[0:05]Assalamualaikum warahmatullahi wabarakatuh.
[0:13]Assalamualaikum warahmatullahi wabarakatuh.
[0:21]Allahu Akbar Allahu Akbar La ilaha illallahu wallahu Akbar Allahu Akbar Wa lillahi al-hamd. Auzu billahi minash shaitanirrajim Bismillahir Rahmanir Rahim
[0:33]Ya ayyuhallazina amanu kutiba alaikumus siyamu kama kutiba alallazina min qablikum la'allakum tattaqun. Ayyaman ma'doodat Faman kana minkum maridan aw 'ala safarin fa'iddatun min ayyamin ukhar. Wa 'alallazina yutiqunahu fidyatun ta'amun miskeen Faman tatawwa'a khairan fahuwa khairullahu Wa an tasoomu khairullakum in kuntum ta'lamun Sadaqallahul Azim.
[1:07]Allah Rabbul Izzat ka khaas fazal-o-karam hai. Ki usne hamein Ramadan ka mahina ata farmaya. Uske aakhri lamhaat ata farmaye aur aakhir mein phir ek aur Juma Allah Rabbul Izzat ne ata farma diya. Ibadat karne ki taufeeq ata farma di, Tarawih padhne ki taufeeq ata farma di. Roze rakhne, Quran-e-Majeed ki tilawat ki taufeeq ata farma di. Yeh sab Allah Rabbul Izzat ka khaas fazal-o-karam hai aur is par Allah ka khoob shukr ada karna chahiye. Allah Rabbul Izzat ne insaan par jitni ibadat farz ki. Woh Allah Rabbul Izzat ne usmein kuch ibadat ko jismani rakha hai. Kuch ko roohani rakha hai. Kuch ibadat maali hain.
[2:06]Jo insaan kisi ki taraf se koi ibadat ada kar sakta hai ya nahin? Agar woh ibadat ada na kar sake, toh kya uska mutabadil hai ya nahin? Is baat ko Quran-e-Majeed ki ayaat ki roshni mein aur Nabi Sallallahu Alaihi Wasallam ke irshadat ki roshni mein khoob zehen nasheen kar lena chahiye. Ke woh log jo Ramadan mein roze nahin rakh sakein woh ab kya karein? Jo log Ramadan mein roze nahin rakh sake. Unko zehen mein yeh rakhna chahiye ki roza rakhna yeh kis par farz hota hai? Musalman par, Aaqil par, Baligh par. Musalman ho, Aaqil ho, majnoon na ho, bilkul hosh-o-hawaas bechare ke na ho, us par bhi roza farz nahin hota, aur baligh par roza farz hota hai. Jo 15 saal ka ladka, ladki us par roza farz ho jata hai. Ismein tandrusti shart nahin hai. Agar koi bimaar ho, shadeed bimaar ho tab bhi us par roza farz hai. Tabhi ayat tilawat ki. Surah Al-Baqarah ki ayat 182 aur 183. Usmein Allah Ta'ala ne yahi ahkaamat sikhayein. Faman kana minkum maridan aw 'ala safarin fa'iddatun min ayyamin ukhar. Jo tum mein se bimaar ho ya safar mein, safar ki wajah se roza nahin rakh sake, beemari ki wajah se roza nahin rakh sake, toh woh aur dinon mein ginti ko poora kar liya karein. Lekin kya kisi ko roza rakhwaya ja sakta hai? Koi aur doosre ki taraf se roza rakh le, yeh bohot sawal aaj kal ho raha hai. Uska jawab zehen mein rakhna chahiye ki Allah Ta'ala ne insaan par jo ibadat farz ki hain. Woh do tarah ki buniyadi taur par, jismani ibadat aur maali ibadat. Jo jismani ibadat hain, jaise namaz aur roza. Yeh do ibadat jismani hain, unka jism se ta'alluq hai. Jismani ibadat kisi doosre ki taraf se karne ki ijazat nahin hai. Na koi banda doosre ki taraf se namaz padh sakta hai, na koi doosre ki taraf se roza rakh sakta hai. Jo badani ibadat hain, jismani, unmein koi doosra ibadat nahin ada kar sakta hai. Khud karni hogi ya uska mutabadil abhi arz karta hoon Insha'Allah. Number do, jo khaalis maali ibadatain hain, unmein ijazat hai, khuli ijazat hai. Ke koi doosra bila takalluf doosre ki taraf