[0:00]لو بقى لك كتير بتدور على شغل وما حدش بيكلمك يبقى انت عامل مصيبة في السي في بتاعك، مصيبة بحالها؟ اه والله، والمشكلة الأساسية انك ما بتكونش عارف ومفكر الشركات مستقصدينك. انت معاك 30 ثانية بالظبط عشان تقنعني بالسي في بتاعك ان انا اكلمك، غير كده هيتركن السي في ويتحط جنب اخواتك وتخرج بره المنافسة خالص. تخيل يا صديقي العزيز ان احنا وصلنا السنة اللي فاتت يمكن اكتر من 1000 سي في في تعيينات المبرمجين. اللي كان ينفع بس ان احنا نكلمهم لا يتعدى ال 20%، وده كله بسبب المصايب اللي بتتعمل جوه السي في دي. لذلك انا قلت الموضوع ده ما يتسكتش عليه، انا جيت النهارده الفيديو ده عشان اوريك السي فيهات اللي كانت بتترفض وكانت بتترفض ليه، لعل وعسى يكون انت برضه عندك نفس المشاكل دي او حاجات قريبة منها، فتحسنها فتفتح لك فرص احسن في سوق العمل ان شاء الله، يلا بينا.
[0:54]السلام عليكم، ازيكم عاملين ايه؟ يا رب تكونوا بخير وفي أحسن حال، أنا علي شاهين، المدير التنفيذي لشركة اي تي لجند. لو عايز تستفيد من خبراتي في البرمجة وفي البزنس وفي الحياة، اشترك في القناة عشان ما يفوتكش اي حاجة من الحاجات اللي احنا بنعملها، وهتلاقيني سايب لك في الديسكربشن لينكات كتير جدا، من ضمنها كورساتي المجانية وكورساتي المدفوعة ومعلومات التواصل بتاعتي. مبدئياً كده عشان نكون متفقين مع بعض، احنا شيلنا اسامي الناس كلها من السي فيز عشان ما نطلعش حد على المسرح، الاساس بتاع الفيديو ده ان هو يوريك المشاكل اللي بنشوفها بشكل متكرر عشان انت ما تعملهاش في السي في بتاعك فيفتح لك فرص افضل. وعايزك تركز معايا كويس جدا في الفيديو ده وفي كل كلمة فيه وتكمل معايا الفيديو لحد الاخر عشان في الاخر ان شاء الله عامل لك مفاجأة هتعجبك. نبتدي مع بعض بالحاجات السيئة جدا اللي الواحد لما بيشوفها بيقفل السي في فورا، نشوف كده الراجل اللي قدامنا ده دلوقتي، الراجل اللي قدامنا ده عنده اول مشكلة ان هو باعت السي في وورد، والافضل دايماً ان انت تبعته بي دي اف. النقطة الثانية ان هو مش عامل تمبلت اصلا يعني هو اصلا كاتب السي في بكلمات كده ورا بعضها زي ما انت شايف، والموضوع يعني في غاية السوء اللي هو ما فيش اي تنسيق نهائيا، ما فيش اي نظام نهائياً في السي في. طب هنا بقى يجي السؤال، انت متوقع ازاي بالسي في اللي انت بعته ده ان انت ممكن تشتغل، او اللي انت بعت له السي في ده ممكن يكلمك ويقول لك تعال احنا عايزين نقعد معاك. يعني ازاي الناس هتجيبك وتشغلك في شركة وانت مش عامل اقل درجات البروفيشنال جوه السي في اللي انت بعته، طب انت شغلك بقى هيبقى عامل ازاي؟ يعني السي في اللي انا مدي لك فيه وقتك وبقول لك فيه اعمله براحتك انت عامله بالمنظر ده، امال لما تيجي تشتغل عندي هتعمل ايه؟ فطبعاً المنظر اللي انا اللي انتم شايفينه قدامكم ده منظر بشع وما احبش ان انا اشوفه ابداً ولا احب ان حد يعمل الحاجة بالمنظر ده نهائياً. على نفس الشاكلة المنظر اللي قدامك ده، ده برضه مش متنسق كويس على قد ما هو فيه خطوط وكلام من ده، بس ده ما مش معناه ان السي في كويس، الخطوط مش متناسقة، الخطوط كبيرة جدا، اللينكات محطوطة في شكل مش كويس، شكل معلومات التواصل محطوطة فوق، يعني بطريقة مش ماشية على نفس اللاين، حاجة بجد يعني صعبة جدا، ده بيتقفل على طول. والسي في رقم تلاتة اللي موجود قدامنا ده نفس القصة بالظبط، يعني انت ما تبقاش فاهم هو شغال على اتنين كولم ولا شغال على وان كولم، وبعدين فجأة تلاقيه كتب كتير وفجأة تلاقيه كتب قليل، فجأة تلاقيه ساب مسافات كبيرة فجأة تلاقيه لا ده المسافات قليلة، فطبعا ده برضه صعب جدا الشكل نفسه مش حلو، الشكل ما يفتحش النفس. يا جماعة يعني لازم السي في بتاعك يفتح النفس، لازم لما اشوف السي في احس ان انا مبسوط شايف حاجة كويسة. اما السي في اللي قدامنا ده يعني هو فيه تنسيق شوية ولكن في مشكلة كبيرة في الخطوط، الخطوط حجمها كبير جدا ده اولاً، ثانياً السي في اربع صفحات، فانت النهارده حد مبتدئ باعت سي في اربع صفحات ليه؟ بالاضافة ان انت مش عارف ترتيبة السكاشن مين مين قبل مين؟ مين الاول ومين الاخر والكلام ده كله، فتحس ان انت ماشي في السي في تايه، مش عارف انا رايح على فين ولا انا بعمل ايه؟ انا طبعاً اول ما بلاقي سي في كبير كده او الاقي سي في الخطوط فيها مش مظبوطة او الكلام ده كله على طول بروح قافله وداخل في اللي بعده، هي الوقت ضيق يا جماعة. ما فيش مساحة عندي ان انا اقعد ادقق انا ببص على حاجات اساسية ما لقيتهاش بجري، اللي فاتوا كانوا ناس مش عاملين تنسيق، اللي جايين ناس عاملين تنسيق بس التنسيق فيه مشاكل او فيه بعض الحاجات اللي مش عايزينها تبقى موجودة. يعني على سبيل المثال السي في اللي موجود قدامنا ده، السي في اللي موجود قدامنا ده يا جماعة فيه مشكلة كبيرة جدا وهي الجزء اللي فوق، الجزء اللي فوق كبير اوي اوي. اولاً لازم تكون فاهم علامات التواصل بتاعتك لازم تكون سطر واحد او سطرين بالكتير قوي في الاول، بعدين الكلام اللي انت بتكتبه عن نفسك اللي هو السمري او البروفايل بتاعك او الكلام ده ما ينفعش يبقى عدد السطور دي كلها، انت مش هتكتب قصة حياتك انا محتاج منك سطرين اتنين بس. مبدئياً انا السكشن ده مش بقراه، ولو هقراه فانا عاوز اشوف كلام قوي في سطرين اتنين بس، مش عايز اشوف اي حاجة اكتر من كده، فالشكل طبعاً اللي قدامنا ده مش شكل صحي ومش كويس ومش حلو ان هو يكون موجود. بقيت السي في نقدر نقول ان هو التنسيق بتاعه معقول بس لسه فيه مشاكل تانية هنتكلم عليها، لاني مش بس السي في لازم يكون شكله حلو وجميل ده فيه حاجات تانية كتير برضه لازم تكون موجودة. نفس المشكلة هنا برضه في السي في اللي قدامنا ده هتلاقي الجزء اللي فوق برضه معمول برضه بشكل مش حلو يمكن تحت في السي في الدنيا متنسقة بشكل الطف ولكن هو الجزء اللي فوق اللي مش كويس، طبعاً هو ما اترفضش عشان الجزء اللي فوق بس هو اترفض لان برضه بقيت السي في لسه فيه مشاكل تانية هنتكلم عليها دلوقتي حالا. انت يا صديقي عموما لما تيجي تعمل السي في بتاعك انت محتاج تختار تمبلت، التمبلت دي تبتدي