[0:15]Assalamualaikum warahmatullahi wabarakatuh. Bismillahirrahmanirrahim Alhamdulillahi rabbil alamin wasalallahu wasallam wa baraka ala Nabina Muhammad wa ala alihi wasahbihi ajmain wa man tabiahum bi ihsan ila yaumiddin amma ba'ad. Muazzaz nazireen, hum tamam ke liye intihai sa'adat ki baat hai ki Allah ke fazl o karam se is nashist mein hum kutub us sunnah ya kutub al-hadith, Hadith ki kitabon ka ta'aruf hasil karne ki koshish karenge. is ummat ke liye Allah ki kitab Quran Majeed ke baad sabse sahih tareen jo kitab hai, yani Sahih Bukhari, iske hawale se InshaAllah bunyadi maloomat hasil karne ki koshish karenge. Imam Bukhari rahmatullahi alaih, jinka naam Abu Abdullah Muhammad ibn Ismail al-Bukhari hai. Imam Bukhari rahmatullahi alaih ko Allah Ta'ala ne yeh sa'adat bakhshi ki is ummat ke liye Quran ke baad sabse sahih tareen kitab likh sake. Balki ahl e ilm ne kaha ki sahih kitaben likhne ka jo silsila shuru hua woh Imam Bukhari rahmatullahi alaih aur Imam Muslim rahmatullahi alaih in dono Aima ki anthak koshishon ka natija hai. Imam Bukhari aur Imam Muslim rahmatullahi alaihim ki in kitabon se pehle sahih kitabon ka koi tasavvur nahin paya jata tha. Is kitab ko mukhtalif ahl e ilm ne mukhtalif naamon se yaad kiya hai, jaise Imam ibn Salah rahmatullahi alaih ne apni kitab Muqaddimah mein ya Ma'rifatu Anwa'i Ulum al-Hadith mein aur Imam Nawawi rahmatullahi alaih ne in jaise Aima ne is kitab ko al-Jami' al-Musnad as-Sahih ke naam se yaad kiya. Yeh taweel naam hai, lekin Ibn Hajar rahmatullahi alaih ne Fath ul-Bari mein is kitab ko alfaz ke thode se radd-o-badal ke sath pesh kiya.
[2:36]al-Jami' as-Sahih al-Musnad, ya'ni Imam Nawawi aur Imam Ibn Salah ne al-Jami' zikr kiya, Imam Ibn Hajar ne bhi al-Jami' zikr kiya. Ya'ni yeh kitab Hadith ke mukhtalif mauzu'at ko apne andar ikatthey kiye hue hain. Mauzu'at ke aitbar se jami' tareen kitab hai, ihata ki hui kitab hai. al-Musnad ya'ni sanad wali kitab jiski sanadein muttasil rehti hain, tooti nahin rehti, kisi bhi tarah ki poshida illat uske andar nahin payi jati. as-Sahih jaisa ki humne jana, sahih Hadith ki us kitab ko kahenge jiske mu'allif ne Muhaddith ne yeh shart lagayi ke main apni is kitab mein sahih Hadith hi zikr karunga. Sahih Hadith, ya'ni jo Nabi sallallahu alaihi wasallam tak sanad ke aitbar se judi rehti hai, tooti nahin rehti, kisi bhi tarah ki poshida illat uske andar nahin payi jati. Sanad ke jitne ruwat hain, woh tamam ke tamam adl rehte hain ya'ni qabile e'timad rehte hain, Musalman, aqalmand, balig aur ghair akhlaqi umoor se bachne wale rehte hain. Hafize ke aitbar se bhi kamil darje ka hafiza inka rehta hai. To goya yeh sifatein jis sanad mein payi jati hai aur jis matn mein payi jati hain, woh Hadith sahih kehlati hai.
[4:10]Imam Nawawi aur Imam Ibn Salah ne al-Mukhtasar zikr kiya, lekin Ibn Hajar rahmatullahi alaih ne al-Mukhtasar zikr nahin kiya. al-Mukhtasar min umuri Rasulillahi sallallahu alaihi wasallam wa sunanihi wa ayamihi. Nabi sallallahu alaihi wasallam ke rozmarra ke kaam, zindagi ke mamulaat, taur tareeqe, shab-o-roz kaise guzara karte the. Us hawale se Imam Bukhari rahmatullahi alaih ne mukhtasar kitab tartib di hai. Lekin Ibn Hajar rahmatullahi alaih ne jo naam zikr kiya us naam mein hai: al-Jami' as-Sahih al-Musnad min hadithi Rasulillahi sallallahu alaihi wasallam wa sunanihi wa ayamihi.
