يا ترى السماء شكلها إيه ؟ - الحلقة التاسعة من "مين بيقول إيه؟! .." مع أبونا داود لمعي

[0:04]هو إيه شكل السما؟ إحنا دايماً نقول إن إحنا رايحين السما. ونقول أبانا الذي في السماوات. طب هما اللي في السما بيعملوا إيه؟ وحاسين بإيه؟ وشايفينا ولا مش شايفينا؟ بصوا حبايبي، أنتوا شايفين القمر؟ شايفينه من بعيد فاكرينه دورية كدة أو كورة. بس القمر كبير أوي. ما حدش فينا راح وشاف جوا القمر في إيه؟ إحنا ما حدش فينا يعرف يوصف اللي جوا السما غير اللي راحوا السما. مين صاحب السما؟ ربنا يسوع. جه كلمنا عن قد إيه السما حلوة أوي. بس لإنه الوصف صعب، يعني عشان يقول لنا حلو أوي أوي. طيب إحنا حلو بس مش فاهمينه مش عارفين نتخيله. لإنه إحنا ما نعرفش نشوف غير اللي بنشوفه في الأرض. ونسمع الكلام اللي بنسمعه في الأرض. بس السما ليها كلام تاني، وليها شكل تاني. وعشان كده مش هنعرف نتخيلها من جمالها. يقوم ربنا يقول لنا في الإنجيل إيه؟ عارفين كل حاجة وحشة في الأرض مش موجودة في السما. إيه اللي بيزعلكم في الأرض؟ إنك أنت بيجيلك صداع أو وجع في بطنك، ما فيش وجع خالص في السما. طيب إيه اللي بيضايقك؟ إنك أنت مثلاً بابا يسافر أو صاحبك يبقى مشغول عنك، هنبقى مع بعض على طول في السما. إيه اللي بيزعلك تاني في الأرض؟ الشمس سخنة، ما فيش شمس في السخنة في السما. الدنيا برد، ما فيش برد في السما. في ناس زعلانة، ما فيش حاجة اسمها زعل في السما. الأرض دي فيها خناقات وفيها حاجات وحشة، ما فيش ولا خناقة في السما ولا حاجة وحشة في السما. يبقى حتى لو مش عارفين نقول السما شكلها إيه؟ نقول إنها حلوة أوي لإن أي حاجة وحشة في الدنيا دي مش موجودة في السما. طب إيه بقى حلو في السما؟ ربنا يسوع نفسه هنشوفه بعنينا. يبقى قاعد وسطينا وماما العذراء والملايكة والقديسين اللي بنحبهم. والناس اللي سبقونا للسما قرايبنا وحبايبنا اللي سافروا للسما هيستقبلونا. وهنقعد مع بعض على طول فرحانين أوي. وعشان فرحانين أوي مش هناخد بالنا من الأكل والشرب مش هنحتاج ناكل. هنبقى فرحانين من غير أكل. ومش عطشانين حتى الماية مش هنحتاج نشربها. هنبقى مبسوطين جداً من غير ما نتعب. ومن غير ما نحارب ولا نزعل ولا يبقى في وجع. ربنا قال لنا كده، تبقى السما حلوة أوي. الناس اللي في السما فرحانين أوي وبيقولوا لنا يلا تعالوا بسرعة. ده الأرض دي مش حلوة ده إحنا عندنا حاجة أحلى كتير أوي. حد فيكم فاكر لما كان في بطن ماما؟ أكيد مش فاكر. لما كنت جوة بطن ماما كنت عارف إيه بره ماما؟ كنت تعرف يعني إيه شجرة؟ ما تعرفش طبعاً تعرف يعني إيه عربية؟ جوة بطن ماما ما فيش حاجة خالص، بس أنت كنت مبسوط برده. إنما لما بقيت بوي وجيرل بقيت ولد وبنت وخرجت كده بقيت تروح الحضانة وتروح المدرسة وتلعب. لقيتها عالم تاني ما كنتش تقدر تعرفه وأنت في بطن ماما. فكروا كده كأن إحنا دلوقتي في بطن الأرض، جوة عالم اسمه الأرض. بس في عالم تاني حلو أوي مش هنعرف نقول لكم جماله قد إيه. بس ربنا وعدنا إنه حلو أوي أوي أوي. وأحلى حاجة فيه هو ربنا نفسه هنبقى معاه على طول.