se woh ibadat ada kar de. Jaise zakat. Zakat ada karna. Ab biwi ke paas zevar hai, shauhar malik nahin hai itne paise ka. Ab yeh shauhar biwi ki taraf se zakat ada kar deta hai, bilkul jaiz hai. Jo maali ibadat hai, aap kisi doosre ki taraf se sadqa dena chahein toh de sakte hain. Aap Sadqa-e-Fitr kisi ki taraf se dena chahein jiska abhi zikr karunga Insha'Allah. Toh Sadqa-e-Fitr kisi ki taraf se dena chahein de sakte hain. Isliye ki woh maali ibadat hai. Aap kisi ko keh dein apne bhai ko, behn ko, kisi aziz-o-aqarba mein se, bas theek hai main aap ki taraf se sadqa-e-fitr de doonga. Jaiz. Toh maali ibadat doosre ki taraf se karna bila takalluf jaiz. Aap doosre ki taraf se zakat bhi de sakte hain, Sadqa-e-Fitr bhi de sakte hain. Lekin jo ibadat maali bhi ho, badani bhi ho, usmein kuch thodi si tafseel. Jaise Hajj. Hajj yeh maali ibadat bhi hai, badani ibadat bhi hai. Ab jo maali aur badani dono ibadatain hon, usmein uzr ki wajah se doosre ki taraf se woh ibadat ki ja sakti hai, baghair uzr ke nahin. Jaise aap Hajj-e-Badal kehte hain. Ek banda us par Hajj farz hua, lekin baad mein bimaar ho gaya, nahin kiya, boorha ho gaya, ma'zur ho gaya, nahin ja saka, Hajj farz ho gaya. Inteqal ho gaya, ussi ke maal mein se phir Hajj karwaya jaata hai, use Hajj-e-Badal kehte hain. Yeh insaan zindagi mein bhi agar koi bohot bimaar ho jaye shadeed, lekin us par pehle Hajj farz ho chuka tha, nahin kar saka ab is umar ke is hisse mein ya beemari aisi aa gayi ke ab safar nahin kar sakta, toh aisi soorat mein woh Hajj-e-Badal kar sakta hai, doosra insaan uski taraf se. Toh roze ke bare mein hamein maloom hua ke roza doosre ki taraf se toh namaz bhi doosre ki taraf se nahin rakhi ja sakti hai. Lekin jo abhi ayat tilawat ki Surah Al-Baqarah ki ayat 183, usmein Allah Ta'ala ne roze ka badal bataya. Ke Wa 'alallazina yutiqunahu fidyatun ta'amun miskeen. Un logon par jo roza rakhne ki taaqat na rakhte hon, toh woh ek miskeen ko khana khila de. Iski tafseer Hadees mein hai ke do waqt khana khila de kisi ghareeb ko, mohtaj ko. Do waqt khana khila do. Ab isko baaz log is baat par lete hain ke do waqt khana khilana hai, lehaza Ramadan ke andar baaz hazraat aisa karte hain ke woh sehri kisi ghareeb ko khila dete hain aur usko kehte hain bhai aapki sehri bhi hamari taraf se, iftar bhi hamari taraf se, toh woh do waqt ka khana ho jata hai. Goya ke poora Ramadan aap unko khana dete rahe toh woh fidya bhi ho gaya. Lekin isko yeh nahin kehna chahiye ki doosre ki taraf se roza rakh liya. Roza toh usko khud rakhna padega ya fidya dena hoga. Phir Nabi Sallallahu Alaihi Wasallam ne fidyah ka mutabadil bhi agar khana nahin khila sakta, toh paune do kilo gandam yaani nisf sa gandam ya uske paise de sakta hai. Aajkal nisf sa gandam, yaani paune do kilo laga lein, do kilo laga lein uske taqreeban Lahore ke hisaab se iska 300 rupiya banta hai. Yahi Sadqa-e-Fitr ki miqdar hai. Yahi Sadqa-e-Fitr ki miqdar hai ki 300 rupiya gandam ke hisaab se denge toh aisi soorat mein yeh fidyah hoga, ek roze ka ek bande ki taraf se. Sadqa-e-Fitr, woh alag cheez hai, woh abhi arz karta hoon. Lekin Sadqa-e-Fitr yeh kis par wajib hota hai? Yeh alag se baat samjhne ki hai. Aur fidyah ke bare mein ek baat arz karta chalu ke hamein ahadees se maloom