[0:00]القصة ديالنا بدات مع جمال في 2010 ماشي ظروف واحداث اللي غريبه كيقول جمال انا في الاول كنت عايش واحد الحياة هادية مع با ومي واختي اللي صغر مني. كان في عمري 21 سنة واختي 16 عام وهادشي اللي عاود لكم اليوم داز عليه اكثر من 10 سنين ومازال لحد اليوم كنخلص. وما بغيتكمش بصراحه تلوموني على هادشي اللي غادي نعاود لكم اليوم بغيت ندخل نيشان في القصة اللي عاود لنا جمال حيت فعلا الا كان هادشي بصح الله يحضر السلامة من هذا الفيديو وصافي. بلا ما نطول عليكم توحشتكم ومطلوب اليوم 10000 لايك
[0:37]كيقول جمال باش نكمل لكم اشنو كاين والصورة توضاح في عينيكم با سميتو عباس وامي سميتها نعيمه وبا في هذا الوقت كان جيبو ديما عامر. ما مقصرش من جهته الحق يتقال الحوايج الماكله بطبيعة الحال وداكشي كامل ويزيد يعني اللي بغيناها اللي حلينا فيها فمنا كيشريها. حنا مازال صغار ماشي هذاك الصغر ولكن من صغرنا ما كناش مسوقين اساسا اشنو خدام بانا. ما عارفينش اشنو خدام كيسولنا الناس ما كنعرفوا ما نجاوبوا كنقولوا خدام اعمال حره اي هضره وما كناش مسوقين بصراحه المهم انه كنا عايشين بخير هذا الشيء اللي بغينا. امي على حسب هذاك الشيء اللي فهمت كانت بحال ديما مضاربه معه على الفلوس منين جاءوا يعني شنو هو المصدر ديالهم. ديما كتسول الراجل منين جاءوك الفلوس كيفاش علاش بزاف ديال الاسئله با كيقولها لا لا ياك ما خصكش خير ياك ما ما وقعش شي مشكل فباركه من هذه الاسئله بزاف وصافي زعما نقلب الموضوع. امي راه ديما كتنكر عليه ما عمرنا شفناها فرحات انه مثلا حقق واحد النجاح فاش كنقول نجاح كنقصد المادي يعني كيجي شي نهار كتكون كيكون جيبو عامر نيت. الدار اللي كنا ساكنين فيها مثلا اللهم بارك كل واحد البيت دياله بطبيعة الحال وكاينين بزاف البيوت اساسا ما كانش الضيق. بصراحه بالعكس كنا عايشين واحد الحياه مرتاحه اكثر من القياس حتى ماكلتنا لباسنا اي حاجه متعلقه بنا فين كنقراو فين قرينا كان كل شيء ديال الناس اللي لاباس عليهم. واخا حنا اساسا ماشي من عائله اللي لاباس عليهم يعني كتشوف اعمامي خوالي كلهم على قد الحال اشرح لكم اكثر لانه مهم بزاف في هذه القصه اليوم كل واحد نعرفو بلان وكيفاش كيفكر. امي مثلا النقيض ديال با كانت واحد المراه اللي متدينه وداخله سوق راسها وعندها غير مع نيشان المعقول ذره ديال الشك في شي حاجه انت كديرها خايبه. تقلب عليك وغادي تحيع عليك وتبقى مدابزه معك باش تصلحك اما با فراه كان ديما ضاحك حاجه زوينه بطبيعه الحال ولكن كان ضحك بلا قياس. تقول ديما مهز النشاط والضحك ما عمرك تشوفوا مغوبش بعدا واخا الا شفنا المنظر دياله بصراحه كان كيخلع با راجل اللي قد تبارك الله. انا ما عرفت شنو وقع لي ما طلعتش بحاله ولكن المهم هو كان مختلف كان طويل عرض ولابس الخواتم واللحيه طويله والتسبيح. المهم كان واحد الراجل من الشوفه كي كيخلعك شي شويه كيهيب عليك لدرجه انه انا