[0:00]هل صحيت قبل كده من النوم على وجع حاد في القدم بالذات في الاصبع الكبير من القدم، لقيته لونه أحمر ومنتفخ ومتورم؟ هل حصل قبل كده إن جالك انتفاخ أو تورم في الركب أو كيعان أو الرسغ؟ هل في حد قبل كده قال لك إن عندك أملاح في القدم أو أملاح في الكعب؟ هل بعد كل الحاجات ديت كلها تم تشخيصك بمرض النقرس أو حد قال لك احتمال يبقى عندك مرض النقرس؟ دي الحاجات اللي إن شاء الله هنتناقش فيها في هذا الفيديو، هنحاول مع بعض نتعلم أكثر عن مرض النقرس، هنحاول نفهم إزاي بيحصل أسبابه، إزاي ممكن إننا نحمي نفسنا منه. إن شاء الله الفيديو دوت هيكون مفيد لكم فخليكم معانا.
[0:44]أهلا وسهلا بيكم، أنا حمدي محمد عبد العزيز، مدرس واستشاري أمراض الباطنة العامة والروماتيزم والمناعة أعمل حاليا في الولايات المتحدة الأمريكية. ودي قناة الاستشاري، قناة هدفها نشر العلوم الطبية الصحيحة ومحاربة الجهل والخرافات اللي ممكن تحصل في الدنيا والطب والصحة. النهارده هنتكلم عن مرض النقرس أو داء الملوك كما كان يعرف سابقا، وعشان نفهم إيه هو مرض النقرس محتاجين نعرف إيه هو حمض اليوريك أسيد؟ حمض اليوريت أو اليوريك أسيد هو الحمض المسؤول عن حدوث مرض النقرس لما بيزيد بمستويات معينة في الدم. طيب مش بس بيزيد في الدم لا كمان بيبتدي يحصل له إنه يبتدي يترسب في المفاصل. بييجي منين الحمض دوت؟ بييجي من الأكل اللي إحنا بناكله. في أكل معين إحنا بناكله بيتم التعامل معاه داخل الجسم، لما تحصل هذه العملية الكيميائية ينتهي بتكوين حمض اليوريك أسيد. في الحيوانات والكائنات حية ثانية كثيرة بيحصل إن في حمض ثاني بيقدر إنه هو يكسر هذا اليوريك أسيد أو حمض اليوريك. في البني آدمين أو البشر ما فيش هذا الحمض موجود، وبالتالي إحنا بنخلص من هذا الحمض عن طريق إنه بينزل مع البول. وهنا ممكن نستنتج أول حاجة إن مرض النقرس بيحصل لما يزيد حمض اليوريك أسيد. ودوت بيحصل نتيجة إما إنك أنت أكلت زيادة والتكوين زاد داخل الجسم أو إن الكلى ابتدأت يضعف قدرتها على إخراج هذا الحمض مع البول. فهنا زي ما قلت هتبتدي تترسب الحمض اليوريك دوت يبتدي يترسب داخل المفاصل وممكن ساعتها إن هو يعمل النقرس اللي إحنا متعرفين عليه. نفس الحمض دوت أو الأملاح اللي هي لما بيذوب الحمض ممكن تحصل إنها تترسب كمان في مناطق تحت الجلد. أشهر مكان بيبقى دائما حوالين الكوع تلاقيها ابتدت تعمل زي كلكيعة كده صغيرة ممكن تكبر لحد ما تبقى زي حجم كورة صغيرة مثلا كرة البينج بونج كده أو كرة الجولف. ممكن كانت تترسب في داخل الكلى أو في مجرى البول وساعتها هتعمل لنا أملاح وممكن كمان تعمل لنا حصوات. ففي بعض الناس بيجي لها حصوات في الكلى وهذه الحصوات تكون مكونة أصلا من حمض اليوريك. فهنا بقى نوصل للسؤال اللي بعد كده: ليه في بعض الناس أصلا ممكن يزيد عندهم حمض اليوريك أسيد؟ زي ما قلنا الموضوع في الأول ممكن يبقى له علاقة بالأكل، طيب الأكل زي إيه مثلا؟ هنقول أكثر حاجة وأشهر حاجات طبعا هي اللحوم الحمراء وبعض أنواع الخمور بالذات البيرة يعني. كمان السي فود ديت يمكن أشهر حاجات وهنرجع ثاني للنقطة ديت بعد شوية. خليني أتفق إن أول حاجة وأهم حاجة هي نوع الغذاء اللي أنت بتاكله. ثاني عوامل ممكن تأثر هي الجينات بتاعتنا. بعض الناس جينيا عندها جينات معينة بتخليها أكثر عرضة إنها تحوش حمض اليوريك وبالتالي أكثر عرضة إن يجي لها مرض النقرس. في شوية حاجات ثانية يعني مثلا المرض دوت بيحصل أكثر في الذكور أكثر من الإناث. طبعا هو بيحصل برضه في الإناث لكن تحديدا بيحصل أكثر بعد انقطاع الدورة الشهرية. كمان كل ما يزيد العمر كل ما نسبة حدوث النقرس بتزيد. اللي فاتت ديت دي شوية حاجات أنت ممكن ما تقدرش إنك أنت تتحكم فيها، طبعا باستثناء الغذاء بتاعك. لكن في شوية حاجات أنت ممكن تتحكم فيها وهي برضه تؤدي إلى حدوث مرض النقرس. مثلا الوزن الزائد، مثلا مرض الضغط ومرض السكر بالذات لو إحنا مش متحكمين فيهم كويس. كمان بعض الأدوية، بعض الأدوية زي مثلا أنواع من مدرات البول أو العلاجات الكيماوية أو أدوية أخرى ممكن إنها تتسبب في حدوث مرض النقرس. بمعنى أدق زيادة حمض اليوريك أسيد وبعد كده حدوث مرض النقرس. هنا نوصل لسؤال مهم جدا ودائما النقطة ديت بتتسئل فيها كثير قوي من مرضى العيادة وكويس إني افتكرتها: هل كل الناس اللي عندهم زيادة في حمض اليوريك في الدم هيجي لهم مرض النقرس؟ يعني هل إحنا محتاجين نعالج كل شخص عنده حمض اليوريك عالي في الدم بتاعه حتى لو ما كانش جاله قبل كده آلام مفاصل أو أي أعراض ثانية من أعراض مرض النقرس؟
[4:47]الإجابة هي: لا، مش كل الناس هتتعالج. أيام زمان أيام زمان يمكن من 15 20 سنة كان بيتكتب في كتب الطب إن إحنا محتاجين نعالج هايبر يوريسيميا أو ارتفاع حمض اليوريك. لو وصل لدرجات معينة زي مثلا أعلى من 10 أو حاجات زي كده لكن عامة ده ما عادش موجود حاليا والموضوع دوت اتغير وما بقيناش بنعالج ارتفاع حمض اليوريك إلا في ناس معينة. في يعني نطاق معين يعني ودي حاجات لازم يحددها هو الطبيب لكن بشكل عام ما بقاش إن إحنا محتاجين نعالج كل الناس اللي بيجي لها حمض اليوريك أسيد عندها عالي. ليه؟ لإنه يا جماعة مش كل الناس اللي عندها حمض اليوريك أسيد العالي أو معنى أدق أغلبية الناس مش هيجي لهم مرض النقرس بس لمجرد إن هو حمض اليوريك أسيد بتاعهم عالي.
[5:39]أتمنى تكون النقطة ديت وضحت في دماغكم، ولو كنت وصلت للنقطة ديت من الفيديو وعجبك الكلام لحد دلوقتي وشايف إن الكلام اللي إحنا بنقدمه مفيد. ما تنساش تدوس على علامة اللايك وتشترك معنا في القناة، أنا عارف الكلام دوت ممل جدا وتسمعه طول الوقت في كل فيديوهات اليوتيوب لكن الموضوع فعلا بيفرق مع قنوات اليوتيوب فشكرا جزيلا على دعمكم لينا. السؤال اللي بعد كده: مرض النقرس دوت بيظهر إزاي؟ قلنا أهم حاجة هو حاجة اسمها الاكيوت أتاكس أو أرترايتس. يعني إيه؟ يعني أنت ممكن تبقى قاعد في حالك حرفيا، داخل تنام ما فيش أي مشاكل عندك خالص تصحى في نص الليل الساعة 3 الفجر. تصحى على إيه؟ تصحى على تنميل ويتحول بسرعة لوجع بالذات يعني لو هيجي لك في صباع رجلك الكبير، أشهر مكان بيحصل فيه لكن برضه ممكن يحصل في مفاصل ثانية. يعني مثلا المنطقة الوسطى في القدم ممكن يحصل فيها، ممكن يحصل في الركب، ممكن يحصل في اليد ومنطقة الرسغ، ممكن يحصل في الكوع وممكن يحصل في أماكن ثانية. مرة واحدة بدون أي مقدمات، وجع رهيب شديد جدا، مش قادر تحط الغطاء على المفصل ومش قادر تحط رجليك على الأرض هو ده مرض النقرس. طبعا في مرض ثاني اسمه السيودو جاوت أو اللي هو النقرس الكاذب يعني. ده مرض ثاني ممكن لو حابين نتكلم عنه في يوم من الأيام اكتبوا لي تحت في التعليقات وأنا إن شاء الله هتكلم عنه لإن ده مرض شبيه بالنقرس لكن ما هو النقرس ومش كل العلاجات بتنفع معاه وليه تكات مختلفة خاصة بيه. دي أشهر حاجة بييجي بيها مريض النقرس، إيه ثاني ممكن ييجي بيه؟ ممكن ييجي بحاجة اسمها كرونيك أرترايتس. يعني إيه؟ يعني إن أنت عندك وجع المفاصل بقى وجع مزمن. الناس ديت ممكن كمان للأسف يتراكم اليوريك أسيد حوالين جوه المفصل ويعمل زي كلاكيع كنا تكلمنا عليها ويبتدي يأكل في العظم بتاع المفصل أيا كان مكان المفصل. لما نعمل أشعة سينية نلاقي أماكن حوالين المفصل العظم متاكل فيها. بيسموها باللغة الانجليزية رات بيتن إيروجن يعني كأنها بالظبط قراضة فار في العظم. كمان ممكن إن هو زي ما قلت يترسب تحت الجلد. بعض المرضى بيبقى الموضوع عندهم إنهم ما بيجي لهمش أي حاجات في المفاصل خالص ويجي لي العيادة تحت الكوع بتاعه ومن حاجة زي كورة كده الجراح مثلا أخذ منها عينة ويجيء يقول لي قالوا لي إن ديت مرض النقرس، أعمل إيه؟
[7:53]طبعا هنا بنبتدي نعالج كأنه مرض نقرس ليه لإنه لو اتساب كده كده هيجي له آلام في المفاصل في النهاية وهي برضه ممكن تأكل في العظم اللي حواليها.
[8:06]تكلمنا عن موضوع الحصاوي اللي على الكلى، الحصاوي اللي على الكلى هنا أحيانا بتبقى صعبة شوية في تشخيصها لأنها ممكن ما تبانش في الأشعة السينية وبتحتاج أشعة مقطعية. ففي بعض أنواع حصوات الكلى ما بيبانش في الأشعات العادية فأكثر حاجة بنشك فيها دائما هو مرض النقرس. بنرجع ثاني لحتة الآلام الحادة اللي بتحصل، بعض الناس أحيانا بتستغرب هي ممكن تروح في خلال يوم ومع بعض الناس ممكن تقعد للأسف أيام وفي بعض الحالات ممكن تقعد أسابيع. ودي بتبقى صعبة جدا في علاجها وللأسف لو ما لحقناهاش في الأول ممكن فعلا تستمر فترة وبتبقى رخمة في العلاج بتاعها. طيب يبقى أنت لما تجي لك هذه الأعراض ممكن ساعتها تتوجه للطبيب تروح. غالبا الناس بتروح لدكاترة العضم لكن ممكن كمان تروح لدكاترة الروماتيزم، ممكن دكتور الباطنة العامة برضه يكون شاطر ويعرف برضه يشخص مرض النقرس. أو الطبيب اللي هو البرايمري كير لو أنت في مناطق اللي هي فيها طبيب الوحدة الصحية أو اللي هو الطبيب الأولي يعني على حسب البلد اللي أنت فيها بيسموه إيه. برضه البرايمري كير فيزيشن ممكن أن هو يشخص أو الجينرال براكتيشنر ممكن أن هو يشخص مرض النقرس. طب أنت لما تروح للدكتور، الدكتور هيشخص إزاي؟ أنا هقول لكم على حاجة بصراحة، الطريقة الوحيدة أو الطريقة المضمونة أو اللي هو بيسموها يعني اللي هو الجولد ستاندرد بتاعنا في التشخيص هو إن إحنا ناخد عينة من السائل اللي داخل المفصل ونبص تحت الميكروسكوب. وهنلاقي ساعتها حاجة زي أملاح كده بتبقى بالضبط عاملة زي شبه الإبرة وبيبقى لها ألوان يعني خاصة بها. عن طريقها بنشخص مرض النقرس. غير كده ممكن زي ما قلت لكم طبعا ممكن نقيس حمض اليوريك في الدم لو لقيناه عالي فده مؤشر إن ده ممكن يكون مرض النقرس. زي ما قلت مش كل الناس اللي عندها الحمض عالي هيبقى عندها مرض النقرس. بعد كده كمان إحدى طرق التشخيص إن إحنا نعمل الأشعة على المفاصل ونشوف هل في علامات تآكل المفصل من حمض