[0:01]بسم الله الرحمن الرحيم. النهارده الحقيقه علمتني ايه؟ علمتني ان في مفهوم كده في حياتنا اسمه مفهوم فراغ ما بعد الضغط. او الارتخاء والرحرحه اللي بتحصل لنا ما بعد ما بنشد. يعني ايه؟ تلاقينا بنبقى مضغوطين قوي ايام امتحانات، ومشدودين جدا جدا، ودماغنا بتشتغل بفاعليه عاليه قوي. تلاقي في فتره الامتحانات بتخلص كميات رهيبه جدا جدا من المنهج، بتقعد تقول لنفسك يا ريتني كنت قعدت عليهم يعني بس 10 15 يوم اثناء السنه. يا سلام لو في يوم ثاني بس كده قبل الامتحان كان زماني مخلص اكثر، كميه او قدرتك التحصيليه بتزيد جدا، قدرتك وفاعليتك بتزيد بشكل كبير قوي. فترات الضغوط، وتلاقي الانتباه بتاعك عالي، وتلاقي فترات النوم ممكن تقل معك شويه. وبعدين تمتحن، وطبعا اثناء الامتحانات تلاقي نفسك انت دماغك شغاله في الاحلام والتخطيطات والخطط الحاجات اللي هتعملها بعد الامتحان. وتخلص الامتحان، تلاقي بعد الامتحان مباشره وانت طالع انت كنت متوقع انك تبقى مبسوط وسعيد بالاجازه ومرتاح وتبتدي تنفذ الحاجات اللي انت عايزها. تلاقي نفسك بليد تماما، عندك نوع من انواع التبلد، واحيانا الموضوع بيبقى اكثر من كده فراغ، شعور بالخواء. انا فاضي، هو فين المتعه اللي انا كنت منتظرها بعد الاجازه؟ هي مالها الاجازه بهتانه ليه كده؟ هي مالها الاجازه بارده ليه كده؟ هي مالها ملهاش طعم؟ وتلاقي نفسك ما عندكش اللذه بتاعت الاشياء، في كده شعور بانعدام اللذه، نوع من انواع الأنهيدونيا. وتلاقي نفسك الحاجات اللي انت كنت عايز تعملها فقدت الرغبه في فعلها. ما عدتش عايز تعملها، ولو عملتها ما تبقاش مستمتع، يعني كميه الافلام اللي انت شايلها على اللاب ومستني كده تيجي الاجازه والمسلسلات اللي انت عايشها اللي ما كنتش بتتفرج عليها انت مش عايز. الناس اللي كنت عايز تنزل معهم ما عدتش عايز، ايه اللي حصل وده يحصل في الاول على فكره؟ اللي حصل ببساطه ان احنا ما بعد الشد الشديد ده بيحصل لنا نوع من انواع الارتخاء. الموضوع ملوش علاقه بقى نهائي بين ان انا الاجازه بتاعتي بهتانه ولا هي دي الاجازه اللي كانوا بيقولوا عليها ولا اصحابي بعدوا عني وتخلوا عني بعد تخطيطات الاجازه. ولا انا عندي ولا اي حاجه خالص، هو الموضوع ما فيه ان انت جهازك النفسي والعقلي العصبي شد جامد جدا وشحن كل طاقته. عشان يسلم في الديد لاين ده عشان يدخلك الامتحان، فما بعده هو بيحتاج فتره من الريبورتنج. من عايز يعمل ريستارت، فلازم يفصل، الفصلان ده احنا بنقوله ان هو اكتئاب او بنقوله ان هو شعور بالضيق او بالبؤس. وانا ليه بائس وعايز ابص في السقف ومش عايز اعمل حاجه ولا عايز اتكلم حد، هو كل ما في الموضوع ان دوت البوست ريتشن اوت فلو. يعني الرحرحه اللي بتيجي بعد فترات الضغوط. عارف لما تبقى ماسك خرطوم ميه وانت ضاغط عليه قوي فتلاقي قوه الميه اللي طالعه عاليه جدا، وتلاقيها تروح لمسافات اعلى بكثير جدا من قوه الضخ نفسها. صح؟ انت لو عايز تودي مثلا ترش ميه لمسافه بعيده هتلاقي نفسك بتضغط على الخرطوم وبتضيق المسافه اكثر فتطلع مركزه بزياده. سيب مره واحده تلاقيها ايه؟ بدات تنزل قريب يمكن اقل حتى من ضغط الميه الاصلي. هو ده اللي بيحصل بالضبط، ان طاقتنا النفسيه مش بتتبدد هي لوحدها كده الجسم بيبقى شغال الجسم والعقل والنفس بيبقوا شغالين بفاعليه وبطاقه عاليه جدا.