[5:06]Umoor bahut aam ta'beer thi jise Ibn Salah rahmatullahi alaih aur Imam Nawawi rahmatullahi alaih ne istemal ki, lekin Ibn Hajar rahmatullahi alaih ne daqiq ta'beer istemal ki. Umoor se jo murad hai, Nabi sallallahu alaihi wasallam ki Hadith ko naqal kiya. To Sahih Bukhari ka yeh mukammal naam hai, thode se ikhtilaf ke sath Ulama ne is naam ko zikr kiya hai. Sawal yeh paida hota hai ki Imam Bukhari rahmatullahi alaih ne Allah ki taufiq se yeh azeem karnama kaise anjam diya? Kya pas e manzar hai, kya wujuhaat ho sakti hain? Ibn Hajar rahmatullahi alaih ne Hady us-Sari jo Sahih Bukhari ki sharah Fath ul-Bari ka muqaddimah hai, us kitab mein teen asbab zikr kiye hain, teen wujuhaat bayan ki hain. Sabse pehli wajah yeh hai ki Imam Bukhari rahmatullahi alaih ne ghaur kiya ki jitni kitaben payi jati hain, unmein sahih riwayat bhi hain, hasan darje ki riwayat bhi hain, balki za'eef riwayat bhi hain, jo ghair sabit aur ghair maqbool riwayat hain. Imam Bukhari rahmatullahi alaih ko yun lagta tha ki Nabi sallallahu alaihi wasallam ki sahih ahadeeth ka ek deewan hona chahiye. Sahih ahadeeth ka ek majmooa, sahih ahadeeth ka ek daftar hona chahiye. Dusri wajah yeh bayan ki ke Imam Bukhari rahmatullahi alaih ke ustad e muhtaram Imam Ishaq ibn Rahway rahmatullahi alaih, Imam Bukhari rahmatullahi alaih ko Amir ul-Mu'mineen fil Hadith kaha jata hai, lekin Imam Ibn Rahway rahmatullahi alaih ko Amir ul-Mu'mineen fil Hadith wal Fiqh kaha jata hai. To Imam Bukhari rahmatullahi alaih ke yeh ustad hain, Ishaq ibn Rahway rahmatullahi alaih. Imam Bukhari rahmatullahi alaih ne zikr kiya ke hum apne ustad ya'ni Ishaq ibn Rahway ke paas the rahmatullahi alaihim ajma'een.
[7:27]Faqal Ibn Rahway rahmatullahi alaih ne farmaya laujatum kitaban mukhtasaran li sahihi sunnati Rasulillahi sallallahu alaihi wasallam. Kya hi achha hota ki agar tum mukhtasar kitab tartib dete, likhte. Mukhtasar kitab ka mazmoon yeh hoga ki Nabi sallallahu alaihi wasallam ki sahih ahadeeth usmein jama hongi. Ek aam baat Imam ibn Ishaq rahmatullahi alaih ne apne shagirdon ke samne rakhi, lekin Allah ke fazl aur uski taufiq se ustad ki yeh aarzoo aur tamanna Imam Bukhari rahmatullahi alaih ke dil mein ghar kar gayi. Sirf sama'at ke pardon se nahin takrayi, balki dil ke darwaze par dastak di aur Allah tabarak wa ta'ala ne Imam Bukhari rahmatullahi alaih se yeh kaam liya. Farmate hain Imam Bukhari rahmatullahi alaih, fawaqa zalika fi qalbi fa akhtu fi jam'is sahihi. Yeh baat mere dil mein baith gayi aur maine sahih ahadeeth ko jama karne ka silsila shuru kiya. Yeh do wujuhaat ke sath sath, teesra sabab bhi hamein maloom hota hai.
[8:57]Imam Bukhari rahmatullahi alaih farmate hain, raitun Nabi sallallahu alaihi wasallam. Maine Rasulullah sallallahu alaihi wasallam ko khwab mein dekha. Wa kani waqifun baina yadayhi, goya ki main Nabi sallallahu alaihi wasallam ke samne khada hoon.
