[0:00]السلام عليكم ورحمه الله وبركاته اهلا وسهلا بحضراتكم مره ثانيه وحلقه جديده من برنامج بالحجايس وحلقه جديده من سلسله كتاب سلام ما بعده وسلام. الحلقه الرابعه واللي هنتكلم فيها عن التهريج المنظم. هي شكلها حرب عالميه اه وهيموت فيها ملايين اه بس في حقيقتها هي تهريج لكنه تهريج منظم. هنشوف رئيس اركان جيش بيعيط بالدموع من الحوسه لما بلغوه ان تم اختياره كرئيس اركان هنشوف قائد ساب خطه المعركه كلها موجوده جوه جيبه واتقفشت من جيش الخصم فالجيش بتاعه اتعكش عكشه ما يعلم بها الا ربنا. بعد ما كان منتصر وهنشوف ظابط بيتجاهل تعليمات قيادته مرتين وفي المرتين بيتعصبوا عليه ويعدوه بالويل والثبور وعظائم الامور وفي المرتين بينتصر انتصارات ساحقه فبيعملوا نفسهم ميتين ولا كان في حاجه حصلت. وهنشوف جيش فاكر نفسه جاي يعمل عرض ازياء ولابسين الوان مزهزهه كده وجايبين معاهم فرقه موسيقيه تعزف لهم وهم بيحاربوا فجيش الخصم تسلى عليهم وقعد يصطادهم زي البط مع خلفيه الموسيقى الحزيني من الفرقه الموسيقيه اللي جايبينها معاهم. وهنشوف قائد اتقمص ومش حابب زمايله في الجيش الثاني فبياخد جيشه وياخد الكوره ويقول لهم انا مش لاعب. وينسحب ويسيب العاصمه للجيش الخصم ويضطر قائد الاركان يجي له مخصوص علشان يصالحه على زمايله ويقنعه انه يحارب بقى معاهم وما يبقاش دمه ثقيل. ومعلومه كده بزلومه صغننه بالمره عن الحرب دي ان جورج الخامس ملك بريطانيا نيكولا الثاني قيصر روسيا اللي بيحاربوا ضد فليل الثاني او ويليام الثاني قيصر المانيا في الحرب دي الثلاثه ولاد عم وكانوا قبل الحرب بيبعتوا لبعض رسايل بيحاولوا يهدوا بيها الاوضاع من نيكولاس لفيلم يعني يقول له يا شويه الجماعه بتوع امبراطوريه نمسا والمجر دول قبل ما الحرب تولع وفي اخر رساله ماضي له بيقول له منكي بيدلع نفسه يعني نيكولاف وفيلم او ويليام بيرد عليه يقول له هعمل كل اللي اقدر عليه يا ابن عمي ويديله في اخر الرساله من ويلي دلع لويليام يعني وبعدها 22 مليون بني ادم يموتوا. يعني ال 22 مليون بني ادم اللي ماتوا في الحرب العالميه الاولى دول ماتوا نقدر نقول في خناقه عائليه واسره مع بعضهم يعني. طبعا الموضوع مش بالبساطه دي بس الليله اخر مسخره. حاجه حره قوي الحقيقه الواحد كان بيبقى مكسوف من مناظر القيادات اللي عندنا دلوقتي بس بقى عنده احساس ان يعني لو ايامنا كان في تويتر وفيسبوك ويوتيوب كان الضحك برده هيبقى للركب. في البدايه ما كنتش عايز اخش قوي في تفاصيل الحرب العالميه بس لقيتها فرصه تهون علينا شويه اللي احنا فيه. ويبدو وكانها طبيعه بشريه ان الارجوزات محدودي الذكاء الواثقين في نفسهم ثقه عمياء دول هم دول اللي بيبقى عندهم الجراه الكافيه انهم يحركوا العالم وياخدوه ويلبسوه في اتخن حيط.
