[0:00]Modi sarkar ke dwara ki ja rahi hai witch hunting itni predictable hai ki Sonam Wangchuk jaante the, kabhi bhi koi ut patang bahana dekar unhe jail dala ja sakta hai. Jab China ghus aata hai to Ladakh ke log jaan dekar rote hain, magar agli baar wo aaye to hum unko rasta dikhayenge, hum rokhenge nahin. Are baap re, isse to prove ho jaata hai ki ye to Chinese agent hain. Lekin sach baat kya hai, actually mein ye baat unhone nahin kahi, ye out of context kaat ke clip dikha rahe hain. Yahan ke ek famous comedian hain jinhone kaha ki Sarkar ke paltu trolls itne kamchor hain ki is sab ke alawa inhein kuch mila hi nahin Sonam Wangchuk ko badnaam karne ke liye to inhone three idiots movie par hi aarop lagana shuru kar diya. Ye sab kya dekhna pad raha hai? In logon ne khud to desh ko aage badhane ke liye kuch kiya nahin hai aur Sonam Wangchuk jaise aadmi par ye sawal utha rahe hain. Nathuram Godse ko pujne walon se waise kya hi expect kiya ja sakta hai? Inhein har Gandhi violent aur deshdrohi dikhega aur har Godse mein inhein apna Bhagwan dikhega. Namaskar doston, 26 September 2025, dopahar ke kareeb 12:30. Darjon ki sankhya mein police officers Sonam Wangchuk ke ghar mein ghus jaate hain. Bina kisi court order ke unke ghar ki talashi li jaati hai aur unke phones aur electronic devices ko chheen liya jaata hai. Iske baad unhein arrest karke seedha airport le jaya jaata hai. Unki patni is waqt ghar par maujood nahin thi, wo institute mein kaam kar rahi thi. Baad mein unhein ek phone call aati hai ek inspector se. Inspector phone par batate hain ki unke pati ko National Security Act (NSA) yaani NSA ke तहत arrest kar liya gaya hai. Unhein Rajasthan ki Jodhpur jail mein bheja jaa raha hai aur flight land karte hi wo apne pati se baat kar sakengi. Lekin ghante beet jaate hain, koi khabar nahin aati. Unki wife ko Sonam se baat karne ka koi mauka nahin diya jaata. Jis samay main ye video bana raha hoon doston, inki wife ka kehna hai ki Sonam Wangchuk traceable nahin hain. Unke baare mein koi ata pata nahin ki wo sahi halat mein bhi hain ya nahin, aur hain to kahan par hain. Jis act ke तहत inhein arrest kiya gaya hai ye apne aap mein hi itna undemocratic hai ki agar Sarkar kahe ki ye insan National Security ke liye khatra hai to ise ek saal ke liye detain kiya ja sakta hai aur Court mein pesh karne ki bhi zarurat nahin hoti. Iske alawa inhein legal help bhi deny ki ja sakti hai. Aamtaur par Sarkar jab ye kanoon layi thi to kaha tha ki aatankwadiyon ke khilaf iska istemal kiya jayega. Aur yahan par istemal kiya jaa raha hai iska ek famous scientist, innovator, educator aur aise activist ko arrest karne mein. Jinhone desh ka naam duniya mein roshan kiya hai, na jaane jinhone kitne awards jeete hain apne kaam ke liye. Aur ek aise insan jinhone hamesha non-violence aur Gandian philosophy ko follow kiya hai. Ye ghatna doston sahi maaynon mein desh ki democracy ke liye ek aur bada turning point hai. Sabse shocking cheez to ye hai ki kis tareeke se social media aur national media par ek poori machinery laga di gayi hai inke peechhe inhein badnaam karne ke liye, inke khilaf jhoothi khabrein phailane ke liye. Hum kya kar sakte hain? Toh ho jaate hain badnaam wo kuch bhi na bhi karen to charcha nahin hota. Ladakh bachao aandolan ke liye main kahunga taiyaar rakhen apne jilon ko khali saaf karke hum aa rahe hain. Bharat Mata Ki Jai. Ladakh mein ye jo protests hain doston kam se kam pichhle paanch saalon se chal rahe hain, sahi suna aapne. Pichhle paanch saalon se ek hi cheez ko lekar log protest kar rahe hain. Bas fark ye hai ki pichhle paanch saalon mein media ne inhein koi coverage nahin di kyunki peaceful protests ho rahe the.
