[0:01]افاين افاين غبرت ياك؟ غبرة هادي. اه عمرك سمعتيها وقراوك في التاريخ الغابر ديال هاد البلاد أنه طرات واحد الحرب فوق أرض المغرب ماتوا فيها ثلاثة ديال الملوك فنها واحد فدقة وحدة إلا الرابع هو اللي بقى حي. المهم هاد الحرب تجمعات علينا فيها أربعة ديال الدول الأوروبية ومعاهم الكنيسة وراس الحربة فيهم كانت هي البرتغال، ولكن قبل ما نبداو خاصنا نتفكروا واحد اللعيبة المونديال ديال 2018 اللي كان في روسيا. عقلتو فاش طحنا مع اسبانيا والبرتغال وايران؟ مجموعة الموت. الماطش الأول كان مع ايران فاش بوحد دوز والماطش الثاني مع البرتغال فاش كان المنتخب المغربي مسيطر تماما على الماطش، كلشي كيقول غنربحو وكدا حتى جا رونالدو و وتزنا عاوتاني مع اسبانيا وحنا نزيرو بيت هنا بيت لهي بيت هنا بيت لهي وشفنا في التحكيم فاش المرابط قالهم فار از بولشيت. بقى فيكم الحال ياك؟ حسيتوا بالحكرة والظلم ديال التحكيم كلشي كان معول على المنتخب على الأقل يتأهل وكدا وعلاش زعما حيت اسبانيا وحنا ماتهلوش. ماديروش في خاطركم. يلا قلت لكم بلي نفس هادشي طرا في التاريخ الغابر ديال المغرب والدول اللي طحنا معاهم في 2018 هما نفسهم اللي طحنا معاهم في القرن 16 غير جدودنا ما كانوش كيلعبوا كتحطهم على الجرح كيبر. تبع معايا حتى اللخر ديال الفيديو كبر الشاشة مزيان جاك شي ميساج في الواتساب ولا شي حاجة خلي حتى من بعد. سيداتي وسادتي ليديز أند جينتليمن بليز ويلكم لديك الشي اللي مقروك حبس.
[1:41]دابا عاد غتبدا الشلاظة. تخيلوا معايا أن الامبراطورية الاسبانية الامبراطورية البرتغالية وأعلى سلطة دينية ديك الساعة اللي كانت هي الكنيسة وشوية من الطاليان شويه من الألمان وشي مرتزقة من بزاف ديال الدول الأوروبية السيوف ومطرق ومالينوا. تجموا في معركة القصر الكبير ضد المغرب بوحده. البلان بدا بحال هكا المغرب في اللخر ديال عهد الوطاسيين بدا كيضعاف كيموت ليه الحوت الدول الأوروبية ولا كيبان لهم المغرب بحال شي كيكة خصوصا البرتغال. حاطة العين بداو كيهرفون على السواحل المغربية شدو أصيلة العرائش سبتة كيديرو فيها ما بغاو الوطاسيين ولاو حامين على المدن الكبرى. أما سوس درعة تافيلالت مراكش أسفي واكليم دق صبروا حتى عياو ولاو كيحسوا بالخوف لان البرتغال وصاحباتها كتضرب بالجيوش ديالها وبقا لها غير شوية وتتاكل هذه المناطق. الناس مشتت القضية مرونة ما كاينش قائد معلم يحاربوا تحته. لقيتو واحد المدن كاين في درع وهو أول شخص غنبداو به الأحداث كانت سميته أبو عبد الله محمد وكانوا ملقبينو بالقائم بأمر الله من الأسرة السعدية. الناس كانوا كيقولوا بانه هاد السيد كان عالم بأمور الدين عندو فصاحة اللسان اللغة العربية والأمازيغية بجوج يعني كاع المواصفات اللي كانوا كيقلبوا عليها الناس أمير يكون حاكم عليهم لقاوها فيه. هاد المدة اللي دوينا عليه هو مؤسس الدولة السعدية اللي قرينا عليها في الاجتماعيات. زعما اللي ماقرناش عليها. أول حاجة كان مركز عليها هي يربي ولاده تربية دينية سياسية علم الكلام الفصاحة وصيفطهم من الحجاز بثلاثة عبد الكبير احمد الأعرج ومحمد الشيخ. وثاني حاجة دار هي انه بدا كينفخ السوفل في القبائل باش ينوضوا يقاوموا ويتحاربوا معه. بشويه بشويه الخبار بدات كتبارطاجه في سوس درعة والصيد ديالو بدا كيديع وزادو كملوها ولادهم منين رجعوا من الحجاز مشاو يقريوا في جامعة القرويين في فاس فين كاين السلطان ديال الوطاسيين. واحد في هاد الخوت اللي هو محمد الأعرج ولا كيتقرب من السلطان ديال