[2:43]الكل كان متوقع انها حرب من يوليو 1914 لغايه الكريسماس في ديسمبر 1914 وكل واحد هيروح يعيد مع اهله. كل الخطط كانت قصيره الاجل وكله كان وثيق بالفوز في البدايه. كان الحلفاء فرنسا وروسيا وصربيا والمحور المانيا وامبراطوريه النمسا والمجر. المانيا كانت معتمده على خطه حطها الفرد فون شليفن او زي ما عرفت بعد كده بخطه شليفن او الشليف بلان ودي حطها في 1905 وكان فيها تصور لسيناريو حرب مع فرنسا وروسيا في نفس الوقت بيحاول فيها يتفادى انه يتعمل سندوتش ما بين روسيا في الشرق وفرنسا في الغرب. ومعتمد فيها على تفوق السكك الحديديه الالمانيه اللي حكينا عنها في بدايه الحلقات وقدرتها على تحريك جيشها بسرعه كبيره جدا من الغرب للشرق. بسرعه كبيره يروح يخلص في الغرب على فرنسا ويرجع للشرق يتفرغ لروسيا. بالنسبه للغرب الخطه هناك كانت اشبه ما يكون بالركب الزريفه اللي بيعملها اي عمو غلس عايز يسقم على عيال صغير. بيروح جاي من على شمال الواد كده ويروح مخبط له على كتفه اليمين فالواد يروح باصص ناحيه كتفه اليمين ما يلاقيش حاجه يروح عمه السخيف لعه على قفاه من على الشمال ويضحك ضحكه سمجه سخيفه لازجه زي عمه ده الله يسامحك. الفكره ببساطه ان المانيا هتوزع جيشها 80 20، 20% يقفوا على حدود فرنسا و 80% فوق من ناحيه بلجيكا وهولندا. الخطه الاصليه كانت ان ال 20% دول يبتدوا يناغشوا ويوشوا الفرنساويين من تحت ويروحوا مخبطين على كتفهم من الجنوب علشان تبتدي فرنسا تلف ناحيه الجنوب في الوقت اللي فيه 80% اللي موجودين فوق في الشمال يدخلوا ويعدوا من لوكسمبورج وهولندا وبلجيكا من فوق ويزحفوا لحد باريس ويلسعوا الفرنساويين على قفاهم. كل ده في سرعه خاطفه وبسرعه الامور لازم تستقر في خلال ست اسابيع بالكثير علشان الجزء الاكبر من القوات دي ترجع تنسحب وتروح بسرعه للشرق تلحق العركه بتاعه روسيا. الخطه ما ركزتش قوي في موضوع نفخ روسيا ده لانهم كانوا معتمدين على تخلف روسيا الفظيع وعدم قدرتهم على التعبئه السريعه وتحريك الجيش بسرعه. كانوا معتمدين على اللي شافوه من اداء روسيا في الحرب الروسيه اليابانيه اللي اكل فيها الروس علقه محترمه زي ما نوهنا قبل كده. ف 1914 لما بدات الحرب قائد الاركان الجديد هيلموت فون مولتيكي قرر يعمل شويه تعديلات على خطه شليفن واجبر على شويه تعديلات ثانيه في اثناء الحرب. قرر مثلا انه ما يدخلش هولندا ويستغلها في الامدادات ويدخل بلجيكا بس وخاف ان الفرنساويين يضغطوا عليه جامد في الحدود فقرر انه يزحزح الجيش كله تحت سكه كده فبقت التوزيع 70% يخشوا من عند بلجيكا و 30% يفضلوا على الحدود مع فرنسا. ال 70% دول زي ما قلنا هيروحوا لافين وضاربين فرنسا على قفاها عند باريس لكن حصل له مفاجاه ثانيه في الشرق وهي ان الروس كانوا فعلا بداوا التعبئه قبل اعلان الحرب بثلاث ايام وبقوا بالفعل موجودين على الحدود وجاهزين بجيشين عددهم كاسر النص مليون جندي فاضطر انه يحرك جنود من الغرب للشرق علشان يوقفوا روسيا عن التقدم. وبالمره خلينا نحكي عن اللي حصل تحت في الجبهه الثالثه اللي فيها النمسا والمجر كانوا بيجهزوا للهجوم على صربيا ونزلوا تحت على صربيا بكل قوتهم للانتقام للدوك فرانز فرناند اللي اتقتل اللي هو كان سبب الحرب كلها من الاساس. رايحين ياخدوا بثار الراجل اللي تم اغتياله وده كان اول خازوق بتلبس فيه دول المحور. اتفاق نمسا والمجر مع الالمان كان توزيع النسبه الاكبر من الجيش فوق عند روسيا مش تحت عند صربيا المفعوصه. فده كمان لغبط الدنيا لما النمسا والمجر بعتت الجيش اغلبه تحت على الجنوب على صربيا لان اللي حصل في النهايه ان هم ولا هزموا الصرب بهزيمه ساحقه ودخلوا معاهم في حرب عصابات هم غير مؤهلين ليها وروسيا كمان حطت عليهم حط الطائر الرخ العملاق. بس خلينا ما نسبقش الاحداث هنا ونرجع تاني للتسلسل بتاعنا.