hota hai ke jo banda abhi filhal bimaar hai. Abhi uska operation hua hai, doctor hazraat ne kaha hai ki abhi is saal toh aap nahin rakh sakte, lekin aayinda Insha'Allah ek do saal baad aap roza rakh sakenge, toh aisi soorat mein yeh banda fidyah nahin de sakta. Jo banda aayinda zindagi mein roza rakhne ki taaqat rakhne ki usko tawaqqo ho, woh fidyah na de. Kyunki usko phir roze rakhne padenge, jab tandrust ho jayega. Yeh us shakhs ke liye jo bohot boorha ho chuka ho ya beemari aisi ho, doctor ne kaha ho ab roza nahin rakh sakte, aisi soorat mein woh fidya de de. Fidya kisko diya ja sakta hai? Har miskeen ko jisko zakat aap de sakte hain usko aap fidyah bhi de sakte hain. Woh Allah Ta'ala ne Quran-e-Majeed mein jab zaroorat pesh aa jaye aapko ke hum zakat, sadqat kisko de sakte hain? Toh Surah At-Tawbah, ayat number 60, ayat number 60. Surah At-Tawbah, ayat number 60. Uska sirf tarjuma padh leejiye, toh aapko Insha'Allah woh aath masraf pata chal jayenge, aath qism ke insaan ke jinko aap zakat sadqat de sakte hain. Aur phir Sadqa-e-Fitr bhi aap un logon ko de sakte hain. Sadqa-e-Fitr ki miqdar, yeh Nabi Sallallahu Alaihi Wasallam ne ek toh batayi gandam ki. Agar gandam ki miqdar ho toh woh paune do kilo gandam Sadqa-e-Fitr ek shakhs ki taraf se. Aur agar khajoorein hon ya kishmish ho, toh phir ek sa'a yaani saare teen kilo. Ab saare teen kilo agar khajooron ka, aajkal jo darmayani qism ki khajoorein hain, uska hisaab lagaya jaye toh taqreeban kam-az-kam 500 rupiya banta hai. Gandam ka dein toh woh 300 rupiya, har bande ki taraf se. Aur agar khajooron ka dein toh woh kam-az-kam 500 rupiya. Aur kishmish aur us se zyada mehngi, uska hisaab dukan-dar se maloom kar liya jaye, saare teen kilo kitne ki aati hai. Jo saheb-e-sarwat hazraat hain, woh ghuraba mustahiqeen ki madad zyada se zyada karna chahte hain, woh de sakte hain. Aur Nabi Sallallahu Alaihi Wasallam ne hamein samjhaya ke yeh insaan Sadqa-e-Fitr kis par wajib hota hai? Kis par wajib hota hai? Woh shakhs jo saheb-e-nisab ho, chahe roza rakh raha ho chahe na rakh raha ho. Yeh baat qaabil-e-tawajjuh hai. Koi agar roza nahin rakh raha ghar mein, koi boorhe fard hain, mareez hain. Toh aisi soorat mein us par bhi Sadqa-e-Fitr wajib hota hai. Fitr ka ma'na roza kholna. Sadqa-e-Fitr, roza kholne ka sadqa, iftar ka sadqa. Toh yeh aisi soorat mein yeh insaan koshish kare ki Eid-ul-Fitr se pehle pehle ada kar de, Eid-ul-Fitr ki namaz se pehle pehle. Ramadan mein bhi ada kiya ja sakta hai. Lekin agar koi Eid-ul-Fitr ke baad namaz padhne ke baad sadqa kare, toh Nabi Sallallahu Alaihi Wasallam ki ek hadees hai ki agar koi Eid-ul-Fitr se pehle Sadqa-e-Fitr ada kare toh woh Sadqa-e-Fitr hai. Aur agar baad mein ada kare toh woh aam sadqon ki tarah sadqa hai. Lekin yeh zehen mein rakhna chahiye ki chunki yeh wajib hota hai, isliye agar namaz padhne tak Sadqa-e-Fitr ada nahin kiya toh namaz ke baad bhi ada kar sakta hai, taake uska wajib ada ho jaye. Zakat ka nisab ab aajkal ke hisaab se. Woh zehen mein rakhna chahiye, kyunki yeh utaar chadhav ismein chalta rehta hai. Nabi Sallallahu Alaihi Wasallam ne bataya ke 200 dirham ke barabar. Jami At-Tirmidhi ki hadees. 200 dirham yeh zakat ka nisab hai. Ek dirham hota hai teen gram, 62 milligram chandi.