الوطاسيين ولا هو المؤدب ديال ولاده. الخوت تشهروا في المدينة ولاو كيعطيو خطب ومحاضرات لدرجة ان السلطان كلفهم باش يديروا الدعوة للجهاد ضد البرتغال. استغلوا الفرصة وانتشروا في الأحياء القرى المدن حتى وصلو لدرعة فين كاين باهم وخوه عبد الكبير. منين تلاقاو اتفقوا باش يجمعوا الناس ويقنعوهم بلي الوطاسيين ما بقاوش صالحين يدافعوا على هاد البلاد. هزو سيوف ومطرق ومالينوا وبداو كيحاربوا مع ناس سوس كيربحوا كاع الحروب ضد الجيوش البرتغالية. كيحروا منطقة بمنطقة بمنطقة وصلوا شيظمه عبدة حاحة حتى الاسفي. ها هنا السلطان الوطاسي بدا كيدخل معه الزايد وحس بلي الأخوين يقدوا ينقلبوا عليه. خصوصا فاش وصلاتو الخبار بلي الأخوين دارو واحد الخطة دكية للقائد ديالو اللي كاين في مراكش. الخوت صاحبوا مع هاد القائد ولاو كيديرو معاه علاقات كيعاونهم في الحروب كيعطيوهم المأونة حتى لواحد النهار غاديين في رحلة ديال الصيد ودارو ليه السم في الخبز الصغير اللي كانوا كيسميوه قريشلات. ماكم جاتكم عجب راه قريشلات اسم عندو تاريخ من ديك الوقيتة. منين سالو معه ضمو مراكش للحكم ديالهم واللي سهل عليهم الناس اصلا في مراكش كانوا باغين هاد الأخوين السعديين هما اللي يحكموا. هنا بداو الأخوين كيصلحوا البلاد من التخريب اللي دارت البرتغال القرى والبواضي كيعطيوهم السلاح باش يقويهم من الداخل وهنا ولات مراكش والنواحي تحت الحكم ديال احمد الأعرج تارودانت درعة وسوس تحت الحكم ديال محمد الشيخ. والسلطان الوطاسي بقات ليه غير فاس. ترونت في المغرب الوطاسيين جمعوا جيش كبير وهابطين باش يفنيوا الخوت وباهم. ونزيدكم الإمبراطورية العثمانية كانت كدعم الوطاسيين بالجيش والسلاح لأنهم هما كانوا حلفاء مع بعضياتهم. الشبكات ديمات ما بين المسلمين ماتوا فيها فقهاء علماء ناس ما عندهم حتى شي علاقة بالحرب ترونات ترونات ترونات وفي اللخر السعديين هما اللي غلبوا وخدوا فاس. هوب طلعوا للحكم. هادشي كيعني رسميا ان الدولة الوطاسية مشات طلعت بلاصتها الدولة السعدية. احنا غاديين بشويه دابا. الملك دابا هو باهم أبو عبد الله وولدوا احمد الأعرج هو الخليفة ديالو ومحمد الشيخ هو الأخ الصغير الوزير. كانوا غاديين مزيان المغرب بدا كيتقوى السلاح كدا واخا مات أبو عبد الله الولد اللي خلفوه اللي هو احمد الأعرج غاديين مزيان خوه معانوا الأمور مزيان حتى دخلوا بيناتهم الوشات الوسخ ما بين الضفار واللحم. ناضت عاوتاني الروينة الجيش تقسم لجوج طوائف نص مع احمد الأعرج والثاني مع محمد الشيخ. بقاو هكاك هاك بالك حتى محمد الشيخ الأخ الصغير قتل خوه الكبير احمد الأعرج. اه دابا احنا غاديين بشويه بشويه شكون هو الملك دابا محمد الشيخ وعقلوا دابا عقلوا. محمد الشيخ منين شد الحكم كان مشرمل بمعنى الكلمة. تخيلوا انه بدا كيمشي ويقتل كاع الزعماء ديال القبائل اللي كانوا معاه في الأول باش ما تبقاش عليه المن وكتل حتى العلماء والشيوخ اللي معارضين ليه باش ما يأثروا في الناس وتنوض الفتنة. حيت ديك الوقيتة ماشي بحال دابا كان الإنفلونسر الحقيقي هو العالم ولا الشيخ واللي كياثر في الناس. ناض مسخوط شد اي واحد من الوطاسيين سنسلهم وصيفطهم لمراكش دار هكا باش ما يبقا ينافسه حتى شي واحد إلا واحد الأمير هرب ليه للحدود ديال الجزائر. عقلوا على ذاك الأمير حيت دابا شويه بسبابه غتترول. محمد الشيخ ما حبش غير هنا هز الجيش مشا ديريكت لاسفي اللي كانت محتلاها البرتغال 72 سنه. حل الحصن ودخل جر على البرتغال من بعد ما البرتغال شافوا هاد الهيلمان هذا خرجوا حتى من أصيلة وازمور. ونجح صراحه انه يرد المغرب قوي وفرض الضريبة على كلشي باش تقوى البلاد ويتقوى حتى الجيش. فلوس وما كلشي دابا كلشي غادي مزيان. عقلتو على داك الأمير اللي قلت لكم قبيل هرب؟ ما عرفتوش المنطقة اللي هرب فيها فين؟ منطقة تلمسان اللي كاينه في الحدود ديال الجزائر اللي كانت تابعه للدولة العثمانية. غتترون. محمد الشيخ حمر عينه مزيان على منطقة تلمسان هز الجيش ديالو وطلع عند ديك البلاصة حيت فيها العدو ديالو. تسع شهور وهو حاصر عليها دخل ليها واحتالها ولكن من بعد عام رجعوها العثمانيين. شنو الفائدة من هادشي؟ اللي مهم في هادشي هو أن السلطان العثماني سليمان القانوني صيفط الجيش باش محمد الشيخ تنحى من المغرب ويردوا السلطة لذاك الأمير اللي هرب عندهم أبو حسون الوطاسي. لا لا لا لا لا لا لا. محمد الشيخ ما تسرطاتش ليه مشا غبر عام جمع قبائل سوس كاملة وهبطو لفاس. خرجوا أبو حسون الوطاسي والعثمانيين اللي معاه وكاع كلشي رجع محمد الشيخ. ايوا السلطان ديال العثمانيين وصلته الخبار وعاد وصلته تنقنيقه اخرى بلي محمد الشيخ تحالف مع اسبانيا ضده. هنا سليمان القانوني قال الكاتب ديالو جبد جلدة وقلب وكتب لمحمد الشيخ. كتب احنا كنهنئوكم بالوصول للحكم كنلتمسوا منكم انكم دعيو لينا في المنابر والجوامع وتسكو الفلوس باسمنا كما كانوا كيديرو خوتكم الوطاسيين يعني المغرب يولي تابع للدولة العثمانية. اسميا جا المرسول دخل للمغرب وصل الرسالة ورجع بحاله في نظركم شنو هو الجواب اللي غادي يكون قال محمد الشيخ للسلطان العثماني؟ منين وصل المرسول سولوا السلطان العثماني فينا هي الرسالة؟ قال له ما اعطاني والو ولكن فاش كان كيقرأ الرسالة ديالك تعصب وتزنق وقال ليا قول لذاك سلطان الحواته اللي مصيفطك ليا ما جاوبوا حتى نتلاقاو في مصر. وهذه الرسالة فيها بزاف ديال المعاني الأولى هي انه قصد ان المغرب غيولي حاكم من المغرب حتى لمصر. والثانية قال له سلطان الحواته حيت الإمبراطورية العثمانية كان عندها من بين أقوى الأساطير البحرية في العالم. ايوا لا. سليمان القانوني جمع الوزراء ديالو استشار معاهم على ود باش يجمعوا الجيش ويدخلوا للمغرب. أغلبهم ما اتفقوش معه إلا واحد المستشار قال ليه نديروا خطة بأقل الأضرار. قال له راه عندنا واحد القائد تركي سميته صالح الكاهيه كان واثق فيه محمد الشيخ وداروا وسط الجيش ديالو حيت كانت عنده تجربة كبيرة في الحرب مع الوطاسيين والعثمانيين. وهنا في هذا الفيديو غتحسوا بحال كنلعبوا الشطرنج لان السياسة ما فيهاش الثقة. المستشار ديال السلطان العثماني غيصيفط ميساج لصالح الكاهيه وجد راسك غنصيفطوا لك 12 لواحد متخصصين باش يديروا عمليات اغتيال لمحمد الشيخ. ويجيبوا الراس ديالو حتى لعند السلطان العثماني للقسطنطينية. صالح الكاهيه ما بغاش في الأول ولكن قنعوه توسط لهاد 12 لواحد ودخلهم لعند محمد الشيخ على أساس أنهم هما هاربين من الحامية اللي كاينه في الجزائر من الجيش ديال العثمانيين ودخلوا عنده حيت هما كيامنوا به وبالسلطة ديالو وبغاو يكونوا تحته ويعاونوه باش يحكم حتى الجزائر. ايوا محمد الشيخ وثق فيهم ولا كيعطيهم بزاف ديال المهام ولاو كيبوسوا ليه يديه كل صباح كيف ما كانوا كيديرو للسلطان العثماني. تيقوه في راسو حتى حسوا براسهم شدو بزمام الأمور في واحد الليلة خارجين في واحد الرحلة حتى وصلوا لجبل درن في أكركار تارودانت. خلاوه حتى نعس قطعوا ليه راسو بشاقور وداروه في كيس ديال النخاله ذاك الخيل اللي كيكون عند حشاكم البغال والحمير