IBS - القولون العصبي - اعراض القولون العصبى وعلاجه بالتفصيل

[0:00]بسم الله الرحمن الرحيم، معاكم الدكتور احمد من قناة ادرينالين ومكمل معاكم في سلسله كورس الـ OTC وهنتكلم النهارده عن القولون العصبي الـ IBS. الاول هنعمل اوفر فيو سريع هنتعرف بيه عن المرض، بعد كده هنتكلم عن اسباب القولون العصبي وبعدين هندخل على الاعراض الشائعه والغير شائعه اللي بتدخل لنا الصيدليه وبنعرف منها ان المريض اللي قدامنا بيعاني من تهيج في القولون العصبي. وهنشرح كل عرض بيحصل ازاي بالتفصيل، بعد كده هنتكلم عن النصائح اللي بنقدمها للمريض علشان يتجنب الاصابه بتهيج القولون العصبي. واخيرا هنتكلم عن علاج القولون العصبي بالتفصيل، نبدا الاول بالاوفر فيو. القولون او الـ Large intestine الأمعاء الغليظه ده اخر جزء في جهازنا الهضمي. سبب تسميته لارج انستين بناء على القطر مش على الطول لان السمول انستن اطول منه. وظيفه الامعاء الغليظه اول حاجه بتعمل امتصاص للمايه والاملاح من الاكل المهضوم جزئيا واللي جاي من الامعاء الدقيقه. تاني حاجه بتعملها بتطرد الفضلات وبواقي الاكل خارج الجسم وده عن طريق فتحه الشرك. وده بيبقى عن طريق تقلصات في عضلات جدار القولون والتقلصات دي اسمها حركه الـ peristalsis. حركه الـ peristalsis بتتحكم في معدل تفضيه محتويات الامعاء الغليظه زي ما اتكلمنا عليها قبل كده وقلنا ليها تلات حالات. حركه سريعه وحركه بطيئه وحركه متوسطه وع عرفنا ان الحركه السريعه بينتج عنها اسهال وشرحنا ده في حلقه الاسهال. وعرفنا انها لما تبقى بطيئه ده بينتج عنه امساك وع عرفنا السبب في حاله الامساك. والحركه المتوسطه هي الحركه الطبيعيه اللي بيطلع فيها قوام البراز الطبيعي. الستات اكثر احتمال للاصابه بالقولون العصبي من الرجاله ولاسباب غير معروفه. كده خلصنا الاوفر فيو، ندخل بقى على اسباب القولون العصبي. القولون العصبي مالوش سبب واضح حتى الان لكن اكثر النظريات بتقول ان لما يكون القولون حساس لضغط نفسي او بعض الاطعمه ده بيعمل خلل وظيفي فيه. نتيجه الخلل ده بيحصل تهيج في القولون العصبي والنقطه دي هنتكلم عليها قدام شويه بالتفصيل. كمان لقوا ان في علاقه بين الجهاز المناعي وتهيج القولون العصبي. بعض الدراسات الحديثه لقت علاقه بين السيروتونين اللي هو هرمون السعاده اللي بيضبط المزاج والقولون العصبي. تعالوا نفصل المعلومه دي علشان دي تقريبا من اهم الاجزاء في حلقه القولون واللي اغلبنا ممكن ما يكونش واخد باله منها. ماده السيروتونين اللي هي هرمون السعاده بتتفرز من الامعاء وبتكون موجوده في الامعاء بنسبه 95%. وموجوده كمان في الدماغ بس 5% فقط، والخلايا المبطنه للقولون هي المسؤوله عن نقل السيروتونين للدماغ لحد هنا تمام. في حاله تهيج القولون بتاثر على وظيفته في نقل هرمون السيروتونين للدماغ، بالتالي هيتراكم في الامعاء ومش هيوصل للدماغ. وده بيفسر لنا سبب احساس بعض مرضى القولون باكتئاب وقلق وتوتر وسواس قهري فزع ارق كل الاعراض دي وارد ان احنا نسمعها من مريض بيشتكي من قولون عصبي. والاعراض دي مش خطيره ومش محتاجه تدخل طبي دي بتظهر فقط وقت تهيج القولون العصبي واحنا دورنا ان شاء الله نشوف ايه الحاجات اللي بتهيج القولون ونبعد عنها. نرجع لاول نقطه قلنا ان ممكن يكون القولون حساس لبعض الماكولات، طيب ازاي القولون حساس لبعض الماكولات وايه اللي بيحصل؟ وايه هي الماكولات دي؟ خلونا نبدا القصه من اولها، عندنا في الامعاء الغليظه بكتيريا نافعه، البكتيريا دي عددها بالمليارات، عددها 10 اضعاف خلايا جسم الانسان. تسمى بالـ microbiome وفي حلقه كامله اتكلمنا فيها عن الـ microbiome بالتفصيل. البكتيريا دي بتاثر على حبك او كرهك لبعض الماكولات وبتاثر كمان على صحتك ومزاجك ونومك. طيب ايه علاقه البكتيريا بموضوعنا؟ بعض الماكولات اللي هنذكرها قدامي ان شاء الله، بتتغذى عليها البكتيريا دي وبتتكاثر وبتوصل للامعاء الدقيقه اللي المفروض ما يكونش فيها بكتيريا. لما بتوصل للامعاء الدقيقه بتتكاثر بسرعه ولما بناكل اكل معين بتهضمه وبتطلع منه غازات وهنا بتبدا اعراض القولون العصبي. طيب ايه هي الاكلات المعينه اللي بتتغذى عليها البكتيريا دي وبتتكاثر وبتعمل لنا كل المشاكل اللي قلناها. اساس المشكله كلها السكر، البكتيريا دي بتحب السكر ولما بتتغذى عليه بتكبر وتتكاثر ويزيد عددها عن الطبيعي وبتدخل للامعاء الدقيقه وتبدا في عمليه التخمر الناتج عنها الغازات اللي بتسبب في تهيج القولون. طيب السكريات موجوده في ايه؟ موجوده في الجلوكوز العادي، موجوده في الفركتوز اللي موجود في الفاكهه، موجود في اللاكتوز اللي موجود في اللبن، موجود في الرافينوز اللي موجود في الخضار زي البروكلي والقرنبيط والكرنب، الجلوتين موجود في الشعير والشوفان. يعني لو عندك مشاكل في القولون يبقى لازم تبعد بقدر المستطاع عن الحاجات اللي قلناها دي. كمان من ضمن الحاجات اللي بتزود مشاكل القولون الاسترس الضغط العصبي. من اسمه قولون عصبي، بالتالي لما بتتوتر وتشد اعصابك او تبقى في ضغط عصبي بيتفرز الكورتيزون بكميات اعلى. ونتيجه الكميات العاليه من الكورتيزون بيحصل ارتفاع في ضغط الدم والسكر وبيقل هرمون السيروتونين اللي هو هرمون السعاده وبيسبب انتفاخات وغازات ومن هنا بتبدا اعراض القولون. ومن ضمن الحاجات اللي بتبوظ الامعاء واللي اغلبنا مش واخد باله منها اللبان. مبدئيا كده عمليه المضغ لما بتحصل بتخلي المخ يرسل اشارات عصبيه للامعاء علشان تفرز الانزيمات الهضمه استعدادا طبعا للاكل اللي نازل. فلما بتمضغ اللبان الانزيمات الهضمه كده شغاله عمال على بطال وبتستهلك في الفاضي. فلما تيجي تاكل بجد يكون الانزيمات دي استهلكت وتطلع بكميات قليله فما تقدرش تهضم الاكل كويس فيتخمر وينتج عنه غازات وتبدا من هنا اعراض القولون العصبي. طيب زي ما عرفنا ايه اللي بيساعد البكتيريا علشان تتكاثر عاوزين برضه نعرف ايه اللي بياثر عليها وبيقتلها المضادات الحيويه. ادويه منع الحمل المسكنات الكتير كل دي حاجات بتقتل البكتيريا. طيب ايه هي الاعراض اللي بتدخل لنا الصيدليه وبنعرف منها ان المريض اللي قدامنا بيعاني من القولون العصبي. لما بيحصل تهيج للقولون بسبب الحاجات اللي قلناها تلاقي المصاب بيشتكي من انتفاخات وع عرفنا سببها وبتحصل ازاي مغص. وتلاقي المريض بيقول لك حاسس بتقريص في بطني وتقريبا بيختفي لما بيدخل الحمام، امساك او اسهال، الم كتير في البطن ومكانه مش محدد. وبيختفي الالم ده بعد دخول الشخص للحمام ده طبعا بالاضافه لخلل في نقل هرمون السيروتونين اللي هو هرمون السعاده اللي اتكلمنا عليه قبل كده. فبيؤدي طبعا لاكتئاب وقلق ووسواس قهري وفزع وارق، كمان ممكن المريض يقول لك انا بدخل الحمام كتير وده بسبب الغازات الكتير اللي في البطن ضغط على المثانه فبتخليه يدخل الحمام كتير. تلاقي المريض يقول لك حاسس بضيق في التنفس وده سببه الغازات الكتير اللي في البطن ضغطت على الحجاب الحاجز ادت لضيق في التنفس. بعض الاحيان بيحصل وجع في القلب والوجع ده بيبقى عباره عن نغزات او خفقان في القلب. طبعا لو دخلك