[0:00]Namaste doston. Pichhle saal April ke mahine mein Ram Navami ke samay kuchh log pakde gaye gohatya karte hue Agra ke shehar mein. Iski wajah se Agra mein us waqt communal hinsa bhi chhid gayi thi. Yeh ek lauta aisa incident nahi hai. August 2022 mein bhi aisa hi kuchh hua tha. Uttar Pradesh ke Kannauj district mein ek Shiv mandir ke samne kisi aadmi ne meat phenk di aur uski wajah se hinsa chhid gayi. Aisa hi kuchh May 2020 mein bhi hua tha. Coimbatore mandir ke samne kisi ne meat phenk di. February 2024 Uttar Pradesh ke Moradabad mein kuchh log gau hatya, cow ki slaughtering karte hue pakde gaye. Yeh saari khabre sunkar ek cheez aapke dimaag mein zaroor aayegi. Aakhir yeh kaun log hain jo Hinduon ki bhavnaon ko thes pahuncha rahe hain aur Hinduon ko bhadkane ki koshish kar rahe hain? Iska jawab woh nahi jo shayad aap soch rahe ho. Pehli khabar ka news article dekhiye. UP Police ke anusar gohatya ke peeche asli zimmedaar the Hindu Mahasabha ke kuchh karyakarta jo hinsa bhadkana chah rahe the. Doosri khabar. Shiv mandir ke samne meat fikwai Chanchal Tripathi naam ke ek aadmi ne. Isne ek Muslim kasai ko iske liye Rs 10,000 diye the. Iske peeche karan tha ki yeh wahan ke SHO Harishyam Singh ke khilaaf badla lena chah raha tha. Teesri khabar. Coimbatore ke mandir ke samne meat phenkne wala aadmi tha Hari Ram Prakash. Ek unemployed civil engineering graduate. Police ke anusar yeh mentally disturbed tha. Chauthi khabar. Gohatya ke peeche Moradabad mein UP Police ne arrest kiya chaar logon ko jinme se ek tha Bajrang Dal ka leader. Yeh ek Musalman aadmi ko ek jhoothe case mein phansane ki koshish kar rahe the, isliye inhone khud gohatya kar di. Hairani ki baat yeh ki yeh kaam karne ke liye inhone khud ek Muslim aadmi ki madad li. In khabaron ke peeche ki sachai sunkar agar aap hairan ho rahe ho to aaram se baith jao. Agle aadhe ghante mein jo main sunane wala hoon apni aankhein aur kaan kholkar dhyan se sunna. Hamare desh mein ek bhayankar mafia chalaya ja raha hai WhatsApp aur media ke zariye jiska sirf ek maksad hai. Sabhi Hinduon ko brainwash karna aur tanashah ke hathon kathputli bana dena. Maine pichhle video mein samjhaya tha doston ki kaise kisi bhi desh ka koi bhi dictator ho woh humesha desh ki majority community ko apna target banata hai. Bharat ke case mein majority community hai hum Hinduon ki. Aur humein brainwash karne ke liye jo WhatsApp par mafia chal raha hai woh chaar departments par kaam karta hai. Pehla department jo aapke andar garv aur ahankaar bharta hai. Kaha jata hai ki aap Hindu kitne mahan ho. Especially so-called upper-caste Hinduon ko yeh garv diya jata hai. Chaahe aapne kuchh personal life mein achieve kiya ho ya na kiya ho, aapko kaha jata hai ki aap mahan ho kyunki aap is jaat is dharm mein paida hue ho. Hindu dharm mein jis vyakti ka janm hota hai woh vyakti bahut hi bhagyashali hota hai. Doosra department kehta hai ki aap par sadiyon se atyachar hua hai. Yeh dekho aap kitne bade victim ho. Teesra department: aap khatre mein ho. Dekho humein un logon se khatra hai. Woh kabhi bhi aakar humein khatam kar sakte hain. Aur chautha department jo Narendra Modi ko masiha banata hai. Aapko kaha jata hai ki agar aapko koi bacha sakta hai to sirf wohi ek insaan hai jo aapko aakar bachayenge, isliye sirf unhein hi vote do. Duniya ka sabse best Prime Minister hain. Baap jo paida kiya usse bada Modi hai. Utna woh Bhagwan hain Bhagwan. Bharat mein Bhagwan ka vardan banke aaye hain. Is video mein teesre aur chauthe department ko gehrai se samajhte hain yeh janne ke liye ki logon ko kya-kya dikhaya jata hai unhein brainwash karne ke liye.
