[0:00]Namaste dosto, saal 1999, Russia ke Dr. Ernst Muldashev apni team ke saath Tibet pahuchte hain. Yahan ye aaye the ek expedition par, duniya ke sabse mysterious pahad ki khoj mein Kailash parvat.
[0:18]Kayi hafton ki expedition ke baad jab ye Russia wapas laute to inhone kuch aise daave kiye jinhone puri duniya ko hilakar rakh diya. Muldashev ne kaha, kuch saal pehle char Siberian climbers ne Kailash par chadhne ki koshish ki thi. Aur ek-dedh saal ke andar wo charon budhe hokar mar gaye. Inhi ke ek team member, Sergei Seliverstov ne kaha, Kailash parvat ek time machine hai. Yahan samay alag tarike se chalta hai aur umar zyada jaldi badhti hai.
[0:49]Ye claim bahut se logon ne baad mein dohraaya bhi ki Kailash parvat ke paas nakhun aur baal zyada tezi se grow karte hain. Dr. Muldashev ne to ye tak kaha ki Kailash asal mein andar se khokhla hai aur iske andar bahut saari gufaaye hain jinmein ancient mythical civilization ke log samadhi mein hain. Ye claims itne viral hue ki aaj bhi internet par agar aap Mount Kailash search karoge to ye kahaniyan sabse pehle aage aati hain. Lekin aakhir kitni sacchayi hai in daavon mein? Kya Kailash ke paas sahi mein samay alag tarike se behave karta hai? Aakhir kya karan hai jab Mount Everest jaise duniya ke sabse unche pahad par hazaron log chadh chuke hain, to Kailash parvat par aaj tak bhi koi insan kyun nahi chadh paya hai? Aaiye samajhte hain Kailash parvat ke is rahasya ko aaj ke is video mein.
[1:39]Video shuru karne se pehle batana chahunga dosto, agar aap aaj bhi reports, presentations ya content manually bana rahe ho. Apne research work mein ya kisi bhi office ke kaam mein AI ka use nahi kar rahe ho to honestly bataun aap kaafi piche reh jaoge. Dosto aaj artificial intelligence hamari lifetime ka sabse bada technological shift hai. Ye koi future ki baat nahi hai ye abhi ho raha hai. Aur isse farak nahi padta apne AI ke baare mein kitna suna hai aur kitna nahi. Farak isse padta hai ki aap apni life mein apne kamon mein AI ka kitna istemal kar rahe ho. Aaj 2026 mein log jante to hain ki AI kitni powerful cheez hai lekin ise dhhang se use nahi kar pate. Baat badi simple hai jo log AI ko practically use karna seekh jayenge wo future mein zyada productive honge, zyada valuable honge aur opportunities automatically attract karenge. Isi liye maine banayi hai ye AI Masterclass. Khaas tor par un logon ke liye jo non-technical hain. Students, working professionals, creators ya business owners. Ye teen ghante ki live workshop hai jo conduct karunga main 15 February ko sham ke 7:00 baje personally live aakar aapko 25 powerful AI tool sikhaunga. Is class ke baad aap presentations bina design skills ke banana seekh jayenge reports aur assignments mintoon mein ban jayengi. Hyperrealistic quality mein AI images, AI videos aur AI se gaane banana bhi seekhenge. Aur jo kaam aap pehle kayi ghanton mein karte the ab wo kuch hi mintoon mein ho jayega. Abhi tak pichle sessions mein 50,000 se zyada log is workshop ko join kar chuke hain aur unka feedback honestly bahut solid raha hai, screen par dekh sakte ho. Pichle session mein 76% logon ne kaha ki workshop unki expectations se above and beyond gayi. To agar aap 2026 mein piche nahi rehna chahte aur AI ko apne kaam ka daily assistant banana chahte ho to link niche diya hai. Ya fir aap is QR code ko bhi scan kar sakte ho is masterclass ko join karne ke liye. Jaldi se kar lena kyunki seete limited hai. Ab apne topic par wapas aate hain. Nakshe mein agar hum dekhen to Mount Kailash India-China ke border se lagbhag 100 km dur Tibet ke Western region mein sthit hai. Iski unchai kareeb 6,638 meter jo ki Mount Everest ki height se kareeb 2,200 meter kam hai. Lekin anokhi baat hai iski shape jo ki bilkul ek pyramid jaisi hai. Iski dhalan itni zyada hai ki pahad ke ek bade hisse par to barf bhi nahi tik pati. Lekin sabse special baat hai iski religious significance. Char