في صغري فاش كان كيجي عندي المدرسه ولا غير فاش كنشوف هكا فصافي في الليل كان كيخلعني. عنده واحد الهاله غريبه نبقى نوصف لكم من اليوم حتى لغدا ما غاديش نسالي معها هذه ماشي حاجه خايبه هذا الشيء اللي اعطى الله هو داير بحال هكاك خلقوا الله بحال هكاك ما عندنا ما نديروا. الحاجه اللي خايبه بصح هي البليه دياله با كان مبلي الله يحفظنا ويحفظكم وديما مضارب مع امي. بزاف ديال البليات كنهضر على هذاك الشيء اللي كيتشرب وكيتكمى راكم فاهمين ما عرفتش واش بسبب الفلوس انه دار فلوس دار في يدي الفلوس فاش كان صغير ما كانتش عنده الفلوس. بصراحه ما عرفتش ولكن غادي نعرف من القدام المهم واللي كنظن انه منين بدا المشكل هو انه هو ومي كانوا كيتضربوا بزاف على المصدر ديال الفلوس. وكتبان انه هي عارفه منين كيجيب هذيك الفلوس وما حملاهاش ولا يمكن كانت خايفه علينا وكنظن غالبا الخوف الخوف ديالها خلاها تبدا تعامل معها بحال هكاك. كنشوفهم ديما مضاربين في ما كيتضربوا كنقولوا هذه ماشي اول مره ولا غادي تكون اخر مره انا واختي مع كبرنا شي شويه كنا مولفين هذا الوضع. كنتسناوا هذا المسلسل اليومي باش نتفرجوا لدرجه انه الا ما تخاصموش كنقولوا واش ياك لاباس ياك ما شي واحد فيهم مريض بالعكس كنتخلعوا. حنا ما كناش اصلا عارفين اشنو واقع ولا كنا مهتمين وكون غير ما عرفناش المهم دارنا كانت في سميتو با بزاف الحوايج مثلا الفلوس ما كنعرفوش فين مخبيهم. وحتى كيخبي شي شويه في الدار كيخبيوهم في البلاكار عنده كلشي ديال با المهم ما عندها والو من اللخر ولا حنا بطبيعه الحال انا مازال كنقرا في لافاك واختي مازال صغيره. تقدروا تقولوا باك متسلط نقول لكم لا با عباس من داك الشيء اللي كنشوفه بالعكس يا ما دار حوار بينه وبين امي قدامنا على انه يكتب لها شي حاجه يكتب لنا حنا شي حاجه هي ما كتبغيش. بتقول لي بالحرف الحرام ما عندنا ما نديروا به هذه الجمله اللي ما فهمناش علاش امي كتقولها واش با خدام مع المافيا الله اعلم. ورديت البال انه مع الوقت مع العمر وحنا كنكبروا با كيكبروا في الاول ما كانش كيتاثر بهذا الكلام ديال امي. وشويه بشويه بدا كيتاثر بكلامها يعني كان كلشي مزيان وكل ما با كيتاثر بالكلام ديال امي كل ما ولا غادي وكيولي معصب. حتى وصل لواحد المرحله ما بقاش كيخرج من الدار با عباس اللي كان كيخرج بكري وبعض المرات ما كيجي حتى للغد عليه في الصباح دابا ما بقاش كيتحرك من بلاصته. وزيد عليها با اللي ما كانش كيغوت علينا ولا دابا كيغوت علينا بسبب وبدون سبب تقدر غير تحل الباب ويسمع شويه ديال الصوت يدير لك محاضره. وبعض المرات يقدر يضربك ضربه خفيفه ولكن كيضربك وحنا صغارنا كامل ما عمره ضربنا ادخل الكوزينه تشعل هذاك الضوء هو من البيت لهيك كيبدا يغوت اشنو كدير اش مشيتي دير في الكوزينه. المهم هضره بحال هذي اي حركه تحركتيها كتجي معها بزاف ديال الاسئله با عباس اللي كان غير كيضحك ناشط معنا