[3:26]Arey baap re. Ab jab jaise hi thoda sa violence breakout kar gaya to media ne ise cover karna shuru kar diya taaki protesters ko badnaam kiya ja sake. Sabse pehla protest hua tha September 2020 mein. Hum nahin chodenge. Hum nahin chhodenge. In protests ko phir call off kar diya gaya tha jab Amit Shah ne in logon ke saath meeting kari aur promise kiya ki inke waade ko poora karenge. Lekin koi action nahin liya gaya, phir December 2021 aur November 2022 mein phir protests hote hain. Phir January 2023 mein Sonam Wangchuk pro-actively saamne aakar in protests ko lead karna shuru karte hain. Pehle inhone paanch din ka climate fast kiya. Sarkar ne nahin suni, phir February 2023 mein inhone Jantar Mantar par protest kiya. Sarkar ne nahin suni, phir March 2024 mein inhone 21 din ki hunger strike kari. Phir Sarkar ne nahin suni, phir September 2024 mein inhone 1000 kilometer ki pad yatra kari, Leh se Delhi tak ye chalkar gaye. Namaskar. Juley. Salam. Ye hai Ladakh ka Delhi Chalo Aandolan. Aur aaj 1 September ko hum 25 kilometer chal chuke hain. Phir bhi Sarkar ne nahin suni. Phir 5 October 2024 ko ye indefinite hunger strike par baith gaye. 16 din tak hunger strike par baithne ke baad Home Ministry ki taraf se letter aata hai ki aao baat karte hain. Lekin baton mein phir jumlebaazi dekhne ko mili. Koi action nahin liya gaya aur phir ye majboor hue protest karne par. 10 September 2025 ko sabse recent protest start hua jahan par ek aur hunger strike inhone karni shuru kari thi. Hum 15 log anshan par hain. Jo hamare anshan ki kadi hai. Jisme is baar hum paanch hafte yaani ki 35 din anshan par rahenge, ya marenge. Jo bhi pehle ho. Aur ek cheez main yahan par clear kar doon doston in sabhi protests mein, in sabhi marches mein, in sabhi hunger strikes mein Ladakh ke logon ki demand ek hi rahi hai. Ki Ladakh ko Sixth Schedule mein add kiya jaye aur Statehood diya jaye. Aap shayad poochhoge ki aakhir kyun zaruri hai Ladakh ke logon ko ye dena to iski detailed explanation maine pichhle saal wale video mein di thi. Is video ko jaakar dekh sakte ho, dobara in baaton ko nahin dohraunga, kyunki kaafi lambi discussion is par ki ja sakti hai. Lekin short mein kaha jaye to Ladakh ka paryavaran, Ladakh ki vadiyan, Ladakh ka culture aur Ladakh mein democracy ka sawal hai. Bina Sixth Schedule aur Statehood ke ye sab khatre mein aa jaata hai. Aur sabse badi baat to yahan par ye hai ki BJP khud iski baat kar rahi thi. BJP ne apne manifesto mein khud promise kiya tha ki wo Ladakh ke logon ko ye denge, dekhiye teesre point par kya likha hai saaf shabdon mein. Maine pehle bhi dikhaya hai, aaj phir dikhaunga ki 2019 mein jab ye sansad ke chunav ho rahe the, aapne pehle teen binduon mein Ladakh ko chhathe schedule mein sangrakshit rakhne ka waada kiya tha. To sawal ye uthta hai ki jab khud BJP is cheez ko lekar waada kar rahi thi aur saalon se log is cheez ki maang bhi kar rahe hain, to ab BJP apne waade ko poora kyun nahin kar rahi hai? Is cheez ka short mein jawab hai doston Adani Ambani, Adani Ambani. Ambani Adani, Ambani Adani. Yaani ki Sarkar Ladakh ki zameen ko corporates ko de dena chahti hai. Wahan par mining karana chahti hai. Wahan ke junglon ko tabah karna chahti hai. Is cheez ki baat bhi maine is video mein detail mein kari thi. Waise yahan par aapko doston agar kisi bhi latest news se related koi bhi sawal hai to ab aap directly AI Fiesta se poochh sakte hain, kyunki AI Fiesta mein ab web search ka feature aa gaya hai. AI Fiesta mera khud ka banaya AI platform hai jahan par aapko duniya ke saare top AI models ek hi jagah par milenge. ChatGPT, Gemini, Grok, DeepSeek. In sab ke premium versions jinko agar aap alag se loge to inki cost ₹10,000 per month se bhi zyada ki padegi combined. Lekin AI Fiesta mein ye sab aapko iski 1/10th