[0:00]Bismillah, Alhumdulillah Was Salato Was Salamo Ala Rasulullah Ama Ba'ad. Hajj ki teen kisme hain. Hajj e Qiran, or Tamattu, or Ifrad. Aaj aapke samne hum Hajj e Qiran ka tareeqa or khulasa asan andaaz mein bayan karenge. Qiran ke lafzi maine do cheezon ko ek saath milana hai. Ismein chuki umrah or Hajj ki ek saath milakar niyat karte hain, isliye isko Hajj e Qiran kehte hain. Or is tarah Hajj karne wale ko Qarin kehte hain. Hijrat ke baad aap Sallallahu Alaihi Wasallam ne san 10 Hijri mein pehla or aakhri Hajj kiya tha jise Hajjatul Wada kehte hain. Is Hajj mein aap Sallallahu Alaihi Wasallam ne Hajj e Qiran ki niyat ki thi. Isi wajah se Imam Abu Hanifa Rahmatullah Alaih farmate hain ke Qiran, Tamattu or Ifrad se afzal hai. Lekin chuki Hajj e Qiran mein Ehram ki muddat umooman lambi hoti hai. 10 tareek ki rami or qurbani se pehle Ehram nahi khulta, jis mein Ehram ki pabandiyon ki riayat karna aam logon ke liye mushkil hota hai. Khasusan wo log jo bairun mumalik se aate hain or Hajj se kafi arsa pehle aate hain. Or is mein har galti par dohri jaza hoti hai. Yani jis galti par Tamattu karne wale par ek dum hoga, Qarin par do dum honge. Do Ehramon ki wajah se. Isliye Fuqaha e Muta'akhkhireen ne aam logon ke liye khas taur se jo Qiran ki barikiyon se or uski tafsilat se nawaqif hain, unke liye Tamattu ko afzal qaraar diya hai. Lihaza maujooda surat e haal mein behtar ye hai ke be-tarteebi ke saath Hajj e Qiran karne ki bajaye aap sahi tarteeb or sunnaton ki riayat karte hue Hajj e Tamattu kar len. Is mein aapka Hajj bhi sahi ho jayega or bahot se ikhtilafat se aap mehfooz rahenge. Imam Ahmad Rahmatullah Alaih farmate hain ke Tamattu har haalat mein afzal hai kyunki aap Sallallahu Alaihi Wasallam ne Sahaba ko Tamattu ka hukum diya. Or khud bhi ye tamanna farmai ke agar mein qurbani ka janwar saath lekar nahi aata to mein bhi Tamattu karta. Yahan par baaz logon ko ek galat fehmi ho jati hai or wo ye samajhte hain ke Qiran ke liye janwar saath lana zaroori hai. Halanki aisa nahi hai. Qiran bagair janwar saath laye bhi ho sakta hai or aajkal to qurbani ka janwar saath lana mumkin bhi nahi hai. Ab ek sawal ye aata hai ke Hajj e Tamattu or Hajj e Qiran mein farq kya hai? To uska jawab ye hai ke dono mein buniyadi farq ye hai ke Hajj e Tamattu mein Miqaat par sirf umre ki niyat karte hain. Phir umrah karke halaq ya qasar karne ke baad ehram khol dete hain or halal ho jate hain. Phir Hajj ka ehram Haram se ya hudud e Haram ke andar apni rihaish se bandh kar 8 tareek ko subah Mina jate hain. Lekin Hajj e Qiran mein Miqaat par Hajj or Umre ki ek saath niyat karte hain, dono niyatein ek saath hoti hain. Phir Umrah karke baal nahi katwate, yani ehram nahi kholte kyunki Miqaat par Hajj ki bhi niyat ki ja chuki hai or wo abhi baaqi hai. Isliye Hajj se pehle jitne bhi din baaqi hon wo sab Ehram ki haalat mein guzrenge. Phir usi Ehram se Qarin wale Mina jayenge. Dusra farq ye hai ke Hajj e Qiran mein Umre ke baad tawaf e Qudum karna Imam Abu Hanifa Rahmatullah Alaih ke yahan sunnat hai. Or Tamattu mein Tawaf e Qudum nahi hota. Dusra sawal ye hai ke Hajj e Qiran kis ke liye hai or wo kaun kar sakta hai? To uska jawab ye hai ke Hajj e Qiran sirf Afaqiyon ke liye hai, yani wo log jo Miqaat