[0:01]يا يا بحر انا تعبان اوي يا بحر تعبان تعبان. قلبي مكسور ومش طايع حبسته في صدري كبد مفطور. ولا ولا اخرس يالا مين؟ مين اللي هنا؟ انا البحر يا غبي. البحر البحر انت سامعني يا بحر؟ سامعني؟ ايوه ما تزعقش يا متخلف سامك ناي عايز ايه؟ ايه اللي عايز ايه؟ ما انت عارف يا بحر جاي ارمي همي عليك. جاي ترمي همك ولا جاي ترمي كيس الزبالة اللي في ايدك. مشوار اتنين في واحد كده يا بحر الله. ولما كله يشكي همه للبحر البحر هيشكي همه لمين؟ هو البحر عنده هموم؟ كتير كتير بس محدش بيسمع يا ربيع. انا رحت فين يا بحر؟ الله انا اسمعك يا اخي يلا قولي فضفضلي. الناس بقت وحشة قوي معايا صيد جائر تلوث مياه البحر ارتفاع منسوب مياه البحر ارتفاع ضغط البحر من كلامك انت لوحدك بس كل يوم. حبيبي تسلم غير طبعا الأكياس البلاستيك والأزايز وطافي السجاير اللي بتتحدف عليا.
[1:24]يا صعب قوي يا بحر صعب قوي. ايه المهم كنت عايز أكلمك في موضوع أولاد أختي. ربيع انت سامعني أصل ممكن تشيل الهيدفونز اللي في ودنك دي. سوري كان معايا فويس نوت بس. امشي يا ربيع امشي. لا لا والله يا بحر ما يصحش انا سامعك. امشي بس انا عايز أبقى لوحدي دلوقتي امشي. الله طب و مشاكل الاحتباس الحراري هتحلها ازاي يا بحر؟ يا عم بقولك سيبني مالكش دعوة انا عايز اقعد لوحدي. ماشي براحتك يا بحر.
[1:53]السلام عليكم يا بحر ولا ولا ولا عايز اشكي همومي يا عم الله.
[2:05]أعزائي المشاهدين السلام عليكم ورحمة الله وبركاته أهلاً بكم في حلقة جديدة من برنامج الدحيح. في فبراير سنة 2018 نشرت صحيفة the streets time السنغافورية خبر غريب ومريب عن سرقات منظمة وغير قانونية لعدد كبير من السفن البحرية اللي غرقانة من وقت الحرب العالمية الثانية. نواحي السواحل الإندونيسية الخبر بيقول ان هذه المنظمة نجحت إنها تسرق حطام 48 سفينة بحرية وتهرب في المايه الدولية. الغريب يا عزيزي في هذا الخبر أن هذه المنظمة مش بتاخد الحطام وتبيعه مثلاً في مزاد على الدارك ويب أو تتصرف فيه في حاجة شمال. مش بتاخده تسوقه لهواة جمع آثار الحرب العالمية الثانية يعني ولا حتى عايزة توديه لأي متحف يدفع فلوس عشان ياخد الآثار دي عنده. امال بيجمعوها ليه أبو حميد هو إيه؟ هي؟ يا عزيزي انت بقى لك كتير معايا عارف ان رأس المال دائماً له علاقة بالمواضيع. المنظمة اللي بتسرق دي بتبيع هذا الحطام لشركات صناعية صينية تتور على هذا النوع من الحطام عشان بيبقى معمول من نوع فولاذ نادر جداً. ياخدوا الفولاذ اللي موجود في الحطام ده ويستخدموه في صناعة بعض الأجهزة العلمية والطبية الدقيقة. ال هي أبو حميد يعني من قلة الفولاذ في الدنيا؟ ما هو الاستيل ده مرطرط في كل حتة. إيه اللي خلاه نادر؟ ما يروحوا لبتاع الفولاذ ويقولوا له عايزين فولاذ. إلحق يا عزيزي كنت هكدّرك ولكن ده سؤال ذكي. ايه اللي يخليهم ينزلوا المايه في عز السقعة ويدوروا على ركن عند السواحل الإندونيسية عشان ينزلوا المايه يجيبوا حطام سفن عدى عليها اكتر من 80 سنة. وطالما غرقت يبقى كانت خسرانة في الحرب هي رفيتها وحشة. أكيد أنت عارف يا عزيزي إن الحرب العالمية الثانية انتهت بضرب أمريكا لليابان بالقنبلتين النوويتين سنة 1945. ودي تعتبر لحد تصوير الحلقة طبعاً يعني المرة الوحيدة التي تم فيها استخدام سلاح نووي بغرض القتل في حرب. يا أبو حميد دي قصة جديدة أنت أول مرة تحكيها في البرنامج. لا أنا ما حكيتهوش وأنت ما تعرفوش اللي بعد ما أمريكا ضربت اليابان والحرب خلصت بدأت دول تانية هي كمان تطور البرنامج النووي بتاعها. زي الاتحاد السوفيتي وبريطانيا وفرنسا والصين. أكيد مش هيسيبوا أمريكا تلعب بالسيتي ويلعبوا هم بفرق الدرجة الثانية. لازم إحنا كمان نتطور عشان نعادل القوة المهم بعد ما هذه الدول طورت السلاح النووي بتاعها كان لازم عشان يعرفوا الأسلحة دي شغالة ولا لأ ان هم يجربوها. والطرق اللي كانوا بيأكدوا بيها أن القنابل دي شغالة كان تلات طرق هناك ال test ال atmospheric test وال underwater test. اختبارات تحت الأرض، اختبارات جوية واختبارات في عمق المحيط. الاختبارات دي حصلت اكتر من 2050 مرة على مدار 53 سنة من 1945 ل 1998. تخيل يا عزيزي أن بسبب هذا العدد الضخم من التفجيرات النووية فوق 2000 تفجير فنسبة الإشعاع اللي موجود في الغلاف الجوي زادت عن العادي. فبقى من المستحيل تقريباً أن احنا نعمل فولاذ غير مشع بسبب الجو الملوث بالإشعاع ده. والفولاذ الوحيد اللي مش متأثر بهذا الإشعاع هو أي فولاذ اتعمل قبل سنة 1945 ما قبل اسقاط اول قنبلة نووية. فهمت يا عزيزي فهمت؟ ثانية واحدة أبو حميد يعني الفولاذ اللي بيتصنع في الارض ده مشع يعني احنا لو احتكينا باي فولاذ حوالينا هنصاب بالإشعاع. عزيزي لا تقلق نسبة الإشعاع دي مش كبيرة لدرجة انها تأذيك انت مفيش حاجة تحوق فيك. ولكن بسبب أنها موجودة بالفعل فصعب نستخدم الفولاذ ده في تصنيع أجهزة علمية و طبية خصوصاً لو حساسة جداً زي اللي الشركات الصينية دي بتنتجها. خد بالك احنا بنتكلم على أجهزة طبية أجهزة طبية دقيقة لما بيبقى فيها اشعاع كارثة. ده بيكون صدرك وجعك ورايح تكشف عند الدكتور تلاقيه بيدخن. ايه اللي أجهزة طبية يبقى فيها اشعاع؟ للاسف نقدر نقول ان احنا عورنا كوكب الارض في وشه تعويرة صعبة. وعلمنا عليه في أكتر من حوار هنحتاج عشان نحل هذه المشاكل وقت أطول من أعمارنا وأعمار عيالنا. من اكبر المشاكل اللي عملناها للكوكب هو ال global warming او الاحتباس الحراري. ابو حميد أبو حميد أنت هتقعد تكلمني في البيئة وال ريسايكلنج والكلام ده ما ياكلش عيش ده. عايز تديني حاجة اديني حاجة صفة ال اي تي ام. وطاقة بديلة وطاقة الرياح ومتجددة وغير متجددة انا ما اشتريش الكلام ده. انا عايز من اي تي ام. خد بالك يا عزيزي هذا الكلام مش بالضرورة يأثر في حياتك هو ممكن يأثر جداً على فكرة. ولكن لو أنت بتخاف على أولادك وبتخاف على أحفادك فده موضوع في غاية الاهمية. المشكلة يا عزيزي ان احنا ك ك ناس في الدول النامية والفقراء وكده مش مسؤولين عنه. يعني ال contribution بتاعنا في الأزمة العالمية دي مش احنا السبب فيه بس ما زال احنا أكتر ناس هتتأثر بيه. فعشان كده انت لازم تعرف عنه. خليني يا عزيزي أكلمك قليلاً عن الاحتباس الحراري. من بعد بداية الثورة الصناعية حوالي سنة 1750 وكوكب