How Elon Musk Became World's Richest Man | Hindi

[0:00]Saal 1984, jahan dusre bacche video games khela karte the, wahi ek 12 saal ka ladka coding karke khud ka video game bana raha tha. Ye ek genius tha, dusron se alag tha aur isi liye iska koi dost nahi tha. Ise buri tarah bully kiya jata tha, lekin iske bawajood isne himmat nahi haari. Aaj wahi ladka rockets, electric cars aur AI tools banake world ka sabse ameer aadmi ban chuka hai. Ye kahani hai Elon Musk ki. 1971 mein South Africa ke Pretoria sheher mein janam hota hai Elon Musk ka. Unke father ek mechanical engineer the aur mother ek model aur dietician thi. Bachpan mein Elon ko ek problem thi. Wo kai baar ek trance ki situation mein chale jaate the. Jis dauran unke aas paas chahe kuch bhi ho raha ho, unhe bhanak tak nahi lagti thi. Parents aur doctors ko laga ki Elon ko sunne mein koi problem hai par baad mein pata chala ki is dauran unka brain ek super computer ki tarah kaam karta tha. Bahar ki duniya pe focus khatam ho jata tha aur poori brain power complex ideas ko visualize karne mein lag jati thi. Basically unke dimag ke andar ek poori science lab chal rahi hoti thi. Elon ki ek aur aadat thi lagatar 10-10 ghanto tak encyclopedias aur science fiction books padhna. Aur inhi books ko padh padh ke wo kafi intellectual ho gaye the. Ek raat wo apni cousins ke sath bahar khel rahe the. Tabhi unki ek cousin ne kaha ki use andhere se dar lag raha hai. Jiske jawab mein Elon ne kaha ki darkness is only the absence of light. Elon hamesha logo ko isi tarah ke logical aur factual tariko se jawab dete the jis karan dusre bacche unhe pasand nahi karte the. In fact unhe school mein buri tarah bully kiya jata tha. Ek baar to students ki ek gang ne unhe seedhiyon se niche fek diya aur fir itna peeta ki unhe hospital mein admit karna pada. Lekin in sabhi incidents ne Elon ko pain aur hardship sehne ke liye mazboot bana diya. 8 saal ki umar tak Elon ki family ek happy family thi aur ye photo unhi happy times ki hai. Lekin fir ek saal ke andar andar sab kuch bikhar gaya. Unke parents ka divorce ho gaya lekin Elon ne decide kiya ki wo apne father ke sath rahenge. 10 saal ki age mein Elon ne ek mall mein pehli baar ek computer dekha aur use dekh ke wo itne fascinated ho gaye. Ki unhone apne father se use kharidne ki zid ki. Kuch time baad unhe 5 KB memory wala ye computer mil gaya. Saath mein basic programming language wali ek workbook bhi mili. Ise generally 6 mahino mein khatam karna hota tha lekin Elon ne 3 din lagatar bina soye sabhi lessons complete kar diye. 1984 mein keval 12 saal ki umar mein Elon ne isi computer mein coding karke ek video game bana diya aur uska naam rakha Blaster. Ye ek single player space shooter game tha jisme player ko apni space ship ka use karke aliens ki space ship ko destroy karna hota tha. Unhone Blaster ko ek company ko $500 mein bech bhi diya aur technically ye unki life ka pehla business tha. High school tak Elon ko samajh aa chuka tha ki wo baki bachchon se zyada capable hain aur unki incapacities ko keval ek desh justify kar sakta tha aur wo desh tha America. Lekin usse pehle unhone Canada jaane ka socha. Kyunki Elon ki mother ek Canadian citizen thi aur wahan ke law ke according wo apni citizenship ko apne bachchon ko transfer kar sakti thi. Aur isi tarah se 17 saal ke Elon Canada ke liye nikal pade. Canada mein wo apne ek cousin ke sath rehne lage aur chhote mote kaam karne lage. 1989 mein unki mother aur bhai Kimbal bhi Canada aa gaye aur isi dauran Elon ne Queens University mein admission le liya. Fir 2 saal ke andar andar unhone USA ki University of Pennsylvania mein transfer bhi le liya aur finally unki America mein entry ho gayi. 1995 mein Elon aur unke bhai Kimbal college khatam karne ke baad apna khud ka ek startup karna chahte the. Us samay internet common logo tak tezi se pahuchna chalu ho chuka tha lekin iske baad bhi local businesses ya stores ko dhundne