ضارب الدنيا بركله ولا واحد اخر. كيفما قلت لكم انا ما بقيت فاهم والو كنلاحظوا هذا التغيير في با ولكن علاش ما عرفناش كنا كنقولوا يمكن بسبب امي هذيك الهضره اللي كتقول له مع الوقت كثرت النكر بطبيعه الحال غادي تبدلك. امي ولات هي اللي واكله العصا بداو كيتخاصموا بزاف لدرجه انه كيخلي الشتا ديال بصح ولا واحد المرحله كيضربها بزاف با اللي كان مستحيل يمد يديه على شي مره ولا على ولاده ولا على اي واحد ما يمكنش. انا كنت كنكره فاش كان كيضربها وكندافع عليها وكيجمعنا بجوج المهم هذا الشيء اللي اعطى الله مع جمال كيقول انه بالنسبه لي امي ما تضربش ما يضربها حتى واحد وما يمكنش نبقى غير كنشوف وماندير والو. قلبتني ضني فاش كنشوف دموعها وكيفاش كتبكي كتقول لي بعد مني خليني اعطيني اتساع وداكشي اللي خاصه يجي غادي يجي يبدا اكبر لغز في حياتنا. با غادي يخرج ما غاديش يبقى يرجع. قبل ما يخرج من الدار بدا كيقول كلام اللي ما مفهومش خاصني نهرب منهم خاصني نتخبى منهم عندك يشدوني غير بوحده قافز. حنا قلنا يمكن هذه غير هضره خاويه غير كيدوي بحال هكا حيت كان شويه مبلي بشي حوايج خايبين كل مره كيعاودها كيعاودها خاصني نهرب خاصني نهرب. واش يمكن شي وحدين حال فينا فيك بحال كنكون خدام في ذاك الشيء ديال الممنوعات الله اعلم المهم با كان كيشرب بعزكم الله في كل زمان ومكان. فما كناش كنفهموا اشنو كيقولوا اشنو كيقصدوا واش كيدوي بصح ولا لا انا اللي كيصدمني هو امي اشنو كتقول له كتقول له دير هنينا. راه صدعتينا بلا قياس كتقول له قهرتني في صحتي وفي ولادي كون غير تمشي كون غير تمشي الراجل وتهنينا دير دير هذا الخير هذا. وهو فاش قالت له بحال هكاك جمع حوايج مشى وما عمره رجع السيد غبر غبره وحده تقول بلات الارض طبعا امي قالت لي بحال هكاك ولكن ما غاديش تمنى الاديه لب ولادها ولا انه يتوضا في شي بلاصه ولا انه يمشي لشي بلاصه وحتى واحد ما يعرف عليه شي حاجه. فبدينا كنقلبوا عليه من هنا من لهيه والو تسناوه نهار وجوج وثلاثه شهوره وما جاش تما حسينا انه صافي با ما عمرنا غادي نشوفوه وهذا اللغز ديال فين مشى ما عمرنا غادي نفكوه. وبحال كان ناويها من الاول هو كان داير في باله انه يمشي ما يرجعش ومده طويله قبل كيهددنا كيقولنا انا غادي بلا رجوع وهي الهضره. وكان كيقول لنا واحد الكلام اللي خطير بزاف خصوصا فاش كيكون شو كيقول لنا الا ما مشيتش غادي يقتلونا كاملين شكون هما ومالهم معهم في هذيك الوقت حتى واحد ما كان عارف. وصل لواحد الحاله اللي صعيبه مهما يكون كيبقى هذاك با وما نبغيش ليه الاديه كيف ما كانت ومن هذه اللحظه فاش با مشى الامور غادي تبدل 180 درجه.
