[0:00]Hello and I welcome you to Vigyan Recharge. Baat hai san 1993 ki. Raat ke 3:56 par Maharashtra mein ek bhukamp aata hai. Jiska asar 500 kilometer dur ek saal baad tab jaakar dikhta hai, jab ek pure shahar ke log apni dukan, apna ghar, kaam dhandha sab kuch chhod chhadkar raton raat shahar khali karne lag jaate hain. Police ho gayi, paramilitary ho gayi, ye sadkon par aur raston par nakabandi karke unhe rokne ki koshish karti hain. Toh log jungle aur kheton ke raste bhag nikalte hain. Koi bhi us shahar mein rehna nahi chahta tha. Aur ye Bharat ke itihas mein vibhajan ke baad logon ke dwara kiya gaya sabse bada palayan tha. Lekin kya aap jante ho ki ye log kisse darkar bhag rahe the? Toh woh the chuhe. Ab zara Japan ke bare mein suno. 1984 Japan ke ek yoga teacher ke chelon ne puri dharti ki aadhi abadi ko mitane ka lagbhag bandobast kar hi diya tha. Ye toh shukr hai ki unka tukka galat ho gaya. Nahi toh shayad aap aur main aaj yahan baithe bhi na hote. Ab in ghatnaon mein ek cheez common hai, woh hai bimar karne wale virus aur bacteria. Ab Japan mein kya hua tha, Maharashtra mein kya hua tha aur aaj hum kis vinash ki taraf ja rahe hain? In sabhi sawalon ka jawab hai ye video. Chalo, zara itihas ki qabr khodte hain. Saal tha 1918 Alaska ke Brevig Mission naam ke gaon mein 80 log rehte the. Jin mein se 72 log anjani bimari se mare gaye. Phir Alaska ki sarkar ne lashon ko thikane lagane ke liye local gold miners ko ye kaam saunp diya. Ab in sone ke khoj kartaon ne barf ko kaata aur 72 lashon ke liye qabr khod kar unhe barf ke niche dafna diya. Lekin kya aapko pata hai 31 saal baad ye lashen wapas khodni pad gayin. Lekin kyun? Aaiye ab ye batata hoon. 1949 mein John Hultin naam ka 25 saal ka ek ladka America ki Iowa University mein padhta tha. Ab ek lecture ke dauran virologist se usne ye suna ke Alaska mein 1918 mein jis bimari ki wajah se 72 log mare gaye the, aaj hum us bimari ka pata laga sakte hain agar koi wahan jaakar un lashon ko khod kar nikal le toh. Toh bhaiya Hultin babu Alaska gaya, bhai ne izazat lekar qabr khod mari, ek lash nikali, uska fefda kholkar usse sample liya, use kharab hone se bachane ke liye ek solution mein duboya, seal kiya, jahaz pakda aur pehli flight se wapas. Ab ye bhai sahab apni university mein aane ke baad lab mein is virus ko dubara zinda karne ki matlab dubara se active karne ki koshish karte hain. Lekin kamyabi nahi milti. Aur iske piche karan tha ke bhaiya hamare paas us zamane mein aaj ki jitni advance technology nahi thi. Ab Hultin ho gaye 72 saal ke aur bhai ne apne sapne ko pura karne ke liye pure 47 saal ka intezar kiya aur inhein mauka mil gaya. Ab kahani mein entry hoti hai American military ke liye kaam kar rahe doctor Jeffrey Tubenburger ya Burger pata nahi aisa hi kuch naam tha. Ab in bhai sahab ne Alaska wali bimari par ek research paper publish kar diya aur usi research paper mein inhone ye bhi likha ki research ko aage badhane ke liye inhein un lashon se aur sample chahiye. Ab Hultin bhai ne 72 saal ki umar mein isko padh liya. Aur Jeffrey ko patra likhkar ye kaha ke woh sample wahan se main lekar aaunga, kyunki main pehle bhi wahan ja chuka hoon. Mujhe pata hai ki woh lashen kahan milengi. Ab bhaiya Hultin babu apne aste baste pack karke jahaz pakad kar seedha Alaska utar jaate hain. Dobara logon ke paas gaye, dobara izazat mangi aur qabr khod kar ek hatti katti mahila ka fefda khol diya. Jise aaj hum Lucy ke naam se jante hain. Phir bhaiya inke fefde ke sample ko ek solution mein dala gaya taaki woh kharab na ho. Use seal kiya, flight pakdi aur wapas America. Ab ye sample pahuncha Jeffrey ke paas. San 2005 mein Jeffrey ne un viruses ko dobara active kar liya. Ab un viruses ka kya hua? Vaigyanik dobara virus ko zinda kyun karte hain ya active kyun karte hain, virus kaise banaye jaate hain, kaise kaam karte hain aur vaccine kaise kaam karti hai, ye kaise banai jaati hai ye sab aapko isi video mein aage pata chal jayega. Abhi zara aap Maharashtra ki ghatna ke bare mein suno taaki aapko is topic se judi hui thodi si aur clarity mil jaye. 30 September 1993, raat ke 3:56 par Maharashtra ke Latur mein 6.2 magnitude ka ek bhukamp aata hai. 10 hazar se zyada log mare jaate hain aur 52 gaon tabah ho jaate hain. Log raton