[0:00]الصورة اللي قدامنا دي واحدة من ضمن الصور المدهشة اللي التقطها رواد مهمة أرتميس 2 المتجهة للقمر. صورة حقيقية التقطها رائد الفضاء ريد وايزمن وهو بيبص على كوكبنا من الخارج من على متن المركبة أورين اللي هترجع الإنسان للقمر بعد أكتر من 50 سنة. دلوقتي واحنا بنسجل الحلقة دي البشرية بتعمل واحدة من أهم الرحلات في تاريخ استكشاف الفضاء. خروج الإنسان من مدار الأرض والانطلاق في رحلة حوالين القمر والعودة مرة تانية للأرض. رحلة أرتميس 2. رحلة مختلفة تمامًا عن الرحلات اللي قبلها. أول مهمة مأهولة تغادر مدار الأرض المنخفض من ساعة انتهاء برنامج أبوللو سنة 1972. البرنامج اللي وضع أقدام البشر على سطح القمر من أكتر من 50 سنة فاتت. والمرة دي رحلة على متنها أربع رواد فضاء. في المهمات السابقة كان التركيز على التجربة التقنية، أما في أرتميس 2 الهدف هو اختبار أنظمة دعم الحياة داخل كبسولة أوريون. والتأكد من قدرة الرواد على التحكم اليدوي بالمركبة، والتحقق من قدرة الأنظمة على حماية البشر من الإشعاعات الكونية لفترات طويلة. وكمان مصمم عشان تكسر الرقم القياسي لأبعد مسافة وصل لها البشر عن كوكب الأرض على الإطلاق. النهارده هنغطي مع بعض أهم الأحداث اللي حصلت في رحلة أرتميس 2، مش كلها ولكن الأكثر إثارة. ومن غير كلام كتير أهلاً بكم أنا محمود. ودي إحدى حلقات قناتكم مليون سنة ضوئية. وقبل ما نبدأ حابب إنكم تشتركوا معانا في القناة وتفعلوا جرس التنبيهات وتدعمونا بالإعجاب بالفيديو ويلا بينا نبدأ. 1 أبريل 2026 ده كان تاريخ إطلاق مهمة أرتميس 2. آلاف البشر كانوا بيوثقوا الرحلة دي بعيونهم. وملايين البشر كانوا بيشاهدوا الرحلة دي في بث مباشر. وبالظبط الساعة 6:30 تقريباً انطلقت المهمة دي على متن الصاروخ SLS. الصاروخ اللي كان شايل الكبسولة أوريون واللي كان على متنها رواد الفضاء الأربعة. خلال الإطلاق كان انفجار هائل من اللهب والطاقة بيولد قوة دفع بملايين من الأرطال. ودي كانت كافية إنها ترفع الصاروخ اللي وزنه آلاف الأطنان من على الأرض. بعد الإطلاق في دقائق قليلة الصاروخ قدر يعدي سرعة الصوت. وبعدها دخل في مرحلة الماكس كيو أخطر لحظة ضغط على المركبة أثناء الإطلاق. وبمجرد ما الصاروخ خرج من الطبقات الكثيفة للغلاف الجوي بدأ أول فصل مهم. انفصال المعززات الصاروخية بعدها المراحل الأولى. وهنا بيكون الطاقم خلاص خرج فعلياً من قبضة الأرض الجوية ودخل في بيئة الفضاء. طبعا لسة ما سابوش الأرض بالكامل، ولكن دلوقتي كانوا في مرحلة اسمها مدار أرضي مؤقت وهو انهم يتحركوا حوالين الأرض بسرعة تقارب ال 28 ألف كيلومتر في الساعة. في المرحلة دي كل الأنظمة بتتراجع والاتصالات بتتاكد والمركبة بتستعد لأهم قرار في الرحلة كلها. زي هل تكمل تسيب الأرض فعلاً ولا هترجع تاني؟ لحظة القرار دي اسمها ترانس لونر إنجكشن. أو ببساطة للحظة اللي هتحدد هل الإنسان هيرجع للقمر تاني أو لا. بعد ما المركبة استقرت في المدار المؤقت حوالين الأرض بدأت واحدة من أهم المراحل في الرحلة كلها. مش انطلاق مباشر للقمر، لكن دوران حوالين الأرض بسرعة هائلة وده عشان تكتسب الطاقة الكافية للمرحلة اللي جاية. وهي الخروج من جاذبية الأرض. المرحلة دي استغرقت تقريباً 24 ساعة وكان كل ده بيتم قدام العالم في بث مباشر. وبعد ما المركبة وصلت للسرعة المطلوبة بدأوا في تشغيل المحرك الرئيسي وهنا حولت مسار المركبة من مدار حوالين الأرض لمسار مباشر في طريقها للقمر. خلال ساعات طويلة من الرحلة دي المركبة قطعت مسافة أكبر من الأرض. وقتها بدأت تظهر ملامح كروية الأرض وهنا أخيراً بدأ الرواد يلتقطوا أغرب وأجمل المشاهد. واحدة من ضمن المشاهد دي الأرض وهي نصها مظلم بالكامل ونصفها التاني مضيء. أو المشاهد اللي بنشوفها مع بعض دلوقتي. الأرض بدأت تبعد أكتر وأكتر وهنا المشاهد بقت أروع لكوكب الأرض. فقط ظلام دامس بيحيط عالمنا الأزرق. اللي لاحظوا ناس كتير هنا هو إن مفيش نجوم باينة في الخلفية، وده برضه مش غريب لأن الكاميرات كانت مضبوطة على إضاءة الأرض الساطعة جداً. فأي ضوء ضعيف زي النجوم بيختفي تماماً من الصورة. وعلى الجانب الآخر من المركبة القمر كان حجمه بيكبر أكتر وأكتر مع الوقت. يوم 3 أبريل 2026 المركبة كانت وصلت تقريباً لنص المسافة بين الأرض والقمر. وعلى الناحية التانية الأرض بيت مجرد كرة صغيرة زرقا حواليها ظلام كامل. بمجرد إنك توصل لنص المسافة أنت فعلياً بعدت مئات الآلاف من الكيلومترات عن الأرض. وفي المرحلة دي الطاقم بدأ يعمل تعديلات بسيطة على المسار اسمها تركتوري كوريكشن. تصحيحات صغيرة جداً لكنها بتفرق في آلاف الكيلومترات لأن أي خطأ بسيط في الاتجاه ممكن يخليك تعدي القمر بالكامل أو تدخل في مسار خطر. ببساطة كل حاجة كانت ماشية بدقة متناهية. وكل صورة كانت بتوصل كانت بتأكد إننا بنبعد أكتر وأكتر عن المكان الوحيد اللي نعرفه. أثناء الاقتراب يوم 3 لـ 4 أبريل الأرض كانت بتصغر بشكل ملحوظ والقمر بيظهر بحجم أكبر عن الأرض. لكن الغريب هنا كان في شكل القمر الثابت تقريباً في الفضاء وده اللي لاحظناه في البث المباشر. القمر كان باين كأنه واقف في مكانه. وده ببساطة لأن المركبة كانت بتتحرك في نفس الاتجاه نحو القمر فكان بيبان كأنه ثابت لكن في الحقيقة كان بيكبر تدريجياً كل ساعة. ومع مرور الوقت الكرة الصغيرة دي بدأت تتحول لجسم واضح. وأخيراً قبل الوصول يوم 5 أبريل القمر بقى أكبر. تفاصيل سطحه بدأت تظهر والفوهات والبقع المظلمة بدأت تبان وهنا أنت مش بس شايف القمر. أنت بدأت تشوف نص القمر اللي عمرنا ما شفناه من الأرض. الجانب المظلم من القمر بدأ يظهر. وأخيراً يوم 6 أبريل 2026 كانت لحظة الوصول. وصول الكبسولة أوريون أو المركبة داخل مجال جاذبية القمر.
