الجاسوس محمد حسنين | رحلة جاسوس من خداع المخابرات المصرية إلي المواقع الإباحية و الموساد الاسرائيلي

[0:00]فخير ان انا بطل قومي مش جاسوس زي ما قالوا عليه انا ثقتي كبيره جدا جدا جدا في القدر المحكمه

[0:14]ونبتدي منين الحكايه؟ نبتديها يوم 26 مارس سنه 1974. ومن داخل حي الافرنج بمحافظه بورسعيد بيتولد الجاسوس محمد علي حسنين. اتولد في اسره تعتبر من الناحيه الماديه كويسين جدا. الاب كان عنده خمس ابناء، ثلاث بنات وولادين وكان محمد هو الابن الكبير فيهم. تدرج في التعليم لحد ما حصل على المعهد الفني الصناعي في بورسعيد سنه 1995. واول ما تخرج من المعهد بدا انه يشق طريقه في الشغل وخاصه في مجال التجاره وبصفه عامه. يعني كان يبيع ويشتري في اي حاجه واستمر على كده لحد سنه 1999. في الوقت ده قرر انه يسيب التجاره خالص ويدخل في مجال الملاحه البحريه. واول ما بدا شغل الملاحه اشتغل في مكتب اسمه مسكو للملاحه البحريه وده كان موجود في بورسعيد. واشتغل في المكتب ده لمده اربع سنين كاملين. وبعدها اتنقل في العمل ما بين اكثر من شركه. واستمر بقى في موضوع التنقلات ده لحد سنه 2010. خلال السنين اللي فاتت دي كلها كان قدر انه يكسب خبره كبيره جدا في مجال الشحن والنقل والتخليص الجمركي. خبرته دي اهلته انه يروح يشتغل في شركه كبيره اسمها شركه حورس للنقل والملاحه البحريه. وخلال وقت قليل جدا كان قدر انه يوصل لمنصب المدير التنفيذي لشركه حورس فرع بورسعيد. وخد بالك بقى شركه حورس دي طبيعه شغلها انها مسؤوله عن الاجراءات الملاحيه للسفن مثلا اللي جايبه بضاعه من الخارج عشان تنزلها في مصر. وفي نفس الوقت برده السفن اللي واخده بضاعه من هنا وهتسافر بها الخارج. ده غير طبعا ان ليهم مخازن كبيره جدا وحاويات وفروع في كل مواني مصر. يعني واحد زي ده بموقعه الحساس وعلاقاته الواسعه جدا يعتبر شايف كل شرده وورده جوه المينا. ولكن للاسف وعلى الرغم من كل اللي هو فيه، سواء بقى المنصب الحساس او انه ماديا مرتاح وكويس جدا. الا انه كان مصاب بداء النساء والصبحه الفاسده ومن هنا كان مربط الفرس والنقطه اللي اتسببت في خراب بيته وضياع مستقبله كله. في يوم من الايام واحد من اصدقاء السوء اللي كان ملموم عليهم دله على موقع اباحي موجود على الانترنت. طبيعه الموقع ده ان اللي بيدخل عليه بيبقى داخل وعارف هو عايز يعمل ايه بالظبط. اول ما بيدخل بيدفع مبلغ معين من الدولارات وبعد كده بيحوله على حاجه اسمها الغرف السريه للدردشه. اول ما بيدخل الغرف دي بيبدا يختار اي واحده بقى من بائعات الجسد الحرام. بعد كده الموضوع بيبقى صوت وصوره، طبعا الموضوع اتكرر مره واتنين و10. لحد ما في يوم من الايام بنت من اللي كان بيكلمهم على الموقع ده بدات انها تدخل معاه في الكلام في سكه ثانيه خالص. سكه مثلا زي انت اسمك ايه؟ بتشتغل ايه؟ ساكن فين؟ صاحبنا بقى حب ان هو يتباه بنفسه قال لها انا اسمي كذا وساكن في بورسعيد وبشتغل مدير تنفيذي في الملاحه البحريه في ميناء بورسعيد. المهم ان الموقف ده حصل وهو ولا على باله، يا دوب عدى كم يوم وجاي بيفتح صفحه الفيسبوك بتاعته. لقى ان في حد باعت له طلب صداقه لما دخل على طلب الصداقه لقى اللي بعت له صوره بنت تقريبا شبه عاريه تماما. ولقاها كمان من داخل الاكونت جنسيتها اسرائيليه. طيب ربنا يهديه بقى ويلم نفسه ويقول كفايه لحد كده ابدا. على طول راح جاي قابل طلب الصداقه اول ما قابل طلب الصداقه من هنا بص لقى البنت داخله بتكلمه. قعدت تكلم فيه وحكايه في روايه في حدوته بص لقى نفسه كده مسحوب من رقبته ودخلته على السكه اياها. وزياده بقى في الجدعنه منها اكتر راحت جايه بعته له اكونتات لبنات كتير جدا من نفس نوعيتها. وهو ما كان عليه غير انه يدخل على الاكونتات يبعت في طلبات صداقه وهم يقبلوا. اول ما يقبلوا طلب الصداقه شويه بشويه ويدخل معاهم على السكه الثانيه. ومع الوقت بداوا انهم يتوغلوا في الحساب عنده زي الشياطين. لقى ان في رجال دين وحاخامات بداوا ان هم يبعتوله طلبات صداقه. وشويه بشويه كده بداوا كمان انهم يعرضوا عليه انه يترك الاسلام ويعتنق الديانه اليهوديه. الحقيقه ان موضوع ترك الدين بالنسبه له كان مرفوض تماما. ولكن هو تظاهر قدامهم انه عاوز بالفعل يعتنق اليهوديه وده عشان يفضل مستمر في الغرض اللي في دماغه. المهم انه فضل بقى في مستنقع الحرام والوحل اللي حط نفسه فيه ده لحد شهر ابريل سنه 2011. الطبيعي والمعروف ان اي حد من اصدقائك لما بيبدا يشير اي حاجه على الصفحه بتاعته فبتبدا تلقائيا انها تظهر قدامك. وهو ده بالظبط اللي حصل مع محمد حسنين. اللي حصل ان واحده من ضمن صديقاته اللي موجودين عنده على الاكونت شيرت على صفحتها موقع عبري اسمه 10 مليون دولارز. الموقع ده كان اطلقه الموساد الاسرائيلي بيرصد من خلاله مكافاه 10 مليون دولار لاي حد هيدلب معلومات عن الجنود الاسرائيليين المختطفين. صاحبنا اول ما شاف كلمه 10 مليون دولار راح جاي داخل على اللينك على طول. اول ما دخل لقاهم كاتبين ان اي حد عنده اي معلومه عن موضوع الجنود يتفضل يكتبها. اي حد عنده اي معلومه عن اي حاجه ثانيه برده يتفضل يكتبها واللي هيكتب حاجه هندي له المكافاه بتاعته. وتحت منها كده لقاهم حاطين مجموعه من الخانات عشان طبعا يكتب الاسم العنوان التليفون الايميل. المشكله انه لا كان عنده معلومات ولا يعرف اي حاجه عن الموضوع ده من الاساس. ولكن طبعا بس في موضوع الفلوس راح جاي داخل وكتب كل بياناته. وجه بقى في الخانه بتاعه المعلومات اللي هم عايزينها كتب ان الجنود اللي انتوا بتسالوا عليهم موجودين في مصر. وعدى بعدها شهر واثنين ولحد اربع شهور كاملين، لحد كلمه ولا حد سائل فيه. لحد ما في يوم من الايام في منتصف شهر اغسطس سنه 2011 تفاجئ بان في مكالمه دوليه جايه له من الخارج. اول ما رد على المكالمه لقى ان اللي بيكلمه بيتكلم معاه بلغه عربيه وبلهجه شبه اللهجه اللبنانيه. واول سؤال سالهه له قال له المعلومه بقى اللي انت كتبتها دي مصادرك فيها ايه؟ الجاسوس ما حبش بقى انه يريحه قعد يلف ويدور عليه في الكلام وفي الاخر قال له دي طراطيش كلام كده بتتقال حوالينا. وبعدين الموقع اللي انا شغال فيه يخليني اعرف واسمع اكتر من كده بكتير. فرد عليه ابو منصور واللي اتضح بعد كده انه ضابط بالموساد الاسرائيلي واسمه بنيامين شاؤول. قال له على العموم انا اسمي ابو منصور والرقم اللي ظهر قدامك دلوقتي ده انا عايزك تحفظه زي اسمك. واي وقت لو عندك اي معلومه حابب تبلغني بيها كلمني على طول. لكن اعمل حسابك ان اي مكالمه منك لازم تبدا الاول برقم الكودي. رقمك 200 150 وبعد الموقف ده ويا دوب عدى اسبوعين فقط بص لقى ابو منصور بيتصل عليه مره تانيه. ولكن المره دي بقى عشان ياخد منه بعض التفاصيل الشخصيه. بدا يساله عن رتبه، عنده عربيه ولا لا؟ عنده حسابات بنكيه ولا لا؟ خلصت المكالمه على كده وعدى بعدها شهرين كاملين، لحد كلمه ولا حد سال فيه. وبقى صاحبنا قاعد لا على حامي ولا على بارد، الله هم اخوانا البعد دول اتصلوا عليا وخدوا مني كل بياناتي. وبعد كده ما فيش ولا واحد فيهم سائل فيا خالص قام جاي واخذ التليفون بتاعه واتصل على الرقم بتاع ابو منصور. لكن اول ما اتصل تفاجئ بان الرقم مغلق. حاول مره واثنين وثلاثه و10 ايام كاملين بيتصل عليه وبرده الرقم مغلق. طيب يلم نفسه بقى ابدا يقول الحمد لله يا رب دي علامه عشان ما كملش في الطريق ده و من طين و من عجين. قال لك لا ما بدهاش بقى راح ماسك الكمبيوتر بتاعه دخل على موقع الموساد الاسرائيلي. واول ما دخل راح جاي داخل على الخانه بتاعه الاتصال جاب الايميل بتاعهم وراح جاي باعت لهم ايميل بكل التفاصيل. كتب لهم كل اللي حصل ما بينه وما بين ابو منصور اسمه وعنوانه ووظيفته. وعشان يدلل لهم بقى على صحه كلامه راح جاي كاتب لهم رقم ابو منصور والرقم الكودي بتاعه. اول ما بعث الرساله وبعد يومين بالظبط لقى ابو منصور بيتصل عليه مره تانيه. ولكن المره دي بقى كان بيكلمه بلهجه حاده جدا جدا. طلب منه انه يقابله ولكن المقابله هتبقى بره مصر. وطلب منه انه يعرفه ايه هي البلاد اللي ممكن يسافرها بحيث ان تبقى تاشيرتها سهله بالنسبه له.

[9:02]فرد عليه الجاسوس وقال له ان البلاد اللي ممكن يسافرها بسهوله مثلا زي تايلاند او فيتنام او الفلبين وده لانه سبق وسافرهم عن طريق الشغل. فرد عليه ابو منصور وقال له بدايه كده المقابله ما بيني وبينك هتبقى في تايلاند في شهر مارس سنه 2012. ومن اللحظه دي اعمل حسابك ان الرقم القديم اللي كنت بتكلمني عليه تنساه وتشيله من دماغك تماما. اي مكالمه ما بيني وبينك بعد كده هتبقى على الرقم اللي بكلمك منه دلوقتي. واي رساله عايز تبعتها لي هتبقى على الايميل اللي انت عارفه. واول ما تجهز نفسك هتبعت لي صوره الفيزا وتذكر على الايميل. وتطمن كل المصاريف اللي هتصرفها اول ما تيجي انا هدفع حالك. وحذاري انك تتواصل مع اي حد غيري مره تانيه. مفهوم بعدها راح جاي واخذ اجازه من الشغل وبلغ اهله انه طالع سفريه تابع شغله. بعد كده حجز التذكره وطلع تاشيره سياحه لبنكو واخذ بعضه وسافر على هناك. واول ما وصل هناك نزل في الفندق المتفق عليه وبعت رساله لبو منصور عرفوا فيها انه وصل. عدى يوم والثاني وفي ثالث يوم لقى بنيامين بيتصل عليه. قال له انا عايزك بقى