المهمة الرسمية - مدخل إلى التطبيقات -الصف العاشر - الاستاذ احمد دومي

[0:01]بسم الله الرحمن الرحيم يعطيكم العافيه وان شاء الله اليوم رح نشرح لكم مهمه التطبيقات الرسميه. نزل لكم الواجب، الواجب كان سهل للامانه بس بدكم تحكوا عن تطبيقين وتقارنوهم ببعض. فالسيناريو اللي عندك بقول لك انك بصفتك مطور تطبيقات اجهزه اجهزه محمول موهوب، تم اختيارك لتمثيل المدرسه في مسابقه كبرى. مهمتك انك انت تراجع تطبيقين مختلفين وتحللهم بشكل موضوعي وموثوق. رح نمشي خطوه بخطوه عشان نعرف كيف احنا نحل كل قسم بالمهمه هاي. شو المطلوب منك اصلا؟ انك انت اول شيء تختار تطبيقين مختلفين، بعدين اه، وكل تطبيق لازم يكون من نوع مختلف. بعدين لكل تطبيق بتحلل الاستخدامات والمميزات والمنصات والفعاليه وراح نحكي فيهم وحده وحده كيف تعملهم. بعدين بدك تدعم كل نقطه بلقطات شاشه موثوقه ومشروحه وتقارن بين التطبيقين واصدر تقييم نهائي للتطبيقين. خلينا نمشي مع المعايير اول باول. اول شيء انت عندك مقدمه بدك تمشي فيها، بدك تكتب مقدمه بناء على السيناريو اللي عندك لا تكتب مقدمه عامه انه انت مطور او انك بدك تطور تطبيق بشكل عام لا. انت بدك تكتب انك انت في شركه وهي الشركه طلبت منك انك تطور تطبيق. فمثلا انت بدك تكتب في اطار مهمه مراجعه التطبيقات، اخترت تحليل تطبيق وبتكتب اسم التطبيق الاول واسم التطبيق الثاني، ليش؟ لانهم بيمثلوا نوعين مختلفين وبتقارن بينهم من حيث المميزات والمنصات والفعاليه، وسااقارن بينهم من حيث المنصات والفعاليه. تمام؟ وبتذكر انه انت مين وظفتك شركه عشان هذا الحكي. طيب بعدها بدنا نروح ونعرف التطبيقين اللي عندنا. اول شيء بدك تختار تطبيق كل تطبيق من ايش؟ من نوع مختلف. فمثلا انت بدك تختار تطبيق اندرويد او اي او اس. تمام؟ فبتتمسك التطبيق الاول اول شيء، مثلا بتقول انك انت بدك تشرح على جوجل ماب. التطبيق الثاني مثلا بدك تشرح على دولينجو. فبتكتب اسم التطبيق ونوع التطبيق وشو الشركه المطوره لهذا التطبيق، ونظام التشغيل الخاص بهذا التطبيق ورابط التطبيق او مصدره. تمام؟ وبتعطي لقطه شاشه لهذا التطبيق. وين؟ بالتطبيقين بتعمل نفس الحكي. استاذ من وين اجيب نوع التطبيق واسم الشركه؟ هذول كلهم بتبحث عنهم. يعني مثلا احنا لو رحنا على جوجل ماب مين اللي طورتهم؟ شركه جوجل، تمام؟ شو نوع التطبيق مثلا؟ تطبيق هاتف محمول، تمام؟ ممكن ايش يكون عندك تطبيق ديسك توب تجيب انت النوع الثاني تطبيق ديسك توب. خلينا ننزل ونشوف الاستخدامات النموذجيه للتطبيقين. اول شيء عشان انت بتقول كمثال توضيحي يعني، بتذكر الاستخدامات اليوميه للتطبيق. شو هي الاستخدامات اليوميه؟ مثلا جوجل ماب انت شو بتستخدمه؟ والله انا بستخدمه عشان اعرف الاتجاهات. تمام؟ فانت مثلا بتقول انه دولينجو بستخدمه عشان اتعلم اللغات وهكذا. فبتتمسك التطبيق الاول، اسم التطبيق بتكتبه، بعدين بتذكر الاستخدامات تعيته، الاستخدامات النموذجيه للتطبيق. وعرفنا بين الاستخدامات النموذجيه وغير النموذجيه، تمام؟ الاستخدامات النموذجيه يعني وظائف داخل التطبيق، ولكن غير النموذجيه شو بتكون؟ عباره عن وظائف او عفوا اشياء زي سهوله الاستخدام او المنظر يكون جذاب. فبتذكر خمس استخدامات شائعه للتطبيق في الحياه اليوميه. طبعا هذا الحكي راح تكرره مع التطبيقين، بعدين مين المستخدم المستهدف لهذا التطبيق؟ بتحدد الفئه العمريه والاهتمامات والاحتياجات للمستخدم النموذجي. بعدين انت باي موقف ممكن تستخدم هذا التطبيق؟ يعني مثلا بجوجل ماب انت بدك تروح على مكان معين، فبدك توصف السياق والبيئه مثل انك بدك تروح على المنزل بدك تروح على العمل او دولينجو عشان انت مثلا ايش؟ بتتعلم لغه معينه.

