فتح شركة لسيارات الأجرة بس، علشان يوفر وقت!

[0:00]معدل ذكاء المدير ده في حتة تانية، لأن مايكل اوليري المدير التنفيذي لشركة رايان اير، فتح شركة لسيارات الاجرة بسيارة واحدة بس، والسبب كان حيلة عبقرية علشان يوفر وقت! لأن مايكل كان عايش في دبلن اللي تعتبر تالت اسوأ مدينة في العالم في الزحام المروري. متوسط سرعة السيارات على الطرق في ساعات الذروة حوالي 13 كم/الساعة. و كحل للأزمة دي المسئولين في المدينة عملوا حارة في الطرق و خصصها بس للباصات والعجل و التاكسيات. فالأستاذ اوليري علشان وقته ما يضعش على الطريق، قدم على رخصة تاكسي بسيارته الخاصة مرسيدس S500. ووظف سواق علشان بالحيلة دي يملك الحق إنه يمشي في حارة الباصات ويتجنب زحمة الطريق، في رحلته كل يوم من بيته البعيد عن مقر شركة رايان اير. والمضحك إن رغم امتلاكه للسيارة و لشركة التاكسيات الوهمية دي، اتفق مع سواق عربيته إنه هيحاسبه حسب العداد في كل رحلة، علشان كله يبقى ماشي قانوني. وبسبب القصة اتهموه بإساءة استخدام القانون، لكنه قال إن شركته قانونية و إنه مش بيعمل حاجة غلط.