ke liye logo ko sheher ki paper directories use karni padti thi. Jisme basically sheher ke sabhi businesses ki details hoti thi. Saath mein store ki location tak pahuchne ke liye bhi physical maps use karne padte the ya logo se direction puchna padta tha. Ise dekhte hue Elon ko idea aaya ki kyu na businesses ke liye ek online listing banayi jaye. Ek aisi website jahan sheher ke sabhi businesses listed honge aur restaurants, hotels aur doctors jaisi categories mein divided honge. Taki log inhe easily search kar sake. Saath mein directions ke liye ek online map bhi hoga. Elon aur Kimbal ne ek chhota sa apartment leke is idea pe kaam karna shuru kiya. Unhone apne startup ka naam rakha Zip2. Elon din raat coding karte aur Kimbal door to door jaake dukandaron ko Zip2 mein list hone ke liye convince karte. Ek saal mein Zip2 ki team grow hui, platform improve hua aur customers tezi se judne lage. Baad mein Zip2 ne dusri companies ke liye softwares banana bhi shuru kiya. Ise dekhte hue Zip2 ko pehle 3 million aur fir $50 million ki funding mil gayi. 1999 tak poori duniya mein internet boom apni peak pe tha aur badi companies achche startups ko acquire karna chahti thi. Isi liye Compaq ne Zip2 ko $307 million mein acquire kar liya. Elon ko apne shares ke badle mein mile poore $22 million. Aur isi tarah keval 27 saal ke Elon Musk ek multi millionaire ban gaye. Elon chahte to in paiso ke sath retire ho sakte the lekin Zip2 ki success to unke aane wale future ka 1% bhi nahi thi. Waise agar aap bhi ek business karte hain ya karna chahte hain to ye dhyan rakhiyega ki keval ek achha product bana lene se business successful nahi hota. Product ke sath sath aapko aapke business ke day to day operations jaise invoicing, accounting, recruitment aur customer relationships ko bhi manage karte aana chahiye. Waise kitna achha hota agar hum in sabhi chizon ko ek hi all in one management software ke through manage kar sake. Well ye possible hai Odoo ke sath. Odoo 45 aise apps offer karta hai jo kisi bhi type of business aur kisi bhi size of business ke sabhi business needs ko cover karta hai. Yahan aap invoices bana sakte hain, books of accounts maintain kar sakte hain plus marketing, website aur sales bhi manage kar sakte hain. Odoo ki khas baat ye hai ki ye kafi easy to use hai. Ise use karne ke liye kisi expert ki zarurat nahi hai. Also inke apps ek dusre se integrated hote hain. For example, agar aap Odoo ke through ek invoice raise karoge to uski entry automatically aapke books of accounts mein ho jayegi. Similarly, jab aap ek sales record karte ho to aapke inventory records automatically update ho jayenge aur CRM app mein customer ki purchase history bhi update ho jayegi. The best part is ki aapko in sabhi apps ke liye alag alag pay nahi karna. Ye sare apps ek hi single affordable subscription mein aa jate hain. Inka first app to lifetime ke liye 100% free hai. To agar aap bhi apne business operations ko digitize karna chahte ho to description aur pinned comment mein diye hue link se Odoo pe abhi sign up karo. College ke dauran unhe Nova Scotia Bank mein internship karte waqt realize hua ki banking industry kafi slow aur old fashioned hai. Isi liye wo ab banking industry ko disrupt karna chahte the. Unka vision tha banking ke har ek aspect jaise payments, investment, loans aur savings accounts ko poori tarah online le jana bina kisi physical branches ke. Is vision ke sath unhone $12 million invest kiye aur 1999 mein start ki X.com. Lekin us samay log online shopping pe bhi trust nahi karte the. Online banking to door ki baat thi. Jis karan Elon ke liye customers lana bahut difficult ho raha tha. Isi liye Elon ne ek kamal ki scheme sochi. Unhone har naye user ko join karne par free mein $20 dena chalu kar diye. Is $20 ko wo customer immediately kharch kar sakta tha. Saath mein is app ko dusre logo ko refer karne par bhi $10 ka referral bonus milta tha. Ye strategy