ke bahar rehne wale hain, jin mein Riyaz, Dammam, Taif, Madina Munawwarah or Saudi Arab ke deegar shehron ke log or Saudi Arab ke bahar jitne log rehne wale hain, jaise Hindustan, Pakistan, Amrica, England, deegar tamam mumalik wale sab shamil hain, ye sab Afaqi hain. Is sawal ka dusra hissa ye hai ke wo kaun log hain jinke liye Hajj e Qiran ki ijazat nahi hai? To uska jawab ye hai ke wo Hilli or Makki hain. Hilli yani Miqaat ke andar rehne wale jin mein Jeddah, Bahra, Usfan, Dhahban, Jamoom ke log shamil hain. Or Makki yani hudud e Haram ke andar rehne wale log, ye dono sirf Hajj e Ifrad kar sakte hain. Agarche unka pehla Hajj ho or farz Hajj ho, ye log Hajj e Qiran or Tamattu nahi kar sakte. Isi tarah wo Afaqi bhi Qiran nahi kar sakta jo Hajj ke mahino mein aakar umrah kar chuka ho or apne watan e asli na gaya ho. Jaise log Hajj ke liye aate hain or umrah karke Madina chale jate hain. To Imam Sahab Rahmatullah Alaih farmate hain, Madine se wapsi mein ab ye Hajj e Qiran nahi kar sakte, umrah karne ki wajah se unka Hajj sirf Tamattu hoga, dusra nahi ho sakta. Teesra sawal ye hai ke Hajj e Qiran ka tareeqa kya hai? To hum tareeqa bayan karne se pehle aapke samne Hajj e Qiran ka pura khulasa rakh dete hain taake uska pura naqsha aapke samne aa jaye. Hajj e Qiran mein char tawaf hote hain. Do tawaf Hajj se pehle or do tawaf wuquf e Arafah ke baad. Is mein do tawaf farz hain or ek sunnat or ek wajib. Pehla tawaf umre ka hota hai jo ke umre ka ek farz hai. Or dusra tawaf umrah mukammal karne ke baad hota hai, yani umre ka tawaf or sa'ee mukammal karne ke baad jisko tawaf e Qudum kehte hain or wo sunnat hai. Or teesra tawaf Tawaf e Ziyarat hai jiska waqt 10 tareek ki Fajar se yani Muzdalifa se wapsi ke baad shuru hota hai. Or rami or qurbani or halaq ya qasar ke baad kiya jata hai. Ye Hajj ka teesra farz hai. Or chautha tawaf Tawaf e Wada hai. Ye wajib hai. Ise Tawaf e Rukhast bhi kehte hain. Or Qiran mein do sa'ee hoti hain, ek sa'ee Umre ki or dusri sa'ee Hajj ki. Bahot se log ek sa'ee kar lete hain or dusri sa'ee chhod dete hain jisse dum aata hai. Umre ki sa'ee Makkah pahunchne ke baad Umre ke tawaf ke baad kar li jati hai. Or Hajj ki sa'ee Qiran mein Hajj se pehle Tawaf e Qudum ke saath karna behtar hota hai. Or agar koi sa'ee pehle na kare, baad mein karna chahe to Tawaf e Ziyarat ke baad bhi kar sakta hai. Hajj e Qiran mein tawaf ki ta'addad or sa'ee ki ta'addad mein bahot se logon ko ishkal hota hai. Kyunki A'imma ka is mein ikhtilaf hai to log mukhtalif batein sunkar or padhkar confuse ho jate hain. Isliye mein ne Imam Abu Hanifa Rahmatullah Alaih ki tahqeeq ke mutabiq wazahat ke saath aapke samne tareeqa bayan kar diya hai. Or ye tareeqa Hazrat Ali or Ibn Masood Radiallahu Ta'ala Anhuma se manqool hai or mut'addid Akaabir e Tab'een se or Imam Ahmad Rahmatullah Alaih ka ek qaul bhi iske muwafiq hai, agarche mashhoor qaul unka dusra hai. Ab hum aapke samne Hajj e Qiran ka tareeqa tafseelan bayan karte hain. Sabse pehle aap Miqaat par ya usse pehle Umrah or Hajj dono ki niyat karenge. Jo log jahaz se safar kar rahe hain unko jahaz mein baithne se pehle Ehram bandh kar or do rakat padhkar baithna hai. Or jahaz udhne ke baad fauran Hajj or Umrah dono ki niyat karke Labbayk padh lena hai. Niyat ke liye koi makhsus alfaz zaroori nahi hain or na Arbi mein karna zaroori hai, sirf itna keh le ke ya Allah mein Umrah or Hajj ki niyat karta hun, un dono ko tu mere liye asan farma or qubool farma. Ye khayal rahe ke niyat ke saath Labbayk padhna bhi zaroori hai. Niyat karke Talbiya padhte hi Ehram ki pabandiyan shuru ho jayengi.
