الهبوط على القمر أكبر كذبة في تاريخ أمريكا ؟

[0:00]11 يوليو 1969، وبالضبط مع 2 و 32 دقيقة ديال الصباح، رجل بشرية ديال انسان غادي تتحط على القمر. وغادي يتمشى ويدور في القمر، وغادي يهز الدرابو ديال المريكان. وهاكا المريكان غاتولي أول وآخر دولة غاتطلع للقمر. ولكن واش بصح هذي هي الحقيقة ولا هاد القصة كاملة كذوب؟ علاش الدرابو ديال المريكان فاع الفيديوهات يرفرف مع العلم في القمر ما كاينش هواء؟ وكيفاش قدوا يبقوا فوق القمر كثر من 6 سوايع؟ مع العلم درجة الحرارة في القمر - 173. كيفاش في الفيديوهات والتصاور ما كيبانوش نجوم؟ مع العلم الفضاء عامر نجوم. كيفاش لاتراس ديال اللي مشى في القمر غير مطابق لاتراس ديال الصباط اللي كان لابس؟ وعلاش المريكان طلعوا القمر في 1969؟ ومن تما إلى يومنا هذا 2026 والعلم تطور بزاف. ومع ذلك ما كاينا حتى شي دولة اللي قدات تطلع القمر وحتى من المريكان ما غاديش تعاود تطلع ليه.

[1:03]فالفيديو غانديروا بحث معقم مع طاقم تقني ونجيب لكم جميع الأدلة والحقائق والأسرار باش نعرفوا واش بصح المريكان طلعوا للقمر ولا كانت هذي أكبر كذبة في التاريخ.

[1:17]فاش كنا صغار درنا أول عملية اختلاس ونصب واحتيال وتملص في حياتنا واللي تقريبا المغاربة داروها. كيبان لنا واحد الدري صغير من العائلة عنده 1000 فرانك هاكا كبيرة زوينة مجمعة. كنمشيو وكنجيبوا جوج دراهم مصرفة، كلها 4 ريال 10 ريال فهمتي فيها بزاف الصرف. وكنمشيوا عنده كنقولوا ليه هاك هاد الفلوس كاملة وعطينا غير 1000 فرانك اللي عندك. الدري صغير مسكين حيث غبي والذكاء ديالو يساوي الذكاء ديال ضفدع. كيتييق وكيعطيك 1000 فرانك وكياخذ جوج دراهم مصرفة كلها 4 ريال. وتما كتنصب على باباه لأنه ما عندوش الذكاء الكافي باش يعيق بك وباش يحصلك. ولكن إلا قلت لك عاود دير نفس العملية على بروفيسور وباحث جامعي في عالم الرياضيات غاتكون عملية مستحيلة ما يمكنش تنصب عليه. باختصار ممكن نكدبوا وننصبوا على أي إنسان عادي ولكن شبه مستحيل تنصب على إنسان ولد الدومين. وولد الاختصاص وكييفهم مزيان غيعيق بك غيعيق بك. وهاد اللعيبة بالضبط عقلوا عليها مزيان غانرجعوا ليها في القصة. وغاتلعب نقطة محورية ومركزية فهاد الفيديو كاملة. غانقزوا دابا ل 1969 وبالضبط 16 يوليو مع 8 و 32 دقيقة ديال الصباح غاتبدا عملية أبوللو 11.

