[0:01]زلزال سياسي في امريكا، ترامب يطيح بوزيره العدل المدعي العام بام بوندي ووزير الحرب الامريكي بيت هيكسث يقيل رئيس اركان القوات البريه في الجيش الامريكي. النهارده الجمعه 3 ابريل 2026 الساعه دلوقتي 2:00 صباحا بعد منتصف الليل بتوقيت القاهره. ايه الحكايه؟ زلزال كبير جدا داخل الاداره الامريكيه، داخل البيت الابيض، داخل الجيش الامريكي. ناس بتقول ان ده مؤشر لانقسام، ناس بتقول ان ده مؤشر لصراع، ناس بتقول ان ده تصدع من الداخل في فريق دونالد ترامب سواء على المستوى العسكري او المستوى السياسي. ليه بيقولوا الكلام ده؟ تعالوا نشوف مين الشخصين اللي تمت الاطاحه بهم في الساعات القليله الماضيه. نبدا من الجانب العسكري لانه اللي يخصنا يخص ايران ويخص الحرب اللي موجوده دلوقتي. تم اجبار رئيس اركان القوات البريه في الجيش الامريكي الجنرال راندي جورج على الاستقاله فورا وتم احالته للتقاعد. مين الراجل ده؟ ايه اهميته وايه اهميه منصبه؟ الراجل ده واحد من اهم الضباط في الجيش الامريكي في ال 20 25 سنه اللي فاتوا ويمكن قبل كده، شارك في حرب الخليج، شارك في حرب افغانستان، شارك في حرب العراق. كان منوط به اعاده تشكيل او اعاده تطوير الجيش الامريكي في كل المجالات تقريبا الفتره الاخيره. واحد من اهم القيادات العسكريه في الجيش الامريكي. مهام المنصب بتاعته مهام مهمه جدا وخطيره جدا داخل الجيش الامريكي. الراجل ده عضو هيئه الاركان المشتركه بيقدم المشوره بشكل مباشر للرئيس ترامب ولوزير الحرب بيت هيكسث. بيشارك في قرارات الحرب وقرارات السلم للجيش الامريكي والاداره الامريكيه. مسؤول عن ميزانيه كبيره جدا للتسليح، هو اللي بيضع اولويه التسليح، وهو رئيس اركان القوات البريه للجيش الامريكي. يعني بالتاكيد صاحب قرار مهم جدا في عمليه بريه في ايران سواء بالايجاب او بالسلب. ليه تمت الاطاحه به؟ في بعض التكهنات وفي بعض المعلومات. واشنطن بوست اتكلمت عن معلومات نقلا عن مصادر وقالت انه بيت هيكسث شايف انه لازم يطيح بكل القيادات الكبيره في البنتاجون لانهم لا يدين بالولاء التام له ولدونالد ترامب. يعني مش بيتحولوا لميجا فون مكبر صوت زي ما وزير الحرب الامريكي عامل دلوقتي. فهو عايز يطيح بالناس دي كلها واطاح بعدد كبير فعلا وتبقى تقريبا اثنين او ثلاثه هم اللي شغالين او بيحاول ان هو يطيح بيهم. فكان راندي جورج واحد من هؤلاء اللي يجب الاطاحه بهم لان ولاؤه يمكن للجيش الامريكي ولاؤه يمكن للولايات المتحده لكن ولاؤه ليس كاملا لبيت هيكسث مذيع الفوكس نيوز السابق ودونالد ترامب المجنون البرتقالي. اذا تمت الاطاحه بهذا الرجل واشنطن بوست بتقول الكلام ده لكن في بعض التكهنات ان الراجل ما كانش موافق على العمليه البريه الاربع خطوات اللي فيها او الاربع مراحل. احتلال جزيره خرج، غزو بري شامل، سرقه مخزون اليورانيوم على الارض او السيطره على مضيق هرمز. واضح ان الراجل ما كانش يعني معجب او مغرم بقصه الغزو البري والاوهام الترامبيه في تحقيق عمليه بريه داخل ايران فربما كان ده احد اهم الاسباب للاطاحه به. وده بيقول لك قد ايه ان الاداره الامريكيه حتى الجيش الامريكي منقسم على نفسه في قصه العمليه البريه ضد ايران وفقا لبعض التقديرات اللي اللي كتبت. طيب على المستوى الاخر ترامب اطاح بمين النهارده كمان؟ اطاح ببام بوندي وهي المدعي العام وزيره العدل اللي هو جايبها مخصوص عشان تنفذ اجندته.
[3:43]عشان تشتغل في موضوع جيفري ايبستين تشتغل في موضوع خصومه. تعرف تسرع المحاكمات، تعرف تقلل قصه التفتيش اللي كان بيحصل عليه والكلام ده. تلاحق كل اللي لاحق ترامب قضائيا اثناء فتره بايدن. طيب ليه بام بوندي اللي هي كانت بتعمل كل حاجه لترامب فشلت في الاخر ان هي تبقى مدعي عام او وزير عدل لفتره اطول. واصبحت تقريبا اقصر فتره كوزيره عدل في التاريخ الامريكي في ال 60 70 سنه اللي فاتوا لعدد من الاسباب. اول قضيه او اول سبب هو قضيه ايبستين الست دي فشلت تماما في التعامل مع ايبستين. في مجموعه من التقارير سي ان ان كانت بتتكلم عنها انه بام بوندي قالت في الاول ان القايمه بتاعه عملاء ايبستين موجوده على المكتب عندي لكن ما طلعش فيه قائمه ولا حاجه. قالت كمان ان هو هنسلم الفايلات بتاعه ايبستين وملفات ايبستين لكل الناس وراحت جابت مجموعه من المؤثرين تبع ماجا وسلمتهم ملفات كلها بالاسود متغطي عليها. فده اثار شكوك، حضر الجلسات استماع في الكونغرس كان ادائها ضعيف جدا لدرجه ان سوزي وايلز رئيسه موظفي البيت الابيض قالت في مقابله فانتي فير ان بام بوندي فشلت فشلت ذريع واخفقت في اداره ملف ايبستين. وبالتالي حولت ايبستين لورقه ضغط دلوقتي وملف بيتهاجم بيه دونالد ترامب فبالتالي كان لازم انه يشيلها. الجزء الاخر ان هي تعاملت مع خصوم ترامب زي ما هو عايز بس بغشميه شديده جدا وتجاوزت فيها الدستور وتجاوزت فيها القانون وتجاوزت فيها بروتوكولات وزاره العدل الامريكيه. وبالتالي فتحت جبهات حروب كبيره جدا على نفسها وعلى دونالد ترامب لدرجه ان ترامب نفسه انتقدها اكثر من مره. النقطه الثالثه ان ادائها الاعلامي وفي جلسات الاستماع في الكونغرس اداء ضعيف جدا في كل مره كانت بتظهر كانت بتجيب انتقادات كبيره لاداره ترامب. حط بام بوندي جنب الجنرال راندي جورج هتكتشف ان في زلزال سياسي حقيقي وانقسامات داخل البيت الابيض والجيش الامريكي والفضل يعود لحرب ايران وجيفري ايبستين.
