قريبا نهاية الفلوس !

[0:00]قريبا هذه الفلوس الورقية ما غتبقاش عندها قيمة. وماشي غير هذا الشيء وصافي غادي يختفيوا من العالم كامل وما غاديش يبقاو. حيت بان فيهم واحد المشكل كبير. عليها بزاف الدول بداو كيحاربوا الفلوس أوراق بحال السويد، الدانمارك، فنلندا. وقريبا حتى المغرب اللي غادي يحيد الفلوس دياله. حيت بسبابهم المغرب كيخسر كل عام 5 مليار دولار. في هذا الفيديو غادي نعرفوا شنو المشكل اللي واقع في العالم بالضبط. وبالمساعدة ديال طاقم التقني والبحث المعمق غادي نعرفوا حقيقة الفلوس أوراق وكيفاش بانوا نهار الأول. وشنو هو المشكل اللي بان فيهم حاليا؟ وكيفاش الفلوس اللي عندك دابا كتنقص لهم القيمة ديالهم نهار على نهار.

[0:45]واحد البلان طرا شحال هذه، بسببه حاليا حياتنا تبدلات بزاف وباقا غتزيد تبدل. وهذا البلان اللي وقع شحال هذه وقع بالخطأ. القصة غتبدا في 1950 واحد السيد سميتو فرانك ماكنامارا رجل أعمال أمريكي. كان خارج فواحد المساء مع الزوجة ديالو الفاضلة وقالوا غنمشيو نتعشاو فشي بلاصة. مشاو لواحد الريسطو و جلسوا كيتعشاو في أمان الله وفجأة غيوقف عليهم السرباي و غيقول لهم خلصوني. خونا فرانك غيضرب يده في جيبه باش يقلب على البسطام غيدير هاه ويلي البسطام فين هو. جيبه كيصفر البسطام نساه في الدار وما عندوش الفلوس باش يخلص. وتم مرته بقات كتشوف فيه و قالت ليه يا ودي يا رجالي يا ودي. وفي الآخر مرته هي اللي خلصات كلشي. تم فرانك بقى فيه الحال وما تسرطتش ليه حيت ما كانش كيآمن بـ 50 50. تيقول أنا راجل أنا نخلص كلشي. في حين بقى فيه الحال ومشى للدار وما جاهش النعاس. وجلس كيفكر الليل كامل فشي حل لهذا المشكل. كيفاش أنا عندي فلوس والبنكة عارفاني عندي فلوس حاط عندها الفلوس وفي الآخر كنطيح في موقف حرج و ما كنلقاش باش نخلص. ضروري خاصني نلقى شي حل فتم بقى الليل كامل كيفكر فشي حل باش ما يعاودش يطيح في هذا الموقف. فتم قال مع راسه أنا عندي الفلوس والبنكة عارفاني عندي الفلوس ولكن مول المطعم كاع ما عارف هذا الشيء. فعلاش مول المطعم يمشي ياخذ الفلوس من البنكة نيشان بلا ما يدوي معايا أنايا. وكيفاش غاتطيح عليه الفكرة ديال كارت بونكير؟ يعني كارطا كارطا. غايقول مع راسه كيفاش الناس كيعرفوا شكون أنا عن طريق كارط ناسيونال. فنفس البرانسيب غينطبق باش يعرفوا الحساب البنكي ديالي كارط بونكير. وتم غتكريه أول كارط بونكير في التاريخ. غتكون كارط بونكير مقاد من الكارطون وماشي من هذه المادة اللي كنعرفوا حاليا. كانت مقادة غير من الكارطون و كانت كتستعمل غير في 14 المطعم في ميريكان. والمستخدمين ديالها ديك الساعة كانوا غير 200 واحد فقط. هما اللي ثاقوا في الفكرة و جربوها ولكن في نفس العام الرقم غا يرتفع لـ 2000 مستخدم. ومن موراها في 1958 تما غتخرج أول بطاقة بنكية معدنية حقيقية. من