[0:14]Assalam o alaikum, mera naam Furqan Qureshi hai aur aaj se aap jo bhi sunne wale hain ye ek sacchi kahani hai. Aap ki, meri aur hum sab ki zindagi ki kahani. Ek hairat angez mazi, haal aur ek hairat angez mustaqbil ki kahani. Yeh kahani tab se shuru hoti hai jab kuch bhi na tha aur iska ikhtitam wahan par hoga jab kuch bhi na rahega. Aasman se le kar zameen tak jo kuch bhi inke darmiyan hai, sitare, sayyare, suraj, waqt aur woh tamam takhliqat jise hum apni mehdood zuban mein kainat kehte hain. Aaj hamara ek safar shuru hone wala hai, is kainat ki khoj ka safar. Isse kisne banaya? Isme kya kuch chupa hua hai? Aur humari choti si zameen jise hum duniya kehte hain, isme kya kuch ho chuka hai aur kya kuch hone wala hai, yeh sab janne ka safar. Aur hamare is safar ka aaghaz hota hai aaj se 14 arab saal pehle. Lekin 14 arab saal hi kyu? Kya kabhi aap ne raat ke aasman mein saat sitaron ka yeh jhurmat dekha hai? Main chota sa tha toh meri ammi ne mujhe iske mutaliq bataya tha, isse Ursa Major kehte hain, ya phir Arabic ya Urdu mein Dubb-e-Akbar. Pakistan mein yeh jhurmat raat ke aasman mein takriban har roz nazar aata hai aur agar aap ki aankhein duniya ki sab se taqatwar durbin ki tarah hon toh aapko is darmiyan wale sitare ke bilkul upar ek chota sa surkh dhaba nazar aata hoga. Yeh hai GN-z11, yaani ke aaj tak ki sab se door ki kehkeshan.

[1:54]Karoron sitare ek mamooli se surkh dhabe ki shakal mein aur hum se itna door ke iski roshni jisse tez raftar is kainat ki koi aur shai nahi hai, hum tak pohanchne mein 14 arab saal le leti hai. Is chote se be-naam hisse mein dekhne se humein itna toh pata chal hi jata hai ke hum apne safar mein kam se kam itna door toh ja hi sakenge. Lekin in 14 arab salon ka 99.9985% hissa toh insan se pehle hi guzar chuka hai. Hum insan toh bilkul akhri chand seconds mein aaye hain. Toh phir hum kaise is kainat ki paidaish ko dekh payenge? Yeh janne ke liye aap apne aap ko waqt ki qaid se azad kar dein aur chalein mere saath, hum un tamam ulooom ko explore karenge ke jo aaj se humein is kainat ki ek sacchi kahani sunane wale hain. Hamare ird-gird ek ilm bahut aam hai jisse Science kehte hain. Is science ki ek branch hai cosmogony. Yaani kainat ki paidaish ki study, jiske zariye 1964 mein ek daryaft hui thi. Yeh daryaft itni bari thi ke isse karne wale dono scientists Arno Penzias aur Robert Wilson, in dono ko Nobel Prize mila tha. In dono ne khala mein ek tarah ka radiation dhundha tha, daryaft kiya tha lekin ajeeb baat yeh hai ke yeh radiation na hi kisi sitare se aa raha tha, na hi kisi sayyare se aur na hi kisi dusri kehkeshan se, yeh bas khala mein har taraf bikhri hui ek energy ki tarah tha. Yeh log kainat mein jahan kahin bhi nazar dalte, inhe yeh energy mehsoos hoti, dikhai deti. Yun lagta tha ke kisi zamane mein ek bahut bare dhamake ki wajah se paida ho kar har taraf phel gai ho. Jesa ke kisi azeem, kisi zor-dar dhamake ki ek goonj ho jo aaj tak sunai de rahi hai. Lehaza unhone isse Cosmic Microwave