[0:00]تخيلوا انه حرامي عمل اكبر عملية سرقة في تاريخ اليابان، من دون ما يستخدم اي نوع من القوة. كل اللي سمعوا هاي القصة، حكوا انها اذكى عملية سرقة بالعالم.
[0:13]احنا طبعًا ما عم نحكي عن اشي بسيط، الزلمة سرق 300 مليون ين ياباني. وأخذهم بكل بساطة، من دون لا اسلحة ولا مطاردات، والاحلى من انه كيف سرقهم التحقيق اللي عملته الشرطة اليابانية. هذا الفيديو رح تستمتعوا فيه كثير، فالكل يجهز له اشي يشربه وشوية سناكات، وخلونا نبلش. السلام عليكم يا جماعة الخير، للي بشوفوني اول مرة انا ابو الصادق، وبحكي قصص عن كل شي غريب وغامض على كوكب الارض. قبل ما نبلش قصة اليوم لازم تعرفوا انه كل الاحداث انا سمعتها على فيديو بقناة اجنبية اسمها "روبرز اي كيو"، مشان الحلال والحرام. وبعد ما تاكدت من كل اشي قلت خليني احكي لكم اياها لانها عن جد كثير حلوة. احداث قصتنا اليوم، صارت باليابان، بسنة 1968. بهذاك الوقت اليابان كانت عم بتعيش نهضة اقتصادية هائلة، لانه العالم كله كان في ثورة تكنولوجية واليابان من البداية كانوا هم قادة العالم بالتكنولوجيا. هاي النهضة الاقتصادية اثرت على البنوك بشكل ايجابي، يعني البلد اللي فيها شغل كثير اكيد بده يكون فيها فلوس كثير. ومشان هيك البنوك صارت هدف ممتاز لكثير من الحرامية، وبالفعل صار في كثير عمليات سطو على البنوك ولكن واحدة منهم كانت الاكبر والاذكى. القصة بلشت كالاتي: في بنك اسمه نيهان ترست بنك. مدير هذا البنك وصلوا رسالة على صندوق البريد تبع بيته، الرسالة من مجهول. بس لما فتحها انصدم انه فيها تهديد من واحد انه اذا ما بيجيب له 300 مليون ين على موقع محدد رح يفجر له بيته. طبعا المدير لما قرا الرسالة خاف عقله وخاف ولما راح على الدوام اتفاجئ انه في كمان رسالة واصلته على المكتب، فعلى طول بلغ الشرطة. وبعدها هاي الرسائل ظلت توصل بانتظام على بيته وعلى المكتب. الشرطة طبعا حطوا مراقبة على البنك وعلى بيت المدير لانهم كانوا خايفين انه هذا المجهول فعلا ينفذ تهديده. والمدير عمل اجتماع للموظفين وخبرهم عن التهديد اللي عم بيوصل وقال لهم خليكم جاهزين والكل ياخذ احتياطاته لانه ممكن يصير في خطر على البنك باي لحظة. بعد كم يوم من هاي الرسائل، وتحديدا يوم 10 ديسمبر 1968، البنك كان المفروض انه يسلم مبلغ بقيمة 300 مليون ين ياباني لشركة توشيبا. توشيبا شركة كبيرة اظن كلكم بتعرفوها، الشركة ضخمة وعندهم عدد كبير من الموظفين وكانت نهاية السنة وبدهم يوزعوا عليهم مكافآت والشركة كانت تدفع لهم المكافات كاش. وكان البنك هو المسؤول عن تسليم المبلغ لفرع من فروع شركة توشيبا بطوكيو. مدير البنك عين اربع موظفين عشان ينقلوا المبلغ، حطوا الفلوس بثلاث شنطات كبيرة وحطوهم بصندوق السيارة وركبوا بالسيارة وتحركوا على شركة توشيبا واللي اصلا ما كانتش بعيده عنهم الا كم من كيلو متر. وهم بالطريق في شرطي على دراجة وقفهم، قرب منهم وخبرهم