[0:00]جينا بقى للفيديو اللي هيخليكم كلكم تلغوا اشتراكاتكم من القناه. أخيراً الحلقة اللي ناس كثير مستنياها عشان تلغي اشتراكها في قناة بتاعنا. الحجامة طب ولا عك؟ مقدمة غريبة طبعاً من الدكتور وهتخليك تلغي اشتراكك في قناة الدكتور، فهو بيقول لك ما تلغيش الاشتراك. أنا عارف يعني واضح إن أنا مش هقدر أقنعكوا قوي. خلونا بقى ندخل في الجد على طول. في الفيديو ده هنناقش تلات حاجات أساسية. رقم واحد، هنتكلم عن إيه هو الدليل العلمي اللي موجود حالياً على الحجامة وفوائدها الطبية، وفوائدها الصحية. والدليل العلمي دوت هنستقيه من الناس اللي هي بتتكلم عن الحجامة بطريقة علمية. رقم اتنين، هنتكلم عن علاقة الدين والسنة بالتحديد النبوية والحجامة. وطبعاً هنتطرق للفيديوهات الأخيرة اللي عملها أستاذ تامر اللبان، لأنه عمل فيديوهين اتنين بيتكلم عن موضوع الحجامة والسنة النبوية وعلاقتهم بالطب. رقم تلاتة، هنتكلم عن الناس اللي بتتكلم عن الحجامة وبتعمل الحجامة وبتمارسها وبيتكلموا عن فوايد الحجامة على طول. وطبعاً أكثر واحد موجود على السوشيال ميديا بيتكلم عن الموضوع دوت هو أستاذ محمد الفايد، وهنتكلم عنه هو كمان. إن شاء الله كل محور من دوت من سبعة لعشر دقايق، إن شاء الله الفيديو ما يطولش، إن شاء الله تستفيدوا منه جداً. للي أول مرة يجوا هنا، أنا حمدي محمد عبد العزيز، ودي قناة الإستشاري، قناة هدفها نشر الوعي الطبي الصحيح. وخلونا نبدأ الكلام العلمي بتاعنا بإننا أول حاجة نتكلم عن تعريف الحجامة. إيه هي الحجامة؟ أول حاجة، الحجامة، أو اللي هي في الطب الحديث أو بالكلام الحديث بيسموها الكابينج. فكرتها إن هي إيه؟ إن هو أنت بتيجي تعمل مثلاً زي بتستخدم كوبايات معينة، هي كابينج جايه من كلمة كاب، يعني كوباية. بتبقى حاجة كدة زجاجية، والفكرة فيها إن أنت بتقلل الضغط جواها، فتبتدي الضغط دوت يشفط أو يبتدي يأثر على الجلد والأوعية الدموية اللي تحت الجلد. طبعاً لما يكون الضغط قليل جداً بيخليها تروح مفرقعة، وتروح تعمل كدمات في المنطقة اللي هي اتعملت فيها. أحياناً بيتم برضه استخدام بعض الأدوات الحادة، مثلاً زي المشرط، فإن هو يفتح الجلد بحيث إن الدم ممكن يخرج. أو أيام زمان كانوا ممكن يستخدموا حاجات تانية في أن هم يعملوا امتصاص للدم من هذه الأماكن. خلونا الأول نقول إن هم كانوا أيام زمان بيعملوا الكابينج أو الحجامة، بفكره إن في دم فاسد موجود داخلنا. وإن هو بالحجامة ديت بيشيل هذا الدم الفاسد. مع الوقت ابتدت معرفتنا تزيد، وجالنا علماء زي ابن النفيس، العالم المسلم، اللي قدر إن هو يوصف الدورة الدموية أو جزء من الدورة الدموية لأول مرة في التاريخ. وبعد كدة جه ويليام هارفي وقدر يوصف لنا بقية الدورة الدموية كلها. يعني إيه دورة دموية؟ إن القلب بيوصله الدم ينقبض يروح هذا الدم يمشي في حاجة اسمها الشرايين. الشرايين ديت تقعد تصغر تصغر تصغر تصغر لحد ما تبقى في حجم الشعيرات، يعني بالضبط هي زي حجم الشعيرة. وديه اللي هي بتبقى موجودة مثلاً في الجلد أو موجودة في كل الأعضاء الداخلية عندنا. الشعيرات الدموية ديت هي اللي فيها بيحصل تبادل. الدم يدي الأوكسجين للخلايا ويديها الغذاء بتاعها، وياخد منها الفضلات بتاعتها وثاني أوكسيد الكربون، ويرجع عن طريق حاجة اسمها الأوردة أو عن طريق حاجة اسمها الأوعية الليمفاوية، يعني أوردة دموية وأوعية ليمفاوية. والاتنين يمشوا ويمشوا ويمشوا وفي الآخر يرجعوا ثاني للقلب. لما بيرجعوا للقلب القلب بيروح ضاخه الدم اللي فيه ثاني أوكسيد الكربون. يروح على الرئة، الرئة يحصل لها تروح واخدة هي ثاني أوكسيد الكربون وترجع تدي الجسم أوكسجين ويروح رايح على النصف الثاني اليسار من القلب. معلش معلومة بسيطة جداً وأنا متأكد إنكم كلكم عارفينها، لكن مهمة جداً أن احنا نبتدي بيها عشان نقول يا جماعة إنه ما فيش حاجة اسمها دم فاسد. في ناس كثيرة جداً مقتنعة إن في جوانا دم فاسد وإن هذا الدم الفاسد محتاج إن هو يتشال. فدي أول معلومة يعني مغلوطة.