[9:17]Wa bi yadiya mirwahatun azubbu biha anhu, aur mere haathon mein ek pankha hai jiske zariye main Nabi sallallahu alaihi wasallam se koi cheez door kar raha hoon. Fa sa'altu ba'd al-mu'abbireen, farmaya Imam Bukhari rahmatullahi alaih ne ke maine khwabon ki ta'beer bayan karne wale kuch afraad se sawal kiya. Faqala li, to mujhe yeh jawab mila, anta tazubbu anhu al-kazib. Ke tum Nabi sallallahu alaihi wasallam se jhoot ko door karoge ya'ni log jo jhooti ahadeeth waza kar lete hain, ghad lete hain, batil riwayat pesh karte hain, tum Nabi sallallahu alaihi wasallam se aisi jhooti riwayat ko door karoge. Fahuwalladhi hamalani ala ikhrajil Jami' as-Sahih. To yahi khwab aur khwab ki is ta'beer ne mujhe Sahih Bukhari likhne par amada kiya. Yeh teen wujuhaat hain. Mu'ashare mein zarurat hona sahih kitab ki aur asatiza ki targhib dilana, bilkhusus Ibn Ishaq rahmatullahi alaih ki, aur teesri wajah hai khwab ka nazar aana aur khwab ki aisi ta'beer bayan karna. Agla sawal yeh paida hota hai ke itni azeem kitab ko Imam Bukhari rahmatullahi alaih ne kitni muddat mein likha hai? Khud Imam Bukhari rahmatullahi alaih farmate hain, sannaftu kitabi as-Sihah. Meri yeh kitab jismein sahih ahadeeth payi jati hain, maine yeh kitab likhi li sit asharah sanah.
[11:21]16 saal ki muddat ke darmiyan. Kharrrahtu min sittati alfi hadithin. Imam Bukhari rahmatullahi alaih ne 6 lakh ahadeeth jama ki, 6 lakh ahadeeth mein se Sahih Bukhari ke liye asaneed ko mutun ko, sahih ahadeeth ko muntakhab farmaya. Sahih Bukhari ke sath kuch imtiyazi baatein judi hui hain. Imam Bukhari rahmatullahi alaih ki khas inayat Allah tabarak wa ta'ala ke fazl aur uski taufiq ke baad. Ya'ni aisi kuch baatein hain jo kisi dusri kitab ke sath ya dusre mu'allif ke sath hamein nazar nahin aati. Jaise Imam Bukhari rahmatullahi alaih ne farmaya ke maine is kitab ki tasnif Masjid al-Haram mein shuru ki. Aur Allah tabarak wa ta'ala se istikhara kiya. Do rakaat namaz ada ki. Jab mujhe itminan ho jata ke yeh riwayat sahih hai ya'ni Muhadditheen ke usul o zawabit ke pesh nazar Hadith ki parakh karne ke baad, jaanch padtal karne ke baad, yeh ek izafi amal hai, Allah tabarak wa ta'ala se rujoo' hona aur is mubarak kaam ke liye mubarak aur muqaddas jagah ka intikhab karna. Baaz riwayat mein ghusl ka bhi tazkira milta hai. Ma waza'tu fi kitabi as-Sahih Hadithan illa qablil ghuslu. Maine Sahih Bukhari mein ek Hadith bhi darj karne se pehle ghusl ka ehtemam kiya, do rakaat istikhare ke maine ada kiye. Mazeed farmaya ke maine Masjid-e-Nabawi mein abwab ke tarajim likhne shuru kiye. Aur Masjid-e-Nabawi mein bhi Riyad ul-Jannah ka intikhab kiya. Nabi sallallahu alaihi wasallam ki qabr aur mimbar ke darmiyan jo jagah hai, us jagah mein baith kar abwab ke tarajim ya'ni chapter ke jo names hote hain, unki tartib ka kaam shuru kiya. Ahadeeth ki ibteda Masjid-e-Haram se ki, abwab ke tarajim ki ibteda Masjid-e-Nabawi se ki aur jab Bukhara wapas pahunche to ikhtetami marahil mein is kitab ko anjam diya.