[12:11]Jab iske aap 200 dirham ka banayenge toh yeh 612 gram chandi banegi. Jisko aap saare 52 tola chandi kehte hain.
[12:26]Aajkal, aajkal ka jo rate hai chandi ka, woh hai 2653 rupiye. 6200, 2653 rupiye yeh aaj ka rate hai. Is hisaab se agar aap saare 52 tola chandi ke paise lagayenge toh woh banenge 139,220 rupiye.
[12:58]Toh aap 139, 140 laga leejiye. Jis bande ke paas 140000 rupiya Eid ke dinon mein bachhat uske paas maujood hai, zaroorat se zaaid pada hua hai, chahe us par saal nahin guzra, us par Sadqa-e-Fitr wajib ho jata hai. Agar itna paisa uske paas maujood nahin hai, toh aisi soorat mein us par Sadqa-e-Fitr wajib nahin hota. Jab Sadqa-e-Fitr wajib hota hai toh Nabi Sallallahu Alaihi Wasallam ne hamein sikhaya, Sunan Abi Dawud ki hadees mein hai. Ki yeh shakhs apni taraf se Sadqa-e-Fitr ada kare aur apni nabaligh aulaad ki taraf se bhi Sadqa-e-Fitr ada kare. Jo baligh aulaad hain, agar woh khud sahib-e-nisab hain toh Sadqa-e-Fitr ada kar dein. Biwi agar khud sahib-e-nisab hai, biwi ke paas agar saare saat tole sona ho toh woh sahib-e-nisab hogi. Is se kam hoga sona aur naqd paisa nahin hoga, toh aisi soorat mein us par Sadqa-e-Fitr wajib nahin hoga. Toh yeh mard apni taraf se Sadqa-e-Fitr ada kare. Apne nabaligh bachchon ki taraf se Sadqa-e-Fitr ada kare. Yeh wajib hai. Ghar mein woh mulazim ke jinka khana iske zimme hai. Jiska khana iske zimme hai, aisi soorat kafalat iske zimme hai, toh aisi soorat mein unki taraf se bhi Sadqa-e-Fitr ada kar diya jaye. Yeh Sadqa-e-Fitr aap kisko de sakte hain? Uska jawab phir wohi hai, Surah At-Tawbah ki ayat number 60. Innamas sadaqatu usmein aath masraf Allah Ta'ala ne bataye. Innamas sadaqatu lil fuqara wal masakeen wal amileena alaiha wal mu'allafati qulubuhum wa fir riqabi wal gharimina wa fi sabilillahi wabnis sabeel. Aath masraf ho gaye. Innamas sadaqatu lil fuqara. Faqeer ko aap zakat sadqat de sakte hain. Faqeer se muraad gadagar, bheek mangna jiski aadat hai, uski hausla shikni ki jaye, uski hausla afzai na ki jaye. Haan maloom hua aapko ki waqayi mustahiq hai, aisi soorat mein aap de dijiye. Faqeer se muraad Shari'at mein hai jo sahib-e-nisab na ho. Faqeer ka zid, uska opposite Quran-e-Majeed ke andar woh hai ghani. Faqeer ka opposite ghani. Ghani kisko kehte hain jo sahib-e-nisab ho. Yaani jiske paas ek lakh 40 hazar rupiya bachhat uske paas maujood ho, Shari'at usko ghani kehti hai. Aur agar uske paas ek lakh 40 hazar, 39 hazar rupiya nahin hai, toh aisi soorat ke andar woh faqeer hai. Ab aajkal 40-45 hazar rupiye bhi kamane wala, uske chand bachche, ghar ka kiraya, bijli waghera ke bill, woh nikal kar uske paas agar nahin bacha hua, ek lakh 40 hazar rupiya toh woh faqeer kehlayega is ayat ke tahet aur usko aap zakat sadqat de sakenge. Miskeen ki ta'reef, number do, miskeen, laisa lahu quut-e-yawmih, uske paas khane ko kuch nahin hai. Usko bhi aap de sakte hain. Wal amileena alaiha, number teen, zakat ka kaam karne wale. Zakat jama karne