[8:27]امي من هذه الساعه ولات نتحمل المسؤوليه غير بوحدها مسكينه وكانت حالفه كتقول لك قسم بالله ما غادي ناخذ سنتيم من اي حاجه دياله هنايا يعني بالنسبه لها كان اهون مليون مره نعاودوا من الزيرو ولا نعيشوا واحد الحياه اللي هي بالنسبه لها ما زويناش. ولات خدامه في بزاف ديال الحوايج اي حاجه بعض المرات الطياب بعض المرات الميناج اي حاجه باش توكلنا وتوفر لنا داكشي اللي بغينا كانت بحال باغا تدخل لنا عايشين في نفس المستوى اللي كنا عايشين فيه. تقولوا لي انت كبير بحال هكا وما تعاونش بالعكس بغيت نعاون وبديت كنعاون بالتخبيع امي كانت رافضه واحد الرفض كامل انه نمشي نخدم ونخلي قرايتي. هذا الشيء علاش كنت كنخدم بالتخبيع وبا اللي كان طول بعرض وكان كيوحل معاه بقيت غير انا اختي بوحدها اللي كانت عارفاني خدام كانت كتغطي عليا فكنت كنحتاجها وعاودت لها اشنو كاين. اما امي فلا قلتها لها ما غاديش تخليني نعاونها انا عارفه شويه بشويه كيدوز الوقت الامور كتزيد تعقد الدار اللي حنا جالسين فيها اللي كبرنا فيها تقريبا ولاو حتى هي ولات فيها الحياه في شكل. بغينا نرحلوا امي بغات ترحل وما لقيناش كيفاش ما كاينينش الفلوس ومع المصاريف وغير داكشي ديال الضوء الماء كل شهر صعيب. وقبل ما نلحقوا انه نجمعوا شي بركه ونقدروا نخرجوا من هذا الدار اعمامي يهجموا علينا خرجوا العيب نيشان جاؤوا كاملين هما كانوا عايشين الميزيريا قبل. والوالد ما كانش كيعقل عليهم بصراحه وقالوا دابا خاصنا ناخذوا الدار انت قالوا الامي انت هي السبب انه طش يعني فجاه ولاو كيموتوا على با وانا عارف انه با واخوته بيناتهم المشاكل. امي قالت لهم حشومه عليكم انا باغا نخرج ولكن ما عنديش كيفاش ندير فين غادي نمشي انا ولادي دابا وثانيا باش من حق تقولوا لي نخرج من الدار. هما كانوا كيقولوا الامي شوفي راه الا ما خرجتيش راه غادي نقولوا بلي انت درتي شي حاجه لرجلك يعني صفيتيها لي ولا شي حاجه وحنا كاملين غادي نشاهدوا. كانوا كيهددوها من اللخر انه يا هي باقي عاقل مزيان كيفاش واحد عمي قال لها سيروا للزنقه راه زوينه وغادي تعيشوا فيها مزيان غتعيشوا فيها مخيرين انت اصلا تكوني جايه من الزنقه. قال لها دي ولادك معك وسيروا للزنقه احسن لكم امي كتشوفوا ساكته عينيها فيها الدموع وكترج فديك الوقت كتقول لي الله يرحم الوالدين غير شويه ديال الوقت انا ما بغاش هذا الشي اصلا. غادي نخلي لكم كل شيء ونمشي ولكن شويه ديال الوقت نجمع شي بركه انا ديك الساعه كنت كنغلي للداخل ما كرهت نشد هذا عمي ونبرد فيه كاع داكشي اللي فات. السيد طمع علينا في هذه الخربه اللي احنا اساسا ما باغيناش وغير داك الشيء اللي فيها يكفي هذا الدار واخا كبيره وزوينه ومخصوره عليها فلوس فيها واحد الطاقه سلبيه خايبه. الدار كتحرك بزاف يعني واخا ما يكون حتى واحد ديما كتسمع شي قرقيب ديما شي حاجه ماشي في بلاصتها المهم شي حوايج في شكل بعض المرات اصوات ديال الجيران واخا ما كاينينش حدانا الجيران. لدرجه انه واحد الوقت هذا الشيء في الوالد فاش كان معنا ديما مع 12 ديال الليل كنسمعوا البكي ديال واحد الوليد صغير هذاك البكي ولا مع الوقت بحال شي حاجه ضروري ديما 12 ديال الليل كنسمعوه. قلنا