[0:00]ليه ربنا امر الحوت بابتلاع يونس عليه السلام وخرج تاني من بطن الحوت ازاي؟ وقومه عملوا ايه لما ابتلعوا الحوت؟ تفاصيل كتير هتلاقيها في الفيديو ده، تابعوا للاخر ويلا نبدأ.
[0:18]القصة بتبدأ من مدينة نينوى في شمال العراق. هناك ربنا أرسل سيدنا يونس للناس يدعوهم لعبادة الله وحده، فكذبوه وتمردوا عليه. وطالت المده وهو بيدعوهم لكن بدون فايدة، فقرر سيدنا يونس إنه يسيبهم ويخرج من القرية. وقبل ما يمشي قال لهم ان عذاب ربنا هينزل عليهم. وبعد ما خرج ربنا قذف في قلوبهم الإيمان والتوبة وندموا على تكذيبهم لنبيهم. فتضرعوا لله ودعوه واستغفروه، كل اهل البلد تقريبًا كانوا بيدعوا وبيبكوا من الندم. الرجال والنساء والصبيان، حتى الحيوانات بقت بتعمل أصوات كأنها بتتضرع لربنا إنه يكشف عن البلد العذاب. كانت ساعة عظيمة جدا، جت بعدها رحمة ربنا وكشف عنهم العذاب ومحدش منهم اتمس بأي أذى. العذاب عدى من فوقهم في مشهد رهيب جدا، تجلى فيه رحمة ربنا الواسعة ورأفته بعباده. ودي كانت البلد الوحيدة في التاريخ اللي امنت بالكامل، وكان عدد سكانها أكثر من 100 ألف انسان. سيدنا يونس ما كانش يعرف اللي حصل لأن كل ده حصل بعد ما هو خرج من البلد. لما خرج راح ركب سفينة مع مجموعة من الناس، وفي وسط البحر حصل اضطرابات جوية شديدة. الأمواج عليت والريح اشتدت والسفينة أصبحت معرضة للخطر بشكل كبير، وفي الحالة دي الناس اضطروا يتخلصوا من كل الأحمال الزايدة في السفينة. لغاية ما وصل بيهم الحال انهم لازم يتخلصوا من حد منهم لتخفيف الوزن، فكان القرار صعب جدا واضطروا يعملوا قرعة ويشوفوا مين اللي نصيبه يسيب السفينة. بدأوا بالفعل وأول مرة تمت الإشارة على سيدنا يونس. فرفضوا المرة دي وقالوا يعيدوها لأنهم كانوا شايفين أن يونس عليه السلام شخص صالح وما يستاهلش كده. فعدوها ثاني مرة وبرده تمت الإشارة ليه، فقام وقلع هدومه علشان ينط في البحر. فرفضوا وقالوا نعيدها مرة ثالثة، لكن ربنا لما يريد حاجة ما فيش حد يقدر يمنعها أو يغيرها سبحان الله. فعدوها لثالث مرة وكانت الإشارة برضه على يونس عليه السلام فاستسلموا للأمر، وبالفعل ساب يونس السفينة. وهنا ربنا أمر حوت ضخم إنه يبتلع يونس عليه السلام، لكن بطريقة معينة. ربنا أمر الحوت إنه ما يأكلش من لحمه حاجة ولا يكسر ليه عضم وعرفوا أن ده مش رزق ليه. وفعلًا راح الحوت وابتلع سيدنا يونس عليه السلام وطاف بيه البحار بأمر ربنا. يونس عليه السلام لما استقر في جوف الحوت ظن إنه مات. ظلام دامس، شعور غريب، أصوات غريبة. حرك أطرافه فتحركت فعرف انه لسه حي، وساعتها خضع لإرادة ربنا وقال: يا رب اتخذت لك مسجدا لم يعبدك أحد في مثله. عدت ليالي وهو في جوف الحوت بيوحد ربنا ويسبحه وبيعترف انه غلط لما أصابوا اليأس من قومه وسابهم وغضب. وفي الفترة دي كان يونس عليه السلام بيسمع أصوات أول مرة يسمعها. فقال في نفسه ايه الأصوات دي؟ فجاء له وحي ربنا ان دي أصوات دواب البحر وهي بتسبح. وفي نفس الوقت الملائكة سمعت صوت تسبيح يونس عليه السلام، فقالوا يا رب احنا سامعين صوت ضعيف في أرض غريبة. فرد عليهم ربنا وقال لهم ده عبدي يونس عصاني فحبست في بطن الحوت في البحر. فقالوا له يا رب ده العبد الصالح اللي كان بيصعد ليك منه في كل يوم وليله عمل صالح، فقال لهم أيوه هو. فالملائكة كانت شفيعة عليه عليه السلام وسألوا ربنا انه يرحمه ويفرج كربه. وبالفعل استجاب ربنا لتسبيح يونس عليه السلام وشفاعة الملائكة وأمر الحوت انه يلفظوا على الشاطئ. خرج سيدنا يونس من جوف الحوت ضعيف جدا مش قادر يتحرك تماما. رفيع جدا وما فيش عليه هدوم، وجلده باين عليه تأثير اللي هو كان فيه. فوهو مكانه ربنا أنبت عليه شجرة يقطين اللي هو القرع، وكان الحكمة من كده أن ورق الشجرة دي كبير وبيعمل ظل وما فيش ذباب بيقرب له. ده غير ان القرع فيه فوايد كبيرة جدا لجسم الإنسان، وينفع يتاكل في كل حالاته، ني أو مطبوخ، حتى البذر بتاعه ينفع يتاكل. وغير كده كمان ربنا سخر ليونس عليه السلام نوع من الماعز كانت بتيجي تقف عنده وتخليه يشرب لبنها. برغم انه مش قادر يتحرك وكانت بتعمل ده كل يوم صبح وليل، وده من رحمة ربنا ونعمته وإحسانه ليونس عليه السلام. ربنا نجاه بسبب تسبيحه وخضوعه، وقال في كتابه الكريم ان أي حد من المؤمنين هيتضرع ليه ويسبحه هينجيه من الكرب والحزن. والدليل على ده ان في احد الصحابه راح للنبي عليه الصلاة والسلام وساله عن قول يونس عليه السلام. هل ده فيه خصوصيه ليه وربنا نجاه بالدعوة دي ولا ينفع أي حد يقولها وربنا ينجيه؟ فالنبي عليه الصلاة والسلام قال له انها ليونس خاصة وللمؤمنين عامة إذا دعوا بها. وقال له انت ما سمعتش قول ربنا عز وجل لما قال: أعوذ بالله من الشيطان الرجيم فَنَادَى فِي الظُّلُمَاتِ أَن لَّا إِلَهَ إِلَّا أَنتَ سُبْحَانَكَ إِنِّي كُنتُ مِنَ الظَّالِمِينَ (87) فَاسْتَجَبْنَا لَهُ وَنَجَّيْنَاهُ مِنَ الْغَمِّ وَكَذَلِكَ نُنجِي الْمُؤْمِنِينَ (88) الأنبياء صدق الله العظيم، وقال في حديث تاني ان الدعوة دي ما فيش أبدًا راجل مسلم يدعي بيها ربنا إلا وربنا يستجيب ليه. من أهم الدروس المستفادة من قصة يونس عليه السلام أن مهما كانت الظروف صعبة أو انت شايفها شبه مستحيلة في حلها. إوعى اليأس يدخل قلبك أو تستسلم، اعرف ان رب المستحيل موجود وبأمر منه كل حاجة تتغير في لحظة ويختفي المستحيل. وان رحمة ربنا واسعة جدا وأكبر مما تتخيل. انت بس ادعي من قلبك وكون واثق في الإستجابة بإذنه وخلي عندك دائما حسن ظن في حكمته وتدبيره. وصلي اللهم وسلم وبارك على سيدنا محمد وعلى آله وصحبه وسلم تسليما كثيرا. عرف غيرك المعلومات دي وادخل شوف باقي الفيديوهات هتلاقي فيهم مواضيع كتير مهمة ومفيدة وهتنفعك ان شاء الله سلام.
