[0:00]بسم الله الرحمن الرحيم، معاكم الدكتور أحمد من قناة ادرينالين، ومكمل معاكم في سلسلة كورس الأوتو سي، وهنتكلم النهارده إن شاء الله عن الأبدومينال بين، ألم البطن. ألم البطن من المشاكل الشائعة، ومش هبالغ لو قلت إنها بتدخل لنا الصيدلية بشكل يومي، ومن ضمن الأخطاء اللي ممكن نقع فيها، إن لما مريض يقول لك بطني بتوجعني، بتوصف له حاجة للمغص بدون ما تعرف فين المشكلة. وفي حلقة النهارده إن شاء الله، هنغير المفهوم ده تمامًا، وزي ما اتعودنا مع بعض في الكورس بتاعنا، إننا بنبدأ الأول مع المريض بتشخيص الحالة قبل ما نصرف أي علاج، وده لأن ألم البطن أسبابه كتير، وكل سبب له طريقة مختلفة من العلاج. والنهارده هنتكلم عن كل حاجة تخص ألم البطن، وهقول لك بكل بساطة إزاي تحدد المشكلة من مكان الألم، وإن شاء الله بعد الحلقة دي لما يدخل لك مريض الصيدلية بيشتكي من ألم في البطن، هتعرف إزاي تشخصه صح، وتصرف له علاج مناسب لحالته. وإمتى تعمل له ريفير للطبيب المختص، أولًا كده قبل ما ندخل في حلقتنا، هقول لك على أربع حالات لو دخلوك الصيدلية وبيشتكوا من ألم في البطن، لازم تحولهم للطبيب المختص. ألم في البطن مع وجود دم، سواء ترجيع أو إسهال، يروح لطبيب بطن، ألم في البطن والمريضة حامل في أول ثلاث شهور، لا يفضل إننا نتعامل معاها، وهتعرف قدام ليه، وتحولها للدكتور أو الدكتورة اللي متابعة معاها. ألم في البطن والمريض بيعاني من كانسر، ما ينفعش نتعامل معاه، ألم في البطن والمريض عمل جي أي تي سيرجري قريب، برضه ما ينفعش نتعامل معاه، أي ألم في البطن غير الأربع حالات اللي قلناهم، هنعرف إن شاء الله في جزء التشخيص إيه اللي بنعالجه فيهم، وإيه اللي بنحوله للطبيب المختص. طيب دلوقتي لو دخل لك مريض الصيدلية وقال لك يا دكتور أنا بطني بتوجعني، هتتعامل معاه إزاي؟ أول حاجة، هتطلب من المريض إنه يشاور على مكان الألم، وبناءًا على المكان اللي هيشاور عليه المريض، هنعرف مع بعض فين المشكلة، علشان كده هنبدأ الأول بأوفر فيو سريع، هنشرح فيه الأعضاء المتواجدة في منطقة البطن، ودي هتسهل علينا جدًا في جزء التشخيص ومش هتخليك تحفظ كتير، بعدها هندخل على جزء التشخيص، ثم علاج كل حالة بالتفصيل إن شاء الله. نركز مع بعض في الصورة اللي قدامنا دي، أول حاجة هنعتبر إن دي السرة، وهنقسم البطن للجزء العلوي من البطن اللي هو فوق السرة، والجزء السفلي من البطن اللي هو تحت السرة. عندنا في الجزء العلوي، منطقة منتصف الصدر، ودي المنطقة اللي بيلتقي فيها الإيزوفيجاس المريء مع الاستومك المعدة أو بيسموها فم المعدة. وعندنا هنا الليفر الكبد وتحت الكبد في الجال بلادر المرارة، وهنا موجود الكلية، وموقع الكلية تحت المعدة في الجزء الخلفي من الظهر، ده كله في الجزء العلوي من البطن اللي هو فوق السرة. وعندنا في الجزء السفلي من البطن، هنا اللارج إنتستين القولون، وهتلاقيه لافف في جزء كبير من البطن، وفي نهايته جراب شبه الصباع، اللي هو الأبيندكس، الزائدة الدودية، ودي مكانها في الجزء السفلي من