itni successful hui ki agle do hi mahino mein X.com pe 2 lakh users aa gaye. But problem ye thi ki Elon aisa karne wale ek laute nahi the. Isi dauran Peter Thiel naam ke ek young entrepreneur ne bhi PayPal naam se ek digital bank start kiya tha. Dono hi companies ek dusre ko harane ke liye marketing pe karodo rupay kharch kar rahi thi. Lekin year 2000 ki shuruaat mein unhe realize ho gaya ki agar wo isi tarah ladti rahi to dono hi companies barbaad ho jayengi. Isi liye March mein dono companies merge ho gayi. Is nayi company ke largest shareholder aur CEO Elon the aur company ka naam bhi X.com tha. Lekin is merger ke baad ye baat clear ho gayi ki Elon aur PayPal ke founders ke beech mein bahut disagreements the. Jahan Elon company ka naam X.com chahte the wahi employees aur customers PayPal prefer kar rahe the. Saath mein Elon ka management style kafi ruthless tha. Wo apne employees ko micromanage karte the aur galtiyan nikalne par unhe publically criticize karte the. Jis kaam ke liye kai din ya hafte lagne hote the Elon usi kaam ko kuch hi ghanto mein expect karte the. Isi dauran Elon ne apni long time girlfriend Justine se shadi ki thi aur September 2000 mein wo honeymoon ke liye Australia gaye the. Mauke ka fayda uthate hue company ke senior executives aur board of directors ne unhe CEO ki position se hata diya aur Peter Thiel ko CEO bana diya. Unhone wapas aake control regain karne ki bahut koshish ki par wo successful nahi hue. Lekin fir bhi wo PayPal ke largest shareholder bane rahe. Luckily Peter Thiel ki leadership mein bhi PayPal ne bahut achhi growth ki aur 2002 mein eBay ne PayPal ko $1.5 billion mein acquire kar liya. Is deal se Elon ko mile poore $180 million. PayPal ki success ke baad Elon Silicon Valley ke sabse successful entrepreneurs mein se ek ban chuke the. Ki tabhi Elon ki kahani mein ek bahut badi tragedy ho gayi. Ek beemari ke chalte unhone apne dhai mahine ke bete ko hamesha ke liye kho diya. Is incident ne Elon ko deeply impact kiya. Wo teen hafto tak apne ghar nahi gaye kyunki unke andar ghar mein empty cradle dekhne ki himmat nahi thi. Bachpan mein Elon bullying se deal karne ke liye khud ko books aur programming mein duba diya karte the. Similarly apne bete ke loss se deal karne ke liye unhone apne aap ko kaam mein duba diya. 2001 mein 30 saal ke Elon fir se ek aisi industry dhundne lage jise disrupt kiya ja sake. Bachpan mein unhe space mein kafi interest tha aur wo mini rockets banake launch bhi kiya karte the. Isi liye unhone space sector ko explore karna chalu kiya. Ek din unke dimag mein question aaya ki aakhir humans ne abhi tak Mars ko explore kyun nahi kiya. Unhone NASA ki website check ki aur paya ki Mars ko explore karne ka NASA ke paas koi plan hi nahi tha. Aur isi movement mein unhone decide kiya ki unka agla mission hoga Mars ko explore karna. Elon ne world ke best rocket scientists se mulaqat ki aur khud ko rocket science ki kitabo mein immerse kar diya. Jisse wo khud rocket science mein expert banne lage. Elon ne Life to Mars Foundation launch kar di aur Mars OASIS project start kiya. Jiska main aim tha Mars mein ek pressurized greenhouse bhejna aur wahan Mars ka pehla paudha ugana. Unka objective tha duniya ke samne prove karna ki Mars mein zindagi ho sakti hai. Wo is experiment ko cameras ke through poori duniya ko dikhana chahte the aur wapas Mars exploration mein poori duniya ka interest jagana chahte the. Elon ka plan tha ki wo Russia se intercontinental ballistic missiles kharidenge aur unhe launch vehicle ki tarah use karenge. Unhone kuch aerospace experts ke sath Russia ki trip plan ki lekin Russians ke sath unke negotiations kabhi theek se ho hi nahi paye. Russians ne Elon ko unki age ke karan seriously nahi liya. Elon yahan aaye the $20 million mein teen missiles kharidne lekin Russians ne keval ek hi missile ka price $21 million quote kiya. Elon aur unki team ko samajh aa chuka tha ki Russia se