[0:03]Alhamdulillah Rabbil Alamin, wassalatu wassalamu ala Sayyidil Mursalin Muhammad ibn Abdillahil Amin wa alihi tayyibin wa ashabihi ghurril mayamin mattasalat ain binazar wa azat uzun bi khabar wasallamat tasliman kasiran kasira amma ba'd. Alhamdulillah, kal pehle pare ka khulasa mukammal ho gaya tha aur aaj doosre pare ka khulasa hum InshaAllah shuru kar rahe hain. Doosre pare ki ibtida hoti hai, sa yaqulu sufaha minannasi ma wallahum an qiblatihimullati kanu alaiha. Qul lillahil mashriqu wal maghrib. Doosre pare ki ibtida hoti hai Tahwil-e-Qibla ke hukm se aur uske zikr se. Tahwil-e-Qibla ka kya matlab hota hai? Aapko maloom Tahwil-e-Qibla ka matlab hai Qible ka change ho jaana, Qible ka badal jaana. Aapko maloom hona chahiye ki Kaaba se pehle hamara jo Qibla tha wo Baitul Maqdis tha, Masjid-e-Aqsa.
[1:29]Aur Allah ke Rasool Sallallahu Alaihi Wasallam jab Makkah tul Mukarrama mein the, to namaz padhte waqt is tarah aise direction mein wo khade hote the ki saamne Kaaba bhi pad jaaye aur fir Baitul Maqdis ka rukh bhi usi taraf ho jaaye. Lekin jab aap Sallallahu Alaihi Wasallam ki Hijrat ho jaati hai Madinatul Munawwara, to wahan se dono direction change ho jaate hain. Yaani ya to ab aap namaz padhte waqt Kaaba hi ki taraf rukh kar sakte the ya to namaz padhte waqt Baitul Maqdis ki taraf rukh kar sakte the. To zaahir hai qibla jo tha wo Baitul Maqdis tha. Is wajah se Allah ke Nabi Sallallahu Alaihi Wasallam Madinatul Munawwara Hijrat karne ke takriban Hijrat karne ke baad bhi takriban 16 se 17 mahine tak aap Sallallahu Alaihi Wasallam ne Baitul Maqdis ki taraf rukh karke hi namaz ada ki. Lekin aap Sallallahu Alaihi Wasallam ki khwahish thi ke jis ghar ko Hazrat Ibrahim Alaihissalatu Wasallam ne Hazrat Ismail Alaihissalatu Wasallam ke saath milkar jiski taameer ki hai usko hamara Qibla bana diya jaaye. Lekin chuki ab tak Allah ki taraf se koi hukm nazil nahi hua tha. Koi Wahi aisi nazil nahi hui thi, Revelation jis mein ye hukm ho ki aap Kaaba ki taraf rukh kar le. To aap Sallallahu Alaihi Wasallam Allah ke hukm ke hi tabe the zaahir hai to wo Baitul Maqdis ki hi taraf rukh karke namaz padhte rahe. Yahan tak ki hukm nazil hua fa wajjahaka shatral masjidil haram. Qad nara taqalluba wajhika fissama fala nuwalliyannaka qiblatan tardaha ki hum aapko dekh rahe hain ki aap aasman ki taraf nazar uthakar dekhte hain. Allah ke Nabi Sallallahu Alaihi Wasallam intezar karte the kabhi kabhi aasman ki taraf dekhte the ki shayad Hazrat Jibrail Alaihissalatu Wasallam Wahi lekar aa rahe ho. Toh fawal li wajhaka shatral masjidil haram. Ab aap jis qible ko chahte hain ab hum use hi asal Qibla bana denge.
[3:40]Aur fir ye hukm hua ki ab Masjid-e-Haram ki taraf aap rukh kar le. To 16 se 17 mahine tak Madinatul Munawwara mein Allah ke Nabi Sallallahu Alaihi Wasallam aur Musalman Baitul Maqdis Masjid-e-Aqsa ki taraf rukh karke namaz padhte aaye jo Yahudiyo ka bhi Qibla tha. Ahle Kitab ka bhi wahi Qibla hai.