اليوريك أسيد ولا لا. لكن برضه عشان أوصل لكم الصورة كاملة في أغلب الحالات التشخيص بيبقى اسمه تشخيص اكلينيكي. يعني أنا بصراحة أحيانا كثيرة جدا ببقى مجرد سماع القصة من العيان ومجرد ما إحنا نقدر مثلا نربط حدوث هجمات آلام الحادة في المفاصل ممكن نربطها بنوع معين من الأكل أو بأحداث معينة. ساعتها ممكن إن إحنا فعلا نشخص مرض النقرس من غير ما ألجأ للوسائل الأخرى. كده كده هحتاج إن أنا أعملها عشان أأكد تشخيصي وعشان العلاج ومتابعة العلاج. ده هياخدنا لنقطة ثانية مهمة جدا: إزاي ممكن أحمي نفسي من مرض النقرس؟ طيب لو أنت عايز تحمي نفسك من مرض النقرس زي ما قلنا في حاجات أنت ما تقدرش إنك أنت تتحكم فيها يعني جيناتك مش هتقدر تتحكم فيها. بالنسبة للرجالة العمر الكبير خلاص دي حاجات مش هقدر أتحكم فيها، لكن اللي تقدر تتحكم فيه هو الوزن بتاعك تقدر أن أنت تقلل وزنك. تقدر أن أنت تتحكم في الوجبة الغذائية بتاعتك أن أنت تقلل الأكل اللي هو بيحتوي اللي هو ممكن يؤدي إلى تكوين حمض اليوريك في الدم. وممكن كمان تشتغل على السكر والضغط تظبطهم كويس، وأخيرا ممكن لو أنت على بعض الأدوية اللي هي بترفع حمض اليوريك. ممكن تتناقش مع الدكتور بتاعك أن هو يحاول يغير لك هذه الأدوية أو العلاجات. طيب إيه هي الوجبات أو الأكلات اللي إحنا بنحاول إن إحنا دائما نتحاشاها؟ خليني نبتدي بأول حاجة وأهم حاجة هي اللحوم الحمراء. زي لحوم البقر أو لحوم الخرفان أو الماعز، اللي الناس برضه اللي بتأكل الخنازير برضه ده يعتبر من اللحوم الحمراء. طيب ناس ما بتأكلش اللحوم الحمراء لكن بتأكل الكبدة والكلى والبنكرياس. أنا مش شاطر في الأسماء ديت الكرش الحاجات ديت، حاجات ديت كلها برضه ممكن إنها تزود احتمالية حدوث مرض النقرس وتزود نسبة حدوث آلام المفاصل. نوع كمان من الأكل نحاول أن إحنا نقلل منه على قد ما نقدر هو السي فود بالذات الجمبري والمخلول السردين. بشكل عام الحاجات اللي هي غير السمك الأبيض دي كلها حاجات ممكن إنها تتسبب في حدوث هجمات من مرض النقرس. زي ما قلت برضه الناس اللي هي بتشرب خمور البيرة تحديدا أكثر حاجة ممكن إنها تتسبب في حدوث دوت. كمان بعد كده هنوصل لحاجة اسمها الفروكتوز، بعض أنواع العصائر بدل ما بيتحط فيها سكر الجلوكوز بيبقى لا محطوط فيها فروكتوز أو سكروز. تحديدا الفروكتوز أكثر حاجة ممكن إنها تعمل النقرس، المشروبات الغازية اللي فيها الصودا ممكن إنها تتسبب في زيادة حدوث الهجمات من النقرس. وبالتالي بصراحة لما بنيجي نتكلم مع مريض النقرس بيبقى للأسف الحاجات اللي هو محتاج يقللها في أكله بتبقى كثيرة. بس أنا عايز أفكركم بحاجة مهمة إنه إحنا ما بنوقفش الأكل تماما. مرضى كثير جدا عندي في العيادة ما بيمنعوش الأكل خالص بتاع مرض النقرس لكن مثلا بيأكل كميات صغيرة في أوقات معينة فخلاص هو بيبقى عارف جسمه وعارف إيه طبيعة المرض عنده. بيقدر إن هو يتعايش مع الأكلات الصغيرة، المهم في الموضوع إنك أنت ما تجيش مرة واحدة وتأكل أكلة كبيرة. يعني مثلا ما تجيش إيه معزوم عند جيرانك أو أصحابك، معزوم في فرح، فتروح فتروح مديها سي فود كثير. تروح مديها لحوم كثيرة، كل ده هيخلي للأسف مرض النقرس أو هتلاقي نفسك ثاني يوم الصبح ممكن يجيء لك آلام حادة في مفاصل من النقرس. فبالتالي