ان انت تحط المعلومات بتاعتك جواها عشان ما تقعدش تألف. مرة يبقى الخط كبير، مرة الخط صغير، مرة الكلام ده، يعني تبقى الموضوع متناسق بشكل كبير، بشكل عام يا صديقي انت محتاج انك تختار تمبلت، التمبلت دي تعمل بيها السي في بتاعك وتحط بياناتك جواها عشان الموضوع يبقى متناسق، ما يبقاش فيه خط كبير وخط صغير، مرة عنوان بلون ومرة عنوان بلون تاني. فتعال نشوف ناس اختاروا تمبلت بس عملوا برضه السي في بتاعهم وحش، زي الاخ اللي قدامنا ده دلوقتي، الاخ اللي قدامنا ده عمل السي في بتاعه على اتنين كولم وخدوها كده قاعدة، اي سي في معمول على اتنين كولم مرفوض الفترة اللي جاية. ليه؟ لان فيه دلوقتي انظمة ذكاء اصطناعي بتفلتر السي فيز قبل ما بتعدي على الشركات، الذكاء الاصطناعي لما بيشوف السي في على اتنين كولم ما بيعرفش يفهمه، ما بيعرفش يفهم الحاجات اللي موجودة جواه، فبالتالي هتلاقيه رفضه من غير ما يروح للعنصر البشري. بالاضافة لما هو بيروح للعنصر البشري بتبص في السي في انت بتبقى عينيك مش مركزة في مكان واحد عمال تروح يمين وشمال والكلام ده كله فطبعاً مش كويس. ده بالاضافة ان خلينا نبص كده مع بعض بص السكشن بتاع البروفايل قد ايه؟ كبير جدا، والراجل ده برضه عنده غلطة تانية ان هو كاتب سكيلز كتير قوي. السكيلز دي مستحيل تكون انت عارفها كلها فبالتالي لما انا بشوف الكلام ده بعرف ايه؟ بعرف ان حضرتك واخد السي في ده كوبي اند بيست او بعرف ان انت مش مركز، انت مش مصحصح انت مش واخد بالك انت بتعمل ايه؟ انت عملت اي حاجة وبعتها وخلاص، وكل دي انديكيتورز بالنسبة لي بتخليني مش عايز اجيب الشخص ده. اما الراجل اللي قدامنا ده فهو اختار انه يعمل سي في بشكل جميل وامور، وعلى فكرة لما تشوف السي في هتقول جميل يعني ده طب ده اترفض ليه ده؟ الراجل عامل حاجة حلوة يعني عامل حاجة كويسة، باختصار يا جماعة زي ما قلت لكم ده اتنين كولم فده اولاً مرفوض، تاني حاجة بص كده على الجزء اللي في اليمين هتلاقيه عامل لك بقى مربعات ودوريات ومش عارف ايه والكلام ده كله، كل ده ضيعت الذكاء الاصطناعي طبعاً. ده بالاضافة ان هو عامل لنفسه تقييم في اللغة، يعني مقيم نفسه في العربي ومقيم نفسه في الانجليزي، ودي من الحاجات الغلط جدا ان انت تعملها في السي في ما تقيمش نفسك في اي سكيل، انت قول انا عارف كذا ومش عارف كذا، بس ما تديش لنفسك تقييم، وبالذات لو كان تقييم بالنجوم بالمنظر ده. طبعاً النجوم ضيعتك في ال اي تي اس وضيعتك كمصداقية اصلا، بالاضافة كمان لمشكلة الخطوط ان في ناس بيحبوا يشوفوا السي فيز على شكل ورق، في ناس بيحبوا كده، لما يجي يطبع السي في ده على ورقة ممكن تلاقي الكلام اللي معمول بالبنفسجي ده ممكن ما يظهرش على الورق، فممكن برضه فرصك تقل. هو السي في شكله حلو ولكن احتمالات ان هو يترفض كتيرة قوي، انت معرض نفسك لمساحة كبيرة جدا ان اللي قدامك يشوف السي في بتاعك مش حلو. اما الراجل اللي قدامنا ده فهو خد تمبلت المفروض ان هي كانت كويسة بس هو بوظها بالمنظر اللي انتم شايفينه قدامكم ده، فطلع السي