rocket ki ummeed karna bekar hai. Wapas aate hue flight mein jahan unki team disappointed baithi thi wahi Elon lagatar laptop mein kuch kaam kar rahe the. Kuch der baad unhone apni team ko kaha ki ab hum khud hi rocket banayenge. Unhone laptop mein raw materials, manufacturing, assembly aur launch ke sabhi costs ko calculate kar liya tha. Unhe realize hua ki rocket banane ke liye jo raw materials lagte hain unki cost final rocket ke cost ki keval 2% - 3% hoti hai. Baki sara kharcha better design aur manufacturing process se kam kiya ja sakta hai. Elon ko samajh aaya ki space industry ki asli problem ye nahi thi ki koi Mars explore nahi kar raha balki problem ye thi ki insano ke paas aisa karne ke liye affordable rockets hi nahi the. Isi liye ab wo space industry ko badal kar rakh dene wale the aur isi tarah start hui SpaceX. June 2002 mein Elon ne ek 75,000 sq ft ka warehouse kharida aur use ek modern rocket factory mein convert kar diya. Aur Boeing aur NASA jaisi organization se world ke best rocket scientists aur engineers ko hire kiya. In sab ka keval ek mission tha, space industry mein sabse sasta aur sabse tezi se rockets banane wali company banna. Ise achieve karne ke liye Elon ne kai innovative strategies use ki. Jahan baki aerospace companies rockets ko design karne wali team aur rockets ko build karne wali teams ko alag alag rakhti thi wahi SpaceX ne dono ko ek sath bitha diya. Isse time bacha aur galtiyan kam hui. Fir SpaceX ne vertical integration adopt kiya. Matlab jo parts pehle third party suppliers se aate the jaise engine, fuel tank aur battery pack ab SpaceX unhe khud hi banane laga. Kyunki suppliers slow aur expensive the. Finally Elon ne dekha ki baki companies rocket ke har ek part mein 2x-3x extra paisa kharch kar rahi hain. Jabki same kaam saste part se bhi ho sakta tha. Isi ke sath Elon ne declare kiya ki SpaceX ke pehle rocket ka naam hoga Falcon 1. Us samay dusri companies 600kg ke payload ko lower Earth orbit mein bhejne ke liye kareeb $70 million charge karti thi. Wahi Elon ka promise tha ki wo same payload ko keval $7 million mein bhej denge. SpaceX ka target tha ki wo Falcon 1 ko keval ek hi saal mein launch kar denge lekin poori koshish ke baad bhi ise taiyar karne mein poore 4 saal lag gaye. Finally 2006 mein wo din aaya. 70 foot uncha silver colour ka Falcon 1 launch ke liye taiyar tha. Countdown khatam hua aur rocket zameen se uthne laga aur poori team khushi se jhoom uthi. Ki tabhi 25 second baad ek disaster ho gaya. Ek chhote se fuel leak ke karan engine ke paas aag lag gayi. Falcon 1 ne control kho diya aur crash kar gaya. Elon aur unki team literally apne dreams ko jhulaste hue dekh rahi thi. Lekin unhone courage gather kiya aur bina zyada samay gawaye second launch ki taiyari shuru kar di. Theek ek saal baad Falcon 1 ka second launch attempt hota hai. Is baar launch ke 3 minute beet chuke the aur sab kuch sahi lag raha tha. First stage ka separation perfectly hua lekin fir second stage ka engine time se pehle hi band ho gaya. Jis karan Falcon 1 aasman mein hi spin hone laga aur fir se crash ho gaya. Elon dukhi the lekin unhe pata tha ki wo success ke kafi close hain. Aur isi liye unhone teesre launch ki taiyari shuru kar di. August 2008 mein Falcon 1 ka teesra launch attempt hua lekin is baar bhi success haath nahi lagi. Ek minor error ke karan Falcon 1 aasman mein hi explode ho gaya. Control room mein pin drop silence tha. Is rocket ke sath Elon ke $100 million bhi jal chuke the. SpaceX ke paas ab keval ek aur launch ke paise bache the. Agar next attempt success nahi hoga to SpaceX hamesha ke liye khatam ho jayega. Ek taraf SpaceX company struggle kar rahi thi to wahi Elon ki ek aur company thi jo barbaadi ki kagaar pe thi. Aur wo thi Tesla. Jab Elon space industry mein entry le rahe the to usi waqt wo automobile industry ko bhi analyze kar rahe the. Elon ko pata tha ki abhi ki cars fossil fuels pe dependent