[6:04]كده الحرب كالتالي الصرب اصحاب العركه الاساسيين ومعاهم الروس حلفائهم ضد امبراطوريه النمسا والمجر ومعاهم المانيا حليفها. والمانيا قررت تضرب فرنسا بسرعه زي ما اتفقنا على حسب خطه شليفن علشان خايفه انها تتشغل مع روسيا اللي هتتخانق معاها عشان خاطر الصرب فتيجي فرنسا تضربها من ظهرها. بس علشان توصل لفرنسا لازم كمان هتلطش في بلجيكا في السكه طيب في الحفله دي الانجليز راحوا فين الانجليز فيه معاهده ما بينهم وما بين بلجيكا وطالما الالمان هيدخلوا بلجيكا بالرغم من اعلانها الحياد ورفضها دخول الالمان ارضها فالانجليز كده كمان مضطرين ان هم يدخلوا الحرب من باب الدفاع عن بلجيكا ودعم الحليفه فرنسا. وما وكل واحد يضرب اللي جنبه قفا وبدا العجن خطه شليفن ماشيه زي الساعه في الغرب. مش الساعه قوي الحقيقه 8 اغسطس بدات التخبيطات اللي موجوده في الجنوب زي ما احنا بنقول عليها كده ابتدت تجيب اثارها وبدا الفرنساويين يلتفتوا ويهجموا والالمان يطردوهم بره. الفرنساويين يهجموا ويحتلوا مكان وبعدها الالمان يطردوهم فينسحب الفرنساويين ويبقوا في موقف دفاع ويفعلوا ما يسمى بالخطه 17 واللي هي ببساطه نشر قوات دفاعيه بطول الحدود وعمل هجمات مضاده من وقت للتاني ضد الالمان. وعندهم قلاع حصينه كده بنوها للدفاع عن الحدود وفي اللحظه دي تكتشف فرنسا انها كانت نايمه في ميه اللفت وان الحروب بتطور بسرعه جدا والمواجهه المباشره الراجل الراجل دي ابتدت الجدوى منها تقل بشكل كبير. ابتدت تقل مع ظهور المترليوزات والماشين جز والمدافع طويله المدى وفي 20 اغسطس في مورهاج 20000 فرنساوي داخلين باللبس الملون بتاعهم الاحمر في ازرق دوت اللي هو الاحمر المزهزه الجميل الفرنساوي ده. الوان فخر وعز للجمهوريه الفرنساويه الى مؤاخذه العظيم وحاجه في منتهى الشياكه الحقيقه وجايبين معاهم بقى فرقه موسيقيه وطبل وزمر علشان يلهبوا حماس الجيش الفرنسي الى مؤاخذه عظيم يعني. وداخلين في ساحه القتال المنبسطه بمشهد مهيب وفجاه بوم بوم طخ يا اختي. الالمان قاعدين بالمدافع المرعبه بتاعتهم فوق ارض عاليه كده وبيضربوا وبيساووا بالفرنساويين الارض. الالمان من بعيد راكبين المعركه بمدافعهم المخيفه والتانيين جايين بمزيكا حصب الله دي ولابسين الحته الزفره وفاكرينها حرب في الشياكه الاف اتحروا و20 الف اسير. يوم 21 في فيرتون الفرنساويين هجموا تحت غطا الضباب وفجاه الضباب انقشع وتكشفوا مره تانيه وعينك ما تشوف الا الظلمه. حاجه كده ولا الممر الشرفي بتاع السيتي اللي اتعمل في ليفربول. يوم 22 اغسطس 27 الف قتيل فرنساوي وسجلوا اكبر هزيمه في يوم واحد لجيش واحد في الحرب العالميه الاولى. في الشمال الالمان قبلها بكام يوم دخلوا بلجيكا مسحوها مسح وفي يوم 20 اغسطس كانوا دخلوا جوه بروكسل. وهنا بدا الكلام عن انتهاكات شديده جدا من الالمان في حق البلاجه او البلجيكيين يعني اغتصابات ومذابح وحرق بيوت ودور عباده ومباني تاريخيه هو الحقيقه الموضوع ده يعني موضوع محل خلاف ان كان