ليه بنحس إننا مرينا بالموقف ده قبل كده؟ 🤷🏻‍♂️

[0:00]السلام عليكم ورحمه الله وبركاته صاحبنا نعناع كان معزوم على الغدا عند شمشمون. وده نظرا للموده والعلاقه الطيبه اللي بينهم ونعناع وصل فعلا في ميعاده تمام التمام لانه شخص منضبط جدا. وكمان لانه جعان، الاثنين قعدوا على سفره كبيره فيها ما لذ وطاب من الاصناف. واثناء ما نعناع وشمشمون وباقي افراد الاسره الشمشونيه كانوا بيتبادلوا اطراف الحديث، بص نعناع على طرابيزه السفره نظره غريبه. وفجاه حس بشعور غريب اشبه برعشه او انتفاضه، ولما شمشمون ساله وقال له مالك يا ابني في ايه؟ رد عليه وقال له انا حاسس اني مريت بالموقف ده قبل كده، حاسس ان اللحظه دي متكرره. وفي الواقع مش نعناع بس هو اللي مر بالموضوع ده، معظم الناس ويمكن عدد كبير من اللي بيشوفوا الحلقه دي دلوقتي. هم كمان مروا بنفس التجربه واللي معروفه علميا باسم الدي جافو. لكن يا ترى ايه هي الدي جافو وليه بنمر بيها اصلا؟ وهل المرور بالظاهره دي شيء مضر؟ ومؤشر فعلا للاصابه ببعض الامراض الدماغيه زي ما هو متداول ولا لا؟ اهلا بكم انا عمرو عابدين والحلقه دي من اسئله نص الليل هنجاوب على سؤال ليه بنحس اننا مرينا بالموقف ده قبل كده؟ وقبل ما نبدا لو لسه جديد في القناه ما تنساش تعمل سبسكرايب وتفعل الجرس علشان توصلك فيديوهاتنا اول باول. الدي جافو هي كلمه فرنسيه معناها شوهد من قبل. وفي الواقع اسمها في حد ذاته هو اكتر حاجه تدينا انطباع عن الظاهره وتفاصيلها. ظاهره الدي جافو بيتم اطلاقها على المواقف اللي بيمر بيها بعض الاشخاص وبيحسوا فيها انهم مروا بالموقف ده قبل كده. واللي بيمروا بيها فعليا مش بعض الاشخاص وبس هم في الحقيقه كتير جدا. الدي جافو بيمر بيها اكتر من ثلثين البشر، يعني لو البشر عددهم حوالي 7 مليار انسان. فلك ان تتخيل ان حوالي 4.6 مليار انسان مروا بالتجربه دي ولو مره واحده في حياتهم. وشافوا بعض المواقف والاحداث حسوا فيها ان الزمن بيعيد نفسه وانهم مروا بالموقف ده قبل كده. وطبقا للاحصائيات فظاهره الدي جافو مش بتحصل غير للاشخاص اللي عمرهم اكبر من 8 سنوات. يعني اي شخص عمره اقل من السن ده غالبا ما مرش بالتجربه لحد دلوقتي. ولكن بمجرد ما بيتخطى السن ده ويبدا يقرب من مرحله العشرينيات هيلاحظ ان الظاهره بدات تزيد معاه تدريجيا. ومع وصوله لمرحله عمريه كبيره زي مثلا سن ال70 او ال80 هيكتشف ان الظاهره بتقل معاه تدريجيا. وكانها بترجع مره ثانيه لحالتها اللي كانت عليها وقت الطفوله وده اللي خلى بعض الباحثين يربط ما بينها وما بين النمو الدماغي الخاص بالانسان. وده لان الانسان لما بيكون في مرحله الطفوله بيكون النمو الدماغي قليل نسبيا ومع التقدم في السن والمرور بفتره الشباب. بتبدا النمو الدماغي يزيد اكثر واكثر لكن طبعا مش بيزيد الى ما لا نهايه وعند سن معين. بيبدا النمو الدماغي ياخذ منحنى ابطا ويرجع يقل، بس بقى بعيدا عن كل الكلام اللي فوق ده ليه اصلا؟ بنمر بالدي جافو. من اوائل التفسيرات اللي تم وضعها لفهم ظاهره الدي جافو ان الظاهره دي مرتبطه ارتباط كلي بحالات الصرع اللي بتصيب الانسان. وان الاشخاص اللي عندهم نوبات صرع هم اكثر الناس عرضه للاحساس بظاهره الدي جافو. ده غير كمان ان في انواع معينه من الادويه بتساهم في حدوث الظاهره بشكل كبير. وكمان الاشخاص اللي عندهم حالات دائمه من القلق والتوتر كل دول معرضين للمرور بالظاهره. هلاقي بقى واحد راح طالع من وسط اللي قاعدين وقال لي طب انا ولا عندي نوبات صرع ولا بتعاطى ادويه ومش بمر بحالات قلق ولا توتر ومع كل ده الظاهره بتجي لي وكتير كمان. اجابتي عليه هتكون انت مش لوحدك، دايما بنسمع من اشخاص من اهلنا او اصحابنا جمله يا جماعه انا حاسس اني شفت الموقف ده قبل كده. او يا جماعه انا حاسس اني جيت المكان ده قبل كده وهم برده عاديين زيي وزيك مش بيعانوا من اي حاجه. وفي الواقع التساؤل ده سليم 100% تفسير العلماء والباحثين عن ان السبب في الدي جافو. هو بس نوبات الصرع والادويه وحالات القلق والتوتر هو مجرد تفسير مبدئي. لكن اكتشفوا فيما بعد ان الموضوع اعمق بكتير. اول محاوله لفهم الدي جافو بتكمن في ظاهره المعالجه المزدوجه او الدول بروسيسنج. وهي ظاهره بتحصل داخل جسم الانسان وبالتحديد في المخ، لما يكون في عمليتين بيحصلوا مع بعض في نفس الوقت. وفجاه يحصل خلل في التزامن بين العمليتين دول يعني بالعربي كده في جزئين في الدماغ مسؤولين عن تخزين الاحداث والذكريات. الجزء الاول مسؤول عن تخزين الاحداث قصيره الامد او المؤقته وبعدين بتتنقل لجزء ثاني في المخ اسمه الهيبوكامبس. وهو اللي مسؤول عن الذاكره طويله الامد، احيانا بقى بيحصل عدم تزامن في تخزين الذكريات الطويله والقصيره. فبيجي الهيبو كامبز يسجل بالغلط الحدث اللي انت بتشوفه حاليا على انه حدث قديم او ذكرى طويله الامد. وبعدها بجزء من الثانيه بيسجلها مره ثانيه في الذاكره المؤقته على انها ذكرى قصيره الامد. واختلال التزامن ده هو اللي بيخلي المخ يشعر انه عاش الموقف ده قبل كده. وان الحدث اللي بيشوفه حالا عباره عن حدث قديم مع انه اصلا حدث جديد ولسه حاصل دلوقتي. طب هل بقى الموضوع توقف لحد كده؟ في الواقع واحده من اهم النظريات الثانيه اللي تناولت تفسير الدي جافو هي نظريه بتقول ان سبب حدوث الظاهره معتمد بشكل كلي على الالفه. يعني لو انت حصل لك الدي جافو في مره من المرات فده بيكون بسبب ان في حاجه معينه في الموقف اللي بيحصل لك دلوقتي. انت اصلا بينك وبينها الفه بالفعل، يعني على سبيل المثال قصه صاحبنا نعناع وشمشمون اللي قلناها في اول الحلقه. اغلب الظن ان نعناع مر بظاهره الدي جافو لما بص لترابيزه السفره لان الترابيزه دي شبه ترابيزه السفره اللي كانت في بيت جدته زمان. واللي صورتها محفوره بقوه في ذاكرته طويله الامد، وعلشان كده بمجرد ما ركز في شكل الترابيزه بتاعت السفره اللي كان قاعد عليها وهو بيتغدى. استرجع صوره من ذاكرته وحاس ناحيهها بالالفه وده اللي خلاه يحس فورا انه مر بالموقف ده قبل كده. لو النظريه اللي فاتت فسرت الموضوع بانه معتمد اعتماد كلي على انك تكون بتشوف حاجه حاليا شبه حاجه انت شفتها زمان ومحفوره في سجل الذاكره القديمه الخاصه بك. ففي نظريات