[4:09]Lekin jab ye Qibla change hua. Direction change karne ka hukm diya gaya. Namaz ki halat mein ye Ayat nazil hui. Namaz ke dauran hi Allah ke Nabi Sallallahu Alaihi Wasallam ne Qibla change kiya aur tamam Musalman ne bhi Rasoolullah Sallallahu Alaihi Wasallam ko follow karte hue direction apna change kar liya. To ab Yahud ho gaye bade pareshan. Ki bhai unhe aise hi un saazish kar rahe the unhe chid thi Musalmano se. Lekin kam az kam Qibla to ek hi tha. Lekin ab Qibla bhi change ho gaya to aur zyada dushmani badh gayi aur mazak udaane lage Allah ke Rasool Sallallahu Alaihi Wasallam ka aur Musalmano ka ki ye bhai kaise Nabi hai. Ye kaise Musalman hain ki ab tak Baitul Maqdis ki taraf rukh karke namaz padhte rahe ab Kaabe ki taraf rukh kar rahe hain. Kabhi idhar kar rahe hain kabhi udhar kar rahe hain. Ye kaise Nabi hai. To Allah Taala ne is Ayat ka nuzul farmaya. Qul lillahil mashriq wal maghrib. Aap keh dijiye ki mashriq aur maghrib, East and West ye sab Allah ke hain. Asal East nahi hai, asal West nahi hai, asal North nahi hai, asal South nahi hai. Kisi direction ko kisi direction par fazilat hasil nahi hai. Koi maksus direction mukaddas nahi hai. Balki tamam directions barabar hai. Asal to Allah ka hukm hai. Allah ka ab tak hukm tha ki Baitul Maqdis ki taraf rukh karke namaz padho to hum namaz usi taraf rukh kar rahe the. Allah ka ab hukm aa gaya ki ab bhai tum Kaabe ki taraf ruju karo, Kaabe ki taraf rukh karo to fir ab hum Allah ki taraf rukh Allah ke hukm ko mante hue Kaabe ki taraf rukh karne lag gaye. Toh asal direction nahi hai. Aap keh dijiye in Yahudiyo se aur jo log ye aitraz kar rahe hain ki Qibla kyu change hua. Aap keh dijiye ki asal Allah ka hukm hai. Hum kisi imarat ko sajda nahi karte. Hum Kaabe ki imarat ko sajda nahi karte. Aur hum Baitul Maqdis ko jab Musalman us taraf rukh karte the to use sajda nahi karte the. Balki Allah ke hukm ko follow karte hue us taraf rukh karte the. Toh behal doosre pare ki ibtida Tahwil-e-Qibla ke hi zikr se hoti hai.
[6:56]Uske baad ek Ayat hai, Kama arsalna fikum. Doosre pare mein Kama arsalna fikum rasulan minkum yatlu alaikum aayatina Wa yuzakkikum wa yu'allimukumul kitaba wal hikmata wa yu'allimukum ma lam takunu ta'lamun. Is Ayat mein Allah ke Rasool Sallallahu Alaihi Wasallam ki Ba'asat ke char bunyadi maqasid bayan kiye gaye ki aapko kyu bheja gaya? Sabse pehla maksad Yatlu alaikum aayatina. Ki Nabi ka kaam ye hai, Nabi ki zimmedari hai ki hamari aayatein padhkar aapko suna de. Hamari aayaton ki tilawat aap par kare. Sabse pehla kaam. Wa yuzakkikum. Aur Nabi ka doosra kaam hai Tazkiya karna. Yaani Insan ke batin ko bhi durust karna. Insan ke dilo ke andar jo gandagiyan hain, hasad hai, bughz hai, adawat hai, shirk baitha hai, un saari cheezo ko Saaf karna, pak karna, tazkiya karna, ek achha banda banana, ek achha Momin banana ye bhi kaam Nabi ka hai.