عند بانك أوف أميريكا واللي سماوها بانك أميريكا كارد. والمستخدمين ديالها غايطلع لـ 300 ألف مستخدم. وفي 1976 غيبدلوا السمية من بانك أميريكا كارد إلى فيزا. هي السمية اللي كنعرفوها حاليا كارط فيزا. نهار الأول اللي بانت فيه هذه الكارطة حتى شي حد ما ثاق فيه. و كانوا غير 200 واحد هما اللي خدامين بها. من موراها غتطلع من 200 لـ 2000 ومن موراها من 2000 لـ 300 ألف. أما حاليا في العالم كامل كنلقاو 2 مليار و نص بطاقة بنكية. وميريكان بوحدها فيها 631 مليون بطاقة بنكية. وهذه البطاقة البنكية تحارب بشكل مباشر الفلوس الورقية. وبزاف الدول بداو كيعتمدوا بشكل أساسي على الكارط بونكير. أما هذه الفلوس قريبا غتختفي من هذه البلدان. على سبيل المثال بزاف الدول في الاتحاد الأوروبي الأغلبية ديالهم خدامين بـ دي كارط بونكير. وغير 9% ولا قل كاع هما اللي خدامين بالفلوس الليكيد بيع وشراء ليكيد هكاك. فدبا السؤال المهم جدا. علاش بزاف الدول فجأة بدات كتحارب الفلوس؟ ما بقاتش باغاهم، ما بقاتش حاملة ما كتحملهمش، ما كيكرههمش. ديال هذا الوراق اه يلاه قول ليا سيدي. وماشي غير هذا الشيء و صافي كتحاول تضيق الحصار على المواطنين ديالها باش تجبرهم يستعملوا كارط بونكير. يعني بزاف د لي سيرفيس ما يمكنش تخلصهم إلا عن طريق كارط بونكير. الفلوس غير متايحين. يعني هذه حرب مباشرة باش هذو ما يبقاوش كاع بمرة. و سي أسامة غير تقول علاش غي حاربوهم راه زوينين. أه و رويحة هي فيهم والله ما كايناش شي حاجة كتدار غير هكاك. كاين واحد السبب خطير جدا هو اللي خلى بزاف الدول كتحارب الفلوس الورقية. وغاتفهموا علاش بزاف الدول متخلفة والدول الأفريقية ما باغاش لي كارط بونكير ما بقاو عندها الفلوس كيتحركوا. حيث ماشي في الصالح ديالهم جميع المواطنين ديالهم يخدموا بـ كارط بونكير. تما كاين واحد السر مخبي و ما بغاوكمش تعرفوه. وهذا السبب غنعرفوه بالتفصيل في هذا الفيديو.

[4:19]أول حاجة خاصكم تعرفوها بأن شحال هذه ما كانوش الفلوس كاع ما كانش البيع والشراء أصلا. البيع والشراء بالمفهوم الحالي ما كانش شحال هذه. إلا بان لك شي واحد عنده واحد اللعيبة عجباتك كتمشي كتجيب أحسن خشبة كتشكي عليها كيعطيك حدودة كتاخدها سهلة ماهلة. البيع والشراء ما كانش. غادوز المدة و غيولي البيع والشراء عن طريق التبادل. أعطيني نعطيك دونون دونون اللي ما يسمى بالمقايضة. أنت عندك بطاطا اراها و هاك 2 كيلو قمح ولا عندك اللفت. أه خليه عندك ما نديروا باللفت. وغادوز مدة و هما خدامين بهذه اللعيبة ولكن كان فيها ديفو اللي هو السلعة كتخسر وكتبيريما وكتفقد القيمة ديالها. عليها غاينقزوا لواحد اللعيبة أخرى و اللي هي البيع والشراء عن طريق الأسلحة. حيث السلاح ما كيتبيريماش و ما كيخسرش و غايبقاو مدة خدامين بهذا البلان. حتى لواحد النهار غي تبدل حتى هو حيت