wale, zakat ka account ka hisaab rakhne wale, zakat ke mehqame ke log unko bhi aap zakat ke paise mein se de sakte hain. Number char wal mu'allafati qulubuhum, logon ke dilon ko Islam par jodne ke liye zakat dena taake woh gurbat ki wajah se kahin apna deen na badal lein. Khaas taur par hamare maashre ke andar baaz ilaqe aise hain. Ke jinke andar itne ghareeb log Musalman hain ki bas auqat baaz doosri missionaries jo hain woh unko bedein karti hain, paise ka lalach dekar. Wahan insaan ko zakat ka paisa kharch karna chahiye. Isi tarah hamare maashre mein jo nau Muslim hote hain, woh aam taur par bichare Islam laane ke baad apni biraadri se kat jaate hain aur unki koi khabar-giri karne wala nahin hota. Aisi soorat mein nau Muslim ko bhi tarjeeh dijiye agar woh, mu'allafatul qulub logon ke dilon ko Islam par jodne ke liye. Innamas sadaqatu lil fuqara wal masakeen wal amileena alaiha wal mu'allafati qulubuhum. Char. Number paanch, wa fir riqabi. Ghulamon ko azaad karne ke liye. Ab ghulam nahin hote, ghulamon ko azaad karne ke liye bhi aap zakat ka paisa de sakte hain. Panch ho gaye. Number che, wal gharimeen. Wal gharimeen, qarzdaar. Jo shakhs maqrooz hai, us par qarza hai. Aur us par ek lakh 45 hazar, 40 hazar rupiye uske paas naqd maujood nahin hain aur us par qarza hai, aap usko zakat ka paisa dein taake woh qarza ada kar de. Toh aisi soorat mein yeh bhi zakat ka masraf hai, che masraf ho gaye. Wa fi sabilillah, number saat, Allah ke raaste mein jo kaam kar rahe hon. Masroof hain deen ka kaam karne par aur woh kamane ke liye unke paas waqt nahin, unke paas itni zaroorat nahin poori hoti, aap unko zakat ka paisa de sakte hain. Number aath, wabnis sabeel, musafir. Agar koi apne ilaqe mein toh maal dar hai, lekin halat-e-safar mein woh hai aur mohtaj ho gaya kisi wajah se, aap usko musafir hone ki wajah se aap usko zakat de sakte hain. Yeh aath masraf Allah Ta'ala ne bataye. Inko aap zakat aur Sadqa-e-Fitr de sakte hain. Rishtedaron mein Sadqa-e-Fitr dena, yeh bohot sawal hota hai, kya rishtedaron ko Sadqa-e-Fitr de sakte hain, zakat de sakte hain? Uska jawab yeh hai ki Nabi Kareem Sallallahu Alaihi Wasallam ne irshad farmaya, bohot mustanad hadees. Ke yeh insaan agar sadqa aur zakat kisi aam mustahiq ko de, toh usko ek sawab milta hai. Aur agar rishtedar ko de toh usko do sawab milte hain. Ek taraf woh sadqa zakat ada karne ka sawab aur ek sila-rehmi ka sawab. Yeh do sawab usko milte hain. Isliye rishtedaron ko tarjeeh dijiye agar woh in aath masarif mein se kisi masraf ke mutabiq hon, toh aap unko rishtedar ko dijiye, us par aapko dohra sawab milega. Kin rishtedaron ko zakat de sakte hain? Uske liye ek usool zehen mein rakh leejiye, bohot aasaan sa. Apni nasal se oopar, apni nasal se neeche, zakat sadqat nahin de sakte. Apni nasal se oopar, maa, baap, dada, dadi, nana, nani. Apni nasal se neeche, beta, beti, pota, poti, nawasa, nawasi. Apni nasal se oopar ko aap zakat sadqat nahin de sakte. Apni