cost par sirf ₹999 per month mein milenge. Yahan par image generation ke liye bhi aapko dher saare latest AI models milenge jaise ki Google ka Nano Banana ya ByteDance ka Seedream 4.0. Saath hi AI Fiesta ke har ek subscription ke saath aapko ye ultimate prompt book milegi jisme 3,000 se bhi zyada prompts hain, jiski value apne aap mein hi ₹5,000 ki hai, lekin ye aapko bilkul free of cost milegi. Ye duniya ka pehla platform hai jahan par aap itne saare alag alag AI se saath mein chat kar sakte ho. Agar aapne checkout nahin kiya to zarur kijiye, iska link aapko niche description mein mil jayega ya phir aap is QR code ko bhi scan kar sakte hain. Ab apni timeline par wapas aayein to 10 September se hi Sonam Wangchuk ki hunger strike peacefully chal rahi thi, lekin Sarkar ne is par koi dhyan nahin diya tha. Lekin phir 23 September ko hunger strike kar rahe do logon ki tabiyat kharab ho jaati hai aur unhein critical condition mein hospital mein bharti karaya jaata hai. Ye violence trigger hone ka sabse immediate reason ban jaata hai. In logon ki tabiyat kharab hone ke baad saikron log sadkon par utar aate hain.
[7:50]Aur yahan ek shut down ka call de diya gaya hai. Log is waqt Martyrs’ Ground mein ikatthte ho rahe hain. 24 September ko Leh mein band organize kiya jaata hai aur yahan ke Martyrs' Ground mein bheed ikatthi ho jaati hai. Saalon se dabe logon ki frustration aur gussa is samay tak apni charam seema par pahunch chuka tha. Yahan par ye baat bhi mention karni zaruri hai doston ki Ladakh mein berozgaari ki kitni buri halat hai. Jammu Kashmir Recruitment Board se alag hone ke baad yahan jobs mein bhari kami dekhi gayi hai. Recent government survey batate hain ki Ladakh mein 26.5% graduates berozgaar hain, jo national average 13.4% ka lagbhag double hai. Ye berozgaari ka rate desh mein Andaman Nicobar ke baad sabse zyada hai. To 24 September ko jo ye bheed ikatthi hui, yahan maujood logon ke andar in saare alag alag kaaranon ki wajah se gussa bahut zyada tha. Kuch log seedhe taur par bhadak gaye aur police aur protesters ke beech mein clashes dekhne ko milti hain. Kayi gaadiyon par aag laga di jaati hai aur todphod bhi dekhne ko milti hai. Leh mein BJP ke regional headquarters aur Hill Council Office par aag laga di jaati hai. Police protesters par lathicharge karti hai aur aansu gas ke gole chhode jaate hain. Kuch eye-witnesses ke anusar yahan par police seedhe taur par goli bhi chala deti hai protesters par jisme chaar logon ki maut ho jaati hai. 80 se zyada log ghayal hote hain. Protesters ka daawa hai ki unke kayi saathiyon ko apne haath pair gawaane padte hain. Yahan ye bhi mention karna zaruri hai ki logon ke dwara liye gaye ground par videos se ye dikhta hai ki police ne pehle firing kari thi aur violence uske baad shuru hua tha. Aur ab kayi local log bata rahe hain ki internet ko suspend kar diya gaya hai aur in videos ko dabane ki koshish ki ja rahi hai taaki sach bahar na aa sake. Sabse shocking baat ye hai ki maare jaane wale logon mein se ek Kargil war ke veteran bhi the, Tsewang Tharchin. Inhone Kargil ki war mein teen mahine tak frontline par ladai ladi thi. Pakistani inhein nahin maar paye, inhein maara to aakhir hamare desh ki khud ki forces ne. Modi Sarkar dwara control ki gayi police ne. Inke pita batate hain ki hamare khoon mein hai Indian Army ko join karna. Ye khud bhi Kargil war ke veteran rahe hain aur Tharchin ke bachche bhi ek army school mein padhte hain, bade hokar army join karna chahte hain. Lekin ab apne bete ko khone ke baad inke pita sawal karte hain, kya is tareeke se hamari Sarkar hamare patriots ko treat karti hai? Is beech Sonam Wangchuk jo Gandian tareeke se protest karte aaye the abhi tak, Gandhiji ke style mein hi apni hunger