alag-alag religions Hinduism, Buddhism, Jainism aur Bon Kailash parvat ko pavitra mante hain. Aur inmein se kuch ka kehna hai ki ye universe ka center hai. In charon dharmon ke log hazaron saalon se Kailash parvat ki parikrama karte aa rahe hain. Jo sacred rasta hai is parvat ke charon taraf ghumne ka wo kareeb 52 km ka hai. Hindus aur Buddhists clockwise direction mein parikrama karte hain aur Jains aur Bon followers anti-clockwise karte hain. Hindu dharm mein Kailash wo parvat hai jis par Bhagwan Shiv apni patni Parvati ke saath rehte hain. Aur sabse famous Hindu legend hai Ravan ki kahani. Apni shakti ke ahankar mein chur Ravan ne ek baar Kailash parvat ko Bhagwan Shiv aur Mata Parvati samet uthakar Lanka le jane ki sochi thi. Jab Ravan Kailash ko uthane laga to Bhagwan Shiv ne bas apne pair ka ek angutha dabaya aur Ravan hazar saal ke liye pahad ke niche fas gaya. Hinduon ki tarah hi Buddhists mante hain ki Kailash parvat par Buddhist devta Chakrasamvara apni patni Vajravarahi ke saath meditation karte hain. Isi tarah Jain dharm mein Kailash ko Ashtapad kaha jata hai. Jahan par pehle Tirthankar Rishabhdev ne lakhon saal tapasya ki aur Moksha prapt kiya. Isi tarah hai Bon dharm jiske baare mein aap mein se zyada tar log shayad nahi jante honge kyunki ye Tibet ka pre-Buddhist indigenous religion hai. Yaani ki Buddhism ke aane se pehle Tibet mein is dharm mein zyada tar log mana karte the. Ismein mana jata hai ki Kailash wo Axis hai jahan swarg aur dharti milte hain. To sochkar dekhiye, char alag-alag dharm lekin sabhi ki Kailash ko lekar ek hi soch hai ki ye pavitra hai aur yahan par devi-devta rehte hain. Kailash ke alawa puri duniya mein sirf ek hi aur aisa pahad hai jo char dharmon mein puja jata hai. Aur ye hai Sri Lanka ka Sri Pada yani Adam's Peak. Ye Adam's Peak bhi bahut anokhi hai iski photos dekhiye zara iski religious significance Hinduism, Buddhism, Islam aur Christianity mein dekhi jaati hai. Is pahad ke upar ek badi footprint jaisi formation bani hai pattharon ki jiska charo alag-alag dharmon ke logon ka alag-alag interpretation hai. Lekin Kailash par aaye to Kailash parvat ko Himalaya ka sabse purana pahad bhi bataya jata hai lekin ye baat sach nahi hai. Himalaya ki pahadiyan jaisa ki aap jante hi hoge Indian aur Eurasian plate ke collision se lagbhag 5 crore saal pehle banni shuru hui thi. Jabki Kailash parvat iske lagbhag 3 crore saal baad sirf 1.7 crore saal pehle hi banna shuru hua tha. Is pahad ko agar aap satellite view se dekhoge to aapko iske paas do lakes bhi dikhayi dengi. Ek hai Mansarovar Lake aur dusri hai Rakshastal. Ye dono lake side by side hain donon mein bas do se teen km ki duri hai aur aaspaas ka environment bhi bilkul same hai. Lekin kamaal ki baat ye hai ki Mansarovar Lake ka pani meetha hai jise piya ja sakta hai ismein machliyan aur plants bhi hain. Aur dusri taraf Rakshastal ka pani khara hai ismein bahut zyada namak hai ise piya nahi ja sakta aur iske aaspaas kuch ugta bhi nahi. Ye sahi mein ek natural wonder hai dosto do lakes ek dusre ke bagal mein ek hi jagah par lekin ek ka pani salt water aur dusre ka pani fresh water. Aisa kaise ho sakta hai? Iski baat aage video mein karte hain lekin logon ka manna hai ki Mansarovar Lake devtaon ka bathing place hai aur Rakshastal rakshason ka. Kaha jata hai ki Ravan ne Rakshastal par hi Bhagwan Shiv ko khush karne ke liye tapasya ki thi. Lekin sabse important baat ye hai ki char major Asian rivers Indus, Sutlej, Brahmaputra aur Karnali jo Ganga mein jakar milti hai ye sab Mount Kailash ke aaspaas se originate hoti hain. Ye nadiyan karodon logon ko pani deti hain. Ek scientific perspective se ye baat bhi bahut extraordinary hai ki ek mountain range ke paas sirf is ek pahadi ke paas itni saari badi nadiya nikalti hain. Lekin baat yahan khatm nahi hoti maine kaha tha is pahad ki shape bhi bahut special hai. Kailash parvat almost ek perfect pyramid shape mein hai. Iske