[3:17]Duniya bhar par nazar dalen doston to dictators kai deshon mein dekhe gaye hain. Chaahe yeh Pakistan ho, Germany ho, Chile ho ya Rwanda ho. Lekin sabhi dictators ke dwara target humesha majority community ko kiya jata hai. Pakistan ke desh mein Sunni Muslims majority mein hain. Toh unhein brainwash karne ke liye jhoothi khabrein phailayi gayi ki kaise desh ki baaki minorities unke liye khatra ban rahi hain. Hindu, Christian, Sikh, Shia Muslims, Ahmadiyya Muslims ya phir Sufi Muslims hi kyun na ho. 2021 mein BBC ne yeh video report upload kari thi jismein dikhaya gaya ki Pakistan ki school ki kitaabon mein kaisa nafratkhor propaganda maujood hai jiske zariye bachchon ke dimaag mein zehar dala jata hai. Unhein yeh kahaniyan sunayi jaati hain ki kaise Hindus aur Sikhs ne laakhon aurton, bachchon ko maar diya. Mere paas Mutala-e-Pakistan book hai aur yeh 11th aur 12th jamaat ke liye hai. Page number 33 pe yeh likha hua hai. Insaniyat dushman Hinduon aur Sikhs ne hazaron balki lakhon aurton, bachchon, boodhon aur jawanon ko intehai bedardi aur sangdili se qatl kiya aur beyabroo kiya. Mutala-e-Pakistan 11th aur 12th jamaaton ke liye, Sindh Textbook Board. Aur itna hi nahi, Yahoodiyon ko bhi Islam ka dushman bataya jata hai. Iske alawa is 2016 ki report ko dekho. Ya phir is 2021 ki report ko dekho jismein bataya ja raha hai ki kaise Ahmadiyya Musalmanon ke khilaaf bhi hate speech dekhne ko milti hai Pakistan mein. Is sab nafrat ka natija yeh hua hai ki Pakistan aaj ke din bahut hi buri halat mein hai.
[4:39]Pichhle saal ki World Bank report dekho. 40% Pakistanis below poverty line hai. Berozgari ek bahut badi musibat bani phir rahi hai aur kuchh hi din pehle IMF ne bataya hai ki Pakistan mein is fiscal year mein nearly 25% ki inflation dekhi jayegi. Pakistan ki majority community Sunni Muslims ko is nafrat ke jaal mein phaskar, brainwash hokar kya mila? Ek aisa desh jo rehne layak nahi hai jahan law and order ka koi namo nishan nahi hai. Majority community ke andar ek dar ki bhavna jagane ke liye kis tareeke ka khabaron ke sath khel khela jata hai. Iska ek achha udharan dekhne ko milta hai aaj se 100 saal pehle America mein. Saal 1919 ki baat hai. Washington mein ek 22 saal ka black criminal kuchh logon par hamla karta hai aur chori karta hai. Jin logon par hamla kiya jata hai unme se ek school teacher thi jo khud ek black aurat thi. Is incident ko lekar ek interesting baat yeh hai ki Washington ke jo saare akhbaar the us waqt, woh ya to is khabar ko report hi nahi karte ya phir ise poori tareeke se daba dete. Lekin paanch din baad, same shehar mein same criminal jab ek white aurat par hamla karta hai to saare akhbaron ki yeh front page khabar ban jati hai. Iski wajah se agle kai hafton tak Washington mein dange dekhne ko milte hain blacks aur whites ke beech mein. 39 logon ko mara jata hai aur 150 se zyada log zakhmi ho jate hain. Jo actual criminal tha is case mein uska arrest sirf ek saal baad hi dekhne ko milta hai jab woh koi ek nayi chori karta hai. Washington Post jo us waqt bhi ek akhbar tha woh 100 saal baad 2019 mein us incident ko lekar khed jatata hai. Article mein likhta hai ki unhein regret hai apne racial past ko lekar. Aaj doston aisi hi kahaniyan hamare desh mein dohrai ja rahi hain. Kuchh mahine pehle aapne yeh khabar suni hogi Shraddha Walkar ki. Ek Hindu aurat jise bahut hi berehmi se maar diya gaya uske Muslim boyfriend Aftab Ameen Poonawalla ke dwara. Shocking baat yeh thi ki ismein iski body ko kaatkar fridge mein rakha tha. Lekin hamare Godi media ne is ek incident ka istemal kiya sabhi Musalmanon ke khilaaf nafrat phailane ke liye. Iski wajah se National Broadcasting and Digital Standards Authority NBDSA ne Rs 50,000 ka fine laga diya Mukesh Ambani ke channel News18 par. Chaar shows jinhein anchor kiya gaya tha Amish Devgan aur Aman Chopra ke dwara inhone nafrat phailayi thi.
[6:44]Rs 1 lakh ka fine Times Now Navbharat par bhi lagaya gaya isi cheez ko lekar. Is incident ka istemal karke social media par bhi bharpoor tareeke se nafrat phailayi gayi. Ek Godi influencer ne Bollywood actress Sonakshi Sinha ki photo upload kari unke Muslim dost ke sath. Shraddha ki khabar ko dekhte hue Shatrughan Sinha ne dahej ki list se fridge hata diya hai. Sudarshan News ne ek program chalaya jiski headline thi, Mera Abdul aisa nahi hai ki haqeeqat. Ek aur Godi influencer ne Twitter par post kiya, Aapka Abdul bhi waisa hi hai. Zee News ne tweet karke yeh program chalaya, DNA: Mera Abdul waisa nahi hai walon ke liye sabse bada sabak hai yeh case. Aur of course WhatsApp mafia ne bhi Abdul shabd ka istemal karke bahut saare zehrele messages phailaye. Yeh saare posts aur messages sirf ek cheez sabit karna chahte hain ki har ek Muslim aadmi ek potential khooni hai. Abdul