[2:25]العملية اللي غاتسالي بأكبر نجاح بشري واللي هو الصعود للقمر. وشنو هو السبب الرئيسي اللي خلى المريكان تطلع القمر وتحط رجليها فوق القمر؟ والسبب هو اغتيال ولي عهد النمسا من طرف الطالب الصربي. صحابوا لي كنضحك هادا هو السبب بصح كون ماكانش الطالب الصربي اللي سخن عليه الراس وناض اغتالوا عهد النمسا ماعمر المريكان ما كانت غاتطلع القمر. ما كانت غاتحلم به السبب هو ذاك الطالب الصربي. هو اللي خلى المريكان تطلع للفضاء وباش نفهموا مزيان غانمشيو ل 1914 بالضبط 28 شهر 7. غايتم اغتيال فرانز فرديناند ولي عهد النمسا من طرف واحد الطالب صربي كيتسمى غافريلو برينسيبي. من مور هاد العملية غاتشبك الحرب العالمية الأولى واللي غاددينا مباشرة للحرب العالمية الثانية. وغاتشبك في العالم كامل حروبات وشكون المستفيد الأكبر؟ جوج د الناس هما اللي خرجوا رابحين من الحرب العالمية الأولى والثانية. أشكون هما؟ المريكان والاتحاد السوفياتي المريكان خرجت رابحة من الحرب والاتحاد السوفياتي خرج رابح من الحرب. وقوة عسكرية وغنائم وفليسات جمعوها من مور الحرب ومن مور الحرب العالمية الثانية أشنو غايوقع؟ غاتنوض حرب باردة. ما بين المريكان والاتحاد السوفياتي. أشنو هي حرب باردة؟ هي الحرب اللي كتنوض ما بين مك وخالتك. ولدي جاب 18 ومشى يقرا في بلغاريا وولدي أنا جاب 21 ومشى يقرا في أفغانستان تبارك الله. كلاش من هنا وكلاش من هنا كتسبك حرب ما بين مك وخالتك. هذي هي الحرب الباردة هي حرب ما فيهاش سلاح حرب الإنجازات. أنا درت أنا فعلت أنا وصلت بلا سلاح بلا قتيلة بلا والو. والحرب الباردة اللي كانت ما بين المريكان والاتحاد السوفياتي كانت حرب تكنولوجية. شكون فينا غايتطور كثر من الآخر والسباق كان في جوج د الحوايج. سوا النووي سوا الفضاء فالمريكان قالت الفضاء شوية صعيب أجي نطور في النووي. مشات المريكان صايبات بضع قنابل نووية وكانت فرحانة بها ومشات كتطلع الاتحاد السوفياتي. كتشوفوا آش صايب كاتلقاه صايب ترسانة نووية قد قدّاش. كل قنبلة قد العمارة عرّام د القنابل تما المريكان فهمات بأن السباق النووي ما غاتربحش فيه. الاتحاد السوفياتي مسالي قنبلة مقابل قنبلة. فتما آش غايوقع؟ غاتنقز الحاجة الثانية واللي هي الفضاء. تما المريكان غاتبدا جديا في عالم الفضاء غاتبقى تضخ فيه أموال هائلة وطائلة. أموال تترعرع باش تطور فهاد المجال وتفوت فيه الاتحاد السوفياتي وتربحوا وهنا غاتبدا القصة كاملة. 1962 الرئيس الأمريكي السابق جون كينيدي غايدير خطاب خطير جدا. ختارنا نمشيو للقمر ماشي حيث ساهل ولكن حيث صعيب وهذا كان تحدي مباشر الاتحاد السوفياتي. وغايبداو سباق خطير جدا على شكون غايحط الأول رجله على القمر. يعني باختصار المريكان ما كان عندها ما تقشبل بالقمر ما عندها ما دير به. باغا تطلع ليه غير ضد الاتحاد السوفياتي وحتى من الاتحاد السوفياتي ما عنده ما يدير بباباه القمر. باغي يمشي ليه غير ضد في المريكان وهادشي اللي غايخليهم يضخوا أموال طائلة وغايانفيستيوا بزاف. وما داروش عملية وحدة ولا جوج داروا عرّام ديال العمليات وكل عملية كتكون فاشلة كثر من أختها. حتى غانوصلوا ل 1969 واللي هو العام اللي المريكان غاتطلع فيه القمر وغاتخش الدرابو ديالها في القمر. وتما غايكون أول بشري غايحط رجله على القمر. دابا القصة سمعتوها ولكن الغريب في الموضوع هو علاش ممكن ننصبوا على دري صغير ونحيدوا ليه 1000 فرانك ونعطيوه جوج دراهم كلها مصرفة 4 ريال وجوج دريال. وما نقدوش ننصبوا على بروف وباحث جامعي في الرياضيات حيث عنده الذكاء الكافي باش يعيق بالكذوب ديالنا. ولكن الدري صغير ما عندوش الذكاء الكافي باش يعيق بنا كدبنا ويجيب دليل على الكذوب ديالنا. وهادشي نيت اللي غايوقع ما بين المريكان والاتحاد السوفياتي. نفترضوا المريكان كدبت على العالم كامل وقنعاته بأنها بصح طلعت القمر واش ممكن تكذب على الاتحاد السوفياتي؟ وتقنع العلماء ديالها والباحثين والخبراء ديالها اللي كيتعتبروا من الأقوى في العالم بأنها بصح طلعت القمر. إلا بصح كدبت على العالم كامل شكون هو أول شخص غايشك في الكذوب ديالها؟ وغاييمشي يبحث فيه هو الاتحاد السوفياتي لأنه هو المتضرر رقم واحد من هاد الإنجاز. غانرجعوا عاوتاني للحرب الباردة اللي كتنوض ما بين مك وخالتك. إيلا خالتك قالت لمك راه ولدي جاب 18 ومشى يقرا في بلغاريا شكون هو أول شخص غايمشي يبحث فهاد الكذبة؟

[6:18]هو أنت ولا مك غاتمشيو وتقلبوا واش بصح مشى ولا لا. وفي حالة ما عقتوا به راه جاب غير 10 وما تقبلوا حتى شي جامعة تما غاتكون ضربة قاضية لخالتك وغاتقضيو على باباه. ونفس البرانسييب كيتطبق على الاتحاد السوفياتي والمريكان راه فاش المريكان طلعت القمر كانت ضربة قاضية للاتحاد السوفياتي. وهو أكبر عدو للمريكان ما كانوش كيتسامحوا. يعني كانت أولى للاتحاد السوفياتي باش يمشي يبحث فهاد الكذبة ويجبد الأدلة على أنهم ما طلعوش القمر. ومع ذلك الاتحاد السوفياتي و كاع العلماء ديالو غايعترف بالإنجاز الأمريكي وبأن المريكان بصح طلعت القمر. وهاد اللعيبة بالضبط غاتزيد تعقد البحث ديالنا. فهاد الموضوع بالضبط واش المريكان بصح طلعت القمر ولا لا.