[8:14]Yaani Nabi sirf message pahunchane nahi aaye. Balki message pahunchane wale bhi hain Nabi, Rasool aur uske ilawa uski taaleem bhi dene wale hain aur tazkiya karne wale bhi hain. Yaani Rasoolullah ki sohbat ke natije mein, unki tarbiyat ke natije mein Sahaba-e-Kiram ki aisi jamaat taiyyar hui ki jo jin ke nufus pak the, jin ke dil pak the. Aur pehla kaam Nabi ka, Rasool ka, hamari aayaton ko Allah ki aayaton ko padhkar tumhe sunaye. Doosra kaam Tazkiya kare. Tazkiya matlab maine bataya pak karna dilo dil ko aur batin ko Insan ke batin ko pak saaf karna gandagiyo se, buraiyo se. Teesra kaam wa yu'allimukumul Kitab. Is Nabi ka kaam hai ki wo Kitab ki taaleem bhi de. Dekhen Kitab ki tilawat karna ye ek alag kaam hai. Fir us tilawat jis Kitab ki tilawat ki gayi hai us Kitab ki taaleem dena. Ki bhai Allah ne is Ayat ko nazil kiya aapko padhkar suna diya gaya is Ayat ko. Lekin is Ayat ka matlab kya hai? Is Allah is mein kya kehna chah raha hai, kya Allah ne hame hukm diya hai? To ye kaam bhi Nabi ka hai. Toh Allah ke Rasool Sallallahu Alaihi Wasallam apne alfaz ke zariye hi samjhayenge ki bhai Quran ki is Ayat ka kya matlab hai? Toh Allah ke Rasool ke alfaz ko hi kya kaha jaata hai? Hadith kaha jaata hai. Lihaza baz aise log bhi hamare hain jo Munkire Hadith hain. Yaani Hadith ka inkar karte hain. Wo kehte hain ki bhai jo Quran hai bas hum usi ko follow karenge, Hadith ko follow nahi karenge. To unki ye tardid hai. Is Ayat mein Allah ne saaf farmaya ki Nabi ka kaam sirf aayaton ko pahunchana nahi hai. Aayaton ki taaleem bhi Nabi ka kaam hai aur jab Allah ke Nabi aayaton ko samjhayenge to apne hi alfaz mein samjhayenge na. Aur jab apne alfaz mein samjhayenge to usi ko Hadith kehte hain. Aur fir us Hadith ko ab hum kaise inkar kar sakte hain? Usko rad nahi kar sakte. Teesri chauthi cheez Hikmat ki taaleem denge, Sunnat ki taaleem denge.
[10:42]Toh ye char bunyadi maqasid hain Allah ke Rasool Sallallahu Alaihi Wasallam ki ba'asat ke. Tilawat karna Allah ki aayaton ki aur uske ilawa Tazkiya karna, uske ilawa Kitab ki taaleem dena aur Hikmat ki taaleem dena. Uske baad Ayat ka zikr hai, Innas Safa wal Marwata min shaa'irillah faman hajjul baita wa'tamara fala junaha alaihi ayyattawwafa bihima. Hua ye ki zamane jahiliyat mein Safa aur Marwa par but rakhe hote the. Toh Allah ke Nabi Sallallahu Alaihi Wasallam ne jab par jab Nubuwwat nazil Nazil hui aur Wahi nazil hona shuru hui aur Musalman ek tadad Islam qubool karne lag gaye log. To fir wo bhi umrah karna chahte the, wo bhi Sa'ee karna chahte the Safa aur Marwa ke darmiyan Sa'ee ki jaati hai. Toh unhe harj mahsus hone laga ki bhai Sa'ee karna chahiye hame ya nahi karna chahiye kyu ki Safa aur Marwa pe to but rakhe hue hain. Achha use hata bhi nahi sakte kyu ki Makkah mein unke paas taqat nahi thi, iktidar nahi tha unke paas. To Allah ne is Ayat ka nuzul kiya, Innas Safa wal Marwata min shaa'irillah. Ki Safa aur Marwa Allah ke shaa'ir mein se hai, Allah ki nishaniyo mein se hai. Lihaza aap umrah karte waqt aur hajj karte waqt Sa'ee zarur kijiye. Uske baad Inna ma harrama alaikumul maita wa dam wa lahmal khinzir. Mushrikin kiya karte the ki