Background ka naam diya. Aaj duniya is dhamake ko Big Bang ke naam se janti hai ke aasman, zameen aur iske darmiyan maujood sab kuch pehle ek hi tha aur phir puri quwwat se hone wale ek dhamake ke baad alayhda hua aur is dhamake ka naam Big Bang tha. Lekin is daryaft ne ek bahut bara masla khara kar diya, is masle ka naam Horizon Problem hai. Yaani ke aasman mein humein kisi jagah yeh energy 46 billion light-years ke fasle par pheli hui nazar aati hai aur kisi jagah sirf 3 lakh saal ke fasle par. Ab is masle ka ek hi jawab ho sakta hai ke kainat mein roshni mukhtalif jagahon par mukhtalif raftaar se safar kar rahi hai, jo ke namumkin hai. Aur hamare ilm ke mutabiq toh yeh qudrat ke qawanin ki khilaf warzi bhi hai. Roshni ki toh ek hi raftaar hoti hai, 3 lakh kilometer fi second. Lekin iske ilawa koi aur explanation thi bhi nahi aur agar yeh baat sach hai ke kuch jagahon par roshni ki raftaar mukhtalif hai toh humein iske saath saath yeh bhi manna padega

[4:56]ke in jagahon par waqt guzarne ki raftaar bhi baqi jagahon se mukhtalif hi hogi. Ab is muqam par pahunch kar humein ek ehsas hone lagta hai ke shayad science bhi humein sirf ek had tak hi ilm de sakti hai. Aur is mein science ka qasoor hai bhi nahi kyu ke humein science ki is shakal se mutaarif hue humein sirf chand so saal hi guzre hain. Lehaza humein ek aur ilm ki taraf tawajjuh karni padti hai, in chand so salon se pehle ke logon ka ilm ke woh kya kuch jante the. Aur unka ilm janne ke liye humein Tareekh mein jana padega, ek bahut, bahut purani Tareekh. Aaj se koi 173 saal pehle ki baat hai, 1849 mein Iraq ke shehar Ninewa mein ek archaeologist Austen Henry ko khudai ke dauran matti ki chand takhtiyan mili thi yaani ke matti se bani woh tablets jin par qadeem zamane mein likhai jati thi. Austen Henry ne in tablets ko Enûma Eliš ka naam diya, yeh basically saat takhtiyon par likhi ek dastan thi jismein aaj se saare 3000 saal pehle ke log

[6:05]is kainat ki takhleek ke hawale se aapas mein guftagu kar rahe the. Aur woh kehte hain ke jab unche aasman ka naam na tha, jab niche koi zameen na thi. Jab sirf pani tha, na koi jhadi thi, na koi jhonpri thi aur na hi koi daldal thi. Jab koi nafs na tha aur na hi koi qismat likhi gai thi, tab isme Khuda ka hukum aaya. Right, something very interesting, yeh bari dilchasp baat hai, aur agar hum is puri ibarat ko parhein toh inhe 1000 lines mein kisi bhi cheez ki takhleek se pehle pani ke hone ka zikr milta hai ke bas pani tha. Aur iske ilawa ek hamesha rehne wale bagh ka zikr aur sab se akhir mein insan aur iski rooh ka zikr milta hai jo aasman se aayi thi. Lekin is ibarat ki sab se dilchasp baat iske Yunani tarjume ka ek lafz Logos hai, yaani ek kahi hui baat. Aasan alfaz mein is jagah likha hua hai ke jab Khuda ne takhleek karni chahi toh ek baat kahi. Lekin kya baat kahi, is mamle mein yeh takhtiyan khamosh hain. Toh chalein ek aur qadeem tehzeeb ki taraf chalte hain, ek jo in se bhi pehle ke the, 5000 saal purani tehzeeb Summera ke log.