[4:20]فبعد المرحله ديت او بعد انتهاء الديد لاين اللي احنا محتاجينه، تبتدي تهدى تماما بل تهدى اقل من المعدلات الطبيعيه اللي انت متوقعها من نفسك وما تعرفش تشحنها. فتلاقي مرحله من فقدان الدافعيه، انا مش عايز انا مش قادر، طب انا بقوله ده ليه بقى؟ لي بقوله عشان نقطتين، النقطه الاولانيه عشان تتقبل، ان ده امر طبيعي تماما وده جزء من كينونتك وجزء من خلقنا جزء من طبيعتنا ان احنا يحصل لنا كده. وان الموضوع ده ملوش علاقه لا بالظروف خارجيه ولا بان تخطيطاتك ما كانتش على ما ينبغي ولا ان الاجازه مش حلوه السنه دي ولا اي حاجه خالص. ده حاجه طبيعيه وبيولوجيه كمان بحته، ان احنا بنرحرح وبنفقد الدافعيه في مرحله ما بعد الضغوط. النقطه الثانيه اللي مهمه قوي واللي لابد تحطها في بالك ما تاخدش قرارات في اللحظه دي. بلاش تاخد قرارات في لحظه اكتئاب ما بعد الامتحانات، اكتئاب ما بعد الشد. في لحظه اي ضغط على يعني من الامثله الغريبه قوي اللي بتحصل تلاقي زوج وزوجه عندهم ابن معاق او عنده نوع من انواع التاخر او عنده مرض ما. فده شددوه وضغطهم وفي نفس الوقت قربهم من بعض جدا وعامل دفء وعامل نوع من انواع التلاقي والقرب والاتفاق على على انهم يخلوا احسن وغيره. وبعدين الطفل ده يموت، تجد نسبه الطلاق بعدها قد تصل الى 80%. 80% بيطلقوا في اللحظه دي، بيؤولوا الموضوع ان الحاجه اللي كانت مبقيانا على بعض راحت دي الغلطه. هو اللي حاصل بالضبط ان قوتنا النفسيه حتى انفعالاتنا الدافئه كانت اعلى ما يمكن في اللحظه دي ليه؟ لان فتره ضغط، ضغط عصبي ونفسي فعشان كده انفعالاتنا وطاقتنا مشحونين جدا جدا. بعد ما الطفل ده يعني يغيب بيحصل ان الضغط يزول، والضغط لما يزول بيسيب خواء ويسيب فراغ فيكيوم جوه النفس.