apni janib se cheezo ko halal karte, apni janib se cheezo ko haram kar dete. Toh Allah ne iski tardid ki ki halal aur haram karna ye sirf Allah ka kaam hai. Ki kaun si cheez halal hai, kaun si cheez haram hai ye batana sirf Allah ka kaam hai. Allah jis cheez ko halal kahega wo cheez halal hogi aur jis cheez ko haram kahega wo cheez haram hogi. Ye Mushrikin ya kisi bhi Insan ke ikhtiyar mein nahi hai ki apni janib se kisi halal karda cheez ko haram kar de aur kisi haram karda cheez ko halal kar de. To is Ayat ka nuzul hua Inna ma harrama alaikumul maita wa dam wa lahmal khinzir aur is mein char cheezo ko ginwaya Allah ne. Char aisi cheeze jo haram hain. Murdar, maita wa dam, behta hua khoon. Wa lahmal khinzir aur khinzir ka gosht. Wa ma uhilla bihi lighairillah aur har wo janwar jis par Allah ke siva kisi ka naam liya gaya ho. Yaani shar'i aitbaar se use zabh na kiya gaya ho aur ghairullah ke naam par use zabh kiya gaya ho ya fir kuch ghair shar'i tarike se Usko qatl kiya gaya ho to wo maita mein dakhil hai. Uske baad ek bahut hi baligh Ayat aati hai.
[13:58]Wa lakum fil qisasi hayatun ya ulil albabi la'allakum tattaqun. Ki qisas lene mein ae aqalmanddo tumhare liye Zindagi hai taaki tum Muttaqi ban jao. Qisas ka matlab kya hota hai? Dekhiye Shariat ka hukm hai ki ek qatil agar Islami hukumat kayam hai tabhi ye hai. Ye Islami hukumat ka kaam hai, koi aam Insan uthkar nahi kar sakta. Wo kya hai ki ek shakhs ne kisi ka qatl kar diya. Toh ab ye jo qatil hai wo saza ka mustahiq hai. Toh usko saza kya di jaayegi? Shariat ne bataya ki usse qisas liya jaayega yaani use bhi qatl kiya jaayega. Isne Insani jaan ka ehteram nahi kiya aur qatl kiya isne na-haq. Toh fir is shakhs ko bhi ye is ye isi saza ka mustahiq hai ki isko bhi qatl kiya jaayega. Toh ise qisas kehte hain. Fir is mein aur bhi yani mukhtalif pahlu hain ki Maqtool ke gharwalo ko bhi ikhtiyar diya jaata hai ya to qatil ko qatl karwa de ya diyyat le le, paise le le. Us tafsil mein main nahi jane wala. Lekin Allah ne jo is Ayat mein kaha hai ki ae aqalmanddo qisas lene mein yaani qatil ko bhi qatl ki saza dene mein tumhare liye zindagi hai. Ae aqalmanddo. Ab aap andaza lagaye zindagi kaise? Bazahir to lag raha hai ki qatil ko qatl kiya jaa raha hai. Toh wo to mar jaa raha hai zindagi kaise hai? Lekin aap gaur kare ki jab Islami mulk ka ya kisi bhi mulk mein is tarah ka sakht qanoon hoga aur aisi sakht saza hogi ki bhai jo bhi kisi ko qatl na-haq karega usko usko bhi qatl ki saza di jaayegi, usse qisas liya jaayega. Toh aise aisi sakht saza ko dekhkar wo shakhs jo qatl karne ka irada rakh raha hoga Wo baaz aa jaayega. Toh is tarah wo qatl karne se jab ruk jaayega to use bhi saza nahi milegi, usko bhi zindagi mil gayi aur jise wo qatl karna chah raha hoga Toh saza ke dar se use qatl nahi karega to jo marne wala tha uski bhi zindagi bach jaayegi. Toh is tarah Allah Rabbul Alamin ne farmaya ki qisas lene mein tumhare liye zindagi hai ki qatil bhi mahfuz ho jaayega, maqtool bhi mahfuz ho jaayega. Yaani qatil, qatil nahi banega, maqtool, maqtool nahi banega. Toh kya hoga ki pure muashre mein, puri society mein ek amn o aman qayem ho jaayega.