strike ko khatam karne ka elaan karte hain is violence ki ghatna ko dekhkar. Theek waise hi jaise san 1922 mein Mahatma Gandhi ne Chauri Chaura ke incident ke baad non-cooperation movement ko call off kar diya tha. Sonam Wangchuk saaf shabdon mein violence ko condemn karte hain aur saath mein ye bhi kehte hain ki Modi Sarkar ne yuvaon ko naukri na dekar aur paanch baar unke peaceful protests ko nazarandaaz karke ye situation create kari hai. Jab wo shanti ko ansuni karte hain, ek baar anshan, do baar anshan, paanch baar tak anshan kare koi, Leh se Delhi tak paidal chale aayein shanti se aur uska bhi koi ansuna kar de to phir is tarah ke halaat aate hain. Ab aise mein agar koi samajhdar padha likha politician Pradhan Mantri ke pad par baitha hota to sharmindagi mehsoos karta aur khud chala jaata protesters se milne unki baatein samjhne. Lekin Modi Sarkar ne iska ulta hi kiya. Protesters ki pareshaniyan, unke gusse, unke frustration ko samjhne ki jagah unhein hi badnaam karna shuru kar diya. Sarkar mein baithe ministers aur inke IT Cell wale kehne lage ki ye to kisi foreign country ki saazish hai. In protesters ko deshdrohi ghoshit kar diya. Ladakh ke Lieutenant Governor Kavinder Gupta ne yahi purani ghisi piti cassette dohraate hue kaha ki Ladakh ki shanti bhang karne ki saazish ki ja rahi hai aur yahan Nepal aur Bangladesh jaise halaat banane ki koshish ki ja rahi hai. Sammit Patra ne to kaha ki ye Gen Z Revolution ki aad mein Congress ka protest tha. Gen Z ke naam se kuch protest dikhane ki koshish hui ki Gen Z ne kiya hai, magar jab tafteesh hui, to maloom pada ki Gen Z ka nahin ye Congress ka hi protest tha. Asal mein doston jab se Nepal mein Gen Z protest hue hain tab se BJP Sarkar ke man mein Gen Z ka bhoot ghus gaya hai. Inhein hamesha dar laga rehta hai ki kahin Nepal mein jo hua wo India mein na ho jaye nahin to hamari Sarkar ka kya hoga. Ye log itne dare hue hain ki inhein har protest mein Nepal ka Gen Z protest hi dikhai de raha hai, lekin phir bhi wahi galtiyan kar rahe hain jo Nepal ki Sarkar ne kari thi. Protesters ko sunne ki jagah unhein crush karne ki koshish karna. Home Ministry ne violence ki poori zimmedari Sonam Wangchuk par dalte hue kaha ki unhone bhadkao bhashan diye the aur unhin ki wajah se bheed uksi thi. Jabki is cheez ka ek bhi saboot nahin hai. Jitne bhi videos aapko Sonam Wangchuk ke dikhenge, hamesha wo non-violence aur peaceful rehne ki baat karte hain. Jabki doosri taraf Kapil Mishra inke Anurag Thakur BJP ke kitne aise ministers hain jinke bhadkao bhashanon ko camera par capture kiya gaya hai seedhe taur par. Amit Shah ko wo baatein bhadkao nahin lagti jahan par actually mein violence bhadkaya jaa raha hai, lekin agar koi Gandian style mein non-violent protest ki baat kar de to inhein ye baatein bhadkao lag jaati hain. Nathuram Godse ko poojne walon se waise kya hi expect kiya ja sakta hai? Inhein har Gandhi violent aur deshdrohi dikhega aur har Godse mein inhein apna Bhagwan dikhega. Lekin main aapko dikhana chahunga doston yahan par kitne shatir tareekon se Sonam Wangchuk ko phansane ki koshish ki gayi hai. 25 September ko Home Ministry ne Sonam Wangchuk ke organization Students Educational and Cultural Movement of Ladakh (SECMOL) ka FCRA license cancel kar diya. Ye license videsh se donation lene ke liye zaruri hota hai. Iske liye jo reason diye gaye unmein se ek ye tha ki Sonam Wangchuk ne ₹3.5 lakh cash mein FCRA account mein jama kiye the. Lekin ye koi black money ya money laundering ka paisa nahin tha. Sarkar ne khud mana ki ye paisa FCRA ke fund se kharidi gayi ek bus ko bechkar aaya tha jise guidelines ke according FCRA account mein hi deposit kara diya gaya tha. Sarkar ko bas dikkat ye hai ki Sonam Wangchuk ne ye