raat gaon chhod kar bhagne lagte hain. Ab is baat ko dhyaan se sunna, maine kaha gaon chhod kar, maine ye nahi kaha gaon ko khali karke. In dono baton mein bahut zyada fark hai. Ab kyunki ye log gaon chhod kar gaye the aur ye kisan the toh inke gharon mein anaj ke bore bhare hue the. Toh bhaiya ab jo hone ja raha hai woh inhi gehun ke boro ki wajah se shuru hua tha. Yahi woh pehla point tha jahan se domino effect create hua. Suniye dhyaan se. Dekho in gehun ko khane ke liye aa gaye chuhe, jin ke andar maujood tha plague ka bacteria. Dekho jab humne jungle kaatne shuru kare toh ecological disturbance ne jungli chuho ko gaon aur shahar ke chuho se mila diya. Jiski wajah se plague ka bacteria jungli chuho se gaon shahar mein rehne wale chuho mein pahunch gaya. Ab ye kaun sa plague tha? Toh ye tha bubonic plague. Kaise failta hai? Toh ye failta tha direct contact se. Ab is baat ko yaad rakhna, ye direct contact wali baat aage aapke bahut kaam aayegi. Ab iske baad 5 August 1994 ko Maharashtra ke Beed district mein Malma gaon se khabar nikal kar aati hai ki achanak se gaon mein bahut sare chuhe mar gaye hain. Ab prashasan ko khabar lagte hi prashasan ne WHO ke kaan khadka diye. Bhai sahab August khatm hote hote jagah jagah plague ke cases report hone lage. Aspatal bharne lage, ilaaj milna mushkil ho gaya aur sarkar bilkul laachar. Kyun? Ab ye suno. Maharashtra ki government ne apni plague surveillance unit ko 1987 mein hi band kar diya tha, jiska natija Haffkine Institute mein anti-plague ki vaccine. Ye banni hi band ho gayi. Lekin phir bhi zaddozehad karkar is bimari ko wahan par control kar liya gaya.
[5:31]21 September 1994 ko subah subah Surat ke Deputy Commissioner of Health ko ek letter milta hai. Ya khabar milti hai ya report milti hai, matlab in teeno mein se kuch tha mereko yaad nahi aa raha. Aur khabar mein ye tha ki ek marij plague ki wajah se mar gaya. Lekin bubonic plague ki wajah se nahi jo Maharashtra mein tha, balki ye maut hui thi pneumonic plague ki wajah se aur ye bahut badi baat thi. Surat ke medical officers turant alert mode mein aa gaye kyunki pneumonic plague khatre ki ghanti thi aur aisa kyun ye aapko abhi samjh mein aa jayega. Phir usi din 10 aur mauthe ho gayin aur 50 log isi lakshan se aspatal mein aur bharti ho gaye. Ab dhyaan se sunna rat bhar mein ye khabar pure shahar mein fail gayi aur usi din puri raat medical store khule aur kuch hi ghanton mein pure Surat se Tetracelin naam ki dava khatm ho gayi. Ye wahi dava hai jo plague ki roktham mein istemal hoti hai. Ab jaise hi ye khabar bahar nikal kar aati hai ki bhaiya Surat mein dava nahi hai toh local doctors, staff, nursing home ye khali ho gaye. Doctors shahar chhod kar bhagne lage. Private aspatalon mein doctor nahi the. Ab iska asar ye hua ki jab logon ko ye pata laga ki doctor shahar chhod kar bhag rahe hain, toh bhaiya Surat mein kaam karne wale dusre rajyon ke mazdoor train ke upar buson ke upar jise gadi mili woh gadi mein jise cycle mili woh cycle par aur jise kuch na mila woh paidal hi shahar chhod kar bhagne laga. Agale do din ke andar 3 lakh log Surat shahar ko chhod kar bhag gaye. Ye Bharat ke vibhajan ke baad yani ke partition ke baad logon ka sabse bada exodus tha. Azad Bharat ke itihas mein isse bada palayan kabhi nahi hua. Iske baad police aur paramilitary ne raste ki nakabandi karke logon ko bahar jaane se rokne ki koshish kari. Jiske jawab mein log kheton aur junglon ke raste se bhag nikle. Ab aata hai teesra din yani ke 23 September. Ye jo ghatnakram maine aapko bataya ye do din ke andar hua tha. Ab teesre din school, colleges, cinema hall, park, bank, industrial unit, office, diamond cutting hubs ye sab ke sab band ho gaye. Aur ye toh kuch bhi nahi jaise hi dusre rajyon ko ye khabar lagi unhone apne border seal kar diye. Jo log Surat se bhag kar apne rajya mein gaye unhein ghusne nahi diya ja raha tha aur jo jaise taise karke ghus bhi gaye. Log unke sath aisa vyavhar kar rahe the jaise ki woh unke dushman ho. Ye apne desh ke apne hi logon ke sath ho raha tha. Iske baad international biradari ne Bharat se aane wali flight ko cancel karna shuru kar diya aur kuch deshon ne toh Bharat ke export par hi ban laga diya. Ek anuman ke mutabik in do dinon ke andar Bharat ko 10,000 