تاخد راحتك على الاخر تاكل وتشرب وتسهر وتعمل كل اللي نفسك فيه. وتطمن كل المصاريف اللي هتصرفها احنا اللي هندفع حالك. المهم انهم سابوه كام يوم لحد ما رووق نفسه على الاخر. بعدها قال له اتصال من بنيامين وقال له الكلام اللي هقوله لك دلوقتي عايزك تنفذه بالحرف الواحد. يوم الجمعه الجايه هتنزل من الفندق بتاعك الساعه 8 الصبح. هتركب اي تاكس وتروح على كافيه اسمه مريم وهتقعد في الكافيه ده لمده ساعه كامله. وبعد كده هتركب تاكسي تاني وتروح على السوق التجاري هتلاقي هناك المطعم الايطالي. هتدخل المطعم وتقعد جواه ساعتين كاملين. وبعد كده هتخرج من المطعم هتركب تاكسي وتيجي على مبنى اسمه اوشين تاور. واعمل حسابك انك تدخل من المدخل رقم اثنين اول ما تدخل هتلاقي الاسانسير قدام عينيك. وعند الاسانسير هتلاقي فيه واحد في انتظارك هو اللي هيتصرف بعد كده. اهم حاجه اوعى تنسى كلمه واحده في التعليمات اللي بقولها لك. وفعلا وفي الميعاد المحدد اتنفذت الخطه المرسومه وبالحرف الواحد. وكان الغرض من اللي بيعمله الموساد ده انه يتاكد ان محمد حسنين غير مرصود من المخابرات المصريه. واول ما وصل عند الاسانسير لقى فعلا واحد واقف في انتظاره. طلع معاه في الاسانسير لحد ما دخله غرفه موجوده في الدور الثالث جنب باب الطوارئ. واول ما دخل الغرفه لقى اثنين مقبلينه في وشه. كانوا لابسين زي ملابس رجال الامن طلبوا منه بقى انه يخلع كل ملابسه بالكامل. وبعدها فحصوه بجهاز كشف المعادن عشان يتاكدوا انه مش مزروع جواه اي جهاز. وبعد ما فتتوه واطمنوا انه ابيض خالص طلبوا منه انه يلبس ترينج ويلبس في رجليه حذاء من احذيه الفنادق. بعد كده راحوا جايين سحبينه ومطلعينه على غرفه موجوده في الدور ال13. واول ما دخل الغرفه لقى ابو منصور او بنيامين مقبله في وشه. طبعا رحب بيه وقعدوا يتكلموا في كل التفاصيل وزي ما بنقول كده اتكلم معاه من الاخر وجابها له على بلاطه. وقال له شوف بقى يا ابن الحلال بقى من الاخر كده انا عارف انك كداب وعارف كمان انك ما تعرفش اي معلومه عن الجنود المختطفين. ولكن ما علينا خلينا دلوقتي بقى نتكلم في المفيد. بقى انت يا ابن الحلال بعت لنا وطلبت انك تشتغل معانا يعني لا احنا طلبنا منك ولا حد فينا ضربك على ايديك. لكن ما دام طلبت انك تشتغل يبقى تشتغل. احنا اللي هنطلبه منك لا في حاجه مستحيله ولا فيها اي حاجه صعبه عليك. اول ما تنزل على مصر وترجع شغلك دبه النمله اللي بتحصل فيه المينا عايزها توصلني. تقرير كامل وشامل بشكل اسبوعي يكون عندي. وعايزك كمان تجمع لي كل البيانات عن كبار المسؤولين اللي موجودين في المينا. اسمائهم، عناوينهم، عائلاتهم وظروفهم الاجتماعيه. وعايزك كمان تركز لي على كل السفن الايرانيه اللي بتعدي في القناه وتبلغني بكل تفاصيلها اول باول. احنا كده بقى يا بطل اتكلمنا في الشغل نتكلم بقى في الفلوس والمصلحه اللي انت عايزها. راتبك الشهري هيبقى 2000 دولار وكل تقرير هتبعت وحسب ما احنا نقيم اهميته هتاخد قدامه 5000 دولار كاملين. بكده انا مؤقتا خلصت دوري معاك هنا. هتاخد بعضك بقى