shabd ka prayog yahan par sabhi Musalmanon ko denote karne ke liye kiya ja raha tha. Kuchh hi din pehle ek aur aisi khabar aayi Karnataka se jahan par ek Muslim aadmi Fayaz ne ek Hindu ladki Neha ko maar diya. Ek baar phir se yeh saare Godi influencers aur WhatsApp mafia ko chalane wale activate ho gaye aur sabhi Musalmanon ke khilaaf nafrat ugalne lag gaye. Maksad sirf ek. Hinduon ko brainwash karo aur Hinduon ke andar dar bithao ki Hindu khatre mein hain aur humein agar is khatre se bahar nikalna hai to Modi ko vote dena hoga. Ab jin logon ka brainwash already kiya ja chuka hai unhein is cheez mein kuchh bhi galat nahi lagega. Woh kahenge kya galat hai ismein? Yeh murder yahan par hua, Musalman ne kiya, yeh saare Musalman aise hi hote hain. Unhein agar aap bolne ki koshish karoge yeh to sirf ek-do incidents hain woh aapko 10 aise incidents gina denge. Shraddha Aftab, Neha Fayaz, Sakshi Sahil Khan, Nikita Tausif, Arshad Prabha, Ankita Shahrukh, Ritika Saiyyad, Mansi Dixit, Muzammil. In sabhi cases ki list sunane ke baad yeh aapse kahenge, yeh dekho kaha tha na maine yeh saare Musalman aise hi hote hain. Yeh saare ke saare potentially khooni hote hain. Kya hai iske peeche ka sach? Is khabar ko dekho. Shraddha Walkar ke case ke do hafte baad ek aur case hua tha Pandav Nagar mein. Anjan Das naam ke ek aadmi ko unki patni Poonam ke dwara maar diya gaya aur Shraddha ke case ki tarah uski bhi body ko kaatkar fridge mein store kiya gaya. Itna hi nahi iske teen mahine baad is khabar ko dekhiye. Najafgarh ke paas Mitraon gaon mein Sahil Gehlot ne apni live-in partner Nikki Yadav ko maar diya. Marne ke baad uski body ko apne dhaba mein fridge mein rakha. Same din usne ek shadi bhi kar li. In dono cases ki details bilkul wahi Shraddha Aftab case wali details hain. Sirf ek farak hai, in dono cases mein koi Hindu-Muslim ka angle nahi hai jaisa us wale mein hai. Isliye aapne in khabaron ke bare mein kahin suna hi nahi hoga aur na hi media walon ne is khabar ko chalaya hoga. Is report ko dekhiye. Bihar ke Vaishali district mein Aman Kumar Singh ne ek 17 saal ki ladki Sonam Parveen ko maar dala. Hindu ladka, Muslim ladki, isliye Godi media iski baat karega hi nahi. News18 Hindi ki website par yeh khabar zaroor chhapi lekin inhone ladke ka naam nahi likha. Bas yeh likha ki hatya ke peeche prem prasang ki aashanka jataayi ja rahi hai. UP ke Shamli district se is khabar ko dekhiye. Naima urf Eesha apne ghar se bhag gayi aur ek love marriage kari Anshu ke sath. Anshu ek sharp-edged hathiyar se Eesha par hamla karta hai aur ise marne ke baad uski body kuen mein phenk deta hai. Wahan ke ASP ne interrogation ke baad bataya ki husband Anshu ne apna gunah kubool kiya. Rasoolpur gaon ki is news report ko dekhiye. 20 saal ki Gulnaz Khatoon ko zinda jala diya gaya ek aadmi aur uske doston ke dwara kyunki usne marriage proposal refuse kar diya tha. Yahan accused kaun tha? Satish Kumar Rai. Pichhle saal jab Sakshi aur Sahil Khan ki khabar media mein phailayi ja rahi thi, to usse kuchh din pehle ek aur waisa hi incident hua tha. Bihar ka ek labourer Ramanuj Sahu Surat gaya apne parivar se milne. Uska apni patni Rekha ke sath jhagda hua aur usne Rekha par 10 baar chaku se vaar kiya. Jab uski 19 saal ki beti ne apni maa ko bachane ki koshish kari to usne use bhi maar dala. Najafgarh ki is khabar ko dekhiye. Vipul Singh naam ka aadmi khulle mein dhamki deta hai ki woh Musalman aurton ko moltest karega aur maarega. Delhi Police aur NCW ne ispar cognizance bhi liya. Ya phir paanch mahine pehle ki Karnataka ki is report ko dekhiye. 39 saal ka aadmi Praveen Arun, isne apni 21 saal ki air hostess colleague Aynaz ke sath dosti kari. Jab Aynaz ne isse communicate karna band kar diya, yeh uske ghar mein gaya aur use maar dala. Aur iske baad isne uski maa ko bhi maar dala, uski badi behan ko bhi maar diya aur uske chhote bhai 14 saal ke usko bhi maar diya. Phir se Hindu aadmi hai, Muslim aurat hai, to Godi media iski baat nahi karega, na hi aapko WhatsApp par sunne ko milegi. 20 din pehle ki is khabar ko dekh lijiye. 