paise cash mein diye aur iske baare mein properly nahin bataya. Doosra kaaran ye kehte hain ki 2020-21 mein teen volunteers ne apne khane aur rehne ke kharche ke taur par kul milakar ₹54,600 diye the jo FCRA account mein transfer kar diye gaye, jabki rules ke according Indians FCRA account mein donation nahin kar sakte, uske liye ek alag local account hota hai. To iske response mein SECMOL ka kehna tha ki ye paise galti se FCRA account mein transfer hue the. Matlab ye dekho kitni chhoti chhoti cheezon ko lekar ye pick out kar rahe hain aur aise dikha rahe hain ki jaise kitni badi galti kar di gayi hai. Ek aur kaaran yahan par bataya jaata hai Home Ministry ke dwara ki is organization ko India ki sovereignty par study karne ke liye videsh se ₹4.93 lakh ki funding mili thi. Ab is funding ki details ko zara aap dekho yahan par kya likha hai. Ye funding ek Sweden based NGO se aayi hai jo food security aur sovereignty samet baaki issues par yuvaon mein awareness create karne ke liye mili thi. Ab koi bachcha bhi ise dekhkar bata sakta hai ki yahan par food security aur food sovereignty ki baat ki ja rahi hai, lekin har jagah apne khilaf saazish dekhne wali Sarkar ko food sovereignty mein India ki sovereignty dikhi aur sirf is bakwas par inhone Sonam Wangchuk ko anti-national ghoshit kiya. Doosra hamla Sarkar ne Sonam Wangchuk par kiya inhein income tax notice bhejkar. Ab baat ye hai doston ki Income Tax Act ke Section 10(26) ke तहत Ladakh ki Scheduled Tribes ko income tax nahin bharna hota. Is chhoot ke baawajood desh ke prati apni zimmedari feel karte hue Sonam Wangchuk income tax bharte hain aur phir bhi unhein ye notice aa rakha hai. Teesra hamla Sarkar in par karti hai CBI chhodkar. Wahi cheez jo opposition leaders ke khilaf bhi kari jaati hai. Kuch bhi ut patang bahana de do aur keh do ki bhai CBI investigate kar rahi hai ise, bahut hi serious matter hai aur kyunki CBI ka naam aa jaata hai to logon ko lagta hai bhai kuch to serious matter hoga. Is case mein kaha gaya ki CBI in par probe kar rahi hai foreign funding ko lekar aur inki Pakistan visit ko lekar, jiski aage main baat karta hoon, kitni hi ridiculous cheez hai. Lekin isse pehle ek interesting cheez batana chahunga ki kareeb ek saal pehle Sonam Wangchuk ko ek anonymous letter mila tha jisme exactly yahi cheezein likhi gayi thi ki agar Sarkar ki nahin suni, apne protest band nahin kiye, to is tareeke se un par ye ye aarop lagaye jayenge. Is letter mein kaha gaya tha ki Sarkari agencies ne unke institution ki bank account details le li hai, jaise ki Arvind Kejriwal ke case mein hua tha aur phir CBI ne koi bhi farzi case banakar jail mein daal diya. The bank accounts details for your institute has been taken by the Anti-Money Laundering department recently from the bank. The same has happened in Mr. Kejriwal's case. Modi Sarkar ke dwara ki ja rahi hai witch hunting itni predictable hai ki Sonam Wangchuk jaante the, kabhi bhi koi ut patang bahana dekar unhein jail dala ja sakta hai. Jab wo chahe hamein giraftaar kar sakta hai, main sochta hoon ki mere jail mein hona desh ko zyada jagaega mere bahar hone se, kyunki desh nazara dekhega jo aadmi desh videsh se Bharat ke liye Magsaysay se leke Rolex Award se leke tisiyon puraskar laata hai. Aath to Universities ke honorary doctorates laata hai, desh ka naam uncha karta hai, yahan ki gyaan ko niryat karta hai aur China jaise deshon ke khilaf boycott Chinese products ka muhim chalata hai jo aage le jaake Sarkar bhi use aage badhaati hai. Usi aadmi ko hum aaj aise doshon mein jail daal rahe hain. Ye nazara jab wo dekhenge tab wo samjhenge ki aaj desh kaise chal raha hai to. Ab dilchasp baat ye hai ki ek taraf Sarkar ki ye paltu agencies apni witch hunting karti hain, lekin