انه للاسف بيت مديرهم تعرض لتفجير كبير وصار في اصابات ووفيات. اول شي اجى في بالهم انه فعلا الشخص المجهول نفذ تهديده وفجر بيت المدير. والشرطي خبرهم انه وقفهم لدواعي امنية لانه كمان مشتبهين انه يكون في متفجرات بالبنك وبسيارات البنك فيلا يا شباب خلونا نشيك السيارة والكل يدور بكل مكان. طبعا هم خافوا كثير وبلشوا يدوروا معه بشكل هستيري بكل السيارة، والشرطي نزل لتحت السيارة ليتفقدها وفجأة بلش يطلع دخان من تحت السيارة. هون موظفين البنك قالوا لك بس قنبلة وراح تنفجر وتركوا السيارة وهربوا وراحوا تخبوا ورا حيط. وبعد شوي واحد من الشباب طلع من ورا الحيط وتفاجا انه السيارة والشرطي اختفوا وما كان في على الارض الا دراجة الشرطي وفلير من اللي بطلع دخان. اولها ما كانوا فاهمين، واول شي اجى في بالهم انه هذا الشرطي الشجاع ركب السيارة واخذها لتنفجر بمكان بعيد عن الشارع. رنوا على البنك ليخبروهم واللي رد عليهم مدير البنك، كانوا مبسوطين انهم سمعوا صوته وانه لساعته عايش وانه ما في قنبلة انفجرت في بيته واهله وانه كل شي تمام. بس بعدها انتبهوا انه لسا في دخان عم بطلع مكان ما كانت السيارة وانه اللي على الارض فلير. هون عرفوا انه اللي كان عامل حاله شرطي وبده ينقذهم هو حرامي، ضحك عليهم بموضوع القنبلة ولما هربوا بعيد عن السيارة اخذ السيارة بالـ300 مليون اللي فيها وهرب. نفس المبلغ اللي كان عم بطلبه المجهول واللي لغايه اليوم هو اكبر واذكى عملية سرقة في تاريخ اليابان. بلغوا الشرطة واجا ضباط كثير للمكان وشافوا شوية ادلة واللي كان من ضمنها الدراجة اللي تركها الشرطي واللي اصلا ما طلعت دراجة شرطة شرعية. الحرامي كان مضبطها ومكتكتها مشان تبين انها دراجة شرطة حقيقية. وموظفين البنك حكوا للشرطة انه الحرامي كان لابس زي شرطة حقيقي، من الاخر الحرامي خطط صح ونفذ صح. والمحققين ما كانوا عارفين شو بدهم يعملوا، حاولوا كثير انهم يلاقوا اشي مميز بالمكان او وصف من الموظفين اللي شافوا الحرامي بس ما كان في اي معلومة مفيدة. طبعا الشرطة ما بتقدر تتساهل بالموضوع او تتراخى لانه المبلغ المسروق مش قليل، فاللي عملوه كالاتي: نشروا اكثر من 10 الاف ضابط بكل المدينة وعملوا نقاط تفتيش على كل شارع رئيسي بطوكيو وعمموا اوصاف السيارة. ما اخذ معهم الموضوع وقت طويل ولقوا السيارة بمقبرة مش بعيدة كثير عن المكان اللي صارت فيه السرقة. المشكلة انهم لقوا اثار اطارات سيارة ثانية بالمكان اللي لقوا فيه سيارة البنك، فعرفوا انه الحرامي كان اذكى منهم وفات الاوان على موضوع نقاط التفتيش لان الحرامي غير السيارة واكيد انه مر بالفلوس زمان. فاعطوا اوامر جديدة بانهم يوقفوا عمليات التفتيش ونقاط التفتيش اللي عاملينها لانه ما منها فايدة. خلال هذا الوقت كان موضوع السرقة على الصفحة الاولى بكل جرايد البلد، والناس كلهم مندهشين. المبلغ المسروق 300 مليون وكان في ناس كثير معجبين بذكاء