بلي غالبا جيراننا اللي واخا بعدا يكون عندهم شي وليد الله اعلم و فاش كنسول ما كيقول والو ولا جاوب كيقول لي يمكن الجيران. وانا عارف انه الجيران ديالنا بعدا وعارف بلي ما عندهمش ولاد صغار عاد زيد عليها الطاقه السلبيه كيف ما قلت لكم في الدار حتى واحد فينا ما كان مرتاح كتحس براسك مخنوق كل شيء باغي يطرش. كتجلس في الدار نص نهار كتحس براسك باغي تموت انا مع الوقت ما بقيتش كنفكر بزاف في هذه التفاصيل هذا الشيء اللي كيوقع وليت كنشوفه عادي يعني باختصار الدار ديالنا كانت فعلا مرعبه وكتخلع. وانا كنت باغي نشوف وجه عمي فاش يعيش نفس هذاك الشيء اللي كنا كنعشوا احنا من بعد هذا الشيء اللي طرا هذا التهديد انه كيجوا عندك يوميا بعض المرات كي جلسوا لك قدام باب الدار ما كيتحركوش خوينا لهم الدار ومشينا كرينا. كرينا واحد البيت اللي صغير على قدنا ما يمكنش تخيلوا كيفاش اعمامنا كانوا كيتصرفوا معنا واحد قله الاحترام ما كاينش الرحمه تقول احنا اعداء ديالهم ما عرفتش اشنو كان واقع بين با وبينهم له الدرجه راه بزاف. طبعا كيف ما قلت لكم في الاول ما كانوش عندنا الفلوس باش نكروي امي حلفت على راسها انها تكون اول مره واخر مره غادي تستعمل الفلوس اللي كان عطاها راجلها وهو داك الذهب اللي كان عندها اللي جاب لها كل شيء باعته. وخلصت تقريبا الا عقل اربع شهور من ديال الكراء من داك الذهب اللي بعد قالت لنا بلي هكا غادي نرتاحوا شي شويه نتنفسوا واحد الوقت واللي بقى غادي يكون ديال المصاريف يعني اللي شاط من الفلوس. وداكشي اللي كان ربي كبير الحمد لله بشويه بشويه بدينا كنولفوا هذه العيشه اللي ولينا كنعشوا دابا انا عادي بالنسبه ليا الدراري كيكبروا كيقدروا يديروا حياتهم ولكن اختي ما كانش ساهل. اختي بالنسبه لها كانت واحد الحاجه تبدلت بزاف وكانت متعلقه ببا فتصدمات وما قدرتش تقبل هذه الحياه الجديده غير مصدومه من صغرها وهي مدلعه فكانت اي حاجه كتشوفها كتصدم. احنا خرجنا من واحد الحي اللي كيقولوا زعما راقي ودزنا لواحد الحياه بسيطه في حي شعبي اللي الطريقه باش كتمشي فيه الامور مختلفه. وهي ما كانتش مولفه كتشوف اي حاجه كتجيها في شكل وكتبقى واقفه كتفكر فيها اصوات ديال الناس بزاف الهضره بزاف الحركه واللي كيبيع وشي كيعرف شيء. انا كنقول لها شوفي اختي خاصك توفي هذه حياتنا جديده وما بهاش زوينه عندها حتى هي المساوئ ديالها والحوايج زوينين ما عندنا ما نديروا انا عارف انه صعيبه شويه في الاول ولكن هذا الشيء اللي اعطى الله اختي. ومع الوقت سبحان الله كتبدا فين ما حطيناك كتولف بالعكس كتحس اللحظه انه تما هذيك هي بلاصتك وهذا الشيء اللي وقع بدينا كنلفوا كل شيء كل شيء ولا غادي مزيان والامور غاده وكتولي احسن حتى لواحد النهار غادي تبدل كل شيء. قلت لكم في الاول انه امي متدينه بالعكس ديال با على هذا الشيء اللي شفنا وكانت انا واختي دايرين لنا المراقبه ضروري نصلوا في الوقت كانت