doosri taraf BJP IT Cell aur inka Godi Media kaam karta hai janta ko behkane ka. Kyunki sirf witch hunting karke kaam nahin banega. Doosri taraf logon ko bhi to brainwash karna hai na ki ye log aatankwadi hain, anti-national hain, isliye jo hum witch hunting kar rahe hain wo justified hai. Isi reason se inka Godi Media aur BJP IT Cell lag jaata hai character assassination ke kaam mein. Iske liye inke kuch log farzi khabrein phailane par focus karte hain to kuch log edited out of context clips phailane par focus karte hain to doosri taraf kuch log seedhe taur par inhein anti-national, Chinese agent ya aatankwadi hi ghoshit kar dete hain. Har ek BJP affiliated Twitter account ya Instagram page par aapne aise tweets dekhe honge pichhle kuch dinon mein jo Sonam Wangchuk ko in saare kaaranon ki wajah se deshdrohi keh rahe hain.
[17:39]Ek edited clip chalakar Sonam Wangchuk par aarop lagaya hai ki inhone kaha tha ki agar China India par hamla karega to wo Chinese army ko rokhenge nahin, balki rasta dikhayenge. Jab China ghus aata hai to Ladakh ke log jaan dekar rote hain, magar ab agar Bharat Sarkar hamare liye kuch nahin kar raha hai to agli baar wo aaye to hum unko rasta dikhayenge, hum rokhenge nahin, hum jaan kyun den jab hamara koi sangrakshan nahin ho raha hai, aur uske baad unpar police ki poochhtaachh hone lagi ye kaise kaha hai?
[18:52]Actually mein agar aap poore video ko dekhoge to Sonam Wangchuk ek deshbakt ki tarah video mein Sarkar ko aagah kar rahe hain ki Sarkar ke unki na sunne ke kaaran logon mein alienation badh raha hai jo Bharat ke liye achhi baat nahin hai. Unhone ummeed jatayi ki Sarkar logon ki maange poori karegi aur Ladakh ke log hamesha ki tarah sainikon ki tarah Bharat ki raksha karte rahenge. Mujhe ummeed hai ki jo unhone waade kiye hain wo poora karegi, aur Ladakh ke log har baar ki tarah Bharat ki raksha karte rahenge sainikon ki tarah. Jai Hind. Jai Bharat. Edited video mein ye last wali line bhi kaat di gayi. Doosra dekhiye ek ye notice bahut zyada share kiya jaa raha hai social media par BJP ki taraf se. Kaha jaa raha hai ki 2007 mein bhi ek notice Congress ki Sarkar ne diya tha Sonam Wangchuk ko FCRA violate karne ke aarop lagaye the. Is notice mein Leh ke DM Sonam Wangchuk par FCRA violation karne ke alawa 200 kanal zameen par kabza karne aur China mein anti-national connections hone ka aarop lagate hain. Ab ye notice to sahi hai lekin BJP walon ne iska context nahin bataya. 2007 mein DM M.K. Dwivedi Leh ki sabhi NGOs ko pareshan kar rahe the aur unhone kuch NGOs ko blacklist kar diya tha jabki unke paas aisa karne ki power bhi nahin thi. Phir NGOs ne unke khilaf case kiya tha aur jab mamla bada hua to Sonam Wangchuk ke khilaf ye notice jari kiya gaya. Baaki NGOs ko bhi aise hi dhamki bhare notices bheje gaye aur is vivaad ke samay Leh Hill Council ke elected head aur CEO ne ek letter jari karke kaha tha ki SECMOL ne Ladakh aur Leh ke sabhi gaon mein administration ki madad ki hai, ye aarop jhoothe hain. 2013 mein Court ne Sonam Wangchuk ko sabhi aaropon se bari bhi kar diya tha. Ye baat aapko nahin batayi gayi unke dwara. Upar se common sense wali baat ye bhi hai ki agar ye aarop sahi the to BJP ki Sarkar ne 11 saal kyun intzar kiya Sonam Wangchuk par action lene se pehle? Abhi protests ke baad hi unhein ye saari cheezein yaad kyun aati hain? Teesra dekhiye, kayi saare bade BJP influenced handles Sonam Wangchuk ki Bangladesh ke leader Mohammed Yunus ke saath ek tasveer bhi share kar rahe hain. Aise dikha rahe hain ki jaise dekho Bangladesh mein revolution hui, Sonam Wangchuk unke leader ke saath yahan pakka kuch na kuch connection hai foreign funding hai. Lekin sach baat ye hai, ye tasveer paanch saal purani hai 2020 ki hai