الأرض بيحصل له ارتفاع مستمر في درجات الحرارة. وعلى بال بقى من الناس بدأت تدرك أن فيه مشكلة وكلموا بعض وظبطوا المواعيد ورتبوا المكان اللي هيتقابلوا فيه. كان كوكب الأرض حرفياً سخن وبدأنا نشم ريحة شياط. لدرجة أن 2015 اتفقت الدول في قمة ال COP 21 للتغير المناخي في باريس انهم يحاولوا يحدوا من ارتفاع متوسط درجات حرارة الكوكب. بحيث تكون درجة ونص أو درجتين بس. محتاجين يا شباب نهدي النار على الكوكب وإلا هيشيط. عايز اقولك يا عزيزي ان ده ما حصلش ومتوسط درجات الحرارة في 2023 بالفعل تخطط الدرجتين. عشان كده يا عزيزي هذه السنة في كوب 28 اللي انعقد في دبي وهدفه الاساسي مش إننا نرجع لمتوسط الزيادة القديم اللي هو من واحد ونص لاثنين. ده كان زمان بقى ونترحم على ايامه. احنا دلوقتي في مرحلة ان انت لو ما عملتش حاجة ممكن ما تشوفش الدرجة ونص أو الاتنين دول تاني أبداً. احنا يا عزيزي عايزين ننقذ امكانية اننا ممكن نرجع لهذه الزيادة القديمة في يوم من الأيام ان شاء الله. لو اتلخبطت يا عزيزي أحب أشرحلك احنا من 2015 كنا بنقول إن ما ينفعش يحصل الزيادة دي. دلوقتي الزيادة دي بقت تمام عايزين نحافظ عليها من كتر ما الوضع سيء. وتاني عزيزي انا لا احمل المشاهد العربي او المشاهد اللي موجود في دول نامية هذه المسؤولية. المتسبب في هذه الأزمة هو الدول الكبيرة بس تاني دي مشكلة مش بس هتاثر فيهم ده ممكن ما تاثروش بيها أصلاً. احنا هنبقى اكتر ناس متأثرة عشان كده لازم نكون عارفين ولازم نوعي نفسنا ونوعي هذه الدول. سامع يا دون؟ عزيزي لو ما تعرفش يعني خليني اقول لك ان الانسان هو أكبر خطر حقيقي على هذا الكوكب. أنا يا أبو حميد خطر على الكوكب ده أنا بصحى العصر. ايوه يا عزيزي أكبر خطر على هذا الكوكب هو الانسان أكبر خطر على حياته وعلى حياة الكائنات التانية. النشاط الانساني على الكوكب من ساعة الثورة الصناعية مودينا ناحية كارثة محققة بلا شك هتتسبب في أضرار مفيش رجوع منها. بسبب ما يسمى بانبعاثات الغازات الدفيئة أو ما يعرف طبعاً بال greenhouse gases. الغازات دي ممكن تطلع على الغلاف الجوي بسبب عوامل طبيعية ولكن بشكل أساسي الإنسان هو أكبر مصدر لهذه الغازات. الحاجات اللي زي حرق الفحم والغاز والنفط اللي بنحتاج نحرقهم عشان نولد طاقة للمصانع والعربيات والطيارات. ده غير طبعاً مزارع البقر والجاموس ومعدل إزالة الغابات والاشجار السريع جداً. اللي بيساهموا في إطلاق كميات كبيرة من غاز الميثان وثاني أكسيد الكربون في الجو. انت لما تقطع الشجر انت مش بس بتخلي الشجر ده ما يسحبش ثاني أكسيد الكربون ويحوله لاكسجين. انت كمان بقطعه بتساهم في زيادة الميثان بتساهم في زيادة الكاربون دايكسايد. الغازات دي بتطلع بقى للغلاف الجوي فتحبس الحرارة بتاعت الشمس. تيجي الأشعة الشمسية داخلة الكوكب تخلص شغلها تطلع ايه ده الغازات قافلة فتفضل الاشعة موجودة ويفضل الكوكب سخن. ولما يبقى سخن تبدأ تحصل كوارث بيئية. فعزيز الانسان ارجوك خد بالك جداً من غازاتك. مع الوقت الحرارة دي هتتركز جوه الكوكب وواحدة واحدة تبدأ درجة حرارة الارض تزيد. مستويات انبعاثات الغازات دي ال