[0:00]بسم الله الرحمن الرحيم، السلام عليكم ورحمه الله وبركاته، ازيكم عاملين ايه؟ يا رب دايماً تكونوا بخير وفي أفظل حال. أعرفكم بنفسي الأول، أنا أحمد الجندي، سوفت وير ديفيلوبر وآي تي انستراكتور، وإن شاء الله النهارده هنتكلم عن أهم موضوع في عالم الانترنت وعالم الكمبيوتر، وهو الآي بي ادرس، أو انترنت بروتوكول. ليه الآي بي ادرس هو أهم موضوع في عالم الانترنت أو عالم الكمبيوتر؟ لأن من غير الآي بي ادرس أنت ما كنتش هتكون بتعرف تتفرج على الفيديو ده. من غير الآي بي ادرس أنت ما كنتش هتكون بتعرف تفتح سوشيال ميديا كل يوم. من غير الآي بي ادرس أنت ما كنتش هتكون بتعرف تحضر كورسات اونلاين. من غير الآي بي ادرس أنت ما كنتش هتكون بتعرف تعمل أي حاجة كونكتد بالانترنت. وده ببساطة لأن الآي بي ادرس هو البروتوكول المسؤول عن إن أنت تتصل بالانترنت. وفي الفيديو ده إن شاء الله هنتكلم بالتفصيل عن كل حاجة تخص الآي بي ادرس. تعالوا كده نرجع بالزمن لورا شوية، لأيام الخمسينات والأربعينات، أيام ما كانش فيه تكنولوجيا ولا انترنت ولا كومبيوترز. كانت الحياة بسيطة عادي جداً وما كانش فيه كومبيوتر وتطور وبرمجة ولا أي حاجة من الحاجات دي كلها. نفترض إن أنا كنت مسافر مكان بعيد جداً، يعني مسافر دولة مختلفة، وعايز دلوقتي إن أنا أطمن أهلي عليا أو ابعت لهم رسالة أطمنهم عليا والكلام ده. أكيد مش هفتح الموبايل وأتصل بيهم يعني، احنا قلنا مفيش انترنت ولا فيه تليفونات ولا تطور ولا تكنولوجيا ولا أي حاجة. كل اللي أنا هعمله إن أنا ابدأ أكتب ورقة أو أكتب جواب لأهلي أطمنهم بقى عليا وأكتب كل حاجة أنا عايز أقولها لهم والكلام ده. وأبدأ أبعت الجواب ده لأقرب مكتب بريد. مكتب البريد هو الهيئة أو المكان المسؤول عن إنه ياخد مني الجواب اللي أنا كاتبه ويسلمه للشخص اللي أنا عايز أوصله له. أنا عايز أوصله لأهلي، عايز أوصله لصاحبي، عايز أوصله لشركة، عايز أوصله لأي مكان. المهم إن أنا بعد ما كتبت الرسالة وخلاص خلصت بطمن بقى في الرسالة على أهلي وكل حاجة، وديت الرسالة دي لمكتب البريد. أول ما موظف البريد بص في الرسالة لقيته بيقول لي أنت إزاي عايز توصل الرسالة دي لحد من غير ما تكون كاتب عنوان الشخص اللي احنا هنوصلها له. قعدت كده لثانية أفكر، افتكرت إن فعلاً ده صح، أنا نسيت أكتب عنوان أهلي اللي أنا عايز أوصل لهم الرسالة. لأن أكيد موظف البريد ده مش حافظ عناوين الناس اللي في العالم كلهم. لازم أنا الأول أكتب على الجواب من بره أو على الرسالة عنوان أهلي وبناء على العنوان المكتوب هيبدأ الشخص ده يوصل الرسالة لأهلي. وده بالتفصيل اللي بيحصل على الانترنت. أي جهاز على الانترنت علشان يقدر يكلم أي جهاز تاني لازم يكون عنده عنوان افتراضي أو عنوان تخيلي بنسميه الآي بي ادرس. فالآي بي ادرسز ببساطة هي عناوين الناس على الانترنت. أي واحد مننا على الانترنت لازم يكون عنده عنوان افتراضي علشان يقدر يكلم أي حد. نقدر بقى نفتح سوشيال ميديا، نقدر نشوف الفيديو اللي أنت بتتفرج عليه دلوقتي، نقدر نعمل أي حاجة تخص الانترنت. ومن غير العنوان ده، لو أنت مش عندك العنوان ده أنت مش هتعرف تتواصل مع أي جهاز تاني على الانترنت. علشان كده الآي بي ادرس هو في غاية الأهمية. عايزك تتابع كل حتة في الفيديو ده وتكون مركز كويس جداً وتجيب ورقة وقلم لأن هيكون في معلومات كتير جداً دسمة ومعلومات كتير مهمة. حتى لو أنت حد عارف يعني إيه آي بي ادرس أوعدك إن في الفيديو ده هيكون فيه نقطة ولا أكتر أنت ممكن تكون مش عارفها. تعالوا دلوقتي نبدأ مع بعض نفهم كل حاجة تخص الآي بي ادرس بالتفصيل. يلا بينا نروح نشوف الكلام ده مع بعض. أيوه أنا هنا تحت على اليمين يلا بينا نبدا. أنت عيني تعبان وشقيان وبتذاكر ومتمرمط، المهم في وسط ما أنت كنت بتذاكر فجأة كده قررت إن أنت تاكل أكلة خفيفة، تاخد بريك يعني. مسكت موبايلك، فتحت الموبايل، اتصلت بأقرب مطعم منك، رد عليك الراجل تطلب إيه؟ قلت له أنا عايز بيتزايه تشيكن رانش كبيرة والأطراف تكون محشية وتكون متغرقة موتزاريلا. المهم الراجل قال لك قل عنوان يا فندم، قلت له دلوقتي اسم المدينة مثلاً اللي أنت ساكن فيها، وقلت له برضه اسم الشارع، تمام، وقلت له برضه رقم البيت بتاعك. الشخص بتاع الدليفري اللي بيوصل أوردرات علشان يوصل لك البيتزاية بتاعتك لحد البيت كان لازم يكون عارف البيانات دي أو العنوان ده لأن من غير العنوان ده هو ما كانش هيعرف يوصل لك البيتزاية. نفس الكلام بالضبط عندنا في عالم الانترنت، أي شخص علشان يتواصل مع أي شخص تاني، علشان يوصل له رسالة أو يستلم منه رسالة أو يتصفح موقع أو يعمل أي حاجة محتاجة إن أنت تكون كونيكتد بالانترنت، لازم يكون عنده عنوان وبنسمي العنوان ده الآي بي ادرس. في العالم بتاعنا شكل العنوان بيكون كده، يعني الراجل بتاع الدليفري ده علشان يفهم العنوان بيكون كاتبينه بالطريقة دي. في الكمبيوتر بقى علشان الكمبيوتر يفهم العنوان بيكون كاتبين الآي بي ادرس بالشكل ده مثلاً، اللي أنت شايفه ده مثال حقيقي لآي بي ادرس. احنا بقى عايزين ناخد الآي بي ادرس ده ونبدأ ندرس كل حاجة في الآي بي ادرس بالتفصيل، بيتكون من إيه؟ الأرقام دي عبارة عن إيه؟ والأرقام دي هل بنكتبها بشكل عشوائي ولا احنا بنكتبها بشكل مترتب؟ ده اللي احنا عايزين نبدأ نعرفه مع بعض دلوقتي بالتفصيل. الآي بي ادرس بيكون عبارة عن أرقام بس، يعني ما ينفعش يكون الآي بي ادرس فيه حروف أو فيه أي حاجة تانية غير الأرقام. احنا بقى عايزين دلوقتي نبدأ نفهم بالتفصيل شكل الأرقام دي، والأرقام دي بنكتبها بناء على إيه؟ احنا زي ما قلت لك الموضوع مش بيتم بشكل عشوائي، في شوية قوانين لازم نتبعها علشان نعرف نكتب آي بي ادرس. أنا دلوقتي أفهمك حاجة، احنا دلوقتي عندنا الآي بي ادرس بيتكون من أربع خانات بفصل ما بين الخانة والتانية بالدوت أو النقطة دي. بنسمي كل خانة من الأربع خانات أوكتت، يعني إيه أوكتت؟ أوكتت بالعربي يعني ثماني أو تمانية، ثمانية إيه بقى؟ المقصود بيها تمانية ديجت وهفهمك دلوقتي ده يعني إيه. في كل خانة من الخانات دي مسموح لي إن أنا أحط رقم ما بين الصفر والـ 255. يعني ينفع أحط صفر، ينفع أحط 1، 2، 10، 100، 200، 255، بس ما ينفعش أحط 256. نفس الكلام برضه بيتم على الأوكتت دي، ينفع أحط ما بين الرقم الصفر والـ 255، نفس الكلام هنا، نفس الكلام هنا. احنا دلوقتي قلنا إن الآي بي ادرس بيكون مكون من أربع خانات. تعالى مثلاً نحط أول حاجة رقم 113، طيب الرقم اللي بعده، تعالى نحط رقم 200، الرقم اللي بعده، تعالى نحط رقم 14، الرقم اللي بعده، تعالى نحط رقم 3. هل ده آي بي ادرس صح؟ أيوه آي بي ادرس صح لأن كل خانة من الخانات دي الأرقام اللي فيها فعلاً ما بين الصفر والـ 255. طيب تعالى ناخد واحد كمان، لو أنا دلوقتي قلت لك الآي بي ادرس ده 10، 10، 10، 10، هل ينفع؟ أيوه ينفع. طيب تعالى ناخد واحد كمان، 192.168.1.1، ينفع الآي بي ده؟ أيوه ينفع الآي بي ده. النوع اللي احنا بنتكلم عليه من الآي بي ادرس ده بنسميه آي بي فيرجن 4. آي بي فيرجن 4 ده الـ 4 دي سموها كده اختصاراً للـ 4 أوكتتس أو الأربع خانات اللي موجودة هنا. أي آي بي ادرس فيرجن 4 من النوع اللي احنا بنتكلم عليه ده بيكون عبارة عن 32 بت. يعني إيه 32 بت؟ كلمة بت المقصود بيها يا إما رقم 0 يا إما رقم 1. احنا قلنا إن الآي بي ادرس زي اللي موجود هنا قدامك ده دلوقتي ده، يعني ده كده آي بي ادرس وده آي بي ادرس وده آي بي ادرس. الأرقام المكتوبة دي هي أرقام عشرية أو ديسمال نمبرز، بس للأسف الكمبيوتر مش بيفهم الكلام ده كله. الكمبيوتر مش بيفهم غير الصفر والواحد أو لغة الآلة اللي هي الباينري نمبرز. فدلوقتي الكمبيوتر علشان يبدأ يفهم الآي بي ادرس ده أو العنوان ده لازم يحول الأرقام العشرية اللي موجودة قدامك للصفر والواحد. علشان الكمبيوتر يفهم الآي بي المكتوب ده لازم الأول يعمل عملية تحويل للأرقام العشرية الموجودة ويخليها صفر وواحد أو الباينري نمبرز. وهيبقى دلوقتي الآي بي اللي موجود بالشكل ده لما يروح للصفر والواحد هيبقى بالشكل ده. ودلوقتي أنت تقدر تعرف احنا ليه كنا بنسمي كل واحدة من دول أوكتت. كنا بنسمي كل خانة من الخانات دي أوكتت لأن أنت فعلاً لو عديتهم دلوقتي هتلاقي كل خانة من الخانات دي متكونة من 8 ديجت. يعني تعالى نعد كده، 1، 2، 3، 4، 5، 6، 7، 8، والخانة دي نفس الكلام برضه، والخانة دي نفس الكلام، والخانة دي نفس الكلام. فدلوقتي لو أنت عديت كل ديجت موجودة في الآي بي ادرس اللي موجود قدامك ده كله، هتلاقيهم عبارة عن 32 ديجت أو 32 صفر وواحد. زي ما أي بلد في الدنيا بتتكون من مجموعة من المدن، والمدينة الواحدة بتتكون من مجموعة من البيوت، نفس المثال ده بالضبط ممكن نطبقه على الانترنت. الانترنت بيتكون من مجموعة من الشبكات، والشبكة الواحدة على الانترنت بيكون جواها شوية أجهزة متصلة بيها، أياً كان نوع الأجهزة ممكن تكون موبايل لابتوب آيباد. أياً كان نوع الأجهزة المتصلة على الشبكة، لو أنا سألتك قلت لك أنت إزاي بتعرف جيرانك؟ هتقولي جيراني دول الناس اللي بيكونوا معايا في نفس المدينة، عندنا نفس الكلام ده بالضبط على الانترنت. الأجهزة اللي بتكون متصلة على نفس الشبكة، دول أجهزة بيكونوا جيران لبعض. طيب إزاي برضه أقدر أعرف الجهاز ده ممكن يكون جار ليا من خلال الآي بي ادرس؟ تعالى نشوف الكلام ده دلوقتي مع بعض. أي عنوان دائماً بيتكون من أكتر من جزء، يعني مثلاً لو أنا سألتك قلت لك أنت ساكن فين؟ هتقولي والله أنا ساكن في محافظة كذا، قرية كذا، عندي نفس الكلام ده بالضبط في الآي بي ادرس. الآي بي ادرس برضه بيتكون عندي من جزئين بالضبط. الجزء الأول بنسميه جزء النتورك، والجزء التاني بنسميه جزء الهوست. دلوقتي احنا عايزين نعرف الفرق ما بين جزء النتورك وجزء الهوست، وإزاي أعرف إن الجزء ده بالتحديد يخص النتورك والجزء ده يخص الهوست. تعالى دلوقتي ناخد مثال وناخد آي بي ادرس ونبدأ نعرف دلوقتي فين جزء النتورك من جزء الهوست. تعالى معايا كده نشوف الآي بي ادرس ده 192.168.1.10، وسألتك دلوقتي سؤال، عايز أعرف دلوقتي الجزء اللي يخص النتورك والجزء اللي يخص الهوست. تقدر تفكر في الجزء اللي يخص النتورك وتعتبره المدينة أو عنوان المدينة، والجزء اللي يخص الهوست ممكن تعتبرهم البيوت اللي موجودة داخل المدينة دي، تمام؟ دلوقتي بقى أنا عايزك تقولي الجزء اللي يخص النتورك والجزء اللي يخص الهوست. علشان تجاوبني على السؤال ده لازم تعرف حاجة اسمها السبنت ماسك. السبنت ماسك عبارة عن رقم عادي جداً زيه زي الآي بي ادرس وبينطبق عليه نفس الشروط اللي بتنطبق على الآي بي ادرس. طيب تعالى كده برضه نشوف، يعني تعالى نشوف مثال على السبنت ماسك. لو أنا دلوقتي قلت لك إن السبنت ماسك اللي تخص الآي بي ده هي 255.255.255.0، وقلت لك دلوقتي أنا عايز أعرف الجزء اللي يخص النتورك والجزء اللي يخص الهوست في الآي بي ادرس ده. احنا قلنا دلوقتي إن اللي بيخلينا نعرف الجزء اللي يخص النتورك من الجزء اللي يخص الهوست السبنت ماسك. أنا دلوقتي أديتك السبنت ماسك اللي موجودة هنا، تقدر بقى دلوقتي تقولي الجزء اللي يخص النتورك من الجزء اللي يخص الهوست؟ للأسف لحد دلوقتي برضه أنت ما تقدرش تقول الجزء اللي يخص النتورك من الجزء اللي يخص الهوست، لأن أنت لازم تحول الآي بي اللي موجود هنا ده تحوله للباينري اللي هي الصفر والواحد. والمسك ده برضه تحوله للصفر والواحد، بعدها تقدر تجاوبني وتقولي الجزء اللي يخص النتورك من الجزء اللي يخص الهوست. قبل ما نبدأ نحول الآي بي ده لباينري والماسك نحولها برضه لباينري، في معلومة لازم تكون عارفها. من هنا ورايح ما ينفعش تشوف آي بي ادرس إلا لو يكون الماسك موجودة معاه. مفيش أي آي بي في الدنيا نقدر نكتبه إلا لما نكتب الماسك بتاعته، عشان كده من هنا ورايح لو أنا سألتك أي سؤال يخص الآي بي ادرس، تجاوبني تقولي أنا عايز أعرف الماسك الأول قبل ما أقول لك الآي بي ادرس. يعني قبل ما أجاوبك عن أي سؤال أنت هتسأله لي اديني الماسك بعدين أقول لك اللي أنت عايزه. تعالوا بقى دلوقتي نبدأ نشوف عملية التحويل من ديسمال أو من نظام عشري زي اللي موجود قدامكم ده للباينري هتتم إزاي؟ وهتفهموها إن شاء الله بشكل بسيط جداً الموضوع مش صعب ما تلاقاش. في طرق كتير جداً للتحويل من ديسمال لباينري، بس احنا هناخد دلوقتي طريقة في منتهى البساطة. والطريقة دي هي إن أنا عندي جدول أو تشارت، ومن خلال الجدول ده أنا بعمل عملية التحويل. طيب تعالوا كده نشوف مع بعض التشارت ده، التشارت ده اسمه 8 بت أوكتت تشارت. لو أنت أخذت بالك دلوقتي إن الرقم اللي موجود على اليمين اللي هو الواحد لما بضاعفه بيبقى اتنين، ولو ضعفت رقم الاتنين يبقى أربعة، لو ضعفت الأربعة يبقى تمانية وهكذا، لحد ما أوصل لرقم 128. عايزين دلوقتي نشوف مجموعة الخطوات اللي احنا هنمشي عليها. أول خطوة بتقول إن أنا هبدأ من الرقم الأكبر وهو رقم 128 الموجود أقصى الشمال. تاني خطوة بتقول إذا كان الرقم المراد تحويله أكبر من أو يساوي القيمة أكتب 1 ثم اطرح القيمة من الرقم. إذا كان الرقم أصغر من القيمة اكتب 0 واحتفظ بالرقم كما هو. أنا عارف الكلام ده أنت ممكن تكون شايفه كبير أو لسه صعب شوية بس هنفهمه دلوقتي في منتهى البساطة يعني. تالت خطوة بتقول إذا كان الرقم أصغر من القيمة اكتب 0 واحتفظ بالرقم كما هو. سيبك بقى من الكلام المكتوب ده، أنا كتبت لك الخطوات دي علشان لما تفهم تبقى تراجع الخطوات وتفتكرها. تعالى بقى نبدأ دلوقتي نحول الآي بي ادرس المكتوب ده نخليه بالشكل الباينري. احنا قلنا إن احنا بنحول أوكتت أوكتت يعني مش بحول الآي بي ادرس كله مع بعض. تعالى نبدأ بأول أوكتت وهو الـ 192 اللي موجود هنا ده. علشان أحول الـ 192، احنا قلنا أول حاجة بنعملها أول خطوة إن أنا ببدا برقم 128 الموجود أقصى الشمال، وأبدأ أشوف دلوقتي هل رقم 192 أكبر من رقم 128؟ لو الإجابة أه، بحط 1 وأطرحهم من بعض. فعلاً رقم 192 أكبر من رقم 128، يبقى أحط هنا رقم 1 وأبدأ أطرحهم من بعض. أقول له 192 ناقص 128، والناتج هيطلع معايا 64. أبدأ آخد رقم 64 وأعمل نفس اللي أنا عملته، هل رقم 64 الموجود هنا ده هو أكبر من أو يساوي رقم 64 الموجود هنا؟ الإجابة أيوه، يبقى أحط هنا 1 وأبدأ أطرحهم من بعض. أقول له 64 ناقص 64، الإجابة هتكون صفر، بما إن الإجابة صفر يبقى كده المسألة خلصت والباقي كله يبقى أصفار، زي ما أنت شايف كده. يبقى دلوقتي لو أنا قلت لك رقم 192 اللي هو بالديسمال المكتوب هنا يساوي كام في الباينري؟ هيساوي 1 1 والباقي أصفار، تعالى كده نبدأ نشوف الرقم اللي بعده اللي هو 168. هبدأ دلوقتي أمشي على نفس الخطوات اللي احنا عملناها المرة اللي فاتت. دلوقتي احنا عايزين نحول رقم 168 اللي موجود هنا ده. احنا قلنا أول حاجة بنعملها بنبدأ نبص على الجدول من اليسار، من رقم 128 المكتوب هنا، وأبدأ دلوقتي أقارن هل رقم 168 أكبر من أو يساوي رقم 128؟ لو الإجابة أيوه بحط 1، هي فعلاً الإجابة أيوه، يبقى أحط هنا 1. وبعد كده أطرحهم من بعض، تعالى نقول له 168 ناقص 128، الإجابة هتكون 40. أبدأ أعمل نفس الخطوات على الرقم اللي بعدها، آخد رقم 40 وأروح به عند الـ 64 الموجود هنا. هل رقم 40 أكبر من أو يساوي رقم 64؟ الإجابة لأ، الـ 40 أصغر، يبقى أحط 0. أروح برقم 40 على الـ 32، هل رقم 40 أكبر من أو يساوي رقم 32؟ الإجابة أيوه، يبقى أحط 1 وأطرحهم من بعض. تعالى نقول رقم 40 ناقص 32، الإجابة هتكون 8. أبدأ أعمل نفس الخطوات على رقم 8، آخد رقم 8 وأروح به عند الـ 16. هل رقم 8 أكبر من أو يساوي الـ 16؟ الإجابة لأ، يبقى أحط 0. أروح دلوقتي برقم 8 على الرقم اللي بعده اللي هو 8، وأبدأ أقارن هل 8 أكبر من أو تساوي 8؟ الإجابة نعم، أيوه 8 أكبر من أو تساوي 8، يبقى أحط هنا 1، ويبقى أنا كده أقول له 8 ناقص 8 يساوي 0. معنى إن أنا وصلت للصفر يبقى كده المسألة خلصت والباقي بأصفار. لو لسه ما فهمتش كمل الباقي وهتفهم ما تلاقاش. دلوقتي الدور على رقم 1، احنا عايزين نحول رقم 1 الموجود هنا ده. أول حاجة بنعملها إيه؟ بنبدأ نروح الجدول من الشمال ونقارن رقم 1 بأول رقم اللي هو الـ 128. هل رقم 1 أكبر من أو يساوي رقم 128؟ الإجابة لأ، يبقى أحط 0. وأبدأ أقارنه بالرقم اللي بعده، هل رقم 1 أكبر من أو يساوي الـ 64؟ لأ، أحط 0. هل رقم 1 أكبر من أو يساوي الـ 32؟ برضه 0، وهنا برضه 0، وهنا برضه 0، 0، 0، لحد ما أروح للـ 1، هل رقم 1 أكبر من أو يساوي الـ 1؟ الإجابة أيوه، وأحط هنا رقم 1، يبقى أنا كده حولت رقم 1. تعالى نشوف الرقم اللي بعده اللي هو رقم 10. تعالى نحول رقم 10 مع بعض، أول حاجة هنعملها نروح نبص على الجدول من ناحية الشمال، رقم 128. وأبدأ أقارن هل الـ 10 أكبر من أو يساوي الـ 128؟ الإجابة لأ، يبقى أحط 0. وأروح للرقم اللي بعده، هل الـ 10 أكبر من أو يساوي الـ 64؟ برضه لأ، يبقى أحط 0. هل الـ 10 أكبر من أو تساوي الـ 32؟ برضه لأ، الـ 16 برضه لأ، نيجي بقى هنا عند الـ 8. هل الـ 10 أكبر من أو تساوي الـ 8؟ الإجابة أيوه، الـ 10 أكبر من أو تساوي الـ 8، يبقى أحط هنا رقم 1 وأبدأ أطرح، أقول له هنا 10 ناقص 8، الإجابة 2، أبدأ آخد رقم 2 وأكمل به اللفة. أبدأ دلوقتي أقارن هل الـ 2 أكبر من أو تساوي الـ 4؟ لأ، الـ 2 مش أكبر من أو تساوي الـ 4، يبقى أحط هنا 0. أروح للرقم اللي بعده، هل رقم 2 أكبر من أو يساوي رقم 2؟ الإجابة أيوه، يبقى أحط هنا 1، وأبدأ أقول له 2 ناقص 2 يساوي 0. بما أني وصلت لـ 0 يبقى المسألة خلصت أحط 0. وكده أنا حولت كل الآي بي ادرس المكتوب بالديسمال أو بالنظام العشري للغة الصفر والواحد اللي هي الباينري. تعالى بقى دلوقتي نجمعهم كلهم مع بعض ونشوف شكل الآي بي ادرس هيكون إزاي. وده دلوقتي هيكون الشكل النهائي للآي بي ادرس بعد ما جمعنا كل الأجزاء اللي حولناها مع بعض. دلوقتي أنا عندي الآي بي ده ودي الماسك بتاعة الآي بي ده. أنا دلوقتي عايز أعرف الجزء اللي يخص النتورك والجزء اللي يخص الهوست. علشان أعرف ده، هنحول الآي بي ادرس للباينري وده هيكون شكله. وهنحول السبنت ماسك للباينري وده هيكون شكلها. بعد كده هبدأ أبص على الآي بي ادرس اللي هو بالباينري الموجود هنا وأمشي عليه ديجت ديجت. ديجت أقصد بيها رقم من ده، رقم من ده بنسميه ديجت زي ما قلنا. أبدأ أبص عليه ديجت ديجت وأشوف أول رقم اللي هو 1 ده، وأبدأ أبص تحت على السبنت ماسك. هل رقم 1 في الآي بي ادرس يقابل رقم 1 في السبنت ماسك؟ أيوه، لو الرقم ده يقابل رقم 1 يبقى ده جزء النتورك، ولو يقابل رقم 0 يبقى ده جزء الهوست. طيب تعالى ندخل على الرقم اللي بعده اللي هو رقم 1 ده، رقم 1 ده بيقابل تحت في الماسك رقم 0 ولا رقم 1؟ يقابل رقم 1 يبقى برضه ده جزء نتورك. رقم 0 يقابل تحت 0 ولا 1؟ 1، يبقى ده نتورك، ده نتورك. عندي كل الأوكتت ده يخص النتورك، وبرضه الأوكتت اللي بعده ده كله يخص النتورك لأن تحت في السبنت ماسك كله وحايد. نيجي للي بعده، كل الأوكتت ده برضه يخص جزء النتورك، ما عدا الأوكتت الأخير هو كله بأصفار تحت. يبقى ده الأوكتت الأخير اللي بيخص جزء الهوست. طيب تاني تاني على السريع علشان تفهم، احنا قلنا دلوقتي بنبدأ نبص على الآي بي ادرس ونبدأ ناخد كل جزء من الآي بي ادرس ونعمل له حاجة اسمها ماسكينج. يعني بقارنه بالسبنت ماسك اللي تحت. أقارن رقم 1 برقم الـ 1، رقم 1 يقابل رقم إيه؟ يقابل رقم 1، يبقى ده يخص النتورك، أي رقم يقابل رقم 1 في السبنت ماسك يبقى يخص النتورك، لو يقابل رقم 0 في السبنت ماسك يبقى يخص الهوست، تمام؟ الكلام ده معناته إن أنا دلوقتي عندي جزء النتورك هيكون كل الجزء اللي هنا ده. كل ده كده جزء النتورك، يعني لو أنا غيرت أي رقم، لو أنا غيرت أي رقم هنا أو هنا أو هنا، كده أنا هكون غيرت النتورك. يعني أنا كده دلوقتي بقيت في شبكة تانية غير الشبكة اللي أنا فيها. داخل النتورك دي بقى عندي كده الجنب ده كده ده الجنب اللي يخص الهوست، يعني إيه؟ يعني أنا دلوقتي أقدر أحط هنا أي رقم يخطر على بالي من أول صفر لحد رقم 255. كأن كده جزء النتورك اللي احنا كاتبينه ده هو ده كأنه شبه رقم المدينة، يعني ده الرقم المميز اللي بيميز مدينة معينة. لو أنا غيرت أي رقم هنا يبقى أنا كده رحت مدينة تانية، والجزء اللي مكتوب بالازرق اللي هو جزء الهوست ده كده بيكون عبارة عن البيوت الموجودة داخل المدينة دي. تعالوا بقى دلوقتي نتكلم عن آخر جزئية في محاضرة النهارده. في حاجة عندي اسمها آي بي ادرسينج، إيه بقى الآي بي ادرسينج ده؟ الآي بي ادرسينج ده أنا عندي منه نوعين، أول حاجة بنسميها كلاس فول آي بي ادرس، والتانية بنسميها كلاس ليس. الكلاس دي برضه بنطلق عليها اسم تاني اللي هو السبنيتنج، وده إن شاء الله هيكون عنوان الفيديو الجاي وهنتكلم بالتفصيل عن السبنيتنج وهنحل مسائل كتير جداً. أنا دلوقتي بس عايزك تركز معايا على الكلاس فول آي بي ادرس الموجود هنا. احنا عندنا دلوقتي أنواع من الآي بي ادرس مقسمين الآي بي ادرس لشوية فئات، فئة اسمها A وفئة اسمها B و C ودي و E. إزاي بقى بنعرف إن الآي بي ادرس ده بيكون تابع لفئة A أو B أو C أو D؟ فاكر الفورمات بتاع الآي بي ادرس؟ مش احنا قلنا إن الآي بي ادرس عبارة عن أربع خانات، بفصل ما بين الخانة والخانة بدوت، اللي هو الفورمات ده، حلو؟ علشان تعرف الآي بي ادرس ده تابع لكلاس A أو كلاس B أو كلاس C، عايزك تركز دايماً على أول أوكتت أو أول خانة اللي هي بتكون موجودة هنا، لأن الرقم اللي موجود في أول خانة هو ده اللي بيحدد لي نوع الكلاس المستخدم. لو الرقم اللي موجود هنا ما بين رقم 1 ورقم 126، بيكون ده تابع لكلاس A. ولو الرقم اللي في أول أوكتت ما بين رقم 128 لرقم 191، ده بيكون تابع لكلاس B. ولو من رقم 192 لرقم 223، ده بيكون تابع لكلاس C. ولو من رقم 224 لرقم 239، ده بيكون تابع لكلاس D. ولو من رقم 240 لرقم 255، ده بيكون تابع لكلاس E. لو أنت أخذت بالك في اللي احنا كتبناه ده، هتلاقينا إن احنا ما اتكلمناش عن رقم 0 خالص ما جبناش سيرته، وما اتكلمناش برضه عن رقم 127. وده لأن الأرقام دي بتكون محجوزة، رقم 0 بيكون محجوز لحاجة اسمها الديفولت روت، هنتكلم عنه بالتفصيل إن شاء الله لما نيجي نتكلم عن الراوتنج. ورقم 127 ده بيكون محجوز لحاجة اسمها اللوب باك. اللوب باك ده بقى أنا بستخدمه في التستنج وبرضه إن شاء الله هنتكلم عنه كده شوية لما نيجي نتكلم عن البينج كوماند. طيب حلو جداً، دلوقتي بقى أنا عايز أعرف أنا إمتى أصلاً بستخدم كلاس A وكلاس B وكلاس C. تعالى نشوف الكلام ده مع بعض. الكلاسز اللي أنت شفتها دلوقتي أو الفئات اللي هي الـ A والـ B والـ C، هم دول اللي احنا بنستخدمهم. إنما كلاس D وكلاس E، دول مش بيتم استخدامهم في الاستخدام العادي. يعني عندك كلاس D بيستخدم في حاجة اسمها المالتي كاست وبرضه ده هنتكلم عليه إن شاء الله لما نيجي لنقطة الراوتنج، وكلاس E بستخدمه في الريسيرش. إنما اللي احنا بنستخدمه في استخداماتنا العادية واللي هي الأجهزة بتاخدها، يعني لو أنت فتحت دلوقتي الجهاز بتاعك هتلاقيك ماسك الآي بي ده أو عندك الآي بي ده. اللي احنا بنستخدمهم كلاس A وكلاس B وآخر حاجة كلاس C، إيه الفرق بقى ما بينهم؟ وإمتى استخدم كلاس A وكلاس B وكلاس C؟ شفت من شوية لما كنا بنشبه النتورك بالمدينة، وكنا بنشبه الأجهزة اللي هي متصلة على الشبكة أو على النتورك بالبيوت اللي موجودة داخل المدينة؟ احنا دلوقتي هنمشي على التشبيه ده وتعالى أفهمك اقصد إيه. في البداية عايزك تعرف إن كل كلاس من الكلاسز دي بيكون ليه الديفولت سبنت ماسك بتاعته. الديفولت سبنت ماسك بتاعت كلاس A بتكون بالشكل ده، والديفولت سبنت ماسك لكلاس B بتكون بالشكل ده، والديفولت سبنت ماسك لكلاس C بتكون بالشكل ده. الديفولت سبنت ماسك لكل كلاس منهم بتعرفني الجزء الخاص بالنتورك والجزء الخاص بالهوست لكل كلاس من الكلاسز الموجودة دي. يعني دلوقتي تعالى كده نشوف كلاس A، بما إن السبنت ماسك لكلاس A هيكون بالشكل ده، يبقى أنا كده عندي أول أوكتت بس في كلاس A هو اللي هيكون الأوكتت اللي يخص النتورك والباقي كله هيكون يخص الهوست. يبقى دلوقتي زي ما أنت شايف أول أوكتت اللي هو هنا ده اللي هو فيه حرف الـ N، ده كده الأوكتت اللي يخص النتورك وكل الباقي ده يخص الهوست. معناته إيه الكلام ده؟ معنى الكلام ده إن أنا عندي رقم ضخم جداً من الديفايسز الموجودة داخل الشبكة الواحدة. تعالى برضه نحسبها مع بعض. احنا قلنا إن كلاس A بعرفه من أول أوكتت اللي هو هنا وأول أوكتت ده بيكون من رقم 1 لرقم 126. معنى إيه الكلام ده؟ معنى كده إن أنا عندي 126 شبكة موجودة في كلاس A. طيب عايزين بقى نعرف داخل الشبكة الواحدة ممكن يكون عندي كام جهاز موجود؟ نقدر نعرف عدد الأجهزة الموجودة داخل النتورك الواحدة بحسبة بسيطة جداً. احنا قلنا دلوقتي إن ده كده جزء النتورك الموجود على الشمال، والتلاتة دول كلهم جزء الهوست حلو؟ في كل أوكتت من دول أقدر إن أنا أحط رقم من أول صفر لحد 255. يعني قدامي كام احتمال؟ قدامي 256 احتمال. تعالى بقى دلوقتي نحسب كل الاحتمالات الممكنة، احنا عندنا كام أوكتت يخص الهوست؟ عندنا 3 أوكتتس، وفي كل أوكتت عندي 256 احتمال. يبقى علشان أعرف الديفايسز الموجودة داخل النتورك الواحدة، ممكن نقول 256 ضرب 256 ضرب 256. الناتج هيكون 16 مليون 777 ألف 216، وده رقم ضخم جداً جداً جداً. عشان كده كلاس A بيستخدم في الشركات الكبيرة جداً زي جوجل ومايكروسوفت وفيسبوك وكل المؤسسات الضخمة بتستخدم كلاس A. تعالى بقى نبدأ نشوف كلاس B، من خلال الديفولت سبنت ماسك الموجودة في كلاس B اللي هي 255.255.0.0. معنى الكلام ده إن أنا أول 2 أوكتت هيكونوا يخصوا النتورك، و2 أوكتت هيخصوا الهوست، يعني كده ده هيخص النتورك والاتنين دول كده هيخصوا الهوست. معنى إيه الكلام ده؟ معنى الكلام ده إن أنا عدد الشبكات عندي هيكون أكتر من عدد الشبكات الموجودة في كلاس A، بس عدد الأجهزة داخل الشبكة الواحدة هتكون أقل بكتير جداً من اللي موجودة في كلاس A. طيب احنا دلوقتي عايزين نعرف عدد الشبكات الموجودة في كلاس B، وعايزين برضه نعرف عدد الأجهزة اللي ممكن تكون موجودة داخل كل شبكة. احنا قلنا إن في كلاس B أول أوكتت اللي هو ده بيكون رقم من 128 لحد رقم 191. يبقى أنا دلوقتي أول أوكتت ده اللي هو موجود هنا، عدد الاحتمالات أو عدد الأرقام الممكنة اللي أنا ممكن أستخدمها من أول رقم 128 لحد رقم 191، يعني بالضبط عندي 64 احتمال. وتاني أوكتت الموجود هنا اللي هو برضه يخص النتورك، عندي فيه من أول رقم 0 لرقم 255، يعني عندي 256 احتمال. يبقى أنا أقدر أحسب دلوقتي عدد الشبكات اللي هو بيساوي 64 في 256، اللي هو بيساوي 16 ألف 384 شبكة وده رقم كبير جداً من الشبكات. تعالوا بقى دلوقتي نشوف عشان أعرف عدد الأجهزة الموجودة داخل كل شبكة. علشان أحسب عدد الأجهزة الموجودة داخل الشبكة الواحدة، أنا عندي 2 أوكتتس بس هم اللي يخصوا الهوست اللي هو الأوكتت ده