فيه ديفو. أشنو هو هذا الديفو في كل مرة كنبغوا نتقداو خاصنا نهزوا معايا عار رمي د الأسلحة و العصى و النبل و الهراوة. وهذا الشيء ماشي عملي ثقيل بزاف. غا ينقزوا من أسلحة لعملات معدنية مدورة و مكورة اللي كنعرفوها حاليا. و عاد من موراها بمدة طويلة عاد غايبانوا الفلوس الورقية. وبالضبط في 618 ميلادية وفي الصين هي أول بلاد غتخترع الفلوس الورقية. وعلاش اخترعوها حيت فاش كيبغوا يبيعوا و يشريوا بشي حاجة كبيرة غالية غا يخصهم بزاف د الفلوس المعدنية اللي ثقيلة بزاف. عليها عوضوها بأوراق خفيفة. ومن تما هذا البرانسيب غاينتشر في العالم كامل. وأول دولة في أوروبا غاتعتمد على الفلوس الورقية هي السويد في 1661. وهذه المعلومة على السويد عقلوا عليها مزيان غنرجعوا ليها في الفيديو. دابا حاليا كاين واحد السؤال مهم علاش الفلوس الورقية عملية و أنتشروا في العالم كامل و كلشي خدام بهم. ولكن حاليا كلشي بغا يتقلب عليهم و بغاو يحيدوهم. فين كاين المشكل و شنو هو السبب الحقيقي؟ وخاصكم تعرفوا عاوتاني بأن شحال هذه كانت المقايضة ومن موراها حيدوها. وعلاش حيدوها حيت كان فيها مشكل. وغيبداو يبيعوا و يشريوا بالسلاح و حتى هو غا يحيدوه. علاش؟ حيت فيه مشكل. وغاينقزوا العملات المعدنية. و من موراها غايبانوا فلوس ورقية حيت الفلوس المعدنية حتى هما كان فيهم مشكل. ودابا حاليا بانت الكارط بونكير و بغاو يحيدوا الفلوس ورقية حيت حتى هما فيهم مشكل. وشنو هو السبب هذه المرة؟ لمحاربة الفساد بالدرجة رقم واحد. حيت الفلوس ما كنعرفوهمش فين مشاو فهمتي ما كاينش لتخاس من مورا الفلوس. ولكن بالكارط بونكير كنعرفوا أي درهم فين مشات. وأي سنتيم فين مشى وكيبقاو لي تخاس من مورا أي إي شونج فهمتوا كيفاش. هذا هو البرانسيب اللي خدموا عليه جميع الدول الأوروبية باش يحاربوا الفساد وباش يحيدوا الفلوس الورقية. وهذه القضية نجحوا فيها على مر سنين ماشي في نهار واحد دقة دقة. على سبيل المثال السويد هذه الساعة حاليا كيستعملوا قل من 5% من التبادلاتهم والبيع والشراء بالفلوس ما تبقى كله بـ كارط بونكير. عليها الرشوة والاختلاس والشفرا هذا الشيء ما كاينش. وحتى في لي سيرفيس ديال الدولة في الإدارة إلى آخره ما كيبقاوش يعطلوا فيك بالعاني. حكى السيد فلان فلاني كاع ما كاين باش أنت كتزير و كدور معه. هذا الشيء ما كاينش. حيت أصلا أنت باش تدور معه ما هازش معك الفلوس. 90% من المواطنين ما هازش معه لا فلوس لا والو جيبه كيصفر. فعليه ما يمكنش يدور معك أنت بقهوة 20 درهم 50 درهم ما يمكنش ما عندوش ما كاينش هذه الإمكانيات. غنطيكم مثال حي. دابا أنا مثلا غنمشي نقضي غراض في شي إدارة خاصني شي شهادة شي حاجة غاتسنا شي حاجة. السلام عليكم أسيدي عافاك بغيت الشهادة ديال ديال الحياة أنا حي. عطيها ليا إلا كان ممكن. هذه الورقة هذه خاص يسني عليك سيلفداوشي ما كاينش دابا. راه أوقات العمل هذه فين مشى سيلفداوشي؟ عنده واحد المشكل شخصي المهم راه ما كاينش دابا. ما كاينش. أه أه أه أه سيلفداوشي. سبحان الله ها هو سيلفداوشي جا. وهذه اللعيبة كطرا في بزاف الإدارات مع كامل الأسف في بزاف الدول الأفريقية المتخلفة ماشي غير واحد الدولة محددة. هذه الدول هذو ديما كتمشي عندهم على ود واحد السيرفيس اللي هو حق ديالك وكيبقاو يديروا لك بزاف د العقبات في الطريق ديالك باش يعكسوا لك. غير باش أنت تجبد معه وتستعمل التقنية المحرمة دوليا 20 درهم مكمشة وهكذا أي مشكل كيتحل مع كامل الأسف. وهذا البلان أقوى حاجة باش تحلوا وأقوى هجوم رادع هو يتحد لهم الفلوس ما يبقاوش كيدوروا ليكيد. وهذه القضية راه مجربة بزاف الدول سبقونا عالميا و حاليا بصح عندهم أقل نسبة فساد بسباب هذه اللعيبة هذه. هذه التقنية ماشي كتحل الفساد 100% ولكن كتنقص منه لو ماكسيموم بوسيبل. على سبيل المثال أنا حاليا أكثر من عامين هذه ما طاحوش في يدي فلوس الليكيد. أقسم ما شفتهمش كاع بمرة ما بقيتش كنشوفهم ما عرفتش الشكل ديالهم كيفاش داير. فكانوا بزاف الناس بحالي ما عندهمش فلوس باش يدور معك أنت. دونك عملية تدوير عملية 20 درهم مكمشة غاتولي عملية صعيبة. وهذا الشيء اللي خدام عليه المغرب حتى هو و حاليا المغرب راه محيح باش يدخل لي كارط بونكير في المغرب كامل و كلشي يولي خدام بهم. حتى عند مول الحانوت حتى هو غتبداوا تخلصوا بـ كارط بونكير وهذه القضية خدام عليها المغرب وما تجيكمش غريبة. ومنا قدام إن شاء الله هذا البلان غا يتطبق في أرض الواقع وغاتكون أحسن حاجة وغاينقصوا بها الفساد لو ماكسيموم بوسيبل و 20 درهم مكمشة غاتختفي. الفساد هو أكثر حاجة كتخلي أي دولة متخلفة. و واخا يكون عندها البترول والذهب والفوسفاط و الألماس أي حاجة الدولة ما كتطورش كتبقى مطحطحة. تخيلوا معايا أفريقيا بوحدها كيتشفر منها سنويا 580 مليار دولار. يعني كل عام 580 مليار دولار كتختفي. فين هي؟ و ما عرفش واش عارفين هي 580 مليار دولار و شنو كان ممكن دير بها أفريقيا. غنطيكم حساب تقريبي شنو كان ممكن يديروا بها كون ما تشفرات. كانوا يقدوا يبنيوا في أفريقيا كلها نص مليون مدرسة و 5800 سبيطار. و 290 ألف كيلومتر ديال الطرقان ديال الكودرون. 580 مليون دار غاتزود بالكهرباء. و نزيدكم معلومة صادمة باش نسالي معكم بـ 580 مليار دولار ممكن نوفروا ماء صالح للشرب لجميع سكان أفريقيا. صغير و فين ما كنت في زيمبابوي غاتشرب ماء صالح للشرب. يعني أكبر مشكل في أفريقيا اللي هو الماء كان غا يتحل تماما. مع العلم نفكركم عاوتاني هذا الشيء كامل 580 مليار دولار كتسرق في الفساد في كل عام. يعني في كل عام نفس المبلغ كيمشي لينا. اللي خاصكم تعرفوا بأن الفساد عنده واحد المؤشر كنعبروا به باش نعرفوا واش طالع بزاف ولا هابط. وهذا