greenhouse gases بقت تتصاعد بشكل سريع ومخيف جداً. لو بصينا يا عزيزي بصه سريعة اللي حصل خلال فترة ما بعد الثورة الصناعية من 1850 ل 1960 هنلاقي ان انبعاثات الغازات دي حصل فيها زيادة كبيرة. الزيادة دي جت بسبب زيادة التصنيع. احنا بقينا عايزين products عايزين عربيات وعايزين بيوت وعايزين أجهزة وعايزين موبايلات. ثورة صناعية ونمو سكاني وحضارة وشغل. وطبعاً حاجة زي كده هتبان في بلد زي أمريكا ال American Dream 24/7 مفيش حد بينام هناك. ومن وقتها يا عزيزي ما شفناش أي نزول في مستويات انبعاثات هذه الغازات. مفيش دروب الكوكب يا جماعة بيككم مننا. الدروبات الوحيدة اللي شفناها كانت أحداث تاريخية اثرت على الصناعة. فمثلاً يوم ما حصل دروب كان بسبب حاجة كبيرة زي الكساد العظيم. ال great depression اللي حصل في الثلاثينات وفضل مكمل لتقريبا وقت الحرب العالمية الثانية. اما بقى في الخمسينات فبدأت انبعاثات هذه الغازات تزيد مع نمو اقتصادات بقى غير امريكا زي الصين والاتحاد السوفيتي. احنا عايزين ننموا احنا كمان عايزين الناس تبقى عندها ال Russian dream وال Chinese dream هتطلع لي غازات هعمي اهلك في الكوكب. مش انت لوحدك بس اللي من حقك تطلع غازات. وبالفعل هذه الانبعاثات زادت ما قلتش غير مع حدث تاريخي مهم زي تفكك الاتحاد السوفيتي اللي حصل في أول التسعينات. وهنا امريكا قالت يا شباب طلعوا غازات زي ما انتم عايزين بس انا هفضل number 1. انا اكبر مسبب في انبعاثات غاز اكسيد الكربون في العالم. طبعاً يا عزيزي النمور الآسيوية مش واقفة تتفرج عايزة تفتح سبرينت هي كمان وتتصدر الترتيب في الانبعاثات. وده حصل بقيادة الصين اللي ما كانتش بتوقف صناعة. وبالفعل مع الوقت الصين تجاوزت الولايات المتحدة الأمريكية وبقت اكتر دولة مطلقة الانبعاثات على مستوى العالم سنة 2005. في الفترة دي انبعاثات الكربون العالمية زادت تقريباً 90% لو قارناها ب 50 سنة فاتوا. وحوالي 80% من الانبعاثات دي كان بسبب حرق الوقود عشان الصناعة. البيانات الجديدة اللي عندنا كمان مخيفة اكتر. في 2011 مستويات الانبعاثات بتاعت ثاني أكسيد الكربون كانت أكبر 150 مرة من مستوياتها في 1850. multiply 150 فانت في 150 سنة نسبة زيادة الكربون زادت 150 مرة. انبعاثات ثاني أكسيد الكربون العالمية المرتبطة بالطاقة وصلت ل 321 مليون طن سنة 2022. وبعد الكورونا واستئناف النشاط التجاري العالمي انبعاثات الغازات دي زادت بنسبة 6.4% السنة اللي فاتت بس. ووصلت لمستويات قياسية جديدة أعلى من ذروتها قبل الكورونا. يا نهار اسود يا ابو حميد أنا قلقان. العالم كده بيدوس بنزين في اتجاه حافة الهاوية. تشبيه ممتاز. خليني يا عزيزي أعرض عليك مسحة عملتها وكالة ناسا لدرجة حرارة بلاد مختلفة من سنة 1880 ل 2017 عشان تشوف. وزي ما انت شايف كل سنة البلاد دي تسجل أرقام قياسية جديدة في درجات الحرارة. لو فضل الوضع مستمر بالشكل ده درجة حرارة الكوكب هتفضل تزيد بشكل خطير. ال World Resources Simulation Center بيقول إن درجة حرارة الأرض هتزيد أكثر من درجة ونصف قبل سنة 2030. ولو كملنا بعد كده على مستوى الانبعاثات ده