[17:01]Uske baad wasiyat ka hukm hai ki Islam mein jab meeras ke ehkamat nazil nahi hue the, yani tak Ye nahi bataya gaya tha ki kisko virasat mein kitna hissa milna hai usse pehle ye Ayat nazil hui. Kutiba alaikum idha hadara ahadakumul mawtu in taraka khairan Ki tum mein se jab kisi ko maut aaye toh wo jo hai wasiyat kar de apne waldein ke liye aur karibi rishtedaron ke liye. To pehle kya hota tha ki jo marta tha to uske jo uski jo aulad hoti thi aur uske jo bete hote the khas taur par wo saari virasat rakh liya karte the. Toh marne wale ke maa baap ko bhi virasat nahi milti, behno ko bhi virasat nahi milti aur ye saari cheeze thi. Toh hukm ye diya gaya tha ki bhai marne se pehle wasiyat kar diya karo. Waldein ke liye bhi ki waldein ko itna mil jaaye, doosro ko itna mil jaaye, behno ko itna mil jaaye, rishtedaroon ko itna mil jaaye. Toh ye pehle ka hukm tha. Uske baad virasat ka hukm nazil hua baqaida. Toh virasat ki taqseem jo hai wo Shariat ne taiy kar di ki waldein ko itna milna hai, behno ko itna milna hai, maa baap ko zaahir hai itna milna hai aur bhi jo rishtedar hain, us tarah Wo saari taqseem kar di. Toh ab un logo ke liye wasiyat karne ki zarurat hi nahi hai. Yaani jo waris hain unke liye to wasiyat nahi ki jaati hai. Albatta kyu ki wariso ke liye pehle se kya hai ki Allah ne hisse taiy kar diye hain ki kisko kitna milna hai. Toh wariso ke ilawa, wurasa ke ilawa jo log hain rishtedaro mein unke liye wasiyat karne ki ab bhi ijazat hai ki maut se pehle wasiyat kar jaaye ki mere marne ke baad mere mal se Itne paise fula jagah pe de diya jaaye ya fula shakhs ko de diya jaaye jo waris nahi hoga zaahir hai. Lekin wo bhi Shariat ne ye qaid lagai hai ki 1/3 jo bhi mal aap chhod ke jaayenge 1/3 se kam kam hi mein aap wasiyat kar sakte hain, uske andar andar hi kar sakte hain. Aisa nahi hoga ki aap kar denge ki pure mal ko mere aap fula shakhs ko de do jo waris hi nahi hai. Toh ye nahi mana jaayega kyu ki jo warisin hain unka bhi haq hai. 1/3 hisse ke andar andar aap wo kar sakte hain wasiyat. Uske baad roze ki farziyat ka hukm hai. Ya ayyuhalladhina amanu kutiba alaikumus siyamu kama kutiba alalladhina min qablikum la'allakum tattaqun. Ae Iman walo tum par roze farz kiye gaye hain. Theek us tarah jis tarah tumse pehle ki qaumo par farz kiye gaye the. La'allakum tattaqun taaki tum Muttaqi ban jao. Muttaqi ka matlab kya hota hai ki tanhai mein aur logo ke samne har aitbaar se Allah ke tamam ehkamat ko follow karne wala aur Allah ki tamam haram karda cheezo se dur rehne wala shakhs jo hoga wo Muttaqi kehlaayega. Taqwa isi ko kehte hain ki Jalwat aur Khalwat mein Allah ka lihaaz rakha jaaye, uska paas o lihaaz rakha jaaye, uske ehkamat ko follow kiya jaaye aur fir Uski jo manhiyat hai usse bacha jaaye. To taqwa kaise paida hoga roza rakhne se? Zaahir hai hum apne nafs ko dabaate hain, control karte hain. Aapko pyaas lag rahi hoti hai Ramadan mein hame. Hame bhuk lag rahi hoti hai lekin hum intezar karte hain ki bhai jab tak Maghrib nahi hogi tab tak hum nahi khaayenge, tab tak nahi piyenge. Toh aap nafs ko control karne ki practice kar rahe hain aur jab Insan apne nafs ko control kar leta hai toh wo bahut si buraiyo se bach jaata hai, bahut se gunaho se bach jaata hai aur khud ba khud uske andar taqwa ahista ahista aane lagta hai.