[6:39]ويحصل فقدان دافعيه ويحصل نوع من انواع الفتور النفسي اللي يؤول بفتور العلاقه، لكن هو فعليا ملوش علاقه بالعلاقه. فيحصل وكأننا ما عدناش بنحب بعض زي زمان، وكأن الحاجه اللي مقربانا من بعض غابت، فيحصل تأويل وقرار بان احنا ما ينفعش نكمل. ودي الازمه ان احنا خدنا القرار في مرحله فتور ما بعد الايه؟ الحماسه. مرحله فراغ ما بعد الضغط، مرحله الخواء اللي بتيجي ما بعد الامتلاء ما تاخذش فيها قرار. ففي اجازتك وبالذات لو القرار له علاقه بصورتك عن نفسك، ان انا مقرر اني هاعمل 1 2 3 4 بعد الاجازه. خذ بالك ان اول كم يوم هتحكم على نفسك بان انت فاشل وان انت هتهز وان الاجازه مالهاش قيمه، وان فعليا المفروض انت تبطل الشغف الفلاني، وتبطل الهوايه الفلانيه لانك ما عدتش عايز تعملها في الفتره دي. ما تاخذش قرار، الفتره دي سيب نفسك لهذه الحاله من الارتخاء وحاله اعاده الامتلاء. او الشحن الجديد اللي بيحصل ده، سيب نفسك ليها اه بص في السقف ما فيش اي مشكله نهائي، وانت تبص في السقف خليك واعي ان انت بتعمل ريبورتنج لنفسك. ان الفولت اللي عالي قوي بينزل مره واحده، فسيبه ينزل عشان يبتدي يملأ من جديد. ما تاخدش او ما تقيمش صورتك عن نفسك او عن هواياتك او عن الاجازه او عن احبتك بعد الضغوط او بعد الفراغ اللي بيعمله انتهاء الضغوط مباشره. فما تقولش ان انا مش قارئ جيد ولا انا اصلا ما عدتش باحب السينما ولا انا اصلا ما عدتش باحب الفن او الكتابه او الهوايه الفلانيه او حتى فلان حبيبي دوت. بتحصل برده اثنين يبقوا مخطوبين او بيحبوا بعض جدا وعليهم ضغط الاهالي رافضين تماما تماما وتلاقي الحب ما بينهم يعني مولع في الذره. وبيحاولوا يعني بينحتوا في الصخر عشان يعدوا المرحله دي، اول ما الدنيا تهدى. واول ما الناس توافق واول ما يقربوا من بعض بدون ما يبقى في ضغوط خارجيه، نفس القصه بالضبط تهدى تماما العلاقه ويحصل الفطور. يؤولوا الفطور انكم ما عدتوش بتحبوا بعض زي زمان او يؤولوا الفطور ان احنا كنا بنعمل كده عند مش اكثر وبنعمل كده عشان تمرد مش اكثر مش عشان ده حب. فيبعده، ليه ما فهموش ان ده سقوط طبيعي في الدافعيه النفسيه في مرحله ما بعد ما بعد الضغط؟ عشان ما اطولش طولت قوي ما تاخدش قرار في اللحظه دي ما تحكمش على علاقتك بالناس في اللحظه دي ما تحكمش على نفسك في اللحظه دي سيب نفسك تماما لاعاده الشحن. المرحله دي بتبقى مؤقته عابره بتاخذ ايام على حسب فتره الضغوط لو فتره ضغوط فتره امتحانات في خلال شهر ولا حاجه تاخذ ايام لو فتره الضغوط اكثر شويه يعني فتره الضغط سنه ولا حاجه في ضغط ما ممكن تاخد لها شهر ولا حاجه.
[10:14]فتره مؤقته وطبيعيه تماما ما تحكمش على نفسك، تقبل وجودها، سيب نفسك لبعض الامنثك والرحرحه والتبلد الطبيعي اللي موجود ما تضغطش على نفسك بزياده وتحاول تعمل دافعيه في نفس منهكه محتاجه وقت تشحن محتاجه عارف لما حد بيجي بيلعب كده. رياضه جيم ولا مش عارف بيروح يلعب رياضه عنيفه بيحتاج العضلات بتحتاج فتره راحه بيسموها فتره شفاء او التئام. فانت فتره الالتئام، فتره الشفاء، نفسك بتشفى زي ما جسدك بينهج نفسك بتنهك. سيب نفسك ما تاخدش قرارات ما تحكمش على نفسك حط نفسك في الشاحن وتقبل تماما كل حاله من فقدان الدافعيه ومن فقدان اللذه وتبقى موجوده في هذه الايه في هذه اللحظه واشوفك بكره.