26 saal ki Rukhsar urf Riya ko uske live-in partner ne maar dala aur uski body ko ek cupboard mein stuf kar diya. Accused kaun tha? Vipul Tailor naam ka aadmi. Jab Dainik Jagran mein yeh khabar chhapi to inhone ladki ka naam kahin mention nahi kiya apne article mein. Ab is khabar ko dekhiye. Bangalore mein rehne wala Pradeep, ek Rukhsana naam ki aurat se sambandh banata hai. Dono ka sath mein bachcha hota hai, Rukhsana usse shadi karna chahti hai, lekin woh yeh nahi chahta tha to usne Rukhsana ka khoon kar diya. Yeh bhi kuchh hi din pehle ki khabar hai Karnataka se. Mera ek hi sawal hai nafrat phailane wale namoono se. Aapko maine itne saare cases gina diye yahan par pichhle ek-do saalon ke jahan par hatya karne wala ek Hindu tha. To kya yahan par yeh kaha ja sakta hai ki har Hindu aadmi yahan par ek potential khooni hai? Obviously nahi kaha ja sakta. Desh mein 55 se 60 crore Hindu aadmi rehte hain. In 20-30 cases ko lekar generalize nahi kiya ja sakta ki saare Hindu ladke aise hote hain. Aur theek isi tareeke se Musalmanon ko bhi generalize nahi kiya ja sakta. Desh mein rehne wale karodon Muslim aadmi hain, saare ke saare potential killer nahi hote. Yeh assume karna ek bahut hi bewakoofi wali cheez hai aur yeh aapka nafratkhor mindset dikhati hai. Agar aapko aisa lagta hai to bade afsos ki baat hai mujhe kehna pad raha hai ki aapka brainwash ho chuka hai. NCRB ki report Crime in India 2022 ke anusar desh mein 4.5 lakh crimes hue hain aurton ke khilaaf is 2022 ke saal mein. In 4.5 lakh crimes mein se 28,522 FIRs darj karayi gayi murder ki jinmein se 8,125 females thi. Ab ek saal mein agar 8,000 se zyada murder ke cases ho rahe hain jahan par aurton ko mara ja raha hai to obvious si baat hai inmein se kuchh murders aise honge jo ek Musalman aadmi ne kiye honge, kuchh aise honge jo ek Hindu aadmi ne kiye honge. Har tarah ke permutation-combination yahan par aapko mil jayenge. Hindu aadmi, Hindu aurat, Muslim aadmi, Muslim aurat, Hindu aadmi, Muslim aurat, ya Muslim aadmi, Hindu aurat. Aur sirf Hindu-Muslim hi nahi sabhi dharmon ke aapko combination mil jayenge kyunki 8,000 yahan par bahut bada number hota hai. Problem yeh hai ki jin logon ka brainwash ho chuka hai unki awaaz sirf tab nikalti hai jab unhein dikhta hai ki hatya karne wala ek Musalman aadmi tha aur jiski hatya hui woh ek Hindu aurat thi. Lekin in sab logon ke muh par chuppi lag jati hai jab dikhta hai ki yahan ek Hindu aurat ko Hindu aadmi ke dwara mara gaya. Ya phir ek Muslim aurat ko Hindu aadmi ke dwara mara gaya. Kisi bhi normal insaan mein agar insaniyat hai to woh in sabhi cases ke khilaaf awaaz uthayega jahan-jahan aurton par atyachar ho raha hai. Koi bhi sensible aadmi yahan par kahega sarkaar ko ki yahan saare crimes ko kyun nahi roka jata jo saari aurton ke khilaaf ho rahe hain. Asliyat mein solution dhoondhne ki zaroorat hai is cheez ko lekar. Aisa to hoga nahi ki police ek area ko safe banayegi sirf Hindu aurton ke liye aur Muslim aurton ke liye woh area unsafe rahega. Agar kisi area ko safe banana hai to sabhi aurton ke liye woh safe banega na. Selective outrage in logon ka sabse bada hathiyar hai. Agar aaj main justice ki demand karta hoon to main Neha ke liye bhi karta hoon aur Rukhsana ke liye bhi karta hoon. Main un sabhi Hindu aur Muslim aurton ke liye justice ki demand karta hoon jin ke khilaaf atyachar hua hai. Police ko yahan par speedy investigation karne ki zaroorat hai. Desh bhar mein agar police walon ki kami hai to state governments ko yahan par aur police ko recruit karne ki zaroorat hai. Courts agar dheere kaam karte hain to unhein fast track trial karne ki zaroorat hai. Tareekh pe tareekh dena unhein band karna hoga. Aur khoon karne wala chahe Hindu ho ya Musalman ho un sab ko strictest punishment di jani chahiye. Ab main in BJP walon ko challenge karta hoon ki yeh same cheez bolkar dikhayein. Inka ek bhi neta, ek bhi karyakarta yeh same cheez bol nahi payega. Himmat hi nahi hogi. Kyunki agar inhone yeh cheez bol di to inka pura ka pura system khatam ho jayega. Hinduon ko brainwash karne ka inka yahi tareeka hai aur iske bina inka dhandha hi nahi chalega. Are kisi aur dharm ki aurat ko lekar justice ki demand karein woh to bahut door ki baat hai. Yeh Hindu aurton ke liye bhi justice ki demand nahi karenge agar inhein dikha ki BJP involved hai kahin par. Agar