[5:48]وهنا بدأت تحصل واحدة من أخطر اللحظات في الرحلة، انقطاع الاتصال بالكامل لمدة تقارب الـ 40 دقيقة. وده ببساطة بيحصل لأن القمر بيحجب الإشارات الراديوية اللي من خلالها بنتواصل بالمركبة، وخلال الـ 40 دقيقة دول الطاقم كان لوحده تماماً. مفيش أي اتصال بالأرض ومفيش توجيهات ولا حتى تأكيد إن كل حاجة ماشية صح. طبعاً كل ده كان مخطط ليه من البداية لأن القمر نفسه بيحجب الإشارة. فأي مركبة بتعدي وراه لازم تفقد الاتصال، وفي الوقت ده الطاقم كان بيقوم بأهم مهام في الرحلة. أولها إنه يعتمد على نفسه في قيادة المركبة أو يظبط مسارها، ودي كانت من أخطر المهام فعلاً. وكمان يصور الجانب البعيد للقمر ويسجل ملاحظات علمية ومراقبة الأنظمة وتجهيز بيانات الرحلة للرجوع. وهنا أخيراً بعد ما رجعت الإشارة مرة تانية بدأت توصل لنا الصور التاريخية أثناء وبعد الانقطاع. صور في قمة الروعة والجمال وهنا الصورة دي بعنوان إيرث ست. الأرض بتختفي خلف القمر زي غروب الشمس ولكن لكوكب كامل. ودي عكس الصورة الشهيرة المعروفة بإيرث رايس بتاعة أبوللو 8. وهنا ده مشهد مدهش جداً ويمكن من أكتر المشاهد اللي بتخطف الأنظار، كسوف الشمس من الفضاء. القمر غطى الشمس بالكامل وظهرت الهالة الشمسية أو الكورونا بشكل واضح جداً ونجوم وكواكب بدأت تظهر حوالين المشهد. الكسوف ده استمر حوالي 40 دقيقة كاملة، أطول بكتير من أي كسوف على الأرض. المشهد الأقوى بصرياً في نفس الوقت كان مشهد مستحيل تشوفه في أي مكان. الأرض والقمر مع بعض، الأرض بعيدة جداً وصغيرة ومظلمة جزئياً والقمر ضخم في المقدمة والفراغ حوالين الاثنين مطلق. المشهد ده بيوضح الحقيقة اللي بننساها دايماً، وهو إن الأرض مش مركز الكون، دي مجرد نقطة صغيرة وسط ظلام لا نهائي. وأخيراً بعد ما المركبة خرجت من ورا القمر العالم كله بدأ يشوف الصور دي لأول مرة. صور ممكن تكون من أهم الصور اللي اتصورت في تاريخ البشرية. مش لأنها بتورينا القمر ولكن بتورينا نفسنا من بعيد. وأخيراً من اللحظة دي المركبة أصبحت في طريق العودة للأرض. المركبة أوريون خرجت من جاذبية القمر وبدأت في رحلة الرجوع وهي دلوقتي بتعتمد على الجاذبية والزخم اللي اكتسبته من رحلتها حوالين القمر. خلال وقت تسجيلنا للحلقة دي الرحلة بقى لها تقريباً سبع أيام، وفاضل أيام قليلة وتبدأ أخطر وأهم مناورة في الرحلة كلها. مناورة العودة للأرض واللي فيها المركبة هتدخل الغلاف الجوي بسرعة بتوصل لحوالي 40 ألف كيلومتر في الساعة. واحدة من أخطر اللحظات في أي رحلة فضائية. وفقاً لجدول المهمة العودة المتوقعة هتكون يوم 10 أبريل 2026 وهتكون هبوط مظلي في المحيط الهادي. بعد رحلة استمرت حوالي 10 أيام كاملة في الفضاء وده معناه إن أثناء مشاهدتك للحلقة دي المركبة يا إما بتستعد للدخول أو بالفعل بدأت رحلة العودة النهائية للأرض. في الحقيقة اللي احنا غطيناه في الحلقة دي مجرد جزء صغير جداً من الرحلة، وده كان ملخص سريع لواحدة من أعظم المهمات في تاريخ استكشاف الفضاء. ولو حابين نغطي تفاصيل أعمق وندخل في كل لحظة بشكل علمي وتحليل أكبر عرفونا في التعليقات. وكان معكم محمود من قناتكم مليون سنة ضوئية ويلا سلام.