nasal se neeche zakat sadqat nahin de sakte. Miyan biwi ek doosre ko zakat sadqat na dein. Iske ilawa haqeeqi bhai, haqeeqi behnein agar mustahiq hon, unko dijiye Sadqa-e-Fitr. Aur yeh zehen mein rakh leejiye ga ki Sadqa-e-Fitr dete waqt doosre ki izzat-e-nafs ka bohot khayal rakhiye. Bohot khayal rakhiye. Isliye Shari'at ke mutabiq doosre ko yeh batana zaroori nahin hai ki main aapko Sadqa-e-Fitr de raha hoon, aapko zakat de raha hoon. Yeh batana zaroori nahin. Aap usko 'eidi' keh ke bhi de sakte hain. Aap usko hadiya tohfa keh kar bhi de sakte hain. Aur yeh Sadqa-e-Fitr aap rupiye paise mein bhi de sakte hain, gandam mein bhi de sakte hain, ration mein bhi de sakte hain, kapde banakar bhi de sakte hain. Jis tarah uski zaroorat zyada se zyada poori ho, behtar se behtar aap usko Sadqa-e-Fitr de sakte hain. Lekin in rishtedaron ko de sakte hain. Haqeeqi bhai ke bete, bhatije, bhatijiya, bhanje, bhanjiya, sabko aap zakat aur Sadqa-e-Fitr de sakte hain. Yahan tak toh yeh baat hui ki Sadqa-e-Fitr kin logon ko. In logon ko hi aap fidyah bhi de sakte hain.
[20:44]Saare rozon ka fidyah ek bande ko dena chahein, aap de sakte hain. Kayee logon ka fidyah ek bande ko dena chahein, de sakte hain. Lekin koshish ki jaye jo ahadees se baat maloom hoti hai ki itna har ek ek hi shakhs ko itna diya ja raha hai ki woh bechara ek lakh 40 hazar rupiye ka malik ho gaya, toh ab aisi soorat mein ab usko Sadqa-e-Fitr nahin diya jayega. Yeh ek ehtiyat kar li jaye. Agar uske paas itna jama ho gaya, toh aisi soorat mein ab uske liye Sadqa-e-Fitr lena jaiz nahin hoga. Isliye mutafarriq logon ko de diya jaye, taake zaroorat poori ho jaye. Aur phir uske saath saath jahan Allah Ta'ala ne hamein taufeeq ata farmayi ke roze aapne rakhe poore sunnat ke mutabiq. Sehri sunnat ke mutabiq, waqt ke mutabiq sehri khana band ki, iftar mein aapne poori sunnaton par amal kiya, din bhar namazon mein, tilawat mein, Tarawih mein sab sunnaton par aapne amal kiya, toh Allah Ta'ala taufeeq ata farmaye toh Eid ka din bhi sunnat ke mutabiq jo kal Eid ka din hai, use bhi sunnat ke mutabiq ada karne ki koshish ho jaye. Ke Nabi Kareem Sallallahu Alaihi Wasallam ke woh mamulat jo Hadees mein maujood hain, bohot mustanad ahadees se jo sabit hain, woh hamein 13 ke qareeb milte hain. Main tarteeb se arz karta chala jaata hoon, hum usmein se aksar kaam karte hain. Aksar kaam hum karte hain. Lekin sunnat samajh ke nahin karte, waise hi karte hain. Innamal a'malu bin-niyat. Aamal ka daromadar niyaton par hai. Aap wohi sunnat samajh kar kar leejiye, aapko sawab milega Insha'Allah. Eid ke din Nabi Sallallahu Alaihi Wasallam jaldi bedaar hote the. Woh aajkal waise hi sehri ke waqt uthne ki aadat hui hui hai, Ma'sha'Allah. Isliye yeh bhi sunnat par abhi amal karna aasaan ho jata hai. Nabi Sallallahu Alaihi Wasallam Eid ke din ghusl bhi farmate the. Eid ke din nahana, sunnat samajh ke naha leejiye. Eid ke din khaas taur par miswak karna. Yeh bhi sunnat. Eid ke din