[6:57]الفكرة ديال الصعود للفضاء والاستكشاف ديالو فكرة قديمة جدا الإنسان ديما كان فضولي. وهاد الفضول هذا هو اللي خلانا نطوروا غانمشيو ل 1926. فهاد السنة بالضبط غايتقترح أول صاروخ أول صاروخ بالوقود السائل غاينجح أنه يطلع للفضاء. ولكن أوسامة بلاتي أشنو هو الفضاء؟ الفضاء هو 100 كيلومتر ارتفاع الكرة الأرضية. فوق الكرة الأرضية كاين بزاف الطبقات أون فوا كنفوتوا 100 كيلومتر كاندخلوا في الفضاء. دابا غانقزوا ل 1944 غانمشيو عند ألمانيا اللي غاتطلق لنا صاروخ في 2. أول صاروخ غايطلع في ارتفاع 176 كيلومتر يعني غايدخل مزيان في الفضاء. ولكن لحد الساعة البشرية ما قادراش تصيفط شي كائن حي للفضاء. كتصيفط صاروخ أيه كيطلع للفضاء وكيطرطق ما كيرجعش اللي مشى ما جا. دخل الفضاء ماشي بحال خروجه تا هنا غانقزوا ل 1946 فين البشرية غاتحاول تصيفط كائنات حية للفضاء. باش يفهموا واش في الفضاء كاينا حياة واش كاين أوكسيجين واش كاين ماء واش كاين هواء واش كاين. فغايصيفطوا كائنات حية ولكن ماشي بشر أول كائن غايطلع للفضاء تاريخ البشرية كاملة هي ذبابة. وما كانتش غير ذبانة وحدة كانت عائلة ديال الدبانات كلها مشات للفضاء. وهاد المهمة غادير قفزة نوعية وغاتكون ناجحة علاش لأنه الدبانات ماشي كلهم ماتوا. شي بعضين ماتوا وشي بعضين بقاو حيين يا سلام دونك هنا غانقزوا للمرحلة الموالية. غانطلعوا النيفو وغانسيفطوا هاد المرة قرد شمبانزي. القرد بصفة عامة كيتشابه مع الإنسان في بزاف الخاصيات عليها كان مناسب للتجربة. 1949 غايصيفطوا ألبرت 2 و غايطلع للفضاء. والمفاجأة فاش غايوصل للفضاء غادي يبقى حي. تما الناس فرحوا واحتفلوا ولكن دابا غاتبدا المهمة رقم 2 اللي هي نحاولوا نرجعوهم من الفضاء حي. وفاش غايبغيوا يرجعوا للكرة الأرضية مع كامل الأسف مول الأمانة غايدي أمانته والقرد غايموت. هنا غانقزوا ل 1957 وبالضبط عند الاتحاد السوفياتي فين غايديروا عملية مشهورة جدا. اللي غايصيفطوا فيها كلبة واللي هي الكلبة لايكا. أول كائن حي غايدور مدار كامل حول الكرة الأرضية. غاتجي عليه الدورة كاملة ولكن مع كامل الأسف راكم عارفين مول الأمانة غايدي أمانته ما غاديش يقدوا يرجعوها للكرة الأرضية حية. غانقزوا ل 1960 وغانبقاو مع الاتحاد السوفياتي فين عاود ثاني غايصيفطوا جوج كلاب. بيلكا و ستريلكا على وزن لايكا ما عرفتش مالهم مع الكلاب ولكن هما كيفضلوا الكلاب فهمتي حسن من القرد الشمبانزي و الذبابة. المهم هاد العملية حتى هي غاتكون عملية ناجحة ممتازة طوب ولكن كالعادة فاش غايبغيوا يردوهم للكرة الأرضية غايموتوا في الطريق. الحد الساعة أصعب مهمة شنو هي؟ هي نردوهم للكرة الأرضية حيين. باش نصيفطوهم ساهلة ولكن في الرجوع هاد القضية شوية معنكشة غانقزوا ل 1961 وبالضبط 5 ماي. وهنا غادخل المريكان على الخط اللي غادير أول عملية ناجحة للصعود للفضاء. بإنسان كامل براسه برجليه بيديه بكلشي ليه غايصيفطوا باباه للفضاء. الفضائي كان سميتو ألان شيبرد صيفطوه في مهمة ميركوري ريدستون 3. وغايدور دورة كاملة حول المدار ديال الكرة الأرضية وغاييردوه حي للكرة الأرضية يا لطيف يا لطيف. ومن موراها ب 1963 هاد المرة غايصيفطوا امرأة للفضاء فالنتينا تيريشكوفا. وصيفطوها في مهمة فوستوك 6 وكالعادة غاينجحوا عاود ثاني وغاتمشي للفضاء وغاترجع حية. هنا الإنسان قال يا سلام قدينا نمشيو للفضاء ونرجعوا سالمين ولكن الإنسان فضولي ما يقنعش. الفضاء مشينا ليه ولكن حنا باغينا نستكشفوه وبالتحديد نمشيوا للقمر وهاد الفضول هذا غايودي البشرية في 60 داهية. علاش؟ لأنهم غايزعموا وغاديروا بزاف العمليات اللي غاتكون فاشلة. وفي كل مرة غايصيفطوا شي واحد للفضاء في الواقع كاع ما صيفطوه للفضاء ولكن صيفطوه للقبر والبرزخ. اللي مشى ما جا مول الأمانة كايدي أمانته وتما غاندخلوا في سلسلة ديال الفشل. فشل مور فشل ولكن من الفشل يتعلم الإنسان ومع الاستمراررية ضروري كتكون نتيجة. 16 يوليو 1969 ومع 8 و 32 دقيقة بالضبط غايبداو الرحلة ديال أبولو 11. اللي غاتأخد البشرية والتكنولوجيا في حيتة ثانية خالصة الرحلة اللي كانت الوجهة ديالها هو القمر نيشان ما كاينش باك صاحبي. واللي غاتنطلق من مركز كينيدي سانتر في الفلوريدا. الهدف كان واحد إنسان بشري يحط رجله في القمر ويخشي معاه الدرابو ديال المريكان. ضروري يخشي الدرابو ضروري باش نفقصوا باباه الاتحاد السوفياتي ونقضيو عليهم. هذا كان هو الهدف هدف بسيط ولكن تطبيق معقد جدا. ما غاتسافرش من الرباط للعطاوية ألا غانمشيو من الكرة الأرضية في صاروخ بحال هذا راه هو فين هو وغانمشيوا للقمر. بزاف الناس كيبان لهم القمر وكيتصحابوا قريب راه القمر راه قريب. المعلومة اللي صادمة واللي هي القمر بعيد جدا الأخوان كثر من ذاك الشيء اللي كتوقعوا. المسافة ما بين الأرض والقمر هي تقريبا 384,000 كيلومتر. رقم كبير و ضخم جدا وباش تستوعبوا هذا الرقم هذا تخيلوا معايا ما بين الأرض والقمر هاد المسافة هادي كافية باش نخشيوا فيها جميع الكواكب المجموعة الشمسية. كلهم عطارد المريخ الزهرة المشتري زحل أورانوس نبتون كلهم يقدوا يتخشوا فهاد المسافة ما بين الأرض والقمر كافية باش يخشيوهم كاملين. غير باش تخيلوا شحال بعيدة المسافة ونزيدكم معلومة صادمة وقنبلة الموسم. إلا عندكم ورقة بحال هادي ها هي وريقة و شديناها وطويناها بحال هاكا على هاد الشاكيلة هادي 42 مرة غايولي الارتفاع ديالها قد المسافة ما بين الأرض والقمر. آآه مستحيل مستحيل واحد جوج ثلاثة أربعة خمسة ستة هادي 6 طويات.