char faces hain North, South, East, West jo char dishaon ki taraf aligned hain. Aisa ek natural mountain mein hona bahut bahut rare baat hai. Itna rare hone ki wajah se hi Kailash ko lekar bahut si baaten kahi jati hain. Isi pyramid jaisi shape ko lekar Dr. Muldashev ne kaha tha ki ye artificially constructed pyramid hai. Yaani ki ise kisi ancient civilization ne banaya tha jo bahut advanced thi aur baki duniya ke pyramid se ye seedha connected hai. Kuch log to ye bhi kehte hain ki Kailash parvat ke niche Shambhala jaisi mythical cities hai aur Kailash inhe chipakar rakhta hai. Halanki sabse popular claim jo kiya jata hai wo hai time dilation ko lekar jiski baat maine video ke shuru mein bhi kari thi. Kaha jata hai ki Kailash ke paas samay bahut differently behave karta hai aur jin cheezon ko hone mein hafto lagte hain wo kuch ghante mein hi hone lagti hain. 12 ghante mein hi baal aur nakhun itne bade ho jaate hain jitne normally do hafton mein badhte hain. Aur suniye Jaggi Vasudev ne tak kaha tha ki Kailash par dhai ghante bitane ke baad unki umar 10 se 15 saal kam ho gayi.
[8:42]Ab jab aap kisi se in claims ke piche scientific explanation mangte ho to wo log reason dete hain ki ismein cosmic energy hai. Kailash cosmic energy ka center hai jahan time aur space ke rules apply hi nahi hote. Kuch log to ye bhi keh dete hain ki Kailash asal mein ek dusri duniya aur dimension mein jaane ka gupt dwar hai aur isi karan se time yahan bade differently behave karta hai. Internet par aaj ke din aise claims bahut zyada circulate hote hain aur kuch log saboot ke tor par ye bhi keh dete hain ki dekho Kailash ki position dharti ke nakshe mein mathematically perfect hai. Daawa kiya jata hai ki Kailash parvat North Pole se exactly 6,666 km dur hai. Britain ke Stonehenge se bhi ye exactly 6,666 km dur hai aur South Pole se exactly iska double 13,332 km hai. Ye numbers dekhkar logon ko lagta hai ki kuch to alag hai is parvat ke bare mein. Lekin ye na ye ittifaq nahi lagta aisa lagta hai ki isliye Kailash parvat ko access Mundi bhi kehte hain. Kaha jata hai ki ye pura jo jo pura earth hai na wo aisa ek barabar ghum raha hai solar system mein. Idhar ya udhar ludhak kyun nahi raha hai? Mana jata hai ki Kailash parvat wo axis hai jo isko balance rakha hai. Aur ye mystery aur bhi zyada gehri ho jati hai jab aap is baat ko dekho ki is parvat par aaj tak koi nahi chadh paya hai. Mount Everest ki height se Kailash parvat 2,200 meter chhota hai. Isse unche 100 se zyada pahad hain jin par log chadh chuke hain lekin is ek pahad par koi nahi chadha aaj tak. Aakhir kya karan hai iske piche? Daawa kiya jata hai ki Kailash par jo bhi chadhne ki koshish karta hai wo kisi na kisi karan se rok diya jata hai. Logon ke sir mein achanak se tez dard hone lagta hai, disorientation hoti hai ya achanak se mausam kharab ho jata hai tez barf girne lagti hai, barfile toofan aa jate hain. Logon ka kehna hai ki yahan koi invisible force hai jo ek certain point ke baad kisi ko bhi upar nahi jane deti. Aaiye iske piche ki asliyat jante hain. San 1926 mein British explorer Hugh Ruttledge ne Kailash par chadhne ki koshish ki thi. Unhone tab ise dekhkar kaha tha ki ye utterly unclimbable hai. Unhone likha ki iska North face lagbhag 90 degrees ke angle par hai aur itna zyada dhalan hai ki is par barf bhi nahi tik pati. Jab inhone chadhne ki koshish kari to ye Kailash par 5,486 meter ki unchai tak pahunchne mein kamyab rahe the lekin uske aage nahi badh paye. Karan tha ki Kailash badalon mein ghira hua tha. Hugh ke saath ek British Indian Army ke Colonel R. C. Wilson aaye hue the jinhone South ki taraf se chadhne ki koshish ki aur ek aisa rasta dhund liya jisse Mount Kailash ki choti par chadha ja sakta tha. Is raste ko dekhkar unke Sherpa Chetsen ne unse kaha, 'Sahib, we can climb that'. Lekin jab Wilson ne chadhne ki koshish kari to wo bhi yahan nahi chadh paye. Unke kadam rakhte hi patthar