hain aur fossil fuels lagatar khatam ho rahe hain. Plus inse pollution to hota hi hai. Isi liye unka prediction tha ki future mein har country ki governments clean energy se chalne wali cars mein shift karna chahengi. Matlab electric cars hi future hai. Us samay tak kuch companies ne electric cars launch ki thi jaise General Motors ki EV1. Lekin slow, expensive aur kam range hone ke karan ye sabhi fail ho gayi thi. Jiske baad automobile companies ne electric cars se apna dhyan hata liya tha. Elon ko samajh aa gaya tha ki agar electric cars ko successful banana hai to unhe speed, range, price aur aspirational value mein gasoline cars se better hona padega. Fortunately unhe isi vision pe kaam karne wala ek startup mil gaya aur wo startup tha Tesla Motors. Tesla ko Martin aur Marc naam ke engineers ne start kiya tha aur unka idea tha Roadster naam ki ek high performance electric sports car banana. Traditional electric cars lead acid batteries use karti thi lekin Tesla ne research mein paya. Ki agar Roadster ko jaldi charge karna hai aur range ko 300km tak badhana hai to usme wahi battery use karni hogi jo phone aur laptop mein lagti hai. Yaani Lithium Ion battery. Saath mein inka plan tha Roadster ko 0-100km tak keval 4 seconds mein pahuchana aur looks aur features mein bhi ye kafi superior ho. 2004 mein isi vision ko dekhte hue Elon ne Tesla mein $6.5 million invest kiye aur iske lead investor ban gaye. Lekin Tesla ka vision jitna bold tha uska execution utna hi difficult tha. Lithium-ion battery technology kafi nayi thi aur use ek car ke liye modify karna kafi difficult ho raha tha. Saath hi Tesla ne estimate kiya tha ki wo har ek Roadster car ko keval $65,000 mein bech lenge. Lekin 2007 tak to car ko banane ka hi kharch $100,000 tak pahuch gaya. Itne zyada cost mein to Tesla ka business model hi collapse ho jata. Situation ki urgency ko samajhte hue Elon khud Tesla ke CEO ban gaye. Lekin wo kuch kar pate isse pehle aa gaya 2008 ka Global Financial Crisis. Jisne automobile industry ko bahut negatively impact kiya. SpaceX ke alawa Elon ke paas jitna capital tha wo use Tesla mein already invest kar chuke the. Aur baki investors ne aur paise invest karne se mana kar diya tha jis karan Tesla bankruptcy ki kagar pe thi. Basically 2008 mein ek taraf Elon ki SpaceX company teen lagatar launch failures ke baad barbadi ki kagar pe thi aur dusri taraf Tesla Motors bhi bankrupt hone wali thi. Aise mein koi bhi logical entrepreneur funds raise karke dono mein se kisi ek company ko save karta lekin Elon different the. Unhone apni McLaren car aur baki personal assets bech ke Tesla mein paise laga diye taki wo kuch din aur survive kar sake. Saath mein unhone personally involve hoke Falcon 1 ke chauthe launch ko successful banane ke liye kaam kiya. Finally December 2008 mein Falcon 1 ka chautha launch ka din aa gaya. Ek baar fir se Falcon 1 launch pad pe taiyar khada tha. SpaceX aur even Elon ka future is ek rocket pe tika hua tha. Countdown khatam hua aur rocket lift hone laga. First stage successful rahi, second stage successful rahi aur third stage bhi successful rahi. Lekin kisi ne celebrate nahi kiya. Fir kuch minute baad control room mein sab cheer karne lage. Screen mein confirmation aa gayi thi ki Falcon 1 orbit mein pahuch chuka hai. SpaceX aisa karne wali duniya ki pehli private company ban chuki thi. Iske kuch hi hafto baad NASA ne SpaceX ko $1.6 billion ka contract de diya. Jisme SpaceX ko International Space Station tak cargo pahuchana tha. Is contract ke chalte SpaceX duniya ki sabse successful private space company ban chuki thi. Lekin dusri taraf Tesla abhi bhi struggle kar rahi thi. Isi liye Elon ne personally investors ko contact kiya aur unhe samjhaya ki na keval unki car ready hai balki hazaro logo ne ise pre-order bhi kar rakha hai. Unhien ye funding keval is car ko mass produce karke customers tak pahuchane ke liye chahiye. Finally Elon