[0:02]السلام عليكم ورحمه الله وبركاته لما بنجيب سيره حيوان عملاق مشهور بجسمه الضخم وبقه الكبير ومعدته الواسعه بنتخيل انه يقدر ياكل اي حاجه تيجي في وشه طالما حجمها اصغر منه. بس الحقيقه ان الكلام ده مش بينطبق على كل الحيوانات الضخمه ولا حاجه. لما نيجي نتكلم عن اي حيوان حجمه كبير، فالحيوان ده علشان يقدر يعيش بيكون محتاج قدر كبير جدا من الطاقه. وفي الحياه البحريه بالذات الطاقه دي بتبقى متوفره في شكلين اما اسماك حجمها كبير بس بتعيش منفرده او مخلوقات حجمها صغير جدا بس بتعيش في اسراب مكونه من الاف ان ما كانش ملايين الافراد. فايه اللي يخلي سمكه بحجم اتوبيس نقل عام تبذل مجهود اكثر من مره في الهجوم على فريسه حجمها كبير وتقدر تقاوم وممكن تعورها كمان لما هي ممكن تاخد نفس السعرات الحراريه دي بهجمه واحده على سرب من اسراب القشريات الغلبانه وتوفر مجهودها. اهلا بكم انا عمرو عابدين. بس قبل ما نبدا لو لسه جديد في القناه ما تنساش تعمل سبسكرايب وتفعل الجرس علشان توصلك فيديوهاتنا اول باول. ولو حد فيكم بيحب العاب الالغاز ما تنسوش تحملوا لعبتنا الجديده كلمات من على البلاي ستور، هتلاقوا الرابط بتاعها في صندوق الوصف.
[1:15]بما ان استراتيجيه توفير الطاقه في مقابل الحصول على كميه اكبر من الاكل هي الاستراتيجيه الانسب والافضل في بعض الحالات فربنا سبحانه وتعالى ميز بعض المخلوقات البحريه العملاقه باسلوب تغذيه فريد جدا من نوعه. سماها العلماء باسلوب التصفيه واللي بيه بيقدروا انهم يفصلوا المخلوقات الصغيره الصالحه للاكل عن الميه والمدهش كمان ان كل واحد منهم له اسلوبه الخاص في الحصول على الاكل. فلو جينا نبص مثلا على اضخم كائن حي على وجه الارض واللي هو الحوت الازرق هنلاقيه بيتبع اسلوب التصفيه ده. الحوت الازرق وزنه بيتراوح من 150 ل 200 طن وطوله حوالي 30 متر يعني ارتفاع مبنى مكون من 10 ادوار وجسم بالحجم المهول ده اكيد اعضاءه عملاقه بشكل غير طبيعي وهتحتاج كميه كبيره جدا من الطاقه علشان تشتغل. ضيف على كده انه بيضطر يهاجر كل سنه مع بدايه فصل الشتاء لمناطق التكاثر وبيقطع في الهجره دي مسافه بتقدر ب 6500 كم واللي طبعا بيبذل فيهم كميه مهوله من الطاقه ده غير انه خلال موسم التزاوج غالبا ما بياكلش اصلا. وده معناه انه لازم يبقى مستعد من قبلها وعنده احتياطي كافي من الدهون واللي بتتراوح من 35% ل 50% من اجمالي وزنه وطبعا علشان يقدر يوصل للنسبه المهوله دي لازم ياكل كميات كبيره جدا من الاكل بتوصل في اليوم الواحد ل 6 أطنان. يعني بياكل 6000 كيلو يوميا وفي المناطق اللي بيعيش فيها الحوت الازرق بقى مفيش انسب ولا اكثر من القشريات وتحديدا نوع معين منهم يشبه الجمبري كده اسمه الكريل. الحيتان الزرقاء افواهم فيها حاجه بتسمى بالالواح البالينيه موجوده عندهم بدل الاسنان ودي عباره عن الواح شبه المشط كده مصنوعه من الكيراتين وهي نفس الماده اللي بيتكون منها الشعر والاظافر عند الانسان وهي اللي بتديهم القوه والمرونه في نفس الوقت. الحوت بقى لما بيشوف قصاده اسراب من الكريل بينقي اكبر سرب فيهم علشان ما يستهلكش مجهود كبير ويغوص في اعماق المحيط علشان يكتسب سرعه ويندفع ناحيه الكريل بسرعه تصل ل 32 كم في الساعه. علما انه عاده بيعوم بسرعه بتقدر ب 8 كم في الساعه بس وبعدين يتقلب على جنبه ويفتح بقه على الاخر ويلم اطنان من الكريل ومعاهم طبعا كميات مهوله من الميه واللي بتخلي حلق الحوت يتمدد يبقى عامل زي البالونه. لكن الشكل ده مش بيستمر كده لان الميه بتخرج ثاني من بين الفراغات البالينيه دي بنفس السرعه اللي دخلت بها كانها عدت على مصفى بالضبط ويفضل في بقه الكريل اللي بعد كده بيقدر يبلعه بكل سهوله باستخدام لسانه. الحقيقه مش الحوت الازرق بس اللي بيتميز بالصفائح البالينيه دي بل انها موجوده عند انواع كثير من الحيتان لكن مع ذلك مش كل الحيتان البالينيه بتاكل بنفس الطريقه. فعندك مثلا الحوت الرمادي واللي على الرغم من انه اصغر من الحوت الازرق في الحجم الا انه مازال حوت عملاق طوله بيوصل ل 15 متر ووزنه بيوصل ل 40 طن وبرده بيسافر في هجرات موسميه لمسافات طويله جدا بتتراوح من 16000 كم ل 22000 كم يعني تقريبا ثلاث اضعاف المسافه اللي بيهاجرها الحوت الازرق. وبناء عليه بيحتاج كميات كبيره جدا من الاكل واللي بتقدر بطن ونصف يوميا وده برده عشان يقدر يكون طبقه محترمه من الدهون تقويه وتسنده اثناء الرحله وبرده بيقع اختياره على القشريات والعوالق بس الحوت الرمادي بقى بيركز اكثر على نوع مختلف خالص من القشريات يشبه الجمبري برده اسمه الامفيبوتس.