البطن، في الجزء اليمين. وفي هنا السمول إنتستين، وهنا تحت الحالب والمثانة، وفي الجزء الشمال من البطن هنحط علامة وهنرجع لها في الشرح قدام إن شاء الله. سريعًا كده خلونا نختصر الجزء اللي شرحناه علشان منتوهش من بعض، عندنا فوق السرة أول حاجة منطقة منتصف الصدر أو بيسموها فم المعدة، ثاني حاجة على الجزء اليمين موجود المرارة، ثالث حاجة الكلية. ونركز إن مكان الكلية في الجزء الخلفي من الظهر، وتحت المعدة، لأننا هنحتاج المعلومة دي قدام في التشخيص، وعندنا تحت السرة في حاجتين، يمين الزائدة الدودية، شمال العلامة اللي قلنا هنرجع لها قدام في الشرح. كده خلصنا الأوفر فيو ندخل على جزء التشخيص، لما هيدخل لك مريض يشتكي من ألم في البطن وسألته هل الألم فوق السرة ولا تحت السرة؟ لو قال لك الألم فوق السرة، في عندنا ثلاث احتمالات، لو كان في منتصف الصدر يبقى جاسترايتس، التهاب في المعدة. الجاسترايتس التهاب المعدة ده ألم في الجزء العلوي من البطن، بالتحديد في منتصف الصدر، ولو قلت للمريض يشاور على مكان الألم هيشاور في منتصف الصدر بصباع واحد فقط. سبب الالتهاب ممكن يكون نتيجة بيبتك ألسر قرحة معدة أو جيرد اللي هي الجاسترو إيسوفجيا ريفلكس ديزيز، ارتجاع مريء. والأعراض اللي المريض هيدخل يشتكي لنا منها، هيقول لك إنه حاسس بألم في معدته مع ثقل وحرقان أو حموضة في صدره وحاسس إنه عاوز يرجع، وفي حلقة كاملة اتكلمنا فيها عن أسباب حدوث الارتجاع والقرحة والأعراض اللي هنشوفها والنصايح اللي بنقدمها للمريض وعلاجهم بالتفصيل. أما لو كان الألم في الجزء اليمين فدي علامة للجال بلادر ديسأوردر اللي هو التهاب في المرارة، وسريعًا كده خلونا ناخد نبذة عن المرارة. المرارة دي عضو صغير يشبه الكمثرى، موقعه في الجزء العلوي من البطن وبالتحديد في الجزء اليمين أسفل الكبد، المرارة دي بتفرز عصارة اسمها العصارة الصفراوية، بتفرزها في الأمعاء الدقيقة علشان تهضم الدهون. طيب إحنا عرفنا إيه هي المرارة وإيه وظيفتها، طيب بيحصل لها التهاب إمتى؟ زي ما قلنا إن المرارة بتفرز العصارة الصفراوية، والعصارة الصفراوية بتتنقل عن طريق البايل دكت للأمعاء الدقيقة علشان تهضم الدهون، في بعض الحالات بتتجمع الحصوات في الجال بلادر وبتنزل في البايل دكت فبتقفله. بالتالي العصارة بتفضل جوه المرارة، فبتنتفخ ويحصل لها التهاب، وطبعًا دي حالة لازم تحولها للطبيب فورًا لأنها حالة مهددة لحياة المريض. طيب أتأكد إزاي إن المريض اللي قدامي بيشتكي من التهاب مرارة؟ هتلاقي الأعراض دي، ألم حاد في الجزء اليمين من البطن، والألم منتشر لكتفه أو ظهره، زي ما شايفين في الصورة اللي قدامنا. كمان هتلاقيه مش قادر يلمس مكان الألم، وهيقول لك إنه حاسس بترجيع مع ارتفاع في درجة الحرارة. والعلامة المميزة واللي بتلخص كل الكلام ده، إن الأعراض دي بتظهر بعد أكل الفاتي ميل الوجبات الدسمة اللي فيها دهون كتير، لو قال لك كده يبقى دي التهاب مرارة بدون أي شك. طيب لو قال لك الألم في الجزء العلوي من البطن معاه ألم في الظهر، اسأل المريض هل في ألم في البول أو تغير في لون البول أو تقطيع في البول؟ لو قال لك أيوه يبقى المريض ده عنده كيدني ديسأوردر، مشكلة في الكلية، وده بيفسر ليه إحنا قلنا نركز في معلومة إن الكلية في الجزء الخلفي من الظهر، لأن الألم البطن بيكون مصاحب بألم في الظهر، وده بسبب موقع الكلية. طيب الوقت الكيدني ديسأوردر، بتحصل نتيجة إيه أو إيه سببها؟ بتحصل نتيجة تكون الحصوات رينال ستون أو يو تي أي يورينري تراكت إنفكشن التهاب الجهاز البولي. نبدأ الأول باليو تي أي اليورينري تراكت إنفكشن، وبما إننا قلنا إنفكشن، يبقى هتلاقي ارتفاع في درجة الحرارة مع ألم وحرقان أثناء التبول. كمان المريض هيقول لك بروح الحمام كتير يا دكتور ومش بعمل بول كتير، مع وجود ريحة نفاذة للبول. هي مش حالة أوتو سي بس هقول لك علاجها من باب العلم بالشيء، الحالة دي بيتكتب لها غالبًا بروكسيمول فوار، في مادة الخلة البلدي بتوسع الحالب. مع يوفامين كبسول، مع أنتبيوتك زي السبروفلوكساسين أو السلفا دراج، بس تخلي بالك إن في مرضى كتير عندهم حساسية من مادة السلفا. ثاني حاجة الرينال ستون، حصوات الكلى، هتلاقي المريض داخل يشتكي من ألم في المعدة مصاحب بألم في الظهر. كمان ممكن يكون في ألم في الكعبين أو الرجلين، مع ارتفاع بسيط في درجة الحرارة، وشعور بالترجيع مع إحساس بالدوار. كمان ممكن تلاقي لون البول غامق أو فيه لون أحمر، نتيجة الحصوات لما بتتحرك بتجرح مجرى البول فبينزل دم، والبول بينزل متقطع. وهنا المريض بيحتاج يتابع مع دكتور مسالك وكلى علشان يعرف نوع الأملاح، لأن كل نوع له علاج خاص به.
[7:04]وهتنصح المريض طبعًا يشرب مية كتير الصبح أول ما يقوم من النوم، ويشرب بريل وعصير قصب وياكل بقدونس، ويبعد عن الأملاح والأكل الدسم بالليل.
[7:18]وضروري يعمل تحليل البول ويعرضه على دكتور مسالك وكلى علشان يعرف نوع الأملاح اللي عنده ويعالجها. طيب لو قال لك الألم في الجزء السفلي من البطن، استبعد الإمساك والقولون والبيريود. الإمساك وده بأنك تسأل المريض إمتى آخر مرة دخلت فيها الحمام، وهل في إمساك ولا لأ، وفي حلقة كاملة اتكلمنا فيها عن الإمساك أعراضه وعلاجه بالتفصيل. والقولون هتعرفه من الغازات مع وجود مغص وكمان هيشتكي إن بيجي له شوية إمساك وشوية إسهال. لكن العلامة المميزة جدًا وجود غازات كتير في البطن، وألم القولون مميز كمان إنه بيكون ألم في جزء كبير من البطن مش مكان محدد، زي ما قلنا قبل كده القولون واخد جزء كبير من البطن، وفي حلقة كاملة اتكلمنا فيها عن القولون أعراضه وعلاجه بالتفصيل. والبيريود ممكن تكون دي أعراض ما قبل البيريود اللي هي المينستروال بين، وهتديها بونستان فورت المادة الفعالة فيها ميفانميك أسيد، ودي مسكن كويس جدًا في حالة البيريود. بعد ما نستبعد الثلاث حالات اللي قلناهم، اسأل المريض هل في حرارة أو ترجيع أو إسهال مائي؟ لو قال لك أيوه، اطلب من المريض يشاور على مكان الألم، لو شاور تحت السرة يمين، هنشك في الأبندستايتس، التهاب الزائدة الدودية. أما لو شاور تحت السرة شمال، ودي العلامة اللي قلنا هنرجع لها قدام في الشرح، ودي هتبقى جاسترو إنتررايتس، نازلة معوية. نبدأ أول حاجة بالجاسترو إنتررايتس النازلة المعوية، ودي ليها مسميات كتير زي التهاب المعدة والأمعاء الفيروسي، وإنفلونزا المعدة، سريعًا كده خلونا نتعرف على المرض، علشان نعرف الأعراض اللي المريض هيدخل يشتكي لنا بيها. الجاسترو إنتررايتس دي عدوى معوية، بنعرفها لما المريض يدخل لك يشتكي من ألم في البطن تحت السرة في الجزء الشمال مع وجود إسهال مائي وتقلصات وإحساس بالترجيع، وفي بعض الأحيان وجود حرارة. ونركز على كلمة إسهال مائي، لأن ما فيش نازلة معوية بدون إسهال مائي، طيب إيه هي أسباب الإصابة بالمرض؟ غالبًا المريض بيكون أكل أو شرب حاجة ملوثة، طريقة علاج النزلة المعوية بتبقى عن طريق علاج الأعراض، وبنعوض الجسم بالسوائل اللي فقدها بسبب الإسهال المائي علشان ما يحصلوش جفاف، وإنه يبعد عن مسببات المرض. وفي حلقة كاملة اتكلمنا فيها عن النزلة المعوية أعراضها وطرق الوقاية منها بالتفصيل. ثاني حاجة الأبندكتيس التهاب الزائدة الدودية، ألم أسفل البطن في الجزء اليمين، وزي ما شايفين في الصورة اللي قدامنا، الزائدة الدودية دي جراب يشبه الصابع بيكون بارز من اللارج إنتستين القولون. في بعض الحالات يختلف مكان الزائدة على حسب العمر، وكمان في الحامل بيكون الألم أعلى البطن، لأن الزائدة بتكون في الأعلى أثناء فترة الحمل. طيب إيه هو سبب التهاب الزائدة الدودية؟ في الغالب بسبب انسداد مدخل الزائدة الدودية ببقايا الأكل الموجودة في الأمعاء، فبيسهل نمو وتكاثر البكتيريا، فبتورم وتلتهب وتبدأ تتملي بالصديد، وفي الحالة دي بتحتاج جراحة فورًا. طيب دلوقتي المريض هيدخل لك يشتكي من إيه؟ زي ما قلنا قبل كده هيشتكي من ألم أسفل البطن في الجزء اليمين ومش قادر من شدة الألم، وممكن كمان يقول لك إن الألم بدأ الأول حوالين السرة وبعدين بدأ ينتشر. بالإضافة إنه ممكن يكون في ترجيع وإحساس بالترجيع مع ارتفاع بسيط في درجة الحرارة، طيب عاوزين نتأكد أكثر، دوس بإيدك بالراحة على مكان الألم. هتلاقي المريض يحس إن الألم بيقل، وبعدين شيل إيدك بسرعة هيرجع الألم ثاني، أو قول للمريض يجرب ينام ويتني ركبته، مش هيقدر من شدة الألم. طيب بعد ما اتأكدنا إن ده التهاب الزائدة الدودية، هنتعامل مع المريض ده إزاي؟ أول حاجة هندي له حاجة توقف الترجيع زي الإيميتركس حقن، ثاني حاجة إوعى تدي المريض أي مسكن أو مضاد للتقلصات، لأن ممكن يحصل انفجار للزائدة الدودية ويحصل تسمم للمريض. لو حاسس بألم جامد أوي ومش قادر، ممكن تقول له يشرب يانسون أو نعناع يهدي الألم شوية، ثالث حاجة إبعت المريض لدكتور جراحة أو مستشفى علشان يعمل استئصال للزائدة الدودية. طيب لو ما فيش حاجة من اللي قلناهم خالص والمريض قال لك إنه بيشتكي من ألم في البطن، مغص فقط، ادي له باسكوبان وياخد قرص ثلاث مرات يوميًا. وبكده انتهت حلقتنا، ويا رب تكونوا استفدتوا، ومكملين معاكم في سلسلة كورس الأوتو سي من قناة أدرينالين.