[8:13]Labbayk Hajji ka tarana hai, usko kasrat se padhte rahen, khususan taghayyur e halaat ke waqt or har namaz ke baad. Or Qiran mein aapki Labbayk Umre ke tawaf ko shuru karne par khatm nahi hogi. Balke 10 tareek ko pehli kankari par khatm hogi. Aap Makkah pahunchne ke baad Umrah karenge. Ehram ka or Umre ka tareeqa mein tafseel se bayan kar chuka hun. Isi tarah khawateen ka Ehram or Ehram ki pabandiyan bhi usko aap Hazraat dobara sun len to In Sha Allah aapko bahot fayda hoga. Us bayan ki link bhi aapke samne hai to aap waqt nikal kar zaroor sunen. Umre ke bayan mein jis tarah tawaf ka tareeqa bayan kiya gaya hai. Usi tarah tawaf karen or ye yaad rakhen ke bagair wazu ke tawaf karne se dum aata hai. Is Umre ke tawaf mein saatn chakkar mein Istiba yaani Ehram ki chadar ko dahne baazu ke niche se nikal kar bayein kandhe par dalna hai. Or shuru ke teen chakkaron mein ramal yaani mard Hazraat agar bahot zyada rash na ho to tawaf ke shuru ke teen chakkaron mein akad kar shana hilate hue qareeb qareeb qadam rakh kar chalenge. Ye sunnat hai. Or tawaf se farigh hokar do rakat Maqaam e Ibrahim ke piche padhen. Agar yahan jagah na ho to Masjid e Haram mein jahan kahin bhi jagah mile wahin ada kar len. Ye do rakat wajib hain. Phir uske baad Hajr e Aswad ka istilaam karen jo ke nawa istilaam hai. Phir Umre ki sa'ee karen. Sa'ee ke baad Umrah pura ho jayega. Umre ki sa'ee ke baad halaq ya qasar na karen. Kyunki Hajj ka Ehram abhi baaqi hai. Umre ki sa'ee ke baad Tawaf e Qudum karna sunnat hai. Is tawaf ka waqt Wuquf e Arafah se pehle tak hai. Tawaf e Qudum ke baad agar Hajj ki sa'ee bhi karni hai to is tawaf mein bhi ramal or istiba karen, warna na karen. Qarin ke liye Tawaf e Qudum ke baad Hajj ki sa'ee karna afzal hai. Agar Tawaf e Qudum ke baad Hajj ki sa'ee nahi karega to ye sa'ee Tawaf e Ziyarat ke baad karna hogi. Umrah or Tawaf e Qudum se farigh ho jaye to kya kare? Umrah or Tawaf e Qudum or Hajj ki sa'ee se farigh hone ke baad Ehram ki halat mein Ehram ki pabandi karte hue Makka Mukarramah mein qiyam karega. Or uske baad 8 Dhul Hijjah ko sunnat ke mutabiq tulu e aftab ke baad Mina jana hoga. Hajj ke aamaal. Or har Hajji Mina mein paanch namaze padhega. Phir 9 Dhul Hijjah ko suraj nikalne ke baad wahan se Arafat jana hoga. Ab hum Hajj ke paanch din ke aamaal aapke samne tarteeb se bayan kar dete hain. Agar aap unko ghaur se sunenge or note karte jayenge to aapko un par amal karna asan hoga. 8 Dhul Hijjah ko Hajj ka pehla din hai. Tulu e aftab ke baad halat e Ehram mein Mina jana hai. Or Mina mein paanch namaze padhna sunnat hai. Har namaz ko apne waqt pe padha jayega. Zohar se lekar 9 Dhul Hijjah ki Fajar tak Makke wale or wo Hazraat jo 15 din ki niyat se muqim ban gaye hain. Wo Mina, Muzdalifa or Arafat har jagah puri namaz padhenge. Or agar Imam Musafir ho to uske salam pherne ke baad ye Hazraat apni baqiyah namaz puri karenge. Or wo log jo Musafir hain, jinki muddat 15 din se kam hai, jaise Saudi Arab ki mukhtalif shehron se aane walon ka haal hai, wo qasar karenge. 