باش ما يعيقوش بهم ملي يكونوا خارجين. سراو في حالهم من الجزائر قطعوا طريق البحر حتى وصلوا للقسطنطينية. منين وصلوا الراس عند السلطان العثماني قال لهم شدوه وعلقوه في القلعة باش يبقى عبره لكاع الناس اللي كيشوفوا الخوالف. دابا ركزوا معايا اخوتي حيت العافية غتشعل. قبله. محمد الشيخ اه تقتل ولكن خلى ثلاثة ديال ولاده. والحننش ما كيولد غاما طول منه الثلاثي الخطير كلها والخطه ديالو كانوا سبب في أن حتى دولة ما قدات تحكم المغرب في العهد ديالو. ها انتم غتسمعوا سميتهم دابا وانا متأكد واحد فيهم غتعرفوه حيت قرينا عليهم في الاجتماعيات. ركزوا. نبداو باللي ما كتعرفوش عبد الله غالب كلشي كان كييثق فيه ديبلوماسي خطير وذكي وكلشي اصلا كان باغي يحكم وهو اصلا اللي كان الخليفة من بعد باه اللي غادي يحكم. الولد الثاني عبد الملك الأول عندو اكثر من خمسه ديال اللغات وسياسي محنك. الثالث واللي كلنا كنعرفوه الديب ديال الدولة السعدية داهية الحرب والسلاح احمد المنصور الذهبي. دابا عرفتوني علاش كنهضر. عبد الله الغالب الأخ الكبير منين عرف بلي باه تقتل كان كيوجد للهجوم ديالهم قبل ما يوصل اصلا راس باه للقسطنطينية. ما جا الترك يوصلوا للحدود ديال المغرب حتى لقاو الجيش ديال المغاربة واقف حسكه وهنا وقعت المعركة اللي كلنا قرينا عليها ما غنهضرش عليها دابا معركة وادي المخازن. وباختصار حيت هاد المعركة ما كتهمنيش بزاف المغاربة كلاو العثمانيين في هاد الوقيتة اجي اجي اجي اجي اجي اجي. فين مشاو الخوت بجوج الأمير عبد الملك والأمير المنصور الذهبي؟ باش نجاوبوا على هذا السؤال خاصنا نعرفوا واحد القاعدة بلي شحال هذه الملك منين كيطلع للحكم يلا كانوا عندو خوتو كبار وخصوصا إلا كان عندو الولد اللي غادي يحكموا من بعد كيقتل خوتو ولا كيصيفطهم وهذا الشيء اللي طرا بالضبط الأخوين بجوج بقاو شويه وسراو في حالهم من المغرب قطعوا الجزائر تونس كدا حتى وصلوا للقسطنطينية. منين وصلوا طلبوا من السلطان العثماني باش يهبط راس باه ويدفنو ما تبقاش ديك الشوهه وكدا تعامل معاهم ولده سليم الثاني وبدات كتكريا العلاقة ما بين الأمراء السعديين اللي هاربين والسلاطين العثمانيين. لدرجة ان هاد الخوت المنصور وعبد الملك ولاو كييحاربوا مع الدولة العثمانية وبينوا على الشجاعة ديالهم. هادشي خلاهم يكبروا في عينين الدولة العثمانية لدرجة ان عبد الملك ولا في البلاط ديال السلطان العثماني. بقاو بحال هكا عبد الملك وخوه المنصور جالسين واحد النهار حتى كتجيهم واحد التنقنيقه. خوككم عبد الله غالب مات في المغرب. وولدوا المتوكل هو اللي شد الحكم. هاد هاد هاد هاد شنو هو؟ اه كيفاش شد الحكم؟ بانا محمد القائم بأمر الله اللي هو المؤسس ديال هاد الدولة ديال السعدية وهاد اللعب هذا قال بلي الحكم غيدوز للأكبر في الأكبر ماشي الأكبر فولده. حنا فين مشينا؟ والكبير هذيك الساعة هو عبد الملك ماشي المتوكل اللي هو ولد خوه. جبد عاوتاني ديك السيوف ومطرق ومالينوا خذوا 5000 مقاتل من السلطان العثماني دعمهم بها وهبطوا للمغرب. مع وصلوا لتما عبد الملك ولا كيتواصل مع القبائل اللي دعمها وبغاها هو اللي يحكم ماشي المتوكل وناض عطى قيادة الجيش لاحمد المنصور الذهبي وقال له انت تقود الجيش وانا مول الشي. طحن جمعوا الجيوش وهبطوا لفاس عند ولد خوهم المتوكل والتقى الجيشان. دابا ركزوا معايا حيت انتما عارفين شكون اللي ربح باين الخوت هما بجوج اللي غا يربحوا حيت هما اللي عندهم خبرة كبيرة اكثر. ولكن عرفتوا شنو طرا؟ المتوكل من بعد ما خسر هرب لمراكش والخوت هنا شدو الحكم. عبد الملك هو السلطان وخوه المنصور الذهبي هو اليد اليمنى ديالو وهو الحاكم ديال فاس. والخمسه آلاف مقاتل اللي جات معاهم من القسطنطينية من الجيش العثماني خلصوهم ورجعوا في حالهم. وهنا ولد خوهم المتوكل حس بالحكرة والخسارة وعينيه عموا بالظلام ودار أكبر غلط في حياته. اسمع اسمع اسمع اسمع هادشي اللي غادي نقول دابا هو اللي داير عليه الفيديو كامل. خونا في الله المتوكل ولد خوهم طلع على البرتغال العدو اللدود ديال المغرب. علاش طلع تما في نظركم؟ علاش؟ طلع تما باش يستنجد بهم يرد الحكم ديالو والمقابل يعطيوه السواحل المغربية كاملة. من اللخر باع البلاد. ولا لا البرتغال جاتها من الجنة والناس هذا خبيز وناكلوه. ديك الساعة في البرتغال سيباستيان يلاه شد الحكم باقي شاب زوين متيول باقي فيه ذاك الحماس ولكن غيجيبها في راسو عندو جيش قوي واسطول بحري قده قد الخلا مستعمر اسيا ودول في افريقيا والامريكياتين وبزاف ديال السواحل. ناض الزغبي ديال سيباستيان تحمس بزاف وصيفط ميساج للكنيسة اعلى سلطة في اوروبا ديك الساعة صيفط ميساج للملك ديال اسبانيا قال له بلي راه البعلوك جا عندنا ودابا غا نقيدوه باش نهبطوا للمغرب. ملك اسبانيا في الأول ما كانش موافق معه نهائيا. قال له راه المغرب هذاك وانت عارف شنو مدوزين معه وصعيب علينا اصلا ندخلوا دابا ولكن اللي عليا انا هو انني غنعطيك طرف من الجيش الاسباني باش تعاون به في الحرب. باختصار خونا في الله تلقى دعم من اربعة ديال القوى العسكرية اسبانيا الكنيسة طاليان الألمان وواحد المرتزقة من بزاف ديال الدول الأوروبية. وهادو كاملين ضد هذا نرجعوا للمغرب المغاربة ما كانوش ناعسين خصوصا عبد الملك كيصيفط لخوه المنصور الذهبي خويا الله يحفظك برد ذاك الجيش اللي كاين في العرائش تريني به مزيان عطيه المونى راه في اي لحظه تقدر ترو. الله الله الله بدات كترون بدات كترون بدات كترون. سيباستيان جمع الرؤوس الكبار كاملة البلاط الملكي السلاح كيعمر في الجيوش في السفن باش يهبط للمغرب. والغريب ان المستشارين ديالو في الأول ما كانوش موافقين انهم يتورطوا في هذه الحرب معه في المغرب. وحسب هاد المراجع اللي غتشوفو قدامكم هنا ولا تلقاوهم في الديسكربشن أقل حاجة كان العدد ديالهم هما 80,000 واكثر حاجة كانت هي 125.000. الروايات كتختلف ولكن احنا نمشيوا بهاد الأعداد. قلعات السفن من ميناء لشبونة ودازو ريحوا فلاغوس من بعد دازو القادش في اسبانيا ريحوا فيها سيمانه وهما هبطو لطنجه. وتم غيتلاقاو مع المتوكل ولد خوه ويهبطو لأصيلة. المغرب كله من الشمال حتى للجنوب سهر. العدو عفط برجليه على الأرض شعلت فيهم العافية حسوا بالغيرة ديال بصح حيت حسوا بلي تقاصو في دينهم كمسلمين وتقاصو في أرضهم كمغاربة. كلشي ركب الخيل السيوف السلح وكيتسناو غير اللحظه اللي غادي يكونوا فاصا فاص مع العدو. واحد في هاد المحاربين هادو احتمال كبير يكون جد جد جد جد في جد جدودك لان المغرب كامل شارك. اه عبد الملك صيفط ميساج لخوه المنصور قال له خونا جمع ذاك الجيش اللي في فاس وطلع به القصر الكبير. وانا غنجمع جيش اللي في مراكش وغانتبعك للقصر الكبير وذاك سيباستيان ضربوا على حسابي حيت انا اللي عارف كيفاش غادي نجيبوا يتحارب معنا في البلاصة اللي بغينا حنا. عبد الملك منين وصل للقصر الكبير صيفط رسالة استفزازية لسيباستيان. قال له اني قطعت اليك 16 مرحلة أما ترحل اليا واحدة يعني بالدارجة ضربنا طواله على قدها وترجل معنا اجي عندنا. سيباستيان