الحساب مكلفة به واحد المنظمة اللي كتسمى ترانسبارانسي إنترناشيونال. كيمشيوا لـ 180 دولة وك يحسبوا فيها المؤشر د الفساد. إيلا كان 100 على 100 يعني هذه الدولة ما فيهاش فساد كاع بمرة. وهذه اللعيبة ما كايناش في العالم كامل. لحد الساعة ما كايناش دولة واحدة عندها مؤشر 100 على 100. والو ما كضورش. وإيلا كان 0 على 100 فهذه الدولة مع الأسف فيها واحد باك صاحبي واحد المحسوبية واحد ما كاينش بحاله كاع. إيلا كنتي في هذه البلاد أخوي شبكة. غنطيكم طوب 5 أكثر الدول فيها فساد وطوب 5 أقل الدول فيها فساد. و غايضركم خاطركم أكثر 5 دول فيها فساد في العالم 4 منها دول عربية ومسلمة. اللي نورمالمون ما خاصش يكون فيهم أصلا فساد بحكم هما دول مسلمة. وهذه اللعيبة كتضر في الخاطر. في المرتبة الخامسة كنلقاو ليبيا واليمن و غيني الاستوائية كلهم في المرتبة الخامسة و عندهم مؤشر الفساد 13 على 100. يعني التنقيط هابط جدا مطحطح. في المرتبة الرابعة كنلقاو سوريا اللي عندها في التنقيط 12 على 100. في المرتبة الثالثة كنلقاو فينزويلا اللي عندها 10 على 100. و كنا عارفين اش وقع فينزويلا الناس كيعانيوا من الفقر المدقع. و مع ذلك اللي خاصكم تعرفوا بأن فينزويلا كتصنع و كتصدر البترول أكثر من الدول الخليجية و أكثر من السعودية براسها. ومع ذلك الشعب كيعاني من الفقر. عليها عطاو لباباها المرتبة الثالثة في أكثر الدول فسادا في العالم. في المرتبة الثانية كنلقاو الصومال اللي عندها 9 على 100 في مؤشر الفساد. الصومال أكثر دولة كتعاني من المجاعة الشعب عندها كيموت بالجوع. ولكن المفارقة العجيبة اللي خاصكم تعرفوها بأن الصومال قادرة توكل و تغذي العالم كامل. ومع ذلك حاليا كتلقاها واحل غير مع الشعب ديالها و سنويا كيموتوا عندها الآلاف بالمجاعة و بسوء التغذية. أما في المرتبة رقم واحد كنلقاو الإخوان جنوب السودان اللي عندها 8 على 10 في مؤشر الفساد. والسودان كاملة و ما طفرتهاش بقى غير جنوب السودان. دولة قسمت راسها براسها وحاليا كتعاني من أكثر مؤشر الفساد في العالم. أ بلاتي أسامة المغرب فين هو؟ دابا غا نجيو للمغرب الحبيب بلادي بلادي. حسب آخر تصنيف اللي دار في 2024 من أصل 180 دولة المغرب كيحتل المرتبة 99 من ناحية الفساد. وعنده غير 37 نقطة على 100. دابا غانخرجوا من القاع و غانمشيو للقمة. طوب 5 أقل دول فيهم فساد في العالم. و مع كامل الأسف هذا الخمسة هما دول غير عربية غير مسلمة. في المرتبة الخامسة كنلقاو النورويج اللي عندها 81 على 100 في مؤشر الفساد. يعني مؤشر طالع جدا. و في المرتبة الرابعة كنلقاو نيوزيلاندا اللي عندها 82 على 100 في مؤشر الفساد. في المرتبة الثالثة كنلقاو السويد اللي عندها 84 على 100 في مؤشر الفساد. و في المرتبة الثانية كنلقاو فنلندا اللي عندها 88 على 100 في مؤشر الفساد. أما المرتبة رقم