[0:00]Bismillahi Rahmani Raheem, Assalamualaikum. Kya Khuda ka wajood hai ya nahi? Ye ek aisa sawal hai, ke jise har daur ke insan ne poocha hai. Yahan tak ke hamare paas is waqt jo qadeem tareen kitabein hain, yani ke Sumerian tablets, un mein bhi ek Khuda ke mutaliq guftagu hai ke kya woh maujood hai ya nahi? Kuch log kehte hain ke Khuda hai aur kuch log kehte hain ke agar hai to phir woh nazar kyun nahi aata? Agar aap in qadeem tareen kitabon ko study karein ke jo hamein pichle 6,000 saal ki dastan sunati hain. To aap dekhenge ke is sawal ka jawab dene ke liye saat tarah ke log saamne aaye hain. Pehle woh ke jinhein Khuda par mukammal yaqeen hota tha. Woh kehte the ke hamein 100% yaqeen hai ke Khuda exist karta hai. Doosre woh ke jinhein mehsoos to hota tha ke Khuda hai, lekin in mein yaqeen ki bohut kami hoti thi. Teesre woh ke jo yaqeen bhi karna chahte the lekin unhein kisi saboot ki talash hoti thi. Chauthe woh ke jo is bare mein bilkul neutral the ke pata nahi Khuda hai ya nahi, hamein to bas apne rozmarrah ke masail ki fikr hai. Paanchwein woh ke jo kehte the ke main Khuda ko sirf tab manunga jab mujhe koi pakka saboot mile. Yaani ke woh log ke jo hamesha mojzon ki demand karte rahe hain. Chhathe woh ke jo taqreeban mulhid the ke shayad Khuda nahi hai. Woh kehte the ke agar Khuda hota to is duniya mein kabhi burai na hoti. Is jaisi baatein. Aur saathwein woh ke jo bilkul kattar mulhid ho gaye. Jin ki ek hi taan hoti thi ke Khuda nahi hai, Khuda nahi hai, Khuda nahi hai. Agar aap in logon ki nafsiat ko samjhein to aap dekhenge ke aasmani hidayat ke ilawa in logon ko ek cheez ki bohut zaroorat hoti hai. Kisi scientific daleel ki. Ye log kehte hain ke hamein logic ke saath jawab dein, scientific daleel dein ke Khuda maujood hai. Aur ye koi asaan baat nahi hai kyunke Islam ki rooh se to Rab, yani Allah ke bare mein Quran kehta hai, ke Laisa Kamithi Shay, yani us jaisi koi bhi shay nahi. To phir aap logic ya science ya physics ke zariye Allah ke wajood ko kaise sabit kar sakte hain? Lekin agar main aapko bataun ke haan, isi physics ke qawanin ke zariye hum Allah ki maujoodgi sabit kar sakte hain, to? Agar physics hi ke zariye main aapko physics ke banane wale Creator God ka wajood sabit kar dun to? Baaz auqat cheezein nazar na aane ke bawajood apni maujoodgi ka ehsaas dila rahi hoti hain. Maslan subah ke 4:30 baje Pakistan ke junoob mein ek bilkul maddham sa sitara nazar aata hai jiska naam hai Proxima Centauri. Is sitare ki ek khaas baat ye hai ke hamare sabse nazdeek ka sitara yahi hai. Lekin iski ek khaas baat aur bhi hai. Aur woh ye ke aaj se 12 saal pehle jab is sitare ko observe kiya gaya, to pata chala ke iski gardish bohut ajeeb tarah se hoti hai. Aise ke jaise koi an dekhi cheez ise apni taraf kheench rahi ho. Aur tamam calculations karne ke baad nateeja ye nikala gaya ke woh an dekhi cheez bilkul hamari zameen ki tarah ka koi siyara hoga ke jo ise kheench raha hai. Aapko pata hai ke chaar saal tak scientists is theory par yaqeen rakhe rahe ke agarche woh hamein nazar nahi aa raha, lekin koi siyara hai ke jo Proxima ko apni taraf kheench raha hai. Aur ye theory 2016 mein sach sabit ho gayi kyunke tab pehli martaba woh an dekha siyara dikhayi diya. Jiska aaj is waqt naam Proxima Centauri b hai. Ek aisa siyara ke jo taweel arse tak kisi ko nazar to nahi aa raha tha, lekin exist zaroor karta tha. Aur science ki is technique ka naam hai Predictive Modeling. Aur aaj science ki isi technique ko istemal karte hue main aapko saboot dunga ke Khuda exist karta hai. Lekin akhir science kis cheez ka naam hai? Science is kayinat ki study ka naam hai, jabke Al-Quran ye dawa karta hai ke is kayinat ko sambhalne wala bhi Allah hi hai. Is dawe ka zikr Surah Fatir mein hai ke Alhamdu lillahi fatirissamaawati wal ardh. Yaani tamam taareefein us Allah ke liye ke jo aasmanon aur zameen ka banane wala hai. Lekin aage chal kar isi Surah mein ek bohut hi zabardast aayat hai. Ke in aasmanon aur zameen ko thamne wala bhi Allah hi hai ke kahin woh apni jagah se tal na jaaye. Aur agar woh tal jaayein to phir siwaye Allah ke inhe koi aur tham bhi nahi sakta. Kon hai Allah ke jisne is kayinat ko na sirf banaya, balki woh ise sambhale hue bhi hai. Aur ab waqt aa gaya hai ke hum apna predictive model apply kar ke dekhein ke kya Allah waqayi exist karta hai? Aapko ek maze ki baat bataun ke hamari ye kayinat aur iska poore ka poora wajood sirf aur sirf 57 numbers ke upar qayim hai. Aise numbers ke jo hamesha ek jaise rehte hain.
