[0:01]السلام عليكم ورحمة الله، معاكم أحمد نظمي. تعالوا نتكلم النهارده على مبدأ التواصل بين الأجهزة. أي جهازين في العالم طبعًا احنا المفروض خلاص خلصنا توصيل الأجهزة من ناحية الهارد وير. أنا كده جاهز لتوصيل الشبكة بتاعتي، كان أهم جزء عندي اللي هو الكابلات، وعرفنا إزاي بنوصل كابل اليو تي بي. وعرفنا فكرة برضه كابل الفايبر ما بحتاجش إن أنا أعمل له تيرمينيشن، بيجي هو جاهز متوصل، كل اللي عليَّ بس أوصل الطرفين في الفتحات بتاعتهم سواء في الراوتر أو السويتش أو السيرفر. همم كده أنا البنية التحتية عندي أو كابلات وتوصيلات جاهزة. فاضل إن أنا أخش بقى على الجزء السوفت وير إن أنا أشغل الأجهزة وأعرف إزاي بيتواصلوا مع بعض، أو أهيأها للتواصل. أي جهازين عشان يتواصلوا مع بعض لازم يتوفر عندي ثلاث حاجات. لازم كل جهاز يبقى له رقم، أرّقمه ودي حاجة بديهية في عالم التواصل. الموبايل له رقم، العربيات لها رقم ولازم يبقى رقم يونيك فريد من نوعه، يعني ما بيتشابهش في نفس البيئة أو في نفس المكان. فعندي رقم جهاز الكمبيوتر اسمه الأي بي أدرس أو الإنترنت بروتوكول أدرس، الأي بي. ده الرقم اللي بيحصل عليه جهاز الكمبيوتر واللي بيميزه في الشبكة، والرقم ده طبعًا بيحصل عليه الأي سي أو النيتورك انترفيس كارد، اللي هو كارت الشبكة في جهاز الكمبيوتر الحاجة الوحيدة اللي لها علاقة بالشبكة في جهاز الكمبيوتر. فكل جهاز كمبيوتر الأي سي فيه بيحصل على أي بي أدرس، طب ينفع جهاز الكمبيوتر يبقى فيه أكثر من أي سي؟ أه ينفع أزود زي ما أنت عايز، بس كل كارت شبكة له رقم أي بي مختلف. وتشوف أنهي كارت اللي أنت هتوصله بالسويتش وهو ده اللي بترقمه عشان يقدر جهاز الكمبيوتر يتواصل مع باقي الأجهزة. يبقى أول حاجة توفرت عندي الأي بي أدرس، تاني حاجة وتالت حاجة الاثنين مكملين لبعض، حاجة اسمها البروتوكول والبورت. البروتوكول هو برنامج صغير شغال في الخفاء هو وظيفته إنه ينقل البيانات من الأي بي ده للأي بي ده حسب نوع البيانات. طب نوع البيانات ده بيتحدد على أي أساس؟ على أساس اللي أنت عايز تعمله، عايز تعمل إيه؟ عايز تتصفح. تتصفح مواقع، سطب مثلًا الكروم أو الفايرفوكس، هو لوحده بيسطب البروتوكول معاه اللي بيحتاجه، اللي هو الأتش تي تي بي والأتش تي تي بي اس، دي بروتوكولات تصفح. وظيفتها تنقل البيانات بالكليكات بتاعتك، كل كليكة هي أمر للبروتوكول إنه ياخد البيانات من أي بي بتاعك للأي بي بتاع السيرفر أو الموقع اللي أنت بتكلمه. يبقى البروتوكول بينقل البيانات حسب نوعها، في بروتوكول الداونلود، الـ أف تي بي فايل ترانسفير بروتوكول. ده وظيفته يعمل داونلود، في بروتوكول إرسال واستقبال الإيميلات، الإرسال له بروتوكول اسمه الأس أم تي بي، ساند ميل ترانسفير بروتوكول، والاستقبال له بروتوكول ثاني اسمه البوب أو الآي ماب، بوب بوست أوفيس بروتوكول وهكذا. كل بروتوكول له وظيفة فدي فكرة البروتوكولات إنها بتنقل البيانات حسب نوعها من مكان لمكان، كل اللي عليك إنك تسطب البرنامج اللي أنت محتاجه وهو بيسطب معاه البروتوكول اللي هيستخدمه. طب إيه موضوع البورت؟ البورت بوابة في نظام التشغيل، أي نظام تشغيل تعرفه أو ما تعرفوش، حتى نظام تشغيل الموبايل لازم يبقى فيه بورتات عددها 65,535 بورت أو 65,536 بورت ثابت. كل بوابة أو كل بورت بنقول عليه ثغرة أو منفذ بيشتغل عليه بروتوكول معين ثابت برضه، يعني بروتوكولات التصفح اللي قلنا عليها الأتش تي تي بي والأتش تي تي بي اس بتشتغل على بورت 80 وبورت 443 ثابتة. الأف تي بي 21، البوب 110، الأس أم تي بي 25 وهكذا. إيه الحكمة من البوابات دي؟ البوابات دي موجودة في أنظمة التشغيل عشان أقدر أتحكم في البروتوكولات دي مستقبلًا. يعني عايز أمنع جهاز الكمبيوتر إنه يعمل داونلود، أقفله البوابة بتاعت 21 اللي هو بورت الأف تي بي بقفلها إزاي؟ فيه عندي حاجة اسمها الفاير وول، ناس بتاعت سكيورتي تفهم الكلام ده، أو اللي هتدخل سكيورتي هتسمع الكلام ده. الفاير وول في منها الجزء مصغر أو برنامج مصغر بينزل في الويندوز، تقدر تشوفها من خلال كنترول بانل، في عندي حاجة اسمها ويندوز فاير وول، دي وظيفتها تتحكم بس في الجهاز ده بس مش بصورة مركزية على مستوى الشبكة. تقدر تتحكم في الجهاز ده تمنع بروتوكول معين أو تسمح له من خلال إن أنت تقفل له البورت بتاعه أو تفتح له البورت بتاعه، دي موجودة بصورة مصغرة في نظام التشغيل تقدر تشوفها في الويندوز. فالفاير وول وظيفتها أن أنا مستقبلًا أقدر أتحكم في البروتوكولات تشتغل أو ما تشتغلش عن طريق أن أنا أقفله الثغرة بتاعته أو البورت بتاعه أو أفتحه. فده الغرض من البورتات أن انا أقدر أتحكم فيها مستقبلًا. دي كده الاحتياجات اللي أنا بحتاجها عشان الجهازين يتواصلوا مع بعض أو أي جهازين يتواصلوا مع بعض. وبالتالي ده مبدأ ثابت في عالم التواصل، ما بيحتاجش نظام تشغيل معين أو شركة معينة، لا. ده مبدأ ثابت بتكلم حد عن طريق الواتساب، هي نفس الفكرة الواتساب لوحده برنامج بيفتح البورتات اللي هو بيحتاجها في التليفون. وفي نفس الوقت الواتساب بيسطب معاه البروتوكول اللي بيحتاجه. تبدأ أنت بقى عن طريق الكلام والسند والريسيف البروتوكول يروح ويجي من الأي بي بتاع تليفونك للأي بي بتاع الشخص اللي أنت بتكلمه وهكذا دي فكرة ثابتة في عالم التواصل. فاضل حاجة أخيرة في عالم التواصل إن احنا نعرف أنواع الرسائل في الإرسال والاستقبال. أي إرسال واستقبال عبارة عن رسالة من ثلاثة، يا إما رسالة يونيكاست، يا مالتي كاست، يا برودكاست. يونيكاست يعني وان تو وان، زي ما بتكلم حد على الواتساب منك ليه كده، فأنت واحد بيكلم واحد دي اسمها يونيكاست، وان تو وان. داخل على الفيسبوك تتصفح الفيسبوك فدي رسالة من واحد اللي هو أنت للفيسبوك اللي هو السيرفر موقع واحد برضه، دي اسمها يونيكاست وان تو وان. طيب المالتي كاست وان تو ميني بنحتاجها في إيه دي؟ مثال بسيط أن أنت مثلًا في الأزمة الأخيرة بتاعت كورونا في برنامج اشتهر جدًا اسمه زوم، هو موجود من زمان بس اشتهر أكثر والضوء انصب عليه أكثر الفترة دي. إيه فكرة برنامج زوم؟ إن أنت بتعمل به ميتينغ اون لاين محاضرات اون لاين، تقدر أنت تشير صورتك بتاعت الكاميرا أو الديسك توب بتاع جهاز الكمبيوتر، وفي حد يخش معاك يحضر المحاضرات دي يحضر الميتينغ ده. ممكن 5 6 10 100 براحتك. أنت لما بتقول كلمة واحدة بس بتروح لكام واحد؟ الناس اللي معاك في نفس الوقت دي اسمها رسالة مالتي كاست. مع أن في ملايين غيرك على مستوى العالم شغالين زوم في نفس الوقت، طب ليه ما بتروح لهمش الرسالة دي؟ لأنها رسالة وان تو ميني مش وان تو أول، وان تو ميني اللي هي رسالة المالتي كاست، بتروح لعدد معين. لأن في رقم ميتينغ بيحكمكم، رقم الميتينغ بتاع زوم ده هو أي حد عنده نفس رقم الميتينغ يشوفكم. فأنتوا كده الموضوع مقتصر على الناس اللي بتتشابه في نفس رقم الميتينغ، مع أن هو نفس البروتوكول اللي كل الملايين بيستخدموه في نفس الوقت، بس عشان مش كل الناس يشوفوا بعض في نفس الوقت. جاءت زوم وقالت أنا هأحكم الموضوع عن طريق رقم ميتينغ، فده بتقلص عدد الناس اللي بنستخدمها البروتوكولات فبيخلي نفس رقم الميتينغ بس اللي يشوفوا بعض مش كل الناس اللي مشغلة زوم واللي مشغلة نفس البروتوكول يشوفوا بعض.
[7:29]فدي اسمها رسالة مالتي كاست أو وان تو ميني، مبدأ كثير مبدأ منتشر جدًا المالتي كاست، أي حاجة بتحصل بنفس الفكرة كده دي اسمها رسالة مالتي كاست. جروب الواتساب أنت بتبعت رسالة منك للواتساب بيشوفها كذا عدد في نفس الوقت الجروبات. هي تعتبر حاجة شبيهة بالمالتي كاست. طيب عندي المبدأ الأخير اللي هو البرودكاست اللي هو وان تو أول. رسالة واحدة بتروح لكل الناس، ودي في الغالب ما بتحصلش على الإنترنت، ما فيش على الإنترنت حاجة اسمها برودكاست، بتحصل على مستوى اللان. الشبكات الداخلية، في بروتوكولات كتير لما تيجي تشتغل بتقوم بمبدأ البرودكاست، سواء مالتي كاست أو برودكاست أو يونيكاست دي كلها مبادئ تواصل بتقوم بها البروتوكولات. يعني البروتوكول الفلاني ده يقدر في شغله يعمل عملية برودكاست، البروتوكول الفلاني يقدر يعمل عملية مالتي كاست، البروتوكول الفلاني آخره يونيكاست. فدي فكرة البروتوكولات، كل بروتوكول حسب شغله بيحتاج مبدأ المالتي كاست أو اليونيكاست أو البرودكاست. هنتكلم على الموضوع ده بصورة فيها استفاضة أكثر لما نيجي نتكلم على الأي بيهات وفكرتها وطريقة كتابتها. وكده احنا دلوقتي هنتكلم على أهم حاجة عندي في الثلاث حاجات المهمين واللي لازم يتوفروا عشان الأجهزة تتكلم بعض زي ما قلنا أي بي أدرس وبورت وبروتوكول. البورت والبروتوكول أمرهم سهل أن أنت تسطب البرنامج اللي أنت محتاجه هو بيسطب لوحده البورت بيسطب لوحده البروتوكول وبيفتح البورت اللي محتاجه في الفاير وول أو في الويندوز في نظام التشغيل. الحاجة اللي احنا محتاجين نعمل لها إعدادات بنفسنا وما ينفعش نسيبها كده تشتغل أوتوماتيك. الأي بي أدرس لازم نفهم فكرته ويلا بينا نتكلم على أهم جزء في حياتنا في عالم الشبكات. يلا بينا.