kisi Hindu aurat ko kisi Hindu aadmi ke dwara mara gaya, kisi BJP ruled state mein ya kisi culprit ka koi BJP connection nikal jaye, to inke muh bilkul band ho jate hain. December 2019 mein dekh lo kya hua tha jab former BJP MLA Kuldeep Singh ko convict kiya gaya kidnapping aur molesting ke case mein. Is case mein bahut se witnesses ki maut ho gayi thi aur inke karyakartaon ne kya kiya? Inke support mein rally nikali thi. Vidhayak ji sarasar nirdosh hain. Unko phansaya ja raha hai. Kuchh mahine pehle ek IIT-BHU ka case hua jahan par teen accused the. Kunal Pandey, Saksham Patel aur Abhishek Chauhan. Yeh BJP IT Cell ki Varanasi Unit ka hissa the. Inhone apni photos post kari thi JP Nadda ke sath. Anurag Thakur ke sath, UP CM Adityanath ke sath. Aur kya lagta hai aapko yahan par kisi Hindu aurat ki inhein chinta thi? Bilkul nahi thi. Kyunki is case mein inke khud ke logon par aarop laga tha balatkaar ka. Uttarakhand ka yeh case dekh lo. 19 saal ki Ankita Bhandari, yeh ek resort mein kaam karti thi aur is resort ke owner former BJP politician Vinod Arya ke bete Pulkit Arya the. Is par ilzaam laga ki isne Ankita ko molest kiya aur uski hatya kar di. Ladki ke papa ko ek se doosre police station tak bhagna pada FIR register karwane ke liye sirf. Kuchh action sirf tab liya gaya jab local news portal Jago Uttarakhand mein is murder ko highlight kiya tha. Lekin baad mein pata hai kya hua? Is news portal ke journalist Ashutosh Negi ko hi police arrest kar leti hai yeh kehkar ki iske intentions par humein shak hota hai. Ankita bhi Hindu thi lekin kya WhatsApp par aapne is message ko padha kabhi? Nahi padha hoga kyunki inka mafia chal raha hai. Shraddha Walkar ke case mein to Muslim organization Jamaat-e-Islami Hind ne use condemn bhi kiya aur killer ko lekar harshest punishment bhi mangi. Neha Fayaz ke case mein Anjuman-e-Islam community ke members ne Karnataka Chief Minister ko letter bhi likha yeh kehte hue ki hum accused Fayaz ke khilaaf severe punishment ki maang karte hain. Lekin jo WhatsApp forwards aapke phone mein har din har shaam ko aa rahe hain woh WhatsApp forwards aapko yeh cheeze nahi batayenge kyunki unka maksad sirf aapko brainwash karna hai. Woh sirf aapke dil ke andar dar ki bhavna jagana chahte hain ki aapko dar lage Musalmanon se aur phir is dar ke mare aakar aap Modi ko vote do. Mujhe bada bura lagta hai yeh kehte hue ki hamare desh ke Pradhan Mantri ke paas bhi ab aur kuchh bacha nahi hai. Ab unhone bhi apne bhashanon mein aise jhooth phailane shuru kar diye hain ki Hinduon ke andar dar baithe aur dar ke mare woh unhein vote karein. Yeh sampatti ikatthi karke yeh kisko baantenge? Jin ke zyada bachche hain unko baantenge, ghuspaithiyon ko baantenge. Pehli baat, Congress ke poore manifesto mein Hindu aur Muslim shabd ka kahin koi zikr nahi kiya gaya hai aur na hi wealth redistribution shabd aapko yeh poore manifesto mein kahin milega. Meri baat par yakeen nahi hota aap inka manifesto khud jaakar dekh sakte ho Congress ki website par, link maine description mein bhi dal diya hai. Control F karke wealth redistribution search karne ki koshish karna. Kuchh nahi milne wala.
[17:27]Ulta Congress ke manifesto mein baat kari gayi hai education ki, healthcare ki, rozgar ki. Inhone kaha hai ki yeh 22 crore logon ko garibi se bahar nikalenge, karodon naukriyan denge. Rahul Gandhi ne apni speech mein bhi aisa hi kaha tha ki jitne rupaye Narendra Modi ne Adani ko diye utne rupaye yeh garibon ko denge, mazdooron ko, kisanon ko aur yuvaon ko denge. Doosri baat, Pradhan Mantri ne badi besharmi se Muslims par wahi stereotype thop diya jo inke WhatsApp mafia mein phailaya jata hai ki yeh Musalman to humesha zyada bachche paida karte hain. Jab Pradhan Mantri yeh khud paanch bhai-behan nahi hain kya? UP Chief Minister Adityanath ko dekh lo, unke khud teen bhai aur teen behan hain. Yeh jo perception banaya jata hai ki Musalman zyada bachche paida karte hain yeh bilkul bakwas perception hai. Kyunki sarkari reports ko aap dekhoge to zyada bachche paida karna iska female literacy se relation hai. Lakshadweep mein 96% log Musalman hain lekin wahan ki female literacy high hai isliye wahan ka fertility rate bahut kam hai. On average