hil gaye aur achanak se mausam kharab ho gaya. Achanak se barfbari hone lagi aur Wilson ke sir ke upar tezi se bijli kadki. Lekin iske piche koi supernatural force nahi thi, bas nature tha. Ye baat sach hai ki physical challenges ki wajah se is pahad ko chadh pana bahut mushkil hai, lekin impossible nahi. Asli karan kisi ke bhi is pahad ke upar na chadh paane ke piche hai iski religious importance. San 1985 mein Italy ke Reinhold Messner ko Chinese sarkar ne Kailash parvat par chadhne ka offer diya tha. Reinhold ko duniya ka greatest mountaineer mana jata hai. Wo 8,000 meter se unche duniya ke sabhi 14 pahadon par chadhne wale pehle vyakti hain. Mount Everest par bhi wo us zamane mein bina oxygen ke chadh gaye the jab aisa karna impossible mana jata tha.
[12:29]To agar koi Kailash parvat par chadhne ke liye sabse zyada qualified tha to wo yahi insan the. Lekin jab Chinese sarkar ka offer inke paas aaya to inke saathi mountaineers ne inse kaha, "One should not trample in mountain boots on gods turned to stone." Kisi ko bhi patthar ban chuke devtaon ko apne joote ke niche nahi kuchalna chahiye. Reinhold samajh gaye aur unhone is pahad par chadhne se mana kar diya. Baad mein unhone kaha ki is par chadhna logon ki aatma ko jeetne jaisa hoga aur wo suggest karenge ki agar kisi ko pahad hi chadhna hai to kisi aur zyada kathin pahad par chadha jaye. Isi tarah British Alpine Club ke president rahe Doug Scott ka bhi Kailash parvat ko lekar kehna tha ki ye koi bahut difficult pahad nahi hai. Lekin Kailash par chadhne ke bare mein sochna bhi us cheez ko nicha dikhana hoga jise log pavitra mante hain. Saal 2001 mein Spanish climber Jesus Martinez Novas ko China se Kailash climb karne ki permission mil gayi thi. Lekin is baat ko lekar itna bhari protest hua ki Novas ne apni expedition cancel kar di aur Chinese sarkar ne international pressure ke chalte Kailash mein climbing par permanent ban laga diya. Sahi suna aapne, saal 2001 ke baad se is pahad par climb karna waise bhi allowed nahi hai legally. Itihaas mein sirf ek hi insan hai jo Kailash parvat par chadh paye hain aur wo bhi Buddhist legend mein. Kaha jata hai ki Milarepa ki Bon dharm ke guru Narowan se Kailash parvat par adhikar ko lekar behas ho gayi. Tay hua ki donon mein se jo pehle Kailash par pahunchega, Kailash usi ka hoga. Jab race shuru hui to Narowan tezi se parvat par chadhne lage aur iski choti ke kareeb the. Lekin Milarepa dhyan mein hi baithe rahe. Lekin fir ek subah suraj ki ek kiran par baithkar Milarepa Kailash parvat ki choti par pahunch gaye aur race jeet gaye. Ye koi actual history nahi hai bas ek legendary kahani hai. Sacred mane jane wale baki pahadon ko lekar bhi mountaineers ki yahi soch rahi hai. Kailash parvat ki tarah hi Tibet ke Khawa Karpo parvat par bhi nahi chadha ja sakta. Ye 6,740 meters uncha hai. Iske piche karan hai ki Khawa Karpo ko Buddhism mein bahut pavitra mana jata hai aur is par chadhna Tibetan communities ki nazar mein sacrilege ke barabar hai. Isi tarah Bhutan mein 7,600 meter uncha ye wala pahad hai. Ganghkar Puensum. Ye duniya ka sabse uncha pahad hai jis par koi nahi chadh paya hai. Aur iske piche bhi karan local religious beliefs ki respect hai. Saal 1994 ke baad se Bhutan ne is pahad par chadhne par ek official ban laga diya tha. Dusre daave par aate hain Kailash ki pyramid jaisi shape. Ye baat sach hai ki nature mein aisi shape banna bahut rare hai lekin iska matlab ye nahi ki aliens ne ise aakar banaya ho. Mount Kailash ki pyramid shape Quaternary period ki ice ages ke dauran banni shuru hui thi jo lagbhag 25 lakh saal pehle shuru hua tha. In ice ages ke dauran glaciers ki barf ne valleys create ki aur pahad ki chattanon ko kaatkar inhe smooth bana diya. Isi ki wajah se hum ek sharp peak dekhne ko milti hai. Ye ek completely natural process hai aur duniya mein aur bhi aise pahad hain jahan par aisa hua hai. Jaise ki Europe ki Alps Mountain range mein