[0:00]SSC CGL 2026 ke exams aap next year 2026 July August mein expect kar sakte ho yaani ki abhi se aapke paas 7-8 mahine ka time hai. To is video mein main 2026 ke liye jitne log tayaari kar rahe hain, wo GS ki tayaari kaise karein, us poore topic ko cover karne waali hoon. But make sure isse pehle Maths aur English ki strategies aa chuki hain, jismein aap logon ka bahut hi achha response mila hai. To is video ke description mein dono hi videos ka link aapko mil jaayega, uske baad zaroor jaakar check out kar lena. Toh chaliye ab late nahi karte, is video ko shuru karte hain. So dekhiye, bahut logon ka question rehta hai ki mam, GS ka weightage bhi achha khaasa hai aur sabse huge syllabus bhi GS ka hai aur GS mein hum kitna bhi padhe, question kahin se bhi aa sakte hain. Aur GS itna bada hai ki hum utna zyada time usmein dete hain to utna output nahi nikalta hai. Toh hum is case mein kya karein? I always suggested in my strategy videos ki aapko GS mein bahut strategically tayaari karni hoti hai. Kitna dekar humein kitna mil raha hai, ye input output ratio ke hisaab se hi karna padta hai. Ye nahi ki hum gyaan badhane ki koshish karein. Ultimately this is a competitive exam, to aapko bahut soch samajh ke chalna padega. Toh dekhiye, aap kisi bhi subject ki tayaari jab GS mein kar rahe ho, toh aap pehle ye dekho ki kitna weightage hai uska. Jaise Polity ka main bolun toh bahut weightage hai, History ka bahut weightage hai. Static GK mein bhi aapko topic wise weightage ke hisaab se jaana hai ki aajkal kya trending topics puche ja rahe hain kuch saalon mein ek-do saalon mein, un par aapko vishesh dhyaan dena hai. Jaise ki classical and folk dances, is par bahut question aa rahe hain. Musical instrument par questions aa rahe hain, festivals ke upar question aa rahe hain, 2011 census ke upar questions aa rahe hain aur bhi bahut saare topics hain, aage main cover karungi kya important topics hain. Toh ye saari cheezein aapko dhyaan mein rakhni hain. Aap chaho toh ek-do saal ka PYQ utha kar ke dekh lo, usmein aap dekh lena ki Static GK ka kaun-kaun sa question aaya hua hai, and kin-kin topics ke upar aaya hai, toh aapko ek pattern samajh mein aa jaayega. Toh un cheezon ko aapko pehle karna hai. Main ye nahi keh rahi ki jo deep questions hote hain unko chhodna hai, lekin pehle aapka target in cheezon mein rehna chahiye. Because bahut saare aise aspirant hote hain ki ye toh hum kar hi lenge baad mein, pehle hum deeply jaate hain. No no, aisa aapko nahi karna, because GS is a very alluring subject. Aap jitna zyada padhte jaoge utna man karega aur padhe, aur padhe, aur jaane. Toh is trap mein aapko nahi fasna hai. Aapko dekhna hai important topics kya hain aur utne mein hi stick rehna hai, lekin unko achhe se karna hai. Ab dekhiye, basics ka matlab main kya kehna chah rahi hoon? Jaise maan lijiye History mein, sansthapak hote hain. Dynasty ke baare mein jo important pointers hote hain jo PYQs mein bahut baar repeat hue hain ya kisi nadi ka udgam hai geography mein ya Chemistry mein formulas hain, chemical formulas. Ya polity mein jo important article, agar aapko ye bhi nahi pata ab bhai article 19 kya hai, 17 kya hai, fundamental rights kahan par hain. Toh ye kya hai, bahut hi basic question hai. Agar aap inko revise karne par dhyaan na do, rather ki aapko bahut deep questions aa rahe hain, toh hum deep deep padhte jaana hai, toh wo bewakufi hi hogi. Toh apne mann ko pehle toh ye samjhao ki humein basics mein