[21:26]Uske baad Ramadan ke mahine ka zikr hai, Shahru Ramadhanalladzi unzila fihil Qur'an. Ki Ramadan ka hi wo mahina hai jis mein ye Qur'an-e-Kareem nazil hua. Hudal linnas jo ki tamam Insaniyat ke liye hidayat nama hai. Toh Qur'an ka Ramadan se bahut gehra taalluq hai. Isi mahine mein iska nuzul hua. Lihaza is mahine mein kasrat ke saath jo hai hum logo ko Qur'an ki tilawat aur Qur'an ko padhne aur samjhne aur uspe amal karne ki fikr karni chahiye. Aur Ramadan ki jo itni fazilat aayi hai Ahaadith mein ki Ramadan ek special mahina hai. Toh uski bahut badi wajah yehi hai ki is mahine mein Qur'an nazil hua. Toh Qur'an ke wajah se Ramadan ko itni zyada fazilat hasil hai. Uske ilawa ek bahut aham nuqta main aap main chahunga ki aap hazrat sun le.
[22:31]Dekhen Shahru Ramadhanalladzi unzila fihil Qur'an. Ye jo aayatein chal rahi hain Ayat number 185. Balki 183 se hi Ramadan ka zikr shuru ho jaata hai. Suratul Baqarah Ayat number 183 se Ramadan ka Zikr shuru ho jaata hai aur Ramadan ke ehkamat rehte hain. Fir uske baad Ramadan mein Qur'an ka nuzul ka zikr kiya jaata hai. 185 Ayat number 185 jahan complete hoti hai uske baad fir Ayat number jo 186 hai. Wo kya hai? Us mein Ramadan ka zikr nahi hai. Kya hai? Wa idha sa'alaka ibadi anni fa inni qareeb. Ujibu da'watad da'i idha da'ani falyastajibu li wal yu'minu bi la'allahum yarshudun. Ke mere bande jab aap se mere bare mein puche to aap keh de ki main unse kareeb hoon. Main har pukarne wale ki pukar ka jawab deta hoon. Sabse pehli cheez is Ayat pe gaur kijiye. Ki jab bhi koi pukarne wala mujhe pukarta hai. Ye nahi kaha jab bhi koi deendar mujhe pukarta hai. Ya koi aalim mujhe pukarta hai. Nahi, koi bhi pukarne wala. Bade se bada gunahgar shakhs kyu na ho, Allah ko pukar raha hai. Aur achha da'watan kaha da'watud da'i yaani ek pukar. Ek guna jitna bhi gunahgar banda ho wo Allah ko ek baar bhi pukarta hai to Allah keh rahe hain main tumse kareeb hoon. Allah uska jawab deta hai. Falyastajibu li wal yu'minu bi la'allahum yarshudun. Toh meri baat manta rahe aur Iman Rakhe taaki wo seedhe raste ki taraf jaaye aur fir wo hidayat pa sake. To ye ek aham Ayat hai. Ki jab bhi mere bande aap se mere bare mein puche, aap bata de main apne bando se kareeb hoon. Jab bhi koi pukarne wala ek baar bhi pukarta hai to main uska jawab deta hoon.