راده البال مع الصلاه بواحد الشكل اللي كبير. مستحيل نكونوا جالسين والاذان كياذن مهما تكون كدير كتخلي هذاك الشيء اللي كدير كتنوض توضا وتصلي طبعا حاجه زوينه ولكن كنقول لكم فعلا امي راه لواحد الدرجه ما تصورهاش. مهما تكون كدير كنقول لكم اول حاجه دير نوض توضا وتصلي ولكن انا دابا في هذا الوقت مازال ما ساليت قرايتي ومع الخدمه ما كيبقاش لي ديما الوقت انني نصلي في مع الاذان فبديت كن زيكزكي شي شويه. ولات مع الوقت كتجمع لي الصلاه كنصلي كل شيء حتى الليل والعجز حتى هو داير خدمته وانتم عارفين فاش كيكون العجز كيبداو معه المصايب. ومع العيال الخدمه نهار ومطال والقرايه بديت كنعجز حتى على الصلاه ديال الفجر مره نصلي في الوقت 10 ما نصليش كنقول حتى الصباح حتى نوض حتى نمشي للخدمه. ومن هنا حياتي بداوا كيوقعوا فيها حوايج اللي ما زوينين بديت كنشوف احلام كثيره وكنسمع حتى اصوات في ودنيا صوت قريب بحال شي واحد حدا ودنيا. الاحلام اللي كنشوف هي نفسها اربع ديال الرجال كحلين كيقولوا لي نفس الهضره خاصك تكمل كيقولوا لي خاصك تكمل يا ولد عباس. انا ما كنت فاهم والو وثانيا الحلم اشنو غادي نفهم ولاش غادي نفهم اساسا وما كنتش كنحاول نقلب على تفسير باش ما يتحققش هذا الحلم لانه فعلا هذوك الاربعه كانوا كيخلعوا. المهم ما كنت فاهم والو في نفس الوقت ما كنتش عاطي اهميه لهذا الموضوع علاش هذا الحلمه كتعاود علاش هذا الحلمه بالضبط شنو المعنى ديالها وحتى امي ما قلت لها والو لانه الا قلت لها غادي تقول لي كدير شي حاجه خايبه وهذا هو السبب. غادي تقلق مني وغادي تبدا ترد معي البال بزاف على انه نصلي في الوقت نقرا القران المهم هذا الشيء والغريب انه هذه الاحلام بقوا كتعاود كتعاودوا حتى رجعت كنصلي مزيان في الوقت وكل شيء هو هذاك. كل ما كنذكر الله كل ما اموري الدنيا مزيانه كل ما هذ الاحلام كيغبروا من حياتي واش كان فعلا بسبب انه الصلاه ديالي ما كانتش هي هذيك ما عرفتش. كنت خايف من شي حاجه وشي حاجه فيا للداخل كتقول لي نوض وتصلي راه تقدر توقع لك شي مصيبه كحله الا بديتي كتخربق بحال هكا وبلا ما نحس لقيت راسي نضبط اكثر من الاول. هادشي كيفما قلت لكم ما عاودت لى حتى واحد لا لمي ولا لاختي واساسا ما عطيتوش ديك الاهميه عاوتاني مره اخرى الوقت كيدوز كيتزادوا المصاريف وحالتنا الماديه غاده وكتصعب. الفلوس ديال خدمتي ما كانوش كينفعوا بزاف ما يمكنش تقرا مزيان وتخدم مزيان في نفس الوقت ضروري باش تدير هذا التوازن كيكونوا فلوس قلال والقرايه ما كتكونش احسن حاجه. ومي فاش كتسمع فاش كتشوفها اعطيتها الفلوس كتقول لي منين جبتي هذا الشي منين دبرتي عليه كيفاش البلان ياك ما قرايتك هاملها كنقول لها لا راه غير كنبريكولي وفي قرايتي نيت زعما كندير بحال السوايع المهم في هذه الوقيته كانت امي تعرفت على واحد السيده هذ السيده خدامه في الاعراس. هذه المراه عندها فرقه ديال العونيات كتحي الحفلات عيد