بآريستا روتين | نية بسيطة تخرجك من منطقة الراحة

[0:00]عدى 16 يوم من سنة 2026، ما زلنا في مرحلة البداية، فإذا أنت من الناس اللي ما زلتي متمسكة في منطقة الراحة وما أنت جالسة تشتغلي لا على معتقداتك ولا جالسة تسوي رياضة ولا جالسة تتعلمي ولا جالسة تعملي أي شيء، ما زال قدامك الوقت وتقدري تلحقي النصف الثاني من يناير. ودائماً لا تنسي انه لا يغير الله ما بقوم حتى يغيروا ما بأنفسهم، واقعك ما يتغير، حياتك ما تتغير طالما أنت ما تغيري من نفسك. في بداياتي لما قررت اني اغير نفسي عشان واقعي يتغير كانت الفكرة جدا صعبة، وغالباً الخروج من منطقة الراحة يكون جدا صعب خصوصاً إذا هذا الخروج ما كان بوظيفة أو عمل. أنك أنت تقرري أنك تطلعي من منطقة الراحة وتقومي ترتبي دولابك أو تقومي تنظفي المطبخ، ترى هذا خيار جداً سيء ما هو أفضل خيار في الدنيا. خصوصاً أنك جالسة على السوشيال ميديا وقاعدة تشوفي هذه بتسافر وهذه بتروح وهذه بتجي وأنت عندك حل واحد أن بيئتك جداً فوضوية ومتضايقة منها ولازم ترتبيها. لكن لما تبدأي تفعلي نية التأني والعفوية وتبدأي تخففي من سرعتك وتحاولي قد ما تقدري أنك تخصصي محتويات السوشيال ميديا وتخليها كمعلومات بالنسبة لكي، يعني بدل ما أشوف هذه فين سافرت وفين راحت وأيش لبست أنا أحاول أني أركز على الجزء المهم من هذه الرحلة. فلانة لما سافرت إلى أي دولة راحت وليش اختارت هذه الدولة وهذه الدولة أيش فيها؟ وتحاولي أنك تأخذي معلومات عن الدول. عشان مستقبلاً بإذن الله إذا قررتي أنك تسافري واتوفرت معك مادة يكون عندك كمية معلومات كافية عن الدول، لازم تكوني بهذه العقلية وإذا بدأت تدخلي بهذه العقلية راح تتصلح 90% من مشاعرك ومن أفكارك ومن نفسيتك. لما تجلسي على السوشيال ميديا وتتشوفي هذه سافرت وتزعلي هذا من الحسد وهذا الشيء ما ينفع، وبالعكس هذا الشيء ينعكس على حياتك بشكل جداً سلبي. ولما تشوفي الناس كيف غنية وبتدخل فلوس وبتشتري الغالي وتزعلي وتحزني ترى كمان هذا الشيء ما هو كويس. فحاولي دائماً وأبداً أنك تفعلي نية التأني، نية التأني بأيش حتفيدك؟ أنك ما تلفلفي بالسوشيال ميديا وتشوفي 60 70 ألف محتوى ما لها علاقة ببعض وما تفيدك وما تمس أي شغف عندك. أنا اليوم جالسة على السوشيال ميديا باختياري ولما جيت أطالع في محتويات السوشيال ميديا أنا شفت أشياء تناسبني، إذا أنا من الناس اللي أحب السفر اتعرفت على كمية كبيرة من الدول وأخذت عنها معلومات. وإذا أنا من الناس اللي أحب النادي، شفت أفضل النوادي في العالم والناس اللي بتروح النادي أيش بتحضر لها أكل وأيش نوع هذا الأكل وأيش يفيد. الموضوع هنا تماماً يخرج من مراقبة حياة الناس إلى اكتساب معلومات عن الحياة وعن الواقع. والطريقة هذه من أفضل الطرق عشان تنظفي عقلك وعشان تشتغلي على معتقداتك أن أنا ماني جالسة أطالع في حياتك أنت وأشوف أيش عندك إمكانيات لا. أنا جالسة أطالع في الإمكانيات الموجودة في العالم أفهمها وأخذ عنها معلومات. لما أكتسبت هذه العقلية صارت تنظيف والترتيب وإني أعيش في حياتي وفي واقعي صار أمر جداً سهل. واليوم إذا يخيروني بين سفر وبين أني أجلس وأرتب غرفتي راح أختار أني أرتب غرفتي وعن قناعة. أختار أني أنجز كامل مهامي وأختار أني أهتم بجسمي ولما تجيني الفرصة المناسبة اللي أنا أكون رايقة وفايقة فيها بإذن الله أسافر. تغيير المعتقدات راح يفيدك مرة كثير، تغييرك لمعتقداتك راح يخليكي تطلعي من فقرة أنك محتاجة لهذا الشيء عشان تغيري نفسيتك لفقرة أنا نفسيتي تحت سيطرتي، أنا مشاعري أنا جالسة أسيطر عليها أنا قاعدة أسيطر على مشاعري. أنا ما أحتاج لسفر وما أحتاج لأحد يجي يشردني وما أحتاج لأحد يجي ينقذني من حياتي راح تطلعي تماماً من هذه العقلية، بس أول شيء لازم تشتغلي على معتقداتك. العمل على المعتقدات يبدأ من لما تقوم ترتبي غرفتك أو لما تقوم تنظفي المطبخ أو تطبخي أو أنت وبتربي أطفالك لما تحاولي تكتسبي مشاعر الرضا وتكوني إنسانة عفوية. لا تفكري بالماضي ولا تفكري بشريكك ولا تفكري بأهل ولا تفكري بصحباتك ولا تفكري بأي شيء، لما أنت تعيشي اللحظة طالما أنا في يدي كوب قهوة وجالسة بأرتب أو أنا بيدي كوب قهوة وجالسة أنظف أنا أستمتع بهذه اللحظة. أسمي بالله أشرب قهوتي وأطالع في الواقع اللي أنا عايشة فيه أيش يحتاج، إذا يحتاج ترتيب رتبت بكل هدوء. تقدري تهوي الغرفة تشغلي بخور تشغلي قرآن تشغلي بودكاست تحبي تسمعيه وتستشعري هذه النعمة أن الحمد لله أنا سليمة وفي صحة وفي أمن وأمان ورايقة وما عندي أي نوع من أنواع الأمراض النفسية ولا عندي أي نوع من أنواع الأمراض الجسدية أنا جالسة أرتب وهذه نعمة من النعم. لما تصيري بهذه العقلية راح تصيري إنسانة جداً ممتنة، وأتفه الأشياء في حياتك راح تشوفيها جداً مهمة تعطيها أهمية مرة كبيرة. تحسينك لسلوكياتك راح يساهم في تحسين تفكيرك. تحسينك لمعتقداتك راح يساهم في تحسين واقعك. راح تبدأ بفعلاً تشوفي قد أيش حياتك وردية وقد أيش فيها إمكانيات. فإذا أنت من الناس اللي للان ما بدأتي أبغاكي تنوي نية التأني وتخففي من العجلة وأبغاكي تخصصي محتويات السوشيال ميديا لمحتوى يناسبك وأبغاكي تبدأي وما تضيعي النصف الثاني من شهر يناير حاولي تقفلي آخر 14 يوم بإنجازات حلوة. الناس اللي بدأت أكتبوا لي إنجازاتكم في أول 15 يوم من السنة. اكتبوها في التعليقات وراح أرد عليكم. والناس اللي ما بدأت أكتبوا لي أيش الشيء اللي خلاكم ما تبدأوا. وأشوفكم على خير.