9 Dhul Hijjah se Hajj ka dusra din shuru hota hai. Us din jab suraj tulu ho jaye to Arafat ke liye rawana hona hai. Arafat mein Zohar or Asar ki namaz padhni hai. Jo Hujjaj e Karam Imam e Hajj ke saath Masjid e Namirah mein padhenge. Sirf wo jama karenge yaani dono namazon ko milakar padhenge. Jo log muqim hon wo Zohar or Asar ki char rakat padhenge or Musafir qasar karega. Zawal ke baad kuch der Arafat ka wuquf farz hai or ghuroob e aftab tak Arafat mein rukna wajib hai. Agar suraj doobne se pehle koi Arafat se nikal jaye to us par dum aata hai illa ye ke ghuroob se pehle wapas aa jaye to dum saqit ho jayega. Dauran e wuquf Zohar se lekar Maghrib tak girya wa zaari ke saath dua, Allah ke zikr, tilawat, durood sharif or istighfar mein mashghool rahen. Qubuliyat ka din hai or darmiyan mein bar bar Talbiya or chautha kalma padhte rahen. Ye wuquf qibla rukh khade hokar karna afzal hai. Arafat ki ek aham tasbih ye hai jo ke qibla rukh hokar padhni hai, zawal se ghuroob ke darmiyan. Is mein teen cheezein padhni hain. Pehli cheez 100 dafa chautha kalma. La Ilaha Illallahu Wahdahu La Sharika Lahu, Lahul Mulku Wa Lahul Hamdu Wa Huwa 'Ala Kulli Shai'in Qadeer. Phir dusri cheez 100 dafa Surah Ikhlas. Teesri cheez 100 dafa Durood e Ibrahimi jo namaz mein padha jata hai. Uske aakhir mein Wa 'Alaina Ma'ahum izafe ke saath, yaani aakhir mein is tarah padhe Innak Hamidum Majid Wa 'Alaina Ma'ahum. Hadees e Pak mein aata hai ke jo banda ye teen tasbihein Maidan e Arafat mein padhta hai to Allah Ta'ala Farishton se farmate hain. Ke aye mere Farishton mere is bande ki kya jaza hai, isne meri tasbih or tahleel ki, meri badai or azmat bayan ki, meri shan bayan ki, mere Nabi par Durood bheja. Aye Farishton tum gawah raho mein ne isko bakhsh diya or iske nafs ke bare mein iski sifarish qubool ki. Agar mera ye banda tamam Arafat walon ke haq mein sifarish kare to mein iski sifarish ko qubool karunga. Jab Arafat mein suraj doob jaye to Maghrib ki namaz padhe bagair Talbiya padhte hue Muzdalifa rawana ho jaye. Muzdalifa pahunch kar Isha ke waqt mein Maghrib or Isha ki namaz ek saath milakar padhen. Chahe akele hon ya jamaat ke saath. Ek Azan, ek Iqamat se pehle Maghrib, phir Isha, phir chahen to sunnat bhi padh len Maghrib ki or Isha ki. Phir witr padhna baharhaal zaroori hai. To Maghrib or Isha or witr. Agar koi shakhs raste mein rash mein phas jaye or Muzdalifa pahunchne se pehle Fajar ka waqt qareeb ho jaye or namaz qaza hone ka khatra ho to aisi surat mein raste hi mein Maghrib or Isha or witr padh le. Raat Muzdalifa mein aaram karna Sunnat e Muakkadah hai. Fajar ke baad kuch der wuquf wajib hai. Jinke kheme pehle se hi Muzdalifa mein hain wo agar in khemon mein aaram kar len to is mein koi haraj nahi hai. Mustahab ye hai ke Muzdalifa se bade chane ke barabar pehle din ki rami ke liye saat kankariyan chun len. Agar sahulat se ho sake to puri 70 kankariyan char din ki rami ke liye chun len. Or agar 12 ki rami karke wapas jana chahen to 49 kankariyan chun len. Agar zaroorat padhe to Mina se bhi kankariyan chuni ja sakti hain. Sirf Jamraat ke paas se uthana makrooh