[0:11]ناصر تكلم عن كتاب كيف تمسك بزمام القوه، احب اقول لك يا صديقي الجميل مع كامل الاسف لن اشرح هذا الكتاب وفي هذا الفيديو راح اعلمك ليش. بعطيك خمس قوانين من 48 قانون اللي هو حطها روبرت جرين في هذا الكتاب عشان اكد لك ان كتاب لا يستحق انك تضيع فيه لا مال ولا وقت ولا جهد. كتاب 48 قانون للقوه للمؤلف روبرت جرين في هذا الفيديو. جهز كوب قهوه محترم وخلنا ندخل في تفاصيل الحلقه.
[0:54]السلام عليكم ورحمه الله وبركاته، اهلا بك يا صديقي الجميل في برنامج الفصل الاول من دوباميكافيين. معك اخوك ناصر العجيل فكره البرنامج اننا نشرح الفصل الاول من كل كتاب، اذا عجبتك فكره البرنامج شرفنا باشتراكك. بصراحه انا محتار من وين ابدا معك، لكن خلنا نقول يا صديقي العسل اني انا وياك نعترف انه في في الحياه اشخاص جيدين واشخاص سيئين. في في الحياه اشخاص يختارون الجانب الملائكي منهم وفيه اللي يختار الجانب الشيطاني منه واحنا فينا الاثنين احنا كائنات مزدوجه فينا خير وشر. فاذا كنت من الناس اللي تحب ان تنحاز نحو الخير، فهذا الكتاب هو من اعفن الكتب اللي ممكن تقراها. واذا كنت من الاشخاص اللي يحب ينحاز نحو الشر، فاليك هذا الدليل اللي انا متاكد باذن الله يعني سيدمر حياتك تماما. تماما تماما يا صديقي العسل تماما، خلنا نبدا على طول بليش، شف فكره الكتاب كامله تتمحور حول لعبه السلطه. روبرت جرين مؤلف الكتاب يقول والله الحياه اللي احنا عايشين فيها الكل فيها بلا استثناء يبحث عن السلطه. كيف يترقى وكيف يمسك بزمام الامور، سواء في البيت ولا في العمل ولا في المدرسه ولا في المشروع ولا في اي مكان. اولا يا استاذ روبرت جرين، الكلام هذا غير صحيح، الواقع يؤكد على هذا الشيء. انت يمكن من الاشخاص اللي قاعد تتابع هذه الحلقه وتقول والله العظيم يعني ما قد فكرت اني امسك بزمام الامور. واحصل على السلطه سواء في البيت ولا في العمل ولا عند اخويي ولا في الجامعه ولا في اي مكان انا متاكد لاني شفتهم في ناس كثير ما عنده اي رغبه يسعى للسلطه. يا اخي انا ابغى اعيش حياه كريمه، جت السلطه في نطاق معين انعم واكرم ما جت والله ماني متعب حالي اطارد وراها، في ناس كثير كذا. فكون انك تعمم يا استاذ روبرت جرين ان كلنا نسعى نحو السلطه هذا الكلام غير صحيح، ولكن لنفرض يلا جدلا انه والله كلنا نبحث عن السلطه. قال لك في 48 قانون اذا طبقت هذه 48 قانون ستمسك بزمام الامور ستحصل على السلطه. على عيني يلا مين مشكله وش هي ال 48 قانون؟ والله العظيم انا كانت توقعاتي يا صديقي الجميل كذا من كثر ما الكتاب عليه بروبوجاندا وتسويق. وناس كثير تتكلم عنه وانا اعرف ان اغلبهم ما قراه ترى بس يشوفون الناس يتكلمون عنه فيحسبون ان كتاب ومن عنوانه كذا جميل فيلا اقراه يا ناصر اشرحها يا ناصر. انا من المقدمه اصلا صعقت ليش؟ لانه يقول في المقدمه لعبه السلطه عشان تكسبها لازم تكون خسيس. كذا كذا بالفم المليان كيف اكون خسيس؟ قال اي لازم تكون مثل لورد بيليش شفتها اللي في جيم اوف ثرونز؟ قال بالضبط لازم تكون انسان مخادع، ولازم تكون انسان كذاب، ولازم تكون انسان متلاعب، ولازم تكون انسان يخفي الحقيقه، ولازم تكون انسان ينصب فخاخ للناس اللي حوله. ولازم تكذب ولازم تمثل ولازم ولازم ولازم، صدمه حرفيا صدمه انا وانا اقرا المقدمه اقول معقوله هذا الكتاب يعتبر من اكثر الكتب مبيعا. يا ساتر على العصر اللي احنا عايشين فيه، عموما اللي قهرني في المقدمه وش قال؟ قال واسمع اذا التقيت في اي شخص في الحياه يحاول انه يظهر لك الجانب الطيب فيه. وانه هو صادق ما يحب يكذب ولا يحب يخدع الناس ولا يحب يغشهم ولا يحب يتلاعب بمشاعرهم وعواطفهم ولا يحب يمثل عليهم وينصب لهم فخاخ هذا انسان يمارس لعبه السلطه. انسان يمثل عليك انه طيب وهو شرير يعني حرفيا وش اللي قاعد يقول؟ قاعد يقول كل الناس اللي انت تشوفهم حولك مخادعين كذابين. سواء اظهروا لك هذا الخداع او حتى اخفوه، اذا شفت شخص طيب تراه مخادع يظهر لك انه طيب وقاعد يلعب لعبه السلطه. واذا شفت واحد شرير هذا قاعد يلعب لعبه السلطه وبالعلن لا يا روبرت جرين لا يا حبيبي. العالم اللي احنا عايشين فيه ويكثر فيهم الناس الطيبه ما هو ب مثل العالم اللي موجود داخل عقلك المعتل واسمح لي اقول عقله معتل وانا بعلمك ليش. خلنا نبدا بالقاعده الاولى استلم القاعده الاولى او عفوا القانون الاول طبعا شف انا اخترت خمس قوانين ولا راح اقولها لك بالترتيب حلو؟ فببدا بالقانون الثاني للسلطه او للقوه. يقول لا تضع ثقه اكثر من اللازم في الاصدقاء وتعلم كيف تستخدم الاعداء طبعا انت لما تقرا القانون هذا. كراس قلم تقول والله كلامه فيه جزء من الصحه احنا نقول احذر عدوك مره واحذر من صديقك مليون او 1000 مره لان المثل بمنتهى البساطه يعني مو بلا تثق في اخوياك. المثل يقول لك كن حذرا ولما تكون حذر احذر من الصديق المقرب اكثر بكثير من العدو، احذر مو لا تثق احذر. طب ليش تحذر من الصديق اكثر من العدو؟ غايه المثل عشان يقول لك صديقك يعرف كل اسرارك. يعرف كل شيء عنك، يعرف مشاعرك، يعرف نقاط ضعفك، فيعرف كيف يهدمك والاخطر من هذا ان صديقك تعطيه الامان بس عدوك ما تعطيه الامان. يعني عدوك انت عارف انه عدو فما راح تامن ولا تثق فيه، هذه غايه المثل بس هو لا ما كان يقصد المثل ابد. شف شو يقول يقول كن حذرا من الاصدقاء فسوف يخونونك على نحو اسرع لانهم يستفزون بسهوله الى الحسد.
[6:08]يقول اخوياك خاينينك خاينينك ليه؟ لانهم يحسدونك ويقول هذا الشيء حاصل حتما لا محاله، هل هذا بالله عليك يا صديقي الجميل كلام صحيح؟ يعني شوف بقول لك شيء انا اكاد اجزم ان عندك على الاقل في هذه الحياه صديق واحد تثق فيه تحبه تامنه وهو يثق فيك ويحبك ويامنك وتساعدون بعض وتوقفون مع بعض في احلك الاوقات. على اقل تقدير عندك صديق واحد، اذا ما عندك صديق يعني خلنا نقول جدلا ان ما عندك صديق فلو حصلت على صديق بكره بتكون هذه مواصفاته. الصديق عمره ما يخون عمره ما يحسد عمره ما يخدعك هذا هو الصديق، طب لو كان والله انا تعرفت على شخص وعشت معاه يا ناصر 10 سنوات او اكثر من ذلك او اقل بشوي. فتره من الزمن وفي نهايه المطاف خدعني او حسدني بقول لك بمنتهى البساطه هذا لم يكن صديقا. وعشان كذا اسمعني بعطيك نصيحه الصداقه ليست بالعشره مو بعشانك عشت معاي فتره طويله من الزمن معنات انك صديقي لا. الصداقه بالتجربه والمواقف، قد تكون عايش مع انسان 10 سنوات بس ما عمره مر موقف اختبر صداقته الحقيقيه. لكن ممكن تكون التقيت في شخص عشت معاه شهر شهرين لكن وراك في هذه الشهر والشهرين كل الافعال اللي تثبت انه انسان صادق وخدوم ومحل ثقه. مريت بمواقف وقف معاك مواقف قاسيه فعلا بين لك وقفته الحقيقيه وهذا يمكن ما له الا اشهر، هذا ممكن تصنفه