[4:38]المخلوق الصغير ده مش بيكون موجود غير في الجحور وتحت الرمال في قاع المياه وعلشان كده هنلاقي ان الحوت الرمادي بيتغذى بطريقه مختلفه جدا عن باقي الحيتان البالينيه فبرغم من ان الحوت الرمادي من الثدييات يعني بيتنفس هوا وده معناها انه بيحتاج يبقى قريب من السطح الا انه مع ذلك بيضطر انه يغطس لعمق بيصل ل 155 متر علشان يوصل للاكل. بيعمل ايه بقى بيعوم ببطء كده على جنبه فوق الرمله ويشفط منها جزء كبير جوه بقه كانه مكنسه تحت البحر وبعدها يقرب من السطح مره ثانيه ويزق الرمله دي بلسانه بره بقه علشان يخرجها هي والميه الزياده من بين الفراغات البالينيه وبرده يتبقى القشريات وبعد كده بالهنا والشفا. على الرغم من انه اسلوب تصفيه الاكل ده مشهور اكثر بين الحيتان الا ان في انواع قليله من القروش العملاقه هي كمان بتتغذى بطريقه الفلتره دي اشهرهم على الاطلاق هو قرش الحوت واللي بيوصل طوله ل 20 متر تقريبا ووزنه بيتراوح من 11 ل 20 طن. واللي بيخليه يتربع على عرش المركز الاول كاكبر انواع القروش على الاطلاق لكن زيه زي اولاد عمه اللي اتكلمنا عنهم هو كمان بيتغذى على القشريات والعوالق والاسماك الصغيره. بس صاحبنا ده بقى ما عندهوش صفائح بالينيه زيهم يصفي بها الاكل بدل الصفائح دي بيمتلك جزء خشن في منطقه البلعوم مكون من 3000 سنه صغيره كل سنه منهم ما بتتعداش ال 3 مللي. السنون دي بقى بتقفش في اي حاجه قطرها اكثر من 2 مللي يعني نقدر نقول كده مفيش حاجه بتفلت منها الا الميه واللي بعد ما تفلت منها بتروح على الخياشيم علشان تعدي بمرحله الفلتره الثانيه وتخرج ميه صافيه من غير اي اكل. وعلشان كده هنلاقي ان قرش الحوت بيعتمد على ثلاث اساليب مختلفه للتغذيه بيبدل بينهم على حسب في قشريات كثير ولا لا في الميه وبرده مقدار الطاقه اللي هو محتاجه يعني لو مش جعان قوي هتلاقيه بيتمخطر كده في الميه وهو فاتح بقه واللي عرضه حوالي متر ونص وسايب السمك يجيله لحد عنده. بيفضل يقفل ويفتح في بقه حوالي 28 مره في الدقيقه وفي النهايه يشوف الحصيله اللي جاءت بقى وهو وحظه اما بقى لو كان جعان فبيروح متعلق بشكل عمودي بالقرب من السطح راسه فوق وديله تحت ويفتح بقه على الاخر ويشفط كميات مهوله من الميه بتوصل ل 500 لتر في المره الواحده وفي بعض الاوقات بيجمع بين الطريقتين فيشفط الميه دي وهو بيعوم. والطريقه دي على الرغم من انها بتستهلك منه طاقه كميه كبيره الا انها بتوفر له برده كميات كبيره من الاكل خصوصا انه بيقدر يفلتر اكثر من 6000 لتر من الميه في الساعه الواحده. الميجا ماوث هو واحد من اكثر الانواع المميزه من القروش طوله تقريبا 5 متر ووزنه في المتوسط طن لكن الارقام مش مؤكده قوي لان النوع ده نادر جدا في الطبيعه والعينات اللي تم صيدها او رصدها من اول اكتشاف ليه سنه 1976 ولحد النهارده هم يا دوبك 273 فرد. والسبب في ان احنا ما بنشوفهمش كثير انهم بيعيشوا على اعماق بتتعدى ال 4500 متر تحت سطح البحر ونادرا لما بيطلعوا فوق على السطح بس الدراسات اللي اتعملت على بعض العينات اثبتت انه بيتغذى على