حصل فعلا ولا لا بس هو بشكل عام تم استغلاله اعلاميا بشكل كبير جدا خصوصا شعبيا في بريطانيا علشان يحفزوا البريطانيين ان هم يخشوا يشاركوا في الحرب بريطانيا اتحركت الانجليز جمعوا 120 الف نفر وعدوهم بحر المنش او القناه الانجليزيه. بحر المانش ده اللي كان بيغني له المرحوم جمال اسماعيل في مسرحيه سيده الجميله اديني شويه حظ ورميني في بحر المنش هو ده بحر المنش. عدوا بحر المنش علشان يروحوا يلحقوا الفرنساويين وكانت اول مواجهه في 23 اغسطس بين الانجليز والالمان. الانجليز عصلقوا شويه باعتبار انهم الاكثر يعني خبره في الحروب وكده بعد حروبهم الاستعماريه الاخيره اللي اكتتحوا فيها دول كثير جدا. لكن بعد ما وصلت المدافع الالماني كله فلق كله اتنفخ ضرب واستمر تراجع الفرانكو بريطاني. الانجليز صايعه الحرب بيرجعوا بشكل تكتيكي وتدريجي الفرنساويين اخر هلا قائد القوات البريطانيه هناك اتقمص وقرف من هبل الفرنساويين. واخذ الكره اخذ الجيش وقال انا مش لاعب وقرر ياخد الجيش بتاعه ويجري مش يجري بقى للعاصمه باريس لا ده طار لحد ساحل المحيط في سان مازوق مزوق. وقال وش كده دي ناس ما تستاهلش ان الواحد يحارب علشانها لحد ما جاء له وزير الدفاع من بريطانيا بنفسه كيتشنر يقول له يا اختشي وكمل حرب وعيب وما يصحش كده يا ولا. ده كان الوضع في نهايات اغسطس في الغرب طيب الجبهه الثانيه الشرقيه ناحيه روسيا من هنا بقى هيبقى في كميه اسماء الماني وروسي برجات جمع برج وكوفيت جمع كوف بالهبل فحاول كل مره اربط الاسم بحاجه علشان حضراتكم ما توهوش مني لان انا شخصيا توهت وانا قاعد اقرا. الخطه زي ما قلنا روح اضرب فرنسا على قفاها وسيطر على الوضع في الغرب وبعدها اجري فيرا على الشرق طش في روسيا. المفاجاه ان روسيا زي ما قلنا بدات تحشد جيشها في غرب روسيا اللي هو يبقى شرق المانيا قبل اعلان الحرب بثلاث ايام. جزء كبير من الجيش ده تم تجنيده من قرى غرب روسيا واتحرك بسرعه جدا على الحدود ودي كانت مفاجاه حقيقيه للالمان اللي اضطروا بسبب الموضوع ده ان هم يحركوا جزء من قوتهم اللي في الغرب اللي بتنفذ خطه شليفن تجري بسرعه للشرق علشان يلحقوا حدودهم الشرقيه مع روسيا. برغم من ان الجيش الروسي تعداده اكبر بكثير جدا بنتكلم عن حوالي نص مليون بني ادم متقسمين على جيشين الا انه وضعهم كان اخر مسخره. من تحت خالص من اول العساكر اللي تم تجنيدهم بسرعه من غرب روسيا شويه فلاحين غلابه من غرب روسيا تم تجنيدهم وزقهم على المانيا ومرورا بقاده الجيشين الروسيين. قائد اسمه رانكوف والثاني اسمه سامسونوف الثاني كان متهم الاولاني ان هو السبب في الهزيمه قدام اليابان في الحرب اليابانيه الروسيه اللي اتكلمنا عنها كذا مره في السكه كده قبليها بكام سنه. وكانوا واقعين في بعض وقعه ب 60 نيله وانتهاء بالقائد العام للجيش الروسي نيكولا نيكولافيتش اللي قعد يعيط لما عرف ان هو اتعين قائد عام لاكبر جيش تم حشده في التاريخ وقتها