الحرامي كيف سرقهم هيك من دون ما ياذي ولا حدا. ومع انه الشرطة معهم الدراجة اللي الحرامي عمل العملية فيها ولكنهم ما قدروا يحددوا اي معلومة تفيدهم. حاولوا بكل الطرق انهم يعرفوا كيف ضبط الدراجة وعدل عليها او حتى من وين جاب القطع ليخليها تشبه دراجة الشرطة بهالشكل. وين دهن الدراجة او اشارة المرور اللي كانت معه او الاواعي اللي كان لابسهم ما خلوا ولا محل او خياط بس ما كان في اي نتيجة. كل اشي تم استخدامه بالعملية مش مبين الحرامي من وين جابه. الان الجزء اللي راح يصدمكم بكل القصة. بناء على وصف موظفين البنك اللي شافوا الحرامي الشرطة رسموه وطبعوا 750 الف صورة ووزعوها بكل اليابان. تخيلوا انه كان في 110 الاف مشتبه فيه وكان عدد الضباط المشاركين بالتحقيق اكثر من 170 الف ضابط. وكلفة التحقيق كانت 900 مليون ين يعني ثلاث اضعاف المبلغ المسروق. الان كثير منكم راح يسال ليش قررت الحكومة انها تصرف هذا المبلغ عشان تدور على مبلغ اقل منه بكثير؟ والجواب هو انهم كانوا بدهم يثبتوا وجودهم ويبينوا للكل انه في نظام امني قوي، عشان ما حدا يفكر مستقبلا انه يعمل سرقة ثانية زي هيك. الشي المهم بكل التحقيق اللي عملوه انه من بين كل المشتبه فيهم واللي عددهم زي ما حكيت لكم 110 الاف واحد كان التركيز على ثلاث فقط. الاول هو مدير البنك، الشرطة ما اتهموه بشكل مباشر بس كان في كثير حكي حواليه انه هو العقل المدبر للموضوع كله. لانه عملية تحويل المبلغ لتوشيبا المفروض انها سرية وما حدا بعرف عنها الا هو واكم من موظف والمسؤولين من شركة توشيبا. وزي ما لاحظتوا السيارة اللي راح تتسلم المبلغ ما تم تامينها بسيارات حراسة مع انه المبلغ اللي نقلوه مش قليل. فكيف شخص خارجي عرف بالموضوع كله؟ كيف عرف انه في مبلغ بده يطلع من البنك ويروح لشركة توشيبا بهذا اليوم تحديدا؟ وضيفوا على هذا الحكي كله انه خلال فترة مراقبة الشرطة لبيت المدير ضلت الرسائل توصل وما كانوا يعرفوا من وين. هاي الاشياء كلها حطت مدير البنك تحت الاضواء وكانوا الناس كلهم يحكوا انه هو اللي عاملها. بس الشرطة ما قدرت تثبت عليه التهمة لانه ما في ادلة قاطعة على هالحكي. المتهم الثاني قصته ماساوية، اسمه تاكينا شوجي وبشتغل شوفير تكسي. السبب اللي خلاهم يتهموه انه ساكن بمكان جنب البنك وفي شبه بينه وبين الرسمه اللي رسموها الشرطة. والشرطة قالت انه عنده مهارات بالقيادة كونه شوفير تكسي، ولكن الشرطة ما لقوا اي دليل ضده وما اعتقلوه. بس المشكلة انه خلال التحقيق اتسرب للاعلام انه هذا الشخص من ضمن الناس المشتبه فيهم. وكثير صحفيين كتبوا عنه مقالات ونشروا صورته واسمه وادعوا انه هو الحرامي من دون ما يكون في عليه اي دليل. وكل اللي استندوا عليه هو الشبه بينه وبين الصورة وانه ساكن بمكان جنب البنك. من كثر ما كتبوا عنه الشرطة راحوا واعتقلوه واستجوبوه مشان يرضوا الراي العام. وخلال التحقيق فعلا اكتشفوا انه في معه