واحد كتمشي للدانمارك اللي كنلقاو عندها أكثر من 91 على 100 في مؤشر الفساد. يعني حرفيا بلاد غادخل ليها و أنت مرتاح ما كاين لا باك صاحبي ما كاين لا 20 درهم مكمشة. الحق ديالك غا تاخده و السيرفيس ديالك غا يقضيوه ليك. وبلا ما تسمع سير و أجي حتى لغدا راه سيلفداوشي كاع ما كاين اليوم راه مشى عنده الكلوة كضره. هذا الشيء ما غا تسمعوش وغاتعرف بأن حقك غا تاخده. الفساد كيهلك الدول كيطحطح كيسالي معاها. الدولة كطيح دودة و الشعب كيتكرفص. واش عارفين شحال د الخسائر المادية كتخسر كل دولة بسب بالفساد اللي فيها؟ خسائر بالمليارات الدولارات كيمشيو مهب الريح. وشحال من واحد عنده كفاءة وعنده مهارة و يستاهل. ومع ذلك بسب باك صاحبي والمحسوبية ما كيبانش كاع بمرة. كتلقاه داير كروسة و كيبيع شي حاجة و هو عنده ديبلوم مفركع في شي مجال. كاين واحد المثال ديما كيطيح في بالي كينطابق حرفيا على الدول اللي فيهم فساد. ديما كتلقى مشة جالسة على البيض يعني ماشي الدجاجة اللي جالسة على البيض. كتلقى مش جالس على البيض ماشي بلاصته ماشي المنصب دياله ما كيعرفش ليه ما عندوش خبرة في البيض. ومع ذلك كيحيد الدجاجة من فوق البيض و كيجلس هو فوق البيض و كيتكلف به. وهذا البلان حرفيا كنشوفوه بعينينا في الدول اللي فيها فساد. بزاف شادين مناصب ما كيستاهلوهاش وما كيعرفوش فيها. وبسبب هذه اللعيبة هذه كنضيعوا في الملايين الدولارات. غاتقول ليا ما فهمناش غانزيد نشرح لكم. بسبب إنسان شاد واحد المجال ما كيفهمش فيه هذاك المجال ما كي أدفونساش ما كيتطورش. و حتى من الميزانية اللي كنحطوا في ذاك المجال كتمشي مهب الريح. حيث ما كيعرفش ليها ما عرفش كيفاش يخدمها. والناس اللي عارفين ليها وكيعرفوا كيفاش يخدموها كتلقاه مهمش وكيبيع الخضرة في الجوطية ما كيعطيوهش فرصة. وهذه الوضعية غات ب ق ا ديما إلا ما غيرناش من راسنا. لا يغير الله ما بقوم حتى يغيروا ما بأنفسهم. و لا بقينا هكا غانبقاو في بلاصتنا و ما غانتطوروش كاع بمرة. وعارفكم باغيين تعرفوا شحال كيخسر المغرب بوحده من الفساد. حيث المغرب بلادنا فهمتي بلادي بلادي. حسب الـ E C O F I N A G E N C Y بسبب الفساد المغرب كيخسر كل عام 50 مليار درهم. يعني ما يقارب 5 مليار دولار. وهذا الرقم مصرح به من الهيئة الوطنية لمحاربة الرشوة والفساد. ودابا أجي معايا تشوف شنو كان ممكن يدير المغرب بهذه 50 مليار درهم كون ما تسرقات و ما مشاتش في الفساد. غايضركم راسكم شقيقه شقيقه. من هذه 50 مليار درهم غانحيدوا منها 20 مليار درهم و غانعطيوها للتعليم. وبهذا المبلغ نقدوا نبنيوا 2500 مدرسة في المغرب كامل بمعدل 8 مليون درهم لكل مدرسة. وغانعطيو 12 مليار و نص لمجال الصحة واللي نقدوا نبنيوا بها 18 سبيطار قدو قداش. بمعدل 700 مليون درهم لكل سبيطار. غانحيدوا منها 12 و نص مليار درهم غانعطيوها