[11:20]وهو ما قادش 10 انفر مع بعض في عركه في حوالي موسكو قبل كده بس برده الحركه المباغته دي والحشد السريع اربك الالمان وكانت الاوامر ان الجيش الالماني يرابط على الحدود ما يبداش اي هجوم لحد ما يطمنوا تماما ان الاوامر استتب بالكامل للالمان في الغرب مع فرنسا وبعد كده يقدروا يهجموا لكن في جنرال اسمه فرانسوا هو اسمه فرانسوا فرنساوي بس هو في الحقيقه الماني. اول ما لقى فرصه للهجوم على الروس خالف الاوامر وخطافها خطف كده يوم 17 اغسطس وخليني هنا هوضح حاجه مهمه بخصوص شكل الجيش الالماني بشكل عام. وهي ان الجيش الالماني كان زي ما بيقولوا كده دلوقتي بتعبير الاداره جيش اجايل يعني كل قائد في متدرب كويس وعارف مهمته ايه والقياده العليا وثقه فيه ان هو هياخد القرار الصح في الوقت الصح فمعاهم توجيهات عامه وبيتصرفوا على الارض بما يمليه عليهم الموقف. لكن الكارثه في موضوع الاجليتي ده ان هو لو من غير اتصال كويس هتتحول الدنيا لهجه ولسوء حظ الالمان هو ده كان فعلا الوضع على الارض. قتل فرانسوا شويه روس واثر 3000 جندي واقنع القائد بتاعه اللي كان اسمه برتويدز وشجعه انه يهجم على الروس في جنبين يوم 20 اغسطس. لكن المره دي ردت في وشه اتقتل يومها كتير جدا وتاسر 6000 جندي الماني على ايد الروس اتهزمت المانيا يومها هزيمه منكره وانسحبت انسحاب مهين. وكان في نيه للانسحاب من شرق روسيا كله بروسيا دي اللي هي شرق المانيا وبرتويدز قائد الجيش الالماني فلق 150 كيلو ناحيه الغرب. لكن هنا حصلت شويه حاجات قلبت الموازين كلها اولا وقتها تم تحريك قوات من غرب المانيا زي ما حكينا راحت على شرقها زي ما قلنا. ثانيا الالمان لقوا في جثه واحد من قيادات الروس الخطه كامله ما شاء الله للهجوم الروسي من الشرق ودي كانت سبب مهم جدا للي هيحصل بعد كده. وثالثا تم تكليف واحد من تعال الجيش الالماني هيندبرج اللي كان تقاعد رجعوه من التقاعد حاجه كده زي اريان روبن لما رجع بعد اتزال ومعاه جنرال تاني هو لودورف. لودورف ده اللي شاف منكم فيلم وندر ومن هو الجنرال الالماني الشرير اللي كانت عايزه تقتله من اول الفيلم لحد اخره. هيندبرج الثعلب الالماني بقى دلوقتي معاه مجموعه 200000 جندي وتحت قياده فرانسوا المتهور اللي اشتبك مع الروس بدري زي ما قلنا ولودورف بتاع وندر ومن ومعاه كمان واحد صايع اسمه ماكس هوفمان ماكس هوفمان ده كان حاضر الحرب اليابانيه الروسيه كمراقب. وعارف كويس الخناقات اللي ما بين سامسونوف رانكوف واتهم الثاني ان هو الثاني هو سبب الهزيمه وفاهم كويس قدرات الجيش الروسي وتحركاته وبيفكر ازاي. رابع حاجه الجيشين الروس اتقسموا جيش من الجيشين اللي هو جيش سامسونوف عدى بحيرات مازوري ناحيه منطقه غابات كده قريبه من بلد اسمها تانبرج. علشان يطلع من تانبرج دي يهجم على كونبرج ويقطع امدادات الجيش الالماني زي ما شايفين على الخريطه. لكن صاحبنا سامسونوف اتحرك بسرعه جدا من غير ما ياخد مؤن وعتاد كفايه والجيش الاولاني بتاع رانكوف اتاخر علشان يكمل الاستعدادات والتجهيزات بتاعته. كده النص مليون روسي اتقسموا مش بس اداريا تحت قيادتين متخانقين مع بعض لا ده كمان جغرافيا مفلوقين بالنص ببحيرات مازوري. كده نقدر نرجع تاني نعتمد على قدرات الجيش الالماني في الحركه السريعه بالقطرات انه يضرب بكل قوته جيش من الجيشين ويرجع يلسع الثاني نفس فكره شليفن. نشر هيندبرج الثعلب القادم من التقاعد اللي حكينا عليه فرقه تثبت رانكوف اللي لسه بيعبي