ميلادات الاعراس اللي بغيتي ولات واحد الوقت ما عرفت كيفاش امي ضربت عليها كتجي عندنا بزاف وبصراحه ما كنتش انا مرتاح لها. كانت غريبه في شكل شي حاجه ما مفهومش انتم عارفين المحبه من عند الله والكره حتى هو من عند الله كاينين الناس اللي ما كترتاحش لهم من الاول غير هكاك لله في لله. وهذيك الايام فاش كانت القضيه ما ازمه كانت جات عند امي وجابت لها واحد القفطان صفر قفطان صفر وشي حوايج هذاك الشيء ديال العيالات انا ما عارفوش مزيان كل شيء صفر تقريبا حوايج ديال البنات انا ما عرفتش السميه ديالهم. قالت لها شوفي اختي نعيمه الا بغيتي تبري على راسك في هذه الازمه يلاه تخدمي معايا امي قالت لها لا لا لا لا اختي انا ما كنعرفش له ذاك الشيء وغادي غير نخرج عليكم ونضحك فيكم الناس. ما انا عرفتها تكون حشمه وما بغاتش تقول لها بلي هذاك الشيء حرام وانا مستحيل نديروا المهم انه هذا الاسبوع كامل هذه المراه كتجي عندنا تقريبا يوميا وكعود تسولها نفس السؤال واش تخدمي معايا وكذا وامي كترفض. رافضه هذه الفكره ما داخلاش لها الراس حتى لواحد النهار مول الكرا جاء وكيضق علينا وكيغوت قال لها شوفي لاله انا قبلتك وانت بلا راجل قبلتك انك تسكني في الدار فعلى الاقل الشهر ديالي ما تعطلش عليا كيف ما كل مره. قال لها شهرين ما خلصتيهم دابا وكل مره كتعطيني شي حجه كيف ما كانت واش ما كتحشميش امي بقات تسيس معها كتقول لها كتشوف الظروف هذا اللي كاين و اللي كاين ان شاء الله قريب غادا غادا نحط لك فلوسك صافي ومن تما مشى. وقبل ما يمشي قال لها عندك ثلاث ايام باش تخلصين ولا حوايجك غادي تلقيهم برا وطبعا انا كنت كنسمع بحال هكا ما كانش كيعجبني هذا المنظر انا كنشوف كنسب في با كنسب في اعمامي كنسب في هذه الظروف اللي خلتنا نوصلوا هذه الحاله. وكنا كنتسائل انا واختي ديما فين هو با اشنو كيدير علاش مازال ما بانش لحد الان وهذا الشيء كامل كان كيقربني من واحد المصير اللي مجهول. في هذه الليله كنا درنا اجتماع على هذا الشيء اللي وقع مع مول الكرا وامي قالت لنا بلي كاين عندها حل واحد هو انها تخدم مع هذيك المراه لاله زهور. انا كنقول لها امي واش من نيتك مستحيل نخليك تخدمي معها ما يمكنش تمشي اخر ايامك تبدلي هذيك التبديله قالت لي شوفي ولدي انا اللي كبرتك وعارفه شنو كندير وكيفاش الامور غاده وما تخافش عليا لا انا لا اختك. قلت لها شوفي امي انت على راسي وعيني انا ما نقدرش نتحكم فيك ولكن اختي مازال صغيره لا اختي الصغيره مستحيل نخليها تمشي لهك الشي ديال الشطيح ورديح ما يمكنش. امي قالت لي ما عندك منين تخاف راه طبعا مستحيل هذا الشيء غادي تمشي غير باش تفوج وتبدل الجو الا بغات اما تنوض تخدم معنا لا وحتى انت ولدي الا بغيتي تمشي معنا يلاه راه لاله زهور ديما واخذه معها ولادها. في نفس الوقت ما عرفتش شنو مزيان انه يكون معنا راجل وهكا حتى انت غادي تكون مرتاح غتكون عارفنا شنو كندير ما غاديش تبرزت علينا ولا تبدا تخيل افلام في راسك نغلبوا الوقت. هذا الشيء اللي غادي نقول فين كنا وفين ولينا قلت لها واخا اش غادي نقول واخا نيت نمشي معكم ونرد لكم البال انا ديك الساعه مازال كنقرا ولكن انا راجل ديال الدار ومستحيل نسمح بلي كرامتنا تقاس وديك زهور بالخصوص ما كانتش مفهومه كانت غريبه وما عجبانيش ما داخلاش لي الراس.