[14:02]Ya'ni jo zaruri tadeel hoti hai, tabdeeli karni hoti hai, tasheeh karni hoti hai, us kaam se farigh hue. Iske alawa Imam Bukhari rahmatullahi alaih farmate hain ke jab main is kitab se farigh ho chuka, yeh kitab taiyar ho chuki. To maine apni is kitab ko Imam Ahmad bin Hanbal, Imam Yahya ibn Ma'een aur Imam Ali ibn al-Madini, in teen asatiza ke samne aur waghirihim, inke alawa dusron ke samne maine pesh kiya. Fastahsanuhu tamam ke tamam asatiza-e-ilm o fan ne is kitab ko achha samjha wa shahidu lahu bis-sihah aur is kitab ke sahih hone ki gawahi di. Sawal yeh paida hota hai ke akhir woh kaun si shart hai jiski wajah se Sahih Bukhari Sahih Muslim se bhi mumtaz ho gayi, mayanaz ho gayi, uska maqam o martaba buland ho gaya. Ahl e ilm ne kaha ke jaise Imam Muslim ne Sahih Muslim ki ibteda mein muqaddimah dikha, Imam Bukhari rahmatullahi alaih ne Sahih Bukhari ke liye muqaddimah nahin likha. Agar muqaddimah likha jaye to aasani se bahut sari baatein wazeh ho jati hain. Lekin Ulama ne Sahih Bukhari par ghaur kiya aur mehnat ki, uske baad kuch natayej par pahunche. Imam Suyuti rahmatullahi alaih ne farmaya ki Imam Bukhari se Sahih Bukhari ho ya Imam Bukhari ki koi dusri kitab ho, usmein Sahih Bukhari ki shart sarahat ke sath hamein nahin mili. Lekin tatabbu' se, istiqra karne se, ihata karne se, gehri nazar dalne se pata chalta hai ke Imam Bukhari rahmatullahi alaih ne rawi aur uske ustad jis se usne ilm hasil kiya, dono ke darmiyan tul e mulazimat ya'ni dono ka ek sath rehna, gehra ta'alluq rehna, mazboot ta'alluq rehna, lamba ta'alluq rehna, ise lazim bataya. Kyunki jis qadar sath zyada hoga, usi qadar quwwat e hafiza aur ahadeeth ko yaad rakhne mein aur ahadeeth ko azbar karne mein madad milegi. Dusri baat yeh batai ke tarikhhi hawale se dono rawat ke darmiyan jab mulazimat kahenge to yeh baat sabit ho jayegi, lekin khulase ke taur par mazeed sarahat ke sath yeh baat batai gayi ke dono ke darmiyan mulaqat sabit rehna aur sama'a ya'ni Hadith ko sunna bhi sabit rehna. Aise nahin ke hum asr hain, ek zamane ke hain, to kafi hai, jaisa ke kuch Muhadditheen ka yeh tareeqa raha. Lekin Imam Bukhari rahmatullahi alaih ne mulaqat aur sama'a Hadith milne ko, Hadith ke sunne ko aur tul-e-mulazimat ke dono ke darmiyan ta'alluq mazboot rahe, gehra rahe, taweel rahe, in tamam umoor ko lazim qaraar diya. Jis ki wajah se Hadith ki sari kitabon mein sabse aala darje ki sahih riwayat Sahih Bukhari mein payi jati hain. Hadith ki kitabon mein ahadeeth ki ta'daad agar hum janna chahe to do tarah ki ta'daad hamein milti hain. Ek to yeh hai ke ahadeeth takrar ke sath zikr ki jaye to kitni ta'daad ko pahunchti hain. Dusri yeh hai ke takrar ke bagair, ghair mukarrar ahadeeth kitni hain. To takrar ke sath ya'ni jo ahadeeth ek se zaid maqam par dohrai gayi hain, takrar ke sath 7275 ahadeeth hain aur takrar ke bagair takriban 4000 ahadeeth hain. Sahih Bukhari ki kuch imtiyazi khusoosiyat Muhadditheen ne bayan ki. Sabse pehli khusoosiyat yeh hai ke Fiqh al-Bukhari. Imam Bukhari rahmatullahi alaih ki deen fehmi ya shar'i ahkaam ki fehm. Jaise unhon ne baab bandha, unwan likha aur uske tahet jo Hadith zikr ki, dono ke darmiyan jo ta'alluq paya jata hai, jo rabt paya jata hai, jo munasabat payi jati hai, yeh hunar duniya ko hairan karke rakh diya. Dusri wajah yeh hai ke Hadith ki har kitab par ahl e ilm ne naqd kiya, aitraaz kiya. Lekin Sahih Bukhari par aitraaz nahin kiya gaya. Agar kiya gaya bhi hai to woh kaladam aitraaz hai. Teesri wajah yeh hai ke Imam Bukhari rahmatullahi alaih ka maqam o martaba Imam Muslim se kayi guna zyada hai, ilm ke aitbar se bhi aur is fan mein maharat rakhne ke aitbar se bhi. Agli wajah yeh bayan ki gayi ke Imam Bukhari rahmatullahi alaih ek hi riwayat ko mukhtalif maqamat par zikr karte hain. Kabhi mukammal, kabhi tukdon ki shakl mein. Jis Hadith se istidlal karna ho, jis Hadith se istinbat karna ho, hukm akhz karna ho, nikalna ho, maslihat ke pesh nazar tafannun ka muzahira karte hain. Imam Ibn Taymiyyah rahmatullahi alaih ne farmaya, laisa tahta adim as-sama' kitaban assahhu minal Bukhari wa Muslimin ba'd al-Quran. Ke Quran ke baad ru-e-zamin par Imam Bukhari aur Imam Muslim ki kitabon se sahih kitab koi aur nahin. Lekin Imam Dhahabi rahmatullahi alaih ne farmaya, amma Jami' al-Bukhari as-Sahih fajallu kutub il-Islam.