hai. Behtar ye hai ke kankariyan kuch zyada chun len ba waqt e zaroorat aapko ya aapke kisi saathi ko kaam aa sakti hain. Jo kankariyan aakhir mein bach jayein usko Mina ya Makka mein chhod den. Dhul Hijjah ki 10 tareek ko Hajj ka teesra din shuru ho jata hai. Is teesre din mein kai kaam hain. Is din che kaam karne hote hain. Pehla kaam us din Fajar ki namaz Muzdalifa mein padhna hai. Subah Sadiq or suraj nikalne ke darmiyan kuch der wuquf wajib hai. Us waqt dua qubool hoti hai. Agar koi mard hujoom or rash ki wajah se ya intizami majboori or Qafle ki rawangi ki wajah se Subah Sadiq se pehle Muzdalifa se chala jaye to us par dum aayega. Albatta aurtein or budhe or za'eef or bimar log agar Muzdalifa mein wuquf na karen or raat hi mein Mina chale jayein to unke liye jaiz hai un par koi dum nahi hai. 10 tareek ka dusra kaam Mina pahunch kar sabse pehle Jamra e Aqaba yani bade shaitan ko jo sabse aakhir mein hai. Saat kankariyan alag alag marna hai dahne haath se. Pehle din sirf bade ko marte hain. Uska masnoon waqt tulu e aftab se zawal tak hai or Maghrib tak bhi bila karahat mar sakte hain. Maghrib baad bhi auraton or za'eefon or bimar logon ke liye karahat nahi hai. Kankari qareeb jakar maren is tarah ke hauz ke andar jakar gire. Agar bahar giri to aapki rami nahi hogi or waqt ke andar dobara rami karna hogi. Agar i'aada nahi kiya to dum aayega. Agar shak ho jaye ke koi kankari bahar gir gayi ya kam ho gayi to uske badal dusri kankari mar den. Pehli kankari par Talbiya khatm ho jayega. Har kankari dahne haath se Bismillah Allahu Akbar kehkar maren. Agar yaad ho to is dua ka bhi izafa kar len Allahumma Ij'alhu Hajjan Mabrooran Wa Dhambam Maghfooran Wa Sa'yan Mashkoora. Mard or aurtein sab apni rami khud jakar karen. Sirf jo shakhs ma'zoor ho, chalkar bhi nahi ja sakta ho or sawari se bhi nahi ja sakta ho. Uski taraf se wakeel bankar rami kar sakte hain. Rami karne ke liye ba-wazu rehna zaroori nahi hai lekin behtar hai. 10 tareek ka teesra kaam qurbani hai. Qiran mein qurbani wajib hai jo rami ke baad ki jati hai. Jo shakhs mazbah khana khud nahi ja sakta or aajkal wahan jana asan bhi nahi hota wo tahqeeq karke kisi mo'tabar or ma'roof idare ko wakeel bana de. Or usse qurbani ka waqt ma'loom kar le phir halaq kare. Or ye yaad rakhen ke kisi anjaan shakhs ke hawale qurbani na karen. Hajj ke mausam mein bahot se fraudiye aate hain or logon ki qurbaniyon ke paise kha jate hain jisse Hajj kharab ho jata hai. 10 tareek ka chautha kaam halaq ya qasar hai. Sunnat ye hai ke mard pure sar ke baal mundwa den to har baal ke ewaz ek neki milegi or ek gunah maaf hoga. Or agar sar par baal na hon tab bhi aapko sar par ustura pherna wajib hai. Or agar koi shakhs qasar karna chahe to kamazkam ek pore ke barabar yani taqriban 1 inch se kuch zyada pure sar ke baal barabar chhote karaye to aap halal ho jayenge. Ye khayal rahe ke jis tarah halaq usture se pure sar ka hota hai isi tarah sahi tareeqe se qasar bhi machine se pure sar ke baal ek pore ke barabar yani 1 inch se kuch zyada katne se hota hai. Agar isse kam kate to dum aayega. Lihaza agar kisi ke baal chhote hon, ek pore se kam hon to uske liye sar ke baal mundwana lazim hai, qasar jaiz nahi hai. Or agar koi shakhs chauthai sar ke baal