والأوكتت ده. وفي كل أوكتت منهم ينفع أحط رقم من أول 0 لـ 255، يعني عندي 256 احتمال، يبقى علشان أعرف دلوقتي عدد الهوستس أو الديفايسز الموجودة داخل الشبكة الواحدة، أقول له 256 ضرب 256 هيساوي 65 ألف 536. وكلاس B ده دايماً بيكون مستخدم في الشركات المتوسطة والجامعات والمؤسسات الحكومية والحاجات دي. تعالوا دلوقتي نيجي لأشهر كلاس وهو كلاس C، من خلال السبنت ماسك الموجودة في كلاس C اللي هي 255.255.255.0. هنصرف إن الجزء اللي يخص النتورك هو أكبر من الجزء اللي يخص الهوست، يعني تعالوا كده نشوف، معنى الكلام ده إن الكلاس ده بيقدم لي شبكات كتير جداً. بس عدد الأجهزة الموجودة داخل الشبكة الواحدة بتكون قليلة قوي وده اللي بيخلي النوع ده مناسب للبيوت والشركات الصغيرة والحاجات اللي شبه كده. عايزين برضه دلوقتي نعرف عدد الشبكات الموجودة داخل كلاس C، ونعرف عدد الأجهزة اللي موجودة داخل كل شبكة. عشان نعرف عدد الشبكات الموجودة داخل كلاس C، احنا قلنا دلوقتي أول أوكتت هنا اللي هو ده اللي أنا من خلاله بعرف إن الكلاس ده نوعه C. الرينج بتاعه بيكون من رقم 192 لحد رقم 223، معنى كده إن أنا عندي كام احتمال في الأوكتت ده؟ معنى كده إن أنا عندي في الأوكتت ده 32 احتمال. نيجي للأوكتت اللي بعده اللي هو ده، الأوكتت ده دلوقتي أنا عندي فيه كام احتمال؟ عندي من 0 لـ 255، يعني عندي 256 احتمال. نفس الكلام الأوكتت ده اللي هو موجود هنا ده، عندي فيه كام احتمال؟ عندي 256 احتمال، يبقى لو أنا ضربت كل دول في بعض هيطلع لي إن عدد الشبكات 2 مليون 97 ألف 152 وده رقم كبير جداً من الشبكات. تعالوا بقى دلوقتي نشوف عشان أعرف عدد الأجهزة الموجودة داخل كل شبكة. علشان أعرف عدد الأجهزة الموجودة داخل كل شبكة، هبص على الهوست بارت اللي هو موجود هنا، هو ده البارت الوحيد اللي يخص الهوست. أنا عندي كام احتمال أقدر أحطهم هنا؟ كام رقم أقدر أحطه في الأوكتت الموجود هنا؟ عندي دلوقتي 256 رقم بس وده عدد الأجهزة اللي أنا ممكن أربطها على الشبكة الواحدة الموجودة في كلاس C. طيب تعالوا بقى دلوقتي ناخد كويز بسيط، هختبركم عشان أتأكد إن أنتم فهمتوا الموضوع بشكل كويس. تعالوا كده نشوف أول سؤال مع بعض، أول سؤال بيقول لي الآي بي ادرس الموجود قدامك ده 10.0.1.5 ده موجود في أي كلاس؟ أسيبك ثانيتين تفكر.
[33:10]صح الإجابة هتكون كلاس A. ليه كلاس A؟ لأن احنا قلنا دايماً بنركز على أول أوكتت، أول أوكتت هنا كام؟ اللي هو 10، و10 ده بيقع في الرينج ما بين رقم 1 لرقم 126 وده اللي بيخص كلاس A. طيب تعالى نشوف السؤال اللي بعده. تاني سؤال بيقول لي الآي بي ادرس ده ضمن أي كلاس؟ يلا أسيبك ثانيتين تفكر.
[33:43]لو أنت قلت C يبقى الإجابة صح. تعالى نشوف السؤال اللي بعده. ها الآي بي ادرس الموجود قدامك ده تابع لأي كلاس؟
[33:57]فكر ثانيتين، لو أنت قلت B تبقى الإجابة صح. تعالى نروح للسؤال اللي بعده. تقدر تقول الآي بي ادرس الموجود قدامك ده تابع لإيه؟
[34:14]فكر ثانيتين، لو أنت قلت اللوب باك يبقى الإجابة صح. طيب تعالى نروح كده لآخر سؤال، تقدر تقول الآي بي ده تابع لأي كلاس؟
[34:31]لو أنت قلت كلاس E يبقى الإجابة صح. وبكده نكون وصلنا للنهاية وخلصنا معظم الأجزاء المهمة اللي تخص الآي بي ادرس. وإن شاء الله في الفيديو الجاي هنتكلم عن البابليك والبرايفت آي بي ادرس، والفيديو اللي بعده إن شاء الله هنتكلم عن السبنيتنج. لو أنت ما شفتش الفيديو اللي فات اللي بيتكلم عن الأو إس آي موديل لازم تشوفه لأن كل اللي جاي مرتبط بالأو إس آي موديل. وزي ما قلت لك فهمك للأو إس آي موديل هيسهل عليك كل اللي جاي. وفي النهاية ما تنساش لو الفيديو عجبك تدعمني بلايك وتشترك في القناة لأن الدعم ده هو اللي بيساعدني إن أنا أكمل وإن أنا أصور فيديوز كتير، وبس خلاص كده يلا مع السلامة.