[7:25]Summera bhi maujuda Iraq hi ka ek ilaka tha aur unhone bhi apni matti ki takhtiyon mein likha hai ke Nammu naami ek quwwat thi jo hamesha se maujood thi. Nammu ne pani ke ek bahut bare zakheere se zameen aur aasman banaye. Aur aap yeh mat samajiyega ke Summera, yaani Sumerians, koi choti tehzeeb thi. Summera tareekh ki sab se purani tehzeeb hai aur aaj ki duniya mein maujood cheezon mein se kam se kam 100 ijadad Summera hi ke logon ne ki thi, maslan sab se pehli likhai, writing, Sumerians hi ne ki thi. Sab se pehli ghari, sab se pehla aab-paashi ka nizam, yahan tak ke geometry ka bhi sab se pehla istemal Summera hi mein hua tha. Chalein, maan lete hain ke sirf do hi tehzeebon kaafi nahi hain, isliye hum thodi si khoj mazeed bhi lagate hain. 3000 saal purana Misr, ke jo apne daur ki ek superpower tha. Woh log bhi apne ehramon mein likhi hui ibarat mein batate hain ke Nun naami ek taqat ne pani ke ek bahut bare toofani samundar se zameen aur aasman banaye. Ek aisa samundar jo bilkul andhere mein tha. Agar 2300 saal purani Yunani tehzeeb ki baat karein toh woh bhi pani ke ek kaale samundar Oceanus se zameen aur aasman ki takhleek ka concept ki baat karte hain. Lekin aap yeh bhi soch sakte hain ke yeh tehzeebain toh bilkul ek dusre ke paas paas thi. Inmein ziyada fasle bhi nahi the, inmein ziyada zamane bhi nahi guzre the. Toh ho sakta hai ke in tehzeebon ne ek dusre se hi yeh concept seekhe hon, isliye main aapko in sab se bahut door waqiya chand dusri tehzeebon ki tareekh mein le kar chalta hun. Australia ke aboriginal log. In aborigines ke mutabiq tamam roohon ki malik ek bahut bari taqat thi jiske ilawa koi bhi maujood nahi tha. Usne roshni banayi aur zameen ko zindagi di. Ab in aborigines se door China ki Taoist mythology. Woh log bhi ek aise Khuda ka zikr karte hain ke jisne bare paniyon ko alayhda kiya, jisne paharon ko unki jagah rakha, aur yeh sab kuch usne apne ilm aur kahe hue alfaz se kiya. China ke baad Korea ki Cheonjiwang mythology. Wahan pe bhi zameen aur aasman ki kisi zamane mein ek hi hone ka concept milta hai. Toh phir sirf do bare-e-azam bachne hain, toh chalein main aapko unke cultures bhi dikha deta hun. Pehle West Africa ki Manden aur Central Africa ki Yoruba mythology. Yeh dono mythologies ek bahut bari quwwat ki maujoodgi ka zikr karti hain ke jo bilkul tan-tanha thi. Aur phir usne pani se takhleek ki. Dusra bare-e-azam America ka jahan ek bahut purana qabila hai Cherokee qabail ka, jo ke Red Indians ka ek qabila tha basically, ek tribe tha. Aur samundar ke becho-bech waqia Hawaii ke jazaair jin ka baqi duniya se takriban koi lena dena nahi hai, koi talluq nahi tha. Wahan par bhi yahi concepts milte hain ke zameen aur aasman pani se wujood mein aaye aur 7 din tak sab kuch banta raha aur akhir mein Europe ka mulk Finland. Jahan aaj bhi Väinämöinen ki dastan zinda hai ke kaise usne pani se takhleek ki thi. Ab aap samajh gaye honge ke main aapko hazaron salon aur hazaron meelon door ki tehzeebon aur culture ke bare mein bata raha hun aur inki study mere liye bari dilchasp thi. Lekin in mythologies mein saath saath ek aur masla bhi aa raha tha ke inki kuch baatein bari mazahiya thi, maslan, for example, African culture mein zameen ke takhleek hone ke baad sone ki zanjeeron mein jakar diye jane ki kahani aane lag jati hai ya phir Finland mein jahan ki mythology mein kawwa aa jata hai jo zameen aur aasman banane mein Väinämöinen ki madad karta hai. Ab main aur aap, hum sab itna toh jante hi hain ke na hi yeh zameen kisi zanjeer se jakri hui hai aur na hi yeh aasman aur zameen banana kisi kawwe ke bas ki baat thi, isliye maine in tamam qism ki mazahiya baton ko filter kar diya. Aur in sab baton ko nikal kar in cultures ko study kiya aur dekha ke agar sirf is baat ko study kiya jaye jo