ek pore ke barabar yani kamazkam 1 inch se kuch zyada kaat le to halal to ho jayega lekin gunahgar hoga. Chuki is tarah karna makrooh e tahreemi or Hadees e Pak mein mana hai. Is muqaddas maqam par aakar bhi insan apne baalon ko Allah ke liye qurban na kar sake to phir kab qurban karega. Yahan aakar bhi koi agar apne baalon ko qurban karne ki bajaye Nabi ki sunnat ko qurban kar de to usse bada mujrim kaun hoga. Khawateen ka qasar. Khawateen apne sar ke pure baal pakad kar ek pore ke baqadr yaani taqriban 1.5 inch or agar choti ke aakhir mein baal bahot kam hon to ehtiyatan 2 inch kaat len. Halaq ya qasar ke baad aapka Ehram khul jayega. Sirf izdiwaji talluqat haram rahenge wo Tawaf e Ziyarat ke baad halal honge. 10 tareek ka paanchwa kaam Tawaf e Ziyarat hai. Ye Hajj ka teesra farz hai. Iska waqt 10vi tareek ki subah se shuru hota hai. 12 tareek ki Zohar se pehle kar lena chahiye. 12 tareek ki Zohar ke baad jo tawaf ke liye jayega rash ki wajah se umooman ghuroob se pehle uska tawaf nahi ho sakta. Iski wajah se takhir ka dum aayega. Aurat agar Haiz mein hai to wo paak hone ke baad karegi. Us par takhir ka koi dum nahi hai. Tawaf ka tareeqa tafseel se Umre ke bayan mein guzar chuka hai usko aap sun len. Albatta jo log Hajj ki sa'ee Mina mein jane se pehle Tawaf e Qudum ke baad kar chuke hain. Wo Tawaf e Ziyarat mein ramal nahi karenge. Or chuki ye tawaf umooman Ehram kholne ke baad hota hai. To isliye is mein iztiba yaani dahna kandha kholna bhi nahi hota. 10 tareek ka chhatta kaam Hajj ki sa'ee hai, ye wajib hai. Jis tarah Umre mein sa'ee ki thi isi tarah Hajj ki sa'ee karega. Bas itna farq hai ke Hajj ki sa'ee umooman Ehram kholne ke baad aam kapdon mein hoti hai. Or uske baad halaq ya qasar nahi hota. Agar kisi ne Mina jane se pehle Tawaf e Qudum ke baad Hajj ki sa'ee kar li hai. To usko ab sa'ee karne ki zaroorat nahi hai. Dhul Hijjah ki 11vi tareek ko Hajj ka chautha din shuru ho jata hai. Us din bhi guzishta din ki tarah zawal ke baad teenon Jamraat ki rami karni hai usi tarteeb se. Dhul Hijjah ki 12vi tareek ko Hajj ka paanchwa din hai.
[21:38]Us din bhi guzishta din ki tarah zawal ke baad teenon Jamraat ki rami karni hai usi tarteeb se.
[22:16]Agar aap sunnat ke mutabiq 13vi ki rami karna chahte hain to behtar ye hai ke raat Mina mein qiyam karen. Phir zawal ke baad masnoon waqt mein rami karke jayein. Us din rami ka aakhri waqt ghuroob e aftab hai. Wapas hone se pehle Tawaf e Wada kar len. Ye Afaqi yaani Miqaat se bahar rehne wale ke liye wajib hai. Agar bagair kare jayega to dum aayega. Or agar kisi ne Tawaf e Ziyarat ke baad koi nafli tawaf kar liya hai or aakhir mein usse mauqa nahi mila to nafl tawaf Wada ban jayega. Agar kisi aurat ne Tawaf e Ziyarat kar liya hai phir usko Haiz mahwari shuru ho gayi to uska wida'i tawaf maaf ho jayega. Tawaf e Wada ke baad koi sa'ee nahi hoti. Alhamdulillah ab aapka Hajj mukammal ho gaya. Allah Ta'ala hum sabko sunnat ke mutabiq ikhlas ke saath Hajj karne ki taufeeq ata farmaye or hum sabki ibadaton ko qubool farmaye or bar bar ye sa'adat naseeb farmaye. Or apni zindagi ko badalne ki taufeeq naseeb farmaye. Wa Akhiru Da'wana Anilhamdulillahi Rabbil Aalameen Was Sallallahu Wasallam Ala Nabiyyina Wa 'Ala Aalihi Wa Sahbihi Ajma'een.