اللي هو أصلاً معرض هو كمان للزيادة فدرجة الحرارة هترتفع بمقدار درجتين في دخلت سنة 2040. وتلات درجات كمان في 2060 وأربع درجات في 2080. عزيزي أحفادنا هيعملوا الشاي في الثلاجة. الثلاجة هتطور المايكرويف والمايكرويف هيبقى صحراء ليبيا. احنا يا أبو حميد تلات أربع درجات حرارة خلال 40 60 سنة مش حوار يعني ما تكبرش المواضيع يا أبو حميد. انا عارف ان ده أكل عيشك ان انت تكبر المواضيع وتعمل حلقات والمشاهدين يشوفوها ويتوتروا وكده. وتيجي في الهيفة وتتصدر. بس يا ابو حميد هنوطي التكييف شوية وننزل الريش. ايه أربع درجات خلاص. خبر حلو يا عزيزي أن انت ما خيبتش الظن فيك. الخبر الوحش إن الظن فيك ما كانش جيد. الموضوع مش هاين خالص زي ما ممكن تكون متخيله. الحر اللي هيزيد ده هنحس بيه قوي في الصيف اللي هتبقى شهوره أطول ودرجة حرارته أعلى بكتير من اللي احنا متعودين عليها. لو درجة حرارة الأرض زادت درجتين فده معناه ان حضرتك مثلاً سنة 2040 ممكن تتعرض لموجات من الحر الشديد اللي هتوصل ل 53 يوم. عزيز انت تبقى well done slow cooking. امسك سمانتك تلاقيها بريسكدة في ايدك كده وقعه منك يحطوا عليك عسل بقى ويرموا عليك بهارات. مش بس كده تقلبات الجو دي ممكن تتسبب في أعاصير في بعض الدول العربية. فينا وهنروح بعيد ليه؟ كلنا فاكرين الإعصار اللي ضرب مصر في أكتوبر سنة 2019. اعصار حمادة. هو اسمه كده عزيزي في الأخبار. اشمعنا في اعصار كاترينا واعصار دانيال؟ على فكرة بيطلع عندنا اعاصير وبنسميهم ابننا مش أقل منهم في حاجة. عاصف مطير مدمر ومؤذي. فربنا يا عزيزي يسترها علينا وما نخاويش حمادة. فاكر بقى يا عزيزي كل التلزيق والحر اللي ما كانش عاجبك ده هتترحم عليه. بتاوع الشتا هيكسبوا اربعة صفر وفيروز هتضرب على أنغامي. وعلى حسب البحث اللي عملوا اتنين من العلماء سنة 2012 فالاحتباس الحراري هيعمل عدد أكبر من الاعاصير المدارية اللي زي ده. اللي ممكن في المستقبل تعمل كوارث فادحة وخسائر كبيرة يا عزيزي. احنا مش بنتكلم ان انت تبقى حرّان شوية احنا بنتكلم هيبقى فيه اعاصير هيبقى فيه جفاف هيبقى فيه ناس بتموت هيبقى فيه مهاجرين نصر اتشرد. تاني يا عزيزي موضوع الاحتباس الحراري موضوع في غاية الأهمية. يبان مشكلة غربية بعيد عننا بس تاني انت هتبقى من أكتر الناس اللي هتتأثر بده. الاعاصير دي ممكن تتسبب في كوارث وخسائر كبيرة جداً في المستقبل. يا أبو حميد يعني الموضوع ده هيأثر عليا في المستقبل؟ عزيزي مستقبل ايه؟ انا عايز أقولك ان في مدن درجة حرارتها عليت زي بغداد مثلاً ممكن توصل عدد ايام موجة الحر الشديدة فيها ل 90 يوم. والرياض ممكن توصل ل 132 يوم تقريبا ثلث السنة. ده وارد يحصل امتى؟ سنة 2040 يعني في خلال أقل من 20 سنة بس. كون انت بقى ربنا كرمك واشتغلت وعرفت انت عايز تعمل ايه في حياتك وتبقى كهل 40 كده وكونت نفسك وعايز تتجوز. هوب تلاقي الجو كله بيغلي. وخليني أزيدك من الشعر بيت بما ان غالبية منطقة الشرق الأوسط وشمال أفريقيا بتعتمد بشكل أساسي على الزراعة. والزراعة دي جزء كبير منها بيعتمد على الأمطار الrain فالمنطقة دي على حسب سيناريوهات ال World Resource Simulation Center فهي معرضة بسبب ارتفاع درجات الحرارة لفترات جفاف ممكن توصل لشهر ونص. ده لو درجة الحرارة عليت بس تلات درجات. اما بقى لو وصلت لأربع درجات فممكن نوصل ل 6 شهور جفاف 6 شهور من غير ما تندع. دي كارثة دي أزمة حقيقية بالنسبة للقطاع الزراعي اللي بيأكلنا. مش بس تأثيره على الزراعة ده كمان هناك تأثير على الثروة الحيوانية. مش بس كده كمان ارتفاع الحرارة طفش كائنات كتير من على وجه الكوكب كائنات كتير انقرضت. كائنات تانية هاجرت من بيئتها ما حدش عارف يتكيف مع درجات الحرارة المرتفعة دي. ده طبعاً كله كوم وذوبان الجليد اللي موجود في القطبين كوم تاني خالص. ال ice caps او ال glaciers اللي موجودة فوق دي مش بس ممكن تدمر البيئة الطبيعية للكائنات اللي عايشة على الجليد زي الدب القطبي مثلاً اللي يصحى الصبح يلاقي بيته ساح. بص عليه كده يا عزيزي حزين وهزيل وغلبان. عامل زي أبطال المسلسلات وهم في السجن. التأثير مش بس هيكون على الكائنات دي تخيل يا عزيزي معايا لما التلج ده يسيح ويتحول إلى water مايه. المايه دي بتخش في المحيطات والبحار. فيقوم حاصل ايه؟ يرتفع مستوى سطح البحر. المدن القريبة من البحر هيبقى منسوبها أقل من منسوب البحر فيبقى عندك الأرض كده والمايه كده. فجأة المايه زادت عشان الجليد ذاب فيقوم المايه طالعة كده اهو وتقوم داخلة كده ونغرق. طب يا أبو حميد ما نعمل مزراب للمدينة بحيث ان هو يصرف ماية البحر. ده يا عزيزي طبعاً اقتراح ممتاز هنحاول نوصله لكوب 120. انت بتقول ايه؟ ايه يا ابو حميد. خليني اقولك ان سطح البحر المتوسط مثلاً متوقع ان مستواه يرتفع 50 سم لما ايه؟ لما الكوكب درجة حرارته تزيد درجة ونص بس. طبعاً واحد يقولي يا أبو حميد وإيه 50 سم يعني. خليني اقولك ان ارتفاع 50 سم ليس قليل ده ممكن يعمل كمية فيضانات رهيبة. حوالي مليون و 800 الف واحد هيتأثروا بالفيضانات دي في دولة زي المغرب. ده غير الضرر اللي ممكن يحصل لمدينة ساحلية زي اسكندرية اللي ممكن توصل قيمته ل 50 مليار دولار. مفيش كبدة الفلاح ومفيش خروب امان. سينما امير سينما مترو تنساهم والمشاريع اللي على البحر دي كلها تقع مننا. لو اجراءات وآليات الحماية من الفيضانات دي فشلت وهرت جداً ده اللي يحصل. ده غير طبعاً ان بعض الأمراض هتزيد زي ايه؟ زي الملاريا اللي انتشارها ممكن يوصل ما بين 20 ل 34 مليون شخص ده لو درجة الحرارة زادت 3 درجات بس. الأعداد دي ممكن تتضاعف لو درجة الحرارة زادت اربع درجات. بعض المختصين زي الدكتور هشام العسكري بيقول ان هو عند المستويات دي من الدرجات الكوكب غالباً هينتهي البشرية as we know it هتنتهي. خليني اقولك ان احنا حقيقة على مشارف كارثة حقيقية هتعصف بينا مجازياً وحرفياً. في عزيزي قاعدة مهمة جداً عند الصنايعية في مصر. هذه القاعدة بتقول طول ما هي ماشية ما تلعبش فيها. عندك مثلاً بعض الثقافات بتؤمن أن القرن بتاع وحيد القرن بيعالج من الأمراض وله قوة سحرية. وللأسف بيتم اصطياد وحيد القرن بشكل مكثف لدرجة ان في سلالة كاملة منه انقرضت سلالة عمرها ما هترجع تاني. باقي السلالات التانية برضه معرضة للانقراض بسبب أعدادها القليلة اللي باقية. عزيزي الإنسان انت ليه بتعمل كده؟ الجدع بيقولك أن هو وحيد القرن يعني عايش لوحده معهوش غير القرن. فانت تصطاده وتموته وتاخد منه كل أملاكه عشان فيه حد حكالك ان في ثقافة معينة تقولك ان القرن ده له قوة سحرية. الموضوع ده يا عزيزي في منتهى الخطورة. معلش يا أبو حميد بس عندي معلومة عايز ازودها في قاموسك ان انا مش صديق وحيد القرن. ولا أكترس بصحته النفسية. ما تولع الكائنات الله مش أنا عايش ومبسوط في حياتي. يا عزيزي أنا عارف ان انت دائماً بتفكر بشكل براجماتي وإيه يعني ما الحيوانات تختفي. افتكِر يا عزيزي معايا حلقة غزو الكائنات. لما بيجي كائن جديد للبيئة او يختفي كائن من البيئة البيئة بتتغير. بتنقلب الكائنات اللي موجودة ممكن تستغل عدم وجود الكائنات اللي كانت بتسيطر عليها وتنتشر وتمحي كائنات مهمة جداً في حاجات زي الزراعة مثلاً. فانقراض بعض الكائنات مؤثر علينا بالفعل مش بس حاجة اخلاقية دي حاجة كمان براجماتية. ان لما بيحصل انقراض بيؤدي الى عدم اتزان بيئي أو ما يعرف بال trophic cascade. مثلاً اصطياد النمور والاسود بأرقام مرعبة في اجزاء من أفريقيا مثلاً أدى لزيادة كبيرة في أعداد قرد النيل الازرق. طب وأنت ايه مشكلتك يا أبو حميد ان لونه ازرق يعني؟ المشكلة يا عزيزي ان ده أدى لزيادة احتكاك هذه الكائنات بالبشر واللي أدى الى ارتفاع معدلات الكائنات الطفيلية المعوية اللي عند البشر والقرود. العبث في السلاسل الغذائية واعداد الكائنات عموماً مش دائماً بيكون بسبب ان احنا بنقتل الكائنات دي بشكل مباشر. لا ده ممكن يكون عن طريق ان احنا بندمر البيئة اللي الكائنات دي عايشة فيها. احنا ممكن ما نبقاش بنقتل حيوان بس ممكن بشكل أو بآخر نكون بنبوظ له بيته. الدب القطبي ده مثلاً بيته هيسيح بسبب أعمالنا. النمور والأسود غاباتهم هتتقطع وتتأخذ عشان تتعمل ورق أو تملى معارض الأثاث في دمياط. تخيل يا عزيزي تصحى من النوم تلاقي بيتك طقم صالون مذهب عايش عليه كائن تاني. ده غير المساحات الفاضية اللي بيتبني و بيتعمل عليها طرق واللي برضه بتقلل من أعداد الشجر اللي بيساعدنا نسحب ثاني أكسيد الكربون من الجو وينتج لنا الاكسجين. فيمكن بالوضع الحالي كل الأضرار اللي الانسان عملها على الكوكب غالباً مفيش رجعة فيها مش هنعرف نرجع. ممكن جداً ما نعرفش نصلح وبنسبة كبيرة هنحتاج مجهود أممي ودولي وجمعي شديد الضخامة والجدية. مش عشان نصلح عشان نحافظ على اللي احنا فيه عشان ننقذ ما يمكن إنقاذه. نخرج بتمثيل مشرف نطلع أحسن توالت. في النهاية يا عزيزي أنا بصراحة خايف ان انت تكون اتشائمت من اللي انا قلته. بالعكس يا أبو حميد دي حلقة شديد التفاؤل انا حسيت باطمنان شديد على المستقبل. عزيزي من واجبي عليك ان انا ما حسسكش ان احنا رايحين في داهية خلاص. وإن الموضوع انتهى يمكن يكون لسه معانا شوية وقت عشان نلحق نعمل أي حاجة. وحتى لو مش هنشيل الضرر اللي عملناه كلياً فجائز نبطأ من الوتيرة المتسارعة اللي ماشيين بيها ناحية الهلاك. يعني مثلاً قمة ال COP 28 اللي اتعملت في الامارات الهدف منها ان الدول تلتزم بخطة مشتركة بينهم. حزمة من الاجراءات