jise khud Sonam Wangchuk ne share kiya tha. Uss waqt Mohammed Yunus sirf ek Nobel laureate the aur unka koi bhi political role nahin tha. Isi se hi related ek aur aarop jo Sonam par lagaya jaa raha hai ki unka Pakistan ke saath connection hai kyunki wo February 2025 mein Pakistan gaye the. Ab ye baat sach hai ki wo Pakistan gaye the, lekin kis kaaran se gaye the? Ek global climate conference attend karne gaye the. Ye Dawn Media ka Breathe Pakistan initiative tha aur yahan par baat-cheet sirf climate change se related ho rahi thi. Agar ye kisi khufiya kaam se Pakistan gaye hote to kya itne openly aur honestly is cheez ko share karte? Hi friends, I am here in Islamabad attending the climate change conference Breathe Pakistan organized by Dawn Media in Pakistan. Upar se is Pakistan ke event mein inhone Pradhan Mantri Modi ki tareef bhi kari thi climate change se related. Ye dekhiye zara. While many world leaders are now denying climate change even. I'm happy that Prime Minister Modi has not only taken many initiatives but also launched a special mission called Mission Lifestyle. To badi hi obvious si baat hai Pakistan visit ke pichhe iklauta mudda tha climate change yahan par. Sarkar ke paltu trolls itne kamchor hain ki is sab ke alawa inhein kuch mila hi nahin Sonam Wangchuk ko badnaam karne ke liye to inhone Three Idiots movie par hi aarop lagana shuru kar diya. Kya? Kya baat kar rahe ho? Is tweet ko dekhiye, kaha jaa raha hai ki Three Idiots movie jo 2009 mein release hui wo Sonam Wangchuk ko launch karne ka ek PR attempt thi. Matlab UPA Sarkar ke andar 2009 mein ek film banayi gayi taaki 16 saal baad jaakar Sonam Wangchuk ko Modi Sarkar par attack karne ke liye istemal kiya ja sake, koi logic hai is baat ka? Waise andhbhakton se kya logic expect karna. In logon ne khud to desh ko aage badhane ke liye kuch kiya nahin hai aur Sonam Wangchuk jaise aadmi par ye sawal utha rahe hain. Sonam Wangchuk ko duniya bhar mein kitne awards mile hain, in awards ki list aap Wikipedia par dekhoge ginte ginte thak jaoge. Aamir Khan ki film Three Idiots mein Aamir ka character Sonam Wangchuk se hi inspired tha. Film ke end mein jo school dikhaya jaata hai theek waisa hi ek school Sonam Wangchuk ka bhi hai. 1988 mein jab Wangchuk ne dekha ki baaki regions ke hisab se designed syllabus ke kaaran Ladakh ke bachche struggle kar rahe hain aur zyadtar fail ho jaate hain to unhone Students Educational and Cultural Movement of Ladakh (SECMOL) establish kiya. Is institution ne Ladakh ki education ko revolutionise kar diya hai. Kaha jaata hai ki isme keval failed bachchon ko admission diya jaata hai aur yahan keval kitabein ratane ki jagah bachchon ke overall development par dhyan diya jaata hai. Inhein tarah tarah ki practical skills sikhayi jaati hain, critically sochna sikhaya jaata hai. Dheere dheere jo bachche pehle school mein fail ho rahe the wo apni aur Ladakh ke logon ki problems ko solve karne ke liye alag alag innovative technologies develop karne lagte hain. SECMOL ka poora campus solar energy se chalta hai aur eco-friendly hai. Doston, aksar kaha jaata hai ki ek akela insan kya kar sakta hai? Lekin ek akele Sonam Wangchuk dwara shuru ki gayi is education revolution ke chalte saal 1996 mein Ladakh ke 95% bachche jo board exams mein fail hue the, yahi number 2024 mein sirf 25% tak reh gaya. Sonam Wangchuk khud ek engineer bhi hain aur kayi saari aisi cheezein innovate kar chuke hain jo desh ke bahut kaam ki hain. Ladakh mein rapid urbanization aur climate change ne water supply ko bahut impact kiya hai. Glaciers tezi se pighal rahe hain, water sources sookh rahe hain aur saal mein keval 100 mm ki barish hoti hai. Iske kaaran kheti ke liye pani nahin hota. Jab Sonam Wangchuk ne ye hote hue dekha to unhone ice stupa technique ko develop kiya.