[25:02]Toh upar se Ramadan ka zikr chala aa raha hai. Fir Ayat number 186 achanak se ye wa idha sa'alaka ibadi anni wali Ayat aa jaati hai. Fir Ayat number 187 se fir Ramadan ka zikr shuru hota hai aur Roze ka zikr shuru ho jaata hai. Toh shuru mein Ramadan aur Rozo ka zikr. Last mein bhi Ramadan aur Rozo ka zikr. Bas beech mein ek Ayat ye aati hai jiska bazahir Roze se koi taalluq nazar nahi aata. Aur wo yehi hai ki jab mere bande mujhse puche. Toh ulama Tafsirin ne ye nuqta bayan kiya hai ki Ramadan ke ehkamat ka zikr karte karte achanak Ye zikr karna ki jab mere bande mere bare mein sawal kare to aap kahe main unse kareeb hoon aur unki dua ka jawab deta hoon. Ye is baat ki taraf Allah ne ishara kiya ki Roze ki halat mein khususan, Ramadan ke mahine mein khususan dua ka bahut zyada ehteram hona chahiye. Bahut zyada ehteram hona chahiye ki ye wo mahina hai aur is mahine ke ye wo lamhat hain jin mein Allah Rabbul Alamin kasrat se duao ko qubool karte hain. Bahut zyada is baat ki possibility hoti hai ki hamari duayen Allah Rabbul Alamin qubool karega aur Rozedar ki dua to Allah reject nahi karta. Agar hum Iman aur Amale Saliha ke saath aur tamam cheezo ka lihaaz rakhte hue hum roze rakh rahe hain. Toh Allah Rozedar ki duao ko reject nahi karta. Toh ye ek bahut bada nuqta hai. Uske baad ehtekaf ka zikr hai. Wa antum akifuna fil masajid. Ehtekaf Ramadan al Mubarak ke aakhiri ashre mein ehtekaf karna ye Sunnat-e-Muakkada alal kifaya hai. Aisi Masjid mein ehtekaf mard karenge jahan paancho waqt ki namaz ba jamaat hoti hai. Uske baad fir mukhtalif sawalo ka jawab diya gaya hai. Aur uske baad Hajj ka bayan hai is pare mein aur Hajj ke mutalliq tafsilaat hai. Uske baad Murtad ke bare mein bayan kiya gaya. Murtad kaun hai? Murtad us shakhs ko kehte hain jo Musalman tha lekin fir wo Islam se fir gaya. Ya to kisi doosre mazhab ko usne ikhtiyar kar liya ya wo Atheist ban gaya ya wo Islam ko chhodkar kisi bhi raste mein chala gaya pehle Musalman hone ke bawajood. Wo fir gaya. Toh aise shakhs ko Murtad kehte hain. Toh unke Mutalliq Allah ne kaha wa mayyartad minkum an dinihi fa yamut wa huwa kafir. Fa ula'ika habitat a'maluhum fid dunya wal akhirah wa ula'ika ashabun nar hum fiha khalidun. Ki tum mein se jo bhi apne Deen se fir jaayega. Islam se fir jaayega aur fir kufr ki halat mein uski maut ho gayi. Fa ula'ika habitat a'maluhum fid dunya wal akhirah. Toh dunya wa akhirat mein uske tamam aamal zaya ho gaye. Uske ab aamal ka koi aitbar nahi kiya jaayega. Wa ula'ika ashabun nar hum fiha khalidun. Aur yehi wo log hain jo Jahannam wale hain, jo aag wale hain hum fiha khalidun, wahan wo hamesha hamesha rahenge. Toh itni badi saza kyu? Kyu ki wo hidayat pa chuka tha. Seedhe raste ki neemat use mil gayi thi. Lekin usne us neemat ki na qadri ki aur neemat ko tark karke wo gumrahi ki taraf khud se gaya. Toh uske liye zyada sangin saza hai. Behal