نظرية فيثاغورث بالماء | بمنتهي السهولة

[0:00]السلام عليكم ورحمه الله وبركاته، معانا النهارده نظريه فيثاغورس. مين فيثاغورس ده؟ ده عالم طلع نظريه مهمه جدا جدا تخص بس المثلث القائم. يعني احنا لو جبنا المثلث القائم بالشكل ده، نظريه فيثاغورس هتتطبق عليه. اللي هي إيه؟ قبل ما أقول لك نظريه فيثاغورس إيه؟ لازم أعرفك أكتر على المثلث القائم. دي الزاويه القائمة بتاعته، وبالتالي الضلعين دول اسمهم ضلعي القائمة. أومال الضلع اللي في وش الزاوية القائمة ده اسمه إيه؟ اسمه الوتر، وبيكون أكبر ضلع في المثلث القائم. يعني علشان تحاول تجيبه، هتعمل عمليه جمع لحاجات معينه. وعلشان تجيب أي ضلع من الاضلاع الثانيه، هتعمل عمليه طرح لحاجات معينه. خلينا نشوف. هنقول الوتر تربيع يساوي مجموع مربعي ضلعي الزاوية القائمة. يعني إيه الكلام ده؟ يعني مثلا هنا عندي الوتر أ ج فهقول له (أ ج) تربيع يساوي هنجمع مربعات الضلعين التانيين، يعني هقول له (أ ب) تربيع زائد (ب ج) تربيع بس كده. يبقى أنت عشان تجيب الوتر تربيع هتجمع مربعات الضلعين التانيين. طب ميس، مربع ده يعني تربيع ولا يعني مربع حقيقي؟ الاتنين صح. يعني أنا لو قلت لك إن أ ب 3 سم و ب ج 4 سم والوتر 5 سم. وأنا جربت أطلع مربع من كل واحد فيهم. وبالتالي هيبقى المربع بتاع أ ب كل أضلاعه 3 سم. والمربع بتاع ب ج كل أضلاع 4 سم. والمربع بتاع أ ج كل أضلاع 5 سم. ومن هنا بقى تعالى مع بعض نشوف تجربه صغيره لو ملينا مايه بالشكل ده. عند ضلعي الزاويه القائمة تفتكر أن مجموع المربعات دي هيدينا المربع بتاع الوتر؟ خليني نشوف. بنحرك العجله بتاعتنا بالشكل ده لحد ما المايه اللي موجوده في المربعين الصغيرين تملى المربع الكبير بالكامل. وطالما قلنا إن الوتر هو الكبير فعشان كده بنجمع. فأنا لو عايز ضلع من الاضلاع يعني (أ ب) تربيع، هقول له الكبير اللي هو (أ ج) تربيع ناقص الصغير التاني اللي هو (ب ج) تربيع. ولو أنا عايزه (ب ج) تربيع يبقى حاطة في دماغي إن أنا عايزة الصغير. هقول له الكبير اللي هو (أ ج) تربيع ناقص الصغير التاني اللي هو (أ ب) تربيع. طيب. أستخدمها ازاي؟ بيجي لك سؤال يقول لك أوجد طول الضلع المشار إليه بعلامة الاستفهام. هنا عندي علامه الاستفهام على الوتر اللي في وش الزاويه القائمة. والوتر احنا اتفقنا ان هو الكبير يبقى أنا هجمع، هقول له (ب ج) تربيع اللي هو الوتر يساوي (أ ج) تربيع زائد (أ ب) تربيع. لو نسيت التربيع افتكر المربع والقصه اللي احنا عملناها. (أ ج) بس 20 وهعمل تربيع، زائد (أ ب) بس 15 وهعمل تربيع. 20 في 20 بـ 400، زائد 15 في 15 225 تقدر تستخدم الاله. الناتج في الاخر هيبقى 625. بس خلي بالك إن الناتج ده مش (ب ج) بس، لأ ده (ب ج) تربيع. طب أعمل إيه عشان أشيل التربيع؟ اللي بيضيع التربيع هو الجذر التربيعي. يبقى أنا هقول له (ب ج) بس يساوي جذر الـ 625 هيدينا 25 سم. وكده يبقى أنت خلصت. يبقى أنا بعد ما بجيب التربيع لازم أجيب الجذر بتاعه. تاني، هنا علامة الاستفهام على ضلع من الاضلاع الصغيره مش على الوتر اللي في وش القائمة. يعني أنا هطرح. هقول له (أ ب) تربيع اللي أنا عايزها يساوي الكبير اللي هو (أ ج) تربيع ناقص الصغير (ب ج) تربيع. طيب (أ ج) 15 تربيع ناقص (ب ج) 9 تربيع. 15 تربيع 225 ناقص 9 تربيع يعني 9 في 9 81. الناتج في الاخر هيبقى 144. بس ده (أ ب) تربيع. أنا عايزة (أ ب) بس يبقى أنا هجيب جذر الـ 144 تقدر تستخدمها على الاله هيديك 12 سم. تاني، يلا بينا نشتغل مع بعض. إيه ده يا ميس هو أنتِ مش قلتِ أول الفيديو إن نظرية فيثاغورس بس بتشتغل على المثلث القائم؟ أه ما هو ده مثلث قائم. إيه ده يا ميس طب أنا هعرف منين أنه مثلث قائم؟ المثلث القائم ليه شكل من تلاته. الشكل الاول والشكل التاني وده الشكل التالت اللي الزاويه القائمة فيه بتبقى من فوق. طب أنا يا ميس عايزة أتأكد إن ده قائم مش ممكن يطلع حاد. هتجيب المسطره بتاعتك وتوقفها بالشكل ده. لو الضلعين كانوا لامسين المسطرة بالظبط يبقى المثلث ده قائم من فوق. يبقى قبل ما تقول إن المثلث ده قائم أو لا، هتجيب المسطرة وتشوفه قائم من فوق ولا لأ. هنا المثلث بتاعنا قائم من فوق وهو عايز (أ ج) يعني عايز الضلع الصغير. فأنا هقول له (أ ج) تربيع يساوي الكبير اللي هو في وش الزاوية القائمة (أ ب) تربيع ناقص. ليه ناقص؟ عشان أنا عايز الصغير (ب ج) تربيع. طيب، (أ ب) 8.5 تربيع ناقص (ب ج) 7.5 تربيع. هتدخلهم مع بعض على الاله هيديك 16. بس خليك فاكر إن الـ 16 دي (أ ج) تربيع. وأنت عايز (أ ج) بس، يبقى أنت هتقول له جذر الـ 16. كم في نفسه يدينا 16؟ 4 سم. ده ملخص عن نظرية فيثاغورس. الفيديو الجاي إن شاء الله هناخد تدريبات أكتر على نظرية فيثاغورس والمسائل اللي بتيجي عليها. أشوفك على خير، السلام عليكم ورحمه الله وبركاته.