crore se zyada ka nuksan hua tha. Ab dekho aap ye soch rahe honge aisa kya hi ho gaya tha jo itna aatank fail gaya aur aakhir ye ghatna kis tarike se Maharashtra wali ghatna se judi hui hai? Bhukamp aaya, chuho ko anaj mila, jungli chuho se bacteria shahar aur gaon ke chuho mein pahunch gaya. Ab chuhe mare unpe makkhiyan baithi, pissu baithe, unhone ye bimari insano mein pahuncha di. Iske baad Maharashtra ke log Surat pahunche aur wahan par ye bubonic plague ka bacteria pneumonic plague mein badal gaya. Dekho bhaiya bubonic plague pneumonic plague mein badal sakta hai agar use sahi paristhitiyan mil jayein toh. Aur us samay Surat mein bilkul sahi paristhitiyan thi. Aur pneumonic plague kyun itni khatarnak bimari hai? Uska karan hai, ye hawa se failta hai. Dhyaan se suniyega, ye us hawa se failta hai jis hawa mein aap aur main is samay sans le rahe hain. Ab zara aap ye socho ki dava nahi hai, doctor nahi hai aur hawa mein bimari ghum rahi hai aur jo iski chapet mein aaya uska upar ka ticket confirm ho gaya. Ab aise mein log bhage na toh kya karein? Dekho jud gaye na sare taar.
[8:56]2014 mein NASA ke scientist ne 32 hazar saal purane ek mammoth ke andar maujud frozen bacteria ko wapas lab mein zinda kar liya. Aur 2022 mein France ki Marseille University se Jean Michel Clavery ne permafrost se 13 naye virus nikal kar zinda kar liye hain ya active kar liye hain. Aakhir ye log aisa kyun kar rahe hain? Kyunki bhai sahab jab ye naye virus apne aap bahar aayen toh duniya inse ladne ke liye taiyar rahe. Bas aap ye samjh lo isi cheez ki taiyari chal rahi hai kyunki bhaiya hamla toh hone wala hai. Ab humein iske bare mein kaise pata? Ab zara ye suno. 2016 mein Siberia ki garmi ne 70 saal ka record tod diya. Wahan par maujud dharti ka freezer yani ke permafrost pigla aur uske pighalne par barf ke andar se ek mare hue hiran ki lash bahar aa gayi. Ab is hiran ke andar anthrax ka bacteria tha. Ab woh hawa mein fail gaya. Iske baad 2350 hiran mare, 115 log hospital mein bharti karne pade aur ek 11 saal ke bacche ki maut ho gayi. Kyun? Kyunki barf ke andar hazaron saal se soye hue bacteria achanak se jaag gaye. Ab global warming ki wajah se jahan jahan par permafrost pighal raha hai, wahan se naye naye bacteria ya viruses ke bahar aane ka khatra har din ke sath badhta ja raha hai. Bhai sahab duniya bhar ke viksit desh pagal nahi hain jo barf khod khod kar in microorganisms ko nikal kar inki dava banane ke piche lage hue hain. Ab dekho aap mein se kuch log ye bhi soch rahe honge ki bhaiya aakhir hum permafrost ke nazdeek jayein hi kyun? Matlab wahan pe nakabandi kar do, logon ko jaane se rok do. Na log jayenge, na virus layenge, na woh failega, virus latak jayega, apan bach jayenge. Itna aasan samadhan toh hai. Ab dekho agar aap bhi yehi soch rahe ho toh bhai sahab bilkul hi alag level par soch rahe ho. Aur aisa main kyun keh raha hoon? Iske liye wapas chalna padega humein Hultin babu ki kahani par. Wohi jo qabr khod kar aaye the. Toh dekho aapko yaad hoga ki Jeffrey ne Hultin ke dwara diye gaye sample se virus ko dobara active kar liya tha. Lekin maine aapko ye nahi bataya ke jab Jeffrey ne dobara is virus ki jaanch padtal kari toh use kya pata laga? Bhai sahab ye virus janwaron se insano mein transfer hua tha, yani ke isne pakshiyon se insano mein jump mara. Uske baad ye mutate hua aur yaad karo Covid bhi kuch kuch aisa hi chamkadon se nikla tha. Abhi jo maine kaha is baat ka matlab samjhiye. Ye viruses permafrost se hi nahi balki janwaron se bhi insano mein pahunch sakte hain. Aur ye itni chinta ki baat kyun hai? Zara ye samjho. Aapko pata hoga ki pakshi ek desh se dusre desh ke andar jaate hain. Ya toh thandi jagah se dusri thandi jagah par jaate hain ya thandi jagah se garam sthan par jaate hain. Agar ye virus permafrost se nikal kar in pakshiyon mein chala gaya aur ye pakshi use kisi desh ke andar lekar ghus gaye aur wahan se ye insano mein pahunch gaya, toh uske baad ye aisi mahamari layega jiske samne aapko Covid bhi baccha nazar aayega. Virus ko hamare andar jane ke liye humein virus tak jane ki zarurat nahi, virus khud hi hamare paas aa jayega. Aur isiliye bahut zaruri hai ki hum virus ke kaam karne ke tarike ko samjhein, taaki wakt aane par virus insano ki Lanka ka danka na