[0:00]التيك توك، تطبيق ما اتوقع احد يختلف انه من الانجح اذا ما كان الانجح بالتاريخ. داخله عالم لا نهائي من المحتوى والشخصيات والثقافات المختلفه وغالبا ما انك دخلت المقطع فانت جزء من هذا العالم. فالسؤال اللي بحاول اجاوب عليه بالمقطع هو كيف عالم التيك توك هذا ياثر بحياتك وتحديدا كيف بيسرقها؟ بالبدايه حاب اوضح اني ما راح اتكلم عن كيف التيك توك يخليك مدمن للدوبامين والخرابيط ذي. لاني اتوقع كلنا سمعنا كلام كثير عن الموضوع نوعا ما صار محلو. فاللي بتكلم عنه كيف التطبيق ياثر عليك بعد ما تقفله.
[0:39]تيك توك برين او بالعربي عقل التيك توك هو مصطلح علمي حديث يصف بعض الاثار السلبيه اللي تسبب فيها التيك توك والمحتوى القصير بشكل عام على مخك. مثل التوتر والخمول وغيرها الكثير بس اقوى واحده وتاثير على المستخدمين هي تقليل مدى التركيز. بما ان التيك توك اساسه هو المحتوى القصير فانت طول الوقت قاعد تتابع مقاطع قصيره مختصره تعطيك الزبده ب 30 ثانيه كحد اقصى. فمع الوقت بيصير هذا هو الطبيعي عند مخك. 30 ثانيه هي كل اللي احتاجه عشان اخذ اللي ابيه من ذا الشيء. فبعد ما يتعود مخك على ذي الاليه وجيت تسوي اشياء ثانيه تتطلب وقت وتركيز لمده اطول ولو بشوي بتشوف انك تمل وتتشتت وتواجه صعوبه بانك تركز على اللي قاعد تسويه بشكل عام. واكيد كلكم لاحظتوا ذا الشيء فيكم بعد فتره من استخدام البرنامج. يعني عن نفسي لاحظت اني صرت بصعوبه اتابع اي شيء سواء مقطع يوتيوب او فيلم بدون لا امسك جوالي واحاول اتعدى السكور الحالي بتترس. واثر ذا الشيء واضح وضوح الشمس لو تناظر الناس اللي حولك. يعني بالفتره الحاليه اذا مجموعه اخويها جلسوا مع بعض لازم كل واحد وهو يسولف يكون ماسك جوالي يسوي شيء ثاني على جنب. سواء مشغل التيك توك ويناظر مقطع سريع بين لحظات الصمت او يلعب لعبه او يقلب بالجوال بشكل عام. لان زي ما قلت كلهم مخهم تعود انه بعد كل 30 ثانيه بتجي جرعه دوبامين. والحين تتوقع منهم يسمعون خويهم يبربر لساعات عن الملحمه السياسيه اللي قاعد تصير بمانجا هنتر وكيف توغاشي قاعد يكتب ارك ممكن يكون الاعظم بتاريخ الفن بدون ما يطفشون؟ مستحيل. فصار التيك توك شيء اساسي بيومك ولازم يكون بيدك في حال لا سمح الله لو لمده ربع دقيقه صار ما عندك شيء ممتع تركز عليه تفتح البرنامج وتشوف لك كم مقطع. يعني وانت تنتظر يدخلك جيم ولا وانت واقف بالاشاره ولا باهم واحده وانت ذاكر. عارف عارف قلت الكلمه المحرمه اللي ما حد يبي يسمعها ويشوف مقطع يوتيوب لكن لازم اتكلم عنها لان بالنهايه المذاكره ممكن اكثر شيء يتاثر من مدى التركيز القصير حقك. وبتشوف عاقب ذا الشيء بشكل واضح. في دراسه اجريت بعام 2013 بهدف فهم كيف الجوال ممكن ياثر على دراسه الطلاب. فجابوا مجموعه طلاب وقسموهم الى قسمين، القسم الاول قالوا لهم لا تفتحون جوالكم بالمحاضره نهائيا. اما القسم الثاني قالوا لهم بين كل فتره وفتره شيكوا جوالاتكم. فبعد ما خلصت المحاضره جابوا القسمين واكتشفوا اللي ما مسكوا جوالاتهم كتبوا ملاحظات او نوتات اكثر