[3:44]عزيزي اللي مقتنع إن في حاجة اسمها دم فاسد، أنا أتمنى إني أغير قناعتك وإنه ما فيش حاجة اسمها دم فاسد وواقف جوه جسمنا. ما فيش دم بيقف. الدم لما بيقف بيحصل له جلطة ودي مرض يحصل لها مضاعفات وأحياناً تكون حادة وفجأة يعني فأنت محتاج تروح المستشفى بسرعة. أو أحياناً تكون إن هي مزمنة، فأنت بتحتاج برضه إن أنت تمشي على علاج. خلاصة القول إنه مش طبيعي إن يكون في دم ثابت. الدم الثابت ده مرض. يبقى نرجع تاني، ليه بنقول المعلومة ديت؟ بنقول المعلومة ديت لأن هي ديت كانت البداية اللي اتبنت عليها فكرة الحجامة في العصور السابقة. في العصور الحالية يعني الطب الحديث، الناس اللي هي بتمارس الحجامة في الطب الحديث، طبعاً هم عارفين إن ما فيش حاجة اسمها دم ثابت ولا دم فاسد ولا الكلام دوت. عندهم محاولات إن هم يخترعوا نظريات أو إن هم يحاولوا يفهموا ليه الحجامة ممكن إن هي يكون لها تأثير أو ممكن إن يكون لها شغل. أنا كحمدي لما جيت عشان أحاول أفهم ليه الناس بتتكلم عن الحجامة قوي كدة، فقلت لنفسي ليه ما نروحش نقرا المواقع ونشوف إيه اللي الناس اللي بتقول إن الحجامة شغالة. والناس اللي بيمارسوا الحجامة فعلاً حوالين مستوى العالم، طبعاً هم الصينيين أكثر ناس، أكثر شعب بيمارس هذه الطب التقليدي يعني، ودلوقتي موجود في الغرب بكثرة وبشدة وفي جمعيات.
[4:56]طبعاً هم ما بيمارسوش الحجامة بس هم بيمارسوا كمان اللي هي الاكيوبانكشر والالتيرناتيف ميديسين كله. فخلونا نشوف بالضبط هم بيقولوا إيه. فلما ابتديت عملت بحث سريع جداً كدة على جوجل، خليني أوري لكم هنا على الشاشة. هنبتدي أول حاجة بحاجة اسمها ناشونال سيرتيفيكيشن كوميشن فور اكيوبانكشر أن أوريينتال أوريينتال ميديسين، ودي موجودة في الولايات المتحدة الأمريكية، زي ما أنتم شايفين.
[5:20]بيتكلموا على أن هم تبعهم أكثر من ألفين شخص بيمارس الاكيوبانكشر. طبعاً اختصاراً للوقت، ده الموقع بتاعهم اللي فيكم عايز يروحه، ده الموقع بتاعهم أهو. بيقولوا إنه في الطب بيتكلموا يعني مقدمة برضه ازاي تعمل دراسات علمية، وبيتكلموا على إن هو صعب أن أنت تعمل دراسات علمية في موضوع الحجامة بالذات، لأنه صعب أنك أنت تجيب حد تعمل له حجامة وحد تاني ما تعملوش حجامة. لو تفتكروا في كل فيديوهاتنا دايماً بنتكلم إن في واحد لما بنيجي نعمل دراسات علمية، في حد بياخد حباية فيها دوا والتاني بياخد حباية ما فيهاش دوا. ده المفروض أفضل نوع من أنواع الدراسات. والمفروض كمان إنه ما يبقاش عارف، محدش عارف مين الدوا ومين مش الدوا، لا الدكاترة ولا المرضى. طيب، لكن هم فهم بيقولوا إنه الحجامة صعب أن هي تتعمل بالطريقة ديت ودوت زعم مش مضبوط مية في المية. لأنك أنت برضه ما زلت تقدر أنك أنت تعمل حاجة اسمها شيم، وهم نفسهم بيعملوها في مثلاً في الاكيوبانكشر بيعملوا حاجة اسمها شيم اكيوبانكشر. فلا في حاجة أنك أنت ممكن أنك أنت تزور الحاجة يعني ممكن أنك أنت تخلي الشخص تحط له حاجة لكن ما تعملش مثلاً الضغط اللي جواه. هندخل بعد كدة بقى في الحتة المهمة، لإنه ان آي اتش دي الناشونال إنستيتيوت اوف هيلث، دي وزارة الصحة الأمريكية. نزلت دراسة من نوع سيستماتيك ريفيو أن ميتاناليسيز، وديت معناها أنك أنت بتجيب دراسات كثيرة جداً جداً جداً وتحطهم كلهم مع بعض زي بتعصرهم كدة بحيث أن أنت تطلع منهم نتيجة واحدة في الآخر. يعني مثلاً في دراسة دخلت ألف عيان وطلعت ايجابية، دراسة تانية دخلت ألفين عيان وطلعت سلبية، يروح مدخلهم كلهم كدة جوه مفرمة ويقول لك النتيجة في الآخر عاملة ازاي. فبيقول لك بقى هنا بقى إيه؟ بص بقى هي دي بقى الحتة اللي تهمنا بقى، عايزين نتعلم بقى. بيقول لك أن الكابينج كود بي افيكتف إن تريتينج ذا بين أند ديسابيلتي أسوسياتيد ويث كرونيك نيك بين أند كرونيك لو باك بين إن ذا شورت تيرم. يعني إيه؟ يعني يا جماعة الحجامة ممكن أنها تكون فعالة في علاج آلام الرقبة وآلام الظهر الخلفية على المدى القصير. طب بعد كدة بيقول لك إيه؟ في سنة 2010 تشاينيز ريسيرشرز الباحثين الصينيين لقوا أن عملوا برضه نفس النوع من الدراسات.