in tamam tehzeeb aur cultures mein mushtaraka hai toh inmein harf ba harf ek hi jaisa waqia sunne ko milta hai ke ek bahut azeem quwwat jisse Khuda kehte hain. Woh tan-tanha tha aur iske ilawa koi nahi tha, isi ne pani se takhleek ki aur yeh sab kuch 6 ya 7 dinon mein hua. Ab is muqam par pahunch kar yun lagne lagta hai ke jaise duniya ke tamam konon mein ek hi paigham bheja gaya tha. Haan, paigham lane wale mukhtalif the aur woh mukhtalif waqton mein aaye lekin paigham bhejane wala ek hi tha. Aur ek baat bahut ache se wazeh ho jati hai ke ek ilm aur bhi hai jiska dayra science se kahin ziyada wasee hai aur jis ilm par duniya ke 85% log kisi na kisi surat, kisi na kisi shakal mein yaqeen rakhte hain aur woh ilm hai mazhab. Lekin yahan pe ek sawal paida hota hai ke akhir konsa mazhab? Is waqt toh duniya mein 3000 mukhtalif mazhab maujood hain aur sabhi ke manne wale apne mazhab ko hi saccha mante hain. Toh chalein chand bare mazahib aur purane falsafon ko dekhte hain ke woh kya kehte hain. Yahudiyat bila shuba bahut purane mazahib mein se ek hai, inke mutabiq kainat banayi toh Khuda ne hi thi lekin yeh zameen ek chapati zameen hai ke jo pani ke upar qaim hai. Aur upar aasman mein jannat aur zameen ke niche jahannum hai. Phir Isaaiyat is waqt duniya ka sab se bara mazhab hai aur woh log bhi yahi kehte hain ke kainat ka banane wala toh ek Khuda hi hai. Lekin inke nazdeek tamam suraj, chand, sitare is zameen ke gird ghoom rahe hain. Aur yeh sari takhleek sirf aur sirf 6.5 hazaar saal pehle hui thi. Aur is sab ke ilawa Isaaiyat mein saatvein din Khuda ne aaram kiya. Phir Yunani falsafa bila shuba 2.5 hazaar saal purane is falsafe ka asar aaj bhi aapko nazar aayega. Greeks bhi Khuda ki takhleek ko hi mante the, woh yahi kehte the ke yeh kainat Khuda ne hi banayi hai lekin woh yeh bhi kehte the ke Andromeda naami ek Devi aasman par urti chali ja rahi thi aur jahan jahan woh doodh girati ja rahi thi wahan wahan ek doodhiya sa rasta banta chala ja raha tha. And let me tell you something very interesting, ke aaj bhi is doodhiya raste ki munasibat se hamari apni kehkeshan ka naam Milky Way hai ke jo Yunanion ne rakha tha. Phir iske ilawa Hinduism, Buddhism, Jainism jo hain toh purane mazhab hain lekin kehte hain ke kainat ka na toh koi aghaz hai aur na hi iska koi ikhtitam hai. Yeh hamesha se thi aur hamesha hi rahegi. Lekin is muqam par zara thehrein aur ek ek kar ke in tamam mazahib par ghaur karein ke agar Yahudi mazhab sach kehta hai toh phir ek hi waqt mein Japan mein din aur America mein raat kyu hoti hai? Chapti zameen ya flat earth pe toh duniya ke har mulk mein din ya raat ek waqt mein ek hi jaise hone chahiye the. Aur phir yeh bhi baat hai ke is waqt hamare 4550 satellites puri duniya ke gird ghoom rahe hain ke jo is baat ka saboot hain ke yeh duniya ek chapti zameen nahi hai. Phir agar Isaaiyat sach keh rahi hai ke yeh sab kuch sirf 6 ya 6.5 hazaar saal pehle hua tha toh GN-z11 ki roshni toh hum tak pahunchni hi nahi chahiye thi, yeh namumkin hota. Lekin is sab se ziyada ahem baat yeh hai ke jo Khuda is qadar wasee-o-areez kainat ka khaliq hai, woh bhala yeh sab kuch banane ke baad thak kyu gaya? Isse toh sab se taqatwar, sab se almighty hona chahiye tha. Aur phir is Isaaiyat ki muqaddas kitab yaani Bible ke 50 versions hain toh phir akhir konsa version waqai saccha hai? Hum konsa version durust manein? Isi tarah agar Yunani, yaani Greeks theek the toh phir Milky Way ke ilawa in dusri kehkeshanon ke upar yeh doodh kisne gira diya ke jo dar-haqeeqat koi doodh nahi hai, balkeh sitaron ka sitaron ka jhurmat hai. Aur agar Hinduism, Jainism aur Buddhism sacche hain ke yeh sab kuch shuru se tha aur hamesha aesa hi rahega toh phir kainat ki tamam kehkeshayein ek dusre se door kyu ja rahi hain? Aur woh bhi itni