Matterhorn ki pahadi. Ye bhi Kailash ki tarah ek pyramid ki shape mein hai aur bahut se log Switzerland mein jab ghumne jate hain ise dekhne jate hain. Isi tarike se Kailash parvat ke paas ek fresh water lake hona aur ek salt water lake hona koi supernatural cheez nahi hai. Reason iske piche bhi completely scientific hai. Ek to duniya mein aur bhi aisi lakes hain jinmein do alag-alag lakes hona to chodiye ek hi lake mein do tarah ke pani hain. Jaise ki Kazakhstan ki Balkhash Lake. Iske Western hisse mein pani lagbhag fresh hai jise piya ja sakta hai lekin Eastern hisse mein pani bahut salty hai. Philippines ki Barracuda Lake ko dekhiye ismein upar ka pani to meetha aur fresh hai lekin niche ka pani salty hai. Kailash parvat ke paas Rakshastal Lake scientific bhasha mein kahen to ek endorheic lake hai. Iska matlab hota hai ek aisi lake jismein pani ke bahar nikalne ka koi rasta na ho, ek landlock lake. Isse hota kya hai ki evaporation se pani to vaporize ho jata hai lekin pani ke andar jo salt aur minerals maujood hain wo Rakshastal Lake mein hi reh jate hain. Dheere-dheere over the years, over the centuries ye minerals pani ke andar hi jama hote rahe, inki concentration badhti rahi aur yahan ka pani bahut zyada salty ban gaya. Aur kyunki itne salty pani mein kuch ugta nahi, koi machliyan nahi rehti isliye yahan par koi jeevan bhi nahi dekhne ko milta. Lekin dusri taraf Mansarovar Lake ka pani overflow hokar Rakshastal aata rehta hai. Isse pani ke saath-saath minerals bhi aate hain aur Mansarovar ke pani mein minerals ka concentration nahi badhta aur yahan sirf ek altitude difference hai in donon ke beech mein. Pani hamesha ek disha mein hi behkar aata hai, isse Rakshastal mein aur bhi zyada minerals ikatthe hote rehte hain aur pani aur zyada khara banta rehta hai. Ab aate hain time dilation par dosto, kya Kailash parvat par samay alag tarike se chalta hai? Aap guess kar hi chuke hoge iska jawab hai obviously nahi. Albert Einstein ki theory of relativity ke mutabik time ko keval do cheeze effect kar sakti hain, speed aur gravity. Lekin Kailash parvat ke paas na to speed zyada hai aur na hi gravity mein koi zyada fark hai. Log dawa karte hain ki is parvat ke paas nakhun aur baal tezi se badhne ke piche ek strong magnetic force hogi. Lekin aaj tak iska koi bhi saboot nahi mila hai ki Kailash par koi bhi unique magnetic force maujood hai. Actually mein iska bhi koi saboot nahi hai ki is parvat ke paas nakhun aur baal tezi se bade hote hain. Asal mein ye saare time dilation ke daave ek hi source tak trace kiye ja sakte hain Dr. Muldashev. Wahi insan jinki kahani maine aapko video ke shuru mein batayi thi, jante ho ye kaun the? Ye koi physicist ya geologist nahi the balki ek eye surgeon the aankhon ke doctor. Kailash ko lekar inhone jo bhi daave kiye the unhe kisi bhi peer-reviewed scientific journal mein publish nahi kiya gaya hai. Yahan tak ki kisi bhi scientist ne unke daavon ko sahi nahi paya hai aaj tak. Muldashev kis type ke insan the aap is baat se andaza laga sakte ho ki wo mante the ki mermaids aur vampires sach mein exist karte hain. Unhone Romania ke desh mein Vampire Dracula ka asli mahal dhundhne ka daawa bhi kiya tha jo unke mutabik underground tha. Iske alawa wo Charles Darwin ki theory of evolution ko bhi bakwas bata chuke hain aur ye bhi daawa kar chuke hain ki India mein aise superhumans rehte hain jo telepathically communicate kar sakte hain. Jo insan is tarike ke science fiction wale daave karta ho jo bachchon ki kahaniyon mein hote hain us insan par aakhir kaise yakin kiya ja sakta hai? Muldashev ke daave itne comedy hain ki Russia mein unki theories ko debunk karne ke liye ek puri kitab Anti Muldashev publish hui thi. Lekin unfortunate baat ye hai dosto ki hamare India mein khud aise bahut saare Muldashevs ghum rahe hain jo podcasts mein aakar aisi ajeebo-gareeb baaten karte hain aur bachchon ki kahaniyon ko sach batate hain.
