[0:00]حتى اسماء اوتار العود احنا مختلفين عليها. خلينا نشوف بهذا الدرس شو ترتيب الأوتار الصحيح ووين الغلط ووين الصح والحق مع مين؟
[0:14]علشان نبدا نفهم اصل المشكلة هذا إذا في مشكلة من أصله. لازم اليوم نحكي على بعض الأمور. أولًا إختلاف عدد الأوتار في الأعواد المختلفة. ثانيًا أنواع الدوزان. ثالثًا طبقات تعديل الدوزان المختلفة. وأهم سؤال طبعًا، هل في دوزان صح ودوزان غلط وترتيب أوتار صح وترتيب أوتار غلط؟ وأنا أي طريقة أتبع من كل اللي راح أشرحه. مهم جدًا إنه نفهم إنه عدد الأوتار في العود، له علاقة مباشرة في عدة أمور. أهمها مثلًا الحقبة الزمنية أو المنطقة اللي عم يعزفوا فيها على العود أو أسلوب العزف أسلوب العزف جدًا مهم. عندنا العود الرباعي والخماسي والسداسي والسباعي، طبعًا رباعي نسبة إلى أربع أزواج من الأوتار. خماسي إلى خمس أزواج من الأوتار وهكذا. آخر 100 سنة إحنا كعازفين صار عندنا حرية الإختيار، أنا بدي أعزف على العود ست أوتار. شخص آخر بدو يعزف على عود أربع أوتار. الأستاذ محمد القصبجي في الخمسينيات كان عنده تسجيلات على عود سباعي وتسجيلات أخرى على عود سداسي. بينما بنفس الفترة الأستاذ فريد الأطرش كان يعزف على عود خمس أوتار. بينما بنفس الفترة الأستاذ منير بشير كان يعزف على عود ست أوتار. الأمر يتبع المنطقة وأسلوب العزف. يعني في الخليج العربي بيعزفوا على عود خمس أوتار. هذا التقليد هذا بيخدم نوع الموسيقى اللي عم تطلع من هذه المنطقة. وهيك خلينا نبدأ نفوت على أنواع الدوزان لأنه لها علاقة مباشرة بترتيب الأوتار وعدد الأوتار. أنا ما راح أشرح طريقة دوزان العود، لأنه كنت عملت عليها فيديو كامل، بحط لكم طبعًا الرابط بالوصف وبتشوفوا الرابط كمان موجود هون. نوع الدوزان الأول يسمى دوزان دو دو. وترتيب الأوتار فيه كالتالي إذا كان عدد أوتارنا ست أوتار. من تحت عندنا دو، الوتر الثاني صول، الوتر الثالث ري، الوتر الرابع لا، بعدين عندنا الوتر الخامس فا. ممكن يكون إما فا ثابت أو صول في بعض الأحيان أو حتى مي يعني الأستاذ رياض السنباطي كان يدوزنه مي أحيانًا. أنا مثلًا هذا الوتر بدوزنه فا، لأنه بحس إنه بيخدم طريقة عزفي وبيعطيني أكثر إمكانيات اللي أنا بدي تطلع مني وقت ما أعزف. عندنا مثلًا الأستاذ سيمون شاهين معدله فا، الأستاذ طارق الجندي معدله صول. وتر الدول الغليظ بما إنه أكثر استعمالاته كمان للقرارات وكمان عشان يحافظ على توازن تردد العود في دوزان الدو دو. هذا ممكن يكون ثابت دو وأحيانًا إذا عم نعزف على مقامات اللي درجة إرتكازها ري ممكن ندوزنه ري أو درجات أخرى يعني طون لفوق أو طون لتحت ما بيأثر على العود بالعكس ممكن يخدم العزف. طيب يا أستاذ يعني لما عندنا خمس أوتار ما عندنا ستة شو بنعمل؟ بسيطة جدًا، هذا الوتر بنشيله. كل اللي شرحته ينطبق على الخمس أوتار الأولى. بنشيل وتر الدو وهيك بصير عندنا عود خماسي. طيب وإذا عندنا عود سبع أوتار؟ كمان بسيطة. إضافة على الست أوتار الموجودين هون اللي أنا شرحت عنهن الآن. نضيف وتر حاد اللي هو وتر الفا يسمى كمان وتر الشرارة. وهيك بصير عندنا فا، دو، صول، ري، لا، فا، دو. هذا العود السباعي دو دو. النوع الثاني من الدوزان يسمى دوزان فا فا. وإذا كان عدد الأوتار ست أوتار بيكون ترتيب الأوتار كالتالي. أول وتر بيكون عندنا فا، ثاني وتر دو، ثالث وتر صول، رابع وتر ري، بعدين عندنا الخامس لا والسادس فا. الأربع أوتار الأولى ما في إختلاف عليهن فا دو صول ري. الوتر الخامس ممكن يكون لا ثابت ولما عندنا ياه لا هذا سمي بالدوزان العربي الحديث أنا طبعًا ما بعرف ليش التسمية إنه دوزان عربي حديث اللي بيعرف طبعًا يكتب لي بالتعليقات. وطبعًا الأستاذ منير بشير كان يدوزنه دو اللي هو الإستعمال الأكثر رواج في الموسيقى العراقية. الوتر الأخير يستعمل فا بشكل عام عشان يكون جواب للفا اللي موجود عندنا وعشان يساعد على يعطي جو لترددات العود بعود فا فا، لكن فيكم كمان تنزلوه درجة لفوق أو درجة لتحت.
[4:34]طيب في الدوزان الفا فا إذا كان عندي عود خماسي، نفس الشرح تبع دوزان الدو دو في العود الخماسي إحنا بناخذ الخمس أوتار الأولى ثابتة. بنشيل هذا الوتر اللي موجود هون. وإذا عندنا عود سباعي هو بالظبط تمامًا نفس عود دو دو سباعي. هو من الدو للدو ومنضيف عليه وتر فا. يعني هون بنستنتج إحنا إنه العود السباعي هو حلقة الوصل ما بين دوزان الدو دو ودوزان الفا فا. واللي بيحب يكسب الناحيتين ممكن ياخذ عود سبع أوتار، وهيك ما بيستغني عن جمال الفا فا وعن جمال الدو دو. مهم جدًا نفهم إنه إختيار دوزان الأوتار يؤثر على شد الأوتار على وجه العود. إذا كان الدوزان فا فا، هذا بيشد الوجه أكثر وراح نسمع صوت براق أكثر. إذا كان دوزان دو دو بيكون الشد أخف على الوجه وممكن نسمع صوت مرتاح شوي أكثر أو يميل إلى إنه يكون غليظ شوي. طيب هيك خلصت الخرافية يا أستاذ؟ لا ما خلصتش. لأنه حتى مثلًا دوزان الدو دو ممكن يكون عندنا ثلاث طبقات لتعديل هذا الدوزان. وهون عندنا ثلاث مصطلحات جميلة جدًا الطبقة الكبيرة والطبقة المتوسطة والطبقة الصغيرة. الطبقة الكبيرة هي اللي ما تسمى بالدوزان العالمي اليوم. اللي فيها اللا 440 هرتز وباقي الأوتار تتلائم مع إيش احنا عندنا في دوزان اللا. وعشان تفهموها أكثر شوفوا هذا الشرح البسيط. في الدوزان العالمي أو الطبقة الكبيرة أنا هذا الوتر هو وتر دو وأنا بدوزنه دو وبسمعه دو. هذا الوتر صول وبدوزنه صول وبسمعه صول، هذا ري وبدوزنه ري وبسمعه ري. بينما في الطبقة المتوسطة أنا بنزل دوزان الأوتار نصف درجة لتحت. وهذا بيقول إنه شو صار عندي؟ وتر الدو في تعديل العود حسب الطبقة المتوسطة أنا مندوزنه نصف درجة لتحت، يعني بيصير سي. هذا وتر صول ولكن أنا مدوزنه نصف درجة لتحت يعني بيصير فا دييز. هذا وتر ري بيصير دو دييز، هذا وتر لا بيصير صول دييز وهكذا. يعني في الطبقة المتوسطة دوزان العود كله بينزل نصف درجة لتحت. فشد الأوتار على الوجه بيصير أخف، وهيك العود بيرتاح أكثر وبيعطينا أقل حدة وقت العزف. هل هذا منيح ولا مش منيح؟ لسة بنشرحها. طيب الطبقة الصغيرة؟ الطبقة الصغيرة أنا بنزل درجة كاملة، تخيلوا. هذا الدو بيصير عندي سي بيمول درجة كاملة لتحت. هذا الصول بيصير عندي فا، هذا الري بيصير عندي دو. هذا اللا بيصير عندي صول. بضلني أقول له إنه هذا اسمه دوزان دو دو ولكن منخفض نصف درجة أو دوزان دو دو ولكن منخفض درجة كاملة. طيب هذه الأمور ليش موجودة؟ ليش ما نوحد الدوزان ويصير عندنا كلنا حسب الدوزان العالمي؟ اليوم أصبح الدوزان العالمي رائج جدًا لأنه صرنا نعزف مع عازفين آخرين من جميع أنحاء العالم، صرنا نعزف كمان مع عازفين آخرين اللي دوزانهم مختلف. فتوحيد الدوزان صار أمر لا بد منه. الطبقة الصغيرة والطبقة الوسطى كانت تستعمل في الموسيقى العربية في فترة مضت لعدة أسباب. السبب الأول إنه مثلًا إذا كان في ملحن ولحن مقطوعة موسيقية ولما سمعها حس إنه الأوتار مشدودة شوي. حس إنه في تنشن في العزف، حس إنه في بريق وهو ما بدو ياه. بدل ما يطلب من العازفين إنه يغيروا درجة المقام، لا يطلب من الكل مثلًا إنه ينزلوا دوزان الآلات نصف درجة أو ينزلوا دوزان الآلات درجة كاملة. وهيك بترتاح الآلات وبقدر ياخذ الصبغة اللي هو حابب تطلع من المقطوعة الموسيقية. وبنفس الوقت العازفين بحافظوا على موقع الأصابع على آلتهم لأنه اللي تغير هو فقط شد الوتر ما تغير المقام على الآلة نفسها. السبب الثاني بيتعلق بصوت المطرب أو المطربة والأغنية اللي عم يغنيها أو بتغنيها. وهون في قصة جميلة قصيرة راح أحكي لكم ياها صارت مع الأستاذ محمد الموجي والأستاذ محمد عبد الوهاب والست أم كلثوم. هل القصة بتشرح السبب الثاني بوضوح. بيقول الأستاذ محمد الموجي وهذا التسجيل موجود على اليوتيوب إنه لما كان يلحن إسال روحك للست أم كلثوم كانوا منزلين الطبقة درجة كاملة، يعني كان التعديل على الطبقة الصغيرة. يعني هيك هيك الآلات كانت مرخية أوتارها. ولكن في الكوبليه اللي فيه بتغني على الطبقات العالية الست أم كلثوم، إسال روحك إسال قلبك. بيقول الأستاذ محمد الموجي إنه في البروفات كان تمام لأنه الست كانت يعني تغني بيت آه بيت لأ عشان تحافظ على صوتها. ولكن وقت الحفلة حس إنه الست أم كلثوم عم تستصعب توصل للنغمات العالية وعم بتغنيها بالعافية. وما صدق وينتى خلصت الأغنية وروح ونام وهو يعني تعبان نفسيًا. ثاني يوم الصبح بتصل فيه الأستاذ محمد عبد الوهاب. بيقول له يا راجل، حدا بيلحن للست أم كلثوم اليوم كأنه عم بيلحلها في الأربعينيات؟ فبيقول له يعني إيش لازم أعمل؟ قال له نزل كمان نصف درجة. قال له إحنا منزلينها درجة كاملة ليش أنزل كمان نصف درجة؟ بصير صوت الآلات مهلهل ما بيعود في طعمة للآلة. قال له ما فدهيا يعني لسة الآلات هي آخر همنا إحنا بدنا الأغنية وصوت الست هن اللي يتألقوا. وطبعًا نزلوا الدوزان وعملوا عليه بروفات وبعد بشهر كانت مرتاحة جدًا الست أم كلثوم في غناء الأغنية. بعدين اتصل فيه الأستاذ محمد عبد الوهاب كمان مرة، قال له آه يا سيدي غنينا. يعني هذا الحرص من ملحن عبقري على أغنية عبقرية لملحن عبقري آخر كان بيستاهل إنه ناخذ نصف دقيقة نحكي عنه خلال هذا الدرس. فهذا سبب مهم جدًا إنه إحنا كمان بنراعي طبقات المطرب وهو يغني الأغنية. في سبب ثالث مهم جدًا ليش إحنا بنخفض الدوزان إنه في أعواد قديمة جدًا اللي عمرها 70 و 80 و 90 و 100 سنة وجهها ما بيتحمل شد. فإحنا منعدل عادة إما على الطبقة المتوسطة أو على الطبقة الصغيرة. طيب شو الصح وشو الغلط من كل اللي حكيته أنا اليوم؟ خلينا نتفق أولًا إنه ما في صح مطلق وما في خطأ مطلق. السؤال إحنا شو بدنا؟ لسة بشرح لكم. إذا أنت شخص بيحب يرافق نفسه على العود وهو عم يغني أنا بفكر إنه دوزان الدو دو ممكن يكون ملائم جدًا. لأنه الطبقة الصوتية لعود دوزان دو دو تناسب كثير الطبقة الصوتية لأي شخص بدو يغني على الطبقات العادية. وساعتها ممكن ندوزن دو دو وتخفض الدرجة نصف درجة أو درجة حسب ما يلائم صوتك. كمان دوزان الدو دو يسمح لصوت المطرب إنه يرافق نفسه من غير ما صوت العود يتغلب على صوته. فبيعطي صوت المطرب إنه يتألق وبيكون هو بالخلفية. أنا شخصيًا دوزان عودي دوزان دو دو وأفضل هذا الدوزان لأنه بيعطيني الإمكانيات اللي أنا بحب تطلع مني وأنا أعزف. كمان أنا بفضل إنه لما أشوف وتر الدو وأعزف عليه أسمع دو ولما أدوزنه يطلع معي دو، هيك أنا بحافظ على سمع ثابت كل الوقت. ما بهري سمعي مرة بسمعه دو، مرة بسمعه دو دييز، مرة بسمعه سي بيكار، مرة بسمعه سي بيمول. هذا في مرحلة معينة راح يشتت السمع ولكن هذا أمر شخصي. الآن إذا أنت عازف منفرد، فيك تدوزن عودك فا فا أو دو دو. هذا بيتعلق شو الأسلوب اللي أنت بتحب تعزفه، شو الأسلوب اللي بتحب تقلده أحيانًا مثلًا أنا بحب أقلد الأسلوب تبع الأستاذ منير بشير. الأستاذ منير بشير في أغلب أوقاته كان يعزف على دوزان فا فا فإذا أنا بدي أقلد الأسلوب وأطلع نفس نبرة العود وأستعمل نفس تقنيات الريشة بفضل إني أروح على دوزان فا فا. إذا أنا مثلًا بحب الأسلوب تبع الأستاذ سيمون شاهين في التقاسيم التقليدية الشرقية العربية القديمة فأفكر إنه دوزان الدو دو راح يلائمني أكثر. هون أنت كعازف منفرد لك كامل الحرية إنه تختار هذا أو تختار هذا. طيب بخصوص إختيار الأوتار أنا بفكر إنه ست أوتار هو بيجي بالنص ما بين الخمس أوتار وما بين السبع أوتار. يعني بيعطينا شوي إمكانيات أكثر من الخمس أوتار بنفس الوقت ما بيخلي العازف يتعب ويجتهد أكثر عشان يتعود على دوزان السبع أوتار اللي هو مش كثير رائج اليوم. وبحب أقول لكم كمان من تجربة عندي في أكاديمية عود لاين دوزان المنهج ودوزان دو دو. وأنا بعلم على عودي اللي هو عود دو دو ولكن عندي عشرات الطلاب اللي دوزانها فا فا وفي طلاب بتعدل الدوزان حسب الطبقة المتوسطة والطبقة الصغيرة وهذا لا يمنع إنه هي الطلاب عم تتقدم وبتستفيد من خلال الدورات والمنهج والبث المباشر الموجود لأنه المنطق واحد إذا فهمنا منطق العزف بيعودش كثير يفرق أي دوزان احنا عم نستعمله.