tezi se ke sirf hamari apni Milky Way hi 21 lakh kilometer per hour ki speed se safar kar rahi hai. Aur hum sab jante hain ke har safar karne wali cheez ka ek aaghaz hota hai aur ek ikhtitam hota hai. Ab yahan pahunch kar yun mehsoos ho raha hai ke jaise in tamam mazahib ka bhi ilm mehdood hai. Haan, inmein paigham ek hi aaya tha lekin waqt ke saath saath inmein bahut kuch badal gaya. Albattah ek mazhab ke mutaliq maine abhi aapko nahi bataya aur yeh woh wahid mazhab hai jisne apni sacchai ka dawa kiya hai ke ismein koi jhoot nahi hai. Aaj se takriban 1400 saal pehle Arab mein ek mazhab saamne aaya jisse Islam kehte hain. Chand hi salon mein yeh mazhab pure Arab mein phel gaya aur phir dekhte hi dekhte baqi duniya mein bhi. Aur aaj Isaaiyat ke baad Islam duniya ka dusra bara mazhab hai. Ab Islam mein bhi takhleek ke hawale se ek aesa hi waqia milta hai, maslan Surah Hud. Ke woh Allah hai jisne aasmanon aur zameen ko 6 din mein takhleek kiya aur iska Arsh pani par tha. Lagta hai ke Quran Pak mein bhi yeh paigham usi paigham bhejane wale ki taraf se hi aaya tha lekin ek cheez hai ke jo Quran ko in baqi tamam cultures, baqi tamam mazahib ya kitabon se mumtaz karti hai aur woh iska ek aesa dawa hai jo kisi aur ne nahi kiya. Woh dawa jo actually is kitab ke bilkul shuru mein hi hai. Surah Baqarah. Ke yeh woh kitab hai jismein koi shak nahi hai. Ab yeh kafi bara dawa hai aur hum jaise woh log jo is kainat ko khojne ke lambe safar par nikle hain unki nazar se is dawe ka baghair dekhe guzar jana mumkin nahi tha. Aur yeh woh wahid kitab bhi hai ke jiska puri duniya mein koi dusra version nahi hai. Ek kitab, ek version aur ek dawa. Yeh woh dawa hai ke jo na kabhi Cosmogony ne kiya hai na hi tareekh ki kisi tablet ne aur na hi kisi culture ne aur na hi kisi mazhab ne. Lehaza is kitab ko mutaarif karwane wale shakhs, yaani ke Nabi Muhammad bin Abdullah ka bhi takhleek ke hawale se nazariya sunte hain ke jo inki Ahadith ki collection ki kitab Sunan Ibn Majah mein likha hua hai. Abu Razeen bin Amir Aqili R.A ne Nabi Karim S.A.W se pucha tha ke, Ya Rasool Allah, takhleeq se pehle hamara Rab kahan tha? Is par Aap S.A.W ne jawab diya ke woh la-makan mein tha ke jiske upar aur niche kuch bhi nahi tha. Aur phir usne apna Arsh pani par takhleek farmaya. Ab dekhne mein toh lagta hai ke Islam se mile sources toh bade hi mudallal aur advanced stage ki baatein kar rahe hain kyu ke yeh haqeeqat ke ain mutabiq hain, in mein time and space ka bhi concept hai. Ismein la-makan ka bhi concept hai, lehaza is point se aage hum is mazhab ki baqi taleemat se bhi rehnumai le kar dekhenge ke yeh humein kahan tak le kar jayega. Aur is rehnumai mein hamare do bunyadi sources honge Islam ki muqaddas kitab yaani Quran-e-Kareem aur Arab ki woh hasti jin par yeh Quran nazil hua tha yaani paigham lane walon mein se akhir paighambar Hazrat Muhammad Mustafa Kainat ki takhleek ke aitbar se tamam mazahib mein Quran ka woh dawa jisse challenge karna bahut mushkil hai. In fact Surah Anbiya mein hai ke kya kafir nahi dekhte ke zameen aur aasman aapas mein mile hue the. Phir humne inhe alayhda kiya aur har zinda cheez ko humne pani se paida kiya. Ab yeh baat hai toh bilkul sach kyu ke yaqeenan jab zameen aur aasman ek dusre se alayhda hue honge toh ek shadeed tareen force ka dhamaka hua hoga. Wahi dhamaka jiski goonj aaj bhi baqi hai. Wahi goonj jisse hum Cosmic Microwave Background kehte hain. Aur yeh dhamaka kehkeshanon ke tezi ke saath ek dusre se door jane ko bhi explain karta hai kyu ke its something very common, bari bunyadi si baat hai ke agar aap kehkeshanon ke ek dusre se door jane ko reverse kar ke dekhein, isse rewind kar ke dekhein toh yeh lazim hai ke kisi zamane mein aap isse ek hi jagah mila hua hi payenge. Ab yeh hain toh bare dilchasp inkishafat