تجهيزات وبعت فرانسوا المتهور اللي قلنا عليه برده على راس فرقه كبيره يهجموا على جيش سامسونوف اللي قلنا عليه اتحرك بتجهيزات قليله. باعتهم بسرعه بالقطر وبدل ما فرانسوا الاهوج ما يتقاو ما تقاوش واتاخر شويه وما هجمش على الجيش بتاع سامسونوف. قيادته شاطت لودورف بتاع وندر ومن هاج وماج وصار ومار لكن هوفمان اللي كان حاضر حرب اليابان وروسيا اللي قلنا عليه هرش دماغ فرانسوا. وعارف انه رانكوف قائد الجيش الاولاني الروسي مش هيتحرك علشان ينقذ صاحبه سامسونوف اللي هو قائد الروسي الثاني طمن هوفمان قيادته وطلب من القاده الميدانيين يسمعوا كلام فرانسوا ويطيعوا ليه. لكن لودورف بتاع وندر ومن صمم انه يبعت فرقتين ثانيين راحوا علشان يشتبكوا مع سامسونوف ابو تجهيزات قليله راحوا استنوه ورا منطقه الغابات. سامسونوف دخل بجيشه في منطقه الغابات وتاه فيها وهنا فرانسوا اللي هو المفروض انه اوج بس ما اوجش طلع صايع. وفي اغسطس 27 اتحرك بكل قوته على مايصير الجيش سامسونوف نفخها وكمل دوران حول الجيش. جاءت الاوامر لفرانسوا اثبت كده مكانك كفايه ما تتحركش لكنه تجاهل التعليمات دي تماما وراح مكمل دوران حوالين جيش سامسونوف لحد ما طوقوه بالكامل. وانضمت للالمان فرقه ثالثه كمان كان باعتها لودورف ونزلوا في الروس عجن بعده اصطادوا الروس من وسط الغابات لحد ما استسلم الجيش بالكامل 100 الف اسير و 50 الف مصاب وقتيل وسامسونوف اللي ما كانش عاجبه زميله وتهريق عليه وقال ان هو سبب الهزيمه دخل في غبه من الغابات وانتحر. ودي اللي كان اسمها معركه تانبرج واللي ليهم في الفيديو جيمز كان في فيديو جيم مش مشهور ليها قوي والحقيقه ما لقتش حتى الشركه المنتجه ليه. كان بيتكلم على المرحله دي ممكن اللي عايز يعيش الاجواء يعني بتاعه الاسلحه المستخدمه والملابس والكلام ده يعيشوا لان هو يعني في دقه مش بطاله تاريخيا يعني. كل المعجنه دي وجيش رانكوف الجيش الروسي الاولاني اللي كان متاخر عشان بيكمل المؤن والعتاد بتاعته بيتمخطر عامل نفسه انه جاي يعني يلحق سامسونوف. بعد ما الالمان خلصوا على سامسونوف طلعوا كملوا على جيش رانكوف اللي جاي عامل نفسه بيتمخط في الطريق وعكشوهم هم كمان. في ما يسمى بمعركه بحيرات مازوري وانسحب المتبقي من الجيش الروسي قدام الالمان ودي كانت من اكبر الهزايم الساحقه اللي حصلت في الحرب العالميه الاولى بشكل عام. وبكده سيطر الالمان تماما على المنطقه اللي في الشرق وفي الغرب نافخين الفرنساويين والانجليز والعركه الثانيه اللي شغاله تحت ما بين النمسا والمجر ضد روسيا. دي الوضع فيها مختلف شويه ومش عايزين ندخل في تفاصيلها بس خلينا نقول ان حصيله اول شهرين من الحرب العالميه كانت عدت المليون قتيل. في رايي الشخصي الذي لا يعتد به في اي محفل من المحافل المحليه او الدوليه ان القرن 19 وال 20 البشريه اكتسبت فيهم معرفه وقدرات خارقه غير مسبوقه في التاريخ المعروف على الاقل لينا وان زي ما الثوره الصناعيه فاجات الانسان بقدرته الجديده على انتاج اكبر بكثير من احتياجه ومن قدرته حتى على استهلاكه وحتى اكبر من قدره الكوكب على توفير مواد خام ليه فالحرب العالميه الاولى كانت هي بدايه مفاجاه ثانيه ان نفس القدره