[0:00]يا ابني يا حبيبي أنا رئيس أمريكا وبقول لك اطبع دولارات زي ما أنت عايز ما يهمكش الذهب. مسيو بريزيدون. ساليو. ااا كومون سافا؟ أنا الرئيس الفرنسي. ازيك يا حضرتك عامل إيه؟ بيان بيان بافوتي والله يا مستر بريزيدون. dit moi tu veux bien? On va juste voir. Je vais pas vous dire que lorsque on cherche bien on finit toujours. ااا باردون مستر بريزيدون ااا الكلام خدني شوية. كان معانا دولارات وعايزين نغيرها لذهب. مممم ااا هو في بس مشكلة صغيرة إنه مفيش ذهب. مفيش ذهب يعني أنا اتنصب عليا؟ لا لا لا لا ما اتنصبش عليك خالص. ممكن تاخد قصادها حاجات تانية مش لازم ذهب يعني. زي إيه؟ ممكن تاخد أمريكان كوفي أمريكان هوت دوج أمريكان فوتبول. أي حاجة وخدها. مستر بريزيدون يعني حياتك عايز تاخد الدهب وأنا أخد أمريكان كوفي؟ بلاش أنت مش فرنساوي؟ وي. ممكن تاخد بداله ااا كرواسون باتون ساليه ااا باجيت. باجيت؟ اللفين بتاعكو ده. مستر بريزيدون أنا مش هسكت وهكلم اليو ان يجيبولي حقي. I am the president of the United States of America. ما أخافش من حد. مسيو حاتك مش أمريكان بريزيدون، حاتك لافاش كيري.
[1:18]أعزائي المشاهدين السلام عليكم ورحمة الله وبركاته، أهلاً بكم في حلقة جديدة من برنامج الدحيح. الدولار الأخضر، أبرز ويمكن أكبر إنجاز في التاريخ المالي الحديث. حته ورقة عاملة قلبان الحق يا أسطى الدولار طلع. الحق الدولار نزل. حتة ورقة بيتبص لها بقيمة واحترام. ذا كوكا كولا اوف ماني، على رأي جيم جراند محرر في مجلة ذا إيكونوميست. بس عزيزي المشاهد الجميل خليني أسأل السؤال وأقول ليه هذه الورق ذات هذه القيمة وذات هذه الأهمية؟ وليه كل دول العالم بتتابع حركة الدولار ده باهتمام جدا؟ فسوق العملات زي الفوركس مثلاً. والسؤال الأكثر أهمية ليه الدولار هو عملة الاحتياطي العالمي؟ الدولار زي ما احنا عارفين هو العملة الرسمية للولايات المتحدة الأمريكية. بدأ يتداول في أمريكا بعد توقيع الدستور سنة 1792. ومع الوقت وصل لأنه يكون العملة الأقوى في العالم النهارده. طبعاً عزيزي المشاهد أنت عارف أكيد الكلام ده محصلش من يوم وليلة، كانت قصة صعود. رحلة الدولار من ساعة ما اتعمل في القرن ال18 لحد النهارده كانت مليئة بالأحداث المهمة والقوية جدا. اللي أكتشلي بطلها الحقيقي جهة اسمها الفيدرال ريزيرف (The FED) أو الاحتياطي الفيدرالي. وده جهاز حكومي فيدرالي. بيعمل إيه؟ بيعمل نفس الشغل اللي بتعمله البنوك المركزية. فممكن بشكل أو بآخر نقول عليه البنك المركزي. معرفش الأمريكان ليه يعني حابين يبقوا مختلفين؟ طب ما نسميه بنك مركزي، ليه بنك فيدرالي ومش عارف إيه؟ بس أمريكان بقى. المهم هي دي الجهة المسؤولة عن أهم عملة في العالم. واحد يقول لي الله طب ما احنا عايزين نسمع قصة الفيد دي؟ هحكيها لك. هي حكاية كبيرة ومهمة فأنا هحكيها طبعا. هحكيلك على الدولار من غير ما أحكيها؟ لازم يجب أروح أرجع الخيارة وأجي لك. الفيد له نظام معقد جدا ومختلف عن بنوك مركزية تانية. صعب على ناس كتير تفهمه بسهولة. وده خلاه عرضة لنظريات مؤامرة كبيرة زي إنه مملوك لعيلة الروث تشايلدز أو بيُدار من المجلس الأعلى للعالم والحاجات دي. عشان نحاول نفهم النظام المالي بتاع الفيد ده ونفهم ازاي الدولارات بتتعمل في أمريكا؟ محتاجين نرجع بالزمن شوية ونشوف والله النظام المالي في أمريكا في القرن ال19 كان عامل إزاي؟ قبل أصلاً ما يكون في حاجة زي الفيد. عزيزي المشاهد كانت أمريكا خلال القرن ال19 في حالة اضطراب سيئة، الوضع مش تمام. ليه؟ كان في حرب أهلية حرب دمرت الدنيا دي أكتر حرب تقريبا أمريكا خسرت فيها جنود. فلك أن تتخيل الأبعاد الاقتصادية لهذا الموضوع. ولكن حتى بعد كده لما الوضع هدي شوية، أمريكا كانت كل شوية تخش في كاسات اقتصادي. كل شوية كاسات كتير الدول الثانية لما عندها هذه المشاكل الاقتصادية، يبقى عندها بنك مركزي يظبط الدنيا. ولكن أمريكا لم يكن عندها بنك مركزي. تقول لي ليه يا أبو حميد أمريكا ما كانش عندها بنك مركزي؟ خلي بالك أيها المشاهد الجميل إن فكرة بنك مركزي بيدير العملة في البلد فكرة جديدة. أول بنك مركزي في العالم عمله الهولنديين سنة 1609. وساهم بشكل كبير جدا إنه حسن اقتصادهم عشان يبقوا قوة عالمية اقتصادية كبرى. وبعد كده عمل الإنجليز أول بنك مركزي لهم اللي هو ذا بنك اوف إنجلند سنة 1694. واللي برضه ساهم في تحسن أوضاعهم الاقتصادية عشان يكونوا بعد كده الإمبراطورية البريطانية العظمى. تقول لي طب ما هو يا عم البنك المركزي أهو فكرة كويسة وبينجح الدول. ليه أمريكا ما عملتش كده؟ أيها المشاهد سببان أمريكا كانت لسه دولة جديدة ولسه طالعة من حرب مع بريطانيا. فمعلش يعني مش أول حاجة هيعملوها إنهم يقلدوا الإنجليز. ولكن بعد المشاكل الاقتصادية الكبيرة اللي مرت بيها أمريكا اكتشفوا إن هم فعلاً محتاجين هيئة حكومية تنظم الاقتصاد بتاعهم. أول واحد قرر يعمل هذا البنك المركزي الأمريكي كان ألكسندر هاملتون سنة 1791. هل الموضوع نجح؟ للأسف الموضوع لم ينجح. حاولوا تاني سنة 1816 برضه ما نجحش. الله في إيه؟ الموضوع ما بيكملش 20 سنة وبيقف وده لإنه ما عرفش يعمل استقرار للحالة الاقتصادية في أمريكا. ليه؟ لسبب بسيط جدا، الناس كانت فاهمة إن البنوك اللي حاطين فلوسهم فيها لو فلست محدش هينقذ فلوسه من اللي فيها. تروح تاني يوم البنك تيجي تسحب فلوسك يقول لك سوري يا فندم البنك فلس. الله طب وأنا مالي؟ أنا سايب عندك أمانة فكان مع هذا التوتر أي إشاعة تطلع تقول إن في بنك احتمال يفلس، يقوم الناس كلها تهجم عليه وتطلب فلوسها. طبعا البنك مش كل الفلوس سايبها فيه. البنك بيطلع استثمارات ويدي قروض عشان تجيب فايدة فيحطها للناس. فيقوم البنك يعلن إفلاسه مش معاه جواه غير فلوس قليلة جدا. لما جت الناس كلها طلبت فلوسها، البنك هيعمل إيه؟ هيقطع نفسه؟ طبعا ده لما كان بيحصل كانوا بيؤدي لإفلاس بنوك كتيرة حتى لو كانت كويسة، حتى لو كان وضعها المالي جيد جدا. وهو ده بالظبط اللي حصل سنة 1857. وسنة 1873 وسنة 1884 وسنة 1890 وسنة 1893. وسنة 1896. عزيزي المشاهد كل سنة من السنين دي، الناس تقرر بدافع الخوف تنزل البنوك وتسحب كل فلوسها. خايفة البنوك تفلس، ومن الحركة دي البنوك أكتشلي اتفلست فعلاً. It's a self-fulfilling prophecy. فكل مرة تحصل أزمة اقتصادية جبارة وركود اقتصادي في البلد كلها. فالوضع الاقتصادي كان منيل بستين نيلة، لحد ما حصل سنة 1907 بانيك كبير. أو ما يعرف بالذعر المصرفي الأمريكي، لما بشكل مفاجئ انهارت البورصة الأمريكية وقيمتها نزلت 50%. يا خبر أبيض إيه اللي حصل؟ وأكثر من عشرة بنوك في الساحل الشرقي الأمريكي فلسوا في نفس الوقت. الناس كلها اتوترت وبتسحب فلوسها من البنوك دي وخايفة على شقى عمرها. فالبنوك اتوترت وقالت هنعمل إيه؟ هنعمل إيه؟ هنعمل إيه؟ قاموا رايحين للشخص المناسب. احنا نروح للكبير بتاعنا، من هو هذا الكبير؟ هو جي بي مورجان. جي بي مورجان كان يعني في وقت من الأوقات ملك وول ستريت. برنس البورصة الأمريكية وفاهم كل حاجة في كل حتة. برنس in fact هذا الرجل برنس. كان عنده بنك اسمه جي بي مورجان على اسمه يعني يعتبر واحد من أكبر البنوك في أمريكا النهارده. in fact قد يكون البنك الأكبر في أمريكا دلوقتي. المهم في أكتوبر 1907 عمك جي بي مورجان ده بعت لرؤساء أكبر بنوك في أمريكا وقتها. عايزين نقعد ونفكر هنعمل إيه في الأزمة الكبيرة دي؟ فالناس اجتمعت وقعدوا اتكلموا فعلا وأدركوا بصوا يا جدعان احنا محتاجين بنك مركزي في البلد. مش هينفع كده مش عايزين كوارث مالية زي دي تحصل تاني. فالمهم الكونجرس يوافق ويطلع مشروع قانون. هيعمل إيه؟ هينشئ هذا البنك المركزي. ومن هنا كل واحد بدأ يدور على مصلحته. مثلاً الولايات الجنوبية كانت خايفة إن البنك المركزي ده هيدي سلطة كبيرة جدا لواشنطن وول ستريت عليهم. لأن الفلوس كلها موجودة هناك. البنوك على الناحية الثانية كانت عايزة تأكد إن البنك المركزي ده مش هيتمن لي التلاعب فيه من السياسيين. وكانت عايزاه حاجة مستقلة عن الحكومة. ابعد لي يا أسطى الجماعة بتوع واشنطن دول. وهاتك بقى مناقشات ومشادات خمس سنين عشان يستقروا ويتفقوا على شكل هذا البنك المركزي. وبالمناسبة هذه النقاشات ما كانتش بتدور تحت إدارة الحكومة الأمريكية ولكنها كانت بتدور ما بين أصحاب البنوك الكبيرة في جزيرة معروفة اسمها جيكيل في ولاية جورجيا. نادي كده من الأغنياء وأصحاب الأموال زي جي بي مورجان وهنري ديفيدسون وفرانك فاندرليب وبول واربرج. كلها أسامي كبيرة جدا في عالم الأموال. كل دول أصحاب بنوك خاصة بيتناقشوا في إنشاء البنك المركزي الأمريكي. وهنا بقى الرأسمالية قالت للدولة لو سمحت أقعدي أنت على جنب احنا هنظبط الموضوع ملكيش أنت دعوة. ده اللي حدث بالفعل مجموعة من أصحاب البنوك