الاسماك الصغيره والقشريات والعوالق وعلى الرغم من انه بيمتلك فم واسع عرضه متر ونص فيه صفين كاملين من الاسنان الا ان اسنانه الصغيره دي ما بيقدرش يفرم بها الاكل. وهو ده اللي بيخليه يستهدف اسراب الاسماك الصغيره علشان يبلعهم بلع واللي لما بيدخلهم في بقه بيتعلقوا في اسنانه ما بين النتوءات دي وبعدين الميه الزياده تخرج من الخياشيم ويفضل الاكل والنوع ده برده بيقدر يفلتر اكثر من 500 لتر ميه في المره الواحده واما بقى الطريقه اللي بيدخل بها الحاجات دي جوه بقه فلحد النهارده مفيش حد شافه وهو بياكل تحت الميه. بس الباحثين بيتوقعوا انه بيجذب الاسماك والعوالق ناحيته عن طريق شريط عاكس للضوء موجود فوق منطقه الفم على طول وبمجرد ما يقربوا منه يفتح بقه على الاخر ويشفط الميه واللي فيها. بجانب بقى الحيتان والقروش واللي بيتغذوا على الاسماك الصغيره بطريقه الفلتره ففي نوع مميز من المخلوقات البحريه بينضم لهم في القائمه دي واللي هو شيطان البحر او المانتا ري تعتبر اسماك المانتا من اكبر انواع الريز على الاطلاق وزنها في المتوسط بيوصل طن كامل ومتوسط المسافه ما بين زعانفها بيوصل ل 5 امتار. بل انها في بعض الاحيان ممكن توصل ل 9 متر يعني كانها عماره ثلاث ادوار عايمه بالعرض في الميه وعلى الرغم من ان حجمها المهول ده واسمها اللي ممكن يوحي بانها من المفترسين المرعبين في اعماق البحار الا انها بتعتمد في اكلها بشكل اساسي على السمك الصغير والعوالق والقشريات زي اصحابنا اللي تكلمنا عنهم. وعلى عكس اغلب انواع الريز فالمانتا مش بتعتمد على الصيد اطلاقا في الحصول على الاكل بل انها بتستغل حجم زعانفها الكبير وبقها الواسع وبتعوم في الميه في اتجاه الاكل وتاخد كميه كبيره في طريقها بدون اي مجهود. وفي بعض الاحيان بيعوموا بشكل دائري حوالين اسراب الكريل علشان يخلقوا حاجه اشبه بالدوامه يحصروا فيها الكريل قبل ما يكلوه بس المفروض الحركه دي تكون سبب ان الشوائب تدخل في فم السمكه وتسد الخياشيم بتاعتها زي ما بيحصل احيانا مع باقي الانواع اللي بتتغذى بالترشيح. ومع ذلك الموضوع ده عمره ما حصل مع المانتا والسبب ده خلى الباحثين في حيره لسنين طويله لحد ما جاء مجموعه من الباحثين في 2018 واكتشفوا ان اسماك المانتا بتمتلك اليه ترشيح مختلفه تماما عن باقي الانواع مش بتستخدم اساسا اسلوب الغربله في تصفيه الاكل بل اتضح ان الصفائح اللي موجوده في الخياشيم بتاعتها موجود في اخرها نتوء صغير بيخلي الاكل والاجسام الدقيقه تخبط فيه وتترفع لفوق على شكل دوامه. علشان تدخل بعدها في الجهاز الهضمي وما تعديش اصلا من الخياشيم وبالتالي تفضل الخياشيم نظيفه وعمرها ما تتسد وبعض الباحثين بيقولوا ان الاكتشاف ده هيكون سبب في ظهور فلاتر ميه اكثر كفاءه في المستقبل. بس كده خلصنا. مين وصل لحد هنا؟ كل اللي وصلوا انتوا اجدع ناس. اعملوا لنا بقى لايك قبل ما تخرجوا علشان نعرف كم واحد وصل للاخر. وما تنسوش لو عندكم ترشيح لحلقه اكتبوه لنا في التعليقات. اغلب الحلقات اللي بنعملها دلوقتي بنكون واخدينها من تعليقاتكم. سلام.
