[0:00]من يوم اختراع الكتابة وفي ناس دائما يحاولون ارسال رسائل سرية اما لان كتاباتهم فيها معلومات حساسة او بس كذا ما تبي الملاقيف يقرون كتاباتك. قدما اذا كنت تبي تنقل معلومات حساسة خياراتك كانت محدودة، ما لك الا ان توصلها بكل سرية في نص الليل مثلا او ان ترسلها مع شخص وتعين عليه حراس يحمونه وهالخيارين ما يعتبرون امنين لذيك الدرجة. الحل اللي اخترعه عدد من الشعوب هو تشفير كتاباتهم. ان تاخذ الرسالة المكتوبة وتحولها لشيء كانها طلاسم ما يقدر يقراها الا الشخص المطلوب. من يصير عندك دولة عملاقة وشوي رياضيات على اتقان للغة، تقدر تضمن ان حضارتك بتطور نوع من انواع التشفير. وما نتكلم هنا عن الشفرات والكلمات السرية اللي احيانا تكون بينك وبين رابعك بدل ما تقول طالع يمين تقول الساعة 3. لا نتكلم هنا عن التشفير المبني على اسس وقواعد رياضية ولغوية. نفس النوع من التشفير اللي نستخدمه كل يوم على الانترنت. دامك استخدمت الانترنت او ارسلت رسالة او ايميل او حتى استخدمت اي نوع من الكمبيوترات اليوم فانت استخدمت نوع من التشفير حتى وان ما كنت تدري عنه. تعرف علامة القفل اللي تطلع في المتصفح فوق اذا شفتها فمعناها انك ترسل وتستقبل معلومات بشكل مشفر والمفروض انه ما حد يقدر يشوف اللي تسويه المفروض يعني. اذا تبي الصج احد الاسباب الرئيسية لاختراع الكمبيوترات كانت التعامل مع الرسائل المشفرة في اوقات الحروب. فنعم التشفير مهم لحياتك الرقمية مثل ما قفل الباب مهم لحياتك الصجية. لو ما كنت تدري المسلمين وخصوصا العرب منهم لفترة طويلة كانوا ملوك هالمجال، ما اخترعوه طبعا تشفير كان موجود قبلهم. لكن علم التشفير كان شيء وبعد العرب صار شيء ثاني، ما ادري ايش معنى العرب بالذات من بين باقي الشعوب ابدعوا فيه. يمكن حبهم للغة، يمكن تطور رياضيات عندهم، يمكن الاوضاع السياسية في العالم العربي بس لسبب ما ربعنا ابدعوا فيه بشكل مبهر وما يتقارنون ابدا مع باقي الشعوب في عصرهم. تبي تعرف لاي درجة العرب تركوا بصمتهم في هذا المجال؟ كلمة التشفير المتداولة اليوم انسايفر سايفر سايفرنج جاية من الكلمة العربية صفر. عاد ليش سموه صفر؟ يقال ان الغرب ما كانوا يعرفون الصفر الصفر كقيمة لانه ما كان موجود في اعدادهم ولا يستخدمونه في حساباتهم. فيوم احتكوا مع العرب وتعلموا منهم رياضيات واسمعوا عن فكرة الصفر مخخهم اختبصت شوي. شلون رقم ماله قيمه ما يمثل شيء، فلانه الفكرة كانت غريبة جدا عليهم صاروا يستخدمونها للتعبير عن الامور الغامضة. وذي هي طريقة حساب القسمة المطولة، كلامي واضح ولا كانه صفر هاهاها ليش؟ ما ادري عن صحة القصة لكن الاكيد ان كلمة سايفر اصلها عربية. ف جهزوا فواطكم يا جماعة اليوم بنغطر رجولنا في جزم التاريخ العربي ما حد يهتم له او يعطيه وجه. لكن قبل ما نتكلم عنه، خلونا ناخذ لفة سريعة على تاريخ التشفير قبل العرب. اوكي التشفير موجود من زمان قديم جدا، ظهر في مصر ايام الفراعنة، ظهر في وادي الرافدين، ظهر في اليونان بس ما كان علم في ذاك الوقت. كان شلون اقولها كان فن اكثر من كونه علم. معظم التشفير الموجود في العالم القديم كان التشفير اللي يعتمد على المجازات والثقافة المشتركة بين جماعة معينة. تعرف شلون لو صرت بين اهلك وناسك يكون عندكم تعابير وكلمات خاصة ما يفهمها الا انت؟ بدال لا تقول ابوي وصل البيت تقول جاك الذيب، هذا هو النوع اللي كان منتشر. التشفير المبني على الثقافة المشتركة بينكم ما في شعب في الكون ما ظهر عندهم هذا التشفير. الكل عندهم كلماتهم وتعبيرهم السرية اللي ما حد يفهمها غيرهم. لكن مثل ما قلنا في البداية هذا النوع ما يعتبر تشفير بمعناه الحديث لانه ما له قواعد ثابتة ومحدود جدا في استخداماته. هذا ما يعني ان ما كان في محاولات مبكرة لتشفير مبني على اسس، مثلا في مصر ووادي الرافدين حصلوا شوي كتابات غريبة يتوقعون انها كانت محاولات بدائية لتشفير منظم. غير عن مصر وبلاد الرافدين، اهل اليونان كان عندهم محاولات لطيفة في اخفاء الرسائل. في اوقات الحروب اذا احتاجوا ان يرسلون رسالة مهمة وفيها معلومات حساسة شي سوون؟ كانوا ياخذون لهم رجال والد حلال ويثقون فيه، يقرعون راسه يكتبون رسالة على قرعته ويخلونه كم يوم الى ان يطول شعره شوي وبعدها يرسلونه الى اي مكان يبون. اذا صار وعترضه احد ما بيحصل عنده رسالة وغالبا بيمشي، واذا وصل لوجهته كل اللي عليه هو زط وخلاص الرسالة وصلت للشخص المطلوب. طبعا هذا مو بنوع من التشفير قد ما انها طريقة لاخفاء الرسائل، لكن هي كانت تؤدي الغرض. محاولة ثانية في اليونان واللي تقدر تعتبرها من اوائل الامثلة على التشفير الحقيقي كان شيء يسمونه بشفرة السكيتال. باختصار تاخذ عصا ولا اي شيء طويل وتلف عليه جلدة وتكتب عليها اللي تبيه. واذا فليتها الكتابة تطلع ملخبطة، واذا رجعت لفيتها مرة ثانية تقدر تقرا المكتوب. الطريقة تحس فيها تفكير بس سهل ان تكسرها. بس لف الجلدة على اي شيء بالحجم المناسب والان الشفرة انكسرت فما منها فائدة لذيك الدرجة. كان عندهم بعد شيء اسمه مربع بولبيس يستخدمونه لتبديل الحروف بارقام بس ما يبدو ان الهدف منها كان التشفير. الروم كان عندهم طريقة ثانية يسمونها شفرة القيصر وذي كانت ذكية في وقتها. بكل بساطة حرك مواقع الحروف يمين او يسار واكتب الرسالة بترتيب الحروف الجديد. مثال هذا ترتيب الحروف الاعتيادي صح الف باء تاء ثاء هذا الترتيب اللي نعرفه. لو اخذت الحروف وحركتهم لليمين شوي بس، شو اللي بيصير عندك؟ الالف بيصير باء، الباء بيصير تاء، التاء بيصير ثاء الى اخره. والان تقدر تستخدم الترتيب الجديد لكتابة رسائل كانها طلاسم، لكن صديقك اللي بيستقبل الرسالة يقدر يقراها بس يعرف مقدار تحريك الحروف. مثلا لو تحرك الحروف خمس خانات الجملة انا احب السبانخ تصير