stick rehna hai, PYQs tak stick rehna hai. Uske alaawa agar koi question aata hai toh hum guess work karenge aur nahi ho paaya toh hum usko chhodenge. Ab ye jo hai, ye base hai GS ke aage tayaari kaise karenge. Ab hum chalte hain ki strategy kya hogi hum GS ki tayaari kaise karein. Toh sabse pehle time ki baat mein kar doon ki GS ko humein kitna time dena chahiye, toh apne aap ko stick rakho ek se dedh ghante se zyada ab GS ko ek din mein mat do. Itna enough hota hai, daily daily agar aap doge toh. Output bhi ek ghante ka, dedh ghante ka aana chahiye, yaani ki kitaab nikaal ke rakh liya aur bas idhar udhar dekh kar time nikaal liya. Ek ghante ke hisaab se aapke topics ready rehne chahiye ki static GK ka ye part mujhe cover karna hai, history ka ye wala topic mujhe padhna hai ya ye video dekhni hai, ye notes revision karna hai. Topic banana zaroori hai us ek ghante ke hisaab se aur uske hisaab se aage jaana hai. Ab hum baat karein agar teachers ki, kahan se hum tayaari karein, toh wo main strategy ke saath-saath hi aapko batati hui chalungi. GS ki strategy jo hai wo three pillars par hoti hai, kyuki teen iske alag-alag bhaag hain. Pehla toh hai ek conventional GS jo hota hai. Subject wise GS jo hota hai matlab jismein history, geography, polity, economics, physics, chemistry aur biology ye saare hi subjects aate hain. Static GK jo hota hai jo change nahi hota, jaise ki vishv ki pehli mahila kaun thi jisne Everest pe chadhaai kari thi, wo toh pehli hi rahegi. Ya kisi desh ki currency kya hai ya is desh ka national bird kya hai, ye saari jo static questions hain wo aate hain static GS ke andar. Aur current affairs jo ki aajkal current nahi reh gaya hai, bahut pehle ke questions bhi puch liye ja rahe hain. Usmein hai ki aajkal desh videsh mein kya khabre chal rahi hain, ek tarah se news samajh lo, toh ye saari cheezein hoti hain. Aur teeno ko padhne ka tareeka alag-alag hota hai, hum ek-ek karke teeno ke baare mein baat karenge. Toh sabse pehle hum shuruaat karte hain aise subject se jiske liye mujhe lagta hai ki abhi bhi content ka thoda shortage hai aur usko lekar ke aspirant bahut zyada confused rehte hain ki isko hum kaise achhe se karein, wo hai computer. Jinke paas paid course hai unka toh phir bhi kaam chal jaata hai, lekin jo free mein YouTube se tayaari kar rahe hain, unke liye I think abhi tak koi aisa fine content available nahi tha. Lekin is video ko banane se pehle maine bahut search kiya hai and Simplicrack With Alok karke ek channel hai, jismein inhone free computer ka content 6 ghante ka diya hai. Jismein inhone basic se lekar ke advance tak ke computer ke saare concept jo SSC CGL mein puche ja sakte hain, unko cover kiya hai. Maine personally inke content ko dekha hai, aur unhone actually bahut beautifully pictures ke madhyam se samjhaaya hai, you know, aapko ratne ki zaroorat nahi padegi, grab ho jaayengi cheezein. Infact kaafi zyada aapko knowledge isse milega. Toh 100% aap computer ke liye is video ko dekh lena, yahan se notes bana lena. Uske baad us notes ko hi baar-baar revise karna. For example, aapne maan lijiye ek MS Word ke upar mein pura concept wahan se padha, alag-alag topics mein unhone usi wali video mein karaya hua hai. Toh uska aap Testbook se ya kisi bhi aur mock test se, jo bhi aap de rahe ho, wahan se sectional mock laga lena, taaki aapko samajh mein aayega kis tarah ki preparation aapki ho rahi hai. Is channel mein inhone Static GK ke bhi bahut hi behtareen tricks diye