[7:32]بس ما عملوش ميتاناليسيز، عملوا سيستماتيك ريفيو بس، يعني أن هم لموا الدراسات مع بعض بس ما سيحوهاش على بعض زي ما أنا بقول، هم بس بصوا لهم كلهم كدة مع بعض. وديه دراسات دخلت أكثر من 550 دراسة. 550 دراسة في سنة كام؟ 2010. طيب، عملوا إيه بقى لما لقوا الـ 550 دراسة دول؟ طلعوا منها بإيه؟ قال لك بقى إيه؟ قال لك أن الماجوريتي اوف ستاديز شو بوتنشال بينيفيت أون بين كانديشنز، هيربس زوستر أند اذر ديزيز.
[8:11]يعني إيه؟ بيقول لك أن أغلبية الدراسات اللي احنا لقيناها قالت أن في منفعة على البين بشكل عام يعني على القلم بشكل عام، وعلى الهيربس اللي هو الحزام الناري، وعلى وأمراض أخرى.
[8:26]لكن محتاجين دراسات تكون معموله بطريقة كويسة عشان نقول هل احنا فعلاً الحجامة ليها دور ولا لأ. يعني أنت عايز تقول لي إيه؟ يعني أنا ببص للموضوع ده بصراحة إنه مجرد اختيار ألفاظ لا أكثر ولا أقل. هو بيضحك علينا، يعني سنة 2010 مدخل جايب لك 550 دراسة. وبعديها بخمس سنين اتعملت دراسة تانية أقوى من اللي اتعملت في سنة 2010. وكل ده أنت مش عارف تقول إن هي فعالة. يا راجل، يعني أنا أفهم مثلاً إيه أن في دوا طالع امبارح أول امبارح مثلاً، خلاص فاحنا بنجربه وبنقول والله يا جماعة ده ممكن يكون فعال. صح، ده لسه الدوا طالع أول امبارح، لسه طالع السنة اللي فاتت. لكن أنت بتتكلم عن حاجة بقى لها أكثر من ألفين سنة، أنت نفسك اللي بتقول كدة. وعامل عليها أكثر من 550 دراسة، يا راجل، وفي الآخر تقول لي ممكن تكون فعالة. هو ده معناها إيه؟ معناها أن هي مش فعالة، يعني أنت ليه أصلاً وصلت لهذا الكم كله من هذه الدراسات يعني؟ ولما تحط الدراسات كلها مع بعض تقول لك كود بي، يعني قد قد تكون، يعني يا راجل يا طيب احنا عارفين كويس قوي في البحث العلمي لما نلاقي الحاجة يا إما فعالة يا إما مش فعالة. لو بنفضل ماسكين كدة العصاية من النص لما تكون الدراسات صغيرة، لما تكون أعداد العيانين صغيرة، لما تكون صح زي مثلاً الدراسة اللي هو بيستدل بيها اللي هي فيها 70 عيان، صح دي دراسة صغيرة جداً. لكن 550 دراسة ولسه بتقول لي ممكن؟ ده بالنسبة لي دليل على إن الحجامة ما فيش عليها أي دليل على أن هي شغالة. عايز أقول حاجة هنا تانية، لما فتحت هذه المواقع أنا كان غرضي في الأول إن أنا هدخل هشوف البحث العلمي اللي هم حاطينه، وهاروح ادور وراه عشان أشوف البحث العلمي أصلاً معمول ازاي.