[20:15]كنت خايف على امي واختي منها كنت خايف انها تاذيهم ومره اخرى عاوتاني جات وجابت هذاك القفطان الصفر وقالت الامي يلاه تخدمي معنا امي قالت لها واخا واخا لاله زهور ما غاديش نردها في وجهك اصلا هذا هو الحل اللي بقى لي قالت لها احنا ما كنديروا شي حاجه خايبه ولا شي حاجه ماشي هي هذيك غير تهناي. غادي تخدمي حتى واحد ما يقرب لك واكله شاربه واخده رزقك وترجعي لداركم معززه مكرمه امي قالت لها واخا ان شاء الله يكون خير حست انه العالم كامل كيتامر علينا باش نوصلوا لهذا الشيء اللي وصلنا ليه.
[20:45]وقالت لي على القضيه ديال انه انا واختي نمشوا معها وهذيك المراه ما رفضتش بالعكس قالت لها مرحبا الله اودي مرحبا بولادك انا بغيتهم يجوا بغيتي تديهم معنا يلاه اصلا ما خصهمش يبقوا بوحدهم. نيت ياكلوا ويشربوا ويبدلوا الجو ويضحكوا وغادي يعجبهم الحال انا كنت حاس وكل ما هي كدوي كنحس اكثر باللي كاينه مصيبه كحله وراها ودارت عند اختي قالت لها لبسي قفطان زوين وديري شي كحل. انا كنت كنقول علاش قالت لها بحال هكا بالضبط شنو هي المناسبه ياك ما انا ما فاهمش هذا الشيء اللي كيوقع بين العيالات وانا واختي غاديين غير نشوفوا نتفرجوا ليش هذا الزواق كامل. قالت الامي بلي اليوم كاينه الخدمه مع العشره ديال الليل وماشي اي خدمه ضروري انك تلبسي الصفر قالت الامي باستغراب علاش اختي شنو كاين قالت لها هذا الشيء اللي كاين. دير هذا الشيء اللي كنقول لك وان شاء الله غادي يكون خير قالت لها من بعد وغادي تعرفي ونضت ومشات وكون غير ما عمرها جات اساسا هي مشات امي ناضت وجدت راسها وحتى اختي كانت فرحانه باغا تبدل الجو. وانا كنشوفهم بحال هكا عاد ما كنزيد نتحمس باغي نمشي ونشوف اشنو كاين تما علاش بالضبط هذه التفاصيل هذو فاش كنتفكر هذا الشيء ورجع بالذاكره كنقول شنو هذه المصيبه كنت كندير في ذاك الوقت وغادي تفهموا علاش كنقول لكم بحال هكا. حن هذا الشيء اللي احنا فيه دابا راه مصيبه كحله وامي واختي وجدوا وبصراحه فاش شفت امي جاتني البكي اول مره نشوفها لابسه بحال هكا امي زوينه متدينه وديما مستوره. ما كنقصدش انه ما بغيتش نقلب ادبي ولكن اول مره نشوفها بحال هكا بقى في الحال ما بغيتش نقصد الاهانه لاي واحد الله يسهل على الجميع ولكن امك هذيك كتبقى حبست دموعي وقلت لهم يلاه وانا غادي بهم. كنت كنحس بلي غادي لشي بلاصه مظلمه غادي غادي لواحد المجهول اللي غالبا غادي يبدل لنا حياتنا وما كنظنش انه غادي يبدل لنا حياتنا الحاجه زوينه بالعكس غادي يبدل الاسوء حاجه ممكن تخيلها.