عذر بيثبت غيابه عن مكان الجريمة وانه مستحيل يكون هو فافرجوا عنه. بس للاسف سمعة الزلمة انضربت اليابان كلها متابعة القضية وكل الناس شافوا صوره بالجرايد. حتى انهم اقالوه من شغله وكل اصحابه وعيلته تخلوا عنه مع انه فعلا طلع بريء والزلمة صار معه اكتئاب وانتحر. المتهم الثالث كان الاقوى من بين جميع المشتبه فيهم، شاب عمره 19 سنة اسمه ساتو يوشيرو. الشب كان عضو بعصابة محلية وبنفس الوقت ابوه كان شرطي، والشب عنده سوابق وكان بالزمانات ممسوك على سرقة سيارات. وزي ما بتعرفوا الحرامي غير اكثر من سيارة خلال العملية وهذا الشب كمان كان معروف انه بيحب الدراجات وعنده مهارات عالية بسواقتها. وملامحه بتشبه ملامح الصورة اللي رسمتها الشرطة وما كان في عنده حجة بتثبت انه ما كان موجود بالمكان اللي صارت فيه السرقة. والاهم من هذا الحكي كله انه ابوه كان شرطي وكان في عنده دراجة يعني سهل عليه يعرف تفاصيل الدراجة ويقلدها. مع كل هاي التفاصيل الشرطة ما كان عندهم حجة ليستبعدوا عنه الشبهه. بس المشكلة انه قبل كم ساعة من اعتقاله وصلهم خبر انه هذا الشب شرب سم ومات. هون الشرطة قالت انه هو فعلا لانه شكله لما عرف انه الشرطة شكت فيه وكانوا بدهم يعتقلوه قرر انه ينهي حياته. بس المشكلة كمان انهم ما لقوا عنده بالبيت اي فلوس او دليل بياكد انه هو الحرامي. وفي كمان احتمال فكروا فيه الشرطة انه ابوه هو اللي يكون قتله عشان ما يجيب له العار لانه شرطي. او انه العصابة اللي هو منتمي الها كلهم مشاركين بالعملية ولما شافوا انه الشرطة شاكين فيه قرروا انهم يتخلصوا منه عشان ما يجيبوا لهم وجع راس. ويمكن هذا اقرب احتمال لانهم لما تبعوا ورا افراد العصابة لقوا انهم شارين بيوت وسيارات جديدة. واعتقلوا واحد منهم بعد فترة ولقوا عنده بالبيت مبلغ ضخم ويمكن هذا جزء من المبلغ المسروق. ومع انه ما في ولا دليل قاطع على هذا الحكي الا انه هاي اقرب فرضية الشرطة وصلوا لها. بعد سبع سنين وبشهر 12 سنة 1975 الشرطة اعلنوا عن نهاية التحقيق من دون ما يوصلوا لاي نتيجة. الحلو بالموضوع انه بعد 20 سنة يعني سنة 1988 على حسب القانون الياباني تم اعفاء السارق من اي تهمة. وقالوا له يا غالي انت هيك تمام ما راح يتم ملاحقتك باي شكل من الاشكال وبتقدر تكشف عن هويتك. ولكنه ما اعترف وما كشف عن هويته وضلت القضية من دون حل لغايه اليوم. الان انا حاب اعرف رايكم مين اكثر واحد حسيتوا انه هو ممكن يكون الحرامي. يا جماعة هاي كانت قصتنا اليوم بتمنى انها تكون عجبتكم لكل واحد وصل معي للنهايه بتمنى اذا استمتعت انك تدعم الفيديو بلايك. وكمان مره للي عم بيشوفوني لاول مره انا ابو الصادق وبحكي قصص عن كل شي غريب وغامض على كوكب الارض. اقل دعم ممكن تقدموا لي اياه انكم تشتركوا بالقناه وتفعلوا جرس الاشعارات، ولو بتحبوا الاشياء الغريبه احضروا هذا الفيديو عن اخطر الاماكن على كوكب الارض. سلام وبشوفكم بفيديو جديد.