الاعتدال مهم، الخضار والفاكهة مهمين جدا، شرب الماء على الأقل على الأقل الكميات المطلوبة منك في اليوم مثلا مطلوب منك لتر ونصف مثلا في اليوم. لترين في اليوم يعني على الأقل الأقل القليل تأخذ احتياجك اليومي من المية ده مهم جدا. يبقى إحنا كده تكلمنا عن إزاي نحمي نفسنا من مرض النقرس، إيه اللي في إيدينا على الأقل اللي إحنا نقدر إن إحنا نعمله. بعض الحاجات كمان اللي هتسمعها كثير التشيري أو الكريز أو الكرز هتسمع دائما إن هو له دور في أن هو يقلل حدوث النقرس والآلام الحادة اللي ممكن تيجي منه. والحقيقة إن دوت صح، دي معلومة صحيحة لكن واقع الأمر العملي يعني إنك أنت عشان تحصل على الكمية المطلوبة اللي هي فعلا تقدر أنها تقلل حمض اليوريك في الدم عشان ما يحصلش هجمات منه. كمية كبيرة جدا، كذا كيلو يعني محتاج أن أنت تأكلهم كل يوم، فبالتالي بصراحة ما بيبقاش الموضوع عملي جدا. لكن لو تقدر أن أنت تجيبه تخليه جزء من وجبتك في اليوم وإن شاء الله يساعد إن هو يقلل في حدوث مرض النقرس والآلام الحادة منه. بعد كده هييجي مسألة الدور العلاجي. أنا عارف إن العلاجات الناس ما بتحبش تاخذ علاجات عشان مرض النقرس لكن للأسف خليني أقول لك لو حصل إنه ابتدأ يجي لك آلام حادة من النقرس أو ابتدأ يحصل ترسبات تحت الجلد. فللأسف إحنا عدينا المرحلة اللي إحنا ممكن فيها نتحكم في المرض من غير علاجات. أغلب الناس في اللحظة ديت خلاص وصلت لمرحلة أن هي بقت محتاجة علاجات. العلاجات عندنا بنقسمها نوعين اثنين مهمين، نوع بيقلل حدوث هجمات النقرس الأكيوت أتاكس يعني. ونوع ثاني بيقلل حمض اليوريك أسيد في الدم عن طريق إن هو بيكسره. في نوع كمان من الأدوية ما هو أقوى حاجة لكنه بيقدر إن هو يرمي حمض اليوريك أكثر في البول ويخلص منه في البول. فبالتالي بقى إحنا عندنا نوعين اثنين كبار من الأدوية بتعمل حماية من الهجمات وأدوية ثانية اللي هي بتقلل اليوريك أسيد. والأدوية اللي بتقلل اليوريك أسيد ديت منها نوعين زي ما قلنا، نوع بيشتغل على اليوريك أسيد نفسه ونوع ثاني بيشتغل على الكلى أن هو يزود أن هو يخلص منه أكثر في البول. مش هقدر أقول أسماء لأنه الأسماء مختلفة جدا في أماكن كثيرة في العالم. يعني حتى الأدوية الموجودة هنا في أمريكا مش نفس الأسماء اللي موجودة في مصر، لكن هم ثلاث أربع أنواع من الأدوية هم ما فيش غيرهم لمرض النقرس فأنصحك طبعا لو أنت مهتم بالموضوع أن أنت طبعا تتابع مع الطبيب. تحاول أنك أنت تتواصل معاه بحيث أنك أنت تعرف إيه هي فعلا العلاجات المناسبة ليك بشكل عام مرض النقرس من الأمراض اللي أنا بحبها جدا. فما تنسوش تكتبوا لي أسئلتكم تحت وإن شاء الله هأجاوب عليها، إن ما كانش في التعليقات إن شاء الله هأجاوب عليها في فيديوهات لوحدها. بنحاول نخلي قناة الاستشاري بعد كده تبقى هي للفيديوهات العامة وممكن قناة افهم مرضك نخليها أو القناة الثانية يعني لسه ما استقرتش على الاسم قوي بس إن شاء الله دي ممكن يبقى فيها جزء منها يبقى الفيديوهات اللي عليها إجابات أسئلة أكثر. تالي نعمل توازن بين القناتين وأدعوا لنا إن شاء الله نقدر نستمر في أن إحنا نعمل فيديوهات ثانية واكتبوا لي المواضيع اللي أنتم تحبوا برضه إن إحنا نتناقش فيها إن شاء الله أشوفكم ثاني قريب، سلام عليكم.