Lakshadweep mein ek aurat sirf 1.4 bachche paida karti hai lekin desh bhar mein yeh average two par hai. Ab Bihar jaisi state ko dekh lo jahan par female literacy sabse kam hai isliye Bihar birth rate mein sabse upar hai. Kuchh jagahon par yeh jo localized trend dekhne ko milta hai jahan Muslims ka fertility rate thoda sa zyada hai baaki religions se iske peeche karan bhi literacy rate hai. Kyunki historically Muslims ka literacy rate humesha thoda sa peeche tha lekin ab Muslims ka birth rate sabse tezi se kam ho raha hai. Lekin Pradhan Mantri Modi ko in facts se kya farak padta hai? Unka to ek hi funda hai. Jhooth bolo, jhooth bolo, jhooth bolo. Humein sabhi Hinduon ko jagruk karne ki zaroorat hai doston. Jab yeh dar ka mahoul banane ke liye inke paas asli khabrein khatam ho jati hain to yeh jhoothi khabrein phailana shuru kar dete hain. Shraddha Walkar ke case mein Rashid Khan naam ke ek aadmi ka case nikal kar aaya tha. Ek on-ground news reporter ne Rashid Khan naam ke ek aadmi se baat kari jo Shraddha Walkar ke murder ko justify kar raha tha. Uske khilaaf ek FIR darj kari gayi aur jab police ne use arrest kiya to pata hai kya pata chala? Us ladke ka naam actually mein Vikas Kumar tha, Rashid Khan banne ka natak kar raha tha. Ek aur aisa hi case samne aaya jab ek Facebook post viral hone lagi Raziya Bano naam ke username ke sath. Is post mein justify kiya ja raha tha ki Hindu aurton ke khilaaf kuchh ho to woh theek hai, revenge hai. Kuchh Hindu accounts ne badi outrage kari isko lekar ki yeh Musalman hum logon se itna nafrat kyun karte hain? Aur jab is cheez ka fact check kiya gaya to pata laga ki username galat tha. Raziya ki jagah Rajiya likh rakha tha aur profile pic ke bare mein search kiya to pata chala ki yeh Raziya ke username ke peeche ek Pawan Sharma naam ka aadmi tha. Is bande ki ek aur post mili to kisi ne comment kar rakha tha, Sharma ji naam kyun badal liya? To us aadmi ne laughing emojis ke sath reply kiya, Pawan bhai ab mulli banoge kya? Sorry Mulla. Aur isne reply kiya, just wait and watch dear. Kuchh log nafrat ke pagalpan mein itne andhe ho gaye hain ki yeh khud se nafrat ki khabre phailate hain taaki ilzaam wahan Musalmanon par dala ja sake. Unki image ko badnaam kiya ja sake. Video ke shuru mein maine aapko aise hi kuchh kisse sunaye the. Jahan par Bajrang Dal aur Hindu Mahasabha ke members ne jakar gohatya kari. Aur woh bhi isliye taaki kisi Musalman par ilzaam dala ja sake yeh kehkar ki yeh dekho yeh Musalman log hain jo hamari gau mata ki hatya karte hain. Yahan par ek bahut bahut bada khel khela ja raha hai doston. Jhoothi khabrein kitni zyada phailayi ja rahi hain aap yakeen nahi karoge. Ek user Abhishek Kumar apne aap ko Modi ka parivar kehte hain yeh video share karte hain jahan par kuchh ladkiyan ek aadmi ke peeche bhagkar use danddon se maar rahi hain. Likha jata hai video kahan se hai yeh pata nahi, lekin yeh dekhkar bahut achha laga ki Hindu betiyon ne love jihadion ko sabak sikhana shuru kar diya hai. Agar search karke dekhoge yeh video kahan se hai? Uttar Pradesh ka yeh incident hai 2018 ka aur jis aadmi ko mara ja raha hai uska naam hai Kapil Chauhan. Kyunki woh ladkiyon ko chheda karta tha. Baat yahan par yeh nahi hai ki Muslim eve-teasers nahi ho sakte, bilkul ho sakte hain. Aise bhi Muslims honge jo apni identity Hindu namon ke peeche chhupakar rakhte hain aur Hindu ladkiyon ko trap karne ki koshish karte hain. Jaise ki July 2022 ka case, UP ke Azamgarh mein. Aise bhi Muslims hain jinhone Hindu mandiron ke samne kuchh galat kiya hai. Jaise ki yeh West Bengal temple ka case jahan par ek Muslim aadmi ne uske samne peshab kar diya tha. Lekin baat main yahan par yeh kehna chah raha hoon ki law and order humesha kaam karna chahiye. Har insaan ko punishment milni chahiye lekin aapko jo dikhaya ja raha hai woh sirf ek side ki khabrein dikhayi ja rahi hain. Aur yeh jo nafrat phailayi ja rahi hai yeh sirf Musalmanon ke khilaaf nahi hai balki BJP ke khilaaf jo bhi awaaz uthata hai uske khilaaf similar tareeke se campaign chalayi jati hai. Example lekar dekh lo Congress ka. Yeh khabar suni hai aapne ki Congress leader Rashid Alvi ne Ram bhakton ko Rakshas kehkar bulaya.