[11:57]السمك ولا قد هاكا وإيلا زدنا 36 طوية السمك غايولي فيه 384 ألف يعني قد المسافة ما بين الأرض والقمر واللي بغا تفسير رياضي ها هو قدامكم. الاستعدادات لهاد الرحلة كانت كثر من 8 سنين و أنفيستيوا الأخوان أموال طائلة أنفيستيوا 200 مليار ديال الدولار. واش عارفين هاد الرقم شحال كبير ولا ما عارفينش؟ نعطيكم أمثلة باش تحسوا بالرقم راه ضخم جدا هاد المبلغ إلى فرقناه على المواطنين المغاربة غاتجي لكل مواطن مغربي 5 مليون سنتيم.

[12:28]كل مواطن مغربي من طنجة لكويرة صغير كبير مرا راجل غاتجي 5 مليون سنتيم. بهاد المبلغ اللي هو 200 مليار دولار نقدوا نبنيو سفينة التايتانيك كاملة. ماشي وحدة ماشي جوج ماشي 10 نقدوا نبنيوا 1000 سفينة التايتانيك بهاد المبلغ نقدوا نبنيوا 2600 تيران مولاي عبد الله اللي عاد تبنى في المغرب باش تحسوا بالقيمة اللي أنفيستوا فيها فهاد الرحلة بوحدها. آه مستحيل مستحيل.

[14:12]16 يوليو 1969 ومع 8 و 32 دقيقة بالضبط غايبدا العد التنازلي والعكسي لانطلاق الصاروخ اللي هاز ثلاثة ديال الناس في الطاقم. نيل أرمسترونغ باز ألدريين ومايكل كولينز. وعاد كاين واحد الطاقم كبير اللي بقى في مركز كينيدي الدور ديالهم التوجيه والمساعدة والمراقبة. وهاد الطاقم الأخوان كان كيتكون من 400 ألف مهندس وعالم فضاء. ماشي واحد وماشي جوج 400 ألف واحد نخبة مركزين في كينيدي سانتر وما تبقى مفرقين في المريكان كاملة وجاهزين للمساعدة والاستفسار. دابا غانشرحوا أهم مرحلة واللي هو الصاروخ أشم من موديل استعملوا أشم من فيرسيون ديال الصواريخ استعملوا. هاد الصاروخ اللي مورايا دابا اللي كيتعتبر من أقوى الصواريخ واللي دار قفزة نوعية في عالم الفضاء لا يساوي شيء قدام الساتورن 5. صاروخ ضخم ومخضرم الوزن ديالو 2970 طن ولك أن تتخيل عزيزي المشاهد واحد الجسم بهاد الكتلة كاملة. وخاصنا القوة باش ندفعوه ونطيروه ويطلع في السماء أشم من قوة خاصك؟ دابا اسمع عليا المحرك اللي كان فهاد الصاروخ ساتورن 5. محرك غا يصدمكم غا يسالي معكم 7.5 مليون حصان. أي ما يعادل قوة الدفع 2600 طائرة البوينغ 747. ولا ما يعادل 530 ألف سيارة رياضية لواحد الدرجة فاش العد التنازلي سالا والصاروخ انطلق. الطاقم اللي كان فيه وصفوا هاد الشعور بأن الرية ديالهم هبطات لعند المعدة. راه كنهضروا على 7.5 مليون حصان. والصاروخ كان كيحرق في كل ثانية شحال ديال الوقود؟ 13 طن. اللي كيحرقها الصاروخ في كل ثانية والحرارة اللي كان كيولد 3300 درجة. التأثير ديالو فاش بغا يقلع كان تأثير يساوي زلزال صغير.