الرسالة استفزاته واخا المستشارين ديالو قالوا له لا. حضروه ما تمشيش واخا هكاك هز الجيش هو طلع للقصر الكبير. ذاك الشيء اللي بغاو. ولكن عبد الملك منين كان جاي من مراكش كانوا كيبانوا عليه اعراض في شكل ومنين وصلوا لسللا زاد عليه الحال. وتحت واحد ما كان عارف المرض ديالو إلا خوه المنصور الذهبي والطبيب اليهودي ديالو اللي كان شاك يا اما تسمم يا اما مرض بشي مرضى في ذاك الطريق اللي كان كيضرب. المهم كلشي وصل للقصر الكبير ولكن في نظركم علاش عبد الملك والمنصور الذهبي جابوا الجيوش لهنا وبغاو يتحاربوا في هذه البلاصة القصر الكبير؟ علاش ماشي مراكش ماشي في فاس ماشي في شي بلاصه اخرى؟ اولا الجيش ديال سيباستيان إلا جا القصر الكبير ما عنده منين ياخذ لا المؤان ولا السلاح. ثانيا الجيوش ديال سيباستيان غادي دوز من تهدارت غتهبط للقصر الكبير غطلع فوق القنطرة ديال وادي المخازن وغتلاقى مع الجيوش المغربية وهنا غي وحلوا حيت غيتحاسروا ما بين ثلاثة ديال الوديان وادلوكوس واد المخازن واد ورور والجيش قدامهم. اه وعقلوا على القنطرة مزيان. 1578 تقابلت هذه الجيوش كامله مع الجيش المغربي. تلاقاو ثلاثة ديال الملوك السلطان المغربي عبد الملك السعدي الملك ديال اسبانيا سيباستيان هو اللي كان ملك المتوكل ولد خوه. الخطة كانت بحال هكا المغاربة نظموا الجيوش ديالهم على شكل هلال الاستراتيجية الحربية ديال المغاربة كانت دقيقة جدا ها انتما عيشوا معايا اللحظه عيشوا. القدام داروا المدفعيات في الوسط حطوا الموشات والرومات في الجناح حطوا المجاهدين والمتطوعين من كل مناطق المغرب واللي حامي الظهر ديال الجنود هما المحاربين الأمازيغ. وعبد الملك بطبيعة الحال كان في الوسط فين مشى المنصور الذهبي؟ كان مخبي مور الجيش في واحد البلاصه ما كيبانش هو والجنود الخيالة وهزين مواد متفجرة الى حد الآن لا وعلم اش غيديروا بها. بدات الحرب. هنا وقعت المعركة.
[17:02]الجيوش بجوج كيتيريوا بالماء دافع القنابل من هنا ومن هنا. عبد الملك مركز في واحد الركنه كيتسنى شنو هي الخطوة اللي غادي يدير سيباستيان. سيباستيان كان حاط القوات المتفوقة عنده والفرسان في المقدمة ديال الجيش. وسط الروينة ديال هاد المدافع سيباستيان عطى أمر لهاد الفرسان باش يخترقوا الجيش ديال المغاربة ويضربوه في الوسط. الآخرين جايين كيجروا المغاربة حابسين عبد الملك ما كيعطي حتى شي أمر الصف الأمامي ديال المغاربة كيتيري بالرصاص وكيعطي اللي في جهده لهاد خوتنا اللي جايين. ولكن في الوقت اللي المغاربة كيعاودوا يعمروا السلاح الفرسان دخلوا وسط الجيش المغربي طول وعرض. وبقاو غاديين للقلب الجيش المغربي باش يفنيوا السلطان الأجنحة ديال الجيش المغربي واقفين ما كيديروا والو كيشوفوا الغوات وخوتهم كيتقتلوا الوسط وما غيديروا والو حيت عارفين بلي هادشي جزء من الخطة. ثبت الصف الثاني حتى هو بدا كيتخترق وهنا عبد الملك غيبين على نيابه والخطة الذكية ديالو. نقص هو والحراس الشخصيين ديالو ودخلوا للمعماعة كييتحاربوا باش يقادوا ذاك الصف وعطى أمر للأمازيغ اللي كانوا اللور باش يتقدموا ويهجموا معه. وفديك الروينة والرؤوس كتقطع عطى إشارة لخوه المنصور الذهبي باش يخرج من الجناب وهي ترون. احمد جاي من ليسر واليمين هو والقبائل والخيل والمكاحل وغاديين ديريكت باش يدوروا الجيش ديال سيباستيان. عبد الملك خرج من الصف وعطى أمر للجناح ديال المغرب باش يطوق هدوك الفرسان ما يخليهمش يخرجوا يعاونوا سيباستيان. شنو طرا؟ ولكن عبد الملك شنو طرا ليه؟ انتما عارفين بلي كان مريض. كاينين جوج روايات. الرواية الاولى كتقول بلي كان فوق الخيل ديالو ورابطين ليه باش ما يطيحش ودخل كيتحارب ومات في الحرب. الرواية الثانيه كتقول بلي منين شاف الحرب في صالح المسلمين رجع للخيما ديالو وتكى ودار السبحة على فمه باش منين يموت يلا دخل شي واحد من الحراس ديالو ولا المنصور الذهبي يعطيه علامة بانه يسكت وما يشيعش الخبار ديال الموت ديالو باش المسلمين تبقى العزيمه ديالهم. هذاك الشي اللي وقع بالضبط الحرب بقات غاديه كيف ما هي المنصور الذهبي طوق الجيش ديال سيباستيان الخيالة والجناح ديال المغرب حتى هما دخلوا مطوقين. السيوف والمكاحل ترونات وبداو كيفنيوا فيهم وحده بوحده. شويه طرف من الجيش ديال البرتغال بدا كيييحاول يهرب اللور ولكن هيهات. شكون اللي غادي يجي يعاون دا؟ ديروا ستوب للحرب وسمعوا معايا مزيان اخوتي. منطقة القصر الكبير كانوا ساكنين فيها بزاف ديال الموريسكيين. اللي هما آلاف ديال المسلمين اللي كانوا ساكنين في اوروبا في عهد ديال الاندلس حتى طاحت الاندلس من يدين المسلمين بالضبط في سقوط غرناطة. الأوروبيين فاش سقطت الأندلس غدروا بالعهد ديال كلها يعيش بالدين اللي بغى ولاو كيشدوا لكاع المسلمين اللي كاينين ساكنين في اسبانيا والبرتغال والدول المسيحية الأوروبية وكيجبرهم في محاكم التفتيش بالتعذيب والقتل وكلشي باش يولوا مسيحيين. من بعد هاد المعاناه كامله اللي عانواها بداو كيهربوا للجزائر ولتونس ولدول الخارج وجزء منهم جا للمغرب فين؟ منطقة القصر الكبير. نرجعوا للحرب. هاد الحكرة وهاد الغصة اللي ما زالين كيحسوا بها بقات فيهم. كيشوفوا العدو اللي عذب العائلات ديالهم وولادهم تما. ها هو كيهرب قدامهم خرجوا كلهم من المنطقة ديال القصر الكبير اللي بالسيوف اللي بالخيله اللي بالمدى كلشي ودخلوا للمعماعة وسدوا ديك الثغرة اللي كانوا كيهربوا منها الجيوش البرتغالية. وهنا المنصور الذهبي جر ديريكت مع الخيالة ديالو حتى وصلوا للقنطرة ديال وادي المخازن وكتسمع في ودنين ديال الجيوش واحد تفركيعه خيالية. الله أكبر ترسات القنطرة. هذه هي القنطرة اللي هدم المنصور الذهبي وبقاو منها غير طريفات صغار. ما بقى للجيوش البرتغالية فين تمشي حصلوا حصلة خايبة. سيباستيان ما بقى عنده حتى شي خيار دخل وسط المعمعة وتقتل. وفهاد الدار بالضبط تدفنات الجثة ديال سيباستيان قدام المسجد الاعظم اللي كاين في القصر الكبير. الراس الكبير منين مشا الجيوش الصليبية كلها تدعضات جزء منهم كبير مشى هارب لجهه الواد وتقتل وتغرق ومنهم كان المتوكل ولد خوه المنصور الذهبي والملك السعدي. ماتوا ثلاثة ديال الملوك عبد الملك السعدي المتوكل وسيباستيان وبقى احمد المنصور الذهبي. وهنا بيعوه المغاربة باش يولي ملك البلاد الحاكم الجديد ديال الدولة السعدية. هذه الحرب اللي طرات ذاع الخبار ديالها في العالم كامل المغرب ديك الدولة اللي كان كلشي باغي يحتلها طحن دولة داعماها اوروبا كامله. هادشي وقع حيت المغاربة عمرهم احنا والراس لأي دولة كيف ما بغا يكون نوعها واللي دخل للأرض كيتفنى. واش فراسكم بلي من بعد الحرب ديال وادي المخازن ما بقات شي حاجه سميتها البرتغال لان في هذه الحرب الجيش كامل الرؤوس الكبار ديال البرتغال كلشي مات وتآثر لدرجة ان الملك ديال اسبانيا من بعد عامين غيضم الأراضي البرتغالية للأراضي الاسبانية وصافي ما بقاتش شي حاجة سميتها البرتغال. بسباش؟ بسباب أن واحد خونا سخن عليه راسو وقرر انه يحط رجله على هذه الأرض سيباستيان بلا ما نحتاج نوصف في العهد ديال المنصور الذهبي كيفاش المغرب ولا كدولة. واخا صراحه ارتكب المنصور الذهبي بزاف ديال الأخطاء الاستراتيجيه وكان عليه يكمل داكشي اللي بدا ويحرر سبته. ولكن واش عرفتوا كيفاش كان المغرب في ديك الوقت خصوصا من بعد الحرب ديال وادي المخازن؟ الأوروبيين ولاو كييجيو يقراو في جامعة القرويين علم الفلك الرياضيات الجغرافيا والسبيطارات ديال الماريستان اللي تبناو من علماء مغاربة وأطباء مغاربة. راه ما يمكنش المريض المغربي وحتى اللي ماشي مغربي كان كيتعالج في هاد السبيطارات كياكل ويشرب ويتعالج ومنين كيسالي كيخرج من السبيطار كتسمى فترة النقاهة كيعطيوه فلوس باش يرتاح. كانوا دقيقين جدا بيت المال ديال المسلمين اللي هو حاليا كيتعتبر الضريبة كانت ديك الفلوس كتمشي لشي بلايص وشي حوايج دقيقة عندها منفعه كتبان. واش عارفين بلي السبيطارات ديال الماريستان كان دايز وسطهم الجداول ديال المياه والنافورات بالرخام كيطلع منهم الماء باش المريض منين يكون كيتسارى في ذاك السبيطار ولا يخرج يتهوى يتنفس يتشافى كييوفروا ليه كاع الأساليب وكلشي باش يخرج سير فحالك. شوفوا غير فين وصلت الحدود ديال المغرب شوف مزيان شوف مزيان. قرا التاريخ ديال المغرب كامل. اه طحنا اه تحتلنا. ولكن عمر جدودنا حنا والراس بقاو حالين وما تحرروش. فين ما كتلقى المغرب كيتستعمر أو كيتستحل المغرب كامل كيشعل باش يتحرر. حنا دابا هاد الجيل هذا اللي كنقولوا الله ينعل باها بلاد ما فيها والو خاصنا نعرفوا بلي المغرب ماشي مجرد دولة في شمال افريقيا. انا ما كنقارنش وما كنقللش من قيمة الدول الاخرى طوبه وحده من جامعة القرويين كتسوى 100 عام في تاريخ دولة من هاد الدول. حنا ماشي دولة يلا بانت البارح كنعانيو من مشاكل في البلاد اه عندنا البطالة اه عندنا السياسيين ما عندهم حتى علاقة بالسياسة اه عندنا اه عندنا هادشي كامل عارفوا. ولكن شكون اللي غيبدلو؟ حنا اللي غنبدلو ما كتعرف تحك لك ظهرك غا يدك. راه ما يمكنش تكون عايش في بلاد وورث فيها العجب ديال الحضارة والكلمة الوحيدة اللي كتقدر تقول هي ما عرفتش ما عرفتش ما خاوي من الداخل أصاحبي اي واحد عايش معنا في هذه البلاد راه عارف المراره اللي عايشها ومن حقه ينتقد باش يغير من الداخل. ولكن ما من حق حتى شي مخلوق خارج حدود هذا الوطن يقرقب الناب علينا ولو بكلمه. الكلمة الخايبه في بلادك جمرة لازم تكويك لازم تعطيك الهمة وشان باش باش توعى بذاك الشي اللي داير بك. وتعرف شكون اللي معك وشكون اللي ضدك. بقاش غادي امدمدم. العز اللي فينا عمرو غادي يتف و الارض اللي احنا فوقها عمرنا غا نسمحوا في طرف منها. احنا دار الخير سوارينا عالية ما عمرها تزعزعت لا بكلام ولا بقرطاس العدو. صهدنا حار و بردنا يطفي جمر الدارك الاسفل في الصدور الشاعلة بالحقد. انا ما كديرش فيديوهات باش نعاود الحجايات تفرجوا فيهم وتقولوا هاد السيد واعر. انا كنجبد القاع الخاتر اللي فينا. القاع اللي مجدر الثقيلة اللي الأغلبية ما عرفوهش. داك الشي علاش ولينا خاويين من الداخل وما تايقينش في ريوسنا وكيسحبنا ما عمرنا غنزيدو القدام. حيت عمرنا قرينا وعرفنا داك الشي اللي عندنا. قد ما عرفتي شحال انت ثقيل ووازن قد ما عرفتي الورت اللي عندك وانت وشنو كتسوى. قد ما غات هز الهمة ديالك و غيكون عليك حمل ثقيل ديما ممرضك باش تهز وتكمل داك الشيء اللي بناو والديك. حنا حضارة حرام تموت. حنا حضارة خصها تكمل وخليها في ودنك ديما ما تخليش بنادم يحكرك وعطيه على ودنيه يلا تلى غير بالفكره.
[25:14]السلام عليكم.