baja paye. Zara sa virus aakhir hamare sharir mein itna aatank machata kaise hai? Matlab sharir ko bachane wali immunity ye kahan baith kar patte khel rahi hai? Aur virus kaise inke hote hue sharir mein khula ghum raha hai? Aaiye aapko sab kuch bilkul saral shabdon mein samjhata hoon. Dekho virus ek seal kari hui chitti ki tarah hota hai aur is chitti ke bahar ek chabi latki hai jise hum kehte hain spike protein. Ab is chabi ke upar hi ek address likha hai aur ye address us taale ka hai jahan par ye chabi fit hogi. Ab dekho cell ke paas receptor hote hain. Jaise taale ke andar chabi dalne ki jagah hoti hai, aise hi cell ke upar receptor hote hain. Ab dekho yahan par ek baat toh clear ho gayi. Ki agar kisi virus roopi chitti ke upar fefdon ke cell ka address likha hua hai toh woh virus sirf fefdon ke hi cell ka taala khol sakta hai. Matlab fefdon ko infect karega. Ab agla sawal ye aata hai ki is chitti mein aakhir likha kya hai? Toh dekho is chitti ke andar na kaam dham ki baat hai. Aap ise aise mano ke jaise plane hijack karne ke baad aatankwadi pilot ko ek tarah se aadesh deta hai. Ki beta yahan se left le le, phir right le le aur yahan se tere ko plane yahan land karna hai. Theek bilkul waise hi virus cell se bolta hai. Ki beta bhul ja tu kaun hai, kya kaam karta hai, ab se ye tera naya kaam hai. Ab agla sawal aata hai ki cell ki buddhi aakhir bhrasht hoti kaise hai? Kyun woh sari baatein manta hai virus ki? Dekho cell ke andar maujood hai ribosome naam ka ek robot. Iska kaam hai bina soche samjhe sirf aur sirf aadesh manna. Ab jaise hi virus ko sahi cell milta hai, virus apni chabi se cell ka taala khol kar andar ghus jata hai. Aur ab virus apni chitti mein likhe hue code ko yani RNA ko ribosome nami robot ke andar dal deta hai. Yaani robot ko kaam karne ki nayi instructions de deta hai. Ab ye cell naye aadesh ke hisab se kaam karne lagta hai, jaise virus ki copies banana. Aur bas infection shuru. Ab aap zara us pattebaaz immunity ki bhi sun lo jo baith kar kahin patte khel rahi thi jise pata hi na hai ke sharir mein kya ho raha hai. Lekin usse pehle zara cell ka mahima mundan karte hain. Ha mundan nahi karenge mundan hi karenge. Dekho aap virus ke samne cell ko aise samjho jaise ki Sholey ke Gabbar ke samne bina hathon wala Thakur. Ab Sholey mein toh dikha diya ki Thakur ne Gabbar ko dhar liya lekin asliyat mein bhaiya agar hath na ho toh pitai toh Thakur ki tai thi. Ab kyunki Thakur ke hath nahi hai toh woh lad nahi sakta aur yehi bilkul cell ke sath hota hai. Uske paas virus se ladne ke liye kuch bhi nahi hai. Toh bhaiya ab cell kya kare? Toh dekho mana ke cell ke paas hath nahi hai lekin zaban toh hai. Matlab Thakur ke hath hi toh nahi the, uske paas zaban toh thi. Yani ke agar Thakur shor macha sakta hai toh bhaiya cell bhi shor macha sakta hai. Ab ye shor kaise machata hai ye suno. Ab jaise hi kisi cell par virus ka hamla hota hai toh woh interferon naam ka chemical chhod kar baki cells ko savdhan kar deta hai. Ki bhaiya dakuon ka hamla ho gaya yani virus ghusa hai, savdhan ho jao. Ab yahan par do cheeze ho sakti hain. Agar virus gali ka gunda type tha yani ke normal khansi zukham wala tab toh cell par jaise hi hamla hua woh gala phad kar sabko aagah kar dega. Matlab baki sab savdhan ho jayenge, hamle se bach jayenge. Aur iske baad virus ki fielding set karke usko nipta diya jayega. Lekin agar virus trained military agent ki tarah hua jaise Ranveer Singh dhurandhar mein tha ya Covid ka virus, ye toh cell ko shor machane ka mauka hi na deta. Kaise? Ab zara ye samjho. Dekho cell ke andar sensors lage hote hain, jaise hamare gharon mein CCTV, smoke alarm, fire alarm, waise hi cell ke andar bhi sensors hote hain. Ab jaise hi virus cell ke andar ghusta hai, alert bajta hai. Ab agar cell ne shor macha diya bakiyon ko alert kar diya toh infection ruk jayega. Lekin agar virus Bahubali type ka hua toh sabse pehle woh in sensors, in CCTV ko hi thikane lagayega. Aur agar virus aisa karne mein kamyab ho jata hai toh cell ke dwara bheje ja rahe chetavani ke signal bahar nahi jayenge, rok diye jayenge. Bilkul theek waise jaise ye Madam bahar phone se chetavani bhej ne ja rahi thi lekin taar kaat diya gaya. Aise hi cell virus ke samne laachar ho jata hai aur bilkul yehi same