uske baad fir aur bhi kai saare masail bayan kiye gaye. Paaki na-paaki ke mutalliq. Fir uske baad at talaq marta. Talaq ke chand masail bayan kiye gaye. Uske baad raza'at ka zikr hua. Wal waalidatu yurdina aulaadahunn haulaini kamilain. Ki jo maa hain wo apni aulad ko haulaini kamilain do saal mukammal doodh pilaayengi. Islam ne bachcho ke bhi huqooq ka lihaaz rakha hai ki jo doodh peeta bachcha hai uske bhi huqooq ka khayal rakha hai. Aur maao ko hukm diya gaya hai ki wo mukammal do saal tak bachcho ko doodh pilaye. Achha ye raza'at ka bhi bayan hai yahan pe aapko maloom hona chahiye. Raza'at ka kya masla hai? Jis tarah haqeeqi bhai behen mein nikah karna, shadi karna ye jayez nahi hai, haram hai. Isi tarah razai bhai beheno mein bhi shadi karna jayez nahi hai, nikah karna jayez nahi hai. Masalan do alag alag bachche, ek bachcha hai, ek bachchi hai. Aur dono alag alag maa baap ke hain. Lekin kisi ek aurat ka doodh dono ne piya hai bachpan mein. Toh ab kya hua? Ye do ye bachcha aur ye bachchi aapas mein razai bhai behen ban gaye. Toh ab jab ye bade honge toh aapas mein inka nikah karna jayez nahi hoga. Toh ye raza'at ka masla aur iske aur bhi masail hai. Uske baad iddat ka masla bayan kiya jaata hai. Walladhina yutawaffawna minkum wa yadharuna azwajan yatarabbusna bi anfusihinna arba'ata ashhurin wa ashara. Ki aisi aurat jis jis ko talaq de di jaayegi. Yaani shauhar ne talaq de diya to ab talaq ke baad wo teen haiz tak iddat guzarayegi. Iddat mein kya karna hai ki zeb o zeenat ko ikhtiyar nahi karna hai aur ghar se bahar nahi nikalna hai. Aur fir us iddat guzarne ke baad wo nikal sakti hai aur fir uske baad wo kisi aur se nikah kar sakti hai. Aur aisi aurat jiska shauhar mar gaya hai, wafaat ho gayi hai uski. Wo char mahine 10 din tak iddat guzarayegi. Uske baad hukm hai wa la junaha alaikum fima aradhtum bihi min khutbatin nisa. Ki iddat ke zamane mein jab ek aurat iddat guzar rahi ho, toh ab jo doosra shakhs hai jo nikah karne ka irada kar raha hai usse. Yaani ek shadi shuda aurat thi, use talaq mil gayi ya aisa hua ki uska jo pehla shauhar hai wo mar gaya. Toh ab wo iddat guzar rahi hai. Toh iddat ke dauran kisi doosre mard ko is baat ki ijazat nahi hai ki wo sarahatan nikah ka paigham bhej de. Han ishare kinaye mein to baat keh sakta hai, ishare kinaye mein apne nikah karne ka irada wo zahir kar sakta hai. Lekin sarahatan nikah ka paigham nahi bhej sakta iddat ke dauran. Iddat guzarne ke baad ab wo nikah ka paigham usse bhej sakta hai aur wo aurat kisi aur se bhi nikah kar sakti hai. Uske baad is pare ke akhir mein Hazrat Talut ka zikr hai.
[33:04]Hazrat Talut kaun the? Talut aur Jalut ka zikr hai. Hazrat Talut wo the ki aapko maine bataya tha Bani Israil mein bahut saare Anbiya guzre hain. Toh unhi mein se ek Nabi ke zamane mein Bani Israil ne us Nabi se ye darkhwast ki ki aap jo hain hamare liye ek Badshah muqarrar farmaye.
