[0:00]لو حد طلب مني نصيحه في الفترة اللي إحنا فيها دلوقتي فمن أهم النصايح اللي ممكن أنصحه بيها هي إبدأ قناة يوتيوب حالا. لو عايز تعرف إيه السبب؟ كمل الفيديو ده للآخر. فيديو جديد في سلسله اليوتيوب للمبتدئين وكالعاده جهز لي كوبايه الشاي بتاعتك وأشوفك بعد الإنترو.
[0:24]السلام عليكم ورحمه الله أهلاً بيكم في فيديو جديد هنا على القناة معاكم طاهر منتصر. على حسب الوقت اللي بتشوف فيه الفيديو ده سواء كنت في 2022 أو في أي وقت تاني قدام، فصدقني النصيحة دي مهمة ليك جداً. خصوصاً لو كنت لحد دلوقتي لسه ما بدأتش على اليوتيوب. خلينا في البداية نقسم الفيديو ده لأسئلة وأجوبة. السؤال الأول: هو ليه لازم أبدأ على اليوتيوب؟ والسؤال التاني: إيه المميزات اللي موجودة في اليوتيوب؟ السؤال الثالث: إزاي هبدأ على اليوتيوب وإيه المعدات اللي مطلوبة مني في البداية؟ السؤال الرابع: هل اليوتيوب مربح؟ والسؤال الخامس: لو أنا لسه طالب وبدرس أو موظف وبشتغل، هل ممكن أعمل قناة يوتيوب جنب شغلي أو دراستي؟ قبل ما نجاوب على الأسئلة دي حابب أقول لك إن الفيديو ده هيكون متقسم على شريط التشغيل على اليوتيوب، بحيث أنك تقدر تروح على السؤال اللي أنت عايز تعرف إجابته على طول. وده طبعاً عشان إحنا بنقدر وقتك وبنحترمه ولكن الأفضل إنك تشوف الفيديو للنهاية عشان تقدر تستفيد بكل المعلومات اللي موجودة في الفيديو. بس قبل ما نبدأ ما تنساش بقى تدعمني بلايك وشير للفيديو وتشترك في القناة لو كنت لسه ما اشتركتش وتفعل زرار الجرس عشان يوصلك كل جديد بنعمله هنا على القناة. ولو عندك أي تعليق أو حابب تشجعني بأي كلام حلو عشان أقدر استمر في تقديم محتوى فياريت ما تبخلش عليا بيه، هكون شاكر جدا جدا ليك. ها؟ جاهز؟ يلا بينا. أول سؤال هو ليه لازم أبدأ على اليوتيوب؟ يمكن اللي هقوله في الإجابة دي يكون مفاجئ لبعض الناس. بس أنا كطاهر بشوف إنه كل الناس من حقها بل ولازم أنها تعمل قناة على اليوتيوب. ولكن الأساس هو إنك تكون فاهم إزاي تقدر تستغل اليوتيوب صح. اليوتيوب هو منصة مجانية للجميع أي حد يقدر أن هو يرفع فيديوهات عليه في أي وقت ومن أي مكان وبلاش. ولكن للأسف مش كل الناس بتستخدم اليوتيوب الاستخدام الأمثل. وعلشان كده بنشوف البلاوي اللي بتكون موجودة دائماً على صفحه الترند بتاعه اليوتيوب. لكن أنا في الفيديو ده يا صديقي جاي أقول لك إعمل قناة على اليوتيوب تكون مختصة في الحاجة اللي أنت بتعرف تعملها. ومليون في المئة هتلاقي ناس كتير مهتمة بالحاجه دي وبتتابعك على قناتك. وهتكون مهتمه إنها تتعلم منك. أنت ممكن تكون بتعرف تكتب بخط حلو. شوف الموضوع بسيط إزاي، ممكن تكون بتعرف ترسم، ممكن تكون بتعرف تشتغل أي مهنة نجارة، خياطة أياً كان. ممكن تكون بتعرف تشرح أي برنامج على الكمبيوتر، تكون بتعرف تستخدمه كويس وتعمل كورسات عن البرامج دي. دور على أي حاجة بتعرف تعملها، هتلاقي مليون فكرة ممكن تختار منهم فكره تعجبك وتبدأ بيها قناتك على اليوتيوب. وغير كمان إنك هتعلم الناس وهتبقى صدقة جارية ليك، علمٌ يُنتفع به. يعني ثواب عظيم يفضل في ميزان حسناتك ليوم الدين. فمستني إيه إبدأ بقى. السؤال التاني إيه المميزات اللي موجودة في اليوتيوب؟ تعال نشوف مع بعض كام ميزة هتحصل عليها لمجرد بس إنك بدأت على اليوتيوب. في البداية أنت عشان تبدأ على اليوتيوب أنت محتاج تتعلم شوية حاجات زي مثلاً التصوير، الإضاءة، المونتاج. شوية حاجات كده محتاج تتعلمها برامج زي الفوتوشوب مثلاً على الموبايل أو على الكمبيوتر. يبقى هنا أول ميزة هي إنك بتتعلم حاجات جديدة ودي هتفيدك جداً على المدى البعيد. بعد كده بتبدأ قناتك تكبر وبتبتدي تحقق شروط الربح الخاصة باليوتيوب واللي هي 4000 ساعة مشاهدة و1000 مشترك. وساعتها بتبتدي تكسب من الإعلانات اللي بتظهر على الفيديوهات بتاعتك وهنتكلم في موضوع الربح ده بس كمان شوية. بعد كده بتلاقي نفسك دخلت في مرحلة سبونسر يعني حسب محتوى القناة بتاعتك بقى بتلاقي في شركات بتكلمك وبتطلب منك أنك تعمل لهم إعلان عن المنتج بتاعهم عندك على القناة. وبيكون ليك مقابل مادي وممكن كمان أن هم يبعتوا لك المنتج ده أصلاً عشان تعمل له مراجعة عندك على القناة وفي الآخر بتاخده بلاش. طيب عملت القناة وكبرت وبقى عندك مشاهدات كتير ومشتركين كتير والقناة بقت كبيرة جداً. تيجي بقى لمرحلة الشهرة، ودي بقى من المميزات الكبيرة جداً في اليوتيوب بس طبعاً ده في حالة أنك تكون يعني شهرت بحاجة كويسة. حاجة كويسة، يبقى أنت وجودك على اليوتيوب له مميزات كتير جداً وأكتر كمان من اللي إحنا قولناهم. يعني تخيل معايا أنك هتتعلم وتضيف لنفسك خبرة، وكمان هتكسب ثواب عظيم جداً وكمان فلوس بالدولار. وتتشهر ويجيلك منتجات ببلاش كل ده وأنت لغايه دلوقتي مش عايز تبدأ على اليوتيوب عشان خايف من رأي الناس. أو خايف أن الناس ما يعجبهمش محتواك. يا عم إبدأ، إبدأ وسيبها على الله، كل الناس اللي موجودة على الساحة دلوقتي بدايتها كانت أقل منك بكتير. إتفرج على أي حد من القنوات الكبيرة اللي موجودة دلوقتي وشوف أول فيديو موجود ليه على اليوتيوب هتلاقي الموضوع كان صعب جداً. أنت النهارده عندك الإمكانية أنك تطلع بمحتوى شكله محترم لأن بقى عندك ناس كتير بتشرح لك إزاي تعمل المحتوى ده. لكن زمان الناس اللي بدأت في البداية ما كانش عندهم حد أصلاً يقول لهم يبدأوا إزاي فكان الموضوع صعب جداً عليهم فمن فضلك إبدأ. تالت سؤال إزاي هبدأ على اليوتيوب وإيه المعدات اللي مطلوبة مني في البداية؟ عشان تبدأ على اليوتيوب فالموضوع ما فيش أبسط منه. كل اللي عليك في البداية إنك تحدد نوع المحتوى اللي هتشتغل عليه في القناة. بعد كده هتعمل أكاونت جديد على الجيميل ومنه هتنشيء القناة بتاعتك. وتسميها الاسم اللي أنت عايزه وممكن كمان تسميها باسمك أنت زي ما إحنا عاملين هنا في القناة. وكنت عملت فيديو كامل بشرح فيه إزاي تعمل قناة على اليوتيوب من الصفر. أنصحك جداً إنك تتفرج عليه بعد ما تخلص الفيديو ده، هسيب لك اللينك بتاعه موجود تحت في صندوق الوصف. طيب، نيجي بقى للمعدات. بص يا صديقي أنا حتى الآن بقالي على اليوتيوب حوالي تسع شهور. وطول الفترة دي كنت بصور بالموبايل والحمد لله النتيجة اللي خرجت بيها كانت مرضية جداً بالنسبة لي. كل اللي عملته إني جبت سوفت بوكس مستعمل ومايك بويا ب150 جنيه. وظبطت المكان اللي هصور فيه وبس كده. وعلى فكرة أنت مش شرط خالص أنك تبدأ بسوفت بوكس، أنت ممكن بكل بساطة تشوف أي شباك وتقف عنده. ما فيش أحسن من إضاءة ربنا. أظن أن ما فيش أبسط من كده يعني لو ألخص لك الإجابة على السؤال ده فهقول لك أن سر النجاح هو حسن استخدام المتاح. رابع سؤال هل اليوتيوب مربح؟ الإجابة وخليني أقرب عليك كده شوية آه مربح ومربح جداً كمان. ولكن لو هتبدأ قناة على اليوتيوب علشان الربح فصدقني هتتعب جداً جداً. كل اللي عليك في البداية أنك تبدأ وتستمر في رفع الفيديوهات بكل الطرق. وما تفكرش في موضوع الربح ده في البداية اعتبر نفسك بتزرع نخلة. في البداية هتبتدي تحافظ عليها وتراعيها وتسقيها دائماً بإستمرار وبعد فترة النخلة دي هتكبر وتطرح. وهو ده بالظبط اليوتيوب، هتفضل تعمل فيديوهات بإستمرار وبعد كده هتلاقي الفلوس جاية لك لوحدها. آخر سؤال لو أنا لسه طالب وبدرس أو موظف وبشتغل هل ممكن أعمل قناة جنب دراستي أو شغلي؟ تفتكر إجابتي هنا هتكون إيه؟ أكيد طبعاً ممكن تعمل كده بل إنك لازم تعمل كده. لأن أنت معرض جداً إنك لا قدر الله تسيب شغلك مثلاً في أي وقت أو بعد ما تتخرج ممكن تقعد فترة طويلة على ما تلاقي شغل. يبقى ببساطة ممكن تعتبر قناتك دي هي مشروعك الخاص. اللي لو في أي وقت الدنيا باظت وزنقت معاك تبقى القناة دي موجودة بتسندك لحد ما تقف على رجليك مرة ثانية. وفي النهاية أتمنى لك التوفيق يا صديقي في حياتك وفي قناتك على اليوتيوب. آخر حاجة عايز أقولها لك يا صديقي هي إبدأ، إبدأ دلوقتي. ما تستناش الوقت المناسب عشان تبدأ فيه، لأن الوقت المناسب عمره ما هيجي. أنت اللي بتخلق الوقت المناسب وصدقني دلوقتي هو أنسب وقت تبدأ فيه. إبدأ عشان كل لحظة بتضيعها هتندم عليها بعد كده وبس كده يا صديقي ده كان كل حاجة الفيديو النهارده لو عجبك الفيديو ما تنساش بقى تعمل لايك وشير للفيديو وتشترك في القناة لو كنت لسه ما اشتركتش وتفعل زرار الجرس عشان يوصلك كل جديد بنعمله هنا على القناة. وكالعادة لو عندك أي تعليق أو حابب تشجعني بأي كلام كويس فياريت ما تبخلش عليا بأنك تكتب لي تحت في الكومنتات أكون شاكر جداً جداً ليك. وما تنساش تتابعني على وسائل التواصل هتلاقي اللينكات كلها موجودة هنا وكمان موجودة تحت في صندوق الوصف وفي التعليق المثبت تحت الفيديو. كان معاكم طاهر منتصر أشوفكم في فيديو جديد و سلام.