[3:32]شو المشكله اللي بيساعدك التطبيق انك تحلها؟ بتوضح انت كيف التطبيق تاعك بلبي الحاجه للمستخدم. مثلا حاجه المستخدم في جوجل ماب انه يوصل لمكان معين، فبيحل له هاي المشكله. طيب لو قلنا انه عندنا دولينجو مثلا، ليش؟ بدي اتعلم لغه جديده وهكذا. التطبيق الثاني بتكرر نفس الخطوات، بتروح تشوف شو الاستخدامات النموذجيه، بتذكر المستخدم المستخدم وبتذكر اي المواقف انت ممكن تستخدم فيها التطبيق هذا بالعاده. وشو المشكله اللي بيساعدك في حلها هذا التطبيق. خلينا ننزل لتحت ونشوف المميزات الرئيسيه لكل تطبيق. هي بتلبي معايير البي 1 والام 1. اول شيء لكل تطبيق على الاقل بدك تذكر اربع ميزات رئيسيه. كل ميزه بدك تذكر اسمها ووصفها وكيف بتشتغل وشو فائدتها وهسه رح نشوفها بالجدول. وترفق لقطه شاشه لكل ميزه من داخل التطبيق. فخلينا نشوف هذا المثال، مثلا انا عندي ب خلينا نقول جوجل ماب، انه بيعطيني اشعارات. وصف الميزه ارسال تنبيهات فوريه للمستخدم. كيف بتشتغل في التطبيق؟ بيستخدم التطبيق خدمه الاشعارات في الجهاز لارسال رسائل تلقائيه. شو فائدتها للمستخدم؟ والله بتخلي المستخدم على اطلاع بالتحديثات اللازمه، وبتحط لقطه شاشه للنوكيشن وصلتك من هذا التطبيق او اشعار وصلك من هذا التطبيق.

[4:55]طيب بعدين بدك تكتب لماذا تعد هذه المميزات رئيسيه وكيف تدعم غرض التطبيق الاول؟ شو يعني؟ يعني مش انت حكيت عن اربع ميزات؟ طيب الاربع ميزات ليش انت اخترت هذول الاربع ميزات؟ فبدك تشرح ليش هاي المميزات بالذات انت اخترتها وكيف هاي المميزات بتخدم الغرض الاساسي للتطبيق؟ فمثلا تطبيق جوجل ماب انت بتقول انه النوتفكيشن بتخليني اعرف انه انا وصلت للمكان، صح ولا لا؟ ولا تكتفي انك بس انت تكتب هيك المميزات تاعتك، لا، اشرح كل ميزه شرح كامل. بعدها بتروح على التطبيق الثاني ونفس الشيء بتشرح عليه اربع ميزات رئيسيه بهذا التطبيق. خلينا ننزل للاي بي 1 والاي ام 1. بدنا نحكي عن الانظمه الاساسيه للاجهزه المحموله والتكامل مع مكونات الجهاز. حكينا وشرحنا لكم في الحصص عن التكامل مع مكونات الجهاز زي الكاميرا، زي الجي بي اس الى اخره. كل تطبيق بدك تعمل له جدول المنصات تعيته، تمام؟ وهسه رح نشوفه بالجدول تاعنا كيف رح نشتغل على المنصات والتكامل مع الاجهزه. فخلينا نشوف نشوف اول شيء عنصر المنصه او التكامل. مثلا انت بتحكي عن التطبيق الاول طبعا، التطبيق الاول بيشتغل على اندرويد مثلا او على اي او اس او على الديسك توب. هل هو متوفر انه بيشتغل على اندرويد؟ اه متوفر. طيب شو الملاحظات اللي عندك؟ والله انه بيشتغل على اندرويد 8 فما فوق، بيشتغل على اندرويد 8 واللي فوقه. مثلا نظام التشغيل المدعوم، شو نظام التشغيل اللي بيدعمه هذا التطبيق؟ مثلا بيشتغل على اندرويد، بيشتغل على اي او اس، بيعمل على اجهزه لوحيه، بيحتاج اتصال بالانترنت، الموقع الجغرافي هل بيستخدم الموقع الجغرافي؟ هل بيستخدم الكاميرا؟ هل بيستخدم الميكروفون؟ هل بيستخدم الاشعارات؟ وهكذا. طيب بعدين بدك تذكر كيف بتاثر هذه المنصات او المكونات على تجربه المستخدم. كيف يعني؟ يعني بتقول مثلا ان الجي بي اس، ماشي؟ او عفوا، بدك تكتب تحليل بيشرح كيف بياثر استخدام الجي بي اس. او الكاميرا او الاشعارات على طريقه استخدام التطبيق وتجربه المستخدم. كيف يعني؟ يعني انت الجي بي اس كيف قاعد بيساعد هذا التطبيق؟ الكاميرا، الاشعارات، كيف قاعده بتساعد هذا التطبيق؟ كمثال بما ان التطبيق بيستخدم الاشعارات فانه بيخلي المستخدم يبقى متصل باستمرار حتى لو ما كان فاتح التطبيق، وبتكتب شرح وتحليل كامل في هاي الخانه. ولا تاخذ كوبي بيست ابدا، لا تستخدم هاي الجداول زي ما هي كوبي بيست انت اكتب بايدك جداول. او اذا استاذك ما بيحب الجداول بنفس الطريقه اللي انا عاملها ولكن انت بتحولها لفقره. التطبيق الثاني نفس الشيء بدك تعمل ايش؟ عليه نفس الخطوات، تطبيق وين مدعوم؟ بيشتغل على اي او اس ولا لا؟ بيشتغل على اجهزه لوحيه ولا لا؟ هل بيحتاج اتصال بالانترنت؟ هل بيعتمد على حساب مستخدم؟ هل بيتكامل مع خدمات خارجيه؟ كيف يعني بيتكامل مع خدمات خارجيه؟ يعني مثلا تطبيق دولينجو هل بيتكامل مع الكاميرا؟ هل بيتكامل مع خدمات سحابيه زي ما شرحنا لكم في الحصه انه بيروح بيطلب اي بي اي؟ طيب بعدين برضه نفس الشيء بدك تذكر كيف هاي المنصات او المكونات بتاثر على تجربه المستخدم لكل تطبيق بدك نفس الحكي تعيده. طبعا مش نفس الحكي تكرره لا، انت بدك تحكي نفس الحكي بس عن التطبيق الثاني. نيجي على النقطه السادسه وهي فعاليه التطبيق في تنفيذ غرضه المعلن. كيف يعني؟ كل تطبيق له غرض اساسي، فانت شو بدك تعمل؟ بدك تناقش هذا التطبيق او هذا الغرض بشكل موضوعي وبدك تحكي عن مدى نجاح هذا مدى نجاح التطبيق في تحقيق هذا الغرض. تمام؟ وانت بدك تحكم على هذا التطبيق، فمن خلال المميزات اللي عندك بدك تربط الحكم تاعك بالمميزات الفعليه وتجربه الاستخدام. كيف يعني؟ هسا بنشوف، اول شيء مثلا التطبيق فعال لانه واجهته بتتيح للمستخدم اتمام للمهام الاساسيه في اقل من ثلاث نقرات مما يعكس نجاحه في تحقيق غرضه. طيب ممتاز، هاي كمثال. طيب فانت بدك تمسك التطبيق الاول وتشوف الغرض الاساسي من التطبيق، شو الهدف الرئيسي اللي احنا عملنا التطبيق عشانه؟ يعني مثلا جوجل ماب ليش عملنا جوجل ماب؟ عشان نعرف الاتجاهات. مدى نجاح التطبيق في تحقيق غرضه، هل التطبيق بادي وظيفته بشكل جيد؟ وبدك تحط ادله، يعني كيف ادله؟ كيف احكي ادله عن جوجل ماب مثلا وعن دولينجو او عن اي تطبيق انت اخترته؟ بتفوت على التطبيق بتستخدمه اذا لقيت استخدامه سهل، بتحط هاي السكرينات عندك في المهمه. بعدين نقاط القوه الرئيسيه، شو اهم نقاط القوه بالتقارير او عفوا بالتطبيق تاعك؟ ونقاط الضعف او القصور، يعني نقاط انت بتحب تحسنها او لو كانت موجوده بيكون احسن. يعني مثلا جوجل ماب لو بيشتغل او بيتكامل مع الكاميرا خلينا نقول بيكون ممتاز. امثله واقعيه بتروح بتجيب سكرينات بتدعم رايك والاشياء اللي انت حكيتها بسكرينات من عندك. ونفس الشيء للتطبيق الثاني طبعا. نبدا بال نقطه السابعه وهي الشرح التحليلي ونربط المميزات بالاستخدام والمنصات. بالقسم الخاص بالميرت انت هون لازم تحكي عن اه او عشان توصل لمستوى الميرت ما بتكتفي بعمليه التعداد والتحديد. ولكن لازم تشرح عن جهد التطبيق كيف بيشتغل وتحلل كيف وليش. فمثلا انت بدك تروح تحلل للتطبيق الاول، كيف بدك تحلل للتطبيق الاول؟ بتربط المميزات باستخدام التطبيق، اشرح كيف كل ميزه بتخدم الاستخدامات اللي حددتها انت سابقا.

[10:46]بعدين بدك تربط المنصه بطبيعه الاستخدام، يعني ليش هذا التطبيق بيشتغل على انظمه معينه؟ مثلا انت لو اخترت تطبيق بيشتغل بس على نظام اي او اس كيف بدك تحدد هذا الشيء او ليش بيشتغل على انظمه معينه؟ طيب بعض المميزات مناسبه لهذا التطبيق تحديدا، يعني في ميزات معينه في هذا التطبيق مش موجوده في تطبيقات ثانيه. فبدك تقارن هاي المميزات ماشي بتقول مثلا انت عندك جوجل ماب، خلينا نجيب مثلا مثال ثاني على جوجل ماب، ايش في مثال ثاني على جوجل ماب؟ مش خاطر في بالي والله. المهم مثال ثاني على جوجل ماب انت بدك تروح من خلاله، مثلا في ميزات مش موجوده في تطبيق جوجل ماب. كيف بتاثر خصائص الجهاز المحمول على اداء التطبيق؟ يعني كيف التطبيق قاعد بيستفيد من الجي بي اس والكاميرا والاشعارات في عمليه تحقيق غرضه اللي هي شو؟ انك انت بدك توصل لوجهتك. نفس الشيء للتطبيق الثاني بتحلله. نيجي لهون لعمليه الاي بي 1 والاي بي 2 والاي ام 1. شو يعني يا استاذ؟ هذول الثلاث مع بعض بدنا نشبكهم ونقارن بين التطبيقين.