hue hain, mnemonics ke madhyam se, pictures ke madhyam se, toh aap topic wise agar static GK ki trick bhi dhoondh rahe ho toh ye channel mein aapko bahut saare mil jaayenge. Aur recently ye subject wise like Polity ke upar mein, History ke upar mein bhi topic wise video bana rahe hain. Toh aap usko bhi ek baar check out kar sakte ho, kyuki personally mujhe inka content sahi laga hai, matlab relevant laga hai kaafi aur samjhane ka tareeka is also very very good. Toh is channel ka specially main link aapko description mein de doongi, aap isko check out zaroor karna, especially computer wali video ke liye toh zaroor karna. Sabse pehle hum aate hain conventional GS mein. So ismein humein dekhna hai ki kis subject ka kitna weightage hai. Toh agar main apna input doon, pehle main taiyaar karungi Polity, then Ancient History, Modern History, Medieval History, World History, aap chaho toh World History chhod bhi sakte ho, then Geography, then Biology, Physics and Economics. Ya toh aap is series mein padh sakte ho ya phir aapko jo subject zyada achha lagta hai, interesting lagta hai, aap wahan se shuru kar sakte ho. Because GS aisi cheez hai ki interest ka hona bhi zaroori hai padhai mein. Agar main bolungi pehle economics shuru kar do toh mere liye toh economics maut wali cheez hai. Toh main shuru hi nahi kar paungi, taalti rahungi. Toh usse achha hai ki aapko jo interesting lag raha hai usko karna shuru karo. Ab dekhiye jo bhi aapne subject uthaya, ek subject ko kaise ready karna hai usko main step by step bataungi. Aap dhyaan se suniye aur is tarah se agar aap follow karke padhoge toh GS aapko yaad bhi rahega long term tak aur GS mein achhe number bhi aayenge. Toh maan lijiye maine sabse pehle uthaya Polity, ki mujhe Polity taiyaar karna hai. Ab ismein kuch log galti kya karte hain, wo topic wise Polity padhne lag jaate hain jisse unka bahut zyada time waste hota hai aur utna output bhi nahi milta. Kyuki ek topic mein bahut saari aisi cheezein bhi teachers cover karte hain jo relevant hi nahi hai, jo kabhi aaya hi nahi. Bas knowledge bahut zyada hona humara you know, maksad nahi hai abhi, humein exam ke liye tayaari karni hai. Toh isiliye hamesha jabhi bhi aap teachers se padhe, pehle toh aapko book se nahi padhna theory part, kyuki usmein bahut zyada yaad karne mein aapko time lagega, padhne mein bhi time lagega, highlight karoge, matlab bahut saari cheezein hongi. Toh better hai ki aap videos ke through hi apna theory part prepare karein. Lekin video kaun si dekhni hai, toh ek hi video jisne poori Polity kisi ne cover kara ke rakhi hai. Waisi wali video aapko dekhni hai, jismein ki mostly wahi saare questions concepts teachers karayenge jo important hai jiske aane ke chances zyada hain. Toh aisi jo videos hain, aapko Parmar SSC mein saare hi subjects ke liye mil jaayengi. Aur jaise exam paas aata hai, recent videos bhi upload ho jaati hain. Toh jo bhi recent videos har ek subject ke hain, unko main screen par laga de rahi hoon. Aur Parmar SSC channel ka link bhi aapko mere description mein mil jaayega toh aap wahan se jaa ke check out kar sakte ho. Toh uske baad kya karna hai ki Polity ke aapne Parmar SSC se maan lijiye ek pura padh liya. 8-9 ghante ki video, I think hogi maine dekha nahi hai. Itni hi length ki video hoti hai, kyuki bahut saari cheezein cover karni hoti hain ek hi video mein, toh lambi video hoti hai. Toh aapko na ek time fix karna hai ki mujhe daily ek ghante ki video dekhni hai. Aur