[10:10]لكن هو في قدر من الأمانة طبعاً في النقل العلمي موجودة على الموقع، وبالتالي هم أصلاً هم أصلاً مش محتاجين احنا نروح ندور ورا دراساتهم، يعني هي نتايجهم بتعبر عن نفسها. مش محتاجين أصلاً ان احنا نروح ندور وراهم عشان نشوف مثلاً الدراسات اتعملت ازاي فيها حاجة غلط ولا لأ، ده هي لو افترضنا إن الدراسات صح مية في المية. كونهم يوصلوا للنتيجة ديت، ده في حد ذاته دليل كافي على ان الحجامة حتى هذا اليوم محدش قادر ان هو يلاقي لها أي فايدة علمية. فده يخلينا مش هنطول أكثر في النقطة ديت، لكن خليني نشوف يمكن يكون في جمعيات تانية أو ناس تانية عندها كلام تاني. فأنا قلت إيه بقى؟ خلينا نخرج من أمريكا ونروح على انجلترا. طيب، في الأول فتحت جمعية البريتيش ميديكال اكيوبانكشر على أساس أن انا أشوف هل الجمعية البريطانية للناس اللي هي بتعمل النيدلز يعني الاكيوبانكشرز هل دوت عندهم حاجة عن الكابينج ولا لأ. وصراحة مالقيتش عندهم في الموقع بتاعهم أي حاجة عن الكابينج يمكن لو حد دور ورايا ولقى يقول لي. لكن لقيت حاجة تانية اسمها بريتيش بريتيش كابينج سوسايتي، والبريتيش كابينج سوسايتي ديت هم حاطين مجموعة مقالات أو ابستراكتس يعني بتتكلم على إن الـ إن الـ ان الكابينج ممكن يبقى له دور برضه.
[11:21]برضه بنفس الطريقة ما فيش حاجة اللي هي ما فيش كلام علمي قوي، وفي نفس الوقت ما فيش كلام اللي هو أكيد، يعني ما حدش بيجرأ أن هو يقول لك أن في حاجة شغالة هنا. طيب، خليني أشوف برضه الموضوع من جوانب تانية ونشوف الناس اللي بتدافع عن الحجامة بتدافع عنها ازاي. خليني ناخد الأول دفاع عن الحجامة من منطلق الدين ومن منطلق السنة النبوية. اللي لفت نظرنا طبعاً في الموضوع دوت فيديو اتعمل قريب من الأستاذ تامر اللبان، وفيه بيتكلم عن فيديو دكتور محمد منصور اللي فيه اتكلم عن الحجامة، وحتى عمل له مش فيديو واحد، لأ ده عمل له فيديوهين اتنين. كان في كذا نقط مهمين جداً محتاجين احنا نتوقف قدامهم عشان نفهم بالضبط إيه هي العلاقة بين السنة النبوية وموضوع الحجامة، على الأقل أنا كطبيب ازاي بشوف الموضوع ده. كل الأحاديث اللي حضرتك جبتها يا أستاذ تامر في الـ 50 دقيقة كلها طبعاً هو كان بيفند هل الأحاديث صحيحة ولا لأ، وأنا معاك وموافقك تماماً في كل اللي أنت بتقوله. كل الأحاديث اللي أنت عايز تقول أن هي صحيحة أنا ما فيش عندي مشكلة فيها، كلها صحيحة. وأنا لست أهلاً إن أنا أناقشك فيها هل هي صحيحة ولا لأ. أثبت السند بتاعها، تمام بمراجع وحضرتك كنت بتعرض مراجع، تمام جداً. كل الأحاديث كلها بتتكلم عن إيه؟ بتتكلم عن أمر من النبي صلى الله عليه وسلم للصحابة ان هم يعملوا الحجامة. حديث تاني بيقول فيه: الحجامة دي كويسة، الحجامة دي أفضل حاجة عندكم. كلها المعاني كلها ماشية في هذا السياق. طبعاً باستثناء حديث واحد بس وهو ده اللي لفت نظري، وده اللي فعلاً رحت دورت عليه. الحديث اللي هو إن النبي صلى الله عليه وسلم في أثناء رحلة الاسراء والمعراج، أن الملائكة طلبت منه أن هو يأمر أمته بالحجامة. ده الحديث اللي فعلاً شدني شوية لأنه الباقيين كلهم أمر جاي من النبي نفسه، أما ده الوحيد اللي كان أمر جاي له من براه، يعني جاي له من الملائكة. طبعاً ما فيش أمر إلهي جاي من ربنا نفسه، والحجامة اللي مش مذكورة في القرآن. طبعاً الواحد ما عادش تلات دقايق على جوجل دور على الحديث، اكتشفت أن هو حديث ضعيف، ومضعفه كمان الالباني نفسه. فا يعني واضح إن الحديث دوت مش عليه إجماع، لكن في أحاديث تانية عليها إجماع، وهي اللي أنا قلت عليها في الأول. طيب، أنا ما عنديش مشكلة إطلاقاً يا أستاذ تامر وكل الناس اللي عايزين يقولوا أن الحجامة من السنة النبوية. السؤال المحوري، وهو ده اللي الأستاذ تامر حتى قعد عليه عشر دقايق كدة عمال يرد على دكتور محمد منصور ويقول: هل هو من أدويتكم ولا من أدويهي؟ معنى السؤال كالتالي: هل ده دوا النبي صلى الله عليه وسلم بيأمر به هو مؤمن إن الدوا ده في حد ذاته هو اللي بيعالج؟ ولا هو ده دوا لانه هو ده أفضل ما كان موجود ساعتها بالنسبة لهم؟ يعني أنت بتقول مثلاً في حتة تانية بتيجي تقول إيه؟ والنبي صلى الله عليه وسلم طلب من صحابي أن هو يداوي صحابي تاني، فعمل له زي خلطة كدة معينة ما كانتش حجامة وعالجه بالخلطة ديت. وأنت بتسأل بتقول يا جماعة هو أنتم عايزيننا نعالج الدكاترة عايزيننا نعالج بـ طب الاعشاب ديت؟ وأنا يا سيدي ما بقول لك واحنا ما عندناش مانع. ما هو ده كان الطب ساعتها كدة. ما هو يعني هو أنت متخيل مثلاً إن هم هي لما حد يجيله وجع أو حد يجيله ألم أو حد يجيله حاجة، هيديله مضاد حيوي؟ ما هو أكيد ما فيش مضادات حيوية. اللي موجود قدامهم: أعشاب، خلطات أعشاب أو حجامة أو ممكن يكون أشياء أخرى كثيرة لكنها كلها كانت هذا هو الطب في ذلك العصر. النهاردة أنا عندي مية ألف دليل مليون دليل إن الحاجات ديت في اللي أفضل منها مية ألف مرة. إيه اللي يخليني أرجع لها تاني؟ النبي صلى الله عليه وسلم لما جه هاجر من مكة للمدينة، أخد معاه أفضل جي بي اس. إيه هو كان أفضل جي بي اس ساعتها؟ كان انسان عارف الطرق وكان انسان حتى ما هواش مؤمن، وجابه وخده معاه عشان يدلوا على الطريق. معناها إيه؟ لما أنت تيجي النهاردة تقتضي بالنبي صلى الله عليه وسلم تقتضي بيه ازاي؟ هقتضي بيه بأن أنا أقول أنا يعني أتكلم عن نفسي كحمدي إن النبي صلى الله عليه وسلم كان بيستخدم أفضل حاجة، أفضل تكنولوجيا موجودة ساعتها في أن هو يوصل لهدفه طالما إن هو محتاج هذه التكنولوجيا. وده اللي أنا بحاول أعمله في حياتي. النبي صلى الله عليه وسلم كان بيستخدم الحجامة اللي أنا فهمته من واقع الأحاديث كلها، من واقع حتى الكلام على الحجامة أو أي شيء تاني خالص غير الحجامة ساعتها. إن ده حاجات كانت ساعتها معروفة أن هي مفيدة ولذلك النبي صلى الله عليه وسلم كان بيتبع الدليل العلمي اللي موجود قدامه. هو ده ده اسمه دليل علمي. النهاردة الدليل العلمي بيقول حاجات تانية. فأنا متأكد إن النبي صلى الله عليه وسلم النهاردة لو قاعد معانا النهاردة وجاله صداع، هيروح ياخد قرص باراسيتامول. النبي صلى الله عليه وسلم مش هيروح يعمل حجامة. لو جاله وجع في ضهره هيروح يكشف عند الدكتور. لو جاله زي ما أنت بتقول مثلاً سم مثلاً لو جه تعبان مثلاً أو حد حط له سم في الأكل أو كدة، أنا متأكد إن هيروح للمستشفى وهياخد ترياق للسم مش هيروح يعمل حجامة. لو أنت مقتنع إن النبي النهاردة صلى الله عليه وسلم لو هو عايش معانا النهاردة هيروح يعمل حجامة، خلاص يبقى أنت كدة بتتبع سنته وماشي صح. لكن أنا بالنسبة لي أنا فاهم صح إن احنا بنتبع منهج النبي صلى الله عليه وسلم وهو دوت اللي هو عمله في عصره كله، في كل حاجة كان بيعملها في حياته. مش عايز أطول في موضوع الأستاذ تامر، لكن هو نفسه، هو نفسه أستاذ تامر يعني في الفيديو الأول بتاعه أول ما بيبتدي الفيديو راح قال إيه؟ أنا كان عندي وجع في ضهري وجبت له كركمين، أنا ما أعرفش طب يا أستاذ تامر حضرتك ليه ما رحتش عملت الحجامة؟ وديه الحقيقة، أغلب الناس اللي بتأمرنا أو عايزنا نعمل الحجامة ونستخدمها في كل حاجة هم نفسهم ما بيستخدموهاش بالطريقة اللي هم عايزيننا احنا نستخدمها بها أو عايزين الناس حواليهم يستخدموها بها. خليني اسأل أسئلة: لو هو فعلاً الحجامة ديت طب ممكن حضرتك تقول لي لما يكون عندي صداع نصفي أعمل الحجامة كام مرة في اليوم؟ ولا كام مرة في الأسبوع؟ ولا كام مرة وعاملها فين بالضبط؟ فين المناطق اللي هي بتاعت الصداع النصفي؟ طب لو عندي حصوة على الكلى المفروض أعمل الحجامة ديت كام مرة؟ طب لو عندي زائدة مثلاً، المفروض أعمل لها حجامة؟ ولو قلت آه، أعمل لها حجامة كام مرة؟ حضرتك ممكن تقول لنا أنا يعني أنا أتمنى طبعاً إن أنت تجاوب على هذه الأسئلة أو أي انسان مقتنع إن الحجامة بتعالج وفعلاً بتشفي يقول لنا واحنا مستعدين نكتب وراك روشتات ونشوف ونراجع وراك. هتقول لي ده أهل الاختصاص يا سيدي الفاضل، أهل الاختصاص نفسهم ما عندهمش دليل على أن هي شغالة. وأهل الاختصاص ما عندهمش الحاجات ديت، واللي أهل الاختصاص اللي يقول لك أن هو عارف الحاجات ديت كلها، قول له من أين لك هذا. بس، قول له طلع لنا الدليل بتاعك، طلع لنا جبت منين الروشتات ديت، جبت منين الوصفات السحرية ديت؟ ما فيش، ما فيش دليل. ناس بتألف ناس بتخترع. مش عايز أطول في الحتة ديت، خليني أختم بأن أنا أقول إن النبي صلى الله عليه وسلم يوم وفاته احنا عارفين قصة وفاة النبي صلى الله عليه وسلم، وازاي قعد كذا يوم بيتوفى. هل النبي صلى الله عليه وسلم احتجم ساعتها؟ هل طلب من حد إن هو يجري بسرعة تعالوا يا جماعة اعملوا له حجامة أو الصحابة حواليه قالوا له يا جماعة تعالوا اعملوا له حجامة؟ أبو بكر الصديق لما كان بيتوفى بعديها بسنتين هل طلب من الناس اللي هو ييجي يعملوا له حجامة؟ يعني الناس كانت مريضة يعني. ليه هم نفسهم ما طبقوهاش بهذه القوة؟ خلونا بعد كدة ننتقل لحاجة تالتة. الناس اللي هي بتتكلم عن فوايد الحجامة بصفة طبية موجودة على الانترنت. لو كتبت بحث على اليوتيوب هتلاقي اكتب بس فوايد الحجامة، هتطلع لك بعد كدة للرجالة وللستات ومش عارف إيه. كم دوس بس فوايد الحجامة بس هيطلع لك بعد كدة فيديوهات كثيرة جداً. أنا شفت بعضها وشفت بالذات دورت بالذات على الأسماء اللي هي مكتوب أن هي من دكاترة. يعني مثلاً شفت فيديو للدكتور النبولسي. الدكتور النبولسي بيتكلم عن بعض فوايد الحجامة العلمية. وزيه كان في فيديو هنا تاني، حد بيتكلم فيه آه دكتورة ابراهيم كسرون مثلاً. أي حد حاطط دكتور انا فتحته بما فيهم كمان دكتور أحمد بدر. دكتور النبولسي ودكتور كسرون يا رب أكون بقول الاسم صح، الاتنين بيتكلموا عن إيه؟ عن أنك أنت لما بتعمل الحجامة ده بيؤدي إلى وبنص الكلام إن الكبد والطحال بيعتصروا نفسهم عشان يخرجوا دم جوه جسم الانسان. ليه؟ الحجامة أدت إلى نزيف، وبالتالي ده بيقلل الضغط الدم، فبالتالي الأعضاء بتيجي طبعاً كلام كله غير علمي إطلاقاً. مين اللي قال أن الحجامة بت عنيفة لهذه الدرجة ان هي تقلل ضغطك لدرجة ان هي يبتدي الكبد والطحال يشتغلوا ويطلعوا دم؟ ثانياً الكبد والطحال عمرهم ما بيشتغلوا وبيطلعوا دم في صفة دقايق ما بيحصلش الكلام دوت. أول حاجة الدم بيطلع بيطلع من نخاع العظم وبعد كدة يبتدي يطلع من الطحال والكبد لو احتجنا للحاجات ديت. فالكلام أصلاً طبياً وعلمياً أصلاً مش راكب، يعني هم ما أعرفش هم يعني دكتور النبولسي ما أعرفش هو فعلاً طبيب. هو أنا دايماً باسمعه دايماً الكلام في الدين يعني. دكتور تاني لا أعتقد أن هو يكون طبيب، لأنه برضه بيقول في وسط كلامه كان عندي عيانين عندهم سرطان وعملت لهم حجامة. هنا بقى هندخل في المصايب بقى. إيه هي فكرة إيه؟ ان الناس ابتدت تقتنع ان الحجامة علاج لأمراض زي مثلاً مرض السرطان. هذه الفيديوهات هي فيديوهات مضللة وأنا أتحدى أصحابها ان هم يقولوا لنا جايبين منين هذا الكلام. دكتور مثلاً أحمد بدر برضه هو دكتور علاج طبيعي وهو دكتور فاضل، لكن برضه في الفيديو بتاعه بيتكلم على ان الحجامة بتعالج خشونة الركبة وبتعالج الأملاح وبتعالج حاجات كثيرة جداً.