ثانيه بتقول عكس كده والموضوع لسه ما خلصش، هيظهر نفس الشخص اللي كان قاعد دلوقتي وهيقول لي طب انا ليا ناس صحابي مروا بالدي جافو. مع حاجات مستحيل يكونوا شافوها قبل كده ودي معضله صعبه جدا وغريبه. على سبيل المثال هنفترض ان في رسام لسه مخلص لوحه جديده ما حدش شافها قبل كده وما حدش صورها ولا نزلت في معرض ولا اي حاجه. واول ما خلصها قرر انه يعرضها على صاحبه نعناع علشان ياخد رايه، المدهش بقى ان نعناع بمجرد ما شاف اللوحه حس فجاه بالدي جافو. طب ايه ده؟ احنا هنستهبل بقى ولا ايه؟ اللوحه لسه خلصانه دلوقتي حالا وما حدش شافها قبل كده. يعني مستحيل تكون اللوحه دي محفوره في ذاكره نعناع لانه اصلا اول مره يشوفها. ايه بقى السبب اللي خلاه يمر بالدي جافو؟ وقياس على كده الاشخاص اللي بتبقى بتزور مكان مميز لاول مره. زي اي مدينه سياحيه مثلا واول ما يدخلوها يحسوا بالدي جافو هناك. مع ان مستحيل يكونوا مروا بالموقف ده قبل كده لان الحاجات المميزه دي مش بتتكرر كتير في حياه البني ادم. وفي الحاله دي التفسير الثاني بيكمن في وجود خلل في عمليات الجهاز العصبي. بمعنى ان الاشارات اللي بتروح للمخ بيحصل لها بطء او تاخر اثناء الحركه، وعلشان نوضح ده اكتر. خلينا نروح لموقف نعناع مع صديقه الفنان اللي عرض عليه اللوحه للمره الاولى. في الواقع نعناع شاف اللوحه بعيونه الاثنين عادي جدا والطبيعي اننا لما بنشوف حاجه بعينينا بتبدا البيانات تتنقل من كل عين على حده وتروح لجزء معين في المخ اسمه الفيجوال كورتكس او القشره البصريه. وهو ده الجزء اللي بيستلم دايما البيانات من العينين في نفس الوقت وبيؤدي في النهايه اننا نشوف الحاجه اللي منقول منها البيانات. اللي حصل بقى مع نعناع انه اول ما عيونه وقعت على اللوحه بدات عينه اليمين تبعت البيانات للمخ. لكن عينه الشمال وعلى غير المتوقع اتاخرت شويه في ارسال الاشارات البصريه بتاعتها للمخ. وده تسبب ان المخ استلم نفس البيانات مرتين ورا بعض مش مع بعض ونظرا لللخبطه دي فبيانات العين الشمال اللي وصلته للمره الثانيه. حاس معاها بالالفه وكانه شافها قبل كده وده لانه اصلا شافها بالفعل قبل كده لكن بلحظات معدوده لما العين اليمين بعتت البيانات. يعني من الاخر كده التفسير ده بيقول ان ظاهره الدي جافو ما هي الا ان العقل استلم بيانات من العين مرتين ورا بعض بدل ما كان بيستلمهم في نفس اللحظه زي المعتاد. وده بيخليه يتعامل مع البيانات الاولى على انها اشبه بالذكريات والبيانات الثانيه بيقارنها بالبيانات الاولى ويحس انها شبه ذكريات قديمه شافها قبل كده. وده اللي بيخليه يقول بكل فخر انا حاسس اني شفت الموقف ده قبل كده، يا رب نهدى بقى ونبطل اسئله وجوديه. بالرغم من ان ظاهره الدي جافو تم تفسيرها علميا بصوره كبيره الا انه ما زال منتشر عنها بعض التفسيرات الغريبه شوويه. واللي ما فيش عليها اي دليل، ونركز كده التفسيرات اللي هنقولها دي يا جماعه ما فيش عليها اي دليل. مين فينا ما سمعش بعض الناس بيحاولوا يربطوا ظاهره الدي جافو بالفتره اللي كان بيقضيها الجنين في رحم الام. وقالوا ان السبب