lekin humein thodi si rehnumai mazeed bhi chahiye, isliye hum is kitab ko mazeed parhte hain. Quran Pak mein kam se kam 5 jagah, maslan Surah Hud, Surah Furqan, Surah Sajda, Surah Qaf aur Surah Hadid mein yeh bataya gaya hai ke zameen aur aasman ko humne 6 din mein paida kiya. Toh yeh konse din the? Kya yeh hamare 24 ghanton wale din the? Balkeh Isaaiyat ke falsafe par toh hamara yeh bhi ek aitraaz tha ke 6 dinon ki takhleek ko mante hue humein GN-z11 nazar hi nahi aani chahiye thi aur Isaaiyon ki kitab yaani Bible mein iski koi explanation hai bhi nahi. Ab yahan aapko woh Horizon Problem yaad hai jiska main ne shuru mein hi zikr kiya tha ke yun lagta hai ke kainat mein waqt mukhtalif jagahon par mukhtalif raftaar se chal raha hai. Lekin I believe ke yahan science se ghalti hui hai, inhe is baat ko ek problem ke bajaye ek revelation ka naam dena chahiye tha, ek inkishaf ka naam dena chahiye tha, kyu ke Quran Pak mein waqt ka concept bara wazeh hai ke jo Isaaiyat mein nahi hai. Surah Hajj aur Surah Ma'arij mein toh waqt ka concept bari wazahat ke saath badalne ki fitrat rakhta hua nazar aata hai, for example, Surah Hajj ke tumhare Rab ke nazdeek ek din tumhare 1000 saal ke barabar hai, ya phir Surah Ma'arij ke farishte aur rooh ek aise din mein uski taraf charhte hain jiski miqdar 50,000 saal hai. Ab kahin ek din 1000 saal ka hai aur kahin ek din 50,000 saal ka, yeh toh bari advanced level ki kitab hai jo waqt ke concept ko itni wazahat ke saath bata rahi hai warna baqi kisi mazhab mein waqt ki is tarah se koi tashreeh nahi milti. Toh phir toh humein kainat ki takhleeq ke hawale se Quran Pak se mazeed rehnumai leni chahiye. Surah An'aam ki bilkul pehli aayat hai. Ke tamam taareefain us Allah ke liye hain ke jisne aasmanon aur zameen ko banaya aur andheron aur noor ko banaya. Its something very incredible, yeh bari ek hairat angez qism ki aayat hai kyu ke agar aap dekhein toh ismein ek se ziyada aasman bane aur andhere ka bhi banne ka zikr hai, ab yeh andhera kaise banta hai? Aam alfaz mein toh andhera roshni ke na hone ka naam hai, the absence of light is called the darkness. Aur phir aasmanon aur zameen banane ke liye Khalq ka lafz aur andheron aur noor banane ke liye Ja'al ka lafz aesa kyu? Aur shayad sab se ahem sawal ke yeh sab banane wali hasti Allah kon hai? Ok, ek ek kar ke in sab cheezon ko dekhte hain lekin sab se pehle andhere ka mua'mma. Ke 17th century mein ek German astronomer tha Heinrich Olbers. He raised a question, usne ek sawal khara kiya jisse aaj hum Olbers' paradox kehte hain, usne kaha ke agar toh yeh kainat la-mehdood hai aur yeh har taraf ek jaisi pheli hui bhi hai toh jab hum raat ko aasman mein dekhein toh technically hum jahan kahin bhi dekhein hamari nazar kisi na kisi ek sitare par hi rukni chahiye thi aur raat ka aasman is maujooda aasman se kahin ziyada roshan bhi hona chahiye tha lekin aisa nahi hai. Yun lagta hai ke jaise koi cheez in roshniyon ko dhanpe hue hai, chupaaye hue hai jaise raat ke andhere jaisi koi syah cheez. Aaj 300 saal ho gaye hain lekin Olbers ke is sawal ka koi tasalli bakhsh jawab saamne nahi aaya albattah mujhe iska jawab Surah Shams mein milta hua feel hota hai. Ke qasam hai raat ki ke jab isse dhanp le. Yeh toh bari advanced level ki kitab hai aur dil mein mazeed khwahish paida hoti hai ke takhleeq ke raaz janne ke liye is kitab ko mazeed explore kiya jaye. Aur agla marhala hai aasman ko samajhne ka kyu ke bil-akhir insan ka aasman se bara hi gehra, bara hi purana talluq hai. Hum sadiyon se aasman ki taraf dekhte chale aaye hain, yahan tak ke humne aasman ki taraf dekhne walon ke naam bhi rakh diye hain. Jisse aasman aur iske badal pasand hon isse humne Nepohile ka naam de diya. Jisse aasman ki garaj pasand ho isse humne Ceraunophile kehne lag gaye.