[24:32]Ye inka sabse famous invention hai, isme sardiyon mein pani ke artificial glaciers banakar use store kar liya jaata hai. Aur jab kheti ke liye kisanon ko pani ki zarurat hoti hai to in artificial glaciers se pani milta hai. Isi tareeke se Sonam Wangchuk ne Indian Soldiers ke liye Solar Heated Tents bhi banaye hain, taaki wo Ladakh ki minus degree ki thand mein safe reh saken. Ye jo shayan kaksh hai, iska taapman raat mein bhi kaafi garam rehta hai. Jaise kal raat ko 10 baje andar yahan par 15 degree tha jabki in dinon bahar ki taapman minus 14 ke kareeb chal raha tha. Ye Solar Heated Tent din mein suraj se heat collect karte hain aur phir pani ke zariye is heat ko store rakha jaata hai jo tent ki insulation properties ke kaaran raat ko jawanon ke kaam aati hai. February 2021 mein unhone is tent ki tasveerein tweet karte hue bataya tha ki raat ke 10 baje tent ke andar 15 degree temperature hai jabki bahar minus 14 degree temperature tha. Yahi Sonam Wangchuk jinhone hamari Indian Army ke liye ye sab kiya BJP wale inhein anti-national keh rahe hain. Waise inhi Sonam Wangchuk ne saal 2020 mein border par China ke saath tension ke beech boycott China ki campaign chalayi thi. Inhone naara diya tha, Sena degi bullet se jawab, hum denge wallet se jawab. Aur ab kuch BJP ke hi log inhein Chinese agent keh rahe hain. Soch sakte ho kitne bade bewakuf hain ye log. Sach baat to ye hai doston ki Sonam Wangchuk ek sachche deshbakt hain jinhone is desh ko apna khoon pasina diya hai. Agar wo chahte to apne innovations ke chalte aaj kisi doosre desh mein Arabpati banke baithe hote, lekin unhone paise ke upar apne desh ko chuna. Jab 2019 mein Article 370 hataya gaya tha to unhone khud Pradhan Mantri Modi ko Thank You kiya tha. Tab wo is BJP ecosystem ke darling ban gaye the, lekin ab jaise hi unhone apne logon ki baat ki, apne dimag se baat ki to Sonam Wangchuk anti-national ho gaye. Ye kisi bhi desh ke liye bade sharm ki baat hai ki ek aise insan ko aaj jail mein daal diya gaya hai wo bhi bina kisi saboot aur bina kisi dosh ke. Kya aisa kisi democratic country mein kabhi ho sakta hai? Main aapse poochhna chahunga. Aur main request karna chahunga desh ke Supreme Court se, please is tareeke se desh mein loktantra ka mazaak mat banne dein. Sonam Wangchuk ko jaldi se jaldi riha kar dein. Sarkar se main kehna chahunga ki agar abhi bhi koi sharm bachi hai to Ladakh ke logon ke saath baat karo aur jo waada unhein kiya tha use poora karo. Sixth Schedule mein Ladakh ko add karo. Aur aap logon se main request karna chahunga doston, apni aawaz uthaiye, social media par post kijiye, tweet kijiye, Instagram par videos daliye, saaf shabdon mein kahiye, I support Sonam Wangchuk. Is behri Sarkar ke kaan kholne zaruri hain. Pichhle kayi saalon se ek naya trend banta jaa raha hai, chahe kisan aandolan ho ya students ka protest ho. Har peaceful protest ko ye log badnaam karte hain, logon ki suni nahin jaati. Kabhi kisanon ko Khalistani bolte hain, kabhi Musalmanon ko aatankwadi, kabhi chhatron par police ki lathiyan barsa dete hain. Ye wahi saari galtiyan kar rahe hain jo baaki deshon ke dictators ne kari thi. Inhein ehsaas dilana zaruri hai ki zara itihas ki kitab padhkar dekh lo un dictators ka baad mein jaakar kya haal hua tha, zara jaan lo iske baare mein. Aur AI Fiesta ko check out karna mat bhoolna ₹5,000 worth prompt book free of cost milegi iska link niche description mein mil jayega. Waise Ladakh ki situation ko aur gehrai se zarur samjhiye is video ko dekhkar kyunki isme maine detail mein explain kiya hai ki Sixth Schedule ke kya maayne hain exactly. Yahan click karke dekh sakte hain. Bahut bahut dhanyawad aur Jai Hind.