[21:58]After Salman Khurshid another Congress leaders sparks row. Congress neta Alvi compares those chanting Ram bhakts to demons. Rashid Alvi sahab ne bola ki yeh jo Jai Shri Ram bolte hain yeh sab Rakshas hain. Lekin yeh sarasar jhoothi khabar thi. Sach baat yeh hai ki Rashid Alvi actually mein baat kar rahe the Ramayan ki jab Meghnad se ladte hue Lakshman unconscious ho jate hain aur Hanuman unke liye jadi-booti lekar aate hain. Ravan kuchh Rakshason ko bhejta hai jo apne aap ko ek Sadhu ki tarah disguise kar lete hain. Kuchh aise Rakshas jo khud Jai Shri Ram ka naara lagate hain. Yahi cheez unke dwara kahi ja rahi thi ki yeh kuchh log jo Ram ka naam le rahe hain yeh asal mein Rakshas hain Sadhuon ke phase mein. Woh apsara ban jati hai aur woh Hanuman ji se kehti hai, Hanuman, kyun waqt kharab kar rahe ho? Tumhein to suraj nikalne se pehle jaana hai sanjeevani booti lekar aur yeh jo samne baitha hai Jai Shri Ram keh raha hai, muni nahi, yeh nischay gora. Yeh muni nahi hai yeh to ghor Rakshas hai.
[22:57]Main aapse bas itni baat kehke aapse vida loonga ki aaj bhi bahut log Jai Shri Ram ka nara lagate hain woh sab muni nahi woh nishchar hain. BJP wale yeh baat jante the lekin jan-boojh ke inki statement ko clip kiya gaya yeh dikhane ke liye ki Congress Musalmanon ke sath hai Hinduon ke khilaaf bolti hai. Ravish Kumar ke sath bhi yeh cheez aksar kari jati hai. Delhi mein jab dange bhadke the, Shahrukh naam ke ek aadmi ne goliyan chalayi thi. WhatsApp par ek clip katkar dali jati hai jiski upar neeche caption likha jata hai, Aatanki Shahrukh ko bachane ke liye Ravish ne bataya use Brahmin Anurag Mishra. Jo original unedited video hai wahan par Ravish Kumar keh rahe hain, abhi bhi zaroorat hai ki police iski pehchan ko lekar dobara bole. Police saaf kehti hai ki Shahrukh hai, magar aap social media mein dekhiye Anurag Mishra bataya ja raha hai. Abhi bhi zaroorat hai ki police iski pehchan ko lekar dobara bole. Iske baad ek NDTV reporter khud police se baat karte hain aur confirm karte hain ki is aadmi ka naam Shahrukh hi hai. Naam ko lekar koi spashtikaran aaya hai ki naam kya hai? Shahrukh naam hai uska. Ek aur jhooth phailaya jata hai ki Ravish Kumar kabhi Kashmiri Panditon ki baat nahi karenge. Jabki unhone kai baar episodes banaye hain Kashmiri Pandit par, 12 saal pehle se lekar as recent as teen mahine pehle. Lekin kya farak padta hai? WhatsApp par jab logon ko brainwash karna hai to uske liye kuchh bhi bol do. Ek aur accusation jo inke khilaaf uthayi jati hai ki yeh kabhi Congress ke khilaaf nahi bolte. Lekin 2014 se pehle ki inki yeh clip dekho, kai reports mil jayengi jab yeh Manmohan Singh ki sarkaar ke khilaaf awaaz utha rahe hain. Pichhle August mein Ayaz Jhansi ke sher se jawab diya tha tab Koyla Ghotala ke aaropon ki aanch unki sarkaar par aa rahi thi. Saath mahine baad Manmohan Singh ne un sawalon ka jawab diya ya apni aabroo ke liye khamoshi todi hai. Is tarah ke hazaron kamre gaon ki zameen par bana diye gaye aur mazdooron ko bori mein aloo ki tarah inmein thhoos kar rakh diya gaya. Ab mere khilaaf bhi yeh log aise hi jhooth phailate hain. Is WhatsApp message ko dekho, pata nahi kitni baar inhone is WhatsApp message ko apne groups par baar-baar forward kiya hai. Likhte hain ki main ek Hindu hi nahi hoon, mera naam Dhruv Rathee nahi hai. Mera asli naam hai Badru Rashid. Aur itna hi nahi, inhone meri wife Julie ko bhi Pakistani bana diya. Ab neeche dekho kya-kya bakwas likh rakhi hai ki yahan pe Pakistani Army ka connection hai, ISI hai, America hai, Dawood Ibrahim ka connection hai. Kya bakwas likhte hain. Mujhe sunkar hansi aati hai, aapko bhi hansi aa rahi hogi lekin iske peeche ka agenda dekho kya hai. Jo bhi BJP ke khilaaf bolne ki koshish karta hai use kisi na kisi tareeke se Musalman bana do, Pakistani bana do. Kyunki jo overall game yahan par khela ja raha hai woh yahi hai ki Hinduon ke andar dar bithana hai. Aur jo bhi inke khilaaf bole, agar koi woh Hindu bol de na inke khilaaf to woh Hindu ho hi nahi sakta. Yeh apne followers ko, apne brainwashed logon ko yahi dikhana chahte hain ki jo bhi wahan se awaaz utha raha hai inke khilaaf woh Hindu nahi hai, woh sirf Muslim log hain. Jo jhooth yeh phailate hain