الخاصة هم اللي عملوا البنك المركزي للدولة. ومحدش راحته. تستمر هذه المفاوضات والمناقشات لحد سنة 1913. لحد ما عملوا لنا الفيد الاحتياطي الفيدرالي. The Federal Reserve. الفيدرال ريزيرف ده عبارة عن 12 بنك إقليمي في ولايات مختلفة بيمتلكهم مصرفيين ورجال أعمال من نفس الولاية. ولكن برضه عشان يعني الحكومة ما تزعلش وإن راضيها وتحس إن كل حاجة تمام وإن احنا يعني ما بنعملش حاجة من وراهم، فالفيدرال ريزيرف ده هيكون له بورد أوف غافيرنر أو مجلس إدارة. مكون من سبعة أشخاص. مين اللي بيختارهم دول؟ الرئيس الأمريكي (The Head Of State) رئيس الدولة عشان ما نقولش أوه أنت يا دولة اللي بتختاري. ولكن ده احنا اللي عاملينه. تمام؟ وعشان ندي للدولة فرصة يلا خدي دي عندك كمان مجلس الشيوخ يجب أن يوافق على السبع أشخاص دول. فكده احنا إيه؟ ظبطنا الدولة. المهم أنشانا هذا البنك الفيدرالي بيساعد البنوك لو كانت محتاجة وبيساعد مين كمان؟ الدولة. الله ليه مالها الدولة؟ مش هي اللي عملته؟ هي بس بتشرف عليه. عزيزي المشاهد لو حصل مشكلة كبيرة على مستوى الدولة ما هتاثر في البنوك. هتأثر في الاقتصاد هتخرب الدنيا خالص. فابتدى يحصل كالتالي: الحكومة مثلاً ممكن تحتاج فلوس فتقوم رافعة التليفون ألو. أيوه يا فيدرالي يا ريزيرف والنبي مزنوقين في شوية دولارات. فالاحتياطي الفيدرالي يقول حاضر بس كده من عينا الإثنين بس بالإنجليزي طبعا. فيقوم الاحتياطي الفيدرالي مكلم الخزينة المسؤولة عن المطابع. أيوه يا تريزري عايزين فلوس اطبعها. فيطبع التريزري هذه الدولارات وتفضل يا عم الاحتياطي الفيدرالي خذ الفلوس اهي. يقوم الاحتياطي الفيدرالي (The Federal Reserve) يسلف الحكومة. يا نهار أبيض الاحتياطي الفيدرالي بيسلف الدولة؟ نعم هذه المشاهد مش بس بيسلفها ده كمان بيسلفها بفايدة. يعني يا حكومة يا أكبر دولة في العالم يا أمريكا لو ما دفعتيش الفلوس اللي عليكي بفايدة هنتخذ إجراء. عزيزي المشاهد الحقيقة مش عارف إيه اللي بيحصل يمكن يرفضوا بعد كده أن هم يطبعوا بعد كده ولكن ما اعرفش الحقيقة. طبعا عزيزي المشاهد أنت متلخبط شوية مش فاهم إزاي حاجة عندها هذه السلطة وعندها كل هذه الحاجات، الموضوع صعب. مش سهل. اللي عايزك تعرفه إن هم بيطبعوا دولارات بس لازم ما يكونش عمال على بطال كده. مش أول ما يتزنق اطبع لي يا ابني دولارات. لازم يكون في احتياطي من الذهب. عشان ما يحصلليش تضخم ونبتدي نشوف بقى زي اللي حصل في ألمانيا واللي حصل في زيمبابوي لما الحكومة بتقعد تطبع كده على طول. لازم يبقى العملة بتاعتي ليها احتياطي ذهب. والحقيقة إن ربنا يجزيه الفيدرال ريزيرف كان بيعمل كده فعلاً. ما بيطبعليش دولارات إلا لما يكون قصادها في احتياطي ذهب. وبالفعل النظام الأمريكي وقت الحرب العالمية الأولى اتحسن كتير وبقى يسلف دول عظمى زي مين؟ زي بريطانيا. اللي ما كناش عايزين نعمل زيهم. نعم احنا بنسلفهم دلوقتي. Start from the bottom now we here. المهم بعد التسليف والنمو الاقتصادي اللي حصل في أمريكا والحاجات الكتيرة دي كلها ابتدى الدولار يبقى جامد وقوي. المهم أمريكا حست إنه إيه بقى؟ إيه؟ معلش يعني وضعي العسكري مفيش زيه ده أنا مؤاخذة كده عندي سلاح نووي والوضع الاقتصادي في الحديد زي الفل. عندي ثلثين احتياطي الذهب في العالم فإيه؟ إيه بقى مش الدولار موجود؟ عايزين نفرح بيه، ولسه أمريكا كاسرة عين بريطانيا ومسلفاها فلوس قد كده. أيها المشاهد العزيز فعلاً أمريكا وقتها كانت هي على قار لواحدة ومش شاركت قوي في الحرب وهناك الدنيا متدمرة ومتكسرة. فكل بقى خلاص مش هنلتزم بأي احتياطي ذهب احنا هنفضل نطبع فلوس عشان نسعف الدنيا، الدنيا بتبوظ. في حرب عالمية ثانية مدمرة. مفيش غير عمتك أمريكا هي اللي قاعدة معاها الذهب والدولارات وعمالة تسلف لي. وكله بقى عمال ياخد مفيش خلاص مفيش مش هنلتزم بدام مش هنقدر. أمريكا قالت لك بس هي دي، دي فرصتها عشان أوصل للقمة. Let's make America great. قبل ما I feel again بقى هي دي كانت لسه في مرحلة الجريت. وفعلاً قبل ما الحرب العالمية الثانية تخلص سنة 1944 اجتمع حوالي 730 مندوب من حوالين العالم، 44 دولة من دول الحلفاء بدعوة من أمريكا. في منطقة اسمها بريتن وودز في حتة اسمها نيو هامبشير. عشان إيه؟ عشان يتفقوا على شكل النظام الاقتصادي العالمي الجديد. بعد الحرب العالمية الثانية، ما احنا هنخلص الحرب هنقعد فاضيين كده، لازم نتفق يا حبيب قلبي. وبالفعل عملوا اتفاقية بريتون وودز اللي بسببها نقدر نقول أن هم عملوا ثلاث حاجات أساسية. أولاً عملوا حاجة معروفة بصندوق النقد الدولي وده المفروض أن هو بيسلف الدول الأعضاء. والله أنت يا دولة مزنوقة في مش عارف إيه؟ يلا خدي فلوس. بس هنقعد نحط خطة نشيل مش عارف إيه، نحط مش عارف إيه إجراءات تقشف. يونان قللي لي مش عارف إيه مش عارف إيه اعملي لي مش عارف إيه كده ده النظام الصندوق. ثانياً عملوا البنك الدولي للإنشاء والتعمير (World Bank). ده كان بنك وظيفته يساعد دول الحلفاء اللي تضررت وقت الحرب العالمية الثانية عشان تعيد بناء نفسها. ثالثاً وده الأهم هو اعتماد الدولار كعملة بديلة للذهب في العالم. في الوقت ده زي ما قلنا أمريكا معاها ثلثين احتياطي الذهب في العالم كله. طبعا تقول لي يا نهار أبيض فرنسا تسكت؟ إنجلترا بريطانيا العظمى تسكت؟ نعم تسكت. لسه طالعين من حرب وهتلر كان مبهدلنا. فرنسا دي كانت ثلاث أرباعها محتلة من ألمانيا. هترجع تتكلم تقول إيه؟ وهم الإثنين سالفين فلوس قد كده من أمريكا. ده غير طبعا أن هم كانوا بيطبعوا فلوس كتير فكان هناك تضخم في العملات بتاعتهم. ومعاهمش احتياطي ذهب كتير فاللي أمريكا هتقوله هيتسمع ومحدش يقدر يقول حاجة. وفعلا قرروا أن كل الدول لازم يبقى عندها احتياطي أجنبي من عملة الدولار بدل الذهب. وبكده تقدر تطبع قصاده عملتها المحلية. والذهب كده كده موجود في أمريكا. وأونصة الذهب كانت محددة ب 35$ تقريباً. يا بلاش والله دلوقتي وصل ل 1200$. ما هي طبعا هنعرف بقى بعد كده ليه؟ ليه حصل كده؟ عمك نيكسون. واحد يقول لي الله معلش يعني مش الدولار ده مازال عملة ورقية؟ عزيزي المشاهد ما قلت لك معاها ثلثين احتياطي الذهب فانت يوم ما معاك أي دولار تروح لعمتك أمريكا تقول لها خدي يا أمريكا أنا عايز ذهب بالدولار ده فتديك اه هات لي 35$ اتفضل أونصة الذهب بتاعتك. واحد يقول لي طب ما يمكن أمريكا تلعب في الموضوع وتبتدي تطبع دولارات أكتر؟ عزيزي المشاهد الفيدرال ريزيرف وظيفته إنه يطبع كمية محددة من الدولارات على قد الذهب اللي موجود لا أكثر ولا أقل. وبالفعل بدأت البلاد دي تستخدم الدولار كعملة عالمية لهذا النظام الاقتصادي الجديد. أي دولة عايزة تشتري حاجة تانية من دولة بتدفع لها بالدولار. ماليش أنا دعوة بالجنيه المصري بتاعك ده ولا البيزو المكسيكي. المهم يعني كل واحد يعرف الدولار بتاع أمريكا. ما تجيش بعملتك تتكلم معايا عايزين الأخضر اللي عليه الراجل المكشر ده. ليه؟ لإن دي عملة مربوطة بالذهب وليها قيمة حقيقية أونصة الذهب ب 35$. ماليش فيه. فبدأ الاقتصاد الأمريكي يزدهر ويكبر. وواحدة واحدة قعد على عرش الاقتصاد العالمي، ليه؟ لإن كل العمليات الاقتصادية اللي بتحصل في العالم بتحصل بالدولار الأمريكي. وبقى هو أهم بنك نوت في العالم. واحد يقول لي أهم من اليورو؟ عزيزي المشاهد لم يكن هناك يورو. in fact على حسب موقع الفيدرال ريزيرف الاحتياطي الفيدرالي. ففي 31 يناير 2019 كان في 1.7 ترليون دولار بيتداول حوالين العالم. جمارك دولية بقى بورصة عالمية تجارة خارجية بيع بترول كل ده بيحصل بالدولار الأمريكي. ثم تأتي سنة 1965 ويطلب الرئيس الفرنسي شارل ديجول من أمريكا أنه يبعت شحنة دولارات عشان يغيروها له ذهب. بس وقتها زي ما حضرتك عارف عزيزي المشاهد أمريكا كانت مشغولة في حرب فيتنام. فقالت له معلش مش دلوقتي. لحد سنة 1971 وتيجي المعلش الكبيرة. يطلع الرئيس الأمريكي ريتشارد نيكسون على التلفزيون هو بيقول معلش يا جماعة احنا كان بقى لنا كام سنة عمالين نطبع دولارات من غير ما يكون في احتياطي ذهب قصادها. نيكسون يكمل معلش أصل احنا اتزنقنا في حرب فيتنام فكلمت الفيدرال ريزيرف الاحتياطي الفيدرالي أرجوك اطبع لنا دولارات من غير ما يكون عندك احتياطي ذهب. طبعا تقول لي مش الفيدرالي المفروض يعترض يمكن يكون اعترض بس it's America و its power و حاجات كتيرة ما نعرفش برضه. يعني ممكن يكون هناك اجتماعات ما نعرفش عنها حاجة، ولكن نيكسون بيتأسف يعني عن اللي حصل ده و بيعتذر. نعم والشعب الفرنسي أقول له إيه؟ وده أيها المشاهد الجميل عرف بالنيكسون شوك أو صدمة نيكسون. صدمة نكست الاقتصاد العالمي. طبعا الدول يا عزيزي المشاهد في حالة حيرة طب الالتفاف اللي كنا عاملينه على بريتون وودز سنة 1944 واتفقنا أن كل دولار له ذهب موجود فيه. إيه ليه خدعتنا؟ طبعا الدول بقى يعني في حالة من الانهيار. عزيزي المشاهد أمريكا اديت العالم كله على قفاه. واللي مضحك في الموضوع إن يا ريتهم صرفوا الفلوس دي على حرب وكسبوها. يعني هم صرفوا الشيء الفلاني على حرب فيتنام وفي الآخر ما كسبوش الحرب. كانت قوة عظمى معاها ثلثين احتياطي الذهب في العالم بتحارب مليشيات. مليشيات مسلحة حاجة المفروض أن هي سهلة ودولة معاها نووي هنا. ما كسبتش الحرب. ضيعت على الناس فلوسها وفي الآخر ما كسبتش الحرب. المهم اللي أمريكا عملته ده كان حاجة خطيرة جدا. تتخيل معايا كده مثلاً أمريكا تصحى الصبح عايزة شوية بترول فتطبع شوية دولارات وتشتري بيهم البترول اللي هي عايزاه. عايزة الكترونيات وأجهزة فتطبع شوية دولارات تانيين وتشتري بيهم الأجهزة اللي هي عايزاه. أمريكا يا ماما يا حبيبتي أنت لتر اللي بتجيبي حاجات ليها قيمة بشوية ورق. What the hell؟ ما خلاص وصلنا لمرحلة جنون العظمة ده. مفيش حاجة تحكمني. أيوه يا فيد يلا يلا يا حبيبي. على رأي المسرحية: يلا يا عادل ينزل بفلوس بقى. طبعا هل الدول هتسكت على اللي أمريكا بتعمله ده؟ هنسيبها تعمل اللي بتعمله ده؟ شوف يا عزيزي المشاهد الطيب اللي يعني قلبه أبيض. لا وأه حكم القوي على الضعيف. Sometimes yes but sometimes no. هفهمك دلوقتي أمريكا أخلت باتفاقية بريتون وودز والدولار ما بقاش بيتطبع باحتياطي ذهب قصاده. ومن ناحية تانية دول كتير في العالم الدولار بقى مهم جدا للبيزنس بتاعها وبيتعاملوا بيه بشكل كبير واقتصادها قايم عليه. غير طبعاً إن السوق الأمريكي من أكبر الأسواق العالمية المستهلكة لكل حاجة. فبيشتري حاجات كتير فبنروح نبيع له فالدول اللي بتعمل بيزنس في أمريكا اللي هي كتير بتطلع بسبوبة دولارات كويسة جدا من هناك. والدول دي أوريدي لبست فيه خلاص معاها منه كتير. هنرمي الدولارات ونقول معلش يعني مفيش ذهب؟ لا احنا نثق في أمريكا أكيد ان شاء الله يعني أمريكا عندها سياسة مالية محكمة ومنظمة للتعامل مع حوار طباعة الدولار ده من غير احتياطي ذهب. وهو ده بالظبط اللي بعض الدول عملته وثقت في الحكومة الأمريكية وفي الفيدرال ريزيرف وإن هم هيتعاملوا مع موضوع الدولار ده بشكل مسؤول وعادل. لكن بعض الدول الثانية الحقيقة ما عجبهاش هذا الكلام. لا ماليش دعوة أنا ما أحطش نفسي تحت رحمة حد. احنا لازم نعمل عملة ثانية موازية للذهب غير الدولار المضروب ده. تخيل عزيزي المشاهد بيقولوا على الدولار مضروب ده الدولار ده لما بينزل هنا بيرن. لكن هي دول بقى متكبرة عشان كده ربنا يعني ما هو احنا شوفنا اليورو إيه اللي حصل في أزمة اليورو سنة 2012؟ المهم بعدهم عملوا عملات احتياطي جديدة زي الاتحاد الأوروبي اللي عمل اليورو اللي بيمثل تقريبا 20% من إجمالي عملات الاحتياطي في العالم. عندك كمان الين الياباني اللي بيمثل تقريبا 5% من إجمالي عملات الاحتياطي في العالم. والاسترليني بقى واليوان الصيني والفرانك السويسري كله. طب حلو عندنا عملات موازية للذهب غير الدولار أهو. واحد يقول لي طب ما خلاص بقى عايزين نعاقب أمريكا وما نستخدمش الدولار. طب ما يلا كلنا ناخد الفرانك السويسري ونفكس لأمريكا. أيها المشاهد ما ينفعش تفكس لأمريكا. معلش سويسرا جميلة جبال بحيرات منظر جميل شوكولاطات ولكن دي بلد قد كده. عدد سكانها 8.5 مليون تقريبا ده حتى ما جابوش سكان القاهرة هيطبعوا فرانكات كتير ليه؟ ما هو العدد أوريدي صغير. فأصلاً مفيش فرانكات سويسري تكفي العالم. أمريكا بقى عندها أكتر من 300 حاجة و 30 مليون بني آدم. وطابعة 1.7 ترليون دولار. المهم الدولار يبدو أن هو أنسب أوبشن حتى بعد ما أولاد اللذين عملوا اللي عملوه. ليه؟ عشان في منه كتير وعشان احنا معانا منه كتير وعشان هنضطر نشقلب الأنظمة الاقتصادية بتاعتنا. ونصيغها من أول وجديد لو سيبنا الدولار فلبسنا في الدولار. هي علاقة توكسيك شوية بس مبنية على الثقة. الثقة في الفيدرال ريزيرف الاحتياطي الفيدرالي اللي لبسنا قبل كده وقال لنا يا جماعة مفيش دولارات هتطبع إلا لما يكون في احتياطي ذهب. يا فرحتي بيك. من ساعة ما أمريكا بقت دولة عظمى والنظام الاقتصادي العالمي بيعدي بمراحل مختلفة وتقلبات كتير. بلاد بتفلس وبلاد بتبقى أغنى وبلاد بتزود صادراتها وبلاد بتزود صناعتها. ولكن يمكن الحاجة المشتركة بين كل المراحل دي هي أن العملة الأساسية المتداولة في هذا النظام هو الدولار الأمريكي. ليه؟ لإنه عملة أقوى دولة في العالم وبالتالي فهو أقوى عملة في العالم. دول كتير عملت ما يسمى بالـ Rate Anchor أو أنها تربط العملة بتاعتها بالدولار بسعر صرف ثابت زي معظم دول الخليج مثلاً. عشان عملتها ما تفقدش قيمتها، ده غير طبعا ده بيسهل عملية بيع البترول مع أمريكا. الدولار بالرغم من أي مشاكل حصلت أو هتحصل على مستوى العالم إلا أنه لازال له قوة وتأثير. ليه؟ بسبب قوة الاقتصاد الأمريكي اللي بيدعمه فانت لو معاك دولار عزيزي المشاهد فأنت غالباً هتعرف تعمل حاجات كتير. لأن اقتصاد أمريكا كله هو اللي بيضمن لك قوة الورقة الخضر اللي معاك دي. وأنا بضمن لك قوة الحلقات اللي فاتت والحلقات اللي جاية والمصادر اللي تحت الفيديو والقناة نشترك في القناة. وبس عزيزي المشاهد أنت يوم ما تعمل ديل معايا أنا لا يمكن أخدعك كما فعل الفيدرال ريزيرف إلا لو جالي مكالمة من الرئيس ترامب أو نيكسون وقتها يعني وقال لي اعمل حاجة زي كده. طبعا احنا يعني سدادين. هم يزعلوا من أمريكا لكن أنا لا يمكن أزعل أبدا. لأن أنا أحب الدولار وأحب أخد دولارات كتير. كنت قلت في أحد الحلقات مرة أن انا منتظر من السيد إيلون ماسك مليون دولار. والله مليون دولار بس. ولا حاجة. أنت معاك حاجة و 20 مليار دولار. ما تدي للناس بالعملة بتاعت الدولة اللي ساعدتك. لأنا أروح للسويسريين وآخد الفرانكات. ماليش دعوة. ولو مفيش فرانكات مفيش شوكولاتات. الشيكولاتة السويسري. Dupletron.