[20:25]Ye dawa approximately close zarur hai lekin exactly accurate nahi hai. North Pole se Kailash ka claimed distance 6,666 km lekin actually mein ye hai 6,550 km. Isi tarike se Stonehenge ka actual distance hai 6,900 km aur South Pole se jo 13,332 km ka distance bataya ja raha hai. Wo actually mein 13,400 km ka distance hai. To ye jo 6,666 numbers repeat karke perfect mathematical position dikhane ki koshish ki ja rahi hai, aisa asli mein hai nahi. Aur pahad ko chadhne par jo sir dard, confusion aur disorientation dekhne ko milta hai uske piche koi supernatural force nahi hai uske piche reason hai altitude. 4,000 meter se upar jaane par kayi logon ko aisa feel hota hai kyunki oxygen actually mein kam ho jati hai. Oxygen ki kami ke karan dimag mein sujan aa jati hai jiski wajah se tez sir dard hona, confusion, hallucinations jaisi dikkatein aa jati hain. Internet par ek ye bhi claim circulate kiya jata hai ki NASA ne Mount Kailash mein strange energy fields detect kare. Iske alawa jab NASA research karti hai to unhe ye pata chalta hai ki Mount Kailash ke andar kuch to magnetic field hai aur wo magnetic field normal nahi hai. Wo magnetic field bahut zyada hai agar main aapko values mein batau to us magnetic field ki value aayi 3,000 se 8,000 nano Tesla zyada as compared to other regions. NASA ke Terra spacecraft ne 20 January saal 2003 ko Kailash ki ASTER images li thi. ASTER ka full form Advanced Spaceborne Thermal Emission and Reflection Radiometer. Images mein 14 spectral bands use hue visible se thermal infrared wavelength region tak lekin NASA ki website par yahan koi bhi anomaly milne ka dawa nahi kiya gaya hai. Kailash ki photo bhi aisi li gayi hai jaise generally pahadon ki photo li jati hai. NASA ko yahan actually mein koi bhi unusual energy hone ka koi evidence nahi mila hai. Lekin in sab cheezon ka matlab ye nahi dosto ki Kailash parvat ek extraordinary pahad nahi hai. Sochkar dekhiye insano ne kahan pahadon se lekar samudra tak, space se lekar chand tak har cheez ko conquer kiya hai. Lekin Kailash jaise pahad ko dekhkar puri insaniyat ne kaha ki ye sacred hai, is par hum nahi chadhenge. Isse adbhut cheez kya ho sakti hai? Duniya ke sabse mahan mountaineer jinhone mana ki Kailash parvat par chadhna zyada mushkil nahi hai unhone khud chadhne se mana kar diya. Ye hai asli miracle. Ye parvat humein sikhati hai ki kuch cheeze conquer karne ke liye nahi hoti, kuch cheeze respect karne ke liye hoti hain. Agar ye video pasand aaya dosto to AI Masterclass ko join karne ka link niche description mein mil jayega. Aur ab agar aap time dilation ke concept ko aur gehrai se janna chahte ho actual wala time dilation kaise kaam karta hai to iske liye aapko black holes aur warm holes ko gehrai se samajhna hoga aur use maine samjhaya hai is wale video mein. Yahan click karke dekh sakte ho. Bahut bahut dhanyawad.