naha dho kar khushboo lagana yeh bhi sunnat. Main abhi arz kiya aksar kaam hum karte hain, lekin sunnat samajh ke karte nahin, waise hi karte hain. Innamal a'malu bin-niyat. Aamal ka daromadar niyaton par hai. Aap wohi sunnat samajh kar kar leejiye, aapko sawab milega Insha'Allah. Eid ke din Nabi Sallallahu Alaihi Wasallam jaldi bedaar hote the. Woh aajkal waise hi sehri ke waqt uthne ki aadat hui hui hai, Ma'sha'Allah. Isliye yeh bhi sunnat par abhi amal karna aasaan ho jata hai. Nabi Sallallahu Alaihi Wasallam Eid ke din ghusl bhi farmate the. Eid ke din nahana, sunnat samajh ke naha leejiye. Eid ke din khaas taur par miswak karna. Yeh bhi sunnat. Eid ke din naha dho kar khushboo lagana yeh bhi sunnat. Main abhi arz kiya aksar kaam hum karte hain, lekin sunnat samajh ke karte nahin, waise hi karte hain.
[23:11]Shari'i hudood ke andar rehte hue yeh mard aur aurat dono ke liye sunnat hai. Phir Nabi Sallallahu Alaihi Wasallam jab naha lete, khushboo laga li, kapde badalne mein Nabi Sallallahu Alaihi Wasallam apne behtareen kapde pehente the. Jo Allah taufeeq de de behtareen kapde. Naye de de toh bohot achha. Warna wahan riwayat mein jo alfaaz hain, woh hai ahsana siyabih, apne kapdon mein se behtareen kapde pehente the Eid ke mauqe par. Phir Nabi Sallallahu Alaihi Wasallam jab namaz ke liye Eid-ul-Fitr ke liye jaate the, toh dono baton mein farq zehen mein rakhiyega. Eid-ul-Adha ke mauqe par, badi Eid ke mauqe par Nabi Sallallahu Alaihi Wasallam ghar se jaate hue kuch nahin khate the. Namaz padh ke qurbani ka gosht khate the. Lekin Eid-ul-Fitr ke mauqe par Nabi Sallallahu Alaihi Wasallam ghar se meetha kha kar chalte the. Koi meethi cheez ho sakti, khajoor bhi ho sakti hai. Hamare yahan rawaj sewayion ka hai, lekin woh sunnat toh nahin, lekin jo bhi koi cheez khane ko meethi mile. Hamare yahan naujawan bachche aur jab Eid ki namaz ke liye jaate hain toh aam taur par woh bas akhir mein taiyaar hona aur tezi mein taiyaar hona, yeh wali sunnat chhoot jati hai, meetha khane ki sunnat. Nabi Sallallahu Alaihi Wasallam yeh bhi hadees mein maujood hai ki jab Eid-ul-Fitr ke liye jaate the, toh koi meethi cheez kha lete the. Yeh bhi sunnat samajh leejiye. Phir Nabi Sallallahu Alaihi Wasallam jab Eid ke liye jaate the, toh Eid ki namaz aam taur par Nabi Sallallahu Alaihi Wasallam woh Eidgah mein khule maidan mein padhte the. Allah Ta'ala jazai-e-khair de Model Town society ke zimmedaraan ko ki unhone hum sab Model Town walon ko nahin sunnat par khoob amal karwaya hai. Ki masjidon mein Eid ki namaz nahin hogi, ikkhatte Central Park mein Eid ki namaz hogi. Uska waqt bhi zehen mein rakh leejiye ga ki Eid-ul-Fitr ki namaz Insha'Allah Central Park mein 7:30 baje theek namaz khadi ho jayegi. Alhamdulillah khoob waqt ki pabandi hoti hai har Eid par. Toh 7:30 baje Eid ki namaz yahan Insha'Allah Eid-ul-Fitr ki Central Park mein, is sunnat par bhi amal ho jata hai ke tarah taakhir se padhna, khule maidan mein padhna.