[6:15]ناديتني يا الحبيب. الطريقة بسيطة لكنها كانت فعالة في ذاك الزمن خصوصا ان ثلاث ارباع الشعب كانوا اميين وما يعرفون يقرون فالكم واحد اللي يعرفون يقرون من العامة لا شافوا هالطلاسم ما بيفهمون منها شيء ويمكن يتخيلونه تعويذات او سحر. هذا باختصار ما كان عليه وضع التشفير في العالم القديم. شوي محاولات متواضعة لتشفير الكلام تمشي الحال لكن مثل ما قلت متواضعة. الشيء استمر لفترة طويلة الى ان نزلت الرسالة صار الاسلام دين اسست قواعد اللغة قامت الدول. مع انفتاح العرب على الحضارات والشعوب الاخرى وتنامي العلوم خصوصا اللغوية والرياضية فن التشفير بدا يظهر وينتشر. اللي ساعد ايضا على انتشاره هو وجود عدة دول اسلامية كانت تحاول تخفي اسرارها عن بعض زائد وجود الخصوم لهم من غير المسلمين، لكن ب ب ب ب. ما نبي نطب في التاريخ السياسي. العرب والمسلمين طلعوا على انظمة التشفير القديمة وقالوا هذا لعب عيال نقدر نسوي شيء احسن. ظهر عدد من العلماء اللي كتبوا وتكلموا عن علم التشفير او التعمية مثل ما كانوا يسمونه في ذاك الوقت. كل هالاسماء اللي قدامك كلهم اما كتبوا عنه او طوروا عليه، ملاحظة جانبية ذي طبعا الاسامي المشهورة اللي قبلت تكتب عن التشفير وتدون افكارها عنه. في غيرهم الكثير من اللي برعوا فيه لكنهم ما دونوا شيء، ليش؟ اللي يضحك في علماء التشفير العرب هو ان الكثير منهم كانوا يعتقدون ان الكتابة عن طرق تشفير الكلام بتخرب الموضوع كله. ايش الفايدة تروح تخترع نظام كتابة سري وتروح تعلم الناس كلهم عنه في كتاب هذا اللي كان يعتقده الكثير منهم على الاقل. فتشوف عدد من اللي كتبوا عن هالموضوع يتحلطمون في مقدمات كتبهم عن انه ما ودهم يكتبون هالكتب لكنهم مضطرين لسبب ما. فالدرس المستفاد هنا هو احيانا ما عليك من العلماء وفلسفتهم، اذا احد عنده علم مفيد او حافظ لتاريخ مهم خلهم يوثقونه في مكان ما عشان لا يموت معاهم. المهم خلونا نجرب نختار واحد من هالحلوين ونشوف ايش كانوا يسوون وين وين وين اها ابن عدلان. علي بن عدلان النحوي كان شاعر ومشهور بانه ذكي جدا. كتب مجموعة كتب وتطرق لمواضيع مختلفة منها طرق التشفير، فخلونا ناخذ احد الطرق اللي يتكلم عنها التشفير بالتعويض. هذا الحروف العربية سهلة وكلنا نعرفها الالف كانها عصا، الباء كانها صحن، الهاء تشبه العقدة اوكي اوكي كل جميل حلو نعرفها كلنا. تخيل لو لخبطنا اشكال الحروف مو حركناهم يمين او يسار مثل الروم لا لخبطنا كل شيء. لو خلينا الباء تمثل الهاء، والجيم تمثل الراء، والراء تمثل الالف الى اخره. بهذه الطريقة تقدر تاخذ اي نص مفهوم وتحوله لمجموعة طلاسم ما حد يقدر يفهم منها شيء. زين على اي اساس تقلب الحروف ما في فائدة تخربط مواقعهم دام مستقبل الشفرة ما يعرف ترتيبهم الجديد، الحل بسيط الصج بس تتفق معاه مسبقا على ترتيب. ما فيها سحر بس هذا اللي تسويه. في العادة اللي كانوا يسوونه هو ان المرسل والمستقبل يتفقون على بيت شعر يكون هو المفتاح لحل الشفرة. خلنا ناخذ مثال عملي. في البداية تتفق انت وصديقك على بيت شعر معين يحوي ترتيب الحروف الجديد، مثلا هالبنت صح عندي وقت شغل بهم اخذ فضن كثن زطن ضر جسي. ان شاء الله قريتها عدل، ملاحظ شيء مميز في هالبيت؟ فيه كل الحروف العربية وما فيه حروف مكررة. هذا مو بصدفة هالنوع من الابيات يكون مصمم بعناية، الفكرة ان ترتيب الحروف في البيت هو ترتيب الحروف الجديد. مثلا لو قلت، مثلا لو قلنا انك تبي ترسل رسالة ذي بطتنا بطت بطن بطتكم اوكي كلكم تعرفونها. اذا اتبعت ترتيب الحروف في البيت الرسالة بتصير حا عضص حظ حا عضص حظ وبس صار عندك رسالة سرية ما حد يقدر يقراها غيركم. ذي كانت احد ابسط طرق التشفير اللي تكلم عنها ابن عدلان، رسالة مفتاح للفك والتشفير، شفرة. هذا المبدا الصغير قدامك هو احد المبادئ المهمة المستخدمة في عالم التشفير وبنيت عليه طرق تشفير كثيرة. والفلة في الطريقة ذي انك مو بملزوم تستخدم المفتاح اللي انا حطيته فوق لا تقدر تخترع اي مفتاح وترتيب تبيه للحروف فكل فترة تقدر تغير مفتاحك علشان تضمن امان الشفرة. لكن مع ذلك الطريقة فيها عيب كبير، بمجرد ما تعرف مفتاح الشفرة بيت الشعر تقدر تكسر الشفرة في دقائق. فالطريقة ذي تنفعك في حالة الطوارئ اذا تبي ترسل رسالة ومستعجل. لكن تقدر تسوي اشياء كثيرة احسن منها وهذا اللي كان عند هالثنين ابن دينير وابن درهم. ابن دينير وابن درهم كانوا عالمين وعاشوا في فترات زمنية مختلفة، لكنهم تشاركوا في الاسماء الغريبة اللي لها علاقة بالفلوس والاهم من ذا تشاركوا في الكثير من الافكار حول التشفير. ابن دينير كان شاعر ذكي ووسيم ابيض البشرة اشقر الشعر ومدوخ الكل. كان شاطر في النحو والخط والاهم في فن التشفير، لكنه كان راعي مشاكل وعنده معتقدات الكثير ما كانوا معجبين فيها. وفوق كل ذا كان يتهم ببعض السلوكيات المو زينة. خلنا نقول انها تشكل مع الناس الغلط ونهايته ابدا ما كانت سعيدة. ابن درهم كان شخصية مختلفة الولد بعد صديقنا الاشقر بيحول 80 سنة ابوه مات وهو صغير وترك له ثروة كبيرة. بعدها كبر وصار تاجر كبير وشبع فلوس، كان يعشق الالغاز والاحاجي ويحب حلهم والتعلم عنهم. فرجل عنده فلوس كثير ويحب الالغاز ما في علم بيستانس عليه مثل التشفير وهذا اللي صار فعلا. كتب في الكثير من المواضيع من العلوم الشرعية والحساب وغيره لكنه انشهر بافكاره حول التشفير. الاثنين تكلموا عن طريقة من خلالها وضعوا اهم مبدا في عالم التشفير. تاخذ الرسالة المراد تشفيرها، تحول كل حرف فيها الى رقم، تجي عملية حسابية على الارقام، ترجع الارقام الى حروف. ايش؟ خلنا ناخذ كل الحروف اوكي؟ كل حرف نعطيه رقم يرمز له، مثلا الف يساوي واحد باء يساوي اثنين جيم يساوي ثلاثة الى اخره. ذي هي القيم اللي في العادة يعطونها الحروف، اوكي؟ فلو بغينا نشفر الرسالة ذي رفيس سلطان في وجهه الرسالة تصير، خذ كل حرف لوحده حولهم لرقم يصير عندك مجموعة الارقام ذي. اوكي كل شيء عادي الان، ما سوينا شيء بس خذنا حروف وحولناهم لارقام ما في شيء مميز. بس شف هالاثنين شو يسوون بعدها، خذ هالارقام سو عليهم اي عملية رياضية تبي، مثلا اضربهم في اثنين. والناتج اخذه وحوله الى حروف مرة ثانية شفت شو اللي سواه. اذا اخذت هالارقام وسويت عليهم اي عملية رياضية ورجعتهم مرة ثانية الى حروف بينتج عندك نص مشفر صعب الكسر. كلمة من خمسة حروف مثل سلطان تتحول لسفرة من سبعة احرف مثل ق ق ق كشعب هذا المبدا. تحويل النص لبيانات رقمية، معالجة البيانات رياضيا، تحويل البيانات الى نص هو المبدا الاساسي اللي قائم ومرتكز عليه علم التشفير الحديث اليوم. وهالثنين اسساه قبل 800 سنة، ف عافية عليهم، عافية على ابن درهم بس الثاني الثاني انا ما ادري شو مسوي في الدنيا فما ابي امدحها قدام الناس. طبعا اذا كنت تتساءل كيف ممكن ترجع تفك الشفرة بعدين علشان تقراها فالمفروض على حسب فهمي ان المرسل والمستقبل يكونوا متفقين على قيم الحروف الرقمية وعلى العمليات الحسابية اللي تمت فتقدر تعكس العملية وتستخرج النص وتقراه والكل يصير سعيد. واذا كنت مو فاهم من وين تجي الحروف الاضافية في الشفرة فلانه احيانا العملية الرياضية ما تطلع ارقام موجودة في الجدول فتضطر تفك الرقم اللي عندك الى رقمين موجودين هنا. ويصير بعدها عندك حرفين يمثلون حرف واحد والفله ان هذه طبقة اضافية من التشفير فممتاز. هذا طبعا مثالين بسيطين لطرق التشفير عند العرب قدما، في غيرهم طرق كثيرة تقلب في اشكال الكلام، تغير ترتيب حروف الكلمة، تخترع رموز جديدة للحروف يصير الكلام كانه لغة جاية من الفضاء. والارهب لما تدمج عده طرق مع بعض علشان تطلع بتشفير اكثر متانة. نقدر نقعد من اليوم الى بكرة واحنا نتكلم عن طرق التشفير المختلفة، لكن في شخص صعب ان تتكلم عن التشفير وما تجيب له طاري. لانه سوى شيء ما حد سبقه له، هذا الشخص هو اللي يعرفون في تاريخ التشفير صار لهم ساعة الان يصرخون ويقولون ليش ما تتكلم عن الكندي. وما تقدر تلومهم الصج، ظلم ان تتكلم عن الموضوع وما تجيب له طاري. الكندي كان فيلسوف مشهور ومن اوائل من تكلم عن التشفير بين العرب. وصف طرق عديدة وعرف الكثير من الناس على الموضوع، لكن الاهم من كل ذا الكندي علم الناس كيف يكسرون الشفرات. مهم جدا ان تشفر معلوماتك الحساسة علشان مو بكل من هب ودب يطلع عليها خصوصا في اوقات الحروب. لكن الحقيقة المره اللي بتستوعبها بسرعة هو انك بس تطور تقنية جديدة للتفوق على غيرك خصومك والناس اللي تراقبك من بعيد بسرعة بينسخونها وببيبدأون يقلدونك. مثل ما انت تشفر غيرك بيشفر. مع تطور التشفير وانتشاره بين الناس صار ضروري ان تتعلم كيف تقدر تكسر شفرات خصومك لان اذا انت ما سويتها هم بيسوونها. اللي سواه الكندي هو انه بدا يدرس تقنيات التشفير الموجودة في زمانه وبدا يدرس الكثير من اللغات وخواصهم. استوعب شيئين اولا في كل لغة في حروف مستخدمة اكثر من غيرها، مثلا في العربي اكثر حرفين استخداما بدون منازع هم الالف واللام. نعم لو ما حسيت من قبل احنا العرب عايشين علاقة حب مع التعريف. صحيت من النوم الساعة 6 دخلت الحمام غسلت وجهي طلعت من البيت وركبت السيارة ورحت الدوام وجاني المدير وطلب من عندي اسوي له شغله على الكل اوكي وصلت الفكرة خلاص العرب يحبون الالف