وتطلع على منيل في الفلبين. اول ما توصل هناك هتنزل في فندق اسمه روز جارد. اول ما توصل الفندق هتلاقي في حد في انتظارك ومن هناك هتعرف بقيه التفاصيل. وبالفعل نفذ محمد حسنين الامر واخذ بعضه وسافر على مانيلا. اول ما وصل الفندق اللي قاله عليه كان في استقباله هناك المتهم الثالث في القضيه او ظابط الموساد ديفيد ماير. واول ما استلمه بدا يدربه على كل الوسائل اللازمه للتواصل والتجسس. وقام جاي بعدها بقى مسلمه عده الشغل وركز معايا هنا بقى في عده الشغل عشان الكلام ده هنحتاجه كمان ايام. سلمه في ايديه جهاز لاب توب مشفر وجهاز تليفون بيشتغل عن طريق الموجات الغير معرفه داخل مصر. وسلمه كمان شريحه تليفون وسلمه ايميل جديد هيتواصل معاهم من خلاله. بالشكل ده وبعد ما خلص تدريبه في مانيلا اصبح جاهز للشغل. بعدها اخذ بعضه ورجع على مصر على طول عشان يبدا بقى في جمع المعلومات ويبعثها لهم على هناك. واول ما رجع على مصر قعد بقى قعدت روقان كده مع شيطان نفسه. قعد يقلب الكلام اللي اتقال له هناك في دماغه كلمه كلمه. قال لك الله يعني دول مهتمين انهم يعرفوا كل اخبار ايران. وفي نفس الوقت اكيد ايران برده عايزه تعرف كل اخبار دول. طيب وانا ليه بقى اشتغل على جهه واحده؟ طيب ما انا اشتغل مع دول واشتغل مع دول وفي نفس الوقت اقبض من الاثنين. وهو كده كده البلد دايقه ورايحه في داهيه ولا اي حد دريان بحاجه. ولكن شيطان نفسه بقى كان له راي ثاني خالص. قال له انت بالشكل ده يا صاحبي عايز تودي نفسك في داهيه. اللعبه اللي انت بتلعبها دي بتلعبها مع المخابرات يعني انت مدي الامان لنفسك اكثر من اللازم. ولكن لو عاوز نصيحه بقى يا صاحبي اعمل اللي هاقول لك عليه ده ونفذه بالحرف الواحد. انت هتاخد بعضك بقى يا معلم وتطلع المخابرات الحربيه. وهناك هتقول لهم انك اتعرفت على مجموعه كده من الاصدقاء عن طريق الفيسبوك. في الاول انت ما كنتش تعرف انهم يهود ولا تعرف عنهم اي حاجه. وبعد كده الشيطان وزك ورجليك خطت معاهم في الغلط. وتبدا تحكي لهم التفاصيل اللي حصلت من طقطق لسلامه عليكم. انما انت عشان راجل وطني ومتحب البلد فقررت بقى انك توقف الغلط ده وتروح تبلغهم. بالشكل ده هتبقى في التمام وفي السليم وما فيش اي حد يقدر يتنفس معاك نص كلمه. وكده ابقى انا خدمتك واستاهل منك حاجه حلوه. قال له حاجه حلوه ده انت تستاهل مني اقول لك اعوذ بالله من الشيطان الرجيم في وشك واحرقك واولع فيك بجاز. انت مجنون انت عايزني اروح لحد المخابرات العامه واقول لهم على كل اللي حصل عشان بعد كده يراقبوني ويحدوا عليا انفاسي. طب المصلحه والفلوس اللي انا عايز اطلع بيها هطلع بيها ازاي؟ قال له طب اهدى عليا كده واسمع مني وانا هقول لك بقى هتعمل ايه بالظبط. انت دلوقتي معاك خطين ومعاك ايميلين. خط وايميل قدام دول اللي كنت انت شغال عليهم. وحاليا معاك خط جديد وايميل جديد وتليفون جديد، هم دول اللي انت شغال عليهم دلوقتي. لما تيجي تروح للمخابرات هتدي لهم الخط القديم وتدي لهم الايميل القديم. وبالشكل ده المخابرات لما تيجي تراقب هتراقب الهواء واي حد ينطق معاك هتقول له انا براءه وفي السليم. انا رحت لحد المخابرات العامه وبلغتهم بكل حاجه. وفعلا وبعد ما سمع بقى نصيحه شيطانه اخذ بعضه وطلع على مكتب المخابرات الحربيه اللي موجود في بورسعيد. وهناك حكى لهم بقى كل اللي حصل وبالتفاصيل. وبعد ما خلص بقى كل اللي عايز يقوله قالوا له دلوقتي احنا هنوصلك بجهاز المخابرات العامه. وهناك كل اللازم هيتعمل اول ما وصل هناك كان في استقبال ثلاث ظباط. قعدوا معاه وسمعوا له قال وحكى وخلص وكتب كل اللي هو عايز يقوله من نفسه واللي في دماغه فقط لا غير. وراح جاي في الاخر مسلمهم بقى الخط القديم والايميل القديم. وبعد ما خلص بقى كل الكلام اللي قاله قالوا له كويس جدا انك جيت لنا في البدايه وعرفت لنا كل حاجه. يا ابن الحلال في اي بيانات او معلومات او اي حاجه عن شغلك وصلتها لهم؟ رد عليهم وقال ما حصلش. ردوا عليه وقالوا له انت وضعك كده لسه على البر، كل اللي مطلوب منك انك تقطع علاقتك بالناس دي تماما ونهائيا. اي رساله او معلومه او اتصال يوصلك منهم تيجي تبلغنا على طول. وعموما احنا مش عايزينك تتعب نفسك، اي حاجه عايز تقولها لنا اطلع على مكتب المخابرات الحربيه هناك وقول لهم اللي انت عايزه. وبعد ما خلص في مكتب المخابرات الحربيه ومكتب المخابرات العامه خرج من عندهم وهو متطمن ومرتاح من جواه. متطمن انه هيخون بمنتهى الراحه. مرتاح انه هيقطع في لحم بلده في الوقت اللي هي اصلا ما كانتش مستحمله. والحقيقه ان الخاين الجاسوس ما بخلش على اسياده باي معلومه. بعدها على طول مباشره بدا انه يبعت في كل التقارير اللي طلبوها منه. اي حاجه اي شرده او ورده كانت بتحصل في المينا كان على طول يبعتها لهم. وصلت بيه درجه الخسه والوضاعه والجبن انه يستغل حاله الضعف والمرض اللي كانت فيها بلده. الاكثر من كده انه كمان قرر ينفذ بقيه خطته. قرر انه يراسل المخابرات الايرانيه في يوم من الايام في شهر يونيو سنه 2013. دخل على موقع المخابرات وبدا كمان انه يعرض خدماته عليهم. عرفهم بنفسه وبوظيفته وعرض عليهم خدماته اللي يقدر يعرفهم بيها كل حاجه عن اسرائيل. الايميل اللي بعثه لايران ده ما ردوش عليه بشكل مباشر. في يوم بص لقى رساله جايه له على الاكونت بتاعه من سيده مسميه نفسها على الاكونت رياح الشمال. وبالفعل بداوا انهم يتواصلوا ويتكلموا مع بعض. فضل بقى يتكلم معاها لحد ما اصبح عنده التاكد واليقين انها تبعهم. قال لها انا ما عنديش اي كلام اقوله لك، لو عاوزه مني اي معلومه وصليني بواحد من الكبار اللي عندك. وعرفيه ان عندي معلومات مهمه جدا عن الناس اللي انتوا عايزين معلومات عنهم. وعرفيه كمان ان المعلومات دي تسوى ملايين. هي بقى وعدته انها فعلا هتوصله باي حد من المخابرات عندهم. في وسط بقى كل الخيانه وكل اللي عمال يعمله ده كانت المخابرات العامه والمخابرات الحربيه بيعملوا تحرياتهم عنه. كل المعلومات والتحريات اللي وردت في تقرير الامن القومي عنه قالت ان الرجل ده لا يمكن الوثوق به على الاطلاق. وان اللي عمله ده ما هي الا مناوره منه او انه بالفعل تم تجنيده بنسبه 