[25:42]Jab Eid ki namaz padhne ke liye jayein, toh aisi soorat ke andar Nabi Sallallahu Alaihi Wasallam aahista awaaz mein takbirat padhte hue jaate the. Eid-ul-Fitr mein aahista awaaz se aur Eid-ul-Adha mein zara oonchi awaaz se.
[26:56]Allahu Akbar Allahu Akbar La ilaha illallahu wallahu Akbar Allahu Akbar Wa lillahil hamd. Bharpoor koshish ki jaye ki ghar mein bachchon ko bhi jo nahin yahan maujood unko bhi sikha kar khoob achhi tarah sunnat par amal karte hue jaiye. Hadees mein ek baat aur maujood hai ki Nabi Sallallahu Alaihi Wasallam jab Eid-ul-Fitr ki namaz ke liye jaate the toh paidal jaate the. Toh koshish keejiye jitna paidal chal sake. Aur phir jis raaste se yeh bhi ek sunnat hadees mein mustanad hadees. Ki jab jaate the Nabi Sallallahu Alaihi Wasallam toh ek raaste se aur jab wapas aate the toh raasta badal kar thoda sa tashreef le aate the. Is sunnat par bhi amal ho jaye. Yeh woh sunnatein hain jo Hadees se sabit. In par bharpoor koshish ki jaye amal karne ki. Phir aap jab Insha'Allah Eid ki namaz ke liye pahunchenge toh wahan aapko khateeb sahab poora Eid ki namaz ka tareeqa bata denge. Lekin abhi se ghar mein aaj hi thoda sa hum Eid ke tareeqe ko, Eid ki namaz ke tareeqe ko zehen mein rakh lein. Ki Eid ki namaz bilkul us tarah hoti hai jaise aap aaj abhi Jumme ki do rak'atein padhenge. Bilkul isi tarah. Sirf niyat ka farq ho gaya, ek toh niyat ka farq hai. Aur ek zaaid takbeeron ka farq hai, bas. Isi tarah khateeb sahab do rak'at padhayenge. Farq kya hai ki pehli rak'at mein bas yeh do cheezein zehen mein rakhiyega, bachchon ko bhi batayega, naujawanon ko bhi batayega, toh zehen nasheen rahegi bilkul baat. Ke pehli rak'at mein Allahu Akbar kehkar haath bandhiye, Subhanakallahumma padha, phir teen dafa kanon tak kandhon tak haath uthate, Allahu Akbar kehkar haath chhod dena hai. Teen dafa. Phir uske baad haath bandh liye, aur phir uske baad Imam sahab Surah Fatiha padhenge, Surah padhenge, phir isi tarah ek rak'at mukammal ho jayegi. Jab doosri rak'at mein khade honge toh bohot aasaan si baat ki pehle woh Surah Fatiha padhenge aur Surah padhenge, phir ruku mein jaane se pehle woh teen takbeerein kahenge. Ussi tarah haath uthayenge aap takbeer-e-tehreema ki tarah aur teen dafa hathon ko chhod denge. Chauthi takbeer jab woh kahenge toh aapne ruku mein chale jana, woh ruku ki takbeer hogi. Is tarah namaz mukammal ho jati hai aur namaz ke baad khutba, yeh bhi sunnat aur uska sunna bhi sunnat. Khutba sun len, uske baad dua mangi, Allah Ta'ala us waqt mein duayein bhi qubool karta hai. Allah Rabbul Izzat hamein jis tarah humne roze mukammal aadab ke saath rakhe, Allah Ta'ala Eid ka din bhi aadab ke saath guzarne ki taufeeq ata farmaye. Zehen mein rakh leejiye ga waqt Eid ki namaz ka waqt Insha'Allah 7:30 baje aur 7:00 baje bayan shuru ho jayega. Bharpoor koshish keejiye usse chand minute pehle pahunchna.