use yeh double check bhi nahi karte. Ek yeh message tha inka jo phailaya ja raha tha. Abhi kuchh din pehle ek yeh doosra message hai inka jo yeh phaila rahe hain. Is tweet ko dekho. Iske anusar to mere father-in-law hain actually mein Pakistani citizen yaani ki Yuli ke papa. Phir likhte hain ki Yuli iklauti beti hai unki. Yeh cheez bhi jhooth hai. Agar inhone mere vlogs dekhe hote to inhein pata hota ki woh iklauti nahi hai. Matlab kuchh believable to ho jo keh rahe ho lekin unfortunate cheez yeh hai ki jo log brainwashed ho chuke hain inke mafia ke andar aakar unhein isse farak hi nahi padta. Yeh ek logical sensible dikhne wali jhoothi kahaniyan kyun banane mein time waste karein jab inke jo log WhatsApp messages padh rahe hain woh in besir-pair ki jhoothi kahaniyon se hi convinced ho ja rahe hain. WhatsApp mafia ka yeh teesra department kuchh is tareeke se logon ke andar dar bithata hai ki unki sochne samajhne ki shakti bilkul switch off ho jati hai. Isliye bahut zaroori hai logon ko jagruk karna is cheez ke bare mein, especially Hindu logon ko jagruk karna. Kyunki agar kisi ko sabse zyada bewakoof banaya ja raha hai yahan par to woh hum Hinduon ko banaya ja raha hai. Is mafia ke do aur departments bachte hain. Aane wale videos mein unko bhi gehrai se samjhenge lekin tab tak kaam rukna nahi chahiye. Hamara yeh sangharsh desh ke samvidhan ko bachane ke liye hai. Desh ke loktantra ko bachane ke liye aur agar aap un logon mein se ho jinhein abhi bhi lagta hai ki nahi desh mein sab theek chal raha hai, desh mein koi tanashahi nahi hai. Yeh to zara kuchh din pehle ki is khabar ko dekh lo zara. Surat ki Lok Sabha seat par kya hua? Congress ke candidate ko disqualify kar diya gaya aur wahan ab baaki aath candidates ne kisi na kisi bahane se withdraw kar liya. Yaani ki election hone se pehle hi BJP ne yeh seat jeet li. Imagine kar sakte ho doston laakhon log jo Surat mein rehte hain unka loktantrik adhikar unse is tarike se chheen liya gaya. Itna hi nahi, Arunachal Pradesh mein bhi aisa hi kuchh hua. BJP ne 10 seatein already jeet li wahan par election hone se pehle hi. Aur is khabar ko dekho jahan par Delhi mein woh chunav haarne wale the, unhone election hi nahi hone diya MCD ki. Isse pehle Chandigarh ki election mein seedha-seedha fraud karne ki koshish kari gayi thi BJP ko jitane ke liye. Matlab samajh rahe ho aap is sab ka doston? Jo pehle Chandigarh mein hua, jo aaj Surat mein hua, woh kal poore Hindustan mein hoga agar inhein isi tareeke se jeetne diya gaya to. One Nation One Election to sirf dikhawe ka funda lagta hai. Agar desh isi tareeke se aage badhta raha to yahan par jald hi One Nation Zero Election hogi. Chunav hone se pehle hi BJP ke candidates jeette jayenge. Kya aap aisa desh dekhna chahte ho jahan par election ke koi mayne hi na reh jaye? Is chunav mein doston humein apni poori jee-jaan lagani hogi desh ke loktantra ko bachane ke liye. Maine to apna poora career yahan dav par laga diya hai kyunki main chup nahi baith sakta. Main desh ko aisi halat mein girte nahi dekh sakta. Isliye main baar-baar keh raha hoon, apni awaaz uthao kyunki shayad dobara kabhi mauka na mile. Teen steps main aapko dobara se batana chahunga. Step 1: mere WhatsApp channel ko jakar join karo. Iska link is QR code mein mil jayega ya link description mein bhi hai. Agar yeh link aapke liye khul nahi raha to WhatsApp app ko update karo apne phone par. Channel join karne ke baad bell icon dabao notification ka. Hamara mission hai 100 crore hum WhatsApp par ek aisi aandhi lekar aayenge sach ki ki inka yeh pura WhatsApp mafia dab jayega. Step 2: vote karna mat bhoolna vote karna bahut bahut zaroori hai. Apne parivar mein, apne doston tak yeh cheeze pahunchao. Aur Step 3: jitna aap apne aas-pas ke logon ko jagruk kar sakte ho, karo. Videos banake karo ya gharon se bahar niklo. Gaon mein jao, mohallon mein jao, sadkon par ghoomo, logon tak yeh sandesh pahunchao ki desh kitna khatre mein hai. Mujhe nahi pata ant mein hamari yeh koshish safal hogi ya nahi. Lekin ek baat zaroor pata hai mujhe. Main apne aap par humesha garv karoonga ki main chup nahi baitha raha. Maine apni taraf se poori koshish kari, akhri dam tak koshish kari. Jai Hind.