uske saath-saath aapko step 2 hai ki iska notes banane banate hue chalna hai. Ab notes banana kis logon ko hectic lag sakta hai ki bhaiya hum baar-baar videos dekh lenge, lekin aisa nahi hota hai, ye notes aapka bahut zyada help karne wala hai. Kyuki kabhi aap mock mein kisi question mein atkoge, kisi topic mein atkoge toh aap is notes pe seedhe aa kar revise kar loge. Phir exam ke time par ek mahine, dedh mahine jab baaki rehte hain, toh ye notes hi hai jo aapko compiled revision karata hai. Turant turant revise karwata hai aur exam mein aap answer karte ho. Aap baar-baar video ko revise nahi kar sakte. Isiliye notes banana initially starting mein thoda hectic lag sakta hai, but you must prepare notes in GS. Ab yahan par kya hai ki notes bhi aapko apni bhasha mein jitna short se short ho sake waise banana hai, aapko poori poori line likhne ki zaroorat nahi hai. Jahan bhi ho sake aap chart use karo, arrow use karo, GS mein maybe aap colors bhi use kar sakte ho. Jisse ki aapko thoda padhne mein maza aaye. Lekin aisa nahi ki color ke chakkar mein aap bahut zyada time notes banane mein hi laga rahe ho, padh kam rahe ho, toh ye nahi karna hai. This is step 2, aapko notes banana hai. Step 3 is ki jab aap doosre din video dekhne ke liye jaao aur notes banao, usse pehle aapko pehle din ka notes revise karna hi karna hai. Otherwise kya hai, maan lijiye 8 ghante ki video hai toh ek-ek ghante karke dekhoge toh 8 din lag jaayenge aapko Polity poori complete karne mein. Toh aap pehle din ka khatam bilkul hi kuch yaad nahi rahega. Isiliye ye aathon din aapko pehle ke saare dinon ke notes ko yaad karte hue jaana hai. This is one of the most important steps, isko aapko skip nahi karna hai. Jisse kya hoga ki aap jab tak chapter complete karoge, aapko Polity yaad bhi ho chuki hogi. Ye cheez dhyaan mein rakhna, revision kiye bina aap aage nahi badhna, nahi badhna, nahi badhna, theek hai. Toh ye aapka third step hua. Step 4 jab aapka ye pura ka pura Polity wala video achhe se complete ho jaaye, notes ban jaaye, revision bhi ho gaya toh kaafi cheezein aapki khatam ho gayi. Tab next aapko aana hai books ke upar mein. Toh ab aapki ichha par hai agar aap theory ki koi book padhna chahte ho, jabki mujhe nahi lagta yahan par zara sa bhi iski need hai. But kuch logon ko chill hoti hai, toh wo padhe toh padhe, nahi toh aap seedhe MCQs ki book mein aa jaaiye. Ye zaroori step hai, MCQs ki book aapko karni hi padegi, ek na ek lena hi padega. Toh aap GS ki book maine jahan se padhi thi, Kiran ki ye GS wali book thi, jismein PYQs type wise, topic wise badhiya se diye hue hain. Toh yahan se aap taiyaar kar sakte ho taaki aapko question lagaane ki bhi practice ho, kis tarah ke questions aate hain aapko pata ho. Aur yahan par important hai jab aap book padho toh holistic way mein padho, ye nahi ki ye question ye answer, ye question ye answer. Question aapne padha answer aapko pata lag gaya, jo teacher ne padhaya us hisaab se pata lag gaya toh well and good. Agar lag raha hai ki ye toh question aaya hai lekin teacher ne isko notes mein cover nahi karaya hai, toh unko tick mariye aur unko revise kariye. Aur yahan par kya karna hai, jaise kisi question ka answer aapko mila aur lag raha hai ki aapne ek question ka answer aapko mila, lekin wahan teen options aur aapke bache jiska solution mein description diya gaya hai. Isko bhi aapko saath ke saath hi cover karna hai. Toh usse kya hoga, ek question se aapke char paanch concepts clear honge