kaam Covid ne hamare sharir ke cells ke sath kiya. Matlab body ko pata hi nahi laga ki virus fielding set kar chuka hai. Aur phir infection ho gaya. Ab agar cell chetavani dene mein kamyab na ho paye aur virus usko hijack kar le toh iske baad cell aakhri hathiyar ka istemal karta hai. Dekho har cell ke bahar ek ID card hai, yaani ke cell ki pehchan ka data jise hum kehte hain MHC molecule. Isi ID card ki wajah se woh cell ye sabit kar pata hai ki bhaiya main tumhari apni hi body ka cell hoon, matlab apni hi team se hoon, main bahar se nahi aaya hoon. Ab jaise hi cell ke andar virus ki copies banna shuru kar deti hain toh cell apne ID card ke sath virus ke un chhote chhote tukdon ko bhi apni body ke bahar display karta hai. Jise kaha jata hai antigen. Matlab mano ki cell ye keh raha ho ki bhaiya mujhe dekho, main infected ho chuka hoon. Mere andar se ye octopus jaisi cheeze nikal rahi hain. Ab jaise ek desh ki raksha ke liye military hoti hai, special operations ke liye special forces hoti hain. Ab bilkul aise hi hamare sharir ki raksha ke liye immunity naam ki military ke paas special forces hoti hain, ya yun kahun ki special soldiers hote hain. Jine kaha jata hai T-cells aur B-cells. Ab inmein se T-cell har cell ka ID card check karta hai. Ab is checking ke dauran teen cheeze ho sakti hain. Agar ID card bilkul sahi hai toh bina rok tok ke cell pure sharir mein aaram se ghum sakta hai. Lekin agar ID card match nahi hua toh T-cells us cell ko nipta denge, bilkul khatm kar denge. Matlab ye shanti se baat cheet karne mein vishwas nahi rakhte, ye seedha maar kaat machate hain. Ab teesra case ye hoga ki agar ID match toh ho gayi. Lekin virus ke ye jo octopus jaise hath pair bahar dikh rahe the, ID card ke sath matlab jise antigen kehte hain jiske bare mein abhi maine aapko upar bataya tha. Tab T-cell is bimar cell ko dhar lenge ki beta tu zara side mein aa ja, tere se baat karni hai. Matlab teri body se ye jo octopus jaisi cheeze nikal rahi hai iski jaanch padtal hogi. Zara idhar ko khopche mein ko aa ja. Ab in T-cells ke paas ek diary hoti hai jise kehte hain immunological memory. Ab is diary mein har us virus ki pehchan hoti hai jo kabhi sharir mein aaya aur use sharir ne nipta diya. Ab T-cell ye dekhega ki bhaiya cell se nikalne wale ye jo octopus jaise hath hain, ye kya kisi purane virus se match ho rahe hain? Agar ho rahe hain toh is cell ko virus ke sath maar diya jayega, bilkul khatm kar denge. Matlab ye shanti se baat cheet karne mein vishwas nahi rakhte, ye seedha maar kaat machayega. Ab zara B-cell ke bare mein bhi sun lo. Dekho B-cell thoda alag kism ka hai. Ye ek chemical weapon banata hai jise kehte hain antibody. Ab ye antibody sharir mein ghumti hai aur virus ko cell tak pahunchnese rokti hai. Matlab raste mein hi pakad leti hai ki beta kahan ghum raha hai? Matlab aise hi muh utha kar bina invitation kisi ki barat mein ghus jayega. Zara idhar ko aa ja. Ab iske baad virus ke upar jo chabi hai yaani ke jise spike protein kehte hain, antibody usse chipak jayegi aur us chabi ke lock ko kharab kar degi. Yaani ke ab woh chabi kisi bhi taale mein ghus nahi payegi. Ab iske baad ye virus aise hi kamon ki tarah pure sharir mein na ghum sake, iske liye antibody gala phad phad ke macrophages yani ke sharir ki safai karne wale jo aise matlab virus jaise dushmano ko kha kar nipta sake. Inko bulawa bhej deti hai ki bhaiya aao dushman mil gaya, maaro ise, niptao isko aur iske baad virus ka kaam tamam. Lekin agar virus ke ye octopus jaise hath diary ke data se match nahi hue. Toh phir cell ko shak ke aadhar par chhod diya jata hai. Ab yehi woh karan hai jiski wajah se normal viral infection 5 se 7 din ke andar theek ho jata hai. Kyunki uska data pehle se hi hamare sharir mein maujood hai. Lekin Covid ki jankari hamare sharir ko nahi thi. Isiliye hamare sharir ki immunity use pehchan nahi payi aur woh immunity se bach kar nikal gaya aur phir baad mein fefdon ke fafde laga diye. Aur yehi woh karan hai jiski wajah se itne sare logon ko oxygen ki zarurat pad gayi, yani unhein ventilator par dalna pada. Aur immunity ke isi tabadtod hamle ko kaha jata hai cytokine storm, jisko rokne ke liye dawaiyan deni padti hain. Ab dawai ki baat chal hi rahi hai toh zara vaccine ki bhi sun