Is Jaipur Safe for Women? (3D) by Professor Of How

[0:00]Sirf kuch dino ke andar andar hue mere shehar Jaipur ke do sharmnak incidents ne pure shehar ko hila kar rakh diya hai. Sabse pehla incident 8 April ko hua, jab New Sanganer Road area mein ek young lady Rapido bike taxi par ja rahi thi, toh do ladko ne motorcycle se uske paas aakar chhedchad ki. Unke saathi ne ghatna record ki aur Instagram pe reel daal di. Video mein clearly dikhta hai ki pillion rider ne ladki ke kapde kheenchne ki koshish ki. Ladki ne resist kiya lekin accused haste haste bhaag gaya. Yeh incident Jaipur jaise sabhya shehar mein, broad daylight mein, busy road par, public ke samne hua hai. Doosra incident 25 March 2026 ko hua, jab Malviya Nagar ke Sector 9 ki ek sunsaan gali mein sham 6:00 baje ke aas paas ek pregnant lady phone par baat karti hui ja rahi thi. Accused ne peeche se aake unhe pakda aur inappropriately touch kiya, molest kiya. Jab mahila ne virodh kiya aur shor machaya toh accused ne patthar se marne ki jaanleva dhamki di aur faraar ho gaya. Ab Rapido case wale chhapri toh arrest ho bhi gaye aur police ne unki marammat bhi kar di. Par pregnant lady wale case mein negligence ke sath kaam karne ki wajah se, police ko apne hi do officers ko suspend karna pada. Aur ab us case ko aur zyada seriousness ke sath mein handle kiya ja raha hai. Par sawal yeh hai ki yeh system ka failure aakhir ho hi kisliye raha hai? Toh iska ek bada reason hai, darr ka khatam hona. Rapido taxi wale case ka main accused ek repeated offender hai, jis pe pehle se hi 6 se zyada FIR hain. Jab aise criminals ko kadi saza nahi milti aur woh bahar ghoomte hain toh unka hausla aur badh jata hai. Jab sara saboot aankhon ke samne hai toh faansi dene mein kya harz hai? Upar se social media pe viral hone ki bhookh ne logon ko itna andha kar diya hai ki woh kisi ki izzat uchhaalne ko content samajhne lage hain. Jaise Rapido wale case mein inhe reel banani thi.