[19:47]أنا برضه بسأل دكتور أحمد برضه هذا نفس السؤال برضه: منين هذه الأدلة؟ هاتوا لنا الدليل على ان هذه الأشياء فعلاً تعمل. وريه لنا يا جماعة. عندكم دليل أفضل من اللي عملاه وزارة الصحة الأمريكية مجمعة في كل الأبحاث اللي اتنشرت عن الحجامة ومنشورة في مجلات علمية. لو عندكم أدلة أفضل من كدة وريه لنا. أنت بالعكس تعالوا علموهم والله، ده يعني الناس هيحبوكم. ده حتى الجمعيات البريطانية والجمعيات الأمريكية للعلوم ديت هينبسطوا جداً بيكم والله. خليني بقى نروح لليفل الوحش، لليفل دكتور محمد الفايد. دكتور محمد الفايد طبعاً فيديوهاته مغرقة اليوتيوب والناس كلها عارفاها وكان ناس كثيرة جداً تكتب لي فيديوهات الروماتويد أو على قناة الروماتويد التانية: اعملوا الحجامة، الحجامة هي العلاج. دكتور محمد الفايد طب شوف محمد الفايد قال إيه عن الحجامة ومش عارف إيه. تروح هناك تكتشف ان الرجل أصلاً ما هوش طبيب. ده حتى من على الموقع الرسمي بتاعه هو وهو نفسه ما أعتقدش أن هو ادعى أبداً قبل كدة ان هو طبيب. ده موقع مثلاً اسمه ريسيرش جيت، خلاص الموقع ده الباحثين بينشروا عليه بعض الأبحاث العلمية. هو موقع مش قوي قوي لإنه بيقبل بحث أي حاجة أنت بتنشرها وبتقول عليها هو موقع ما بيتحققش وراك. تعالوا نشوف هو دكتور محمد الفايد مكتوب عنه إيه في هذا الموقع. لو بصينا هنا هنلاقي ان هو مكتوب عنه أن هو أستاذ في معهد الحسن الثاني للزراعة والطب البيطري. أنا جبتكم في الموقع هنا لإنه دكتور محمد الفايد دايماً الناس يكتبوا ان هو عامل أبحاث في الموضوع اللي هو بيتكلم فيها ومنها موضوع الحجامة. فالناس عندها اعتقاد ان هو عنده أبحاث كثيرة جداً في موضوع الحجامة، وان هو كل الفيديوهات اللي بيعملها عن الحجامة ديت كلها عن علم. ده حتى اتكلم عن فوايد الحجامة بعد ظهور لقاحات أو تطعيمات كورونا وكانت لسه اللقاحات طالعة أول امبارح. أنا أثبت لكم أن هذا الكلام غير صحيح. لما نقلب في الأبحاث بتاعته هنلاقي أنها كلها أبحاث عن الحيوانات وعن الأمراض البكتيرية في الحيوانات أساساً. في بحثين اتنين اجتماعيين عن الأطفال المدارس في المغرب وفي بحث واحد بس، بحث واحد بس، هو اللي بيتكلم عن الحجامة. تعالوا نشوف البحث ده موجود في إيه؟ البحث بيتكلم عن إنه الـ انزيمات الكبد بتقل في عيانين اللي عندهم التهاب كبدي وبائي سي مع استخدام نوع منتج من منتجات عسل النحل. لما تنزل تقرا بقى البحث الحمد لله أن هو حاطط السير هو كاتب إن ده بحث علمي. طبعاً الحمد لله أن هو حاطط الـ النص البحث العلمي بتاعه نفسه. نص البحث بيقول إيه بقى؟ إنه بيقول ان هو جرب طبعاً البحث هو الوحيد بس اللي عامله. طبعاً ده شيء يدعو للانتباه يعني اللي هو ازاي في بحث طبي دكتور واحد بس اللي عامله بنفسه. طبعاً هنكتشف ليه دلوقتي. خد بالك بقى، البحث ده اتقدم في المؤتمر الخامس لحاجة في دولة ألمانيا يعني أبيثيرابي كونجرس. فإذا ده بحث مش منشور أصلاً في مجلات علمية. يعني هو حاطط بحث على الانترنت وكاتب ان هو بحث علمي وهو بحث هو اللي عامله بنفسه ومش منشور أصلاً في مجلة علمية. طيب، بيقول فيه إيه بقى؟ بيقول ان هو كالتالي: جاب عشر عيانين عندهم التهاب كبدي وبائي سي. العشر عيانين دول كانت منهم ستة رجال وأربعة نساء. وده متوسط أعمارهم من 45 لـ 75 سنة منهم ستة منهم كانوا أو ما اعرفش جزء منهم يعني أخد الانترفيرون لمدة سنة وما خفش. والتانيين ما خدوش أصلاً انترفيرون. فهو راح عمل لهم إيه؟ عمل لهم حاجتين اتنين. فهو جاب إيه؟ جاب حاجة اسمها الـ البروبوليس اويل، بروبوليس اويل، يا رب أكون بنطق اسم صح أنا أول مرة بصراحة أعرفه. دورته عليه بالعربي لقيت حاجة اسمها العكبر وان هي حاجة بتخرج من النحل، وهو قاعد يعالجهم بها ان هم أداها لهم تلات مرات قبل الأكل. طيب، وبعد كدة كمان وعمل لهم كمان إيه؟ حجامة. حجامة اللي هي الويت اللي هو اللي هي فيها فكرة التشريط. لما عمل لهم كدة الخلاصة الاستنتاج بتاعه لقى ان بص برضه عشان هتلاحظوا نفس الكلام بيتكرر بطريقة خليني أوريكوا أنا الخلاصة. بس ديس ستادي ساجيست ذات اللي هو البي او بي او اي، ألونج ويث اذر أدجوفنت ميثودز ويتش كود انهانس ذا افيشينسي اوف بي بروداكتس، هاف أن ايمورييتنج افكت اون هيباتيك ديسفانكشن. أن كونفيرم ذا بينيشال افكت اوف ابيثيرابي إن بيشنت ويث كرونيك هيباتايتس، بات ذيس بروميسنج افكت اون فيروس سي كليرنس شود بي كونفيرمد ان راندومايزد دبل بلايندد يعني إيه بقى؟