في الظاهره ان الجنين بيشوف شريط حياته كله وبيمر قدام عينيه اثناء وجوده في الرحم. وبيبدا بقى يلقط شويه احداث من هنا على شويه احداث من هنا لما يكبر ويمر بالاحداث دي مره ثانيه. ولو انت واحد من اللي تاثروا بالقصه دي فاسف على تخيب ظنك لان القصه دي اي كلام. ما فيش عليها اي اثبات علمي وما فيش اي دليل شرعي يؤيد الكلام ده ولا حديث ولا اثر ولا قران ولا تفسير ولا اي حاجه. فتستهدى بالله كده وتشيل الموضوع ده من دماغك خالص. نيجي بقى لناس ثانيه حبت تشغل دماغها شويه وقالوا لو ربطنا الدي جافو باي كلام علمي او نظريه علميه. الدنيا هتمشي وهتبقى اخر حلاوه وده شفناه في محاوله ربط الدي جافو بفرضيه الاكوان المتعدده. وهنلاقي صاحبنا المؤيد لنظريه الاكوان المتعدده بيقول مرورك بظاهره الدي جافو ده معناه ان في نسخه من نسخك الثانيه اللي موجوده في اكوان موازيه مرت بنفس الموقف ده قبل كده. وعلشان كده لما انت مريت بيه حصل بينكم اتصال وحسيت انك مريت بالموقف ده قبل كده وطبعا الكلام ده برده اي كلام. طب هل ده معناه اننا بننفي فرضيه الاكوان المتوازيه تماما؟ بالطبع لا دي مساله ودي مساله ثانيه. وان كانت فرضيه الاكوان المتوازيه نفسها مجرد فرضيه مش اكتر لكن كلامنا ده بننفي بيه ارتباطها بظاهره الدي جافو. وتيجي مجموعه ثالثه تقول ان الظاهره ما هي الا احداث شفتها في احلامك في يوم من الايام وبعد كده نسيتها. ولما بتمر باحداث مشابهه ليها بيبدا عقلك يسترجع الاحلام دي ويحس فورا بالدي جافو. وطبعا برده ده مجرد كلام، ومجموعه رابعه كمان بتقول احنا اصلا كنا عايشين حياه ثانيه خالص قبل الحياه بتاعتنا دي ولنا ذكريات هناك. ولما بنعمل حاجه هنا قريبه من الذكريات دي بنحس بالدي جافو اي خدمه، وطبعا الكلام والادعاءات ما بيتوقفوش لحد هنا. وخد من ده كتير، لكن طبعا ما فيش اي دليل على الكلام ده اطلاقا ومش مقبول حتى بالنسبه للمنطق والعقل وتفضل في النهايه البينه على من ادعى. واي حد عنده راي عايز يطرحه لازم ياتي بالدليل. ونيجي بقى لاخر حاجه، هل ظاهره الدي جافو خطر ولا لا؟ وهل هي مؤشر لاصابه الدماغ بمرض ما ولا لا؟ في الواقع وبالرغم من انتشار عدد كبير من الشائعات حول خطوره الدي جافو على الاشخاص اللي بيمروا بيها الا انه علميا الدي جافو ظاهره طبيعيه تماما ما فيش منها اي قلق. ومش مؤشر على اي نوع من انواع الاصابات الدماغيه زي ما البعض معتقد والظاهره بالفعل مالوفه ومنتشره بين البشر من الاف السنين. فلو ما زلت بتمر بتجربه الدي جافو باستمرار فاطمن انت كويس. وبكده نبقى جاوبنا النهارده على سؤال ليه بنحس اننا مرينا بالموقف ده قبل كده؟ واللي اول مره يدخل القناه فالقناه دي بنجاوب فيها على الاسئله اللي ممكن تخطر على بالك وانت متمدد على السرير في نص الليل ومش جاي لك نوم. وكالعاده لو في سؤال بيجي لك في نص الليل ومحيرك اكتبه لنا في التعليقات علشان نجاوبك عليه. ولو الفيديو عجبكم ما تنسوش اللايك والشير والناس اللي اول مره تشوفنا اعملوا سبسكرايب وفعلوا الجرس علشان توصلكم فيديوهاتنا اول باول واشوفكم الحلقه الجايه.