A Ramadan Guest and a Silent Sacrifice

[0:00]Jab Ramadan ke babarkat mahine mein iftari ke waqt ek bhook se nidhal musafir Hazrat Muhammad Sallallahu Alaihi Wasallam ke paas pesh hua. Toh ek gareeb Sahabi ne musafir ki aisi khidmat ki ke Quran mein un Sahabi aur unke ghar walon ki tarif hamesha ke liye mahfuz kar di. Ye us waqt ki baat hai, jab Masjid Nabvi mein namaz-e-asar ke baad ek musafir hazir hua. Uska chehra peela, libas phata aur halat behaal thi. Wo Nabi Kareem Sallallahu Alaihi Wasallam ke paas aaya aur gidgida kar arz karne laga, Ya Rasulallah, main bhook aur pyas se nidhal hoon, meri madad farmaiye. Aap Sallallahu Alaihi Wasallam ka dil bhar aaya, aap ne ghar paigham bheja toh Hazrat Aisha Radiallahu Anha ne jawab diya ke ghar mein sirf paani hai. Aap Sallallahu Alaihi Wasallam ne Sahaba ki taraf dekh kar farmaya, Aaj raat is shakhs ko kaun apna mehmaan banayega? Allah is par reham farmayega. Hazrat Abu Talha Ansari Radiallahu Anhu khade hue aur mehmaan ko apne ghar le gaye. Ghar pahunch kar ehliya se pucha, kuch khane ko hai? Unhone jawab diya, Khuda ki kasam, sirf bachon ke layek thoda sa khana hai. Abu Talha ne farmaya, bachon ko kahani sunao aur sula do. Aur jab hum dastarkhan par baithe toh tum kisi bahane charagh bujha dena. Hum andhere mein apna munh aise hilayenge jaise hum bhi kha rahe hain, taki mehmaan pet bhar kar kha sake aur use sharmindigi na ho. Ummi Sulam ne bachon ko kahani suna kar sula diya. Jaise hi khana shuru hua toh Ummi Sulam ne charagh bujha diya. Andhere mein Abu Talha aur Ummi Sulam apne hath aise chalate rahe jaise kha rahe hain, magar haqiqat mein wo ek luqma bhi nahi kha rahe the. Mehmaan befikar hokar pet bhar kar khata raha. Raat mein miyan biwi aur bache bhooke so gaye, magar dil mutmain the ki Rasulullah ke mehmaan ki khidmat kar di. Fajr ki namaz ke baad jab Abu Talha masjid mein pahunche toh Nabi Kareem Sallallahu Alaihi Wasallam ne muskura kar farmaya, Kal raat tum dono ne apne mehmaan ke sath jo kiya use dekh kar Allah Taala Arsh par khush hua. Isi mauqe par Quran ki Surat Al-Hashr ki ayat nazil hui. Aur wo apni zaat par doosron ko tarjeeh dete hain khwah wo khud faqe se ho. Is sacche waqiye ka maqsad sirf yahi hai ke is Ramadan mein apni iftari mein kisi ek bhooke, gareeb ya musafir ko zarur shamil karen. Chahe aapke paas kharch kam hi kyun na ho. Kyunki bantne se barkat badhti hai aur Allah ki khushnudi milti hai.