واللام. مو بس العربي طبعا كل اللغات عندها حروف مستخدمة اكثر من غيرها. الكندي بدا يجمع الكتب اللي حوله وصار يعد الحروف اللي فيها ويدون ارقامهم. واتوقع بعد انه درس القوائم اللي طلعوها غيره عن اكثر الحروف استخداما في القرآن وقدر يبني قائمة بااكثر الحروف تواترا في اللغة العربية. ثانيا ان في العادة في زمانه لما تشفر نص اماكن الحروف ما تتغير. اغلب الشفرات في زمانه كل اللي تسويه هو ان تغير اشكال الحروف. يعني لو اخذنا هالجملة وشفرناها عن طريق ابن عدلان اشكال الحروف تغيرت لكن ترتيب الحروف وتواترها وعلاقتها ببعض هي نفسها ما تغيرت. بسبب هالملاحظتين الكندي قدر يطور طريقة ذكية لكسر معظم الشفرات في زمانه. اكتب الحروف في لغتك من فوق لتحت حسب تواترها، خذ الرسالة المشفرة واحصي عدد الرموز او الحروف اللي فيها ورتبهم من الاكثر للاقل و بديت تلاحظ شو يصير؟ في اغلب الاحيان بتلقى تقارب واضح بين القائمتين، اذا كانت الرسالة المشفرة عربية فتدري انه غالبا اكثر حروفها هي الالف واللام، فاحتمال كبير ان الرمزين ذلين هم الف واللام. ونفس الشيء اللي باقي الرموز اذا شفت رمز نادر الظهور فاحتمال كبير انه من الحروف اللي في قاع القائمة مثل الظاء والغين. تقدر تقعد تمخمخ على الرسالة بهالطريقة وتكسر فيها شوي شوي الى ان تبدا تظهر معالم النص الاصلي ويصير سهل عليك تخمن المكتوب. الطريقة طبعا فيها تفاصيل اكثر من اللي ذكرتها يا اهل التشفير الله يخليكم لا تلوحون علي طماط، لكن الان صار عندك فكرة بسيطة عن طريقة عملها. الطريقة ذي سماها الكندي بتواتر الحروف اليوم اهل التشفير يسمونها بالفركونسي اناليزس. الطريقة ذي كانت احد اهم طرق كسر الشفرات اللي كانت متواجدة في ذاك الزمن اذا ما كانت الاهم وظلت تستخدم لوقت طويل لفك الشفرات من وقت الكندي في القرن الثالث الهجري الى قريب الحربين العالميتين. ما ادري والله الكندي من وين جاب الطريقة هل اخترعها من نفسه هل تعلمها من احد، لكن بحسب علمي كتاباته عنها تعتبر اقدم ما كتب في تاريخ البشر عن كسر الشفرات. وهذا يعني والله العالم ان علم كسر الشفرات او الكريبتاناليزس هو اختراع عربي 100%.
[19:06]فاذا كنت عربي هذا عندك شيء اضافي ت شي اضافي تفتخر فيه. الكندي طبعا مو بس طور تواتر الحروف لا لا لا عنده مليون شيء عن التشفير وكسر الشفرات. درس تناغم الحروف مع بعض في حروف كثيرة ما تجي ورا بعض وفي حروف شبه مستحيل تجي ورا بعض في العربي، درس اكثر الكلمات والتعبير ورودا في الرسائل مثل البسملة وكلمات التمجيد واماكنهم متوقعة لان كسرهم اسهل من غيرهم. تكلم عن انواع مختلفة من التشفير البسيط والمعقد وعن امكانية دمجهم لتقوية التشفير، نقدر نمسك الكندي او اي واحد من هالشخصيات ونقعد نتكلم عنه لابكرة. على كثر كلامي في هذا الفيديو ترى ما لمست الا سطح الموضوع. فاذا يوم لقيت نفسك فاضي جرب ابحث عن التاريخ المبكر للتشفير اذا تبي تشوف جانب جميل من تاريخ العرب نادرا ما احد يتكلم عنه.
