[0:00]ازيكم؟ لما بناكل كربوهيدرات سكريات يعني بنهضمها ونحولها لأبسط جزيئاتها. عندك مثلا المونوسكرايدز، السكريات الأحادية، زي الجلوكوز والجلاكتوز والفركتوز، والدي سكرايدز، السكريات الثنائية، زي اللاكتوز والمالتوز، وفي السكروز. في الطبيعي كل دول هيتحولوا لمونوسكرايدز، سكريات أحادية، وبعدين تمتص من الأمعاء للدم، يعني مش هيكملوا وينزلوا في البراز. طيب افرض مثلاً مثلاً مثلاً لقيتهم في البراز؟ أوبا دي بقى المشكلة. هنا هندور إيه اللي خلاهم ينزلوا البراز؟ هل العيان بياكل أكل كتير فيه سكريات؟ هل العيان عنده سوء امتصاص للسكريات؟ هل العيان عنده نقص إنزيمات مسؤولة عن هضم وامتصاص السكريات؟ طيب أنا إزاي أكشف عنهم في البراز؟ قال لك سهلة قوي، السكريات دي فيها ميزة حلوة قوي. إنها بتمتلك مجموعة حرة من الفري ألدهايد أو الكيتون جروب، واللي بتمكنها إنها تختزن مواد كيميائية. يعني ده جلوكوز، ودي مادة كيميائية، الجلوكوز عليه مثلاً ألدهايد جروب، يقدر يختزل المادة دي. كده الجلوكوز يعتبر ريديوسنج ايجنت المخترع، والمادة الكيميائية دي تعتبر ريديوسد المختزلة. ده مختزل ده مختزل، حصل عملية ريداكشن اختزال فاهمني؟ طيب سؤال حلو، دي كل السكريات اللي ذكرتها، مين فيهم عنده القدرة على الاختزال؟ أو بشكل آخر مين فيهم أقدر أكتشف وجوده في البراز؟ هم دول، التحليل يقدر يكشف عن دول. وما بيكشفش عن السكروز لأنه مش بيعرف يختزل، حلو كده؟ يلا بينا بقى ندخل على الحلقة.
[2:04]reducing sugars in stool أو reducing substances in stool، السكريات المختزلة في البراز. هادور في البراز عليهم، لأن لو لقيتهم ده معناه إن العيان أو الطفل للأسف جسمه ما هضمش السكريات كويس ونزلت في البراز. يعني في مشكلة في الامتصاص أو الهضم، والأسباب ببساطة كالاتي: أولا اللاكتوز إنتولرنس. عدم تحمل اللاكتوز، عيان أو طفل عنده نقص إنزيم اللاكتاز، فاللاكتوز مش هيتكسر، فينزل البراز. والملابزربشن سندروم زي أمراض الأمعاء، والجاستروانترايتس، الالتهابات المعوية خصوصا في الأطفال، وممكن نقص إنزيمات من الولادة. خليك ذكي بقى هتلاقي الطفل غالبا عنده إسهال مزمن، انتفاخ، غازات. ملحوظة بقى غالبا بس مش دايماً بتلاقي البراز حمضي. قلت لك الحلقة اللي فاتت وصول السكريات للقولون يعني البكتيريا هتخمر السكريات دي. وعملية التخمر دي هينتج عنها أحماض تخلي البراز حمضي، وهينتج عنها برضه غازات. عايزك فاهم لو لقيت عيان البراز الـ pH بتاعته حمضي مع سكريات مختزلة إيجابي، غالبًا ده عنده فعلاً مشكلة من اللي قولناهم. سواء لاكتوز إنتولرنس، مشاكل هضم أو امتصاص سكريات بشكل عام. طيب هل ممكن يكون سكريات مختزلة إيجابي يعني عنده سوء هضم وامتصاص سكريات والـ pH قلوي؟ آه عادي هو نادر بس وارد، ما هو في عامل آخر قلت لك عليه قبل كده وهو تعفن البروتينات اللي بينتج قلويات. فما ينفعش تربط بينهم، لكن الاتنين لو مع بعض في نفس السياق بيقوي تشخيص سوء هضم وامتصاص السكريات. نيجي للعملي، هو الدكتور هيطلبه بالأسماء دي كلها. أشهر اختبار وكلنا عارفينه وهو اختبار بندكت، تعالى اقول لك شروطه، أولا العينة لازم تكون طازة، فريش. لأن البكتيريا ممكن تستهلك السكريات مع الوقت، اشتغلها خلال من نص ساعة لساعة، أو تتحفظ في الثلاجة لو في تأخير بسيط. ويا سلام لو العينة سايلة أو شبه سايلة، لأن التحليل مهم في حالات الإسهال. وأرجوك ارفض العينات القديمة أو الجافة مش هتنفع، وبلاش أدوية ممكن تأثر على النتيجة زي فيتامين سي، ممكن يديك فولس بوزيتيف وبعض المضادات الحيوية. جهزنا عينة البراز خلاص، نجهز المحلول هو محلول جاهز اسمه محلول بندكت، المحلول ده عبارة عن إيه؟ بص يا صديقي، إحنا محتاجين مادة تختزل، آه في كبريتات النحاس، ومحتاجين مادة تحافظ على كبريتات النحاس دي لا تترسب مننا ولا حاجة. آه في سترات الصوديوم، حلو، والتفاعل محتاج وسط قلوي، فحطينا كربونات الصوديوم. فمحلول بندكت مكون من التلاتة دول، هو بيتشرا جاهز عامة. وهو اصلا لونه أزرق، فلو تم اختزاله هيتحول لألوان تانية. تعالى بقى للخطوات، هنجيب جزء من البراز وندوبه في مثلا 4 ملي محلول ملح. كأنك بتحضر عينة براز بطريقة التركيز، غطى الأنبوبة كويس، ورجها علشان تتأكد إن البراز داب في المحلول. وسنطر الأنبوبة في السنترفيوج هيترسب تحت راسب وفوق رايق، هتاخد 2 ملي من الرايق اللي فوق. وحطه على 3 ملي محلول بندكت في أنبوبة إزاز، وقلبهم كويس كويس كويس، امزجهم مع بعض كويس. وبعد كده هنسخن بالراحة، إما على لهب أو في حمام مائي لمدة كافية. وبلاش تخليه يغلي لأن الغليان الشديد ممكن يبوظ التفاعل. وهنا هناخد النتيجة بعد التسخين مباشرة وحسب اللون وتحت إضاءة جيدة وهنقرر. والله لو مفيش سكريات مختزلة لمحلول بندكت، لكبريتات النحاس يعني، هيفضل اللون أزرق زي ما هو وهكتب نيجاتيف سلبي. طيب لو حصل اختزال بسيط، آه الأزرق هيبقى أخضر وهكتب تريس إيجابي بسيط. أما لو تحول للون الأصفر ده اختزال متوسط، هكتب بلس واحد. ولو اداني لون برتقالي آه ده اختزال كبير، هكتب بلس اتنين. أما لو اداني لون أحمر أحمر طوبي، لا لا لا لا لا ده اختزال عالي جدا هكتب بلس تلاتة. طيب نيجي للمميزات والعيوب، المميزات سهل وبسيط رخيص وسريع. أما العيوب، غير نوعي، أي مادة مختزلة أنا أكلتها مثلاً ومش سكريات ممكن تدي نتيجة موجبة. فممكن يديك فولس بوزيتيف مع فيتامين سي وبعض الأدوية، وطبعا مش بيدي رقم دقيق ده هو عبارة عن درجات ألوان. بس خلاص يا سيدي أنا خلصت حلقة النهارده، لو عجبك المحتوى اضغط لايك واكتب لنا كومنت برأيك وشارك المحتوى لغيرك علشان تفيده، واشترك في القناة لو مش مشترك، أيها السادة سلام.