wahan se aur ye karna hai. Itna jab karoge na tab aap dekhoge ki GS ke jitne mostly important topics hain wo apne aap aapko aa rahe hain. Aur kisi source mein aapko jaanne ki zaroorat nahi padegi. Log GS ke liye sources hi bahut saara bana lete hain, jabki ek book se hi bahut saara content aapko yaad ho sakta hai, theek hai. Toh ye aap karna hi karna hai. Next step agar hum aayenge toh yahan par aapko aana hai sectional mock mein ya chapter wise mock mein kuch bhi jahan par Polity ke questions diye hue hain. Mock mein, kyuki yahan par aap time bound manner mein usko kar paoge toh jaldi sochne ki aapki technique badhegi aur yahan par aap koshish karo ki skipping ko practice karo, time management GS mein thoda sa sikho. Toh ye sab aap sectional mock mein starting mein kar lena. Polity ka sectional mock de diya, tab aapko samajh mein aayega ki actually aap jo padh rahe the wo relevant bhi tha ki nahi tha. Aap dekhoge ki abhi abhi aapne padha hai, notes revise kiya hai, book bhi kar liya hai toh aapke kaafi achhe khaase number aayenge aur yahan se aapko samajh bhi aa jaayega ki bhaiya mera sahi hai.
[11:20]Toh aapko confidence aayega aage ke chapters ko is tarah se karne ke liye. Ek aur cheez kar sakte ho, Adda247 ka ek app aata hai, jismein ki PYQs jo hain wo mock format mein diye rehte hain, bilkul free hai. Aap jabhi bhi leisure time ho, aap baithe ho ya just you know, thoda sa aapke paas khaali time hai, toh ya phir aap travel kar rahe ho kuch bhi, toh wahan par aap khol kar ke GS ke quizzes de sakte ho. Bahut relevant questions hote hain, isiliye main aapko isko recommend kar rahi hoon, main khud bhi deti thi aur maza aata tha dene ka. Isko aapko burden nahi banana, jabhi bhi khaali time rahe aap kar sakte ho, but haan sectional mock aapko dena hai. Ab kuch log question karenge ki full mock, are full mock aap at least 40-50% syllabus complete kar lijiye tab lagaayega. Otherwise wo aapka barbaad hoga, kyuki abhi aapko aata hai nahi, aapke number kam aayenge, demotivate ho jaoge. Toh in sabse achha hai ki aap pehle sectional mock, books wagairah solve karke khud ka ek minimum base toh banao full mock dene ka, uske baad full mock dena. Aur kis tarah se lena hai wo maine video bana rakhi hai, 100% isko dena, aapke number badhenge. Toh ye thi polity ko taiyaar karne ka ek poora ka poora aapko maine strategy bataayi jo ki lagbhag aapko 10-15 din ke andar poori Polity complete ho jaayegi. Same aapko karna hai History ke liye, Geography ke liye. History mein kya hota hai teen alag-alag History matlab Ancient, Medieval aur World History hoti hai. World History dekh lena bhaiya agar time milta hai toh karna, lekin pehle aap modern kar lena, then aap medieval karna, phir geography, polity, chemistry, sabko same strategies ke saath aapko complete karna hai. Bahut hi achhe tarike se complete hoga aur jitna aapko aayega, wo aap vishwas rakhna enough hai. Uske alaawa agar questions aate hain toh aap skip karna. Iske alaawa bhi jab aap mock doge na toh wahan se bhi bahut saare aapko GS ke questions milenge. Jo question hai uska jo answer hai wo toh theek hai, but wahan se bhi aapko teen jo options milenge uska solution aapko padhna hai aur notes banana hai. Wo mock copy alag hogi jo mocks se aap notes banaoge. Wo main aapko thoda jab mock ke baare mein achhe se bataungi toh alag video banaungi ki kya-kya usmein rehna chahiye. Toh wahan par aap note karna aur usko bhi baar-baar revise karna. Toh apne aap hi bahut