lo. Toh dekho vaccine teen tarike se banai jaati hai. Pehla hai virus ke code ko disable karke. Aapko yaad hoga ki maine aapko ye bataya tha ki virus ek chabi wali chitti hai, us chitti ke andar ek code likha hai. Ab vaigyanik isi code ko disable kar dete hain. Ab isse ye hoga ki virus sharir ke andar toh jayega, cell ke andar ghusega, lekin ribosome mein apna code nahi dal payega. Yaani ke cell ke function ko disturb nahi kar payega. Ab isse hamari immunity ko is virus ki pehchan ho jayegi aur woh apni immunological diary mein is virus ki pehchan ko create kar legi. Taaki jab asli hamla ho toh hamari immunity is virus ko maar sake. Iske alawa dusra tarika hai kamzor virus ko sharir mein dalna. Ab kamzor virus hai toh zyada kuch kar nahi pata, sharir ki immunity use bahut hi jaldi nipta deti hai. Lekin chahe kamzor ho ya tagda, pehchan toh same rahegi. Toh iski pehchan jo hai diary mein chhap jaati hai aur jab isi virus ka tagda roop aata hai tab immunity use bhi thikane laga deti hai. Ab teesra tarika hai vaccine banane ka jisme hum virus roopi chitti ke andar koi code dalte hi na hain, bas chabi dalte hain. Ab kyunki ismein sirf chabi hai koi code hai hi nahi toh jaise hi ye cell ke paas jata hai, cell se iski pehchan ujagar ho jati hai. Phir se iski jo photocopy hai ya iski jo pehchan hai woh diary mein chhap jati hai, yaani immunity iske wanted ka poster banakar apni diary mein save kar leti hai. Ab iske baad jaise hi asli virus mauj martta hua andar gaya use pata hi na hai ki body uski fielding pehle se hi set karke baithi hai. Ab chahe woh T-cell ke hath lage ya B-cell ke hath lage, mara toh woh dono hi case mein jayega. Ab 2014 mein ek naye tarike ki vaccine banane par bhi kamyabi hasil kar li gayi jiska istemal humne Covid ki vaccine banane mein kiya tha. Abhi jo maine aapko teen tarike bataye hain ye itne aasan nahi hain. Yani vaccine banane ke liye aapko virus ka structure samjhna padta hai. Uske protein ki jankari aapko chahiye. Jab aap usko samjh paoge tabhi aap usko replicate kar paoge. Isiliye vaigyanikon ne ek chautha tarika bhi dhund ke nikala. Unhone ye socha ki humein kya zarurat padhi hai ki hum sharir ke bahar jo hai virus taiyar kare. Matlab vaccine ke liye taiyar kare. Ye kaam toh cell bhi kar sakta hai. Aapko yaad hoga maine bataya tha ki cell virus ki copies banane lag jata hai. Toh kyun na hum aisi copies cell se hi banwa lein jo sharir mein infection kare hi na, lekin wanted ki photo zarur pahunch jaye andar. Ab ye idea toh bada zabardast tha lekin samasya thi aakhir ye code cell tak jayega kaise? Kyunki hamare sharir mein maujood enzymes is RNA ko pakad kar turant hi tod denge. Ki beta kahan, muh utha kar kahan ja rahe ho. Ab inhi enzymes se bachane ke liye vaigyanikon ne is code ko yaani ke RNA ko lipid nanoparticles ke andar band kiya aur phir sharir ke andar bhej diya. Ab ye lipid nanoparticles cell se jaakar chipak jayega, code andar chala jayega jisse bahar niklega virus ka poster, body usko save kar legi, apni taiyari puri kar legi. Agli baar jab asli virus aayega, pehchana jayega, woh nipta diya jayega aur yehi hai latest vaccine technology. Lekin vigyan do dhari talwar hota hai. Ye kin hathon mein hai aur ise istemal karne wale ka irada kya hai, ye bahut mayne rakhta hai. Ab zara aap ye socho ki agar ye virus leak ho gaye ya jan bujhkar leak kar diye gaye jaise Covid ke virus ke sath hua tha. Agar aise hi koi dusra virus khula chhoot jaye ya kisi aatankwadi sangathan ke hath ye virus lag jaye aur aise vaise aatankwadi nahi, bahut padhe likhe aatankwadiyon ki baat kar raha hoon. Kyunki Japan ke Tokyo mein yehi hua tha. Ab suno aap Japan ka kissa aur isse bahut dhyaan se sunna. Ye kissa aapko batayega ki jab padhe likhe log radical hote hain matlab radical bante hain tab woh duniya mein jo tabahi la sakte hain uske bare mein hum kalpana bhi nahi kar sakte. 1955 mein Japan mein ek Shoko naam ka andha baccha paida hota hai. Garib parivar se tha, andhe bacchon ke school mein padhai likhai usne puri kari.
[23:54]Ab bada hokar woh bhai ban gaya acupuncturist. Woh hote na jo sharir mein alag alag point daba kar ilaaj karte hain. Wohi. Ab is bhai ne 1980 mein Buddhist kitabe padhni shuru kari. Aur dheere dheere duniya ke khatm hone ki bhavishyavani karni shuru kar di. Iske baad bhai ne khud ko Jesus ka dusra avatar aur Buddha ke baad insani roop mein pehla mahavatar ghoshit kar diya.
