Trust Allah like Ibrahim AS | Tuaha Ibn Jalil | YouthfulDeen

[0:00]Ibrahim alaihi salat wa salam baap bhi chhod gaya. Baap ne kaha tujhe main rajam kar ke mar dunga. Har koi saath chhod gaya. Hatta ke sab jama ho gaye unke khilaaf aur unko barahna kar ke catapult mein daal diya. Aur wahan se jab aag mein daalne lage to kya padha Ibrahim alaihi salam ne? Hasbi Allah wa ni'mal Wakil. Mujhe Allah kaafi hai aur kya hi woh ni'mal Wakil. Kya behtareen dost hai. Kya behtareen kaarsaz hai woh. Aur Allah Ta'ala ne woh kis tarah ka Qadir hai, kis tarah Qadeer aur muqtadir hai ke usne hawaon ki direction nahi phera. Nahi usne samandaron ki rukh ko badla. Nahi usne koi parinday bheje jo ke us aag ko thanda kar dein. Paani phenk phenk ke nahi. Balke direct us aag ko kaha jiski sifat hai jalaana, 'Ay aag! Thandi ho ja aur salaamti ka bais ban ja Ibrahim ke liye.' Aur woh kis tarah se thandi hui? Ke sirf Ibrahim alaihi salat wa salam ke liye thandi hui. Lekin jo rassiyan Ibrahim alaihi salat wa salam ke haath par bandhi hui thein, unke liye thandi nahi hui. Woh rassiyan jala di gayin magar Ibrahim alaihi salat wa salam ke baal tak ko bhi nahi jalaya. Aur jab Ibrahim alaihi salat wa salam us aag se nikle toh unka jo baap tha Aazar, woh dekh raha tha aur kehta hai, "Kya Rabb hai tera Ibrahim!" Yaani ek kaafir ko, ek mushrik ko toh yaqeen aa gaya ke kya Rabb hai Ibrahim ka. Humein abhi tak Rabb ki Qudrat par yaqeen nahi aaya. Humein abhi tak honestly Allah Ta'ala ke mukammal Qadir hone par yaqeen nahi aaya.