saara content aapka GS ka ho jaayega, zyada idhar udhar bhatakne ki zaroorat nahi padegi. Ab question rehta hai ki itna karne ke baawajood bhi agar humein tough question ya deep question mil jaayega toh hum kya karenge. Toh dekhiye guess work karna sikho. Agar aap video se padh rahe ho toh aapne ek chronology mein cheezein padhi hongi. Toh aapko aas paas ka concept bhi clear hua hoga, ratta toh nahi hai na aapne. Teacher jab padhaayenge toh sirf question answer question answer toh nahi karayenge, poora topic samjhayenge. Toh isliye isse kya hota hai ki guess work karna thoda sa easy ho jaata hai. Kabhi-kabhi question se hi hint mil jaata hai ki answer kya hoga. Kabhi-kabhi kya hoga ki do options aap eliminate kar paoge, 50-50 aapko risk lena padega, toh us time aap risk le lena. Aur GS mein koshish mat karo ki bhai 25 mein 25 question karna hai. Agar aap GS mein 18 se 20 question bhi karte ho, toh ye achha khaasa number hai question ka, toh usmein aap nischint raho. Lekin haan jitna kar rahe ho utne mein aap thoda confident rehna ki maine dhang se lagaaya hua hai. Toh ye ho gaya poora conventional GS ka part. Ab hum chalte hain Static GK ko hum kaise taiyaar karein. Static GK bhi ek bahut hi you know, conflicting sa ek topic rehta hai ki hum humne kiya koi aur topic, aa kuch aur topic gaya hai. Toh main screen par abhi jo trending topics important chal rahe hain, un sabka list aapko de rahi hoon. Inko aapko sabse pehle prepare karna hai. Iske baad jabhi bhi aapke paas time bachega toh aap next koi topic agar aap chahte ho toh yaad kar lena, otherwise itne se aapka kaafi zyada portion Static GK ka prepare ho jaayega. Ab aate hain ki hum inko kaise prepare karein, inko yaad rakhna hi itna mushkil hota hai, revise karna mushkil hota hai. Toh main aapko step by step jis tarah se bata rahi hoon waise karoge toh yaad bhi rahega aur aapka bahut zyada cover bhi ho jaayega, theek hai. Step 1 hai ki aap Static GK ko pehle khud se book se seedhe yaad karne ki koshish mat kariye, kyuki ye bahut hi similar se lagte hain aur bhoolne ke bhi bahut zyada chances hote hain. Sabse pehle toh ratiye mat, kuch na kuch khud se trick ban raha hai toh khud se trick banaaiye. Ya phir kisi teacher se videos ke madhyam se trick sun lijiye, sunne se cheezein zyada yaad rehti hain. Toh ismein aapko topic wise teacher ki video dekhni hai, jaise ki Musical Instrument is par aap search kariye simply for SSC CGL. Bahut saari videos aapke saamne aa jaayengi, jis par bhi aapko achhe views dikh rahe hain, jis teacher ko bhi aap jaante ho wahan se cover kar lijiye. Main aapko kuch teachers yahan suggest kar deti hoon, maine aise random check kiya toh mujhe mila. Iske alaawa bhi bahut saare teacher karwate hain toh aap kar lijiye. Jaise ki Parmar SSC hai, Careerwill Quick Revision, Crazy GK Trick, iske alaawa bhi bahut saare teachers aise hain jo ki Static GK ke upar mein achhi videos banate hain, achha tricks batate hain toh wahan se kar lijiye, lekin isko aapko topic wise karna hai, theek hai. Jaise ki Musical Instrument ke upar mein kar liya, 2011 Census ke upar mein kar liya. Toh topic, ek topic maan lijiye aapne Folk Dance ke upar mein kiya. Isko aapne videos se dekh liya, iske baad aapko aana hai Lucent ki book par ya jo bhi book PYQs ki ya koi bhi theory book agar aapke paas available hai jismein ki Static GK ka part diya hua hai. Toh book se aap usko achhe se cover kariye, theek hai. Usmein se jo teachers ne video mein nahi karaya