[24:32]Matlab kul mila kar doctor sahab ab Babaji ban gaye aur phir 1987 mein bhai sahab ne Aum Shinrikyo naam ki sanstha banai. Ab ye sanstha tabadtod raftaar mein grow karne lagi. Is mein aise aise log judne lage jaise Bharat ke IITians, woh bhi top IITians aur top ke medical colleges ke student ya medical professionals toh the hi. Bhai sahab Russia ke andar toh is sanstha ke 30,000 se zyada follower ban gaye. Ab 1988 mein Babaji ke khilaf ek case ho gaya. Aur jis vakil ne ye case kiya tha, Baba ke bhakton ne us vakil ki biwi aur uske ek saal ke bacche ko kidnap karke maar diya. Iske baad 1990 mein Babaji ne election lada aur 25 candidate utaar diye aur ye sab ke sab jeet gaye? Nahi, har gaye. Matlab Babaji ka political career khatm, public ne inhein nakar diya aur tab jaakar Babaji ne faisla kiya ki is samaj mein sirf unhi logon ko jeene ka adhikar hai jo Babaji ki baat ko manenge ya unhein follow karenge, baki sabko marna padega. Ab Baba ke paas paise ki toh kami thi na toh inhone apni sanstha ke andar ek shandar lab banwai. Aur Babaji ke paas Japan ke top engineering student aur medical student ya medical professionals toh the hi. Ye sab log inke bhakt ban kar baithe hue the. Ab is lab se kya kya nikla? Zara ye suno. Inhone sabse pehle banaye nerve agent, toxic gas, khatarnak virus aur infections ki lambi chaudi list taiyar kar di. 1993 mein sabse pehle inhone anthrax ka spray kiya. Ab woh refined nahi tha toh fail ho gaya. Iske baad Baba ke chele Congo gaye yani ke Africa gaye aur wahan se Ebola virus ke sample lekar Tokyo aaye. Inke paas Russia ka M17 helicopter bhi tha aur kuch hi dino mein inhone itna sara nerve agent banakar taiyar kar liya jo badi aasani se 40 lakh logon ko ek sath maar sakta tha. Inhone 1994 mein phir se ek baar test kiya, nerve agent ko leak kara, lagbhag 10-12 log mare gaye, 200 se zyada ghayal hue. Aur phir inhone apne nerve agent ko aur behtar bana liya. Iske baad 20 March 1995 mein nerve agent ko Tokyo ke subway mein chhod diya gaya. Jiski wajah se 5000 logon ko hospital mein treatment lena pad gaya. Phir military, secret service, police sab active ho gaye. Pure desh mein chhapaemari hui toh pata laga ki ye sara kiya dhara toh Baba ke chelon ka tha aur ye toh kuch bhi nahi. Baba ke chelon ne toh puri duniya ki fielding set kar rakhi thi. Aap shukr manao ke inke chelon se bioweapon banane mein thodi bahut galti ho gayi. Agar ye log kamyab ho jate toh kuch hi dino mein aadhe Japan ko qabr ke andar pahuncha dete aur uske baad lagta puri duniya ka number. Ab aap ye socho ye toh woh case hai jo ki media mein aa gaya jiske bare mein duniya ko pata lag gaya. Hamein toh pata hi nahi ki aaj ke samay kitne aatankwadi sangathan is tarah ki cheezon par kaam kar rahe hain. Aur pata hona toh chhod, hamari toh taiyari bhi na hai. Ab zara Bharat ke point of view se sari cheezon ko dekh lete hain. Agar Bharat par biological attack hota hai ya permafrost se virus nikal kar main land par aa jate hain, toh ek domino effect kaise create hoga? Zara ye suno. Dekho sabse pehle pehla case report hoga. Doctor confuse honge kyunki lakshan kisi bhi bimari se match nahi karenge. Iske baad lab mein sample jayega. WHO ko report bheji jayegi ki bhaiya ek naye tarah ki bimari market mein aayi hai. Ab isse pehle hi kisi ko kuch samjh mein aata hospitals mein log badhte chale jayenge, bed kam pad jayenge, doctor kam pad jayenge aur phir hoga media ka visphot. Yaani ke social media explosion. Charo taraf khabar chalegi ki beta naya virus aa gaya. Ye aise failta hai, waise failta hai. Sab apne aap mein expert ban jayenge. Aur yahin se pura system tootna shuru kar dega. Log dawa kharidne ke liye bhagenge, jo bimar nahi hai woh bhi dawaiyan kharidne lag jayenge. Koi paracetamol lega, koi antibiotics lega, koi antiviral kharid ke stock kar lega, jiska natija hoga ke jin logon ko sabse zyada dawa ki zarurat hai unhein dava nahi mil payegi. Ye koi kahani nahi hai, ye sab kuch Covid ke samay ho chuka hai. Iske baad borders alert kar diye jayenge, flight cancel hogi, logon ki screening honi shuru ho jayegi. Phir duniya Bharat ko red zone declare kar degi, jisse export band hoga, import mehnga ho jayega, tel mehnga hoga, fertilizer mehnga ho jayega.