[6:05]Ye numbers kabhi badalte nahi aur in 57 numbers ko physical constants kehte hain. Ye numbers badi se badi cheez mein bhi dekhe gaye hain. Maslan roshni ki raftaar ke jo is poori kayinat mein hamesha ek jaisi speed par safar karti hai. Yaani 2,99,792,458 meter/sec. Ye number is poori kayinat mein hamesha ek jaisa rehta hai. Ya phir Kashish-e-Saqal ki jiski taqat is number par rehti hai. Yahan tak ke is kayinat ke har waqt badhne ki speed bhi ke jo 73 kilometer/sec/megaparsec hai. Ye speed kabhi nahi badalti. Ya phir is kayinat ki taqatwar tareen forces mein se ek force, yani electromagnetic force ke jo hamesha hamesha is number par qayim rehti hai. Maine aapko bataya na ke ye numbers badi se badi cheezon se lekar chhoti se chhoti cheezon tak mein dekhe gaye hain. Maslan atom se bhi chhota ek zarra electron ke jiska wazan hamesha hamesha is number par qayim rehta hai. Ya phir electron jaise chhote chhote doosre zarrat, yani protons jinka wazan hamesha hamesha is number par qayim rehta hai. Ye aur in jaise 57 numbers is kayinat mein hamesha ek jaise rehte hain. Ab dilchasp baat ye hai ke ye numbers itne accurate aur ek doosre ke saath itne balance mein hain ke agar in mein baal barabar bhi farq aa jaye aur mera matlab waqayi baal barabar hi hai to na to ye kayinat hoti aur na hi hum. Misaal ke tor par agar kashish-e-saqal, yani gravity, thodi si bhi kam ya thodi si bhi zyada hoti, to sitare ya to bohut garam hote ya bilkul thande pad jate. Lekin isse farq kya padta hai? Shayad aap soch rahe honge ke agar sitare na hote to kya ho jata? Zyada se zyada raat ka aasman zyada dark ho jata to isse mujhe kya farq padta, right? Aap bohut galat hain kyunke agar sitare na hote to hum bhi na hote. Kyunke jin elements ya anasir se mil kar hum bane hain, woh kisi zamane mein sitaron hi ke andar paida hue the. Aur woh sitara agar zyada garam ya zyada thanda hota to kabhi is ke andar koi element ya ansar paida hi na hota. Lekin ye ansar hota kya hai? Apne gird gird nazar daudaiye. Har woh cheez jo aapko nazar aa rahi hai, bashamool aapke apne jism ke, ye sab kuch madde ya matter se bana hua hai. Isi liye to hum ise maddi duniya ya phir material world kehte hain. Aur ye tamam ka tamam madda sirf aur sirf 118 anasir se mil kar bana hai ke jin mein se aksar ke naam aapne bhi sun rakhhe honge. Maslan aapka jism, ye sirf chhe anasir se mil kar bana hai, oxygen, carbon, nitrogen, calcium, phosphorus aur hydrogen. Zara sochein ke ye chhe cheezein ya ye sare ka sara madda aaya kahan se tha? Sitaron mein se. Aur woh kaise? Aapko pata hai ke is kayinat ki paidayish ke baad sirf aur sirf 20 minutes ke andar hydrogen paida ho gayi thi. Kyunke protons ka size bilkul perfect tha. Ab chunke hydrogen ban gayi to phir isse sitare bane. Phir in sitaron ke banne ke baad in ke andar nucleosynthesis hua aur phir is ke baad sitaron ke andar oxygen, carbon, nitrogen aur sab kuch bana. Ab zara imagine karein ke agar sitare na hote to na hi oxygen hoti aur na hi carbon. Aur agar ye dono cheezein na hoti to na main hota aur na aap hote. Chalein yahan main aapko ek aur badi mazedar baat batata hun. Maan liya ke protons ka science perfect hona ye ek ittifaq ho sakta tha. Lekin is kayinat ki chaar badi taqaton mein se ek taqat, electromagnetic force, agar is number se zara si bhi kam ya zara si bhi zyada hoti, to kabhi hydrogen atoms mil kar ek molecule tak na bana pate. Aur agar molecules na bante, to ye kayinat siwaye ek bade se badal ke aur kuch bhi na hoti. Ye 57 numbers bilkul perfect aur ek doosre ke saath perfect balance mein hain. Aur maze ki baat ke ye apni apni jagah se talte bhi nahi. Yun lagta hai ke is poori kayinat ko sirf aur sirf ek maqsad ke liye design kiya gaya tha, zindagi ki paidayish ke liye. Ye sari baat karne ke baad predictive modeling technique ke zariye hamare paas do hi possibilities bachti hain. Pehli ye ke ya to besharmo ki tarah keh diya jaaye ke ye sab kuch sirf aur sirf ek ittifaq tha. Ya phir maan liya jaaye ke koi an dekha hai ke jisne in 57 numbers ko Proxima Centauri ki tarah bandh kar rakhha hua hai. Fatirissamaawati wal ardh ke jo is kayinat ko thame hue hain taki ye apni jagah se tal na jaaye. Koi hai jisne in 57 numbers ko na kabhi kam hone diya aur na kabhi zyada. Kyunke agar ye numbers kam ya zyada ho jaayein, agar ye numbers tal jaayein to phir siwaye us an dekhe Rab ke inhe koi aur tham bhi nahi sakega. Woh Allah Rabbul Izzat ke jo nazar to nahi aa raha lekin har taraf iski existence mehsoos ho rahi hai. Fatirissamaawati wal ardh, Allah Rab Zuljalal Wal Ikram.