tha, aap unko tick mark kar lijiye ki bhaiya ye alag hai, theek hai. Wahan se karne ke baad step 3 is ki aap ab aaiye sectional mock mein aur us topic ka aap sectional mock dijiye. Jisse kya aapko confidence aayega ki aapne jo padha hai wo sahi hai. Iske baad step 5 is revision, revision, revision. Static GK mein jab revise nahi karoge, cheezein bahut jaldi bhool jaate hain ismein. Toh jabhi bhi aap jaise maan lijiye Folk Dance padha, phir aapne Musical Instrument padha, phir 2011 Census padha. Jab 2011 Census padha toh Folk Dance aur Musical Instrument aapko aage yaad kar lene hain uske baad. Jab fourth topic pe jaoge toh aage ke teen topics yaad kar lene hain. Revision nahi karoge, bilkul yaad nahi rahega, baad mein aisa feel hoga ki itna padh kar ke bhi koi faayda nahi hua. So make sure you proceed with previous revisions always. Ab hum chalte hain current affairs ki taraf, toh dekhiye current affairs mein abhi kya hai ki pehle ke questions bahut puch de rahe hain, saal do saal pehle ke. Toh un questions ko aapko avoid karna hai. Yaad hai agar thoda bahut toh aap mark kar lo, guess work kar paa rahe ho toh kar lo. Nahi toh apni taraf se aap 6 se 7 mahine se zyada ka current affairs mat padho, kyuki yaar fayda nahi hai padh kar ke theek hai. Inko aapko kaise padhna hai wo main aapko bata de rahi hoon. Dekhiye current affairs mein bhi aapko ye jo topic screen par dikh rahe hain, ye bahut zyada important topics hain, in par aapko vishesh dhyaan dena hai. Ab step by step kaise padhenge toh inko bhi main bolungi ki daily current affairs ki jo teachers video karwate hain, unko dekha kijiye. Zyada lengthy nahi hona chahiye, maximum 40 minute tak ka hona chahiye, wo bhi aapko 1.25x per, 1.5x par dekhna hai. Aur aise teacher se kariye jo specifically current affairs hi karwate hain. Jaise ki Utkarsh Classes, Parcham Classes, StudyIQ IAS, Current Affairs Updated, GKToday, Crazy GK Trick. Ye saare channels, iske alaawa bhi bahut saare channel agar aap kisi ko follow kar rahe ho toh wahan se karte raho. Lekin main bolungi ki inke liye aapko extra time mat nikaaliye. Inko aap lunch time par ya phir jabhi bhi aap thoda sa aise baithe aapko lag raha hai thoda video dekh lete hain, phone chala lete hain, toh us time aap current affairs dekhiye. Kyuki current affairs thoda entertaining bhi hota hai, you know, bahut boring cheez toh hoti nahi hai, ismein achhi-achhi cheezein bataai jaati hain, kaafi knowledgeable aapko banati hai ye cheez aur ye exam ke baad bhi aapko kaam aati hai, thoda aap knowledgeable hote ho. Toh is tarah se karo. Toh daily jab karoge toh aap guess work achha kar paoge, cheezein aapke dimag mein rahengi aur kabhi-kabhi question aise aa jaate hain jo humein exactly toh nahi pata lekin hum doosre current affairs se relate karke uska right answer kar dete hain. Toh isiliye daily current affairs dekhna is anyway beneficial. Ismein aapko notes banane ki koi zaroorat nahi hai. Isko aap simply PDF se revise kar sakte ho. Jo bhi teacher aapko current affairs karwate honge, unka Telegram channel bhi hoga, wo PDF bhi batate honge, wahan se aap PDF download kariye. Aur main toh bolungi ki aap daily current affairs ko ek do baar revise kariye. Baar-baar daily current affairs ko revise karne ki zaroorat nahi hai. Aap ek baar daily current affairs ek mahine ka dekh loge, uske baad monthly compilation jo aati hai usko dekhiye. Uski jo PDF hai usko download karke rakhiye, exam ke liye monthly wali ko hi