بنسبه 62% من اللي شيكوا جوالاتهم. وايضا قدروا يتذكرون معلومات من المحاضره بسهوله وبدقه اعلى من اللي شيكوا جوالاتهم فاكيد يوم اختبروهم جابوا درجات افضل. طبعا نتيجه الدراسه بعيده كل البعد من انها تكون صادمه كلنا بشكل او باخر ندري ان الجوال شيء سلبي بالمذاكره. لكن اللي ابيك تنتبه عليه هو ان الدراسه هذه كانت ب 2013 يعني قبل 10 سنين تقريبا. ايامها مدى تركيزهم اكيد اطول بكثير من الحين بحكم انه باقي ما انتشرت ظاهره المحتوى القصير وبدا التلوث العقلي اللي سبب التيك توك. واللي هدفه انه يحاول يقلل مدى تركيزك لاقل مده ممكنه فبدال ما وانت تذاكر بين فتره وفتره تشيك جوالك تصير ما تقدر تتركه من الاساس لان بالنهايه هو المستفيد من ذا الشيء. تركيزه اقل يساوي تطفش من كل شيء يساوي تقعد ساعات مهوله على البرنامج يساوي التطبيق يطلع فلوس. ويمديك تلاحظ ذا الشيء بتطور سرعه وهيئه المقاطع من يوم ما بدا البرنامج. بالبدايه كانت مجرد مقاطع قصيره مختصره بعدين صارت مقاطع قصيره جنبها جيم بلاي ولا واحد ينظف اقذر سجاده بالتاريخ. والحين صار يمديك تحط سرعه المقاطع اثنين اكس في حال اللي يصير بمخك ما كان كافي. فبس ابيك تتخيل وش بيصير بعد 5 و 10 سنين من الحين. ولاي درجه عقولنا بتتاثر من لعنه المحتوى القصير.
[4:19]ما حد يختلف ان التيك توك يستهلك من وقتنا كثير لكن كم بالضبط؟ كنت ابي احصائيه لكم ساعه يقضي الشاب العربي خصوصا على التيك توك وبعد بحث طويل على النت وقراءه كثير من الاحصائيات للاسف ما لقيت اللي ابيه. لان اللي ابيه نوعا ما ف دقيقه واغلب اللي لقيته تكون عامه بزياده او ما على الفئه اللي انا ابيها اللي هم الشباب العرب. فكان لازم ارتجل واصنع اجوبتي الخاصه. بالبدايه احتاج مجموعه كبيره من العرب اعمارهم بين 15 الى 24 سنه تقريبا. فقررت الجا الى متابعيني على الانستغرام مع انهم هم الفئه المستهدفه من الاساس. فنزلت ستوري وقلت لهم يشوفون متوسط استخدامهم اليومي للتيك توك ويكتبونها بالمربع هذا عشان بعدين اجيب المتوسط حقهم كلهم ونشوف كم يطلع. طبعا مو شرط تيك توك بس اي منصه محتوى قصير ثانيه تنفع زي ريلز الانستا او اليوتيوب شورتس او اذا كان فيك خلل عقلي سبوت لايت حق السناب. والحق ينقال واجهت صعوبه من سوء فهم بعض العباقره اللي قاموا يكتبون لي قصص حياتهم ولا استخدامهم الاسبوعي للبرنامج. لكن الحمد لله على مروعتها على خير وتقريبا شارك 200 شخص. فجبت متوسطهم الكلي والرقم اللي طلع معي هو اربع ساعات. اربع ساعات يوميا هو متوسط استخدام الشاب العربي للتيك توك. المهم بعدها انتقيت بعض اخوي اللي شاركوا وسالتهم سؤال الاربع ساعات دي تتذكر منها شيء؟ كلهم كان ردهم لا. ما حد منهم يتذكر شيء مع انهم شافوا الاف المقاطع بالمده ذي ومتاكد لو يلي تتابع المقطع الحين سالت نفسك نفس السؤال جوابك بيكون نفسهم. وانا معكم ما حد منا يتذكر شيء من الاف المقاطع واذا مره مره ممكن تتذكر مقطع ولا مقطعين الحسوني وهو يتقمص الادوار باداء اوسكاري. لكن المقطعين دي يمكن مجموعهم دقيقه واللي تشكل اقل من 1% من الاربع ساعات اللي ما تذكرتها فمع احترامي الكبير الحسوني لكن ما تستاهل. وذا شيء طبيعي مقطع او معلومه تاخذها ب 15 ثانيه على السريع اكيد ما راح تبقى بمخك مثل ما جت بسهوله بتروح بسهوله. لدرجه ممكن يجيك مقطع يعطيك طريقه تصير فيها ملياردير بنسبه نجاح 100% وكل اللي بتسويه بعد ما تخلصه انك تروح للمقطع اللي بعده وتنساه. فالان تقريبا نقدر نقول ان اربع ساعات من يومنا اختفت. اربع ساعات بدون اي ذكرى او اي معلومه او اي شيء يثبت اننا عشناها. مجرد فراغ. وعارف البعض ممكن ما يشوفها كرقم كبير او شيء يستحق الذكر. يعني اليوم 24 ساعه واربع ساعات تشكل 15% تقريبا من يومك فقط فايش فيها لو راحت؟ صح؟ طيب خلونا نسوي بعض العمليات الحسابيه البسيطه. اول شيء زي ما قلنا اربع ساعات باليوم على التيك توك اضربها في سبعه عشان يعطيك عدد الساعات بالاسبوع اضربها في اربعه عشان يعطيك بالشهر واضربها ب 12 يعطيك بالسنه. وبحكم ان متوسط عمر الانسان 80 سنه فلنفترض ان عمرك اللي تشوف المقطع 20 بقى لك 60 سنه ان شاء الله. فنضرب ب 60 عشان يعطينا مجمل عدد الساعات اللي بتقضيها على التيك توك طول مدى حياتك القادمه فيطلع الناتج 80640 ساعه يعني تقريبا 10 سنوات. ابيك بس توقف شوي وتستوعب الرقم ذا. عقد كامل من حياتك راح الفاضي عقد كامل من حياتك راح بدون ما تتذكر منه اي شيء. عقد كامل من الفراغ. يعني بالضبط كانك دخلت بغيبوبه 10 سنين واللي هو شيء اغلبنا ممكن يعتبره كابوس ومصيبه. تنسرق حياتك وينسرق شبابك وانت حي لكنك بلا حول ولا قوه. ومع ذلك نسويها بشكل يومي. كلها بسبب الاربع ساعات اللي ما كنت طاق لها خبر بالبدايه اللي الحين تراكمت سرقت جزء املاق من حياتك. وادري اغلبكم بيقول طيب هذه طريقه ترفيه عن نفسي ومو شرط اليوم كله يكون شغل وتعب واحيانا تبي ترتاح وهنا اقول لك 100% صادق. وانا ما قاعد اعطيك اسلوب نصح الاهل اللي لو تستغل وقتك ذا مذاكره ولا بشيء مفيد احسن لك. لا اللي اقوله ان يمديك تستخدم وقتك ذا بشكل ترفيهي افضل. يعني بالعشر سنين ذي كان يمديك تتابع هنتر 1613 مره او تتابع 40330 فيلم او تلعب 2688 لعبه او تقرا 20160 كتاب او تروح النادي ولا تطلع مع اخوياك او اهلك ومليون شيء ترفيه ثاني. وبالنهايه الاشياء ذي بتكون رفاهتك وبنفس الوقت بتبقى بمخك لمده طويله على عكس الترفيه المنسي اللي تستهلكه بالمحتوى القصير. يعني الفيلم او الكتاب الرهيب بتستمتع فيهم وغالبا بيبقون بذاكرتك السنين. وحتى ممكن رسالتهم وهدفهم تغير من حياتك الى الافضل زي ما صار مع ناس كثير. او النادي مثلا شيء ترفيهي وبنفس الوقت يحسن من صحتك وجسمك وجوده حياتك بشكل عام ونفس الشيء ينطبق على كل اللي ذكرته خصوصا هنتر. فاللي ابي اوصل ان الترفيه مو لازم يساوي مضيعه وقتك وحياتك. وقتك هذا استغله بصنع ذكريات جميله بتبقى معك وبتتذكرها بفرح الى اخر نفس. وخلاصه هدفي بالفيديو ذا اني ابيك تسال نفسك كل ما جيت تدخل التيك توك او اي منصه محتوى قصير ثانيه مستعد تنسرق 10 سنين من حياتك؟ تقديم كتابه ومونتاج دهله