عشان نوقف ونفرمل ارتفاع درجات الحرارة. ونقدر نلحق الارتفاع المخيف ده قبل ما يسوء وعلاجه يبقى أصعب بكتير في المستقبل. الإجراءات دي من ضمنها استغلال مصادر الطاقة المتجددة زي الطاقة الشمسية أو الرياح عشان نقلل من حرق الوقود لإنتاج الطاقة. وبالتالي نقدر نقلل من الانبعاثات. والكوكب قالوله يرتاح وغازاته تخف. بالفعل يا عزيزي هناك حلول في بعض الدول بترفع نسب الضرايب على الشركات اللي بتستخدم الوقود. عشان تشجع هذه الشركات ان هم يستخدموا مصادر الطاقة المتجددة. الاجراءات دي في غاية الأهمية واثارها كبير جداً. كلنا شفنا اللي حصل في كذا بلد وقت الكورونا وقت ال lockdown لما الانسان ريح وساب الكوكب يتنفس. ده أدى إلى تراجع كبير جداً في مستويات التلوث في الصين وأوروبا وانخفاض في ال greenhouse gases اللي بتساهم في التغير المناخي. كل ده عشان النشاط الصناعي والتجاري وقف كام اسبوع بس. ولكن عشان برضه ما تستريحش قوي خليني أقول لك ان احنا قدامنا وقت محدود من السنين عشان نلحق الضرر قبل ما يبقى واقع ما نقدرش نتصرف تجاهه. طب وانا يا أبو حميد معلش يعني ايه التصرف المطلوب مني دلوقتي؟ أقفل المصنع بتاعي في الصين أو أوقف النشاط التجاري مع الولايات المتحدة الأمريكية. أكلم الحطابين بتوعي في غابات الأمازون وأقول لهم يبطلوا تقطيع. آخري معاك في الجدعنة ما اكلش محشي. خليني اقولك يا عزيزي ان للاسف انت كفرد قدراتك اقل من كده بكتير. انت لست Jeff Bezos موضوع المحشي مش هيبقى له تأثير كبير قوي في الكوكب. الموضوع بشكل حقيقي متوقف على الدول الصناعية الكبرى. هي دي اللي لازم تتحرك. الحلقة دي يا عزيزي مش غرضها ان هي تلوم المشاهد باي حال من الاحوال غرضها ان المشاهد يعرف انه في خطر. ان خطر ال global warming خطر حقيقي هيتسبب في اذى وتهجير وجوع. ده يا عزيزي مش كلامي ده كلام اهم منظمات بحثية في العالم. هناك اتفاق عالمي على اللي بقوله لك ده. الهدف ان احنا نقدر نوصل صوتنا للدول الصناعية الكبيرة اللي مسؤولة عن اللي احنا فيه. اللي احنا تاني هنبقى اكتر ناس تتاثر بيه. الهدف ان انت تبقى عارف ايه اللي بيحصل حواليك وتتأكد ان احنا مش بعاد عن سيناريوهات تغير المناخ. الموضوع مش خيال علمي زي 2012 ولا interstellar ولا The day after tomorrow. ولا نظرة فلسفية مستقبلية حالمه ان بقى Mother Nature هتغضب علينا. يا عزيزي هي مش لسه هتغضب ال Mother Nature already بنجيب في سيرة ال Mother. لازم نبدأ نفهم ان أثر التغير المناخي بيقرب مننا كلنا كأفراد. ويمكن لما يزيد عدد الناس اللي فاهمين وواعيين بده وتبقى فاهم في الصيف وانت بتشغل التكييف ان مش حياتك بس اللي حر وقبلي. الكوكب كله مع حر وقبلي بنصحى ان يمكن لما الوعي ده يزيد تتغير سياسات العالم تجاه البيئة وتجاه المناخ ويطول عمر الانسان على هذا الكوكب. مش هقولك خبر حلو ولا وحش بس الخبر الحلو ان في حلقات جاية وفي حلقات فاتت ممكن نشوفها واداك مصادر نقدر نطلع عليها ولو احنا على اليوتيوب نقدر نشترك على القناة. اوكي انت عارف يا عزيزي ليه كابوكي بيجي له برد عشان كل ما حد بيجي له بينزل له الريش.