aapko zyada revise karna hai. Uske baad 6 months ki compilation bhi teacher karwate hain toh ek rewind ke liye aap unko bhi us wali video ko bhi dhang se dekh lijiyega. Toh is tarah se karke aapko current affairs karna hai. Iske alaawa Adda247 mein bhi current affairs bahut hi achhe se, colorful way mein dikhaye jaate hain. Wo bhi mujhe bahut pasand tha, main wahan se bhi karti thi daily ki daily basis par aur wahan par previous day ka jo current affairs hai uske upar quiz bhi aata tha, bilkul free hai. Toh wahan se bhi main lagaati thi toh wahan se bhi meri practice achhe se ho jaati thi. Aur current affairs aap jab mock lagaoge na toh bhi aapke paas bahut saare questions aayenge. Toh un questions ko bhi achhe se karna hai aur unke jaise ki maine bataya teen options honge unko bhi dhang se padhna hai. Toh is tarah se karoge toh current affairs ke bahut saare content aapke paas ho jaayenge aur revision bhi ho jaayega. Current affairs mein bahut zyada dimag laga kar ke darne ki zaroorat nahi hai ki ye padha aur ye aa gaya. Current affairs mein aisa hota hi hai toh itna aapko chinta karne ki zaroorat nahi hai. In fact, mujhe lagta hai GS mein hi bahut zyada chinta karne ki zaroorat nahi hai. Maine jitna padhaya utna hi kiya ja sakta hai. Aapke bas mein bahut zyada cheezein nahi hai, theek hai. Toh jitna ho sakta hai, aap utna hi GS mein kariye aur aapko maximum output milega ismein se. Aur ismein se bhi agar cheezein nahi aati toh aapki phir wo samajh lijiye ki bahut koi chhod rahe honge, toh aap bhi chhod dena. So Maths aur English ke last part mein maine aap logon ko mock kaise lagaaye usko demo karke dikhaaya tha, lekin GS wale part mein main aapko nahi dikha rahi hoon. Kyuki GS mein aisa koi hard and fast koi maine invent nahi kiya hai kis tarah ke mock dene ka tarika. Ismein aapko 2 go's enough rehte hain mock dene ke liye. Aap karte jaao, karte jaao jo aa raha hai, guess work starting mein mat karo. Matlab first go mein guess work mat karo ki question ke upar aap soche ja rahe ho bahut der tak. Kyuki aapko samajh nahi aata but sochne mein bahut zyada time lag jaata hai. Jo question aapko aata ja raha hai, aata ja raha hai, bas usko maarte jaao. Jismein thoda sa bhi lag raha hai ki nahi mujhe nahi aa raha hai usko skip kar do. Second go mein jo bhi question aapko lag raha hai ki soch kar ya guess work kiya ja sakta hai us par thoda socho aur kar do. Uske baad aapke agar 6-7 question bach bhi rahe hain, nahi ho paa rahe hain toh koi tension nahi hai, chhod do unko. So I hope is video se aapko GS ki tayaari karne mein bahut zyada help milegi aur aapke number bahut achhe khaase aayenge. Toh isse pehle maine jo Maths aur English ki video banayi thi uski link aapko description mein mil jaayegi, zaroor check out kar lena agar aapko achhe number chahiye aur 2026 mein ek seat secure karni hai toh. ASO VLOGS ekmatra aisa channel hai jismein ki aapko aapke saare question ka jawab milta hai aur bahut hi practical milta hai. Kora motivation nahi deti main ki bhaiya aapka ho jaayega, karo. Maine bahut saare channel ko dekha hai only kora motivation, koi practical guidance nahi hai. But yahan par aapko saare ke saare practical guidance milti hai har problem ka solution aur ab toh ASO VLOGS mentors ke beech mein sabse bada channel ban chuka hai 4 lakh 8 hazaar subscribers ke saath, iske liye aap sabka bahut bahut thank you. Toh chaliye milte hain aisi informative videos ke saath aage bhi tab tak ke liye Jai Hind.