[16:06]المهم الصاروخ انطلق وتما بدات العملية أوفيسيال مون. الناس كلها كانت متوترة سوا غاينجحوا غايمشيو للقمر وغايسكتوا الاتحاد السوفياتي وغايقضيو على باباه. سوا الطاقم كامل اللي كان في الصاروخ في بلاصة ما يمشي للقمر غايمشي عند الله سبحانه و تعالى. يعني كان كلشي متوتر. من مور 76 ساعة في 19 يوليو دخلوا للمدار ديال القمر. تما الطاقم تقسم على جوج مايكل كولينز اللي غايبقى في المركبة الرئيسية والجروب الثاني اللي فيه باز ألدرين و أرمسترونغ. غايركبوا في واحد المركبة فضائية اللي غاتنقاسم وغاتخرج من الصاروخ كامل وهي اللي غاتمشي للقمر. وتما غاتبدا المرحلة رقم 2 واللي هي مرحلة صعيبة الهبوط على القمر. بالضبط مع 8 و 15 دقيقة ديال الليل في 20 يوليو 1969. غ اتهبط أول مركبة فضائية فوق سطح القمر. يعني من مور 4 أيام من الانطلاق من الكرة الأرضية 4 أيام ديال الطريق عاد وصلوا. والعالم كامل كان متبع هاد الرحلة كلشي فرح كلشي نشط إلا طاقم التحكم. ما فرحوا ما نشطوا حيت عارفين بأن المهمة صعيبة عاد جاية واللي هي مهمة الرجوع من القمر. غاتصحاب دخل القمر بحال خروجه تما أرمسترونغ و باز ألدرين ما كانش عندهم الوقت. كان خاصهم بالزربة يوجدو راسهم باش يهبطوا فوق القمر.

[17:25]أول شعور حس به أرمسترونغ حس بالأرض غريبة. السطح ديال القمر غريب جدا كله فيه واحد المادة بيضاء و خفيفة بحال الرماد. زائد المشية كانت صعيبة حيت الجاذبية ما كانتش بحال ديال الأرض. الجاذبية اللي كانت في القمر ضعيفة بارابور للأرض بستة د المرات. يعني كان في كل خطوة بحال كييطير واحد شوية وثالث حاجة قال لهم كان واحد السقيل مرعب جدا ما عمرني عشته ولا شفته في حياتي. ما كيتسمع حتى شي حاجة ومع ذلك ما كانش عندهم بزاف د الوقت فين انبهرو ولا احتفلوا. كان عندهم شوية د الوقت خاصهم بالزربة يقوموا بواحد المهمات اللي مهمين جدا. أول حاجة كان خاصه يجمع واحد العينة من ذاك التراب الأبيض اللي كان في القمر. ثاني حاجة خاصه يجمع واحد العينة من الأحجار اللي كانوا في القمر. ماشي عينة بسيطة غا يجمع 21 كيلو ديال الحجر خوّى القمر نشفه. والمهمة الثالثة واللي هي غا يحطوا واحد اللعيبة في القمر. أشنو هي غا يحطوا مرايا المرايا غا يشدها غايفيكسيها في القمر مزيان. علاش؟ غاتفهموا بعدين فهمتي بعدين. أرمسترونغ وباز ألدرين كملوا المهمة ديالهم استكشفوا القمر وشحطوا ما تيسر من أحجار. ودابا غاتبدا أصعب مهمة مهمة الرجوع للأرض. غا يمشيو للمركبة إيغل غا يطلبوا فيها وغا يمشيو للراس ديالها وهداك الراس هو اللي غا يطيروا به. حيت غا ينفصل على المركبة الرئيسية الجزء السفلي غا يبقى في القمر والجزء العلوي هو اللي غا يطيروا به. وغا يمشيو ويلتحقوا بالزميل ديالهم اللي بقى في المركبة الرئيسية. 24 يوليو 1969 غا يخرجوا من القمر بسرعة 40 ألف كيلومتر وغا يلتحموا بالزميل ديالهم مايكل كولينز اللي كان في المركبة الرئيسية. وهاد المهمة راه كانت معقدة الأخوان. راه باش تلتحم سفينة بسفينة في الفضاء الله يستر ما الله يحفظ العلماء حطوا جهدهم كامل في الماط والحسابات. أش الشقيقة جاتهم فاش قدوا يكملوا هاد المهمة بنجاح. ودابا غاتجي واحد المهمة الرجوع للكرة الأرضية ولكن من الغلاف الجوي ديالها. وداكشي اللي كان غا يوصلوا للكرة الأرضية وبالضبط غا يهبطوا في المحيط الهادئ.

[19:20]تما العالم كامل غا يكون مصدوم. وفاش الخبر وصل للاتحاد السوفياتي شدوا راسهم جاهم الوجع و البومزوي ما فهموا حتى شي حاجة. تما عرفوا راسهم فشلوا واحد الفشل ذريع قدام السباق التكنولوجي مع أمريكا. واعترفوا بالهزيمة ديالهم ولكن الأخوان من مور كل نجاح كيجيوا مشككين. وهنا غا نوصلوا لأهم مرحلة في هاد الفيديو واش هادشي كامل ومن ديبار قصة حقيقية. ولا غير كذوب و تملص و سينما من عند المريكان فعليها بانوا بزاف الناس ديك الوقيتة وحتى إلى يومنا هذا كيآمنوا بأن هادي كانت أكبر كذبة في تاريخ البشرية. وبأن المريكان ما طلعت لا القمر لا يديك لا يخليك والسؤال هو واش هادشي بصح ولا لا هادشي اللي غا نعرفوه دابا.