صديق حقيقي. لكن اللي يعيش معاك عمر موجود يضحك وينبسط ويستانس وانت معاه دائما في الالعاب وفي الطلعات والروحات والجاات ويوم من الايام يبيعك باطرف موقف هذا مو بصديق اصلا. لم يكن صديقا من البدايه لان مواصفات الصديق عمره ما يحسد ولا يخون ولا يخادع وانا بقول لك شيء عشان نختم هذا القانون. الاصدقاء كنز من كنوز الحياه وعشان تكسب اصدقاء في مهارات كبيره جدا وافعال كثيره جدا وتصرفات واسلوب تعامل مع الناس يكسبك الاصدقاء الحقيقيين. ولهم بيئات ترى لهم اماكن فاذا انت تبحث عن صديق نظيف تلقاه في الاماكن النظيفه، تبحث عن صديق او كما يسمى صديق او يظهر انه صديق بس في نهايه المطاف لا، تلقاه في الاماكن القذره الضاحله. فالاصدقاء كنز من كنوز الحياه، خذها مني والله العظيم خذها مني انا من الناس اللي اصدقائي من ايام المدرسه الى اليوم لهم فضل كبير على حياتي وتاثير عظيم على حياتي. وكثير منهم يمكن ما اتواصل معهم بشكل كبير اليوم، لكن معزتهم باقيه في القلب وستبقى الى الابد، والى اليوم لو انا احتجتهم في اي شيء خدموني فيه ولو هم احتاجوا في اي شيء عيوني لهم. الاصدقاء من اصول الحياه من الاصول اللي ممكن تستثمر فيها فلما يجيك شخص يقول لك لا تثق باصدقائك صدقني هو بمنتهى البساطه قاعد يعطيك خلطه سحريه عشان يبعد كل الناس من حولك. اذا عندك اصدقاء بيفرشهم واذا ما عندك اصدقاء ما راح يخلي عندك اصدقاء ابد بيخليك منبوذ في الحياه صدقني. وانت شف الناس اللي حولك اذا شفت شخص منبوذ ما عنده اصدقاء ما حد يحبه ما حد يعزمه ما حد يناديه راجع سلوكياته تلقاها نفس السلوكيات اللي قاعد يتكلم عنها هنا. ما يثق في احد ولا احد يثق فيه، ما يصدق احد ولا احد يصدقه، كذاب دايم مخادع يقولون ما لا يفعلون. خلنا ننتقل للقانون اللي بعده، القانون رقم سبعه يقول اجعل الاخرين يقومون بالعمل نيابه عنك ولكن احصل على الفضل دائما. يعني انا والله تحتاج شرح بالله عليك هاي تحتاج شرح، يقول لك خل الناس تكد وتتعب وتشتغل بالنيابه عنك لا ويقومون بعملك يعني وانت خذ الفضل اسرق الفضل منهم. بالله هذا قانون؟ بالله عليك يا صديقي الجميل في ذمتك اكتب لي في التعليقات هذا قانون يجعل منك انسانا يحصل على زمام السلطه لا منتهى البساطه لا جوابي انا على الاقل تقدير. هذا القانون ينطبق على الاشخاص السيئين اللي انا وياك نعرفهم في الجامعه اذا قد اشتغلت على مشروع وكان معكم نادر يعني انك تلقاهم ولكن اذا طحت في واحد منهم. شخص ما يسوي شيء في المشروع ويسرق منك الفضل عند المعلم دائما وممكن هذول الاشخاص طبعا يكثرون في بيئه العمل في الدوام. تكد انت وتجتهد وهو اللي ياخذ الفضل بالله عليك هذا يستحق انه اصلا يكون انسان تعطيه ثقتك اصلا لا ابدا القانون اللي بعده. يقول القانون رقم 14 اسمع اسمع الطرب اسمع الطرب اتخذ وضع الصديق واعمل كجاسوس. يقول اذا التقيت في الناس في اي بيئه معينه اعمل كجاسوس حاول تسالهم وتطرح عليهم اسئله خفيه عشان يطلعوا لك نقاط ضعفهم. واذا عرفت نقاط ضعفهم هاجمهم عليها يلا يعني يعني والله والله احيانا يعجز الانسان عن التعبير والله العظيم صدق. كيف لهذا الكتاب ان يبيع مليون و200 نسخه؟ كيف؟ والله شيء يخوف او ممكن يكون نصهم متقلبين مثلي يعني. اسمعوا في الكتاب ظنوا انه كويس شروه طلع مقلب وانا متاكد ان نصهم كذا يعني كتاب صدر عام 1998 طبعا اول مره نشر فمن 1998 ليوم مليون و200 نسخه. اوكي انا متاكد في 1998 ما كان في حد يعطيه وجه اصلا ما كان في حد يشتري الكلام هذا ما كان يضيع وقته على هذه الصفحات لا مستحيل. القانون رقم 21 العب دور المغفل لتمسك بمغفل واظهر انك ابلد من هدفك. يقول الناس تكره ان يظهر عليهم انهم اغبى من احد، فانت اذا قابلت شخص بين انك اغبى منه خلاه يتوهم انه هو اذكى. قال ليش تسوي كذا؟ عشان ما تخليهم يشكون في العمليات الخبيثه اللي انت تسويها من وراهم، شوف والله يا صديق يعزف يعزف شرا هذا الكاتب. طبعا انا بقول لك بعد شوي تعليقي قبل لا اختم الحلقه بس عشان ابين لك ابين لك قديش هذا الانسان قذر. القانون رقم 26 يقول ابقي يديك نظيفتين يقول خليك تطلع بمظهر الكيوت الانسان النظيف الطاهر لا تلوث يدك بالوساخه بشكل علني. يقول هذا المظهر النظيف بيسمح لك انك تستخدم الاخرين ككبش فداء يعني بمنتهى البساطه حرفيا يعني بمنتهى البساطه يقول لك خليك انسان قذر بكل ما تحمل الكلمه من معنى. شوف الان خلني اعطيك تعليقي، في مره من المرات نزلت حلقه في اليوتيوب وكنت اشرح كتاب واثناء الشرح في الحلقه قلت يا صديقي العسل الجزئيه هذه من الكتاب ما راح اشرحها راح اطمرها. لانها تختلف مع مبادئي الاخلاقيه، فاذا انت تبغى تعرف وش قال فيها تقدر تروح تاخذ الكتاب تشتريه وتقراه وش قال. فقرات تعليق واحد والله العظيم يا صديقي العسل ولله الحمد معظم التعليقات ايجابيه من ناس عظيمه اللهم لك الحمد طبيعي يا صديقي العسل طبيعي. انا اكاد اجزم بنسبه 99.999% انك من خيار الناس لان المحتوى اللي احنا نقدمه يجذب خيار الناس. فعشان كذا من النادر جدا اني اقرا تعليق سلبي، في عادي تعليقات نقديه ما عندي مشكله بس تعليق سلبي سلبي ما في. فواحده من التعليقات اللي انا اسميها تعليقات نقديه ليست سلبيه، واحد كتب قال ناصر انت مهمتك انك تشرح الكتاب من الجلده للجلده سواء زين او شين. بعدين حط نقطه وكمل وارجوك لا تعطي ارائك الشخصيه عن الافكار اللي موجوده في الكتاب، احنا يهمنا نعرف وش اللي في الكتاب فقط ما يهمنا رايك. هذا التعليق ترى قديم قديم قديم يمكن له سنتين او ثلاث احب اقول لك والله يا صديقي الجميل ان كنت من الناس انا اللي يقرا الكتب دون ان يكون له راي فيها فانا كالحماري يحمل اسفاره. حرفيا بالعكس لازم يكون عندي مبادئ استند عليها واقيس عليها. اقرا الفكره في اي كتاب كان، بعدين اقيسها مع مبادئي واخلاقي اذا كانت تتعارض مع مبادئي واخلاقي اضرب بها عرض الحائط. ارما يا صديقي الجميل الله يكرمك في الزباله على طول ليه؟ لان عندك مبادئ وعندك قيم واخلاق. عشان كذا هذا الكتاب من مقدمته عرفت انه من الكتب اللي لا يمكن لا يمكن ابدا اني اكمل قراءتها. ولكن والله العظيم اني تحملت على نفسي قلت يا ناصر يلا اعطى فرصه اقرا الفصل الاول على الاقل وقرات الفصل الاول ما قدرت ما قدرت ادخل في الفصل الثاني. كتاب يتعارض مع كل مبادئ واخلاقي حرفيا انا من الناس اللي اقدر الاشخاص واحترمهم وعندي الصدق من اكبر القيم والمبادئ اللي اعيش عليها. لا يعني اني انسان مثالي عشان ما تفهمني اني اروج للمثاليه لا، كلنا فينا اخطاء وفينا عيوب واحيانا اتصرف تصرفات بعيدا عن قيمنا ومبادئنا. عادي ولكن في نهايه المطاف لما نرتكب خطا هل نكون متفاخرين جدا نفخر اننا نرتكب هذه التصرفات المشينه؟ لا. تلقانا نتوب ونستغفر ونعتذر للاشخاص اللي اخطينا في حقهم انا هذه مبادئي بمنتهى البساطه مبادئ اسلاميه وعربيه ثانيه. فما عندي الدحاليس ولا حاليس اللي هو قاعد يتكلم عنها وعشان كذا قررت اني ما اضيع وقتي عليه بس لان الكتاب عليه صخب. ولا يزالون في ناس يكتبون لي ناصر اشرح كتاب كيف تمسك بزمام القوه وانا قاري من زمان ترى يعني من فتره قلت خلني اليوم يلا اعلمهم خمس اسباب تخليه فعلا يعزف عن هذا الكتاب لا تضيع وقتك. لا تضيع وقتك، اللي قرا الكتاب يا صديقي الجميل وعنده مبادئ واخلاق يرتكز عليها واخلاق نبيله ومبادئ نبيله وطيبه مستحيل يكمل هذا الكتاب. مستحيل حتى لو قلت لا يا ناصر القوانين هذه ما يقصد فيها الاشخاص كلهم يقصد فيها الاعداء لا لا لا لا لا هو ما يقصد الاعداء هو حرفيا يقصد اي شخص ممكن تقابله في الحياه. هذا كلامه بالنص يعني حتى اذا تبغى تتاكد من كلامه روح مكتبه بتلقى في نسخه مفتوحه من هذا الكتاب قلب الصفحات واقرا تاكد بنفسك لا تشتريه والله هذا ما يستاهل والله تخسر فلوسك عشانه. لكن تدري وش الصادم؟ والله العظيم شف اني قاري الكتاب من فتره بس ما فكرت ابدا اني اروح اشوف روبرت جرين هو من وين وش نشاته وليش هذه هي افكاره ابدا والله. قريت المقدمه والفصل الاول قفلت الكتاب ورميته حتى في درج كذا تحت بعيد هذا هذا خساره هذه من الاستثمارات الفاشله. ليش ما كنت ابغى اتحقق من روبرت جرين؟ لاني من الناس اللي ما ياخذ الامور بشكل شخصي يا حبيبي انت اعرض علي كلامك. وانا عندي مبادئ كلامك خالف مبادئي خالف اخلاقي بضرب فيه عرض الحائط من الاخير يعني ما يهمني من انت ايش علي منك اروح اشوف من انت وليش وكذا ومن رباك ما يهمني. لكن اليوم انت ابني الفضول ليش انت ابني الفضول؟ لاني لما قرات الكتاب المره الاولى قرات القانون الاول بس. بس اليوم يوم جيت احضر للحلقه قرات كم قانون هذه القوانين اللي انا شرحتها لك قراتها وكتاب هذا عباره عن فلسفه. والفلسفه غالبا هي افكارك نتاج افكارك ورؤيتك للحياه تصدر من مبادئك وقيمك، فهذا عنده مبادئ ملوثه. وضعها في كتاب ونشرها في العالم واعجب بها الملوثين، انا اسف ممكن اكون اخطيت على احد ما بهذه الكلمه. ولكن انا بقول لك شيء راجع قيمك واخلاقك راجعها شف هل هي طيبه ولا غير طيبه؟ هل هي خيره ولا غير خيره؟ ان كانت طيبه وخيره وتتمحور حول الاخلاق فكل ما يوجد في هذا الكتاب يتعارض معها. الان بختم بهذه الجمله يا صديقي الجميل، يحق لك تقرا لاي احد كان ولكن تحط في بالك دائما في ناس في الحياه معتوهين اشرار. مثال تجسيدي للقذاره وانعدام الاخلاق والشرف وهذول الاشخاص عندهم القدره انهم يالفون كتب، عشان كذا احذر اي كتاب تقراه لا تسلم له عقلك ابد. عندك قيم ترتكز عليها قارن افكار هذا الكتاب مع قيمك تتعارض معها ولا تضيع وقتك على طول. سله المهملات الله يكرمك ويعزك حط الكتاب فيها، هذه كانت الاسباب اللي حبيت اوضحها لك من رفضي لشرح مثل هذه الكتب. اذا عندك صديق قد يستفيد من هذا المقطع وهذه النصائح شاركها معي يا صديقي العسل، واذا عجبتك الجرعه عطنا عليها لايك شرفنا باشتراكك، فعل الجرس عشان يجيك اشعار بصدور الحلقه القادمه. شكرا يا عسل لحسن الاستماع وشكرا لقيمك واخلاقك ومبادئك النبيله تذكر دائما انك مسلم وان لم تكن كذلك فانت عربي. يعني من الناحيتين عندك مكارم الاخلاق تشبث بها يا عسل سلام عليكم.