[20:37]Ke Imam Bukhari ki sabse sahih jo kitab hai, Sahih Bukhari, Islam ki sari kitabon mein sabse ahim tareen aur azeem tareen kitab hai. Wafdalauha ba'd kitabillah, Quran ke baad sabse azeem tareen fazeelat ki hamil kitab hai. Jaise Hadith ki sanad mein paye jaane wale rawi hote hain, matn ko naql karne wale, riwayat karne wale, usi tarah mukammal kitab ko bayan karne wale bhi rawi hote hain. Ek Hadith ki baat nahin, ek matn ki baat nahin. Kitab jab mukammal ho jati hai, kitab ko sikhaya jata hai aur kitab baad ke daur walon tak pahunchti hai to kitab ko naql karne wale aur kitab ko bayan karne wale bhi rawi hote hain. To Allah tabarak wa ta'ala ne is kitab ko is qadar mubarak banaya ke Imam Bukhari rahmatullahi alaih ki zindagani mein takriban 70,000 se zyada logon ne Imam Bukhari rahmatullahi alaih se is kitab ko suna. Lekin Farabi, Bazdawi, Nasafi aur Nasawi, Mahamaali, yeh aise naam hain jinhon ne is kitab ko bade hi ehtemam ke sath zikr kiya. Duniya mein Allah ke kalam ke baad jis kitab ko sabse zyada ahmiyat di gayi hai, woh hai Imam Bukhari rahmatullahi alaih ki kitab Sahih Bukhari. Takriban mukhtalif naahiyon se is kitab ki jo ilmi khidmat ki gayi rawiyon par, Sahaba ke namon par, Tabi'een ke namon par, Imam Bukhari ke asatiza ke namon par ya umumi taur par Sahih Bukhari ki sharah karna, jaise Fath al-Bari hai, jiske bare mein Imam Shawkani rahmatullahi alaih ne farmaya ke Hijrat baad al-Fath. Iske baad mein kisi aur kitab ki zarurat nahin. Mushkil alfaz ki sharah karna ya sanad ke bajaye sirf matn ko lekar mukhtasar karna, abwab par tarajim par aur usse da'awati asaleeb, aqeeda aur mukhtalif sanadon par guftugu karna. Mukhtalif naahiyon se khidmat ki gayi. Takriban qadeem a'dad o shumar ke lihaaz se Sahih Bukhari ki khidmat ke liye 375 kitaben payi jati thin. Kuch logon ne aitraaz karne ki koshish ki Sahih Bukhari par, halanki woh aitraaz be mahal hai. Imam Ibn Hajar rahmatullahi alaih ne uska jawab diya aur kuch ahadeeth sanadon ke bagair payi jati hain. Woh sanadein dusre maqam par maujood hain. Tawalat ke dar se Imam Bukhari rahmatullahi alaih ne zikr nahin kiya aur Ibn Hajar rahmatullahi alaih ne dusre maqam par isko zikr kiya. Imam Darqutni rahmatullahi alaih ne jo bhi tanqid ki woh muttafaqa qawayed nahin the aur Imam Bukhari rahmatullahi alaih ki nazar mein woh ahadeeth unke ilm ke mutabiq mahfuz thin. Yeh kuch mukhtasar si maloomat thin Sahih Bukhari ke ta'aruf ke hawale se. Wallahu Ta'ala A'lam wa sallallahu ala Nabiyyi wasallam. Wa alaikum warahmatullahi wabarakatuh.