100%. استمروا بقى على الوضع ده اربع شهور كاملين. اربع شهور كاملين وهو في منتهى الحرص والدقه. وطول المده دي ما كانش فيه ولا مكالمه تليفون واحده تمت ما بينهم. طريقه الاتصال كانت عباره عن الايميلات او عن طريق اللاب توب المشفر اللي كانوا موجودين معاه. لحد ما في يوم من الايام ربنا سبحانه وتعالى اراد انه يكشف الجاسوس. اراد انه يكشف اللي كان عايز يكشف عرض بلد بحالها قدام اعدائها. في يوم من الايام حصلت مكالمه من ابو منصور للخاين الجاسوس وهو موجود في مصر. اول ما المكالمه حصلت على خط التليفون وعلى جهاز التليفون السري اللي كان معاه تم رصده من حرس الحدود المصري. حرس الحدود اول ما رصد المكالمه دي عرف على طول ان المكالمه صادره من جهاز تليفون ما بيستخدمش الا في المكالمات السريه فقط لا غير. وان الموجات المستخدمه في المكالمه دي موجات غير معرفه تماما مع الموجات اللي موجوده جوه البلد. ولما تم تتبعه واتعرف مكانه ومصدر المكالمه جاي منين اتاكد عندهم الشك انه هو نفس الشخص اللي كان جاي يوهمهم بوطنيته. وساعتها بس صدر الامر بالقبض عليه. بعد القبض عليه وتفتيشه وتفتيش منزله ومحل عمله لاقوا عنده بقى كل الحاجات اللي قلت لحضرتك عليها. بما فيها طبعا جهاز التليفون واللاب توب المشفر اللي كان بيستخدمه في ارسال الايميلات. المتهم او الجاسوس محمد حسنين وهو بيتحقق معاه في النيابه اول حاجه فكر يعملها انه ينفذ الخطه اللي سبق وخططها مع شيطان نفسه. اول حاجه قالها ان كل اللي حصل ده كان بمعرفه المخابرات والاجهزه السياديه في مصر. وقال كمان انه بطل قومي ومصدرش منه اي خطا في حق البلد. ولكن الايميلات واللاب توب اللي كان موجود معاه والمكالمات السريه اللي تمت ما بينه وما بينهم كانت الدليل كافي عشان يتم احالته للمحكمه الجنائيه. وبعدها تم صدور الحكم عليه بالسجن المشدد لمده 10 سنوات وده كان عن تهمتين. التهمه الاولى هو التخابر مع دوله اجنبيه والتهمه الثانيه السعي للتخابر مع دوله اجنبيه اخرى. وهنا بيخلص ملف الجاسوس محمد حسنين. كل اللي انا عايزه من حضرتك في نهايه الحلقه انك تجمع المعلومات اللي سمعتها النهارده والمعلومات اللي قلتها لك في الفيديو اللي فات. عايز بس حضرتك تعرف وتجمع نتيجه التجارب بتبقى شكلها ايه؟ ان مش كل التجارب ينفع انك تاخدها وان مش كل التجارب ينفع انك تكملها للاخر. يجوز انك خدت تجربه وغلطت فيها، يجوز جدا ان رجلك دست في الغلط. الصح ان حتى لو رجلك دست في الغلط انك ترجع. والصح برده انك تلحق نفسك قبل ما تقع في المنطقه اللي ما تعرفش ترجع منها. ونصيحه اخوك بقى ليك اياك في يوم من الايام تحط نفسك تحت درس حد. اياك في يوم من الايام تحط نفسك تحت درس حد يهددك بفضحه. اديني قلت لك وانت حر، اعمل حساب اليوم اللي هتقف فيه قدام ربنا سبحانه وتعالى. اعمل حساب لاهلك واعمل حساب لاولادك اللي ان شاء الله هييجوا بعد كده. يا رب احفظ اولادنا واحفظ اولادكم واحفظ شبابنا وشبابكم ويا رب احفظ شباب الامه كلها. عاشت الامه العربيه وعاش الشعب المصري العظيم والى اللقاء وتحيا مصر.