[12:12]تمام؟ استاذ هل اكرر نفس الحكي اللي فوق؟ لا، بتذكر النقاط الرئيسيه هون فقط. تمام؟ طيب بعدين بدك تعطي استنتاج موجز للمقارنه، يعني لاحظت ان التطبيق الاول بيعمل كذا، التطبيق الثاني ما بيعمل هذا الحكي. او فقره معينه بتكتبها بتقارن بين التطبيقين استنادا لوين؟ لجدول المقارنه هذا. طيب خلينا نشوف مثلا سهوله الاستخدام كمثال، واجهه بسيطه بتناسب المبتدئين وتتيح الوصول السريع. التطبيق الثاني واجهه متقدمه تناسب المستخدم ذو الخبره وتوفر خيارات اكثر. اللهم صل على سيدنا محمد، نيجي على التقييم النهائي للتطبيقين. التقييم النهائي انت هون ما بدك تحكي بشكل عام ولا بدك توصف، خذها كمان انت ما بدك تشرح التطبيق. كل طلاب الدي بيقعوا بهي المشكله انه انت بدك ترجع ايش؟ تشرح لا. انت هون بدك تحكم وتقيم وتقارن، ركز على هذول الثلاث كلمات. فبدك تمسك مثلا خلينا نشوف كمثال، التطبيق الاول اكثر فعاليه لانه بيحقق غرضه بواجهه ابسط وتكامل افضل مع مكونات الجهاز مما يجعل تجربه المستخدم اكثر سلاسه. هاي انا فقره بسيطه او جملتين بسيطين كتبتهم انا. ولكن انت رح تحكي بشكل اوسع. فبدك تيجي للاوجه المقارنه اللي عندنا، هسا بذكر لكم اياهم، اول شيء بتمسك التطبيق الاول والتطبيق الثاني وبتعمل جدول. وجه المقارنه تقييم المميزات. فمثلا التطبيق الاول مميزات التطبيق الاول متنوعه وتغطي الاحتياجات الاساسيه للمستخدم بشكل جيد. طيب التطبيق الثاني مميزات التطبيق الثاني اكثر تخصص ولكنها تحتاج خبره اكبر من المستخدم. طيب لو اجينا على التقييم الثاني، تقييم المميزات الرئيسيه. هون انت بتقيم وبتعطي حكم، بتكمل عمليه التقييم كامله. تمام؟ وبتقيم ملائمه المنصات المحموله ومقارنه الكفاءه بين التطبيقين. واي تطبيقين يخدم غرضه بشكل افضل.

[14:06]طيب نيجي لهون، هون انت بدك تعمل شيء اسمه دليل اثبات المهمه، يعني كل شيء في التطبيق بتعطي لقطه شاشه، تمام؟ وبتحكي عنه، فبتقول مثلا هي الصفحه الرئيسيه للتطبيق، ليش اخترت هي اللقطه؟ لانها بتوضح الواجهه الرئيسيه. شو العنصر اللي بتوضح هاي اللقطه؟ والله بتوضح ميزه البحث السريع في اعلى الشاشه، تمام؟ وبتحط صوره. وهكذا حسب انت شو بتحب تختار صور، ونفس الشيء برضه للتطبيق الثاني. هون انت بس تخلص مهمتك ان شاء الله، راجع المهمه تاعيتك على الجدول هذا. كيف يعني بدي اراجعها؟ بتشوف الاي بي 1، الاي بي 1 عن شو بيحكي؟ تحديد المميزات الرئيسيه للتطبيق، حددت المميزات؟ اه. الاي بي 2 عن شو بيحكي؟ تحديد الاستخدامات والانظمه الاساسيه للاجهزه المحموله. طيب الام عن شو بيحكي؟ شرح المميزات والاستخدامات والانظمه الاساسيه. الدي بيحكي عن تقييم المميزات والانظمه الاساسيه للاجهزه المحموله. فانت كل واحد بتتاكد هل انت عملته ولا لا؟ وبرضه هون في عندك تشيك ليست اخيره، بترجع انت انك اخترت تطبيقين، كل قسم مكتمل بتفاصيل كافيه وليس مجرد كلمات قليله، لقطات شاشه موجوده ومشروعه في كل قسم ذي صله، القسم السابع بيحتوي على تفسير مش مجرد تعداد، بالدي والام، لا تحكي حكي. لا تضلك تقول بتشرح بالتطبيق، لا، انت هون بدك توصف التطبيق او عفوا تحلل التطبيق وايش؟ وتقيم التطبيق وتنتقده. انتقد التطبيق عادي. ويعطيكم الف عافيه وان شاء الله كلكم بتجيبوا العلامه الكامله يا رب.