مريض بيشتكي من الم في القلب وانت شكيت انه بسبب القولون العصبي وحاولت تقنعه ان ده بسبب القولون هيقول لك يا دكتور ايه علاقه المعده والامعاء بالقلب. والمريض هيقنع نفسه ان عنده مشكله في القلب ولو راح وعمل رسم قلب وفحوصات مش هيلاقي اي حاجه نهائي لان المشكله بسبب القولون مش في القلب. اولا الم القلب لازم يسمع في الظهر مع الكتف الشمال مع الذراع الشمال غير كده ما يبقاش مشكله في القلب يبقى الم بسبب القولون العصبي خصوصا لو المريض سنه صغير. طيب ايه تفسير الحاله دي في عصب طالع من القولون واصل للرقبه لخلف الراس وبيعدي على القلب. العصب ده اسمه الـ vagus nerve فلما بيحصل تهيج للقولون بيسمع في القلب نتيجه مرور العصب ده. وزي ما قلنا العصب بيوصل للرقبه فكمان من ضمن الاعراض ممكن تلاقي الم في الرقبه وبما ان العصب نهايته خلف الراس ممكن تلاقي صداع خلف الراس. والصداع ده بيكون مزعج جدا وغالبا بتاخذ له مسكن ومش بيجيب نتيجه لان المشكله هنا بسبب القولون فعلاج الصداع هنا هو علاج القولون. كمان في بعض الاعراض هنقولها على السريع هي مش بتحصل كتير لكن بتحصل مع بعض الحالات فلازم نكون عارفينها. المريض يشتكي من نبض في البطن، تلاقي المريض كده يقول لك انا حاسس ان في دقه في بطني، الم في الظهر بيحصل بطريقه غير مباشره نتيجه الامساك والانتفاخات، شعور بالغثيان ان حاسس انه عاوز يرجع نتيجه الانتفاخات. دوخه ده عرض نادر لكن بيحصل لما يكون المريض مصاب بالقولون العصبي وعنده مشاكل في الدوره الدمويه. صعوبه في البلع وده نتيجه زياده الحمض، طيب خلونا نختصر الاعراض شويه علشان نفهمها وما نحفظش. الاعراض الرئيسيه متجمعه في كلمه اس جي ان، الاس سيروتونين وع عرفنا سبب نقصه بيعمل اكتئاب وقلق ووسواس قهري وفزع وارق. الجي الغاز وع عرفنا وجود الغازات بتعمل مغص اسهال او امساك بيعمل انتفاخات بيضغط على المثانه بيخلي المريض يدخل الحمام كتير بيضغط على الحجاب الحاجز بيعمل ضيق تنفس. الان النيرف العصب اللي طالع من القولون بيعدي على القلب والرقبه ويوصل لخلف الراس. العصب ده لما بيحصل تهيج للقولون بيسمع في القلب فبيعمل خفقان في القلب بيسمع في الرقبه فبيعمل الم في الرقبه بيسمع فيه خلف الراس فبيعمل صداع خلف الراس. ندخل بقى على مرحله العلاج، علاج القولون العصبي مش ثابت عند كل المرضى، يعني ايه؟ يعني ما ينفعش اعمل روشته واقول ان دي اوصفها لاي مريض بيعاني من قولون عصبي الكلام ده مالوش اي صحه نهائي. لان زي ما قلنا القولون العصبي مجموعه اعراض يعني ممكن تظهر كل الاعراض وممكن يظهر بعض الاعراض فقط. فاحنا في خطوه العلاج بنعالج الاعراض فقط، نرجع بقى لخطوه العلاج احنا قسمنا العلاج لطريقين وانت تختار الطريق المناسب ليك وتمشي فيه. علاج عن طريق الاعشاب الطبيعيه وبعض النصائح اللي ممكن تقلل من تهيج القولون وعلاج عن طريق الادويه. قبل ما ندخل على العلاج في خطوه مهمه جدا ما ينفعش ننساها لازم تعرف المريض بمرضه كويس ويكون عارف الاعراض اللي هتحصل له علشان ما يتفاجئش. وعرفه ان اللي هيحصل ده عادي وما تتوترش لان التوتر زي ما قلنا قبل كده هيزود افراز الكورتيزول ومن ضمن اعراض الكورتيزول انتفاخات في البطن اللي بدورها هتعمل على تهيج القولون اكثر وندخل في دوامه تانيه. الحل اول ما يحصل لك اي عرض من اللي قلناهم طمن نفسك واهدا اشرب مايه كتير وشويه وهيروح العرض اول ما القولون يهدى. نبدا الاول بالاعشاب الطبيعيه والنصائح اللي بنقدمها للمريض. الطريقه دي فعاله جدا لعلاج القولون وهتجيب نتيجه ان شاء الله في خلال اسبوع او اسبوعين بالكثير. في البدايه امنع السبب، يعني ابعد عن كل الحاجات اللي قلنا انها بتهيج القولون البان، خضار، ضغط عصبي، اكل محمر، اكل مقلي، اكل مسبك، اكل حر، شاي، قهوه، مشروبات غازيه، تدخين كل ده وقفه. زود البكتيريا النافعه اللي في جسمك اللي هي البروبيوتيك بتاخدها بقى عن طريق الحبوب او مصادر طبيعيه عايشه فيها البكتيريا النافعه دي زي ايه؟ زي زبادي الاغنام والزبادي المتخمر والمخلللات الى اخره، كمان محتاجين نخلي المعده اقوى بمعنى الحمض يبقى اقوى علشان يهضم الاكل كويس وما يسيبش بواقي للاكل فيحصل لها تخمر وينتج عنها تهيج القولون. ده حلها في خل التفاح خل التفاح مفيد جدا لحاجات كتير من ضمنها علاج القولون وده الجرعه بتاعته بياخذ معلقه الصبح ومعلقه بالليل بعد الاكل على كوبايه ميه كبيره. وطبعا لازم تتاخد بالشيالومون لان الخل بياكل السنان، افضل الخضروات الاكل خس خيار وقف على كده الخضروات. في مشروبات طبيعيه كتير بتريح تهيج القولون زي الزنجبيل واليانسون والكركم. الكركم مالوش علاقه قوي بالقولون لكن بيستخدم كمضاد التهاب في اي التهاب في الجسم هيزيله ان شاء الله. الفيتامين اللي محتاجينها زنك فيتامين اي جلوتامين اوميجا 3 هنحتاج ادويه تظبط الهضم زي السباذمو دايجستن. طبعا الطريقه دي جميله جدا لتنشيط المعده وتقليل اعراض تهيج القولون جربها اسبوع ومش هتندم. الوقتي ندخل على الطريقه الثانيه اللي هي العلاج بالادويه، في البدايه امنع السبب. ابعد عن كل الحاجات اللي قلنا انها بتساعد في تهيج القولون، البان، خضار، ضغط عصبي، اكل محمر، اكل مقلي، اكل مسبك، اكل حر، شاي، قهوه، مشروبات غازيه، تدخين كل ده وقفه. وعرف المريض ان العلاج مش هيجيب نتيجه من غير ما نمنع السبب، الوقت مريض القولون بيتوصف له ايه؟ زي ما قلنا احنا بنعالج اعراض فقط، بنوصف له حاجه للمغص كلوذباسبمين فورت، كولونا، ديسبتالين، كلوفرين بانواعه، ليبراكس والجرعه بتاعتهم قرص قبل الاكل بربع ساعه ثلاث مرات في اليوم. يعني بياخذوا كل ثمان ساعات، هندي له كمان حاجه مضاده للانتفاخات والغازات الدس فلاتيل فلاتيديل ايوكربون او راس الفحم زي ما بيقولوا عليها. والجرعه بتاعتهم قرصين مضغ ثلاث مرات في اليوم يعني برضه كل ثمان ساعات. كمان بندي له حاجه بتظبط الهضم زي الديجيستن سبازمو ديجيستن سبازمو اميز. والجرعه قرص ثلاث مرات في اليوم، بندي له كمان حاجه منظمه لحركه الامعاء زي الموتيليوم والـ جاستريك. الجاستريك كويس جدا للقولون وكمان بينظم حركه الامعاء وي تلاقيه بيخرج كتير جدا لو انت شغال في صيدليه وجنبك دكتور بيعمل عمليات او مستشفى جراحه بياخدوها للشخص اللي لسه خارج من عمليه علشان ينشط حركه الامعاء. الجرعه بتاعتهم قرص ثلاث مرات في اليوم يعني كل ثمان ساعات، كمان بندي له حاجه تقوي المعده وتزود البكتيريا النافعه زي البروبيوتيك ودي علبه موجوده في الصيدليه اكياس. كمان لو المريض بيشتكي من امساك هندي له مينالاكس او سينا لاكس الجرعه قرصين قبل النوم. وفي بعض الحالات ممكن تطلع لها لاكتولوز ولكن لا يفضل اللاكتولوز في حالات القولون العصبي وفي حلقه كامله اتكلمنا فيها عن الامساك وعلاجاته بالتفصيل. اما لو بيشتكي من اسهال بندي له استربتوكين او انتينال، الجرعه هتبقى قرص ثلاث مرات في اليوم يعني كل ثمان ساعات. وفي حلقه كامله خاصه بالاسهال وتكلمنا فيها على انواعه وعلاجاته. وبكده خلصت حلقتنا النهارده ومكملين معاكم في سلسله كورس الـ OTC يا رب تكونوا استفدتوا.