الجديده دي بتخلي الانسان قادر على تدمير نفسه بسرعه وكفاءه مرعبه مش اقل من قدرته على الانتاج المفرط صدمه عنيفه للبشريه كلها. ونرجع لموضوعنا وسط المعمعه دي مين بقى قاعد في الشرق خالص بعيد بيتفرج عليهم وبيسمع اخبارهم عمنا انور باشا. المشهد دلوقتي بيقول ان الالمان راكبين ومدللين وانها مساله وقت والمانيا تعلن انتصارها على فرنسا وبريطانيا وروسيا. وروسيا بتحارب على جبهه ضخمه جدا مع امبراطوريتين كبار جدا المانيا وامبراطوريه النمسا والمجر وبالرغم من انها راكبه في جبهه النمسا والمجر الا انها ممسوح بها الارض في المانيا. ومضطره انها تنقل تركيزها فوق ناحيه المانيا خصوصا والالمان شكلهم كان في الوقت ده خلاص بيشطبوا على فرنسا وداخلين على باريس. يعني ما فيش فرصه احسن من كده فرصه لايه ان انور كوزير حربيه يحرك جيشه ويضرب روسيا. ليه هيضرب روسيا؟ اولا انه كده هيبقى بينفذ الاتفاق ما بينه وما بين المانيا ويبقى حليف فعال للمنتصر في الحرب اللي كان في الوقت ده يعني المانيا فيما يبدو. ويحل عليه من الخير ومن جاور السعيد يسعد ثانيا انه يلحق يخطف له شويه من الارض في روسيا في وقت المفروض ان روسيا مشغوله فيه بالجبهتين المفتوحين عليها. ثالث حاجه انه يعلي كعبه عند الالمان على بلغاريا اللي طمعانه في الاراضي العثمانيه رابع حاجه انه يرسخ حكم الاتحاديين ويبني مجدهم وانه لاول مره من سنين طويله الدوله العثمانيه تتمدد اخيرا على ايد الاتحاديين. والمشكله اللي شايفها انور انهم لو تاخروا بقى ممكن المانيا ساعتها تكسب من غيرهم وممكن لما تكسب من غيرهم تعزم باراضي الدوله العثمانيه على الدول اللي فعلا ساعدوها في الحرب. المشكله دلوقتي ان ما حدش مقتنع بالصوره دي والكلام ده من الحكومه غير عم انور وهو رايه وشايفهم يعني ان هم نظرتهم قصيره قوي. شويه انتيخ سياسيين مفخضين طموحهم محدود ومش عايزين يتحركوا فقال لك خليني اجرب معاهم حاجه يمكن لما يشوفوا ذهب الالمان يقتنعوا. فراح من نفسه كده للالمان في 9 اكتوبر يوعدهم ان الحكومه خلاص بقت في جيبه وان هو كوزير حربيه و طلعت رئيس جمعيه الاتحاد والترقي وخليل اللي كان رئيس مجلس نواب هيقنعه جمال باشا وزير البحريه هو كمان ان هو يجي معاهم ويجبروا سعيد حليم انه يدخل الحرب واذا رفض سعيد حليم هيسقطوا الحكومه عن طريق مجلس النواب ويشكلوا حكومه جديده توافق على قرار الحرب. بشرط صغير ان المانيا تبعت لهم 2 مليون ليره تركيه ذهب علشان يقدروا يجهزوا الجيش. الالمان صدقوه فعلا وبعتوا الفلوس على دفعتين يوم 12 بعتوا مليون ويوم 19 بعتوا مليون تاني. اول ما وصلت الفلوس حصل العكس وبدل ما الحكومه ما تتشجع خليل وطلعت شافوا الذهب قالوا لك لا حرب ايه يا عم في البرد ده خلينا قاعدين بال 2 مليون دول حلوين قوي قوي قوي كده رضا وتمام. لكن جمال وزير البحريه فضل على موقفه فكده جمال وزير البحريه وانور وزير الحربيه الاثنين اللي معاهم جيش موافقين على الحرب. لكن لسه السياسيين مش عايزين يحاربوا فقال لك خلاص بقى يا عم ما بنديهاش هيدخلهم الحرب غصب عنهم. كان عنده تصور انه ممكن يدخل العثمانيين الحرب مع الروس ويتفادى انه يخش في خناقه مع الانجليز وقال لسوتشون القبطان