[28:55]Sab apne apne tarike se hamari majburi ka fayda uthayenge, hamare desh ko lootne ke liye naye naye tarike khoje jayenge. Iske baad arthvyavastha dheemi nahi hogi, toot jayegi. Karodon logon par asar aayega, naukri chali jayengi, logon ki aamdani khatm ho jayegi. Hamara tourism zero ho jayega, hamare professionals ko jinko bahar jaakar kaam karne ke liye visa ki zarurat thi, woh visa nahi milenge. Aur aapko pata hai ki ye sab kyun hoga? Kyunki bhai sahab aaj bhi hamara desh 1897 ke Epidemic Law ko, yaani Epidemic Act ko follow kar raha hai. Hum aaj bhi gulami wale act ko follow kar rahe hain. Azad Bharat ke paas toh apna Epidemic Law hi nahi hai, koi Act hi nahi hai. Ye jo angrezon ne humein banakar de diya, usi ko hum follow kar rahe hain. Ab in sari musibat se bahar nikalne ka tarika hai. Humein sabse pehle toh Ancient Pathogen Surveillance Unit banani padegi, jo sirf permafrost aur Himalaya ke liye 24 ghante, saaton din kaam kare. Ye lagatar monitoring karegi. Iske baad humein bio security level 4 ki labs bhi chahiye yuddh star par chahiye. Aaj hamare paas do hain, humein kam se kam agle teen saal mein 10 aur chahiye. Humein ek single bio secure authority banani padegi. Yaani health ho gaya, agriculture ho gaya, defence ho gaya, science ho gaya, ye ek sath sabko control karegi, yaani desh ko lead ICMR nahi balki ye nayi body karegi. Taaki sare resources ek hi jagah par channelize ho sakein, alag alag jagah par na battein. Aur ye jo 1897 ka purana kanoon hai, bhai sahab ise badlo. Humein Azad Bharat ka modern kanoon chahiye, apna khud ka Epidemic Law chahiye jiske rules saaf ho, power ka distribution bilkul clear ho. Iske alawa humein mRNA technology mein bhari investment chahiye. Vaccine 9 mahine mein nahi balki teen mahine mein ban kar taiyar honi chahiye. Humein apni manufacturing capacity ko double karna padega. Humein apni critical medical supply ko bhi secure karna padega. Matlab davai ho gayi, oxygen ho gayi, PPE kits ho gayi, beds ho gaye, inki zarurat ke samay kami nahi padni chahiye. Ab aa jao doctor par. Bhai sahab agar medical colleges nahi honge toh doctors kahan se aayenge? Isliye humein naye naye medical colleges ki bhi zarurat hai. Ab aate hain trade par. Abhi se duniya ke sath trade agreement negotiate karo, sari duniya ko clearly batao ki agar Bharat ke sath trade karna hai aur kal ko agar koi pandemic aata hai toh trade nahi rukega, koi manmani nahi chalegi, koi dam ki badhotri nahi hogi. Iske alawa humein public communication protocol bhi chahiye. Humein ek afwahen rokne ka system chahiye, ek chain of command taiyar honi chahiye. Aur please, please hamare education system pe investment karo. Bachchon ki padhai par paisa kharch karo. Hamein nahi chahiye Maiya Didi Behana bhaiya yojana. Hamare bachchon ko education chahiye. Dekho insaan ki harkaton ne prakriti ka santulan bigaad diya hai. Ab prakriti usko theek karne ke liye kuch toh karegi. Par ek baat tai hai ki prakriti kabhi warning nahi degi. Jab bubonic plague aaya toh Europe ki ek tihai abadi saaf ho gayi. Spanish flu mein 5 crore se zyada log mare gaye. Jab Covid aaya toh duniya ruk gayi aur har baar humne ek hi baat kahi ki agli baar hum taiyar rahenge. Ab agli bari aa chuki hai. Barf pighal rahi hai, hazaron saal se soye hue bacteria aur virus jaag rahe hain. Aur abhi bhi hum 1897 ka kanoon lekar baithe hain. Hultin ne 47 saal tak apne sapne ko pura karne ka intezar kiya. Ek virus se duniya ko bachane ke liye intezar kiya aur hum log bhi toh azad Bharat ke kanoon ka intezar kar rahe hain. Dekho jab main ye sab cheeze padhta hoon toh mujhe dukh hota hai. Chinta bhi hoti hai ke hamare law makers kahan paisa kharch kar rahe hain? Kaun si yojanaon mein paisa dal rahe hain? Hamari zarurat kya hai aur humein mil kya raha hai? Aur ye chinta, ye frustration, ye dar ye main aapse batne ki koshish karta hoon. Taaki aap jago aur auron ko bhi jagao aur kya pata jo log power mein hain jo soye hain ek din woh bhi jaag jayen. Aur jab tak woh na jage, main toh koshish karta rahunga. Toh isi note ke sang ye hai is video ka ant. Milte hain next video mein.
[33:24]Jai Hind, Jai Bharat.