للطرقان و البنية التحتية. ونقدوا نبنيوا بها 1780 كيلومتر من الكودرون من الطرقان. يعني تقريبا من طنجة حتى الكويرة. و في الأخير غاتشيط لينا 5 مليار درهم وبهذا المبلغ نقدوا نحلوا المشكل ديال الماء والكهرباء في القرى. أكثر من 5 مليون شخص غا يتحل له هذا المشكل و نقدوا نعطيوه 1000 درهم لكل واحد. وا سي أسامة غير تقول. وما تنساوش 50 مليار درهم اللي كتمشي للمغرب كل سنة. يعني في كل عام غانعاودوا نفس الحاجة نبنيو عاوتاني و نشيدوا و نكبروا. وهذا الشيء كامل كنخسروه بسب الفساد. عليها حاليا المغرب خدام كيحارب فيه وبغا يدخل الرقمنة و أهم حاجة لي كارط بونكير باش يحارب التملص و 20 درهم مكمشة. وعارف أن هذا الشيء كيضر في الخاطر. وهذا الأرقام كاملة كتجيب شقيقه ولكن هذا واقع خاصنا نعرفوه و نعترفوا به باش نقدوا نصلحوه و نحاربوه. وهذا هو التفسير علاش حاليا غاتشوفوا بزاف الدول المتقدمة اللي ما فيهاش فساد خدامين بـ لي كارط بونكير و ماشي بالكاش. وغنلقاو بزاف الدول المتخلفة كلها خدامة بالكاش و ماشي بـ لي كارط بونكير. كيحاربوا الكارط بونكير ما بغاوهاش ما حاملينهاش. عليها حاليا المغرب خدام على هذه النقطة بغا يدخل الكارط بونكير و حتى الخلاص بـ لي كارط بونكير. والمهمة غاتكون صعيبة حيت حاليا أكثر من 71% من السكان المغاربة ما عندهمش حساب بنكي. والو عندهم جليجة في الدار ما كيحطوش فلوسهم في البنكة كاع بمرة ما كيتقوش فيها. فعليه غاتكون مهمة صعيبة للمغرب و تحدي صعيب جدا باش يدخل لي كارط بونكير في المغرب كامل. وهذه اللعيبة غات أخذ وقت طويل للمغرب كما أوروبا حتى هي خدات ليها وقت طويل جدا باش يوصلوا لهذا النيفو اللي هما فيه حاليا. وأكيد بـ لي كارط بونكير ماشي غانحاربوا الفساد 100% ولكن على الأقل غانقصوا منه. وهذا الشيء اللي كنتمنوه يوقع من دابا القدام. فلهذا التوقع ديالي شخصيا بأن هذه الفلوس منها قدام غا يختفيوا. ماشي قريبا غا يبقاو معنا واحد شوية د الوقت ولكن أكيد ما غا يطولوا معنا بزاف. و غايجي واحد النهار فين الفلوس الورقية سوف تختفي إلى الأبد.

[16:54]إخواني أخواتي مع كامل الأسف وصلنا لا فان د الفيديو. جيسبير الكونسيبت يكون عجبكم هذا الكونسيبت طاح عليا فاش جلست مع راسي وفكرت إمتى آخر مرة استعملت فيها أنا فلوس ليكيد كاش. و لقيت الجواب بأن هذه عامين ما طاحتش في يدي فلوس كاش كاع بمرة ما كنشوفهمش بعينيا أصلا. ولكن في المغرب كنت ديما هازهم في يديا فعاليه سولت راسي لماذا العالم خدام كيحارب في الفلوس؟ و قلبت و لقيت الجواب و جبته لكم. هذا ما كان جيسبير الكونسيبت يكون عجبكم خلوا لي معكم واحد لايك تابوناو في لا شين أكتيڤاو لا كلوش بارطاجي مع أصحابكم ونتلاقاو إن شاء الله فيديو الجاي اللي غاتكون نهار السبت و هذا الشيء اللي كاين يلا باي باي باي باي باي باي باي باي باي.