الالماني بتاع المركبتين جويبل وبريسلاو اللي كنا حاكيين على قصه استلام العثمانيين عليهم من المانيا في الحركه الصايعه بتاعت سعيد حليم الحلقه اللي فاتت. انور اقنع سوتشون انه يروح يضرب سفن روسيه موجوده في البحر الاسود يعدي ويروح على البحر الاسود يضرب له سفينتين روسي. وكانت الخطه ان بعدها يرجع سوتشون يقول ان المراكب الروسي دي ضربت علينا احنا الاول وان ده كان دفاع عن النفس وبنضرب اللي ضربونا وان خناقتهم دلوقتي بقت مع روسيا مش مع بريطانيا خالص فسيبونا كده منا ليها. لكن سوتشون راح بوظ الخطه دي خالص وراح رايح ضارب الشواطئ الروسيه مش بس المراكب فبقت سرديه ان احنا كنا بنضرب المراكب اللي ضربتنا فك سامه. وبقى كده اعتداء مباشر غير مبرر على اراضي روسيا الحليفه لبريطانيا خناقات بقى يا معلم ولعت في الحكومه التركيه وانشقاقات واستقالات وانسحابات وتحالفات وحاجات ومحتاجات. والقرار النهائي كان للصدر الاعظم سعيد حليم انهم يبعثوا رساله اعتذار لروسيا واحنا اسفين يا روسيا ومش هنعمل كده ثاني وكلام بالشكل ده. لكن انور الصايع راح ضايف على الرساله دي ملحق رساله ثانيه بتقول ان انا بنعتذر بالرغم من انكم انتم اللي بداتوا الضرب طبعا الروس بدل ما يهدوا شاطوا بسبب الملحق بتاع عم انور ده وفي 2 نوفمبر اعلنت روسيا الحرب على الدوله العثمانيه. طب وبالنسبه لبريطانيا الحقيقه ان من بدري شويه تشيرشل كان شايف ان ضم العثمانيين لقائمه المغضوب عليهم من بريطانيا له فوائد كثير جدا وضره محدود خالص. الاراضي العثمانيه هتبقى هدايا جذابه جدا تشجع دول اكثر للدخول في الحرب والتحالف مع بريطانيا وروسيا ومحاصره المانيا. وكان شغال بيجهز لده وبيحاول يكون تحالف كونفدرالي بين صربيا وبلغاريا واليونان والجبل الاسود ووعدهم بما تبقى من اراضي السلطنه في اوروبا. وكمان طول الوقت من اول قصه المراكب الالمانيه في وسط اغسطس ولحد نوفمبر السفير البريطاني بيحذر حكومه الاتحاديين. بيحذروه من الدخول في الحرب والا هتبقى نهايه الامبراطوريه العثمانيه مش بس في اوروبا كمان في اسيا. وبعد الحرص البريطاني الطويل على المحافظه على وحده اراضي الامبراطوريه العثمانيه لعشرات السنين وقناعتهم زي ما اكتر من وزير صرح ان وحده اراضي الامبراطوريه العثمانيه من وحده اراضي الامبراطوريه البريطانيه في الكام يوم الاخين دول اتغيرت وتحولت لقرار بتفتيت السلطنه وتوزيعها بالكيلو على حساله اوروبا في مقابل حرب المانيا. فمن اول ما حصلت الضربه العثمانيه الالمانيه المدبره لسواحل روسيا اللي حكينا عليها دي كانت تشرشل خلاص اخد القرار وامر بالفعل المراكب البريطانيه بمباشره الاعمال الحربيه ضد الدوله العثمانيه. لكن الاوامر دي ما تنفذت ولحد يوم 3 نوفمبر ابتدا الضرب وضربت البحريه البريطانيه قلاع الدردنيل وتمت اضافه الامبراطوريه العثمانيه مع النمسا والمجر والمانيا لاعلان الحرب البريطانيه. ودخلت كده الامبراطوريه العثمانيه الحرب العالميه الاولى رسميا في صفوف دول المحور ضد الحلفاء يا ترى ايه اللي هيحصل بعد كده وايه اللي كان بيترتب الامبراطوريه العثمانيه ده اللي هنعرفه ان شاء الله الحلقه الجايه شكرا جزيلا لحضراتكم ونراكم قريبا سلام.