[24:10]يعني هو لقى ان انزيمات الكبد بتقل شوية، فقال لك ان كدة العيانين كدة استفادوا، وإنه احنا محتاجين يا جماعة نجرب الموضوع ده في دراسات. طبعاً ده أي كلام. انزيمات الكبد في عيانين التهاب كبدي سي هي أصلاً لوحدها مع الوقت بتقل وبترجع تاني للطبيعي، وديه معلومة عارفها أي طالب طب في أي حتة. عارف كويس قوي ان الالتهاب المزمن للكبد لا يترتب عنه ارتفاعات حادة في انزيمات الكبد. كمان انزيمات الكبد لما تقل مش معناها اطلاقاً ان وظائف الكبد اتحسنت، ده هنا طبعاً لانه هو مش طبيب بشري فهو بيألف. ده هو مش بيألف وبس، ده أنا أدعو هؤلاء المرضى اللي هو عمل عليهم هذه الدراسة أن هم يروحوا يرفعوا عليه قضية، لأن هذا الرجل عمل عليهم دراسة علمية بدون ما ياخد منهم تصريح بذلك. وأتمنى يكون فعلاً يورينا فعلاً العيانين دول اتمدوا ازاي على موافقة على ان هو يعمل عليهم هذه التجربة. ويقول لنا ازاي قدر قدر ان هو يعمل تجربة طبية بدون ما يكون في موافقة من جهات رسمية على ان هو يعملها. محمد الفايد وأمثاله دايماً يحذروا الناس هم ما يخضعوش لشركات الأدوية وشركات الأدوية بتستغلهم وي وي وي. يا سيدي الفاضل، ده أنت عملت الحاجة اللي ما فيش حد تاني خالص بيجرؤ على ان هو يعملها من شركات الأدوية. أنت عملت تجربة طبية بدون ما تراجعها مع أي حد، بدون ما كلية طب توافق عليها، ده يصل لحد الجريمة. المفروض يعني أنا أتمنى إن معهد أن الناس المحترمة اللي موجودة في المعهد الطبي أو معهد الحسن الثاني للعلوم البيطرية والعلوم الزراعية ان هم فعلاً يحققوا في دوت ويشوفوا زميلهم بيعمل إيه بالضبط.
[25:42]ازاي واحد متخصص في علوم الحيوانات يعمل دراسة على بني آدمين وينشرها بالطريقة ديت؟ الخلاصة: الحجامة شيء فعله النبي صلى الله عليه وسلم. عشان ده كان أفضل طب موجود في ساعته. ده شيء ما عندناش فيه مشكلة. احنا عندنا مشكلة في إن احنا نفضل لحد النهاردة نعتبر ان هذا أفضل شيء موجود في عصرنا. عندنا مشكلة ان احنا نعتبر ان الحجامة النبي أمر بها لكونها في حد ذاتها مش لانها جزء من الطب اللي كان موجود ساعتها. الحجامة النهاردة ما عندناش أي دليل علمي على ان هي مفيدة. في ناس هتجيب لك دراسات، دراسات صغيرة معموله على أعداد محدودة من العيانين. دراسات ليها عيوب كثيرة جداً، ولما بيتحطوا كلهم مع بعض زي ما وريتكوا في أول الفيديو بتطلع انها ما لهاش فوايد، قد يكون ليها فوايد. لكن ما حدش خالص عارف يثبت ان ليها فوايد عشان عايز إيه أكثر من 550 درس اتحطوا مع بعض. ما يجيش حد بقى يجيء لك واحدة منهم ويجيء يقول لك أصلها شغالة اهي على مش عارف إيه، يبقى ده مش فاهم بحث علمي. أنا بصيت لك على الصورة كلها وعملت لك الخلاصة كلها. لو عندك مشكلة في الطريقة اللي اتعملت بها الدراسة الكبيرة ديت، ما عنديش مشكلة. تعالى وريني واشرح لي ونتكلم مع بعض كلام علمي حقيقي بقى الناس تستفيد منه. لكن أي كلام تاني غير كدة كلام مش علمي وكلام هيكون مضيع للوقت. وفي النهاية أنا شخصياً مش زي أستاذ تامر اللبان، هقول لك ما تعملش الحجامة غير لو أنت عندك مرض. لا يا سيدي، اعمل الحجامة زي ما أنت عايز. مشكلتنا في اللي بيعتبرها دوا ويبتدي يستبدلها بالأدوية التانية اللي هي الموجودة. اعمل يا سيدي الأدوية اللي عليك، روح للدكتور واعمل تحاليلك وخد علاجك وعم عايز تعمل حجامة بعد كدة روح اعملها مش هتفرق معانا خالص.