[20:06]الناس اللي كتقول لك بأن هادي أكبر كذبة كيعطيو مجموعة من الأدلة و الحجج. أول حاجة قالوها الناس واللي هي علاش المريكان طلعت في 1969 للقمر. ومن ديك الوقيتة إلى يومنا هذا ما عاودوش طلعوا عاوتاني. الجواب بكل بساطة حيت ما عندهاش هدف الهدف اللي كان عندها هو أنها تسبق الاتحاد السوفياتي وتطحن باباه وتطلع القمر وهادشي اللي دارت. وحتى من الاتحاد السوفياتي ولا روسيا حاليا ما عاودوش طلعوا للقمر. وثانيا مكلف جدا ماديا كنهضروا على ملايير الدولارات. ثالثا راه ديجا حاليا كاينين بزاف الرحلات للقمر. المريكان وروسيا والاتحاد الأوروبي وحتى من اليابان مشاو ما مرة ما جوج للقمر غير هما ماشي بشرية فيها دي روبو وما فيهاش بنادم. علاش غا يصيفطوا بنادم؟ حنا باغين نستكشفوا القمر غا نصيفطوا روبو يستكشف ويصور ويجيب حاله. ثاني حجة كيقول لك أسيدي علاش العلم الأمريكي فاش خشوه في القمر كان يرفرف مع العلم أن الفضاء مافيهش هواء مافيهش رياح. فشنو اللي خلى العالم كيرفرف؟ الجواب جاي من عند نازا والتفسير كان بسيط جدا. لاحظوا معايا مزيان الفيديو اللي فيه الراية غاتلاحظوا بأنه كاين واحد القضيب أفقي مخشي في الراية. باش كيخليها مجبدة وماطيحش يعني كاين عمود بحال هاكا وكاين عمود بحال هاكا مخشي فيها الراية باش يخليوها مجبدة. وهادشي اللي كيفسر علاش كانت مسرحة وواقفة ولكن بلاتي يا أسامة راه مع ذلك كانت كتحرك كانت ترفرف. الناس كيقطعوا الفيديوهات وكياخدوا غير اللي عجبهم. لاحظوا معايا في هاد الفيديو فاش أرمسترونغ غا يخش الدرابو وغا يطلقوا الدرابو ما عاودش يتحرك كاع بمرة غا يولي ساكن. حيث في الأول كان كيتحرك حيت أرمسترونغ كيحسوا بيدوا كيحاول يغرسوا في الأرض. عليها كيتحرك فاش طلقوا وبعد منه ما عاودش يتحرك. الحجة الثالثة علاش النجوم ماكانوش كيبانوا في الفيديوهات الفضاء عامر نجوم. ولكن في الفيديوهات ما شفنا حتى شي نجم لماذا؟ الجواب بكل بساطة هو الكاميرا كانت مركزة على القمر. عليها الضو القمر كان غالب وبالتالي الضو النجوم اللي هو قليل بالمقارنة مع القمر ما غاديش يبان. ونعطيكم مثال غانجيب بولا بحال هادي غانقربها ليكم أوتوماتيكمون اللور غا يولي كحل. شفتي؟ حيت الكاميرات بصفة عامة كيركزوا على الضو الكبير وكي نيجليو الضو الصغير. الحجة الرابعة اختلاف الطبعة ديال الحذاء أرمسترونغ كيتمشى في القمر كيخلي م وراه ليتراس ديال الصباط اللي لابس. وفاش رجع للكرة الأرضية واللبسة اللي كان لابس حطوها في المتحف الناس شافوا الصباط اللي كان لابس ما عندوش نفس ليتراس ديال الخطوات فوق القمر. تما قالوا بأنه هاد اللعيبة مفبركة ولكن اللي كاع ما ردوا ليها البال بأنه قبل ما ينزل فوق القمر لبس صباط فوق صباط. لبس واحد اللعيبة واقية واللي هي هادي واللي عندها نفس ليتراس اللي خلا فوق القمر. يعني ما كانش خارج فوق القمر بالصباط اللي هو كان لابس مع البدلة. خامس حجة واللي هي أقوى حجة كيقول لك كيفاش نزلوا في القمر وقدوا عاود ثاني يطلعوا من القمر. وحنا عارفين بأن العافية اللي خارجة من الصاروخ هو احتراق وأي احتراق خاصه أوكسيجين. وحنا عارفين بأن في القمر ما كاينش هواء ما كاينش أوكسيجين فكيفاش قدوا يطيروا عاوتاني من القمر؟ الجواب بسيط جدا المركبة اللي هبطوا فيها في القمر قبل ما تطلع تقسمات على النص. نصف الفوقاني طلع وطاروا به ونصف التحتاني بقى في القمر. وكان عبارة على واحد الدعامة ومنصة اللي غاتطلق منها المركبة الفوقانية. زائد المركبة كانت مجهزة بأوكسيجين سائل يعني ما محتاجش الأوكسيجين خارجي باش يتم الاحتراق. المركبة بوحدها فيها أوكسيجين وفيها احتراق لداخل عليها قدوا يطلعوا ويطيروا من القمر. وتقريبا هادو كانوا أبرز الحجج اللي كيعتمدوا عليها الناس اللي كيكذبوا هاد الإنجاز. غات المريكان تجاوب عليهم كاملين وماشي غير هادشي وصافي قدات المريكان تجيب أدلة قاطعة. أدلة اللي مايقد حتى شي واحد يكذبها أول حاجة جابوا معاهم من القمر 21 كيلو ديال الأحجار. ماشي حجرة ولا جوج 21 كيلو وهاد الحجر دار عليه بزاف الفحوصات من العلماء محايدين. ومن العالمة و أكدوا بأن هاد الأحجار التركيبة ديالهم ما كتشبه لتا شي حجرة كاينا في الكرة الأرضية. يعني حجر جاي من شي بلاصة خارجة من الكرة الأرضية. ثاني حاجة واللي هو الاحتراف ديال الاتحاد السوفياتي راه ما يمكنش يعترف بك أكبر عدو ديالك بالإنجاز ديالك. وهما اللي عندهم أقوى العلماء وعاد هما أكبر المتضررين من هاد الإنجاز إلا كانت بصح كذوب. أول الناس كاع ما غادوز عليهم هاد الكذبة هما العلماء ديال الاتحاد السوفياتي. كانوا غايعيقوا بها بالزربة وغا يخرجوا قدام العالم كامل وغا يفضحوا المريكان ولكن ما قالوا والو. وبالعكس اعترفوا بهاد الإنجاز ثالث دليل وأقوى دليل واللي دار غير بالصدفة واللي هي شنو مرايا. فاش هبطوا في القمر حطوا مرايا لصقوها فيكساوها في القمر. شنو كان الهدف ديالها؟ ماشي باش تكون دليل على أنهم بصح طلعوا للقمر ولكن الهدف منها هو يعبروا المسافة بالضبط ما بين القمر والكرة الأرضية. كي غايديروا ليها؟ حطوا مرايا في القمر وعقلوا على الاحداثيات ديالها. ومن الكرة الأرضية غا ي صيفطوا لايزر اللي غا يضرب في المرايا وغ ا ينعكس على الكرة الأرضية. وتما غا ي قدوا يحسبوا المسافة بالضبط بالمليم ما بين القمر والكرة الأرضية. هذا كان هو الهدف من المرايا وديك المرايا غاتكون أكبر دليل على أنهم بصح طلعوا للقمر. حيت ديك المرايا لحد الساعة باقا في القمر ولحد الساعة كيضربوا فيها اللايزر كيضرب وكينعكس. ومع ذلك باقين بزاف د الناس كيشكوا في هاد القصة ولحد الساعة ما تايقينهاش كاع بمرة. هادشي اللي كاين وصلنا لافان ديال الفيديو هاد الفيديو اللي طلبتوني عليها بزاف وقلت ضروري خاصني نديرها. حيث موضوع شائك وموضوع مثير للجدل وبزاف د الناس شاكين فيه. والشك ديالكم في محله مزيان تشكوا ولكن شكوا بناء على أدلة وحجج منطقية. حتى إذا شي واحد سولكم علاش شاكين؟ قدوا تجاوبوه ماشي شاكين غير هاكاك. فتمنى الموضوع يكون واضح بالنسبة ليكم هادشي اللي كاين خليو معايا واحد لايك تابوناو في لاشين. أكتيفيو الجرس وبارطاجيو الفيديو مع صحابكم ونتلاقاو ان شاء الله في فيديوهات الجاية اللي غا تكون نهار السبت. هادشي اللي كاين يلاه باي باي سلامات باي باي.