في قدامكم ان هو مش متنسق تماماً، يعني شكل التنسيق بتاعه العام زي الزفت. طبعاً انتم عارفين موضوع التنسيق ده احنا اتكلمنا هو بيفرق قد ايه، اما الراجل اللي قدامنا ده بقى فده مختلف شوية، اولاً هو عامل السي في على اتنين كولم وقلنا ده مرفوض، ثانياً الالوان الجراي الغامق والجراي الفاتح والكلام ده كله فدي برضه مشكلة. تالت حاجة الراجل ده المفروض خبرة يعني الراجل ده المفروض هو كاتب تلات سنين خبرة وشغال في شركات وحاطط الورك اكسبيريانز بتاعته، ولكن فين المشاريع؟ فين المشاريع اللي تثبت الاكسبيريانز بتاعتك؟ فدي طبعاً مشكلة في حد ذاتها، بالاضافة ان التنسيق نفسه مش حلو، ازاي انت بتقول انك تلات سنين خبرة وشغال في شركات ومطلع حاجة بمستوى التنسيق ده؟ ده معناه ان انت يعني ممكن ما تجيبش حتى سنة خبرة، ممكن حتى ما تجيبش حتى ست شهور خبرة بالمنظر اللي احنا شايفينه قدامنا ده. خبرتك لازم تعبر عن ان انت شخص بروفيشنال، لازم تعبر ان انت قد ايه انت قادر تفيد المكان اللي انت هتروح فيه، انما بالشكل ده صعب جدا جدا ان الناس يكلموك ويتفاعلوا معاك. هنا بقى الراجل ده بغض النظر ان هو عامل اتنين كولم وعامل الوان، هو عامل غلطة تانية انا دايماً بحذر منها اللي هي ما تحطش صورتك في السي في، ارجوك ما تحطش صورتك في السي في. طبعاً ده بغض النظر ان احنا شاطبين على الصورة بتاعته عشان هو ما يبانش بس الصورة ما كانتش الطف حاجة وما كانتش صورة بروفيشنال، وحتى لو كانت بروفيشنال ما تحطهاش عشان ما توقعكش في ال اي تي اس وفي نفس الوقت ما تلعبش في نفسية اللي بيشوف السي في، اللي بيشوف السي في ما تخلوهوش يشوفك امور ولا يشوفك وحش ولا يشوفك مناسب ولا مش مناسب، لا انت حط الخبرات بتاعتك وهو لما يجيبك يبقى وقتها يقرر لانه وقتها لو قعد معاك عادي ممكن يقتنع حتى لو هو نفسيا عنده مع شكلك مشكلات.
[9:05]طبعاً السي في اللي قدامكم ده شرحه نفس الفكرة بنفس المشاكل اللي احنا اتكلمنا فيها قبل كده بنفس الكلام ده كله، مش محتاجين نعيد كلامنا يعني. طيب تعالوا نخش بقى على حاجات يمكن تكون احسن شوية، ناس مختارين تمبلت عاملين تنسيق ولكن عاملين مشاكل تانية مشاكل من نوعيات تانية جوه السي في. الراجل اللي قدامنا ده دلوقتي، الراجل ده عامل سي في كويس معقول ولكن تعالوا نبص على السكشن بتاع المشاريع اللي هو عامله، طبعاً مبدئياً هو سكشن المشاريع من اهم السكاشن اللي موجودة في السي في كلها ولكن ده مش معناه ان انت تكتب لي قصة حياتك في المشروع. الكلام الكتير اللي انت كاتبه ده هل تتوقع ان انا ممكن اقراه؟ انا مش هقراه وما عنديش وقت اقراه ولا الكلام ده كله، طيب هدوس على لينك لو دوست على لينك مش هدوس على التاني، فانا بالتالي محتاج اشوف الحاجة بشكل مختلف، محتاج اشوف المشروع معمول على شكل بولت بوينت تمام؟ تلاتة بوينت او اربع بوينت مش اكتر يكونوا هم بيلخصوا خلاصة مسئولياتك جوه المشروع والتكنولوجيز اللي انت اشتغلت بيها والمشروع نفسه بيتكلم عن ايه؟ اما اللي مكتوب ده كله فده طبعاً حاجة يعني صعبة جدا جدا مش كويسة. ممكن بسببها طبعاً تترفض لان هيجي ناس عاملين الموضوع بشكل احسن هيجذبوا نظري اكتر وانا كده كده بقدم لكثير فهنقي اللي عاجبني اكتر ده شيء طبيعي. نفس المشكلة في الراجل ده على قد ما هو عامل بولت بوينت يعني مقسم الموضوع بولت بوينت مش عامله مثلا برجراف مثلا او حاجة كبيرة ولكن البولت بوينت كتيرة والكلام اللي هو كاتبه كتير والمعنى اللي جوه الكلام متكرر ضعيف، يعني برضه مش اللي هو يعني مش هو ده برضه الحاجة اللي تجذب الانتباه اوي. اما الراجل ده بقى اللي جميل اوي بقى، ده ما كتبش كتير يعني ده كتب قليل ولكن كتبها بطريقة وحشة اوي، اللي هو مختار تمبلت هي نفسها كويسة والتنسيق معقول، الخطوط قريبة من بعضها بس جه بقى في البروجيكتس ما عملش الموضوع كويس يظهر ان التمبلت اللي كانت معاه ما كانش جواها الجزء بتاع البروجيكتس فقرر ان هو يألف الموضوع من دماغه هو، اللي هو انا هعملها بدراعي كده يعني، فطلع المنظر اللي احنا شايفينه قدامنا ده، فطبعاً مش كويس خالص، الشكل مش حلو، النقاط مش حلوة، الكلام اللي جوه النقاط نفسه ضعيف. وبص بقى معايا بقى على الراجل ده، ده الراجل ده بقى كاتب موضوع تعبير، ده بقى يعني عامل بقى شغل جامد قوي بقى، والناس اللي زي دي بتبقى مفكرة ان هي كده بقى بتبين شغلها بقى وان هي كده بتعمل حاجة يعني الصح الصح، لا طبعاً، الحاجات دي كده مش كويسة ومش هيتبص عليها خالص. اما بقى الراجل اللي قدامنا ده دلوقتي فده كان معاه تمبلت كويسة جدا وعامل شغل بولت بوينت بس فجأة قرر ان هو يعمل باك جراوند للعناوين بتاعته، خلى الباك جراوند بتاعت العناوين لون خفيف معرفش هو ليه خد القرار ده، بالاضافة لترتيب السكاشن، هو حاطط سكاشن بترتيب يعني مش مش الطف حاجة مش مرتب الترتيب بتاعه كويس. فغلطات صغيرة جدا خلت السي في بدل ما كان هيبقى شكله كويس ومقبول خلت السي في شكله مش كويس تماماً. اما الراجل اللي قدامنا ده فالسكشن بتاع المشاريع بتاعته متقسم بولت بوينت، تقول لي طب يعني طب انت ايه اللي مضايقك بقى دلوقتي؟ ما هو مقسم بولت بوينت اهو، هقول لك لا بس المشكلة ان هو مش ماشي على فريم وورك ثابت. يعني مشروع عامل فيه بوينتس كتيرة جدا ومشروع حاطط لي بوينت واحدة اللي هو طب يعني هو ده المشروع المهم وده مش مهم مثلا ولا ايه؟ بالاضافة طبعاً ان التنسيق مش كويس وان انا مش قادر اعرف ايه السكيلز اللي هو اشتغل بيها في المشروع ده ولا قادر اعرف ايه المسئوليات اللي هو كان قايم بيها ولا الكلام ده كله، فطبعاً الدنيا برضه سايحة في بعضها، اي نعم هو عامل بولت بوينت وماشي بتنسيق كويس لكن المحتوى اللي جوه اللي مكتوب ضعيف ومش موصلي اللي انا عاوزه. نبص بقى مع بعض على الراجل ده، الراجل ده بصراحة من الناس اللي بيصعبوا عليا، ليه؟ لان ده راجل جينيور شغال على نفسه ولكن جه في اللحظة اللي هو هيقدم فيها على شغل قرر ان هو ما يبذلش مجهود في الحتة دي وان هو يريح دماغه. راح طبعاً عمل الجزء الاولاني كبير زي ما احنا شايفين او كده، كان المفروض يعمل السي في بتاعه صفحة واحدة بس عملها صفحتين، جه في البروجيكتس وعامل بروجيكتس كتيرة والكلام ده كله بس معبر عن البروجيكتس بطريقة غلط خالص. يعني طبعاً كاتب كلام كتير والكلام الكتير اللي مكتوب كلام كله في العادي ما بيبينش الحاجات اللي هو عاملها، هو انا عارف انا كحد بقرا سي فيز كتير انا عارف ان الراجل ده كويس ولكن هو ظالم نفسه بالطريقة اللي هو عمل بيها السي في ده، فبالتالي احتمالية ان هو يترفض هتبقى كتير جدا في الشركات اللي هو بيقدم فيها. وده ناهيك بقى عن الناس اللي بتقدم سي فيز اصلا بيبقى فيها سبلنج مستيكس يعني هو كاتب اصلا كلام غلط كمان، طبعاً اي سبلنج مستيك موجود في السي في بتاعك انت بره خلاص انت الموضوع انتهى. ده بالاضافة للناس بقى اللي بتقعد تتكلم عن هواياتها والحاجات اللي هي بتحبها والكتب اللي هي قرتها والسفريات اللي هي سفرتها طبعاً موضوع صعب جدا، صديقي العزيز باختصار لو كان كل الحاجات اللي قبل كده دي مش حلوة يا ترى ايه اللي حلو؟ باختصار يا صديقي ده السي في الكويس، بص معايا عليه، اول حاجة هتلاقي الجزء اللي فوق صغير مش كبير، هتلاقي السمري سطرين اتنين بس، بعد كده هتلاقي السكشن بتاع البروجيكتس وراه على طول لانه هو ده اللي بيعبر عن مهاراتك الحقيقية، هتلاقي كل بروجيكتس عبارة عن تلاتة بولت بوينت بس او اربعة بولت بوينت بالكتير اوي. وهتلاقيني حاطط تلاتة بروجيكت والبروجيكت نفسه معمول بفرين وورك معين، يعني كل بروجيكت شغال زي التاني بالظبط اول كلمة زي تاني كلمة زي تالت كلمة في كل المشاريع، هتلاقي ان الكلمات اللي مكتوبة كلمات قوية. انت مش كاتب كلمات ضعيفة انت كاتب حاجات لو اتقرت تحسس اللي قدامك ان هو فعلاً قدام حد بروفيشنال وحد كويس، وكمان لو عندك ورك اكسبيريانز او عندك مثلا تدريب او حاجة تقدر انك تكتبها والمهارات اللي سكيلز بتاعتك مكتوب الحاجة اللي انت تعرفها بس مش مكتوب حاجات بالهبل لان كده كده السكيلز بتاعتك بتبان في المشاريع مش محتاج السكيلز بتاعتك تبان في في كل حتة في السي في، وفي الاخر خالص موجود الايديوكيشن وموجود مكان فاضي لو حابب انك تزود مشاريع او تزود حاجات تانية. وصفحة واحدة بس ما فيش غيرها فبالتالي تجذب عين وانتباه الشخص اللي بيدور عليك، التمبلت اللي انت شايفها قدامك دي وقف الفيديو بص عليها كويس وقلدها بالظبط هتطلع سي في محترم وان شاء الله باذن الله يعدي في الشركات. بالاضافة ان ان شاء الله قريب جدا هيبقى فيه كورس هينزل في دبلوت الويب بيتكلم عن ازاي تلاقي وظيفتك الاولانية، هنعمل سيستم كامل متكامل يخليك بتشتغل في يومك من ست لثمان ساعات عشان تلاقي الوظيفة بدل ما انت تبقى شايف ان ما فيش شغل وان الشغل ضعيف نحول الموضوع لسيستم كل اما انت تبذل فيه مجهود اكتر كل اما يجيب لك شركات اكتر ويخلي الشركات هم اللي يدوروا عليك مش انت اللي تدور عليهم. هيبقى فيه تفاصيل كتير جدا جميلة وان شاء الله باذن الله تبقى حاجة مفيدة بالنسبة لكم، لو عجبك الفيديو اعمل له لايك وشهيره مع اصحابك واشوفكم على خير ان شاء الله في فيديو جاي.