ki mehnat rang layi. Unhe Christmas Eve mein $40 million ki emergency funding mil gayi. Aur Tesla bankrupt hone se kuch hi din pehle bach gayi. Is funding se Tesla ne Roadster ka mass production aur deliveries chalu kar di. Aur iski success se Tesla ne poori duniya ko prove kar diya ki ek electric car fast, long range aur classy ho sakti hai. Lekin ek problem thi. Roadster ek two seater sports car thi jo kafi expensive thi aur keval ek niche customer segment ke liye banayi gayi thi. Elon ko pata tha ki agar unhe Tesla ko long term mein ek successful aur badi automobile company banana hai to unhe mass market ke liye cars banani hongi. Aur isi liye 2012 mein Tesla ne launch ki Model S. Ek premium electric sedan jo 0 se 97 km ki speed keval 4.2 seconds mein achieve kar sakti thi. Single charge mein iski range kareeb 500 km ki thi aur iske looks kafi cool the. Lekin Model S ki khas baat ye thi ki ye ek car nahi balki ek computer thi jisme wheels lage hue the. Isme 17 inch ki massive touch screen thi jisme users virtually car ke har ek function jaise lighting, climate, navigation, entertainment ko control kar sakte the. Plus is car mein laptop ya mobile ki tarah software update ke through improvements aur naye features add kiye ja sakte the. Even car ke door handles apne aap bahar aa jate the jab user car ke paas aata tha. In sab ke karan Model S keval ek achhi electric car nahi balki sabhi existing cars se bahut behtar thi. Launch hote hi Model S kafi successful ho gayi aur Motor Trend ne ise car of the year ka award diya. Iske baad na keval Tesla ne apna IPO launch kiya balki 2013 mein wo profitable bhi ho gayi. Aage chal ke Tesla ne Model X, Model 3 aur Model Y launch ki aur 2017 tak Tesla duniya ki sabse valuable car company ban gayi. Aaj to Tesla fully self driving cars banane ke kafi close hai. Dusri taraf SpaceX ne Falcon 9 launch kiya jo Falcon 1 ke comparison mein 50 guna payload ko space mein le gaya. Fir 2015 mein inhone reusable rockets launch kiye jisse har launch ke liye naye rockets banane ki requirement khatam ho gayi aur space travel ka cost bhi kafi kam ho gaya. SpaceX ke through Elon ne Starlink naam se hazaro satellites bhi space mein chhodhi hain jo duniya ke kai hisso ko high speed internet services provide kar rahi hain. Aur aaj ke din ye apna sabse bada rocket Starship bana rahe hain jo humans ko Mars tak le ja sakega. Iske alawa Elon ne transportation ko revolutionize karne ke liye The Boring Company aur Hyperloop ka concept ijad kiya hai. 2015 mein inhone Neuralink launch kiya jo humans ke brain mein computer chips ko implant karti hai. Taki brain aur computer directly communicate kar sake. Elon ka latest move tha 2023 mein Twitter ko acquire karke social media space mein entry lena. Saath mein wo X.AI ke through AI company bhi start kar chuke hain. In sabhi companies ke chalte Elon duniya ke richest person ban chuke hain. Aur unki net worth kareeb $400 billion hai jo second richest person Jeff Bezos se almost double hai. Lekin Elon jitne ameer hain utne hi controversial bhi hain. Unke employees ne tough working conditions aur extreme work pressure ki complaints ki hain. Even Twitter ko acquire karne ke baad bhi unhone ek hi jhatke mein hazaron employees ko fire kar diya tha. Unke controversial tweets kai baar stock prices ko negatively impact karte hain. Finally, election campaigning ke liye kareeb $280 million donate karne ke baad Elon President Trump ke kafi close ban chuke hain. Jisse unke paas paise aur political powers ka ek lethal combination hai aur kuch logo ko dar hai ki wo iska galat istemal bhi kar sakte hain. Lekin in sab ke baad bhi Elon ke mamle mein ek baat 100% fit baithti hai, you love him or hate him, you can't ignore him. Kyunki ye insan future ka wait nahi karta balki khud future banata hai. Ye kahani thi Elon Musk ki. Agar aapko ye video achhi lagi to main recommend karunga ki aap next is video ko dekhen.